Qonunchilikka oʻzgartirish va qoʻshimchalar kiritilganligi, shuningdek, sud amaliyotida masalalar kelib chiqqanligi munosabati bilan, “Sudlar toʻgʻrisida”gi Qonunning 17-moddasiga asosan Oʻzbekiston Respublikasi Oliy sudi Plenumi qaror qiladi:

Oʻzbekiston Respublikasi Oliy sudi Plenumining jinoyat ishlari boʻyicha quyidagi qarorlariga oʻzgartirish va qoʻshimchalar kiritilsin:

1. “Harbiy xizmatni oʻtash tartibiga qarshi jinoyatlarga oid ishlarni koʻrish boʻyicha sud amaliyoti toʻgʻrisida” 2000-yil 15-sentabrdagi 23-sonli qarori:

1.2-bandi quyidagi tahrirda bayon etilsin:

“1.2. Harbiy jinoyatlarning subyekti Oʻzbekiston Respublikasi Qurolli Kuchlari (Mudofaa vazirligi, Milliy gvardiya, Ichki ishlar vazirligining qorovul qoʻshinlari, Favqulodda vaziyatlar vazirligi, Davlat xavfsizlik xizmatining davlat chegarasini himoya qilish qoʻmitasi), Davlat xavfsizlik xizmati, boshqa vazirlik va idoralarning harbiy boʻlinmalari harbiy xizmatchilari, shuningdek, ularda harbiy yigʻinlarni oʻtayotgan shaxslar boʻlishi mumkin”;

7-bandidagi “Oʻzbekiston Respublikasi Oliy sudining harbiy hayʼati, Respublika Harbiy sudi “ degan soʻzlar “Oʻzbekiston Respublikasi Harbiy sudi” degan soʻzlar bilan almashtirilsin.

2. “Bezorilikka oid ishlar boʻyicha sud amaliyoti haqida” 2002-yil 14-iyundagi 9-sonli qarori:

1-bandining ikkinchi xatboshisi quyidagi tahrirda bayon etilsin:

“Jamiyatda yurish-turish qoidalarini qasddan mensimaslik deganda, normativ-huquqiy hujjatlar, odob va axloq normalari, urf-odat, anʼanalar bilan belgilangan jamoat tartibini (odamlararo munosabatlar, yurish-turish qoidalari, shakllangan ijtimoiy turmush tarzini) qoʻpol tarzda buzish tushuniladi. Jamoat tartibi qoʻpol tarzda buzilishi shaxs tomonidan JK 277-moddasi birinchi qismi dispozitsiyasida nazarda tutilgan harakatlardan birortasi sodir etilishida ifodalanadi”;

2-bandining ikkinchi xatboshisi quyidagi tahrirda bayon etilsin:

“Mayda bezorilik tushunchasi Oʻzbekiston Respublikasi Maʼmuriy javobgarlik toʻgʻrisidagi kodeksining 183-moddasida berilgan boʻlib, uning mazmuniga koʻra, ushbu huquqbuzarlik jamoat joylarida uyatli soʻzlar aytish, behayo qiliqlar koʻrsatish, fuqarolarga nisbatan haqoratomuz shilqimlik qilish hamda jamoat tartibi va fuqarolar osoyishtaligini boshqacha tarzda buzish kabi jamiyatda yurish-turish qoidalarini mensimaslikda ifodalanadi. Bunda Jinoyat kodeksi 277-moddasining 1-qismida nazarda tutilgan jinoiy oqibatlar mavjud boʻlmasligi kerak. Guruh tomonidan sodir etilgan mayda bezorilikni, basharti, huquqbuzarlarning harakatida Jinoyat kodeksi 277-moddasining 1-qismi alomatlari boʻlmasa, Jinoyat kodeksi 277-moddasi 2-qismining “b” bandi bilan kvalifikatsiya qilish mumkin emas”;

