O‘zbekiston Respublikasining Fuqarolik kodeksi, O‘zbekiston Respublikasining “Telekommunikatsiyalar to‘g‘risida”gi, “Axborotlashtirish to‘g‘risida”gi, “Radiochastota spektri to‘g‘risida”gi, “Faoliyatning ayrim turlarini litsenziyalash to‘g‘risida”gi, “Tadbirkorlik faoliyati erkinligining kafolatlari to‘g‘risida”gi, “Iste’molchilarning huquqlarini himoya qilish to‘g‘risida”gi, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi, “Shaxsga doir ma’lumotlar to‘g‘risida”gi qonunlariga muvofiq buyuraman:

1. Telekommunikatsiya xizmatlarini ko‘rsatish qoidalari 1-ilovaga muvofiq tasdiqlansin.

2. Ayrim idoraviy normativ-huquqiy hujjatlar 2-ilovaga muvofiq o‘z kuchini yo‘qotgan deb topilsin.

3. Mazkur buyruq rasmiy e’lon qilingan kundan e’tiboran uch oy o‘tgach kuchga kiradi.

Mazkur Qoidalar O‘zbekiston Respublikasining Fuqarolik kodeksi, “Telekommunikatsiyalar to‘g‘risida”gi, “Axborotlashtirish to‘g‘risida”gi, “Radiochastota spektri to‘g‘risida”gi, “Faoliyatning ayrim turlarini litsenziyalash to‘g‘risida”gi, “Tadbirkorlik faoliyati erkinligining kafolatlari to‘g‘risida”gi, “Iste’molchilarning huquqlarini himoya qilish to‘g‘risida”gi, “Xo‘jalik yurituvchi subyektlar faoliyatining shartnomaviy-huquqiy bazasi to‘g‘risida”gi va “Shaxsga doir ma’lumotlar to‘g‘risida”gi qonunlariga muvofiq telekommunikatsiya xizmatlarini ko‘rsatish qoidalarini belgilaydi.

1. Mazkur Qoidalar O‘zbekiston Respublikasi hududida telekommunikatsiya operatorlari, provayderlari, dilerlari va eshittiruvchilar bilan foydalanuvchilar o‘rtasida shartnoma (kelishuv) asosida taqdim etiladigan telefon aloqasi, taksofonlardan telefon aloqasi, qo‘riqlash signalizatsiyasi apparaturasini o‘rnatish va ularga texnik xizmat ko‘rsatish, axborot-ma’lumot, telegraf, ma’lumotlar uzatish tarmog‘i, Internet, jamoat foydalanish joylarida Internet tarmog‘idan simsiz foydalana olish, mobil aloqa, milliy va xalqaro rouming, tijorat asosidagi kabelli, efir, interaktiv, IPTV (IP-televideniye), OTT (Over the Top) va on-line televideniye xizmatlarini tashkil qilish, shuningdek, ulardan foydalanish, xizmatlarni ko‘rsatish tartibi, shartlari hamda subyektlarning javobgarligi, huquq va majburiyatlarini belgilaydi.

2. Mazkur Qoidalarning amal qilishi quyidagilarga tatbiq etilmaydi:

idoraviy telekommunikatsiya tarmoqlari tomonidan telekommunikatsiya xizmatlarini ko‘rsatishga, O‘zbekiston Respublikasi Mudofaa vazirligi, Ichki ishlar vazirligi, Davlat xavfsizlik xizmati, O‘zbekiston Respublikasi Prezidenti Davlat xavfsizlik xizmati va Milliy gvardiyaning ajratilgan aloqa tarmoqlarida, shuningdek, ichki ishlab chiqarish va texnologik vazifadagi aloqa tarmoqlarida telegraf xizmatlarini ko‘rsatishga, Global harakatdagi shaxsiy yo‘ldosh aloqa tarmoqlarida rouming xizmatlarini ko‘rsatishga;

dasturlarni cheklanmagan tomoshabinlarga bepul asosda erkin tomosha qilish uchun tarqatuvchi efir televideniye tarmoqlariga;

bir tashkilot, (muassasa yoki korxona), shu jumladan, ta’lim muassasasining binolari yoki hududlari bilan cheklangan kabel, efir televideniyesi tarmoqlariga;

abonentlarning umumiy soni o‘ntadan oshmaydigan kabel, efir televideniyesi tarmoqlariga;

alohida telekommunikatsiya tarmoqlariga taalluqli bo‘lgan hamda O‘zbekiston Respublikasida davlat boshqaruvi, mudofaa, xavfsizlik va huquq-tartibotni qo‘riqlash ehtiyojlari uchun foydalaniladigan televideniye va videokuzatuv tarmoqlariga;

jismoniy shaxslarning shaxsiy mulki bo‘lgan va individual qabul qilishni va efir teleradioeshittirish dasturlari (shaxsiy ehtiyojlari uchun) tarqatilishini ta’minlaydigan kabel, efir televideniyesi tarmoqlariga.

3. Mazkur Qoidalarda quyidagi asosiy tushunchalardan foydalaniladi:

abonent — telekommunikatsiyalar operatori yoki provayderi bilan tuzilgan shartnomaga asosan telekommunikatsiyalar xizmatlaridan bevosita foydalanuvchi jismoniy yoki yuridik shaxs;

abonent qurilmasi — abonent mulki bo‘lgan yoki unga vaqtincha egalik qilish va foydalanishga berilgan telekommunikatsiyalar tarmoqlari bilan o‘zaro bog‘lanadigan, telekommunikatsiyalar tarmoqlari orqali uzatiladigan yoki qabul qilinadigan signallarni hosil qilish, o‘zgartirish, qayta ishlash uchun mo‘ljallangan texnik vosita;

abonent liniyasi — telekommunikatsiya liniyasining operator yoki provayder telekommunikatsiya tarmog‘ining kirish nuqtasidan abonent rozetkasigacha yoki u mavjud bo‘lmaganda abonent qurilmasigacha bo‘lgan qismi;

abonent raqami — telekommunikatsiya xizmatlari ko‘rsatilishi uchun shartnomaning amal qilish davrida abonentga operator (provayder) tomonidan ajratiladigan raqam;

abonent raqamining ko‘chib o‘tishi — mobil aloqa xizmatlarini ko‘rsatish shartnomasi asosida donor tomonidan abonentga ajratilgan abonent raqamini boshqa mobil aloqa operatori (retsipiyent) bilan yangi shartnoma tuzishda saqlash va undan foydalanish uchun amalga oshiriladigan tashkiliy-texnik tadbirlar majmui;

abonent tarmog‘i — turar joy yoki jamoat binosi maydoni chegarasida xizmat ko‘rsatiladigan abonentning texnik vositalari, qurilmalari va kabel liniyalari majmui;

avtoinformator — chaqirayotgan abonentga oldindan yozib olingan nutqli xabar orqali axborot taqdim etuvchi mantiqiy qurilma;

avtomatik rouming — mobil aloqa tarmog‘ining abonentiga dastlabki arizasiz operatorlar o‘rtasida rouming to‘g‘risida shartnoma tuzilganligi sharti bilan boshqa mobil aloqa operatorining qamrov hududida kiruvchi va chiquvchi aloqaga ega bo‘lish imkonini beradigan rouming xizmati;

avtomatik telefon stansiyasi (bundan buyon matnda ATS deb yuritiladi) — telefon bog‘lanishlarning va uzilishlarning avtomatik ravishda o‘rnatilishini ta’minlovchi telefon stansiya;

avtomatik xizmat ko‘rsatish tizimi — telefon aloqasi xizmatlaridan foydalanuvchi tomonidan chaqirilayotgan abonent raqamini mustaqil terish yo‘li bilan operator-telefonist yordamisiz o‘rnatiladigan telefon bog‘lanish usuli;

ATS ta’sir zonasi — telefon stansiyasi yoki podstansiyadan kabel (havo) liniyalari yoki radio foydalana olish vositalari orqali telefonlashtirilishi mumkin bo‘lgan hudud;

autentifikatsiya — ma’lumotlar uzatish tarmog‘i xizmatlaridan foydalanuvchi tomonidan ko‘rsatilgan identifikatsiyalash ma’lumotlarining haqiqiyligini aniqlash;

axborot-ma’lumot xizmati — foydalanuvchilarga, ularning tashabbusiga ko‘ra, og‘zaki (tovushli), chat yoki vizual so‘rov shaklida ifodalangan axborotni (bir telefon bog‘lanish chegarasida) taqdim etuvchi xizmat;

birlamchi operator — birlamchi ravishda raqamlash resursi ajratilgan, bu resursdan abonentga abonent raqami birinchi marta ko‘chirilgan mobil aloqa operatori yoki provayder;

buyurtma xizmat ko‘rsatish tizimi — oldindan buyurtma bergan holda operator-telefonist yordamida aloqa o‘rnatilishi;

dilerning xizmat ko‘rsatish punkti — diler tomonidan tashkil qilinadigan va foydalaniladigan xizmat ko‘rsatish punkti;

domen nomi — axborot resursiga yoki axborot tizimiga berilgan, ularni Internet tarmog‘ida identifikatsiyalash uchun xizmat qiladigan noyob nom;

domen nomlari tizimi — Internet tarmog‘ida domen nomlarini berish, ro‘yxatdan o‘tkazish va ulardan foydalanish tartibi;

O‘zbekiston Respublikasida jismoniy shaxsning shaxsiy identifikatsiya raqami (bundan buyon matnda JSHSHIR deb yuritiladi) — JSHSHIRni aniqlash tartibiga muvofiq jismoniy shaxsning pasporti bo‘yicha aniqlash mumkin bo‘lgan va 14 raqamdan iborat shaxsiy identifikatsiya raqami;

darhol xizmat ko‘rsatish tizimi — abonentdan buyurtmani qabul qilgandan keyin operator-telefonist yordamida zudlik bilan telefon bog‘lanishning o‘rnatilishi;

identifikatsiyalash — mavjud ma’lumotlar asosida ma’lumotlar uzatish tarmog‘i xizmatlaridan foydalanuvchining shaxsini aniqlash;

yirik avariya — ma’lum bir administrativ hududda telekommunikatsiya xizmatlarini taqdim etishning to‘xtalishiga olib keladigan avariya holati;

Internet tarmog‘i — yagona adres va nomlar makonidan foydalaniladigan, shlyuzlar yordamida birlashtirilgan, yagona TSR/IP protokoliga muvofiq ishlaydigan ko‘plab tarmoqlardan iborat global xalqaro tarmoq;

Internet xizmatlaridan foydalanuvchi — Internet xizmatlarining iste’molchisi hisoblangan yuridik yoki jismoniy shaxs;

Internetdan jamoat bo‘lib foydalanish punkti — kerakli texnik vositalar bilan jihozlangan, foydalanuvchilarning Internet tarmog‘idan jamoa bo‘lib foydalanish xizmatlari ko‘rsatiladigan joy;

Internet-provayder — tijorat asosida Internet tarmog‘idan foydalana olish xizmatlarini ko‘rsatuvchi yuridik shaxs;

kabelli, efir, interaktiv, IPTV (IP-televideniye), OTT (Over the Top) va on-line televideniye televideniyesi (bundan buyon matna eshittiruvchi deb yuritiladi) — erkin tomosha qilish mumkin bo‘lmagan kabelli televideniye kanallaridan foydalangan holda teledasturlar va boshqa telekommunikatsiya xabarlarini muayyan hududda ishlab chiqarish, shakllantirish va tarqatishni ta’minlaydigan taqsimlash va tashkiliy-boshqaruv jarayoni bilan shug‘ullanadigan subyekt;

konferens-aloqa — uchta va undan ortiq abonentga bir vaqtda telefon orqali muloqot qilish imkonini beruvchi xizmat;

ko‘chib o‘tgan raqamlar markazlashtirilgan bazasi — mobil aloqa tarmoqlarida ko‘chib o‘tgan abonent raqamlari ma’lumotlar bazasini boshqarish uchun apparat-dasturiy komplek;

ko‘chirilgan raqamlar markazlashtirilgan bazasi (bundan buyon matnda KRMB deb yuritiladi) — mobil aloqa tarmoqlarida ko‘chirilgan abonent raqamlari to‘g‘risidagi axborotni, shu jumladan, ushbu nizomda belgilanadigan ma’lumotlarni o‘z ichiga olgan ma’lumotlar bazasini boshqaruvchi apparat-dasturiy kompleks;

KRMB operatori — KRMB shakllantirilishi, ishlashi, texnik kuzatilishi va rivojlanishini ta’minlaydigan, uning resurslaridan foydalanishni taqdim etadigan tashkilot;

ko‘chirilgan raqamlarning lokal bazasi — chaqiruv yoki boshqa xabarlarni ko‘chirilgan raqamga to‘g‘ri marshrutlash uchun mobil aloqa operatori tomonidan undan real vaqtda foydalaniladigan, bu operatorda bo‘lgan ko‘chirilgan raqamlar markazlashtirilgan bazasining nusxasi;

ko‘chirilgan raqamlarning lokal bazasini KRMB bilan sinxronlash — muayyan davriylik bilan amalga oshiriladigan, ko‘chirilgan raqamlar markazlashtirilgan bazasidagi axborotning ko‘chirilgan raqamlar lokal bazasiga nusxasini ko‘chirish jarayoni;

qisqa matnli xabar (SMS) (bundan buyon matnda SMS deb yuritiladi) — qiska xabarlar markazi orqali mobil aloqa abonentlariga qiska matnli xabarlarni uzatish va qabul qilish uchun mo‘ljallangan xizmat;

litsenziya — yuridik shaxsga litsenziyalovchi organ tomonidan berilgan, litsenziya talablari va shartlariga so‘zsiz rioya etgan holda faoliyatning litsenziyalanayotgan turini amalga oshirish uchun ruxsatnoma (huquq);

litsenziyaning amal qilish zonasi — litsenziya shartnomasida ko‘rsatilgan va operator (provayder) telekommunikatsiya xizmatlarini ko‘rsatish huquqiga ega bo‘lgan hudud;

marshrut raqami (routing number, RN) — mobil telekommunikatsiya tarmog‘ining ko‘chirilgan abonent raqamiga chaqiruvlarni amalga oshirish uchun telekommunikatsiya tarmoqlarida foydalaniladigan manzilli axborot;

mahalliy operator — O‘zbekiston Respublikasi hududida jismoniy va yuridik shaxslarga mobil aloqa xizmatlarini ko‘rsatuvchi aloqa operatori (provayderi);

mahalliy telefon aloqasi — bitta aholi punkti yoki ma’muriy hudud doirasida joylashgan foydalanuvchilar o‘rtasidagi telefon bog‘lanishi;

ma’lumot xizmati — foydalanuvchiga telekommunikatsiya xizmatlari operatori yoki provayderi tomonidan ko‘rsatiladigan telekommunikatsiya xizmatlari to‘g‘risidagi axborotni taqdim etuvchi xizmat;

ma’lumotlar uzatish — ma’lumotlarni keyingi qayta ishlash uchun telekommunikatsiyalar vositalari yordamida signallar ko‘rinishida bir punktdan boshqa punktga ko‘chirish;

ma’lumotlar uzatish tarmog‘i — ma’lumotlar uzatilishini ta’minlash maqsadida ma’lum nuqtalar o‘rtasida telekommunikatsiyalarni tashkil etish uchun tuzilgan telekommunikatsiyalar uzellari va kanallarining majmui;

ma’lumotlar uzatish tarmog‘i xizmatlari — operatorning (provayderning) ma’lumotlar uzatish tarmog‘i orqali signallar va axborotning boshqa turlarini qabul qilish, uzatish va qayta ishlash bo‘yicha faoliyati mahsuli;

ma’lumotlar uzatish tarmog‘i xizmatlaridan foydalanuvchi — ma’lumotlar uzatish tarmog‘i xizmatlarining iste’molchisi hisoblangan yuridik yoki jismoniy shaxs;

“mexanik” rouming — rouming xizmatini ko‘rsatish, bunda Roumer-abonent rouming davrida xizmat ko‘rsatuvchi operatordan boshqa abonent raqamini oladi va mahalliy operatorga tegishli bo‘lgan o‘zining uyali raqami bo‘yicha kiruvchi chaqiruvlarni qabul qilish imkoniga ega bo‘lmaydi;

mobil aloqa operatorlari o‘rtasida rouming to‘g‘risidagi shartnoma — rouming xizmatini ishlab chiqarish va undan potensial mobil aloqa abonenti tomonidan foydalanish to‘g‘risida kelishayotgan tomonlarning majburiyatlari va huquqlari to‘g‘risida, tomonlarning o‘zaro javobgarlik choralari to‘g‘risidagi yuridik hujjat;

mobil aloqa tarmog‘i — abonentlarga mobil aloqa (ovoz, ma’lumotlar uzatish va boshqalar) xizmatlarini ko‘rsatuvchi texnik vositalar (kommutatsion va radiouskuna, abonent qurilmalari, ulovchi liniyalar, inshootlar va h.k.) majmui. Mobil aloqa tarmoqlariga uyali, trank, lokal-trank, radial-zona tarmoqlari kiradi;

mobil aloqa tarmog‘i operatori (provayderi)ning dileri (bundan buyon matnda diler deb yuritiladi) — operator (provayder) nomidan abonentlarga xizmat ko‘rsatish uchun operator (provayder) bilan shartnoma tuzgan yuridik shaxs (bundan buyon matnda dilerlik shartnomasi deb yuritiladi). Diler bir yoki bir nechta operatorlarning (provayderlarning) manfaatlarini ifodalashi mumkin;

mualliflik shartnomasi — muallifning mulkiy huquqlarini boshqa shaxsga o‘tkazish to‘g‘risida muallif yoki uning vorisi tomonidan tuziladigan shartnoma;

operator (provayderning) ishlash zonasi — telekommunikatsiya operatori (provayderi) telekommunikatsiya xizmatlarini ko‘rsatadigan hudud;

operator (provayder)-donor (bundan buyon matnda donor deb yuritiladi) — telekommunikatsiyalar tarmog‘idan abonent raqami ko‘chiriladigan mobil aloqa operatori (provayderi);

operatorning (provayderning) xizmat ko‘rsatish punkti — operator (provayder) tomonidan tashkil qilinadigan va foydalaniladigan xizmat ko‘rsatish punkti;

operator (provayder)-retsipiyent (bundan buyon matnda retsipiyent deb yuritiladi) — telekommunikatsiyalar tarmog‘iga abonent raqami ko‘chiriladigan mobil aloqa operatori (provayderi);

