Ўзбекистон Республикаси Меҳнат кодекси, Ўзбекистон Республикасининг «Касаба уюшмалари тўғрисида»ги Қонуни, Ўзбекистон Республикаси Президентининг 2006 йил 18 декабрдаги ПҚ-532-сонли «Ўзбекистон Республикасининг 2007 йилги асосий макроиқтисодий кўрсаткичлари прогнози ва давлат бюджети параметрлари тўғрисида»ги қарорига мувофиқ Ўзбекистон Республикаси Молия вазирлиги, Меҳнат ва аҳолини ижтимоий муҳофаза қилиш вазирлиги, Давлат солиқ қўмитаси ва Марказий банк Бошқаруви қарор қиладилар:

1. Касаба уюшмалари органларининг ходимлар ва уларнинг оила аъзоларини соғломлаштириш учун йўналтирилган маблағларни сарфлаш тартиби тўғрисидаги низом иловага мувофиқ тасдиқлансин.

2. Ушбу қарор Ўзбекистон Республикаси Адлия вазирлигида давлат рўйхатига олинган кундан ўн кундан сўнг амалга киритилсин.

Мазкур Низом касаба уюшмалари органларининг ходимлар ва уларнинг оила аъзоларини соғломлаштириш учун йўналтирилган маблағларини сарфлаш тартибини белгилайди.

1. Ўзбекистон касаба уюшмалари Федерациясининг ижтимоий суғурта бюджети қуйидаги манбалар ҳисобига шакллантирилади:

Ўзбекистон Республикасининг қонунчилик ҳужжатлари билан белгиланадиган, Ўзбекистон касаба уюшмалари Федерациясига ходимлар ва уларнинг оила аъзоларини соғломлаштириш учун ижтимоий солиқдан йўналтирилган ажратмалар ҳисобига;

белгиланган тартибда ходимларга даволаниш ва дам олиш учун берилган йўлланмалар учун улардан олинган маблағлар ҳисобига;

қонунчилик ҳужжатлари билан тақиқланмаган бошқа маблағлар ҳисобига.

2. Касаба уюшмалари органларининг ижтимоий суғурта маблағлари Ўзбекистон Республикаси банкларида депозит ва транзит ҳисобварақларида сақланади.

Банкларда депозит ва транзит ҳисобварақларини очиш Банк ҳисобварақларини очиш, юритиш ва ёпиш тартиби тўғрисидаги йўриқномага (рўйхат рақами 3420, 2023 йил 8 февраль) мувофиқ амалга оширилади.

3. Касаба уюшмалари органлари Қорақалпоғистон, вилоятлар, Тошкент шаҳар кенгашларига (кейинги ўринларда — ҳудудий кенгашлар деб юритилади) банкларда қуйидаги банк ҳисобварақлари очилади:

202112 «Нодавлат нотижорат ташкилотларининг талаб қилиб олингунча сақланадиган депозитлари» баланс ҳисобварағида ижтимоий суғурта маблағларини, шу жумладан ижтимоий суғурта маблағлари ҳисобига олинган йўлланмаларни сотиб олишдан тушган маблағларни ҳисобга олиш учун ижтимоий суғурта бўйича транзит ҳисобварақлар очилади, уларнинг 30 фоизи белгиланган тартибда тақсимлангунга қадар — Ўзбекистон касаба уюшмалари Федерациясига, 70 фоизи ҳудудий кенгашларга йўналтирилади;

худди шу 20212 баланс ҳисобварағида тасдиқланган бюджетга мувофиқ ходимлар ва уларнинг оила аъзоларини соғломлаштириш учун ҳудудий кенгашлар ихтиёрига 70 фоиз миқдордаги ижтимоий суғурта маблағларини тақсимлашдан транзит ҳисобварақларидан келиб тушган маблағларни ҳисобга олиш учун жорий ҳисобварақлари очилади.

5. Ўзбекистон касаба уюшмалари Федерациясининг маблағлари тегишли касаба уюшмалари органларининг қарорлари билан тасдиқланадиган бюджет ва сметаларида белгиланган мақсадларга мувофиқ ходимлар ва уларнинг оила аъзоларини соғломлаштириш учун сарфланади. Улар:

санаторий-курортларда даволаниш, пансионат ва дам олиш уйларига йўлланмалар олишга;

корхоналар ва ўқув муассасаларидаги санаторий-профилакторийларда, санаторий-профилакторийларнинг ижтимоий суғурта учун тасдиқланган сметасига мувофиқ, ходимлар ёки талабаларни соғломлаштириш харажатларини қисман қоплашга (ходимларнинг меҳнатига ҳақ тўлашга, даволанувчиларнинг овқатланиши, даволаниши, уларга маданий хизмат кўрсатишга);

ташкилий-ҳуқуқий шаклидан қатъи назар Ўзбекистон Республикаси ҳудудида фаолият юритаётган болалар соғломлаштириш оромгоҳлари йўлланмалари нархининг бир қисмини қоплаш учун ижтимоий солиқ тушумидан ажратмани ҳисобга олган ҳолда оромгоҳларга ёки касаба уюшмалари ташкилотлари орқали унинг аъзоларига базавий ҳисоблаш миқдорининг камида 50 фоизи миқдорида компенсация беришга;

касаба уюшмалари ҳузуридаги болалар ва ўсмирлар спорт мактаблари (кейинги ўринларда — БЎСМ деб юритилади) ходимларининг меҳнатига ҳақ тўлаш, спорт анжомларини харид қилиш, ўқув-спорт тадбирларини ўтказиш учун маблағ ажратишга;