6-bandi quyidagi mazmundagi toʻrtinchi xatboshi bilan toʻldirilsin:

“Ojiz ahvol deganda, jabrlanuvchining shunday ahvoli tushunilishi kerakki, bunday paytda u oʻzining fiziologik, jismoniy yoki ruhiy holati (jismoniy nuqsoni, ruhiyati buzilganligi, qattiq ogʻriq yoki behushlik holati, alkogol, narkotik vositalar yoki psixotrop moddalar taʼsirida oʻta mastlik holati)ga koʻra oʻzini oʻzi himoya qilish, aybdorga faol qarshilik koʻrsatish yoki oʻziga nisbatan sodir etilayotgan harakatlar xususiyati va mohiyatini tushunish yoki oʻz harakatlarini boshqarish imkoniyatiga ega boʻlmaydi”;

6-bandining toʻrtinchi va beshinchi xatboshilari tegishincha beshinchi va oltinchi xatboshilar deb hisoblansin;

11-bandi quyidagi tahrirda bayon etilsin:

“11. Surishtiruv va dastlabki tergov organlari shaxsni ayblanuvchi tariqasida jinoyat ishida ishtirok etishga jalb qilish toʻgʻrisidagi qarorda, ayblov dalolatnomasi yoki ayblov xulosasida, sud esa ayblov hukmida aynan qaysi belgilariga koʻra aybdorning qilmishi Jinoyat kodeksi 277-moddasining tegishli qismi va bandlari bilan kvalifikatsiya qilinganligini koʻrsatishi shart.

Agar sud, sudlanuvchi zimmasiga ilgari qoʻyilgan ayblov bilan bogʻliq boshqa ayblovni qoʻyish uchun yoxud ayblovni ogʻirroq ayblov bilan yoki haqiqiy holatlarga koʻra ayblov dalolatnomasi yoki ayblov xulosasida nazarda tutilganidan jiddiy farq qiladigan ayblov bilan almashtirish, boshqa shaxsni ayblanuvchi tariqasida jinoyat ishida ishtirok etishga jalb qilish uchun asoslar mavjud degan fikrga kelsa, Jinoyat-protsessual kodeksining 416 va 417-moddalariga muvofiq qaror qabul qiladi”;

14-bandi quyidagi tahrirda bayon etilsin:

“14. Sudlar bezorilik jinoyatlarini sodir etgan shaxslarga nisbatan jazo tayinlashda jazo tayinlashning umumiy asoslaridan va Oʻzbekiston Respublikasi Oliy sudi Plenumining 2006-yil 3-fevraldagi “Sudlar tomonidan jinoyat uchun jazo tayinlash amaliyoti toʻgʻrisida”gi 1-sonli qarorida berilgan tushuntirishlardan kelib chiqishlari lozim”.

3. “Yarashuv toʻgʻrisidagi ishlar boʻyicha sud amaliyoti haqida” 2002-yil 25-oktabrdagi 27-sonli qarori:

8-bandining ikkinchi xatboshisi quyidagi tahrirda bayon etilsin:

“Agar sud majlisi davomida yarashuv, aybga iqror boʻlish ixtiyoriy emasligi, zararni qoplashdan bosh tortish, shuningdek sodir etilgan qilmishda ogʻirroq jinoyat tarkibi belgilari mavjudligi aniqlangudek boʻlsa, sud umumiy qoidalar boʻyicha surishtiruv yoki dastlabki tergov yuritilishi uchun ishni prokurorga yuborish toʻgʻrisida ajrim chiqaradi”.