“plastik” rouming — “mexanik” roumingning bir turi bo‘lib, bunda abonent mahalliy operator bilan oldindan xizmat ko‘rsatuvchi operator hududiga borishi to‘g‘risida kelishib oladi va u orqali xizmat ko‘rsatuvchi operatorga tegishli bo‘lgan boshqa abonent raqamini oladi hamda mahalliy operatorga tegishli bo‘lgan o‘zining uyali aloqa raqamiga kiradigan chaqiruvlarni yangi raqamga qayta yo‘naltiradi (manzillaydi);

televideniye tarmog‘ida retranslyatsiya qilish — televideniye dasturlari, radiodasturlar signallari va telekommunikatsiyaning boshqa xabarlari qabul qilinishini, ularning qayta o‘zgartirilishi va dasturlar tarkibini o‘zgartirmasdan to‘liq hajmda abonentlarga uzatilishini ta’minlaydigan kabelli, efir, interaktiv, IPTV (IP-televideniye), OTT (Over the Top) va on-line televideniye tarmog‘ining asosiy ishlash rejimi;

televideniye tarmog‘ida translyatsiya qilish — televideniye dasturlari, radiodasturlar signallari va telekommunikatsiyaning boshqa xabarlari eshittirish tashkilotiga taalluqli studiya uskunasidan bevosita qabul qilinishini, ularning keyinchalik qayta o‘zgartirilishi va dasturlar tarkibini o‘zgartirmasdan to‘liq hajmda abonentlarga tarqatilishini (uzatilishini) ta’minlaydigan televideniye tarmog‘ining ishlash rejimi;

televideniye tarmoqlari — erkin tomosha qilish mumkin bo‘lmagan kabelli, efir, IPTV (IP-televideniye), OTT (Over the Top) va on-line televideniye kanallari orqali har qanday axborotni tarqatish va yetkazib berishni ta’minlaydigan telekommunikatsiya vositalarining majmui;

televideniye xizmatlari — eshittiruvchi (operator, provayder) bilan tuzilgan shartnoma asosida abonentlarga taqdim etiluvchi kabelli, efir, IPTV (IP-televideniye), OTT (Over the Top) va on-line televideniye xizmatlari;

roumer-abonent — xizmat ko‘rsatuvchi operatorning (provayderning) mobil aloqa xizmatlaridan foydalanuvchi mahalliy mobil aloqa operatorining abonenti;

roumer-tashrif buyuruvchi — mahalliy operator tarmog‘i xizmatlaridan foydalanuvchi operator — rouming-sherikning abonenti;

rouming — bitta mobil aloqa operatori abonentining bitta davlat doirasida (milliy rouming) yoki boshqa mamlakatda (xalqaro rouming) bo‘lgan boshqa mobil aloqa operatorining xizmat ko‘rsatish zonasida bo‘lganda boshqa mobil aloqa operatorining tarmog‘idan foydalana olishini ta’minlovchi xizmat;

rouming xizmatini ko‘rsatuvchi operator — rouming to‘g‘risidagi shartnoma asosida o‘z tarmog‘ining imkoniyatlaridan foydalanib boshqa mobil aloqa operatorining (provayderining) abonentlariga mobil aloqa xizmatlarini taqdim etuvchi mobil aloqa operatori (provayderi) (rouming-sherik/xizmat ko‘rsatuvchi operator (provayder));

taksofon — telefon aloqani o‘rnatish, foydalanuvchilarga so‘zlashuvlar va qo‘shimcha xizmatlarni taqdim etish uchun mo‘ljallangan, foydalanuvchilar bilan naqd pul va naqd pulsiz to‘lov vositalari (maxsus jeton, to‘lov kartasi) yordamida darhol hisob-kitob qilish qurilmasidan iborat bo‘lgan, shu jumladan, so‘zlashuv punktlarida o‘rnatiladigan oxirgi abonent telefon qurilmasi;

tarif rejasi — operator (provayder) tomonidan abonentlarga yoki abonentlarning ma’lum guruhiga yoki ma’lum cheklangan hududda bir yoki bir nechta xizmatlaridan foydalanishni taqdim etadigan narxlar va texnik ma’lumotlar majmui;

tarifikatsiya birligi — operator (provayder) tomonidan belgilangan tarifikatsiya tizimiga bog‘liq bo‘lgan ko‘rsatiladigan xizmatning to‘lanadigan birligi;

telekommunikatsiya operatori (bundan buyon matnda operator deb yuritiladi) — mulk huquqi yoki boshqa ashyoviy huquq asosida telekommunikatsiya (telefon aloqasi, ma’lumotlar uzatish, mobil aloqa, televideniye) tarmog‘iga ega bo‘lgan, uning qurilishi, ishlashi, rivojlanishini ta’minlovchi va litsenziyaga asosan tegishli telekommunikatsiya xizmatlarini ko‘rsatuvchi yuridik shaxs;

telekommunikatsiya xizmatlari — operatorning (provayderning) signallar hamda boshqa axborot turlarini telekommunikatsiya tarmoqlari orqali qabul qilish, uzatish, qayta ishlashga doir faoliyati mahsuli;

telekommunikatsiya xizmatlari provayderi (bundan buyon matnda provayder deb yuritiladi) — foydalanuvchilarga operatorlar tarmog‘i orqali tijorat asosida telekommunikatsiya xizmatlarini ko‘rsatuvchi yuridik shaxs;

telekommunikatsiyalar tarmog‘i — ovoz, ma’lumot, rasm, video va boshqa shakldagi signallarni uzatish va qabul qilishni ta’minlovchi telekommunikatsiya vositalarining majmui;

telematik xizmatlar — telekommunikatsiyalar tarmog‘i orqali axborot uzatilishini amalga oshiruvchi, ammo telefon aloqa, telegraf aloqa xizmati yoki ma’lumotlar uzatish xizmati hisoblanmaydigan telexizmatlar (faksimil, komfaks, xabarlarni qayta ishlash, videotekst va boshqalar);

telefon aloqasi xizmatlari — operatorning (provayderning) so‘zlashuvlar va qo‘shimcha xizmatlarni taqdim etishga doir faoliyati mahsuli;

telefon aloqasi xizmatlaridan foydalanuvchi — telefon aloqasi xizmatlarining iste’molchisi hisoblanadigan jismoniy yoki yuridik shaxs;

telefon bog‘lanish — ikkita telefon apparati yoki chetki qurilmalar o‘rtasida aloqaning o‘rnatilishi;

telefon tarmog‘i — aholi, muassasalar, tashkilotlar va korxonalarning telefon aloqasi xizmatlariga bo‘lgan ehtiyojini ta’minlovchi ATS, kommutatsiya uzellari, liniyalari, kanallari, oxirgi (terminal) uskunalarining jami;

texnik qarshi harakat qilish kompleksi — O‘zbekiston Respublikasi telekommunikatsiya tarmoqlarida xalqaro ovozli trafikni o‘tkazishda qonunchilik talablari buzilganligi holatlarini aniqlash va ular to‘g‘risida ma’lumotlarni olish jarayonlarini avtomatlashtirish hamda xalqaro ovozli trafikni o‘tkazish tartibining buzilishlariga qarshi harakat qilish tizimi;

tizim hosil qiluvchi rouming-sherik — o‘z ixtiyorida xalqaro avtomatik roumingni ta’minlovchi moddiy-texnik va dasturiy ta’minot kompleksi bo‘lgan, ma’lumotlar uzatish kanallari va signalizatsiya kanallari tarmog‘i mavjud bo‘lgan yuridik shaxs;

to‘lov kartasi — kodlangan ma’lumotni saqlaydigan, tarmoq foydalanuvchisini identifikatsiya qilish va chaqiruvni initsiatsiya qilish imkoniyatini beruvchi to‘lov vositasi;

universal xizmatlar — umumiy foydalanishdagi telekommunikatsiyalar tarmoqlari orqali barcha foydalanuvchilarga ko‘rsatiladigan belgilangan sifatdagi majburiy xizmatlar to‘plami (foydalanuvchilarning bu tarmoqdan foydalanishini ta’minlash, mahalliy, shaharlararo va xalqaro telefon so‘zlashuvlari, telegrammalar jo‘natish va boshqalar);

o‘zini-o‘zi obro‘sizlantirgan diler — ishi davomida qonunchilik hujjatlari, ushbu Qoidalar, dilerlik shartnomasi talablarining qo‘pol ravishda buzilishiga yo‘l qo‘ygan va ular asosida dilerlik shartnomasi bekor qilingan va diler sertifikati chaqirib olingan diler;

foydalanuvchi — telekommunikatsiyalar xizmatlarining iste’molchisi hisoblangan yuridik yoki jismoniy shaxs;

xalqaro telefon aloqasi — O‘zbekiston Respublikasi hududidagi telefon aloqasi xizmatlaridan foydalanuvchi va boshqa davlat hududidagi telefon aloqasi xizmatlaridan foydalanuvchi o‘rtasida telefon aloqasi orqali bog‘lanish;

xato ko‘chirish — abonent talabnomasisiz mobil aloqa operatorlari (provayderlari) tomonidan abonent raqamining ko‘chirilishi (“inson omili” keltirib chiqargan xato sababli, ya’ni texnik tizimlar bilan o‘zaro ishlaganda xodimlarning noto‘g‘ri xatti-harakatlari sababli abonentning talabnomasida ko‘rsatilgan raqamdan boshqa raqamning ko‘chirilishi);

xizmat ko‘rsatish zonasi — operator (provayder) litsenziya shartnomasi asosida telekommunikatsiya xizmatlarini ko‘rsatish huquqiga ega bo‘ladigan va normativ-huquqiy hujjatlar bilan o‘rnatilgan shartlarga javob beradigan xizmatlar sifatini ta’minlash uchun texnik imkoniyatlarga ega bo‘lgan hudud;

xizmat ko‘rsatish punkti — abonentlar axborot-ma’lumot xizmatlarini olishlari, mobil aloqa xizmatlarini ko‘rsatish shartnomalarini tuzishlari va xizmatlarning boshqa turlarini olishlari mumkin bo‘lgan statsionar savdo nuqtasi va (yoki) xizmat ko‘rsatish nuqtasi;

xizmatlarga abonent to‘lov tizimi — abonentning ma’lum (hisob-kitob qilinadigan) vaqt davri (oy, chorak, yil va b.) uchun to‘lovlari summasi haqiqatda olingan xizmatlar hajmiga bog‘liq bo‘lmagan doimiy miqdor hisoblanadigan xizmatlarga haq to‘lash tizimi;

xizmatlarga haq to‘lashning vaqtbay tizimi — ma’lum (hisob-kitob qilinadigan) vaqt davri uchun abonent to‘lovlari summasi axborotni uzatish va boshqa telefon aloqasi xizmatlarini olish uchun telefon tarmog‘i liniyalari va inshootlaridan foydalanilgan vaqtga bog‘liq bo‘lgan xizmatlarga haq to‘lash tizimi;

xosting xizmatlari — Internet tarmog‘ida doimiy bo‘ladigan serverda axborotni joylashtirish uchun texnik resurslarni taqdim etish xizmati;

barcha chaqiruvlar uchun so‘rov (All Call Query) (bundan buyon matnda All Call Query deb yuritiladi) — mobil telekommunikatsiya tarmog‘ining ko‘chirilgan abonent raqamlariga trafikni o‘tkazish uchun chaqiruvlarni to‘g‘ridan-to‘g‘ri marshrutlash metodi, bunda chaqiruv tashabbuskorining tarmog‘i ko‘chirilgan raqam to‘g‘risida axborot olish va chaqiruvni belgilangan joyiga keyinchalik marshrutlash uchun ko‘chirilgan raqamlarning operatsion ma’lumotlar bazasiga so‘rovni amalga oshiradi;

eSIM — abonent qurilmasining virtual identifikatsiya moduli, uning yordamida abonent qurilmasini identifikatsiya qilish, uning mobil aloqa tarmog‘idan foydalana olishi, shuningdek, abonent raqamidan ruxsatsiz foydalanishdan himoya qilish ta’minlanadi;

GSM-shlyuz — mobil aloqa tarmoqlari va telekommunikatsiyalarning boshqa tarmoqlari o‘rtasida trafikni o‘tkazish uchun mo‘ljallangan apparat-dasturiy vosita;

IMEI kodi (International Mobile Equipment Identifier) yoki xalqaro o‘ziga xos identifikatsiya kodi (bundan buyon matnda IMEI-kod deb yuritiladi) — 15 raqamdan iborat bo‘lgan va GSMA tomonidan ajratiladigan, shuningdek, tarmoqda GSM/UMTS/LTE standartlarida ishlovchi mobil aloqa abonent qurilmasini identifikatsiyalovchi raqam;

IP-adres — TCP/IP texnologiyalari bilan boshqariladigan ma’lumotlar uzatish tarmog‘ida kompyuterlar yoki uzellarni identifikatsiyalaydigan noyob adres;

IP-televideniye (IPTV) — televideniye, video, audio, matn, grafika va shu kabi boshqa ma’lumotlar, IP protokoli asosidagi tarmoqlar ta’minlanadigan, sifat, xavfsizlik, interaktivlik va ishonchlilikning talab qilinadigan darajasini ta’minlash maqsadida boshqariladigan multimedia xizmatlari;

IP-telefoniya — IP texnologiyasi asosida paketlar kommutatsiyalanadigan ma’lumotlar uzatish tarmoqlari orqali nutqli axborot, jumladan, mahalliy va xalqaro aloqani ayirboshlash xizmati;

IP-shlyuz — IP tarmoqlar va telekommunikatsiyalarning boshqa tarmoqlari o‘rtasida trafikni o‘tkazish uchun mo‘ljallangan apparat-dasturiy vosita;

MSISDN (Mobile Station Integrated Services Digital Network) — GSM/UMTS standartlarida aloqa uchun xizmatlari integratsiyalashgan raqamli tarmoq mobil abonentining raqami (masalan: +998 XX-XXX-XX-XX);

progressiv marshrutlash (Onward Routing) (bundan buyon matnda Onward Routing deb yuritiladi) — mobil telekommunikatsiyalar tarmog‘ining ko‘chirilgan abonent raqamlariga trafikni o‘tkazish uchun chaqiruvlarni to‘g‘ridan-to‘g‘ri bo‘lmagan marshrutlash metodi, bunda chaqiruv tashabbuskorining tarmog‘i donor tarmog‘iga so‘rovni amalga oshiradi, donor esa, o‘z navbatida, ko‘chirilgan raqam to‘g‘risida axborot olish va chaqiruvni belgilangan joyiga keyinchalik marshrutlash uchun ko‘chirilgan raqamlarning operatsion ma’lumotlar bazasiga so‘rovni amalga oshiradi;

SIM/RUIM-karta (bundan buyon matnda SIM karta deb yuritiladi) — ichiga mikrosxema o‘rnatilgan, olinuvchi identifikatsiya moduli, uning yordamida abonent qurilmasini identifikatsiya qilish, uning mobil aloqa tarmog‘idan foydalana olishi, shuningdek, abonent raqamidan ruxsatsiz foydalanishdan himoya qilish ta’minlanadi;

SMS-shlyuz — mobil telefondan foydalanmasdan SMS xabarlar jo‘natish va olish imkonini beradigan apparat-dasturiy vosita;

Wi-Fi xizmati tashkilotchisi — ma’lumotlar uzatish tarmog‘i xizmatlaridan foydalanish uchun Wi-Fi texnologiyasi bo‘yicha o‘zlarining chetki uskunalaridan, mijozlar yoki tashrif buyuruvchilar hisoblanadigan tor doiradagi foydalanuvchilarga uskunadan foydalanishni taqdim etadigan ma’lumotlar uzatish tarmog‘i operatori yoki ma’lumotlar uzatish tarmog‘i xizmatlari provayderi yoxud abonent – yuridik shaxs;

Wi-Fi xizmatlari — ma’lumotlar uzatish tarmog‘i xizmatlaridan foydalanish uchun Wi-Fi texnologiyasi bo‘yicha chetki uskunalarga foydalanuvchilarning cheklangan doirasiga uskunadan foydalanishni taqdim etish.

4. Telekommunikatsiya xizmatlari qonunchilik hujjatlari va ushbu Qoidalarga muvofiq operator yoki provayder hamda abonent o‘rtasida to‘g‘ridan-to‘g‘ri (yoxud jismoniy shaxslar uchun diler orqali) yozma yoki elektron shaklda tuziladigan ommaviy shartnoma asosida taqdim etiladi.

Operator (provayder) O‘zbekiston Respublikasi hududida telekommunikatsiya xizmatlarini taqdim etish bilan bog‘liq bo‘lgan ma’lumotlarni abonentlarga yoki iste’molchilarga davlat tilida, shuningdek, boshqa tillarda taqdim etilishini ta’minlaydi.

5. Tomonlarning shartnoma bo‘yicha huquqlari va majburiyatlari qonunchilik hujjatlarida va ushbu Qoidalarda belgilangan hollardagina boshqa shaxslarga berilishi mumkin.

6. Operatorlar va provayderlarning telekommunikatsiya xizmatlarini ko‘rsatish bilan bog‘liq faoliyati o‘rnatilgan tartibda olingan litsenziya asosida hamda operator (provayder) va litsenziya beruvchi organ o‘rtasida tuzilgan litsenziya shartnomasiga muvofiq amalga oshiriladi.

7. Favqulodda vaziyatlar (harbiy harakatlar, zilzilalar, suv toshqinlari, yong‘inlar, epidemiyalar va boshqalar)da telekommunikatsiyalar sohasidagi maxsus vakolatli organ telekommunikatsiya tarmoqlari va vositalaridan, Internetdan jamoat bo‘lib foydalanish punktlaridan ustuvor foydalanish hamda markazlashtirilgan boshqarish, shuningdek, ularning ishlashini cheklash yoki to‘xtatib qo‘yish huquqiga ega.

8. Eshittiruvchi, operator va provayderlar tomonidan favqulodda vaziyatlarda telekommunikatsiya tarmoqlari va vositalaridan foydalanish paytida ularga yetkazilgan zararlar qonunchilik hujjatlarida belgilangan tartibda qoplanadi.

9. Telekommunikatsiya xizmatlari qonunchilik hujjatlarida ko‘zda tutilgan imtiyozlar va afzalliklarni hisobga olib barcha abonentlar uchun xizmat ko‘rsatishning bir xil sharoitlarini ta’minlagan holda ko‘rsatiladi.

10. Telekommunikatsiya tarmog‘iga muvofiqlik sertifikatiga ega abonent qurilmalari (telefon apparatlari, raqamni avtomatik aniqlash funksiyalariga ega telefon apparatlari, ma’lumotlar uzatish va telematik xizmatlar uskunalari (telefaks, teleteks, videoteks va boshqalar), radiotelefon aloqa vositalari, avtojavobbergichlar, signalizatsiya qurilmalari) ulanadi.

11. Abonent qurilmasi abonentlar tomonidan o‘z hisoblaridan sotib olinishi va ularning mulki hisoblanishi yoki telekommunikatsiya operatori (provayderi, dileri, eshittiruvchi) tomonidan shartnoma shartlariga muvofiq berilishi mumkin, bunda abonent qurilmasi telekommunikatsiya operatori/provayderining mulki hisoblanadi va shartnomada belgilangan tartibda abonent ushbu qurilma uchun moddiy javobgar bo‘ladi.

12. Mobil aloqa tarmog‘i abonent qurilmasi IMEI-kodi qonunchilik hujjatlarida belgilangan tartibda ro‘yxatdan o‘tgan bo‘lishi kerak.

13. Operator (provayder) abonentlarning umumiy foydalanish tarmog‘idan uzluksiz foydalana olishini ta’minlashga majbur.

14. Foydalanuvchilar bilan bevosita o‘zaro ishlaydigan operatorning tarkibiy bo‘linmalari (operator, provayder, diler) tomonidan tashkil qilingan abonent bo‘limlari va rivojlanish sexlari, telefon stansiyalarining abonent uchastkalari, so‘zlashuv punktlari va jamoa bo‘lib foydalanish punktlari, ta’mirlash byurosi, ma’lumot xizmatlari, servis xizmatlari, telekommunikatsiya xizmatlariga haq to‘lash punktlari)ning ish rejimlari operator (provayder, diler) tomonidan belgilanadi.

15. Operator, provayder, diler va eshittiruvchilari tomonidan ma’lumot xizmatlari tashkil qilinishi kerak, bunda foydalanuvchilarga quyidagilar to‘g‘risida bepul ma’lumot beriladi:

a) telekommunikatsiyalar tarmog‘idan foydalana olish tartibi;

b) telekommunikatsiyalar tarmog‘idan foydalana olishni taqdim etish narxi;

v) telekommunikatsiya xizmatlarini ko‘rsatish shartnomasini tuzish;

g) operator (provayder) tomonidan ko‘rsatiladigan xizmatlar va ularning narxi;

d) mobil aloqa xizmatlariga tariflar va ularni almashtirish imkoniyatlari (mobil aloqa xizmatlari uchun);

e) bepul ko‘rsatiladigan axborot-ma’lumot xizmatlari;

j) telekommunikatsiya operatori (uning filiallari), provayderi, dileri joylashgan joyi va ish rejimi;

z) abonent shaxsiy hisob raqamining holati (hisobdagi pul mablag‘larining qoldig‘i, imtiyozli daqiqalar qoldig‘i, hisobot davridagi ma’lumotlar, to‘lash uchun hisobni taqdim etish);

i) operatorning mobil aloqa tarmog‘ining xizmat ko‘rsatish zonasi to‘g‘risida axborot (mobil aloqa xizmatlari uchun);

k) telekommunikatsiyalar sohasida foydalanuvchilar huquqlarini himoya qilishga mas’ul organning ishonch telefon raqamlari;

l) abonentdan texnik nosozliklar, SIM-karta yoki abonent qurilmasi yo‘qolganligi (SIM-kartadan foydalanish ko‘zda tutilmagan mobil aloqa standartlari uchun), abonentning shaxsiy ma’lumotlari o‘zgarganligi to‘g‘risidagi axborotni qabul qilish;

m) mobil aloqa tarmoqlarida abonent qurilmasidan foydalanish imkoniyati (mobil aloqa xizmatlari uchun);

n) mobil aloqa tarmoqlarining operatorlari to‘g‘risida — rouming xizmatlarini taqdim etish bo‘yicha sheriklar (mobil aloqa xizmatlari uchun);

o) qonunchilik hujjatlariga asosan boshqa zarur ma’lumotlar.