ўз спорт базалари бўлмаган тақдирда, ҳудудий кенгашлар томонидан тасдиқланган БЎСМнинг сметасига мувофиқ, истисно тариқасида, биноларни ижарага олишга;

ижтимоий суғурта бўйича ташкилий-маъмурий харажатларни молиялаштиришга, кадрларни тайёрлаш, ўқитиш, соғломлаштириш тадбирларида иштирок этувчи шифокорлар ва бошқа кадрларнинг таъминотига;

Ўзбекистон касаба уюшмалари Федерациясининг тасдиқланган сметаси, қурилиш ва реконструкция қилинадиган объектларнинг манзилли рўйхатига мувофиқ касаба уюшмалари соғломлаштириш муассасалари ва БЎСМ спорт иншоотларини реконструкция қилинишига;

Ўзбекистон касаба уюшмалари Федерацияси тизимидаги спорт мажмуалари абонементларини сотиб олишга;

Ўзбекистон касаба уюшмалари Федерацияси Ижроия қўмитаси томонидан тасдиқланган ижтимоий суғурта бюджети ёки сметаси доирасидаги ижтимоий суғурта маблағлари ҳисобига амалга ошириладиган ходимлар ва уларнинг оила аъзоларини соғломлаштириш билан боғлиқ бошқа тадбирларга сарфланади.

6. Ижтимоий суғурта бўйича харажатларни тўлаш кредит тақсимловчилари томонидан имзоланган тўлов ҳужжатлари билан маблағларни ўтказиш йўли билан, қуйидаги қоидаларга риоя қилган ҳолда амалга оширилади:

а) ижтимоий суғурта маблағлари ҳисобига олинган санаторийлар, пансионат ва дам олиш уйларига йўлланмаларининг тўловлари йўлланмалар олинган тегишли ташкилотларнинг тузилган шартномалари ва юк хатлари, ҳисоб-фактураларига асосан амалга оширилади. Шартнома тузилмасдан йўлланмаларни олиш учун маблағларни ўтказишга йўл қўйилмайди;

б) ходимларни, талабаларни санаторий-профилакторийларда соғломлаштиришга мўлжалланган маблағлар мазкур санаторий-профилакторийларининг жорий ҳисобварақларига тасдиқланган сметаларга мувофиқ ўтказилади;

в) болаларни соғломлаштириш оромгоҳларига ёки касаба уюшмалари ташкилотлари орқали унинг аъзоларига базавий ҳисоблаш миқдорининг камида 50 фоизи миқдорида компенсация маблағлари соғломлаштириш оромгоҳларининг жорий ҳисобварақларига ёки ихтиёрида болаларни соғломлаштириш оромгоҳлари бўлган бирлашган касаба уюшмалари қўмиталарининг қарорларига мувофиқ мазкур касаба уюшмалари қўмиталарининг жорий ҳисобварақларига ўтказилиши мумкин;

д) тасдиқланган сметага мувофиқ ижтимоий суғурта маблағларидан БЎСМларни таъминлаш учун дотациялар, БЎСМларни молиялаштириш учун очилган ижтимоий суғурта бўйича жорий ҳисобварақларига ўтказилади;

е) ижтимоий суғурта аппарати ходимларини таъминлаш, кадрлар тайёрлаш учун мўлжалланган маблағлар тасдиқланган сметага мувофиқ ҳудудий кенгашларнинг тегишли жорий касаба уюшмалари бюджетлари ҳисобварақларига ўтказилади ва зарур ҳужжатларни илова қилган ҳолда тасдиқланган касаба уюшмаси бюджетига мувофиқ сарфланади;

ж) спорт мажмуалари абонементларини сотиб олиш учун маблағлар, тасдиқланган сметага мувофиқ Ўзбекистон касаба уюшмалари Федерацияси тизимидаги спорт мажмуаларининг жорий ҳисобварақларига ўтказилади.

7. Касаба уюшмалари органларига ижтимоий суғурта маблағларидан касаба уюшмаси эҳтиёжлари ёки ижтимоий суғурта билан боғлиқ бўлмаган бошқа мақсадларда фойдаланиш ёки уларни ўзлаштириш қатъиян тақиқланади.

9. Санаторий-профилакторийларни, болаларни соғломлаштириш оромгоҳларини таъминлаш, жиҳозлаш, таъмирлаш, уларда қўшимча иш ўринларини ташкил этиш, соғломлаштирилаётганларнинг Ўзбекистон касаба уюшмалари Федерацияси томонидан белгиланган нормалардан ортиқроқ овқатланишини молиялаштириш харажатлари мазкур санаторий-профилакторий, болаларни соғломлаштириш оромгоҳлари балансида бўлган корхоналар, ташкилотлар, ўқув муассасалари ҳисобидан, улар томонидан тасдиқланган сметаларга мувофиқ амалга оширилади.

10. Ҳудудий кенгашлар тегишли ҳудудий солиқ органларидан ижтимоий солиқнинг ҳисобланиши ва тўланиши ҳақидаги маълумотларни электрон тарзда олгандан сўнг, тегишли давр учун ижтимоий суғурта бюджетининг ижроси ҳақидаги йиғма молиявий ҳисоботни Ўзбекистон касаба уюшмалари Федерациясига тақдим этадилар.

11. Ўзбекистон касаба уюшмалари Федерацияси республика бўйича ижтимоий суғурта бюджети ижроси ҳақидаги йиғма молиявий ҳисоботни ҳар чоракда Ўзбекистон Республикаси Иқтисодиёт ва молия вазирлигига тақдим этади.

12. Мазкур Низом Ўзбекистон касаба уюшмалари Федерацияси Кенгаши билан келишилган.