4. “Gumon qilinuvchi va ayblanuvchini himoya huquqi bilan taʼminlashga oid qonunlarni qoʻllash boʻyicha sud amaliyoti toʻgʻrisida” 2003-yil 19-dekabrdagi 17-sonli qarori:

10-bandining ikkinchi xatboshisi quyidagi tahrirda bayon etilsin:

“Shuning uchun, jinoyat ishida gumon qilinuvchi, ayblanuvchi tariqasida ishtirok etishga jalb qilish toʻgʻrisidagi qarorda, ayblov dalolatnomasida, ayblov xulosasida va sud hukmida Jinoyat-protsessual kodeksining 360, 361, 379, 381¹², 467-moddalarida nazarda tutilgan holatlar aniq bayon etilishi kerak”;

11-bandining birinchi xatboshisi quyidagi tahrirda bayon etilsin:

“Ish boʻyicha himoyachi sifatida qatnashishi mumkin boʻlgan shaxslar toifasi JPK 49-moddasining ikkinchi va uchinchi qismlarida belgilangan. Ular jumlasiga, xususan, advokatlar hamda gumon qilinuvchining, ayblanuvchining, sudlanuvchining yaqin qarindoshlaridan biri yoki qonuniy vakillari kiradi. Bunda shuni eʼtiborga olish lozimki, gumon qilinuvchining, ayblanuvchining, sudlanuvchining yaqin qarindoshi yoki qonuniy vakili ish boʻyicha himoyachi sifatida faqat advokat bilan birga qatnashishiga yoʻl qoʻyiladi”;

14-bandining toʻqqizinchi xatboshisi quyidagi tahrirda bayon etilsin:

“Tibbiy yoʻsindagi majburlov choralarini qoʻllash toʻgʻrisidagi ishlarda, apellatsiya, kassatsiya va nazorat instansiyasi sudida koʻrilayotgan ishlarda, shuningdek himoyachidan voz kechish toʻgʻrisida noilojlikdan (himoyachining mehnatiga haq toʻlash imkoniyatining yoʻqligi, ish boʻyicha himoyachining hozir boʻlmasligi va h.k.) arz qilingan hollarda ham himoyachidan voz kechish qabul qilinmasligi mumkin”;

16-bandining ikkinchi xatboshisidagi “qamoqqa olish tarzidagi ehtiyot chorasini” degan soʻzlar “qamoqqa olish, uy qamogʻi tarzidagi ehtiyot chorasini” degan soʻzlar bilan almashtirilsin;

27-bandining uchinchi va toʻrtinchi xatboshilari quyidagi tahrirda bayon etilsin:

“Jinoyat-protsessual kodeksining 51-moddasida nazarda tutilgan hollarda apellatsiya, kassatsiya, nazorat instansiyasi sudi majlisida himoyachining ishtiroki taʼminlanishi shart.

Mahkum himoyachidan voz kechgan hollarda, agar bu sud tomonidan JPK 52-moddasida nazarda tutilgan qoidalarga rioya qilingan holda qabul qilingan boʻlsa, apellatsiya, kassatsiya, nazorat instansiyasi sudida ishni himoyachi ishtirokisiz koʻrishga yoʻl qoʻyiladi”;

31-bandining uchinchi xatboshisi quyidagi tahrirda bayon etilsin:

“JPK 50-moddasiga asosan yuridik yordam uchun haq toʻlashdan oilasida har bir oila aʼzosiga toʻgʻri keladigan yalpi oylik daromad ushbu masala koʻrilayotgan vaqt uchun belgilangan eng kam oylik ish haqining bir yarim baravaridan ortiq boʻlmagan gumon qilinuvchi, ayblanuvchi, sudlanuvchi ozod qilinadi. Yalpi oylik daromad toʻgʻrisidagi masala Oʻzbekiston Respublikasi Adliya vazirligida 2008-yil 2-dekabrda 1878-son bilan roʻyxatga olingan Adliya vazirligi va Moliya vazirligining 2008-yil 26-noyabrdagi 8, 109-sonli qarori bilan tasdiqlangan Gumon qilinuvchi, ayblanuvchi yoki sudlanuvchiga advokatlar tomonidan yuridik yordam koʻrsatish boʻyicha xarajatlarni davlat hisobiga oʻtkazish tartibi toʻgʻrisidagi nizomning 3-bandida belgilangan tartibda hal etiladi”.