Bepul axborot-ma’lumot xizmatlarining ro‘yxati operator, provayder, diler va eshittiruvchilar tomonidan mustaqil ravishda kengaytirilishi mumkin.

16. Axborot-ma’lumot xabarlari bevosita operator-telefonist orqali yoki avtoinformator yordamida, veb-sayt, mobil ilova, ijtimoiy tarmoqlar orqali berilishi mumkin.

17. Operator va provayderlar telekommunikatsiya tarmoqlari orqali uzatiladigan telefon so‘zlashuvlari va boshqa xabarlar, shuningdek, ularga taalluqli bo‘lgan barcha ma’lumotlarning sir tutilishini ta’minlashi shart.

18. Telefon so‘zlashuvlarini eshitish, telekommunikatsiya tarmoqlari orqali uzatilayotgan xabarlar bilan tanishish, ular to‘g‘risidagi ma’lumotlar olishga, shuningdek, so‘zlashuvlar va xabarlar sirlariga doir boshqa cheklanishlarga faqat qonun bilan belgilangan hollarda va tartibda yo‘l qo‘yiladi.

19. Operator, provayder va dilerlar xizmat majburiyatlarini bajarishlari davomida ularga ma’lum bo‘lgan abonentlar to‘g‘risidagi ma’lumotlarni abonentning roziligisiz uchinchi shaxslarga berish yoki tarqatishga haqli emas, qonunchilik hujjatlarida nazarda tutilgan hollar bundan mustasno.

Abonent to‘g‘risidagi ma’lumotlarga quyidagilar kiradi:

a) abonent-jismoniy shaxsning familiyasi, ismi, otasining ismi, JSHSHIR;

b) abonent-yuridik shaxs xodimlarining shaxsiy ma’lumotlari, abonent manzili yoki oxirgi terminal uskuna o‘rnatiladigan manzili, abonentni va uning oxirgi terminal uskunasini aynan identifikatsiyalash imkonini beradigan taxallusi, abonent raqamlari va boshqa ma’lumotlar.

20. Operator va provayderlar tomonidan yaratilgan va abonentlar to‘g‘risidagi ma’lumotlarni o‘z ichiga olgan ma’lumotlar bazalari konfidensial tusdagi hujjatlar sifatida himoyalanishi kerak.

21. Abonentlar to‘g‘risidagi ma’lumotlardan bu abonentlarning roziligisiz axborot-ma’lumot xizmat ko‘rsatilishi uchun foydalanish mumkin emas.

22. Foydalanuvchilar axborot resurslaridan foydalana olish uchun teng huquqlarga ega bo‘lib, ular so‘rayotgan axborotni olish uchun bu resurslarning egalari oldida asoslashga majbur emaslar, bundan qonunchilik hujjatlariga muvofiq foydalanish cheklangan axborot mustasno.

23. O‘zbekiston Respublikasi hududida xabarlarni uzatish texnologik jarayonlarida yagona hisob-kitob va hisobot berish vaqti — mahalliy vaqt o‘rnatiladi.

24. Axborotni uzatish xalqaro texnologik jarayonlarida hisob-kitob va hisobot berish vaqti davlatlararo kelishuvlar va shartnomalarga muvofiq belgilanadi.

25. Telegraf xizmatlarini ko‘rsatayotganda iste’molchi va aloqa korxonasi o‘rtasidagi munosabatlar kvitansiya yoki nazorat-kassa mashinasining cheki bilan yoki shartnoma bilan hujjatlashtiriladi.

26. Taksofonlar ko‘chalarda, maydonlarda, bozorlarda, aloqa bo‘limlarida, aeroportlarda, vokzallarda, metro bekatlarida, avtobus bekatlarida, do‘konlarda, ta’lim muassasalarida, shahar jamoat transporti bekatlarida, tibbiyot va davolash muassasalarida, maxsus jihozlangan so‘zlashuv punktlarida, mahalliy davlat hokimiyati organlari va fuqarolarning o‘zini o‘zi boshqarish organlarining bino va inshootlarida hamda boshqa joylarda kelishuv asosida o‘rnatilishi mumkin. Taksofonlar alohida turuvchi hamda ixcham holatda joylashtirilgan bo‘lishi mumkin.

27. O‘rnatilgan taksofonlar texnik talablarga, standartlarga, sanitariya va gigiyena, yong‘inga qarshi norma va qoidalariga mos kelishi kerak.

28. Taksofonlar o‘rnatilgan joylarda quyidagilar bo‘lishi shart:

a) taksofondan foydalanish bo‘yicha yo‘riqnoma, taksofonlarni ekspluatatsiya qiluvchi operator yoki provayder to‘g‘risida axborot (nomi, manzili, telefon raqamlari);

b) taqdim etiladigan xizmatlar tarifi to‘g‘risida axborot;

v) ma’lumot ko‘rinishidagi axborot (favqulodda tezkor xizmatlar hamda taksofonlarni ta’mirlash xizmatining telefon raqamlari, yaqin atrofda joylashgan taksofonning manzili va boshqalar);

g) maxsus jetonlar va to‘lov kartalarini sotib olish joylari to‘g‘risidagi axborot.

29. Operator tomonidan taksofonlarga telefon raqamlari ajratilgan hollarda, shunday taksofonlardan kiruvchi chaqiruvlarni qabul qilib olish uchun foydalanish mumkin.

30. Internetdan jamoat bo‘lib foydalanish punktining ish rejimi jamoat foydalanish joyining internet-provayderi tomonidan belgilanadi.

31. Telekommunikatsiya xizmatlarini ko‘rsatishda operator, provayder, diler va eshittiruvchilarning o‘zaro munosabatlari qonunchilik hujjatlariga muvofiq ular o‘rtasida tuzilgan shartnomalar bilan tartibga solinadi.

32. Telekommunikatsiya tarmoqlarida radioelektron vositalar va yuqori chastotali qurilmalar uchun radiochastota spektridan foydalanish qonunchilik hujjatlarida belgilangan tartibda amalga oshiriladi.

33. Telekommunikatsiya tarmoqlarida foydalaniladigan va majburiy sertifikatlanishi kerak bo‘lgan telekommunikatsiyaning texnik vositalari muvofiqlik sertifikatlariga ega bo‘lishi kerak.

34. Telekommunikatsiya xizmatlariga tariflar qonunchilik hujjatlarida belgilangan tartibda belgilanadi.

35. Televideniye xizmatlari operator va provayderlari televideniye dasturlarining mazmunini tahrir qilish, o‘zgartirish va to‘ldirishga haqli emas.

36. Operator, provayder, diler va eshittiruvchilar telekommunikatsiya tarmoqlarida axborot xavfsizligini ta’minlashda:

axborot xavfsizligini ta’minlash sohasida qonunchilik hujjatlariga rioya qilishi;

odamlarning dengizdagi, yerdagi, havodagi, kosmik fazodagi xavfsizligiga, O‘zbekiston Respublikasida mudofaa, xavfsizlik va huquq-tartibotni saqlash sohasidagi kechiktirib bo‘lmaydigan tadbirlar o‘tkazishga doir barcha xabarlarga, shuningdek, yirik avariyalar, falokatlar, epidemiyalar va boshqa favqulodda holatlar to‘g‘risidagi xabarlarga mutlaq ustuvorlik berishi;

texnik vositalardan O‘zbekiston Respublikasining mavjud konstitutsiyaviy tuzumini, hududiy yaxlitligini zo‘rlik bilan o‘zgartirishga da’vat qilish, urush va zo‘ravonlikni, shafqatsizlikni, milliy, irqiy va diniy adovatni targ‘ib etish, davlat sirini yoki qonunchilik bilan qo‘riqlanadigan o‘zga sirni oshkor etish, jinoiy javobgarlikka sabab bo‘ladigan boshqa xatti-harakatlarni sodir qilish maqsadida foydalanilishiga yo‘l qo‘ymaslikka qaratilgan choralarni ko‘rishi kerak.

37. Eshittiruvchilar, operatorlar va provayderlar televideniye tarmoqlarida aholini favqulodda vaziyatlar xavfidan xabardor qilishni tashkil qilish uchun zarur bo‘lgan vositalar o‘rnatilishini va ulardan foydalanishni ta’minlashlari shart.

38. Eshittiruvchilar, operatorlar va provayderlarning televideniye tarmoqlari va texnik binolari qo‘riqlash, himoyalash va xavfsiz faoliyatini ta’minlash bo‘yicha qonunchilik hujjatlarida belgilangan talablarga javob berishi shart.

39. Internet-kafelarda voyaga yetmaganlarning ota-onasidan biri yoki ularning o‘rnini bosuvchi shaxs hamrohisiz tungi vaqt (soat 22:00 dan 6:00 gacha) Internet tarmog‘idan foydalanish uchun jamoat foydalanish joylarida bo‘lishiga yo‘l qo‘ymaslik hamda videokuzatuv kameralarini qo‘llab (video yozuvni 90 kun saqlagan holda), tashrif buyuruvchilar xavfsizligi choralari ko‘rilishi kerak.

40. Operator va provayderlar har bir abonentga, shu jumladan, abonentning shaxsiy hisob raqamida mablag‘lar bo‘lmagan holda, tegishli xizmatlar uchun O‘zbekiston Respublikasi hududida belgilangan yagona raqamlarni abonent tomonidan terish yordamida favqulodda tezkor xizmatlarni bepul va kecha-kunduz davomida chaqirish imkoniyatini ta’minlashi kerak. Favqulodda tezkor xizmatlarga quyidagilar kiradi:

yong‘in xavfsizligi xizmati;

ichki ishlar organlari;

tez tibbiy yordam;

gaz tarmog‘ining avariya xizmati;

O‘zbekiston Respublikasi Favqulodda vaziyatlar vazirligining qutqaruv xizmati.

41. Abonent shartnomasi bekor qilinganidan so‘ng, operator (provayder) ma’lumotlar bazasidan abonentlarning shaxsiy ma’lumotlarini qonunchilik hujjatlarida belgilangan tartibda yo‘q qilishlari shart.

42. Operator (provayder) tomonidan ko‘rsatiladigan telefon aloqasi xizmatlari universal va qo‘shimcha xizmatlarga bo‘linadi.

43. Universal telekommunikatsiya xizmatlari ro‘yxati hamda ushbu xizmatlarga tariflar Telekommunikatsiya xizmatlariga tariflarini shakllantirish va tartibga solish to‘g‘risida nizomga (ro‘yxat raqami 959, 2000-yil 18-avgust) muvofiq belgilanadi.

44. Foydalanuvchilarga ko‘rsatiladigan telefon aloqasi xizmatlari ro‘yxati operatorga (provayderga) tegishli litsenziya hamda telekommunikatsiya tarmoqlari va vositalarining texnik imkoniyatlaridan kelib chiqib belgilanadi.

45. Operator (provayder) tomonidan qo‘shimcha va bepul telefon aloqasi xizmatlari ko‘rsatilishi mumkin.

46. Quyidagilar qo‘shimcha telefon aloqasi xizmatlari hisoblanadi:

a) telefon apparatlari va boshqa abonent qurilmalarini qayta o‘rnatish, qayta ulash (ulash sxemasini o‘zgartirish);

b) parallel telefon apparatlarini o‘rnatish;

v) telekommunikatsiya tarmog‘ining aloqa kanallarini va fizik zanjirlarini ijaraga berish;

g) ma’lumot-axborot xizmatlari, bundan ushbu Qoidalarda ko‘rsatilgan ma’lumotnomalarni berish qo‘shimcha xizmatlari mustasno;

d) ma’lumotlar uzatish xizmatlari va telematik xizmatlardan (elektron pochta, faksimil xabarlarni uzatish xizmati, axborot resurslaridan foydalana olish xizmati va h.k.) foydalanish imkoniyati;

e) telegrammalarni telefon orqali berish;

j) chaqirilayotgan abonentda raqamni avtomatik aniqlash funksiyalariga ega telefon apparati bo‘lganda mahalliy telekommunikatsiya tarmog‘ining chaqirayotgan abonent raqamini aniqlash, shuningdek, abonent talabiga ko‘ra hisob tafsilotlarini berish;

z) abonent murojaatiga asosan abonent raqamini o‘zgartirish;

i) chaqirilayotgan shaxsga xabar qilgan holda xalqaro telefon bog‘lanish;

k) boshqa hududdan (aholi punktidan) chaqirilayotgan abonentning telefon raqami to‘g‘risidagi ma’lumot berish;

l) shartnomada belgilangan vaqtda telefon bog‘lanishni taqdim etish;

m) chaqirilayotgan shaxs hisobidan shaharlararo telefon bog‘lanish;

n) telefonogrammani uzatgan holda abonent o‘rniga so‘zlashish;

o) konferens-aloqa xizmati.

Telefon aloqa tarmog‘idan foydalanishni taqdim etish xizmatining narxiga kommutatsiya stansiyasidan abonentning telefon rozetkasigacha abonent liniyalarining tashkil etilishi hisobga olingan stansiya va liniya uskunasining narxi kiradi.

Telefon tarmog‘idan foydalanishning taqdim etilishi to‘lovida oxirgi taqsimlash qurilmasidan telefon rozetkasigacha bo‘lgan shahar telefon tarmog‘ida uzunligi 20 m dan ko‘p bo‘lmagan va qishloq telefon tarmog‘ida uzunligi 40 m dan ko‘p bo‘lmagan abonent liniyasining narxi hisobga olinadi.

Bepul qo‘shimcha telefon aloqasi xizmatlariga quyidagilar kiradi:

a) telefon tarmog‘ining ta’mirlash byurosini chaqirish;

b) chaqirilayotgan abonentning aholi punkti/operatori kodi to‘g‘risida ma’lumotnoma berish;

v) chaqirilayotgan mamlakat va chaqirilayotgan aholi punktining xalqaro kodi to‘g‘risida ma’lumot berish;

g) mahalliy va xalqaro telefon aloqasi xizmatlari uchun tariflar to‘g‘risida ma’lumot berish;

d) avtomatik telefon aloqasidan foydalanish tartibi to‘g‘risida ma’lumot berish;

e) xalqaro telefon bog‘lanishni buyurtma qilish uchun buyurtma berish xizmatlarini chaqirish indekslari to‘g‘risida ma’lumot berish.

Mazkur bandda ko‘rsatilgan bepul xizmatlar ro‘yxati kamaytirilishi mumkin emas.

47. Ushbu Qoidalarda ko‘rsatilgan qo‘shimcha telefon aloqasi xizmatlari ro‘yxati (bepul yoki pullik) qonunchilik hujjatlari talablarini hisobga olgan holda operator va provayderga tegishli bo‘lgan telekommunikatsiya tarmoqlari va vositalarining texnik imkoniyatlaridan kelib chiqib o‘zgartirilishi yoki to‘ldirilishi mumkin.

48. Taksofon orqali quyidagi pullik xizmat turlari ko‘rsatiladi:

a) mahalliy telefon so‘zlashuvlari;

b) shaharlararo telefon so‘zlashuvlari;

v) xalqaro telefon so‘zlashuvlari;

g) axborot-ma’lumot xizmati operator-telefonistlari bilan telefon aloqasi.

49. Shaharlararo va xalqaro telefon bog‘lanish avtomatik xizmat ko‘rsatish tizimi, buyurtma xizmat ko‘rsatish tizimi va darhol xizmat ko‘rsatish tizimi bo‘yicha amalga oshirilishi mumkin.

50. Operator va provayder avtomatik aloqa yo‘nalishlarining borligi, shaharlar kodlari to‘g‘risida va avtomatik telefon aloqasidan foydalanish tartibi to‘g‘risida foydalanuvchilarni xabardor qilishga majbur (OAV, ma’lumot-axborot xizmatlari, Internet tarmog‘i orqali, so‘zlashuv punktlarida).

51. Buyurtma xizmat ko‘rsatish tizimida chaqirayotgan shaxsga buyurtmani qabul qilish vaqtida shaharlararo va xalqaro telefon bog‘lanishga berilgan buyurtmani bajarish muddati xabar qilinishi kerak.

Buyurtma chaqirayotgan shaxsning ixtiyoriga ko‘ra yoki buyurtmaning amal qilish muddati tugashi bilan bekor qilinishi mumkin.

52. Buyurtma bo‘yicha shaharlararo telefon bog‘lanish taqdim etilishi kerak bo‘lgan vaqt operator (provayder) tomonidan mustaqil ravishda belgilanadi, ammo buyurtma qabul qilingan paytdan boshlab yoki chaqirayotgan shaxs tomonidan so‘zlashuv uchun belgilangan vaqtdan boshlab bir soatdan oshmasligi kerak. Ko‘rsatilgan vaqt tugashi bilan chaqirayotgan shaxsning roziligi bilan bajarilmagan buyurtma ushbu Qoidalarning 55-bandiga muvofiq boshqa vaqtga ko‘chiriladi yoki bekor qilinadi.

Buyurtma bo‘yicha xalqaro telefon bog‘lanish taqdim etilishi mumkin bo‘lgan vaqt operator (provayder) tomonidan mustaqil ravishda belgilanadi va buyurtmani qabul qilish vaqtida foydalanuvchiga yetkaziladi.

Chaqirayotgan shaxsning talabi bo‘yicha buyurtma xizmat ko‘rsatish tizimida shaharlararo va xalqaro telefon bog‘lanishlar buyurtma qabul qilingan vaqtdan boshlab 30 daqiqa (shoshilinch buyurtma) ichida taqdim etilishi mumkin. Shoshilinch buyurtmalar qabul qilinadigan yo‘nalishlar ro‘yxati operator (provayder) tomonidan belgilanadi va foydalanuvchilar e’tiboriga havola qilinadi.

53. Shaharlararo va xalqaro telefon bog‘lanishga buyurtma xizmat ko‘rsatish tizimida buyurtmaning amal qilish muddati chiquvchi stansiya uchun mahalliy vaqt bilan soat 08:00 da tugaydi.

a) telefon apparatidan telefon apparatiga telefon bog‘lanishlar uchun — buyurtma berilgan kundan keyingi kunga;

b) shaxsiy telefon bog‘lanishlar va konferens-aloqa uchun — buyurtma berilgan kundan keyin ikkinchi kunga.

Xalqaro telefon bog‘lanish uchun buyurtmaning amal qilish muddati yana 8 soatga uzaytirilishi mumkin, agar bu tegishli stansiyalar yoki ekspluatatsiya qilish va trafikning o‘tish vaqtidagi farq sababli zarur deb tan olingan bo‘lsa.

54. Shaharlararo telefon aloqa texnologik jarayonlarida yagona hisobga olish-hisobot (texnologik) vaqt — mahalliy vaqt qo‘llaniladi.

Xalqaro telefon aloqasida hisobga olish-hisobot vaqti milliy aloqa ma’muriyatlarining xalqaro kelishuvlari bilan belgilanadi.

55. Foydalanuvchilarga shaharlararo va xalqaro telefon aloqasi xizmatlarini ko‘rsatishning texnik imkoniyati bo‘lmaganda operator (provayder) so‘zlashuvlar soni va ularning davomiyligiga cheklovlarni kiritadi, buyurtma va darhol xizmat ko‘rsatish tizimida aloqa to‘liq bo‘lmaganda — buyurtmalarni qabul qilishni rad etadi.