5. “Jazolarni liberallashtirish toʻgʻrisidagi qonunni iqtisodiyot sohasidagi jinoyatlarga nisbatan qoʻllashning ayrim masalalari haqida” 2004-yil 21-maydagi 4-sonli qarori:

9-bandining ikkinchi xatboshisi quyidagi tahrirda bayon etilsin:

“JK 167, 168, 180, 181, 181-1, 184, 185², 192⁴, 192¹¹-moddalarida nazarda tutilgan jinoyatlar uchun — jinoyat oqibatida yetkazilgan moddiy zarar qoplangan taqdirda;”;

15-bandining uchinchi xatboshisi quyidagi tahrirda bayon etilsin:

“Moddiy javobgarlik turi, jinoyat oqibatida yetkazilgan zararni qoplash usulini belgilashga oid masalalarni hal etishda Oliy sud Plenumining 2016-yil 27-dekabrdagi “Jinoyat natijasida yetkazilgan mulkiy ziyonni qoplashga oid qonunchilikni qoʻllash boʻyicha sud amaliyoti toʻgʻrisida”gi 26-sonli qarorida berilgan tushuntirishlardan kelib chiqish lozim”;

19-bandi quyidagi tahrirda bayon etilsin:

“19. Sudlar shuni eʼtiborga olishi lozimki, iqtisodiyot sohasidagi jinoyatlarga oid ishlar boʻyicha moddiy zarar qoplanganligi munosabati bilan ozodlikdan mahrum qilish yoki ozodlikni cheklash bilan bogʻliq boʻlmagan jazolarning tayinlanishi, mahkum jarimani toʻlashdan yoki majburiy jamoat ishlari yoxud axloq tuzatish ishlari tariqasidagi jazoni oʻtashdan boʻyin tovlagan taqdirda, bu jazoni yana ozodlikdan mahrum qilish yoki ozodlikni cheklash jazosi bilan almashtirish imkoniyatini istisno etmaydi”.

6. “Qasddan odam oʻldirishga oid ishlar boʻyicha sud amaliyoti toʻgʻrisida” 2004-yil 24-sentabrdagi 13-sonli qarori:

23-bandi quyidagi tahrirda bayon etilsin:

“23. Sud JPK 415 — 417-moddalari talablariga rioya qilgan holda aybdorning harakatlarini JK 97-moddasi birinchi qismidan ikkinchi qismiga va ikkinchi qismining bir bandidan boshqa bandiga qayta kvalifikatsiya qilishga haqli”.

7. “Sudlar tomonidan jinoyat uchun jazo tayinlash amaliyoti toʻgʻrisida” 2006-yil 3-fevraldagi 1-sonli qarori:

12-bandining beshinchi xatboshisi quyidagi tahrirda bayon etilsin:

“jarima, majburiy jamoat ishlari, axloq tuzatish ishlari, ozodlikni cheklash tariqasidagi jazolar — JK 82, 83 va 84¹-moddalarida nazarda tutilgan muddat va miqdorlardan”;

17-bandidan keyin quyidagi mazmundagi boʻlim bilan toʻldirilsin:

“Majburiy jamoat ishlari tariqasidagi jazoni qoʻllash boʻyicha

17¹. Majburiy jamoat ishlari mehnatga layoqatli shaxsga nisbatan u sodir etgan jinoyatning xususiyati va ijtimoiy xavflilik darajasini hisobga olgan holda uni jamiyatdan ajratish zarurati boʻlmaganda, bir yuz yigirma soatdan toʻrt yuz sakson soatgacha (voyaga yetmaganlarga nisbatan — oltmish soatdan ikki yuz qirq soatgacha) boʻlgan muddatga tayinlanadi va olti oy davomida kuniga toʻrt soatdan koʻp boʻlmagan vaqtda oʻtaladi.

Majburiy jamoat ishlari, shuningdek JK 44-moddasining uchinchi qismi va 82-moddasining ikkinchi qismida nazarda tutilgan hollarda ilgari tayinlangan jarima jazosini almashtirish tartibida ham qoʻllanilishi mumkin. Bunday holda majburiy jamoat ishlarining eng kam muddati toʻlanmagan jarima summasidan kelib chiqib, bir yuz yigirma soatdan (voyaga yetmaganlarga nisbatan — oltmish soatdan) kamroq boʻlishi mumkin, biroq toʻrt yuz sakson soatdan (voyaga yetmaganlarga nisbatan-ikki yuz qirq soatdan) oshmasligi lozim.

17². Qonunga koʻra, majburiy jamoat ishlari quyidagilarga qoʻllanilmaydi:

pensiya yoshiga yetgan (60 yoshdan oshgan erkaklar, 55 yoshdan oshgan ayollar) shaxslarga;

16 yoshga toʻlmagan shaxslarga;

mehnatga qobiliyatsiz (belgilangan tartibda birinchi, ikkinchi guruh nogironi deb topilgan) shaxslarga;

homilador va uch yoshgacha bolasi bor ayollarga, shuningdek, uch yoshgacha boʻlgan bolani farzandlikka olgan yoki unga nisbatan vasiy boʻlgan shaxslarga;

harbiy xizmatchilarga;

chet el fuqarolariga;

Oʻzbekiston Respublikasida doimiy yashamaydigan shaxslarga.

17³. Majburiy jamoat ishlari, odatda, ishdan yoki oʻqishdan boʻsh vaqtda mahkumni haq toʻlanmaydigan foydali jamoat ishlarini bajarishga majburiy tarzda jalb qilishdan iboratdir.

Mahkumlar majburiy jamoat ishlarini oʻtashi mumkin boʻlgan joylar (obyektlar) va majburiy jamoat ishlarining turi mazkur jazoning ijrosini nazorat qiluvchi organlar tomonidan belgilanadi.

Majburiy jamoat ishlari muddatlariga oid masalani hal etishda sudlar sudlanuvchida ish yoki oʻqish joyi, doimiy yashash (ayniqsa voyaga yetmaganlarda) joyi bor-yoʻqligini aniqlashlari lozim.

Jinoyat kodeksining bir necha moddasi boʻyicha majburiy jamoat ishlari tayinlanayotganda, jazo muddati har bir modda boʻyicha alohida, soʻngra esa, ularning majmui boʻyicha belgilanadi. Bunda jazoning uzil-kesil muddati JK 45¹-moddasida belgilangan chegaradan oshishi mumkin emas.

17⁴. Qonun mazmuniga koʻra, (JK 45¹-moddasining beshinchi qismi) tayinlangan majburiy jamoat ishlari muddatini oʻtashdan boʻyin tovlaganda, sud majburiy jamoat ishlarining oʻtalmagan muddatini majburiy jamoat ishlarining toʻrt soatini ozodlikni cheklashning yoki ozodlikdan mahrum qilishning bir kuniga tenglashtirgan holda hisoblab, ozodlikni cheklash yoki ozodlikdan mahrum qilish tariqasidagi jazo bilan almashtiradi.

17⁵. Majburiy jamoat ishlarini ozodlikni cheklash yoki ozodlikdan mahrum qilish tariqasidagi jazoga almashtirish masalasini hal qilishda, sud, majburiy jamoat ishlari ijrosini amalga oshiruvchi organ tomonidan ushbu jazo ijrosini taʼminlash boʻyicha choralar koʻrilganligi, mahkum qonun talabiga muvofiq jazoni oʻtashdan bosh tortganlik uchun javobgarlik toʻgʻrisida ogohlantirilganligi haqida berilgan maʼlumotlarga ega boʻlishi lozim.