Shaharlararo va xalqaro telefon aloqasi xizmatlariga cheklovlar kiritilganligi to‘g‘risida foydalanuvchi buyurtmani qabul qilish vaqtida yoki buyurtma va darhol xizmat ko‘rsatish tizimlarida telefon bog‘lanish taqdim etilayotgan vaqtda xabardor qilinishi kerak.

Telefon aloqasidan foydalanishda uzoq muddatli cheklovlar yuzaga kelgan holda operator (provayder) bu haqda OAV, ma’lumot xizmatlari yoki telekommunikatsiya xizmatlaridan ommaviy foydalanish punktlarida e’lon berishdan foydalanib foydalanuvchilarni xabardor qilish choralarini ko‘rishi kerak.

56. Buyurtma xizmat ko‘rsatish tizimida telefon bog‘lanishini taqdim etish navbati so‘zlashuv toifasiga, buyurtmaning shoshilinchli ekanligiga va kelib tushish vaqtiga bog‘liq bo‘ladi.

57. O‘zbekiston Respublikasi hududida operator-telefonist yordamida taqdim etiladigan shaharlararo telefon so‘zlashuvlarining quyidagi toifalari belgilangan:

har qanday navbatdan tashqari va alohida parollar bo‘yicha;

hukumatga oid;

oddiy.

58. “Har qanday navbatdan tashqari” toifa bo‘yicha so‘zlashuvlar faqat qonunchilik hujjatlariga muvofiq, amaldagi oddiy tarif bo‘yicha haq to‘lagan holda abonent tomonidan ko‘rsatilgan istalgan telefon bo‘yicha bunday so‘zlashuvlarni olib borish huquqidan foydalanadigan mansabdor shaxslarga taqdim etiladi. Abonentning talabiga ko‘ra so‘zlashuvlar aloqaning ishlash jadvalini buzgan va quyi toifadagi bo‘lib o‘tayotgan so‘zlashuvni uzib qo‘ygan holda taqdim etiladi.

59. “Har qanday navbatdan tashqari” toifasidagi buyurtmalar bilan bir qatorda “Falokat” paroli bo‘yicha so‘zlashuvlarga buyurtmalar bajariladi. Ushbu parol bo‘yicha so‘zlashuvlar amaldagi oddiy tarif bo‘yicha haq to‘lagan holda foydalanuvchi tomonidan ko‘rsatilgan istalgan telefondan, shuningdek, so‘zlashuv punktidan taqdim etiladi. Halokatga uchragan dengiz, daryo va havo kemalaridan xabarlarni uzatish uchun shaharlararo telefon so‘zlashuvlariga to‘lov undirilmaydi.

60. Operatorlarga shartnoma asosida to‘langan vaqtincha amal qiluvchi parollarni kiritish huquqi beriladi. Parollar bo‘yicha buyurtmalar oddiy toifadagi buyurtmalardan oldin beriladi.

61. “Hukumatga oid” toifasidagi shaharlararo telefon so‘zlashuvlari “har qanday navbatdan tashqari” so‘zlashuvlaridan keyin aloqaning ishini buzmasdan va bo‘lib o‘tayotgan so‘zlashuvlarni uzib qo‘ymasdan amaldagi oddiy tarif bo‘yicha taqdim etiladi. So‘zlashuvlar faqat bunday so‘zlashuvlarni olib borish huquqi berilgan mansabdor shaxslarga va faqat ro‘yxatga olingan telefonlardan taqdim etiladi.

62. Hech bir boshlangan so‘zlashuv operator (provayder) tomonidan uzib qo‘yilishi mumkin emas, “Har qanday navbatdan tashqari” toifasidagi va “Falokat” paroli bo‘yicha so‘zlashuvni taqdim etish zarur bo‘lgan hollar bundan mustasno. So‘zlashuv tugaganidan keyin foydalanuvchiga uzib qo‘yilgan so‘zlashuvni tugatish imkoni beriladi.

63. Buyurtma bo‘yicha bildirishnomali telefon bog‘lanishlar so‘zlashuv uchun belgilangan vaqtni hisobga olgan holda tarifidan qat’i nazar ushbu (buyurtma) toifadagi buyurtmalar ichidan eng birinchi navbatda taqdim etiladi.

64. Shaharlararo va xalqaro telefon bog‘lanishga buyurtmani qabul qilishda darhol xizmat ko‘rsatish tizimida abonent telefon go‘shagini qo‘ymasdan, shu zahoti, amaldagi oddiy tarif bo‘yicha chaqirilayotgan abonent bilan telefon orqali bog‘lanadi.

O‘zbekiston Respublikasi hududida darhol xizmat ko‘rsatish tizimi texnik vositalarning tayyorlik darajasiga qarab kiritiladi.

65. Mahalliy telekommunikatsiya tarmoqlarida axborot-ma’lumot xizmatlarining quyidagi turlari ko‘rsatiladi:

uchta yoki to‘rtta sonli raqamdan foydalanib, axborot-ma’lumot xizmatlari;

foydalana olish uchun maxsus xizmat ko‘rsatish bog‘lamasida qisqa raqamlari ajratiladigan axborot-ma’lumot xizmatlari;

foydalana olish uchun abonent raqamlari ajratiladigan axborot-ma’lumot xizmatlari.

66. Axborot-ma’lumot xizmatlaridan foydalana olish uchun raqamlar ajratilishi telekommunikatsiyalar sohasidagi maxsus vakolatli organ tomonidan tasdiqlanadigan raqamlash tizimi va rejasiga muvofiq amalga oshiriladi.

67. Quyidagilar axborot-ma’lumot xizmatlarining asosiy vazifalari hisoblanadi:

a) foydalanuvchilarga ma’lumotlar berish:

mahalliy telekommunikatsiya tarmoqlarining telefon raqamlari (tashkilotlar, muassasalar va korxonalar telefonlari) to‘g‘risida;

qo‘shimcha telefon aloqa xizmatlarini ko‘rsatuvchi tashkilotlarning telefon raqamlari to‘g‘risida;

mahalliy telefon tarmoqlarining telefon uzellari ta’mirlash byurosining telefon raqamlari to‘g‘risida;

b) manzilli, muassasaviy, qo‘l va elektron kartotekalarini yaratish hamda ularga mahalliy telekommunikatsiya tarmoqlarini rekonstruksiya qilish bilan bog‘liq barcha o‘zgarishlarni o‘z vaqtida kiritish;

v) telefon ma’lumotnomalarini tayyorlash.

68. Operator (provayder) telekommunikatsiya xizmatlarini ko‘rsatish bilan bog‘liq bo‘lgan axborotni abonentlarga taqdim etish maqsadida axborot-ma’lumot berish bo‘yicha xizmat ko‘rsatish tizimini yaratadi.

Quyidagi ma’lumotlar operator (provayder) tomonidan abonentning so‘roviga muvofiq 24 soat mobaynida hech qanday cheklovlarsiz taqdim etilishi shart:

ma’lumotlar uzatish tarmog‘ining ko‘rsatiladigan xizmatlari to‘g‘risidagi;

ma’lumotlar uzatish tarmog‘idan foydalanish xizmatlariga bo‘lgan tariflar to‘g‘risidagi;

abonentga uning shaxsiy hisobvarag‘ining holati va ma’lumotlar uzatish tarmog‘i xizmatlaridan foydalanish haqini to‘lash bo‘yicha qarzdorlik to‘g‘risidagi, jumladan, abonentga ulangan xizmatlar (ma’lumotlar uzatish vaqti, tezligi, olingan va (yoki) uzatilgan axborot hajmi, shuningdek, limitlangan trafikli tariflardagi trafik qoldig‘i) to‘g‘risidagi;

texnik nosozliklar to‘g‘risidagi.

69. Operatorlarning (provayderlarning) faoliyati yo‘nalishlari va vazifalariga muvofiq axborot-ma’lumot xizmatlari tomonidan operatorlarning (provayderlarning) texnik imkoniyatlaridan kelib chiqib boshqa axborot ham berilishi mumkin.

70. Operatorlar (provayderlar) axborot-ma’lumot xizmatlari ko‘rsatishda quyidagi funksiyalarni amalga oshiradi:

berilayotgan axborot sifatining ishlab chiqarish nazorati;

belgilangan shakllar bo‘yicha birlamchi hisob va hisobotni yuritish;

ko‘p smenali ish grafigini hisobga olib kadrlarni joy-joyiga qo‘yish;

kadrlarni o‘qitish va malakasini oshirish;

ma’lumotnoma kartotekalarini ekspluatatsiya qilish va yuritish;

ma’lumotnoma kartotekalariga tuzatishlar kiritish uchun axborot olish maqsadida mahalliy telekommunikatsiya tarmoqlarining telefon uzellari bilan o‘zaro ishlash;

ekspluatatsiya qilish qoidalari va yo‘riqnomalariga muvofiq texnik vositalarni ekspluatatsiya qilish;

mehnatni ilmiy tashkil qilish, mehnatni muhofaza qilish va xavfsizlik texnikasiga doir chora-tadbirlarni o‘tkazish.

71. Mahalliy telekommunikatsiya tarmoqlarining axborot-ma’lumot xizmati ma’lumot xizmatining maxsus apparaturasi bazasida tashkil qilinadi, uning tarkibiga kommutatsiya uskunasi operator-telefonistlar stollari, kartoteka uskunasi, dispetcher va ishlab chiqarish nazorati pultlari kiradi.

72. Axborot-ma’lumot xizmatlari shaharlar, tumanlar, tashkilotlar joylashgan ko‘chalar nomlaridagi o‘zgarishlar to‘g‘risidagi ma’lumotlarni kiritib, o‘z ma’lumotlar bazasini o‘z vaqtida yangilashlari kerak.

73. Chaqiruv kelib tushganda operator-telefonist darhol va aniq o‘zining shaxsiy raqamini aytishi kerak (masalan, “beshinchi”, “o‘ttiz sakkizinchi” va h.k.). Agar foydalanuvchi javob bermasa, “Ma’lumotnoma xizmati javob beradi” deb takrorlaydi. Ikkinchi marta ham javobni olmagandan keyin, operator-telefonistga aloqani uzishga haqli. “Ha”, “Eshitaman”, “Allo” va b. so‘zlarni aytishga ruxsat berilmaydi.

74. Operator-telefonist yonida ishlayotgan telefonchi operatorga xalaqit qilmaslik uchun ovozni balandlamasdan talab qilinayotgan axborotni aniq va ravshan berishi kerak.

75. Operator-telefonist faqat foydalanuvchi unga berilgan axborotni to‘g‘ri takrorlagandan keyingina aloqani uzishga haqlidir. Agar foydalanuvchi axborotni noto‘g‘ri takrorlagan bo‘lsa, operator-telefonist uni takrorlashga majbur.

76. Operator-telefonist birinchi talab bo‘yicha foydalanuvchiga o‘zining shaxsiy raqamini takrorlashi kerak.

77. Operator-telefonist foydalanuvchilar bilan xushmuomalali bo‘lishi, hech qanday tanbehlar bildirmasligi va u bilan aytishmasligi kerak.

78. Foydalanuvchilar shikoyat qilganda operator-telefonist ularni darhol katta operator-telefonist bilan ulashi kerak.

79. Operator-telefonist ma’lumot berilayotgan materialni, kartotekaning tuzilishi va ma’lumot materiallarining unda joylashish prinsiplarini yaxshi bilishi kerak. Operator-telefonist barcha maxsus xizmatlar raqamlarini (101, 102, 103, 104, 1050) yoddan bilishi kerak.

80. Agar operator-telefonist ma’lumotni berishga qiynalsa, u foydalanuvchiga: “Iltimos, bir oz kutib turing” deb katta operator-telefonistga murojaat qilishi shart. Katta operator-telefonistning tushuntirishlarini olib, kutib turgan foydalanuvchiga xizmat ko‘rsatadi. Ma’lumot olish uchun yonida ishlayotgan operator-telefonistga murojaat qilish qat’iyan man qilinadi.

81. Operator-telefonist foydalanuvchi so‘rovini e’tibor bilan eshitishi va zarur bo‘lganda berilgan savolni takrorlashini so‘rashi kerak: “Iltimos, ma’lumotni qaytaring” yoki “Iltimos, aniqroq qaytaring”. Agar ikkinchi bor so‘rovdan keyin operator-telefonist foydalanuvchini deyarli eshitmasa yoki umuman eshitmasa, u: “Sizni eshitmayapman, iltimos qayta qo‘ng‘iroq qiling” deb javob berishi kerak.

82. Agar foydalanuvchi savolni noto‘g‘ri ifodalagan bo‘lsa, operator-telefonist foydalanuvchidan unga aynan qanday axborot kerakligini aniqlashtirishni xushmuomalalik bilan so‘rashi va shundan keyin yana ma’lumot xizmatini ko‘rsatishi kerak.

83. Agar foydalanuvchi ushbu xizmatga tegishli bo‘lmagan axborot berishni so‘rasa, u holda unga tegishli axborot-ma’lumot xizmatlarining telefon raqamlarini aytish kerak.

84. Telefon raqamlari to‘g‘risidagi axborotni berayotganda telefonning beshta belgili raqamini operator-telefonist shunday aytishi kerak: bitta raqam alohida va qolgan to‘rtta raqamlar ikkitadan. Masalan, 5-44-32 — besh, qirq to‘rt, o‘ttiz ikki. Telefonning yettita belgili raqami shunday aytiladi: uchta raqam birga va to‘rtta raqam ikkitadan. Masalan: 71 278-34-23 — yetti bir, ikki yetti sakkiz, o‘ttiz to‘rt, yigirma uch (50 dan 99 gacha qo‘shib raqamlar raqamlarga ajratgan holda aytiladi: 2-75-58 — ikki, yetti besh, besh sakkiz).

85. Agar foydalanuvchi telefon shikastlanganligi to‘g‘risida xabar qilmoqchi bo‘lsa, operator-telefonist qaysi telefon raqami shikastlanganligini so‘rashi shart va foydalanuvchiga telefon aloqa uzelining tegishli avtomatlashtirilgan ta’mirlash byurosining raqamini xabar qilishi kerak.

86. Operator-telefonist quyidagi hollarda foydalanuvchini katta operator-telefonist bilan ulashga majbur:

operator-telefonist foydalanuvchi savolini tushunmaganda;

operator-telefonist ma’lumot materialida foydalanuvchiga kerak bo‘lgan axborotni topa olmaganda;

foydalanuvchi shikoyat bilan murojaat qilganda;

foydalanuvchi tomonidan berilgan savol ma’lumot xizmatining vakolatiga kirmaganda.

87. Axborot-ma’lumot xizmatining operator-telefonist quyidagi hollarda ma’lumot berishni rad etishga haqli:

korxona, muassasa, tashkilotning to‘liq, qisqartirilgan yoki shartli nomi ko‘rsatilmagan;

yakka tartibda foydalaniladigan xonadon telefoni abonentining ism-sharifi yoki manzili aytilmagan bo‘lsa, ma’lumot materialida esa, shu familiyadagi shaxslar ko‘p bo‘lsa;

jamoa bo‘lib foydalaniladigan xonadon telefon o‘rnatilgan aniq manzil ko‘rsatilmagan bo‘lsa;

ma’lumot materialida so‘ralayotgan axborot bo‘lmasa;

foydalanuvchi unga ma’lumot xizmati bo‘yicha ikkitadan ortiq ma’lumotlar berishni so‘rasa, bunda operator-telefonist foydalanuvchiga u ma’lumot xizmatini ikkinchi bor chaqirganligini aytishi kerak.

88. Telefon tarmoqlarida signalizatsiya uskunalarini o‘rnatish va ularga texnik xizmat ko‘rsatishni tashkil etish qonunchilik hujjatlarida belgilangan tartibda vakolatli organlar (bundan buyon matnda qo‘riqlash xizmati deb yuritiladi) tomonidan amalga oshiriladi.

89. Yuridik va jismoniy shaxslarga qarashli korxonalar, tashkilotlar, muassasalar, xonadonlar himoya qilish obyektlari hisoblanadi.

90. Telefon stansiyalarini loyihalash va rekonstruksiya qilishda qo‘riqlash signalizatsiyasi apparatini joylashtirish uchun krossda va kross yaqinida, mahalliy sharoitlarni hisobga olgan holda, texnologik loyihalashning normativlariga muvofiq maydonli apparatura xonasini jihozlash ko‘zda tutilishi lozim.

Optik tolali aloqa liniyalari orqali tashkil etilgan kichik sig‘imli telefon stansiyalarida qo‘riqlash signalizatsiya apparaturalari alohida shkaflarda o‘rnatiladi.

91. Xavfsizlik signalizatsiya tizimining tarkibiga xabarlarni uzatish tizimlari ramkalariga abonent liniyalarini krossirovka qilish ishlari 5 kun muddat ichida telefon tarmoqlari hisobidan amalga oshiriladi.

Himoya bo‘laklari va krossning stansion ramkalaridan qo‘riqlash signalizatsiyasi ramkalarigacha bo‘lgan krossirovkasi telefon tarmoqlari xodimlari tomonidan amalga oshiriladi.

92. Qo‘riqlanadigan obyektlardagi abonent liniyalarining telefon rozetkasiga xabarlarni uzatish tizimlarining yakunlovchi (terminal) qurilmalarini ulash qo‘riqlash xizmati tomonidan amalga oshiriladi.

93. Xabarlarni uzatish tizimlari uskunalariga texnik xizmat ko‘rsatish bilan shug‘ullanuvchi qo‘riqlash xizmatining mutaxassislariga xabarlarni uzatish tizimlari uskunalari o‘rnatilgan telefon stansiyalari binolariga kirish uchun telefon tarmoqlari ma’muriyati tomonidan maxsus guvohnomalar yoki ruxsatnomalar beriladi.

94. Kechki va tungi payt, ta’til va dam olish kunlari qo‘riqlash xizmati xodimlarining ko‘rsatilgan binolarga kirishlari telefon tarmoqlari dispetcherining ruxsati asosida bo‘ladi.

Qo‘riqlash xizmati xodimlari bajaradigan ishlar telefon tarmoqlari xodimlari tomonidan nazorat qilinadi. Qo‘riqlash boshqarmasi xodimlari tomonidan bajarilgan barcha ishlar maxsus jurnalda qayd etilishi lozim.

95. Telefon liniyalaridan qo‘riqlash maqsadida foydalanilayotgan abonentlarning abonent kartalarida qo‘riqlash pulti belgisi bo‘lishi, ramka raqami va signalizatsiya shtifti ko‘rsatilish lozim.

96. Obyektlarni qo‘riqlash davri mobaynida abonent liniyalarini krossdan tekshirish faqatgina qo‘riqlash xizmatining buyurtmasiga binoan amalga oshiriladi. Tekshiruv uchun buyurtmalar boshqa shaxslardan qabul qilinganda, ko‘rsatilgan liniyalar tekshiruvi qo‘riqlash signalizatsiyasi o‘chirilganidan keyin, faqatgina qo‘riqlash xizmatining ruxsati bilan amalga oshiriladi.

97. Qo‘riqlash signalizatsiyalari uchun ishlatiladigan taqsimlash javonlari, quti, boks va grompolosa shtiftlari telefon tarmoqlari xodimlari tomonidan bo‘yoq bilan markirlanishi (belgilanishi) lozim.

98. Telefon stansiyasi krosslari va liniyalarda ta’mirlash hamda profilaktika ishlari o‘tkazilganda, qayta payka qilinganda va kabellarni almashtirib qayta ulanganda (stansiya va liniya inshootlarida) telefon tarmoqlari xodimlari uchun telefon liniyalarining markirlangan simlari juftligi joyma-joy almashtirilishiga, shuningdek, ulardan xizmat aloqasi uchun foydalanilishiga ruxsat berilmaydi.

99. Qo‘riqlash signalizatsiyasi uchun ishlatiladigan liniyalarda profilaktik reja asosida ish olib borishlari to‘g‘risida telefon tarmoqlari xodimlari qo‘riqlash xizmati ish boshlanishidan uch kun, ishlar shoshilinch (rejadan tashqari) bajarilishi kerak bo‘lganda bevosita mazkur ishlar bajarilishidan oldin ogohlantiradi.