Agar taqdim etilgan hujjatlarda bunday maʼlumotlar mavjud boʻlmasa, sudya tegishli tekshirish oʻtkazish uchun hujjatlarni ushbu jazo ijrosini amalga oshiruvchi organga yuborish haqida ajrim chiqaradi.

17⁶. JPK 541, 542-moddalariga muvofiq majburiy jamoat ishlarining oʻtalmagan qismini ozodlikni cheklash yoki ozodlikdan mahrum qilish jazosi bilan almashtirish haqidagi ishlar sud majlisida, odatda, mahkum ishtirokida koʻrilishi lozim. Bu masala mahkum yashirinib yurganligi yoki sudga kelishdan boʻyin tovlayotganligi toʻgʻrisida ishonchli maʼlumotlar ishda mavjud boʻlgan holdagina uning ishtirokisiz hal etilishi mumkin.

Agar majburiy jamoat ishlarining oʻtalmagan qismini ozodlikdan mahrum qilish jazosi bilan almashtirish haqidagi materialni koʻrish vaqtida JPK 533-moddasida koʻrsatilgan holatlar aniqlansa, sud hukmning ijrosini kechiktirish masalasini muhokama qilishi shart”;

21-bandining ikkinchi xatboshisi quyidagi mazmunda bayon etilsin:

“Voyaga yetmagan shaxs tayinlangan axloq tuzatish ishlari muddatining oʻndan bir qismidan koʻprogʻini oʻtashdan boʻyin tovlasa, sud ushbu jazoning oʻtalmagan qismini axloq tuzatish ishlarining har uch kunini ozodlikni cheklash yoki ozodlikdan mahrum qilish jazosining bir kuniga tenglashtirgan holda hisoblab, ozodlikni cheklash yoki ozodlikdan mahrum qilish tariqasidagi jazo bilan almashtiradi (JK 83-moddasining ikkinchi qismi)”;

“Qamoq tariqasidagi jazoni qoʻllash boʻyicha” boʻlimi chiqarib tashlansin;

25-1-bandining uchinchi xatboshisidagi “Ozodlikni cheklash olti oydan besh yilgacha muddatga” degan soʻzlar “Ozodlikni cheklash bir oydan besh yilgacha muddatga” degan soʻzlar bilan almashtirilsin;

27-bandining ikkinchi xatboshisidagi “olti oydan yigirma yilgacha boʻlgan muddatga” degan soʻzlar “bir oydan yigirma yilgacha boʻlgan muddatga” degan soʻzlar bilan almashtirilsin;

27-bandi quyidagi mazmundagi beshinchi xatboshi bilan toʻldirilsin:

“JK 45¹-moddasining beshinchi qismida nazarda tutilgan hollarda majburiy jamoat ishlari tariqasidagi jazoni almashtirish tartibida, — bir oydan kamroq muddatga tayinlanishi mumkin;”;

27-bandining beshinchi va oltinchi xatboshilari tegishincha oltinchi va yettinchi xatboshilar deb hisoblansin;

27-bandining oltinchi xatboshisidagi “olti oydan kamroq muddatga” degan soʻzlar “bir oydan kamroq muddatga” degan soʻzlar bilan almashtirilsin;

38-bandidagi “jumladan, jarima, muayyan huquqdan mahrum qilish, axloq tuzatish ishlari, xizmat boʻyicha cheklash, ozodlikni cheklash, intizomiy qismga joʻnatish kabi jazolar JK 44 — 49-moddalariga rioya qilingan holda tayinlanishi mumkin” degan soʻzlar “jumladan, jarima, muayyan huquqdan mahrum qilish, majburiy jamoat ishlari, axloq tuzatish ishlari, xizmat boʻyicha cheklash, ozodlikni cheklash, intizomiy qismga joʻnatish kabi jazolar JK 44 — 49-moddalariga rioya qilingan holda tayinlanishi mumkin” degan soʻzlar bilan almashtirilsin;

48-bandi quyidagi mazmundagi ikkinchi xatboshi bilan toʻldirilsin:

“Shuni nazarda tutish lozimki, tadbirkorlik faoliyati bilan shugʻullanayotgan shaxslarga nisbatan tadbirkorlik faoliyati bilan shugʻullanish huquqidan mahrum qilish tarzidagi jazo tayinlanishiga yoʻl qoʻyilmaydi, odam oʻlishiga yoki boshqa ogʻir oqibatlarga sabab boʻlgan hollar bundan mustasno (JK 45-moddasi beshinchi qismi)”;

58-bandining uchinchi xatboshisidagi “qamoq yoki ozodlikdan mahrum qilish jazosining oʻtash muddatining boshlanishi” degan soʻzlar “tayinlangan ozodlikdan mahrum qilish yoki ozodlikni cheklash jazosining oʻtash muddatining boshlanishi” degan soʻzlar bilan almashtirilsin;

61-bandining birinchi xatboshisi quyidagi tahrirda bayon etilsin:

“Qoraqalpogʻiston Respublikasi jinoyat ishlari boʻyicha sudi, jinoyat ishlari boʻyicha viloyatlar va Toshkent shahar sudi, Oʻzbekiston Respublikasi Harbiy sudi:”.

8. “Sudlar tomonidan amnistiya aktlarini qoʻllashning ayrim masalalari toʻgʻrisida” 2006-yil 22-dekabrdagi 16-sonli qarori:

24-bandining uchinchi xatboshisi quyidagi tahrirda bayon etilsin:

“Sudlar shuni nazarda tutishlari lozimki, JK 77-moddasi, JIK 5-moddasiga muvofiq qamoqqa olish yoki uy qamogʻi tarzidagi ehtiyot chorasi qoʻllanilgan shaxs jazo oʻtovchi hisoblanmaydi. Shuning uchun ham uning hukm qonuniy kuchga kirgunga qadar namoyon etgan xulq-atvori uni jazoni oʻtash tartibini muttasil buzuvchi deb topish masalasi hal etilayotgan paytda inobatga olinishi mumkin emas. Ushbu qoida sudning qonuniy kuchga kirgan hukmi boʻyicha ozodlikdan mahrum etish tariqasidagi jazoni oʻtayotgan vaqtda yangi jinoyat sodir etganligi uchun ehtiyot chorasi sifatida qamoqqa olingan shaxsga nisbatan tatbiq etilmaydi”;

30-bandi quyidagi tahrirda bayon etilsin:

“30. Agar sud amnistiya aktini qoʻllanilishi mumkin boʻlmagan mahkumga nisbatan qoʻllagan boʻlsa, apellatsiya, kassatsiya instansiyasi jabrlanuvchining shikoyati yoki prokuror protesti boʻlgan taqdirda, hukmning jazo tayinlash qismini bekor qilib, qonunga muvofiq qaror qabul qiladi.

Biroq, agar apellatsiya, kassatsiya, nazorat instansiyasi amnistiya akti qoʻllanilgan holda hukmda tayinlangan jazo amnistiya akti qoʻllanilmagan holda ham mahkum uchun yetarli deb topsa, hukmni oʻzgartirishga — undan amnistiya aktini qoʻllash haqidagi xulosa va qarorni chiqarib, amnistiya akti qoʻllanilgan holda hukmda belgilangan muddat (miqdor) doirasida jazo tayinlashga haqli.

Shuni eʼtiborga olish lozimki, JPK 500, 513-moddalarida belgilangan bir yillik muddat amnistiya akti qoʻllanilishi mumkin boʻlmagan mahkumga nisbatan asossiz qoʻllanilgan hollarga ham taalluqlidir. Bunday hollarda yuqori instansiya sudi hukmni oʻzgartirishga — undan amnistiya aktini qoʻllash haqidagi xulosa va qarorni chiqarib, hukmda amnistiya akti qoʻllanilgan holda tayinlangan jazoni qoldirishga haqli”.