100. Qo‘riqlash xizmati buyurtmasiga binoan, aloqa liniyalar parametrlari o‘lchovini telefon tarmoqlari 15 kun ichida amalga oshiradi. Zarur bo‘lganda, qo‘riqlash xizmatining mutaxassislari o‘lchovlarda qatnashadilar. Telefon tarmoqlari liniyalari parametrlarini belgilangan normalarga muvofiqlashtirishni ta’minlaydi yoki texnik imkoniyat mavjud bo‘lganda liniyalarni almashtiradi.

101. Qo‘riqlash signalizatsiyasi yuzaga kelishi bilan bog‘liq bo‘lgan sabab tufayli telefon aloqasi buzilgan bo‘lsa, telefon tarmoqlari xodimlari bu haqda qo‘riqlash xizmatiga xabar beradi va qo‘riqlash xizmati xodimlari bilan birgalikda nosozlik sababini ikki soat ichida aniqlab, uni bartarf etish choralarini ko‘radi.

Qo‘riqlash signalizatsiyasining uch soatdan ortiq vaqt orqalig‘idagi nosozlik, telefon aloqasining sifatli ishlashiga ta’sir ko‘rsatgan holda, telefon tarmoqlari xodimlari qo‘riqlash signalizatsiyasini telefon liniyasidan uzib qo‘yadi.

102. Markaziy kuzatuv pultlari va telefon stansiyasini bog‘laydigan to‘g‘ri simlari bo‘lgan kabellar shikastlanishi yoki ta’mirlanishi vaqtida telefon tarmoqlari tomonidan texnik imkoniyat mavjud bo‘lsa uch soat ichida zaxira aloqasi taqdim etiladi. Bunday imkoniyat mavjud bo‘lmagan holda shikastlanishlar belgilangan muddatlarga muvofiq, qo‘riqlash xizmatini xabardor qilgan holda bartaraf etiladi.

Qo‘riqlash signalizatsiyasi uchun foydalaniladigan abonent telefon liniyalaridagi shikastlanishlar, telefon tarmoqlari xodimlari tomonidan birinchi navbatda bartaraf etiladi.

103. Abonent liniyalarini qayta ulash, juftlik sxema bo‘yicha telefonlarni yoqish hamda qo‘riqlash signalizatsiyasi faoliyatini to‘xtatib, telefonlar joyini almashtirish qo‘riqlash xizmati rahbariyatini oldindan yozma ravishda ogohlantirgan holda telefon tarmoqlari tomonidan amalga oshiriladi. Bunda qo‘riqlash signalizatsiyasi apparaturasini ulash uchun to‘lov undirilmaydi.

104. Qo‘riqlash signalizatsiyasi uchun telefon liniyalaridan foydalanganda ro‘yxatdan o‘tkazish va abonent to‘lovlari amaldagi tariflarga muvofiq qo‘riqlash xizmatidan undiriladi.

105. Qo‘riqlash xizmatiga ulangan obyektlar telefonlari o‘chirilganida yoki abonent mazkur Qoidalarni buzganligi sababli aloqa xizmati ko‘rsatilishidan to‘xtatilganda, bu haqda kross xodimlari qo‘riqlash xizmatini ogohlantiradi.

106. Operatorlar quyidagi telegraf xizmatlarini ko‘rsatadi:

telegrammalar qabul qilish, yuborish;

abonent telegraf tarmog‘i bo‘yicha so‘zlashuvlar olib borish;

“teleks” tarmog‘i bo‘yicha so‘zlashuvlar olib borish;

telegraf kanallarini ijaraga berish;

qonunchilik hujjatlariga muvofiq boshqa xizmatlar.

107. Telegraf aloqasidan foydalanilganda telegrammalarning quyidagi turlaridan foydalaniladi:

“topshirilganligi to‘g‘risidagi xabarnoma bilan”;

“pochta orqali buyurtmali” yetkazib berish bilan”;

“jo‘natuvchi tomonidan ko‘rsatilgan muddatda yetkazib berish bilan”;

“badiiy blankda yetkazib berish bilan”;

“tasdiqlangan”;

“javobi to‘langan”;

“sxemali”;

“kriptogramma”;

“perfotasmadagi kriptogramma”.

108. Telegrammalar ishlov berilishiga qarab quyidagi toifalarga bo‘linadi:

oddiy;

shoshilinch;

toifadan tashqari;

navbatdan tashqari;

oliy hukumatga oid;

hukumatga oid.

Telegrammalarga ishlov berish ularning toifalariga muvofiq amalga oshiriladi.

109. Ishlov berishdagi mutlaq ustunlik dengiz, yer, havoda va kosmik fazoda inson hayotining xavfsizligiga tegishli, shuningdek, mudofaa va huquqni muhofaza qilish chora-tadbirlarini o‘tkazish, yirik avariyalar, falokatlar, epidemiyalar to‘g‘risidagi xabarlar bo‘lgan telegrammalarga beriladi.

110. “Oddiy” telegrammalarga toifasi to‘g‘risida belgisi bo‘lmagan telegrammalar kiradi.

111. “Shoshilinch” toifasiga shoshilinch tariflar bo‘yicha to‘lanadigan telegrammalar kiradi.

112. “Toifadan tashqari” telegrammalariga “Havo” (“Vozdux”), “Raketa”, “Mobilizatsion”, “Samolyot” belgilari bo‘lgan telegrammalar kiradi.

113. “Navbatdan tashqari” telegrammalarga “Avariya”, “Shtorm”, “Avia” belgilari bo‘lgan telegrammalar kiradi.

“Avariya” belgili telegrammaga — havo va daryo flotlarida, temir yo‘llarda va avtotransportda, sanoat korxonalaridagi hodisalar va aloqa vositalarining holati, halokatlar, avariyalar to‘g‘risidagi telegrammalar kiradi.

“Shtorm” belgili telegrammaga — havo va daryo flotlari, temir yo‘l va avtomobil transporti uchun xavfli ob-havo hodisalari (bo‘ron, to‘fon, tuman va h.k.), shuningdek, tabiiy ofatlar (zilzila, toshqin, o‘rmon yong‘inlari va boshqalar) to‘g‘risidagi ogohlantirish telegrammalari kiradi.

“Avia” belgili telegrammaga — samolyotlarning uchishi, kelishi va majburiy qo‘nishi to‘g‘risidagi xabarlar, shuningdek, ob-havo to‘g‘risida ma’lumotli telegrammalar kiradi.

“Hukumatga oid” va “Oliy hukumatga oid” telegrammalarini berish huquqidan O‘zbekiston Respublikasi Vazirlar Mahkamasi tomonidan tasdiqlangan ro‘yxatga muvofiq mansabdor shaxslar foydalanadi.

114. “Topshirilganligi to‘g‘risidagi xabarnoma bilan” telegrammani yuborayotganda jo‘natuvchi belgilangan joyda telegrammani 24 soat ichida, telegraf ishi jadval bo‘yicha seanslar bilan amalga oshiriladigan punktlarga manzillangan telegrammalar uchun telegrammani qabul qilgan paytdan boshlab 48 soat ichida topshirilishi to‘g‘risida xabarnomani oladi.

115. “Javobi to‘langan” telegrammalar adresatning jo‘natuvchiga u tomonidan to‘langan axborot hajmidagi to‘langan javobini ta’minlaydi.

“Topshirilganligi to‘g‘risidagi xabarnoma bilan”, “javobi to‘langan”, “banklardan o‘tkazma” turdagi telegrammalar faqat O‘zbekiston Respublikasi hududida qabul qilinadi.

116. “Pochta orqali buyurtmali yetkazib beriladigan” telegrammalar aloqa korxonalari bo‘lmagan aholi punktlariga manzillanadi. Bunday telegrammalar adresatga shaxsan qo‘liga topshirib yetkaziladi, bu telegrammaning o‘tish vaqtini uzaytiradi.

117. “Jo‘natuvchi tomonidan ko‘rsatilgan muddatda yetkazib berish bilan” telegrammalari adresatga jo‘natuvchi tomonidan ko‘rsatilgan muddatda telegrammani yetkazib berishni ta’minlaydi va Mustaqil Davlatlar Hamdo‘stligi mamlakatlariga, respublikaning viloyat va tuman markazlariga yuborish uchun yetkazib berish sanasidan kamida bir sutka oldin aloqa korxonalari tomonidan qabul qilinadi.

118. “Badiiy blanklarda yetkazib berish bilan” telegrammalari jo‘natuvchining xohishiga ko‘ra telegrammalar adresatlariga badiiy blanklarda yetkazib berish bilan qabul qilinadi. Bunday telegrammalar faqat telegraf aloqasi bo‘lgan punktlarga manzillanishi mumkin.

119. “Tasdiqlangan” telegrammalarida aloqa korxonasi telegrammada xabar qilinayotgan qandaydir faktni, jo‘natuvchining imzosini yoki telegrammada yuborilayotgan ishonchnomani tasdiqlashi mumkin.

Iste’molchi telegrammada xabar qilinayotgan faktni tasdiqlovchi rasmiy ma’lumotnomani, guvohnomani yoki boshqa hujjatni taqdim etishi kerak.

Tasdiqlangan telegrammalar belgilangan tartibda rasmiylashtiriladi.

120. “Sxemali” telegrammalar aynan bir xil matnni aloqa korxonasi tomonidan oldindan tuzilgan, ro‘yxatdan o‘tkazilgan va kiritilgan sxema bo‘yicha turli telegraf punktlariga uzatilishini ta’minlaydi. Sxemali telegrammalar yuridik shaxslar tomonidan berilishi mumkin.

121. Telegraf jo‘natmalarini manzillash O‘zbekiston Respublikasining “Davlat tili haqida”gi Qonuniga muvofiq amalga oshiriladi.

Davlatlararo axborot va jo‘natmalar ikki tomonlama bitimlar, shuningdek, xalqaro bitimlar va shartnomalar bilan belgilangan tillarda ishlov beriladi.

Telegrammaning manzili:

xat-xabarlar O‘zbekiston Respublikasida hududida manzillanganda davlat yoki rus tilida, bundan tashqari, Qoraqalpog‘iston Respublikasiga qoraqalpoq tilida;

Mustaqil Davlatlar Hamdo‘stligi davlatlariga yuborilganda — rus tilida yoki belgilangan mamlakat tilida;

uzoq xorij mamlakatlariga manzillanganda — belgilangan mamlakat tilida, lotin alifbosi harflari bilan yozilgan bo‘lishi kerak.

122. Telegrammalar ochiq (umumqabul qilingan) yoki shartli (kodlangan) tilda yozilishi mumkin. Agar yozuv davlat tilida yoki rus tilida tuzilgan bo‘lsa, harflar va raqamlar bilan ko‘rsatilgan zavod, savdo belgilari va markalari yoki faqat raqamlardan iborat bo‘lgan statistik va boshqa ma’lumotlarni o‘z ichiga olsa, telegramma ochiq (umuqabul qilingan) tilda yozilgan deb hisoblanadi. Jismoniy shaxslardan telegrammalar faqat ochiq tilda (umuqabul qilingan) qabul qilinadi.

Agar yozuv shartli belgilar yoki shartli qiymatga ega bo‘lgan oddiy so‘zlar yordamida tuzilgan bo‘lsa, telegramma shartli (kodlangan) tilda yoziladi deb hisoblanadi. Bunday telegrammalar faqat yuridik shaxslardan qabul qilinadi.

123. Tarkibida axloqsiz, haqoratli va inson qadr-qimmatini kamsituvchi so‘zlar, shuningdek, O‘zbekiston Respublikasining xavfsizligi va davlat manfaatlariga qarshi qaratilgan matn bo‘lgan hamda faqat manzildan iborat (matnsiz) telegrammalar qabul qilinmaydi.

124. Respublika hududida iste’molchilarga telegraf xizmatlarini ko‘rsatish mahalliy vaqtni ko‘rsatgan holda amalga oshiriladi.

125. Aloqa korxonalarida telegrammani qabul qilish belgilangan ish rejimiga muvofiq amalga oshiriladi.

126. Aloqa korxonalari iste’molchilarga xizmat ko‘rsatish madaniyatini, telegraf xabarlarining sir saqlanishini ta’minlashlari shart.

127. Telegraf tarmog‘idagi abonent telegraf stansiyalari va teleks tarmoqlari iste’molchilarga tarmog‘iga va teleks tarmog‘iga ulangan korxonalar va tashkilotlar o‘rtasida to‘g‘ridan-to‘g‘ri so‘zlashuvlarni olib borish va axborotni uzatish imkonini yaratib beradi. Iste’molchilarning abonent qurilmalarini abonent telegraf stansiyasiga va teleks xalqaro tarmog‘iga ulash iste’molchilar va aloqa korxonalari o‘rtasida tuzilgan shartnomalar bilan rasmiylashtiriladi.

128. Telegraf kanallari aloqa korxonasi va iste’molchi o‘rtasidagi shartnoma asosida ijaraga beriladi. Telegraf kanallarini ijaraga berish tartibi qonunchilik hujjatlari bilan belgilanadi.

129. Iste’molchining xohishiga ko‘ra aloqa korxonasi tomonidan quyidagi qo‘shimcha telegraf aloqa xizmatlari ko‘rsatilishi mumkin:

a) iste’molchining og‘zaki arizalari bo‘yicha:

berilgan telegrammani bekor qilish yoki telegrammani yuborishdan avval uning manzilini o‘zgartirish;

telegrammani adresatga yetkazilgan (O‘zbekiston Respublikasi hududida) kundan keyin 2 oy ichida uning topshirilganligining tasdig‘ini olish;

“talab qilingunga qadar” belgisi bilan manzillangan telegrammalarni belgilangan bir oy muddatdan tashqari, keyingi bir oy mobaynida saqlab turish;

telegramma berilgan kundan boshlab ikki oy mobaynida telegrammaning tasdiqlangan nusxasini olish;

b) iste’molchining yozma arizasi bo‘yicha:

telegrammani boshqa manzilga qayta jo‘natish yoki yetkazib berish;

telegrammalarni pochta qutilarida va abonent shkaflarida qoldirish;

o‘zlarining telegrammalari, shu jumladan, telegramma jo‘natuvchilarining manzillari to‘g‘risidagi barcha ma’lumotlarni jo‘natuvchilarga va adresatlarga berish.

130. Aloqa korxonalari mazkur Qoidalarga zid bo‘lmagan va amalda bajarilishi mumkin boshqa xizmatlarni ham ko‘rsatishi mumkin.

131. Ma’lumotlar uzatish tarmog‘i xizmatlari ro‘yxati operator yoki provayder hamda abonent o‘rtasida tuziladigan ma’lumotlar uzatish tarmog‘i xizmatlarini ko‘rsatish shartnomasida belgilangan bo‘lishi kerak.

132. Ma’lumotlar uzatish tarmog‘i orqali xizmatlarning quyidagi turlari taqdim etilishi mumkin:

ma’lumotlar uzatish tarmog‘idan foydalanish (turli standartlar bo‘yicha), trafik tranziti, shuningdek, ma’lumotlar uzatishning xalqaro tarmoqlaridan, jumladan, Internetdan foydalanish;

real vaqtda axborot resurslari va axborot tizimlaridan foydalanish;

elektron xabarlar qabul qilish va uzatish (shu jumladan, elektron pochta);

konfidensial axborotni kriptografik va boshqacha muhofaza qilish;

kichik (quyi) tarmoq ajratish;

domen va domen nomlari tizimini ro‘yxatga olish va olib borish;

IP-adres ajratish va tutib turish;

IP-telefoniya va IP-televideniye (IPTV);

xosting xizmatlari.

Operator yoki provayder qonunchilik hujjatlariga muvofiq ma’lumotlar uzatish tarmog‘ining boshqa xizmatlarini ham ko‘rsatishi mumkin.

133. Wi-Fi xizmati tashkilotchisi bo‘lgan abonent-yuridik shaxs tomonidan cheklangan doiradagi foydalanuvchilarga bepul yoki pullik asosda Wi-Fi xizmatlari ko‘rsatishi mumkin. Foydalanuvchilarning cheklangan doirasini aniqlash shartlari Wi-Fi xizmati tashkilotchisi tomonidan belgilanadi. Wi-Fi xizmatini ko‘rsatishda sessiyaning amal qilish davomiyligi 24 soatdan oshmasligi kerak.

134. Wi-Fi xizmati tashkilotchisi o‘z hududida bepul Wi-Fi xizmatini tashkil etish operator yoki provayder bilan tuzilgan shartnomaga muvofiq operator yoki provayderning apparat-dasturiy vositalari asosida amalga oshirilishi mumkin.

135. Wi-Fi xizmati tashkilotchisi:

operator yoki provayder bilan birgalikda, foydalanuvchilarning shaxsini identifikatsiyalash hamda qonunchilik hujjatlarida belgilangan tartibda foydalanilgan veb-resurslari (log-fayllar) hisobini yuritish bo‘yicha apparat-texnik chora-tadbirlar ko‘rishi;

operator yoki provayder bilan birgalikda, axborot resurslari himoya qilinishini ta’minlashga, O‘zbekiston Respublikasining mavjud konstitutsiyaviy tuzumini, hududiy yaxlitligini zo‘rlik bilan o‘zgartirishga da’vat etishga, urush, zo‘ravonlik va terrorizmni, shuningdek, diniy ekstremizm, separatizm va fundamentalizm g‘oyalarini targ‘ib qilishga, milliy, irqiy, etnik yoki diniy adovat qo‘zg‘atuvchi axborotni, shuningdek, pornografiyani targ‘ib qilishga qaratilgan axborotning va tarqatilishi qonunchilik hujjatlari bilan taqiqlangan boshqa axborotning tarqatilishiga yo‘l qo‘ymaslikka qaratilgan choralarni ko‘rishi kerak.

136. Wi-Fi xizmati abonent — yuridik shaxs tomonidan ko‘rsatilgan taqdirda, abonent — yuridik shaxs va operator (provayder) o‘rtasida tuziladigan shartnomada foydalanuvchilarga Wi-Fi xizmati taqdim etishi to‘g‘risida ma’lumot ko‘rsatilishi, shuningdek, foydalanuvchilar shaxsini identifikatsiyalash bo‘yicha ko‘riladigan choralar belgilanishi zarur.

137. Foydalanuvchilar shaxsini identifikatsiyalash mobil telefon raqami bo‘yicha yoki shaxsni tasdiqlovchi hujjatdagi ma’lumotlar asosida amalga oshirilgan boshqa ro‘yxatdan o‘tish ma’lumotlari (aviachiptalar, temir yo‘l chiptalari, mehmonxonada ro‘yxatdan o‘tish ma’lumotlari va shu kabi boshqa ma’lumotlar), shuningdek, Push-xabarlar (abonent qurilmasi ekranida aks etuvchi qisqa xabar) orqali amalga oshirilishi mumkin.

Foydalanuvchini mobil telefon raqami bo‘yicha identifikatsiyalashda, foydalanuvchining mobil telefon raqamiga SMS-xabar vositasida bir martalik parol (One Time Password — OTP) yuboriladi va foydalanuvchi autentifikatsiya qilinadi. Bunda bir martalik parolning (One Time Password — OTP) aktivlik muddati cheklangan bo‘lishi (10 daqiqadan ko‘p bo‘lmasligi) kerak.

138. Operator (provayder) O‘zbekiston Respublikasining “Iste’molchilarning huquqlarini himoya qilish to‘g‘risida”gi Qonuniga muvofiq abonentlarga o‘zi tomonidan ko‘rsatiladigan ma’lumotlar uzatish xizmatlari to‘g‘risida o‘z vaqtida zarur, to‘g‘ri va tushunarli ma’lumot berishi shart.

Operator (provayder) tomonidan abonentga quyidagi ma’lumotlar taqdim etilishi zarur:

operatorning (provayderning) nomi, pochta manzili, foydalanuvchilar va abonentlar bilan hamkorlik qiladigan filiallarining nomi, ular joylashgan joy, ish tartibi va aloqa telefonlari;

operatorga (provayderga) berilgan litsenziya raqami va amal qilish muddati;

ma’lumotlar uzatish tarmog‘i xizmatlarini ko‘rsatish tartibi va shartlari;

foydalaniladigan abonent interfeyslari va ma’lumotlar uzatish protokollari;

ma’lumotlar uzatish tarmog‘i xizmatlarini ko‘rsatishdagi cheklovlar;

tarif rejalari;

muayyan tarif rejasi, marketing kampaniyalari doirasida yoki tadbirlar o‘tkazish davrida ma’lumotlar uzatish tarmog‘idan foydalanish xizmatlarini taqdim etishda imtiyozlar yoki chegirmalar;

ma’lumotlar uzatish tarmog‘idan foydalanishning bepul va pullik xizmatlari ro‘yxati;

ma’lumotlar uzatish tarmog‘i xizmatlariga haq to‘lash muddatlari va shakllari;

abonentlarning ariza va shikoyatlarini ko‘rib chiqish tartibi;

axborot-ma’lumot xizmatining va texnik ta’minlash xizmatining telefon raqamlari (mavjud bo‘lganda);

axborot-ma’lumot berish bo‘yicha xizmat ko‘rsatish tizimi to‘g‘risidagi ma’lumotlar;

ma’lumotlar uzatish tarmog‘i xizmatlarini ko‘rsatish hududlarida texnik imkoniyatlari mavjudligi to‘g‘risidagi ma’lumotlar.

139. Operator (provayder) bilan abonent o‘rtasida tuziladigan shartnomada quyidagi ma’lumotlar majburiy ravishda ko‘rsatilishi shart:

shartnoma tuzilgan joy va sana;

operatorning (provayderning) nomi;

operatorning (provayderning) hisobvarag‘i rekvizitlari;

operatorga (provayderga) berilgan litsenziya rekvizitlari;

shartnomaning amal qilish muddati;

abonent to‘g‘risidagi ma’lumotlar;

hisob-kitob shakli va tartibi;

tomonlarning huquqlari, majburiyatlari va javobgarligi;

tarif rejasi, xizmatlarning narxlari;

xizmatning qaysi texnologiya bo‘yicha taqdim etilishi;

shikastlanishlarni bartaraf etish muddatlari;

sifat ko‘rsatkichlari (ma’lumotlar uzatishning maksimal tezligi, ma’lumotlar uzatishning minimal kafolatlangan tezligi, ma’lumotlar uzatish kechikishining maksimal vaqti);

fors-major holati;

ko‘rsatiladigan xizmatlar ro‘yxati (zarur bo‘lganda).

Shartnomada tomonlar o‘rtasidagi kelishuvga asosan qonunchilik hujjatlariga muvofiq boshqa ma’lumotlar ham ko‘rsatilishi mumkin.

140. Abonent operator (provayder) bilan shartnoma tuzganidan keyin, operator (provayder) ulanish usuliga bog‘liq holda, abonentga ulanish uchun zarur parametrlarni yetkazadi (IP-adres va boshqa adres rekvizitlari), ma’lumotlar uzatish tarmog‘ida ishlash va foydalanish tartibi to‘g‘risida yo‘l-yo‘riq ko‘rsatadi, foydalanuvchining zarur uskunasini (kompyuter, modem, faks) va zarur dasturiy ta’minotni tavsiya qiladi.

141. Operator (provayder) ma’lumotlar uzatish tarmog‘i xizmatlarini ko‘rsatish bilan bog‘liq bo‘lgan axborotni abonentlarga taqdim etish maqsadida axborot-ma’lumot berish bo‘yicha xizmat ko‘rsatish tizimini yaratadi.

Quyidagi ma’lumotlar operator (provayder) tomonidan abonentning so‘roviga muvofiq 24 soat mobaynida hech qanday cheklovlarsiz taqdim etilishi shart:

ma’lumotlar uzatish tarmog‘ining ko‘rsatiladigan xizmatlari to‘g‘risidagi;

ma’lumotlar uzatish tarmog‘idan foydalanish xizmatlariga bo‘lgan tariflar to‘g‘risidagi;

abonentga uning shaxsiy hisobvarag‘ining holati va ma’lumotlar uzatish tarmog‘i xizmatlaridan foydalanish haqini to‘lash bo‘yicha qarzdorlik to‘g‘risidagi, jumladan, abonentga ulangan xizmatlar: ma’lumotlar uzatish vaqti, tezligi, olingan va (yoki) uzatilgan axborot hajmi, shuningdek, limitlangan trafikli tariflardagi trafik qoldig‘i to‘g‘risidagi;

texnik nosozliklar to‘g‘risidagi.

142. Jamoat foydalanish joyining internet-provayderi quyidagi xizmatlarni taqdim etishi mumkin:

a) Internet tarmog‘idan foydalana olish;

b) Internet tarmog‘iga ulanish va tarmoq resurslaridan foydalanish masalalari bo‘yicha maslahatlar;

v) jamoat foydalanish joyi internet-provayderining kompyuteridan fayllarni foydalanuvchi kompyuteriga uzatish.

Jamoat foydalanish joyining internet-provayderi tomonidan qonunchilik hujjatlarida taqiqlanmagan boshqa xizmatlar ham ko‘rsatilishi mumkin.

143. Taqdim etilayotgan xizmatlar uchun tariflar jamoat foydalanish joyining internet-provayderi tomonidan mustaqil ravishda o‘rnatiladi.

144. Abonentlarga operator (provayder) tomonidan ko‘rsatiladigan mobil aloqa xizmatlarining ro‘yxati operatorga tegishli bo‘lgan mobil aloqa tarmog‘ining texnik imkoniyatlarini hisobga olgan holda operator (provayder) tomonidan belgilanadi.

145. Abonentlarga ko‘rsatiladigan mobil aloqa xizmatlari shartnoma shartlariga, shuningdek, operatorning (provayderning) xizmatlar to‘g‘risidagi axborotiga muvofiq bo‘lishi kerak.

146. Operator (provayder) abonentga xizmat ko‘rsatish zonasida mobil aloqa xizmatlaridan kechayu-kunduz foydalanish imkonini ta’minlashga majbur.

147. Operator (provayder) axborot-ma’lumot xizmati tizimiga ega bo‘lishi va pullik hamda bepul axborot-ma’lumot xizmatlarini ko‘rsatishga majbur.

Operator yoki provayder tarmoq ichida uning axborot-ma’lumot xizmatiga bepul qo‘ng‘iroqlar qilish imkonini ta’minlashi kerak.

148. Operator (provayder) pullik axborot-ma’lumot xizmatlarining ro‘yxatini mustaqil ravishda belgilaydi.

149. Operator (provayder) taqdim etiladigan xizmatlar, ularni taqdim etish va mobil aloqa xizmatlaridan foydalanish tartibi, ushbu xizmatlarga tariflar, mobil aloqadan foydalanishda cheklanishlar to‘g‘risida abonentlarni, shuningdek, mobil aloqa xizmatlarini ko‘rsatish uchun shartnomani tuzish istagi bo‘lgan jismoniy va yuridik shaxslarni xabardor qilishga majbur.

Xizmatlarning pullik ekanligi to‘g‘risida abonentlarni oldindan xabardor qilmasdan ayrim pullik xizmatlar uchun to‘lov undirilgan holda ushbu xatti-harakat ko‘rsatilmagan xizmatlar uchun undirilgan to‘lovga tenglashtiriladi.

Tariflar, xizmatlarni ko‘rsatish tartibi, hisob-kitoblar shakli va tartibi o‘zgargan holda, operator (provayder) bu haqda ommaviy axborot vositalari orqali va operator (provayder) tomonidan tanlangan istalgan boshqa usulda abonentni xabardor qilishi lozim.

Operator tarmog‘ida mobil aloqa xizmatlari ko‘rsatilishining to‘xtalishiga olib keladigan yirik avariyalar yuz berganda hamda uchinchi shaxs talabi bo‘yicha ijara asosida o‘rnatilgan telekommunikatsiya inshootlarini ko‘chirish zarurati yuzaga kelganda operator (provayder) abonentlarni bu haqda, shuningdek, xizmatlarni ko‘rsatish tiklanishining taxminiy muddatlari to‘g‘risida ommaviy axborot vositalari orqali yoki operator (provayder) tomonidan tanlangan istalgan boshqa usulda xabardor qilishga majbur.

150. Mobil aloqaning milliy rouming xizmati yuridik va jismoniy shaxslar — mahalliy operatorlarning (provayderlarning) abonentlariga ular O‘zbekiston Respublikasi hududida bo‘lganda xizmat ko‘rsatuvchi operatorlarning (provayderlarning) xizmat ko‘rsatish zonasida mahalliy operatorning (provayderning) xizmat ko‘rsatish zonasining tashqarisida ular foydalanishlari uchun taqdim etiladi.

151. Mobil aloqaning xalqaro rouming xizmati yuridik va jismoniy shaxslar — mahalliy operatorlarning (provayderlarning) abonentlariga ular O‘zbekiston Respublikasining hududidan tashqarida bo‘lganda xorijiy operatorlar — rouming-sheriklarning xizmat ko‘rsatish zonasida hamda yuridik va jismoniy shaxslar — xorijiy operatorlar — rouming-sheriklarning abonentlariga ular O‘zbekiston Respublikasi hududida mahalliy operatorlarning (provayderlarning) xizmat ko‘rsatish zonasida bo‘lganda foydalanish uchun taqdim etiladi.

152. Milliy va xalqaro rouming xizmatlari, odatda, avtomatik ravishda amalga oshiriladi.

Avtomatik roumingni tashkil qilishning imkoni bo‘lmaganda “mexanik” yoki “plastik” roumingni tashkil qilishga yo‘l qo‘yiladi.

Aynan bitta operator tarmog‘i ichida amalga oshiriladigan texnologik rouming (mobil operator tomonidan bir davlatning bir hududida qayd qilingan abonentga o‘sha davlatni boshqa hududida ham telekommunikatsiya xizmatlari taqdim qilinishi) rouming xizmati hisoblanmaydi.

153. Avtomatik roumingni tashkil qilishda O‘zbekiston Respublikasi telekommunikatsiya tarmoqlarida qabul qilingan signalizatsiya tizimlarining tegishli protokollari va spetsifikatsiyalaridan foydalanish kerak.

154. Rouming xizmatini taqdim etish mobil aloqa operatorlari (provayderlari) o‘rtasida rouming to‘g‘risidagi shartnoma asosida amalga oshiriladi.

155. Xalqaro roumingni tashkil qilish va taqdim etish shartnomasi O‘zbekiston Respublikasi mobil aloqa operatorlari (provayderlari) va xorijiy operatorlar o‘rtasida, milliy roumingni esa — O‘zbekiston Respublikasi mobil aloqa operatorlari (provayderlari) o‘rtasida tuziladi.

156. Mobil aloqa operatorlari (provayderlari) o‘rtasida rouming to‘g‘risidagi shartnoma qonunchilik hujjatlarida belgilangan tartibda rasmiylashtiriladi va ro‘yxatga olinadi.

157. Rouming taqdim etish uchun rouming to‘g‘risidagi shartnomaning amal qilish muddati operator (provayder) litsenziyasining amal qilish muddatidan oshmasligi kerak.

158. Mahalliy operator (provayder) va xorijiy operator o‘rtasidagi rouming to‘g‘risidagi shartnoma xalqaro huquq normalariga va O‘zbekiston Respublikasining amaldagi qonunchilik hujjatlariga muvofiq tuziladi.

159. Mahalliy operator (provayder) mobil aloqa xizmatlarini taqdim etish uchun abonent bilan shartnoma tuzayotganda roumingni taqdim etish shartlari to‘g‘risida uni xabardor qilishi kerak.

160. Xizmat ko‘rsatuvchi operator abonentga uning mahalliy operator (provayder) bilan shartnoma munosabatlarida belgilangan xizmatlar ro‘yxatini taqdim etishga majbur.

161. Mahalliy operator (provayder) roumer haqiqiyligini identifikatsiyalamasdan xizmat ko‘rsatuvchi operator tomonidan rouming taqdim etilishi uchun javobgar bo‘lmaydi.

162. Rouming xizmati uchun abonent tomonidan mahalliy operatorga (provayderga) haq to‘lash ular o‘rtasida tuzilgan mobil aloqa xizmatlarini taqdim etish shartnomasining shartlariga muvofiq amalga oshiriladi.

163. Milliy rouming xizmatlarini taqdim etishda mahalliy operatorlar (provayderlar) o‘rtasida yuzaga kelgan nizolar O‘zbekiston Respublikasining qonunchilik hujjatlariga muvofiq sudi tomonidan hal qilinadi.

164. Xalqaro rouming xizmatini taqdim etishda mahalliy operator (provayder) va xorijiy operator (yoki tizim hosil qiluvchi rouming-sherik) o‘rtasida yuzaga kelgan nizolar O‘zbekiston Respublikasining qonunchilik hujjatlari va xalqaro huquq normalariga muvofiq hal qilinadi.

165. Mahalliy va xizmat ko‘rsatuvchi operatorlar (provayderlar) roumingni tashkil qilishda axborot xavfsizligini ta’minlash talablariga rioya qilishlari shart.

166. Roumer-tashrif buyuruvchilarning abonent terminallarini O‘zbekiston Respublikasi hududiga olib kirish O‘zbekiston Respublikasining amaldagi qonunchilik hujjatlari bilan tartibga solinadi.

167. Abonent uchun abonent raqamini ko‘chirish xizmati mobil aloqa operatorlari (provayderlari) tomonidan taqdim etiladi.

168. Abonent raqamini ko‘chirish abonentga 30 kalendar kun mobaynida ko‘pi bilan bir marta taqdim etiladi.

169. Ko‘chiriladigan raqamlar sifatida faqat mobil aloqa operatorlari (provayderlari) uchun ajratilgan raqamlar qo‘llanilishi mumkin.

Raqamni ko‘chirish oqibatida raqamni terish formatining o‘zgartirilishiga yo‘l qo‘yilmaydi.

170. Abonent raqamlarini ko‘chirish xizmatini taqdim etish uchun foydalaniladigan raqamlarning mobil aloqa tarmoqlariga va aksincha ko‘chirilishi taqiqlanadi.

171. KRMB operatori abonent raqami ko‘chirilishini ta’minlash uchun mobil aloqa operatorlari (provayderlari) tomonidan taqdim etiladigan axborotni yig‘ish, uni qayta ishlash, saqlash va uzatish jarayonlarini avtomatlashtiradi va muvofiqlashtiradi.

172. Abonent raqamlarini ko‘chirish, ko‘chirilgan abonent raqamlari to‘g‘risidagi ma’lumotlarni o‘zgartirish, abonent raqamini ko‘chirish xizmatini to‘xtatib turish va ko‘chirilgan abonent raqamini birlamchi operatorga qaytarish jarayoniga tegishli axborot bilan almashish KRMB operatori orqali amalga oshiriladi.

173. KRMBni shakllantirish, yuritish, ishlashi va texnik kuzatuvi, shu jumladan, undagi axborot va ma’lumotlarni yig‘ish, saqlash, qayta ishlash, uzatish, shuningdek, KRMBdan foydalana olish imkoniyatini taqdim etish O‘zbekiston Respublikasining “Shaxsga doir ma’lumotlar to‘g‘risida”gi Qonuni talablariga rioya qilgan holda KRMB operatori tomonidan ta’minlanadi.

174. Mobil aloqa tarmoqlarining abonent raqamlari to‘g‘risidagi axborot va abonent raqamini ko‘chirish jarayonini amalga oshirish uchun zarur bo‘lgan boshqa ma’lumotlar mobil aloqa operatorlari (provayderlari) tomonidan O‘zbekiston Respublikasining “Shaxsga doir ma’lumotlar to‘g‘risida”gi Qonuni talablariga rioya qilgan holda KRMB operatoriga taqdim etiladi.

175. Mobil aloqa tarmoqlari operatorlarining (provayderlarining) KRMBdan foydalanishi KRMB operatori va mobil aloqa tarmoqlari operatorlari (provayderlari) o‘rtasida tuzilgan shartnomaga muvofiq amalga oshiriladi.

176. KRMBda quyidagi axborotlar saqlanadi va (yoki) qayta ishlanadi:

mobil aloqa xizmatlarini ko‘rsatish to‘g‘risida boshqa mobil aloqa operatorlari (provayderlari) bilan yangi shartnomalarni tuzishda abonentlarda saqlanadigan ko‘chirilgan abonent raqamlari to‘g‘risida;

abonent raqamini ko‘chirish sanasi va vaqti to‘g‘risida;

raqamlash resursining mobil aloqa operatoriga (provayderiga) tegishliligini ko‘rsatib, belgilangan tartibda mobil aloqa operatorlariga (provayderlariga) ajratilgan raqamlash to‘g‘risida.

177. KRMB ishlashini va texnik kuzatuvini ta’minlash maqsadida KRMB operatori quyidagi tadbirlarni amalga oshiradi:

a) KRMB kechayu kunduz ishlashini ta’minlash;

b) mobil aloqa operatorlaridan (provayderlaridan) kelib tushadigan axborotni yig‘ish, saqlash va qayta ishlash;

v) KRMBdagi axborot muhofazasini ta’minlash;

g) abonent raqamini ko‘chirish va to‘g‘ri marshrutlashni amalga oshirish uchun zarur bo‘lgan, KRMBda mavjud bo‘lgan axborotdan aloqa operatorlarining foydalana olish imkoniyatlarini taqdim etish.

178. KRMBdagi axborotni muhofaza qilish, shuningdek, undan foydalana olish qonunchilik hujjatlarida belgilangan talablarga rioya qilgan holda ta’minlanadi.

179. Mobil aloqa tarmoqlarida abonent raqamini ko‘chirish uchun talabnoma (bundan buyon matnda talabnoma deb yuritiladi) abonentdan quyidagi tartibda qabul qilinadi:

a) abonent retsipiyentning ofisida mijozlarga xizmat ko‘rsatish punktida shaxsini tasdiqlovchi hujjatini taqdim etgan holda;

b) abonent shaxsini tasdiqlovchi hujjatdagi ma’lumotlari kiritgan holda retsipiyentning rasmiy veb-saytida elektron ko‘rinishda;

v) abonent shaxsini tasdiqlovchi hujjatdagi ma’lumotlarni mobil ilova orqali elektron ko‘rinishda.

Donor bilan mobil aloqa xizmatlarini ko‘rsatish to‘g‘risidagi shartnoma tuzilgan paytdan boshlab abonentda uning shaxsiy ma’lumotlarida o‘zgarishlar (familiyasi o‘zgarganda, pasporti almashganda va h.k.) yuz bergan holda, talabnomani berishdan oldin donor bilan tuzilgan shartnomaga tegishli o‘zgartirishlar kiritilishi kerak.

180. Mobil aloqa tarmoqlarida abonent raqamlarini ko‘chirish abonentdan olingan talabnoma asosida 8 ish soatidan ko‘p bo‘lmagan vaqt davomida mobil aloqa operatori (provayderi) tomonidan ta’minlanadi.

181. Retsipiyent:

abonentdan talabnoma qabul qiladi;

talabnoma to‘g‘ri to‘ldirilganligini tekshiradi, uni ro‘yxatga oladi va KRMBga so‘rov yuboradi yoki KRMB tomonidan talabnomani mobil ilova orqali olinganligini tasdiqlaydi;

abonent bilan yangi shartnoma tuzadi va retsipiyentga biriktirilgan hamda abonent tomonidan talabnomada ko‘rsatilgan tarif rejasiga ulangan raqamlash diapazonidagi vaqtincha raqamli yangi SIM kartani beradi.

Elektron ro‘yxatdan o‘tgandan keyin abonent SIM-kartani olish va shartnomani imzolash uchun operator (provayder) ofisiga kelishi kerakligi to‘g‘risida xabardor qilinadi. Agar retsipiyent abonentga eSIM qo‘llab-quvvatlash bilan qurilmalar uchun xizmatlarni taqdim etsa, operator (provayder) shartnomani masofadan tuzish imkoniyati bilan aktiv eSIMga raqam ko‘chirilishini taklif qilishi mumkin.

182. Shartnoma tuzish paytida vaqtincha raqamli SIM-karta aktivlashtiriladi va abonent haqiqiy ko‘chirilguncha retsipiyentning aloqa xizmatlaridan foydalanishi mumkin.

Abonent raqamini ko‘chirish rad etilganda abonent unga berilgan SIM-karta orqali retsipiyentning aloqa xizmatlaridan foydalanishni davom ettirishi mumkin. Bunda aynan shu retsipiyentga abonent raqamini ko‘chirish uchun talabnoma takroran berilganda aloqa xizmatlarini ko‘rsatish to‘g‘risida yangi shartnomani tuzish talab etilmaydi.

183. Retsipiyentdan abonent raqamini ko‘chirish to‘g‘risida KRMBga berilgan so‘rovda quyidagi ma’lumotlar bo‘ladi:

a) jismoniy shaxslar uchun:

abonentning pasport ma’lumotlari (pasport turi, seriyasi va raqami, JSHSHIR, pasport berilgan sana va kim tomonidan berilganligi);

abonent raqami;

b) yuridik shaxslar uchun:

tashkilotning STIR;

abonent raqami yoki abonent raqamlarining ro‘yxati;

abonent raqamlarini to‘liq yoki qisman ko‘chirishni tanlash to‘g‘risidagi ko‘rsatma.

Bunda, abonent raqamining to‘liq ko‘chirilishini tanlash abonent tomonidan abonent raqamlari ro‘yxatida aks ettirilgan barcha abonent raqamlari ko‘chirilishini ko‘zda tutadi. Agar abonent raqamlaridan bittasini bo‘lsa ham ko‘chirish rad etilgan bo‘lsa, u holda so‘rov ro‘yxatda aks ettirilgan barcha abonent raqamlari bo‘yicha to‘liq rad etilgan hisoblanadi.

Abonent raqami qisman ko‘chirilishini tanlash ko‘chirish uchun donor tomonidan tasdiqlangan abonent raqamlarining ro‘yxatida abonent tomonidan aks ettirilgan abonent raqamlarining faqat qismi ko‘chirilishini ko‘zda tutadi. Bunda bir yoki bir nechta abonent raqamlari bo‘yicha ko‘chirishni rad etish ro‘yxatdagi donor tasdiqlagan abonent raqamlarini ko‘chirish uchun rad javobi hisoblanmaydi.

184. KRMB operatori retsipiyentdan abonent raqamini ko‘chirish so‘rovini olganda quyidagi shartlarga rioya qilinganligini tekshiradi:

KRMBda retsipiyent tomonidan mobil aloqa tarmoqlarida abonent raqamini ko‘chirish uchun so‘rovning to‘g‘ri to‘ldirilganligini. Bunda to‘g‘ri to‘ldirilganligi so‘rovning talabnomaga muvofiq to‘g‘ri va aniq to‘ldirilganligi bilan aniqlanadi. Ushbu shart bajarilmaganda KRMB operatori retsipiyentni xabardor qilgan holda talabnomani rad etadi. Retsipiyent kamchiliklarni bartaraf etadi va KRMB operatoriga yangi so‘rovni yuboradi;

abonent raqamini ko‘chirish imkoniyatini tasdiqlash — oxirgi ko‘chirilgan paytdan boshlab kamida 30 kalendar kuni o‘tganligi, bundan xato ko‘chirilgan holatlar mustasno;

abonent raqamini ko‘chirish uchun aktiv talabnomalar yo‘qligi.

Ushbu bandning uchinchi va to‘rtinchi xatboshilaridagi shartlar bajarilmagan holda KRMB operatori retsipiyentga abonent raqamini ko‘chirish rad etilganligi to‘g‘risida xabar qiladi, bu haqda retsipiyent vaqtincha raqamli SIM kartaga SMS xabarni yuborish orqali, rad etish sababini ko‘rsatgan holda abonentni xabardor qiladi.

185. Retsipiyentdan abonent raqamini ko‘chirish to‘g‘risidagi so‘rov qabul qilinganda KRMB operatori donorga abonent raqamini ko‘chirish to‘g‘risidagi so‘rovni yuborib, retsipiyentga keyin ko‘rib chiqish uchun talabnoma qabul qilinganligi to‘g‘risida xabar qiladi.

186. Donor KRMB operatoridan abonent raqamini ko‘chirish so‘rovini olganda quyidagi shartlarga rioya qilinganligini tekshiradi:

abonent shaxsiy ma’lumotlarining ishonchliligini. Bunda ishonchlilik KRMBdan so‘rovda kelib tushgan shaxsiy ma’lumotlarning donor va abonent o‘rtasidagi mobil aloqa xizmatlarini ko‘rsatish to‘g‘risidagi shartnomada ko‘rsatilgan ma’lumotlar bilan mosligi bilan aniqlanadi;

donor bilan tuzilgan aloqa xizmatlarini ko‘rsatish to‘g‘risidagi shartnoma bo‘yicha donor tomonidan tekshirish paytida abonent qarzlarining yo‘qligi, rouming xizmatlaridan tashqari;

abonentda donor oldidagi shartnoma bo‘yicha majburiyatlarining yo‘qligi.

Bunda mazkur bandda ko‘rsatilgan shartlardan bittasi bo‘lsa ham bajarilmasa, donor KRMB operatoriga abonent raqamini ko‘chirishni rad etish to‘g‘risidagi asoslangan bildirishnoma yuboradi, bu haqda KRMB operatori retsipiyentga xabar qiladi, retsipiyent esa, o‘z navbatida, vaqtincha raqamli SIM kartaga SMS-xabarni yuborib, rad etish sababini ko‘rsatgan holda abonentni abonent raqamini ko‘chirish rad etilganligi to‘g‘risida xabardor qiladi.

187. Donor tomonidan talabnomani ko‘rib chiqish muddati KRMB operatoridan so‘rovni olgan paytdan boshlab hisoblanadi va 3 ish soatidan ko‘p bo‘lmagan vaqtni tashkil qiladi. Bunda ko‘rib chiqish ajratilgan muddatdan oshib ketganda KRMB avtomatik ravishda retsipiyent va donorga abonent raqami ko‘chirilishi mumkinligi to‘g‘risida xabar qiladi, KRMB talabnomani o‘z vaqtida tasdiqlamagan donor tomonidan buzilishga yo‘l qo‘yilganligini qayd qiladi.

188. Donor tomonidan KRMB operatoriga abonent raqamini ko‘chirish mumkinligini tasdiqlash mobil aloqa xizmatlarini ko‘rsatish to‘g‘risidagi shartnomani bekor qilish uchun asos bo‘lib hisoblanadi.

189. Donordan abonent raqamini ko‘chirish imkoniyati to‘g‘risida bildirishnomani olgandan keyin KRMB operatori retsipiyent va donorga abonent raqamini texnik ko‘chirish boshlanishi to‘g‘risida xabar qiladi, retsipiyent esa, o‘z navbatida, bu haqda vaqtincha raqamli SIM kartaga SMS-xabarni yuborib abonentni xabardor qiladi.

190. KRMB operatoridan abonent raqamini texnik ko‘chirishni boshlash to‘g‘risidagi xabarni olgandan keyin:

retsipiyent abonent raqamini o‘z ma’lumotlar bazasiga kiritish, shu jumladan, billing tizimlari va abonentlarni identifikatsiyalash ma’lumotlar bazasiga kiritish zarur xatti-harakatlarni bajaradi, shuningdek, SIM-kartadagi vaqtincha raqamni talabnomada abonent tomonidan ko‘chiriladigan sifatida ko‘rsatilgan raqamga almashtiradi va KRMB operatoriga abonent raqamini o‘z tarmog‘ida ro‘yxatga olish ishlari tugallanganligi to‘g‘risida xabar qiladi;

donor abonent raqamini o‘z billing tizimidan chiqarish bo‘yicha kerakli ishlarni bajaradi va abonent deaktivatsiya qilinganligi to‘g‘risida KRMB operatoriga xabar qiladi.

191. KRMB operatori donordan raqam deaktivatsiya qilinganligi to‘g‘risida va retsipiyentdan abonent raqami ro‘yxatga olinganligi to‘g‘risidagi xabarlarni olgandan keyin abonent raqami ko‘chirilganligi to‘g‘risidagi ma’lumotlarni KRMBga kiritadi hamda barcha telekommunikatsiya operatorlarini (provayderlarini) ko‘chirilgan abonent raqami bo‘yicha marshrutlashni o‘zgartirish zarurligi to‘g‘risida xabardor qiladi.

Ajratilgan muddatdan oshib ketgan holda KRMB marshrutlash o‘zgarganligini o‘z vaqtida tasdiqlamagan operator (provayder) tomonidan buzilishga yo‘l qo‘yilganligini qayd qiladi. Buzilish to‘g‘risidagi bunday axborot keyinchalik nazorat qiluvchi vakolatli organni xabardor qilish uchun KRMB bazasida ro‘yxatga olinadi.

192. Telekommunikatsiya operatorlari (provayderlari) KRMBdan operatoridan xabarni olgandan keyin ko‘chirilgan abonent raqami bo‘yicha marshrutlashga o‘zgartirishlar kiritadilar va o‘z tarmoqlarida ishlar tugatilganligi to‘g‘risida KRMB operatoriga tasdiq yuboradilar.

193. KRMB operatori ko‘chirilgan abonent raqami bo‘yicha marshrutlash o‘zgarganligi to‘g‘risida telekommunikatsiya operatorlaridan (provayderlaridan) tasdiqni olganlaridan keyin yoki bu operatsiya uchun ajratilgan muddat oshib ketgan holda barcha telekommunikatsiya operatorlariga (provayderlariga) abonent raqamini ko‘chirish muvaffaqiyatli tugallanganligi to‘g‘risida xabar yuboradi. Ajratilgan muddat oshib ketgan holda KRMB marshrutlash o‘zgarganligini o‘z vaqtida tasdiqlamagan operator (provayder) tomonidan buzilishga yo‘l qo‘yilganligini qayd qiladi. Buzilish to‘g‘risidagi bunday axborot keyinchalik nazorat qiluvchi vakolatli organni xabardor qilish uchun KRMB bazasida ro‘yxatga olinadi.

194. Retsipiyent KRMB operatoridan abonent raqamini ko‘chirish muvaffaqiyatli tugallanganligi to‘g‘risidagi xabarni olgandan keyin bu haqda ko‘chirilgan raqamli SIM kartaga SMS-xabarni yuborish orqali abonentni xabardor qiladi.

195. Donor tomonidan abonent raqamining ko‘chirilishi to‘g‘risida so‘rov tasdiqlanguncha abonent abonent raqamini ko‘chirish xizmatlarini rad etishi mumkin.

196. Avval bir operatordan (provayderdan) boshqa operatorga (provayderga) ko‘chirilgan abonent raqamini ko‘chirish jarayoni abonentning talabnomasi bo‘yicha 183 — 195-bandlarda ko‘rsatilgan ketma-ketlikda bajariladi.

197. KRMB operatori orqali abonent raqamini ko‘chirish protseduralari bilan bog‘liq barcha xatti-harakatlar so‘rov olinganligini majburiy sinxron tasdiqlagan holda bajariladi.

198. Aloqa tarmoqlarida ko‘chirilgan abonent raqamlari uchun ulanishlarning marshrutlanishini ta’minlash uchun quyidagi texnologiyalar qo‘llaniladi:

a) mobil aloqa tarmoqlaridan chaqiruvni boshlab berishda ko‘chirilgan raqamlarning lokal bazasidan foydalangan holda “All Call Query”;

b) qayd qilingan aloqa tarmoqlaridan chaqiruvni boshlab berishda “All Call Query” yoki “Onward Routing”.

199. Operator (provayder) quyidagilarni ta’minlaydi:

ko‘chirilgan abonent raqamlariga o‘z tarmog‘idan ulanishlarni to‘g‘ri marshrutlashni ta’minlash uchun zarur bo‘lgan ko‘chirilgan raqamlarning lokal bazasini shakllantirish, uning ishlashi va texnik kuzatish;

KRMB operatoriga talabnomada abonent tomonidan ko‘rsatilgan abonent raqamlari to‘g‘risidagi ma’lumotlarni taqdim etish;

ko‘chirilgan abonent raqamlarini o‘zining raqamlash resursiga kiritish va mazkur Qoidalarida belgilangan tartibda tuzilgan shartnomaning amal qilish muddatida mobil aloqa xizmatlarini ko‘rsatish;

donor tomonidan boshqa operatorning tarmog‘iga ko‘chirilishi kerak bo‘lgan raqamning berilishi;

abonent raqamini ko‘chirish va ko‘chirilgan abonent raqami bo‘yicha o‘z tarmoqlarida xizmatlarni lozim darajada ko‘rsatish uchun o‘z tarmoqlarini texnik jihatdan tayyorlash;

foydalanilayotgan texnologiya, taqdim etilayotgan mobil aloqa xizmatining turi, abonent tomonidan aloqa xizmatlariga haq to‘lash usulidan qat’i nazar mobil aloqa tarmoqlarida abonent raqamlarini ko‘chirish;

aholiga mobil aloqa tarmoqlarida abonent raqamlarini ko‘chirish shartlari to‘g‘risidagi axborotni taqdim etish;

belgilangan muddatlarda retsipiyent va abonent o‘rtasida shartnoma bekor qilinganda ko‘chirilgan abonent raqamini donorga qaytarish.

200. KRMB operatori quyidagilarni ta’minlaydi:

KRMBni shakllantirish va texnik kuzatish hamda operatorlar (provayderlar) tomonidan abonent raqamlarini ko‘chirish uchun uning resurslaridan foydalana olish imkonini yaratish;

abonent raqamlarini ko‘chirish jarayonida yuzaga keladigan masalalar bo‘yicha operatorlar (provayderlar) o‘rtasida o‘zaro ishlashni tashkil etish;

KRMBning ko‘chirilgan abonent raqamlari to‘g‘risidagi axborotni aktuallashtirish (ma’lumotlarni sinxronlash) uchun KRMBga ulangan operatorlarning (provayderlarning) ko‘chirilgan raqamlarning lokal bazasi bilan o‘zaro ishlashi;

ko‘chirilgan abonent raqamlari to‘g‘risidagi axborotni KRMBga kiritish (abonent raqamlarini ko‘chirish jarayonida axborotni yangilash);

ko‘chirilgan abonent raqamlari to‘g‘risidagi ma’lumotlardan ruxsatsiz foydalana olishdan himoyalash;

operatorlarni (provayderlarni) ko‘chirilgan abonent raqamiga xizmat ko‘rsatuvchi mobil aloqa operatorining (provayderining) almashganligi to‘g‘risida xabardor qilish.

201. Abonent raqamlarini ko‘chirish jarayonida yuzaga keladigan retsipiyent va donorning o‘zaro ishlashlari faqat KRMB operatori orqali amalga oshiriladi.

202. KRMBda abonent raqamlarini ko‘chirish jarayoni, shu jumladan, axborot almashish avtomatlashtirilgan rejimda amalga oshiriladi.

203. Mobil aloqa operatorlari (provayderlari) o‘z tarmoqlarida, abonent raqamining ko‘chirilishini ta’minlash bo‘yicha barcha xarajatlarini, shu jumladan, KRMBga ulanish va abonentlarga ko‘chirish jarayonlarida ko‘zda tutilgan SMSlarni jo‘natish uchun aloqa kanallarini ijaraga olish xarajatlarini o‘z hisoblaridan amalga oshiradilar.

204. Mobil aloqa operatorlari (provayderlari) tomonidan abonent raqamlaridan, shu jumladan, ko‘chirilgan abonent raqamlaridan foydalanganlik uchun to‘lov abonentga mobil aloqa xizmatlarini ko‘rsatuvchi operator (provayder) tomonidan amalga oshiriladi.

Abonent raqamini ko‘chirish xizmati uchun abonent tomonidan to‘lanadigan haq miqdori retsipiyent tomonidan mustaqil ravishda belgilanadi.

205. Abonent tomonidan abonent raqamini ko‘chirish xizmati uchun to‘lanadigan haq bir martalik hisoblanadi va mobil aloqa xizmatlarini ko‘rsatish to‘g‘risidagi shartnomani tuzishda retsipiyentga to‘lanadi.

206. Operator (provayder) va KRMB operatorining o‘zaro ishlashi va o‘zaro hisob-kitoblari jarayoni operator (provayder) va KRMB operatori o‘rtasida tuzilgan shartnoma bilan belgilanadi.

207. Mobil aloqa tarmoqlarida abonent raqami ko‘chirilganda abonentning shaxsiy hisob raqamida sarflanmagan pul mablag‘lari mavjud bo‘lganda, ushbu mablag‘larni qaytarish mazkur Qoidalarga va donor bilan tuzilgan mobil aloqa xizmatlarini ko‘rsatish shartnomasiga muvofiq donor tomonidan amalga oshiriladi.

Telefon aloqa tarmoqlaridan chaqiruv boshlanganida “Onward Routing” xizmatlari taqdim etilganligi uchun telefon va mobil aloqa tarmoqlarining operatorlari (provayderlari) o‘rtasidagi o‘zaro hisob-kitoblar ushbu operatorlar (provayderlar) o‘rtasida tuzilgan shartnoma shartlari bilan belgilanadi.

208. Abonentning donor oldida ko‘chirilgan raqam bo‘yicha ko‘rsatilgan rouming xizmatlari uchun qarzdorligi mavjud bo‘lganda donor abonent raqami retsipiyent tarmog‘iga ko‘chirilgan sanadan boshlab 30 kalendar kun davomida ko‘rsatilgan rouming xizmatlariga haq to‘lash uchun hisobni taqdim etish huquqiga ega.

Bunda, donor KRMB operatori orqali abonent raqamini, qarzdorlik summasini va qarzdorlikni to‘lash muddatini ko‘rsatgan holda retsipiyentga so‘rov yuboradi. Qarzdorlikni bartaraf etish (to‘lash) muddati 7 ish kunidan oshmasligi kerak.

KRMB operatori donorning ko‘chirilgan abonent raqamining qarzdorligi to‘g‘risida retsipiyent yuborilgan so‘rovini olganda, so‘rovning 30 kalendar kun davomida taqdim etilganligi tekshiriladi, agar so‘rov ushbu muddatga rioya qilingan holda yuborilganda KRMB operatori donorning so‘rovini tasdiqlab va retsipiyentga abonent tomonidan qarzdorlikni to‘lash zarurligi to‘g‘risida xabar yuboradi, agar so‘rov ushbu muddatda taqdim etilmaganligi aniqlanganda, KRMB operatori donorga so‘rovning rad etilishi haqida xabar yuboradi.

Retsipiyent KRMB operatoridan ko‘chirilgan abonent raqami bo‘yicha abonent tomonidan qarzdorlikni to‘lash to‘g‘risidagi xabarnomani olgan paytdan boshlab 15 daqiqa ichida quyidagilar haqida xabardor qiladi:

abonentning donor oldidagi qarzdorligini to‘lash zarurligi to‘g‘risida SMS-xabarnomani jo‘natish yo‘li bilan;

abonentni xabardor qilish vaqti to‘g‘risida KRMB operatorini.

KRMB operatori retsipiyent tomonidan abonent xabardor qilingan paytidan boshlab abonentning qarzdorligini to‘lash uchun belgilangan vaqtni hisoblash boshlanganligini KRMBda qayd qiladi va bu haqda donorni xabardor qiladi.

Abonent tomonidan qarzdorlikni bartaraf etish to‘g‘risida retsipiyentdan xabarnoma olingan vaqtdan boshlab 7 ish kuni davomida qarzdorlik bartaraf etilmagan (to‘lanmagan) taqdirda, donor KRMB operatoriga retsipiyent tomonidan abonent uchun aloqa xizmatlarini blokirovka qilish so‘rovini yuboradi.

Retsipiyent abonent donor oldidagi qarzdorligini to‘liq to‘laguniga qadar KRMB operatoridan xabarnomani olgan paytdan boshlab abonentga xizmatlar ko‘rsatishni to‘xtatadi. Bunda retsipiyent abonentga qarzdorlikni to‘lash zarurligi to‘g‘risida SMS xabarni yuboradi.

Abonent qarzdorligini bartataraf etganda (to‘laganda), donor 15 daqiqa ichida KRMB operatoriga qarzdorlik to‘langanligi va abonent raqami blokirovkadan chiqarilganligi to‘g‘risida xabar yuboradi, bu haqda KRMB operatori retsipiyentga xabar qiladi.

209. Retsipiyent bilan mobil aloqa xizmatlarini ko‘rsatish shartnomasi bekor qilinganda, ko‘chirilgan abonent raqami bir ish kuni ichida birlamchi operatorga qaytarilishi kerak.

Bunda, retsipiyent tomonidan KRMB operatoriga abonent raqamini birlamchi operatorga qaytarish to‘g‘risidagi so‘rov (bundan buyon matnda so‘rov deb yuritiladi) yuboriladi.

210. KRMB operatori quyidagi hollarda abonent raqamini qaytaradi:

raqam retsipiyentga tegishli bo‘lganda;

raqamni ko‘chirish aktiv jarayoni bo‘lganda yoki bo‘lmaganda;

raqamni qaytarish so‘rovining formati to‘g‘ri to‘ldirilganda.

211. So‘rov tasdiqlaganda KRMB operatori retsipiyentga va birlamchi operatorga raqamni qaytarish to‘g‘risida xabarnoma yuboradi, bunda parallel ravishda operatorlarni (provayderlarni) tarmoqda konfiguratsiyaning o‘zgarishi va marshrutlashni o‘zgartirish zarurligi to‘g‘risida xabardor qiladi.

212. Birlamchi operator KRMB operatori orqali retsipiyentni qaytarilgan abonent raqami olinganligi to‘g‘risida xabardor qiladi.

213. Abonent raqami xato ko‘chirilganda retsipiyent KRMB operatoriga aniqlangan xato va abonent raqamining qaytarilishi to‘g‘risida xabar yuboradi.

214. KRMB operatori abonent raqamini qaytarish mumkinligini, abonent raqamining donorga tegishliligini, aktiv ko‘chirish jarayoni borligini tekshiradi. Tekshiruv muvaffaqiyatli o‘tganda, KRMB operatori retsipiyentga abonent raqamini qaytarish va donorga xato raqamni qaytarish to‘g‘risida xabar yuboradi.

Abonent raqamini xato ko‘chirishni qaytarish so‘rovida xatoliklar aniqlanganda KRMB operatori retsipiyentga abonent raqami xato ko‘chirilganligini qaytarishni rad etish to‘g‘risida xabar yuboradi.

Retsipiyent xatolarni bartaraf etadi va KRMB operatoriga qayta so‘rovni yuboradi.

215. Donor KRMB operatoridan xato ko‘chirilgan abonent raqami qaytarilganligi to‘g‘risidagi xabarni olib, so‘rovni tekshiradi.

216. Abonent raqami xato ko‘chrilganligi aniqlangan holda, bunday abonent raqamini qaytarish jarayoni abonentning yozma arizasi yoki donorning axborot-ma’lumot xizmatiga murojaati asosida donor tomonidan boshlab beriladi. Bunda abonentning aybi bilan bo‘lmagan xato ko‘chirilgan abonent raqamini qaytarish uchun to‘lov undirilmaydi.

217. Donor KRMB operatoriga xato ko‘chirilgan abonent raqamini qaytarish to‘g‘risidagi so‘rovni yuboradi.

218. KRMB operatori xato ko‘chirilgan abonent raqamini qaytarish so‘rovini olganda uni abonent raqamini ko‘chirish mumkinligi yuzasidan tekshiradi, bu jarayon quyidagilardan iborat:

abonent ma’lumotlarini to‘ldirish;

ushbu abonent raqamini ko‘chirish uchun aktiv talabnomalarning borligi.

219. Tekshiruv muvaffaqiyatli bo‘lgan holda KRMB operatori donorga so‘rovni olganligini tasdiqlaydi va uni xato ko‘chirilgan abonent raqami bo‘lgan mobil aloqa operatoriga (provayderiga) yuboradi.

220. Xato ko‘chirilgan abonent raqamini qaytarish so‘rovida xatoliklar aniqlanganda KRMB operatori donorga sababini ko‘rsatgan holda xato ko‘chirilgan abonent raqamining qaytarilishi rad etilganligi to‘g‘risida xabar yuboradi.

221. Mobil aloqa operatori (provayderi) KRMB operatoridan xato ko‘chirilgan abonent raqami qaytarilganligi to‘g‘risidagi xabarni olib, so‘rovni tekshiradi. Tekshiruv natijalari bo‘yicha xato ko‘chirilgan abonent raqami bo‘lgan mobil aloqa operatori (provayderi) KRMB operatoriga xato ko‘chirilgan abonent raqamini qaytarish boshlanganligini yoki u rad etilganligini tasdiqlaydi.

222. Agar xato ko‘chirilgan abonent raqami bo‘lgan mobil aloqa operatori (provayderi) 30 daqiqa ichida xato ko‘chirilgan abonent raqamini qaytarish yoki rad etish tasdiqlanganligi to‘g‘risida KRMB operatorini xabardor qilmasa, KRMB operatori donorga xato ko‘chirilgan abonent raqami qaytarilganligini tasdiqlash to‘g‘risida avtomatik ravishda xabar qiladi.

223. Donor KRMB operatoridan xato ko‘chirilgan abonent raqami qaytarilganligi to‘g‘risida xabar olgan paytdan boshlab 30 daqiqa ichida abonentga xizmatni aktivatsiya qiladi. Xizmatlar muvaffaqiyatli aktivatsiya qilingandan keyin donor KRMB operatoriga abonent raqami aktivatsiya qilinganligini tasdiqlaydi.

224. KRMB operatori xato ko‘chirilgan abonent raqami bo‘lgan mobil aloqa operatoriga (provayderiga) abonent raqami muvaffaqiyatli aktivatsiya qilinganligi to‘g‘risida va telekommunikatsiya operatorlariga – tarmoqdagi marshrutlash o‘zgarganligi to‘g‘risida xabar yuboradi. Bunda xato ko‘chirilgan abonent raqami bo‘lgan mobil aloqa operatori (provayderi) 30 daqiqa ichida abonent raqamini deaktivatsiya qiladi.

225. Operator (provayder) KRMB operatoridan xabar olgan paytdan boshlab 30 daqiqadan kechiktirmay ko‘chirilgan abonent raqami bo‘yicha marshrutlashga o‘zgartirishlar kiritadi va KRMB operatoridan xabarni olgan paytdan boshlab bir soatdan kechiktirmay KRMB operatoriga o‘z tarmog‘ida marshrutlash o‘zgarganligini tasdiqlaydi.

226. Xizmatlar, tarif rejasi, xato ko‘chirilgan abonent raqami balansi xato ko‘chirish paytidagi holatgacha donor tomonidan tiklanadi.

227. Eshittiruvchi, operator, provayder televideniye xizmatlari faoliyatini litsenziya asosida amalga oshiradi.

228. Eshittiruvchi qonunchilik hujjatlarida belgilangan tartibda ommaviy axborot vositasi sifatida davlat ro‘yxatidan o‘tgan bo‘lishi shart, bundan teleradio dasturlariga va signallariga ishlov bermasdan, retranslyatsiya qiluvchilar mustasno.

229. Eshittiruvchi dasturlarini tarqatish (translyatsiya, retranslyatsiya qilish) va sotish, shuningdek, olingan dasturlarni tarqatish (translyatsiya, retranslyatsiya qilish) va sotish faoliyatini xususiy yoki alohida mualliflik shartnomalari asosida amalga oshiradi.

230. Televideniye tarmoqlari orqali qonunchilik bilan taqiqlangan ma’lumotlarni tarqatishga yo‘l qo‘yilmaydi. Reklama va e’lonlar qonunchilik hujjatlarida belgilangan tartibda tarqatiladi.

231. Eshittiruvchi, operator, provayder tomonidan ko‘rsatiladigan televideniye xizmatlarining turlari va ro‘yxati televideniye tarmog‘ining texnik imkoniyatlari, yer usti va yo‘ldosh efir eshittirish dasturlari signallarini qabul qilish shartlari va abonentlar ehtiyojlariga asosan belgilanadi.

232. Quyidagilar televideniyening yordamchi xizmatlari hisoblanadi:

abonent uskunasini ulash sxemasini o‘zgartirish, yangi elementlarni montaj qilish va ulash;

abonent tarmog‘i yoki uskunasini abonentning talabnomasiga ko‘ra vaqtinchalik o‘chirish va qaytadan ulash;

abonent liniyalari (abonent tarmog‘i), abonent rozetkalari, abonent antennasi va abonent kabellarini almashtirish, montaj qilish, ulash (o‘chirish);

abonent liniyasi (abonent tarmog‘i), rozetkalari, kabellari va uskunasini ta’mirlash, sozlash va unga texnik xizmat ko‘rsatish;

abonent uskunasini sozlash ishlari xizmat ko‘rsatuvchi tomonidan tarqatilayotgan signal parametrlariga o‘zgartirishlar kiritilishi natijasida sodir bo‘lishi bundan mustasno.

233. Yordamchi xizmatlar televideniye xizmatlarini ko‘rsatish uchun tegishli litsenziyaga ega bo‘lgan yuridik shaxslar tomonidan ham ko‘rsatilishi mumkin. Ushbu xizmatlarning narxi televideniye xizmatlariga tariflarni aniqlashda hisobga olinadi.

234. Televideniye xizmatlari televideniye tarmoqlari eshittiruvchilari (operatorlari, provayderlari) abonentlar bilan yozma yoki elektron shaklda tuziladigan shartnomalar asosida ko‘rsatiladi.

235. Televideniye xizmatlarini ko‘rsatish quyidagi hollarda to‘xtatib turiladi:

televideniye tarmog‘ida rejali profilaktika yoki ta’mirlash ishlarini bajarish vaqtida yoki abonent uskunasiga elektr energiyasining berilishi to‘xtatilganda;

televideniye dasturlari, radiodasturlar yoki telekommunikatsiyaning boshqa xabarlari signallarini operatorga (provayderga) bog‘liq bo‘lmagan sababga ko‘ra televideniye tarmog‘ining kirishiga berish, jumladan, dasturlarni efir orqali translyatsiya qilish to‘xtatilganda;

televideniye tarmog‘i orqali odamlarning dengizdagi, yerdagi, havodagi, kosmik fazodagi xavfsizligiga, mudofaa, xavfsizlik va huquq-tartibotni saqlash sohasidagi kechiktirib bo‘lmaydigan tadbirlar o‘tkazishga doir barcha xabarlar, shuningdek, yirik avariyalar, falokatlar, epidemiyalar va boshqa favqulodda holatlar to‘g‘risidagi xabarlar tarqatilayotganda.

236. Televideniye xizmatlari abonent xonalarida parametrlari tegishli standart va texnik normalarga muvofiq soz holatda ishlaydigan abonent tarmog‘i va abonent uskunasi mavjud bo‘lganda ko‘rsatiladi.

237. Televideniye xizmatlarining ko‘rsatilishi odamlarning sog‘lig‘i yoki xavfsizligiga tahdid solsa, xizmatlar ko‘rsatish rad etilishi mumkin. Abonentga televideniye xizmatlari ko‘rsatishning rad etish sabablari operator (provayder) tomonidan asoslab berilishi kerak.

238. Telekommunikatsiya xizmatlari operator (provayder, eshittiruvchi) va abonent o‘rtasida qonunchilik hujjatlariga muvofiq yozma yoki elektron shaklda tuziladigan shartnomaga asosan taqdim etiladi.

239. Operator (provayder) shartnomani bevosita yoki o‘zining tijorat vakili — diler orqali tuzishlari mumkin.

240. Telekommunikatsiya xizmatlarini ko‘rsatish shartnomasi jismoniy va yuridik shaxslar tomonidan qonunchilik hujjatlariga muvofiq tuziladi.

241. Jismoniy va yuridik shaxslar arizani operator (provayder, eshittiruvchi)ning rasmiy veb-sayti orqali interaktiv usulda yuborishlari mumkin. Bunda elektron arizalar yozma arizalarga tenglashtiriladi va ko‘rib chiqilishi kerak.

242. Telekommunikatsiya xizmatlariga ulanish uchun ariza:

muomala layoqatiga ega bo‘lgan jismoniy shaxs tomonidan;

qonunchilik hujjatlarida belgilangan tartibda davlat ro‘yxatidan o‘tkazilgan yuridik shaxs, shuningdek, uning filiali yoki vakolatxonasi tomonidan berilishi mumkin.

Telefon xizmati uchun — doimiy yashash joyi bo‘yicha ro‘yxatga olingan yoki ushbu turar joyning egasi yoki ijaraga oluvchisi hisoblanadigan jismoniy shaxs tomonidan berilishi mumkin.

O‘n to‘rt yoshdan o‘n sakkiz yoshgacha bo‘lgan voyaga yetmaganlar o‘z ota-onalari, farzandlikka oluvchilari yoki homiylarining yozma roziligi bilan telekommunikatsiya xizmatlariga ulanish uchun ariza berishi mumkin.

243. Ariza ushbu hududda telekommunikatsiya tarmoqlari xizmatlarini ko‘rsatish litsenziyasiga ega istalgan operatoriga (provayderiga, eshittiruvchiga) berilishi mumkin.

Arizalar operator (provayder, eshittiruvchi) tomonidan belgilangan tartibda ro‘yxatga olinadi. Operator (provayder, eshittiruvchi) arizani qabul qilishdan bosh tortishga haqli emas.

244. Bevosita murojaat qilinganda operatorga (provayderga, eshittiruvchiga) yoki dilerga quyidagi ma’lumotlar taqdim qilinishi kerak:

familiyasi, ismi, otasining ismi, turar joyi, shaxsini tasdiqlovchi hujjat rekvizitlari (seriyasi, raqami va JSHSHIR) — jismoniy shaxslar uchun;

nomi (firma nomi), bank rekvizitlari, joylashgan manzili, STIR — yuridik shaxslar uchun);

bog‘lanish uchun ma’lumotlar (telefon raqami, elektron pochta manzili — agar mavjud bo‘lsa);

telekommunikatsiya xizmatlaridan foydalanish ko‘zlanayotgan manzil.

Elektron tarzda murojaat qilinganda ushbu bandda ko‘rsatilgan ma’lumotlar elektron shaklda taqdim qilinadi.

Elektron tarzda murojaat qilinganda operator (provayder, eshittiruvchi) tomonidan murojaatchiga bir ish kuni ichida shartnoma tuzish imkoniyati mavjud bo‘lganda shartnoma tuzish uchun aniq manzil va vaqt ko‘rsatilgan javob yoki shartnoma tuzish imkoniyati mavjud bo‘lmaganda buning sabablari ko‘rsatilgan javob yuboriladi.

245. Shartnomani tuzish quyidagi hollarda rad etilishi mumkin:

murojaatchi voyaga yetmagan jismoniy shaxs bo‘lganda, bundan o‘n to‘rt yoshdan o‘n sakkiz yoshgacha bo‘lgan voyaga yetmaganlarning o‘z ota-onalari, farzandlikka oluvchilari yoki homiylarining yozma roziligi bo‘lgan hollar mustasno;

telekommunikatsiya xizmatlaridan foydalanish ko‘zlanayotgan manzil operator (provayder, eshittiruvchi) xizmat ko‘rsatish zonasiga kirmaganda;

murojaatchi tomonidan ma’lumotlar to‘liq taqdim etilmaganda;

taqdim qilingan ma’lumotlarning soxtaligi yoki noto‘g‘riligi aniqlanganda.

246. Telekommunikatsiya xizmatlarini ko‘rsatish shartnomasi ommaviy shartnoma hisoblanadi va qonunchilik hujjatlariga muvofiq shartnomani tuzish texnik imkoniyati bo‘lganda arizalarni berish navbati tartibida tuziladi.

Shartnoma ikki nusxada tuziladi va tomonlar tarafidan imzolanadi.

Shartnoma tomoni sifatida namoyon bo‘ladigan ariza beruvchi abonent maqomiga ega bo‘ladi.

247. Telekommunikatsiya xizmatlarini ko‘rsatish shartnomasini tuzishda ajratilgan abonent raqami operator (provayder) ma’lumot xizmatining ma’lumotlar bazasiga kiritiladi. Abonentning arizasiga ko‘ra raqam operator (provayder) ma’lumot xizmatining ma’lumotlar bazasidan chiqarilishi mumkin.

248. Tuzilgan shartnoma ikki tomonlama shartnoma bo‘lib, u tuzilgan vaqtdan boshlab kuchga kiradi, muddatsiz hisoblanadi, agar shartnomada boshqasi belgilanmagan bo‘lsa.

249. Jismoniy shaxs bilan shartnoma tuzish uchun texnik imkoniyatning yo‘qligi ko‘rsatilgan shartnomani tuzish uchun texnik imkoniyat bo‘lgan, arizani kechroq bergan boshqa jismoniy shaxs bilan shartnoma tuzish uchun to‘siq bo‘la olmaydi.

250. Operator (provayder, eshittiruvchi) faqat texnik imkoniyat bo‘lmaganda shartnoma tuzishdan bosh tortish huquqiga ega.

251. Shartnomada quyidagilar aks etgan bo‘lishi lozim:

shartnoma predmeti;

shartnoma tuzilgan sana va joyi;

operator (provayder, eshittiruvchi) nomi (firma nomi);

operatorning (provayderning, eshittiruvchining) bank rekvizitlari;

abonent to‘g‘risidagi ma’lumotlar (familiyasi, ismi, otasining ismi, turar joyi, shaxsini tasdiqlovchi hujjat rekvizitlari (seriyasi, raqami va JSHSHIR) — jismoniy shaxs uchun, nomi (firma nomi), bank rekvizitlari, joylashgan manzili, STIR — yuridik shaxs uchun), abonent bilan bog‘lanish ma’lumotlari (telefon raqami, elektron pochta manzili — agar mavjud bo‘lsa);

abonentga taqdim etilgan abonent raqami (telefon va mobil aloqasi xizmatlari uchun), abonentni identifikatsiya raqami (ma’lumotlar uzatish va Internet, televideniye xizmatlari uchun);

shartnomani tuzishda abonent tomonidan tanlangan tarif rejasi va xizmatlar ro‘yxati;

shartnoma diler orqali tuzilgan holda — dilerning rekvizitlari (firma nomi, shaxsiy raqami, imzosi va muhri);

mobil aloqa xizmatlari uchun — abonent oladigan raqam (SIM-karta)dan foydalanish istagi bo‘lgan mobil aloqa abonent qurilmasining asosiy turlari, jumladan, mobil telefon, USB-modem, elektr energiyasi/suv/gaz hisoblagichlari, onlayn to‘lovlar terminallari yoki uskunaning boshqa turlari;

taqdim etiladigan televideniye va radioeshittirish dasturlari (televideniye xizmatlari uchun);

ko‘rsatiladigan ishlar (xizmatlar ko‘rsatish) nomi va ishlarni bajarish (xizmatlar ko‘rsatish) shartlari va muddatlari;

shartnoma bahosi va ishlar bajarishning (xizmatlar ko‘rsatishning) kafolati;

ishlarga (xizmatlarga) haq to‘lash va hisob-kitoblar tartibi, muddatlari va shakli;

hisobni yetkazib berish usuli;

tomonlarning huquqlari, majburiyatlari va javobgarligi;

shikoyatlarni ko‘rib chiqish tartibi;

ko‘rsatilayotgan xizmatlar sifatiga doir buyurtmalarni qabul qilish telefon raqamlari (yoki qisqa raqamlar) va korxonaning “Ishonch telefoni” raqamlari;

shartnomaning amal qilinishini to‘xtatib turish yoki bekor qilish va abonentning shaxsiy hisob raqamida qolgan pul mablag‘larini qaytarish shartlari.

Mazkur bandda keltirilgan ma’lumotlar operatorning (provayderning, eshittiruvchining) abonentlar bazasiga kiritilgan bo‘lishi kerak.