9. “Sudga qadar ish yuritish bosqichida qamoqqa olish tarzidagi ehtiyot chorasining sudlar tomonidan qoʻllanilishi toʻgʻrisida” 2007-yil 14-noyabrdagi 16-sonli qarori:

2-bandi quyidagi tahrirda bayon etilsin:

“2. Sudlarning eʼtibori shunga qaratilsinki, qonunga koʻra, sudlarning vakolatiga nafaqat ishni sudga qadar yuritish bosqichida qamoqqa olish tarzidagi ehtiyot chorasini qoʻllash hamda qamoqda saqlab turish muddatini uzaytirish yuzasidan qaror qabul qilish, balki JPK 243-moddasi oʻninchi qismi 2¹-bandida nazarda tutilgan hollarda, boshqa ehtiyot chorasini qoʻllash huquqi ham kiradi”;

4-bandining ikkinchi — oltinchi xatboshilari quyidagi tahrirda bayon etilsin:

“Ayblanuvchi, sudlanuvchi tergov va suddan yashiringan;

ushlab turilgan gumon qilinuvchining shaxsi aniqlanmagan;

ilgari qoʻllanilgan ehtiyot chorasi ayblanuvchi, sudlanuvchi tomonidan buzilgan;

ushlab turilgan gumon qilinuvchi, ayblanuvchi Oʻzbekiston Respublikasida doimiy yashash joyiga ega boʻlmagan;

jinoyat ozodlikdan mahrum qilish tariqasidagi jazoni oʻtash davrida sodir etilgan hollarda qoʻllanilishi mumkin”;

6-bandining toʻrtinchi xatboshisi quyidagi tahrirda bayon etilsin:

“Ushlab turish vaqti JPK 226-moddasining birinchi qismiga muvofiq shaxs ichki ishlar organiga yoki huquqni muhofaza qiluvchi boshqa organga keltirilgan vaqtdan boshlab hisoblanishi kerak”;

8-bandi quyidagi tahrirda bayon etilsin:

“8. Prokuror, shuningdek prokurorning roziligi bilan surishtiruvchi, tergovchi jinoyat ishi boʻyicha JPK 236, 242-moddalarida nazarda tutilgan holatlar aniqlanganda, gumon qilinuvchi yoki ayblanuvchiga nisbatan qamoqqa olish tarzidagi ehtiyot chorasini qoʻllash toʻgʻrisida iltimosnoma qoʻzgʻatish haqida qaror chiqarishga haqli”;

9-bandining uchinchi xatboshisi quyidagi tahrirda bayon etilsin:

“Iltimosnoma va materiallar sudga ushlab turish muddati tugashidan kamida sakkiz soat oldin taqdim etiladi. Materialga qoʻshilgan hujjatlar nusxasi surishtiruvchi yoki prokuror tomonidan tasdiqlangan va muhr qoʻyilgan boʻlishi zarur”;

11-bandining birinchi xatboshisidagi “jinoyat ishlari boʻyicha tuman (shahar) sudining, okrug, hududiy harbiy sudning” degan soʻzlar “jinoyat ishlari boʻyicha tuman (shahar) sudining, hududiy harbiy sudning” degan soʻzlar bilan almashtirilsin;

12-bandining birinchi xatboshisi quyidagi tahrirda bayon etilsin:

“Qamoqqa olish tarzidagi ehtiyot chorasini qoʻllash toʻgʻrisidagi iltimosnoma material kelib tushgan paytdan eʼtiboran sakkiz soat ichida, lekin JPK 226-moddasining birinchi qismida nazarda tutilgan ushlab turish muddati oxiridan kechiktirmay koʻrib chiqiladi. Ushlab turish tariqasidagi protsessual majburlov chorasi qoʻllanilmagan ayblanuvchiga nisbatan qamoqqa olish tarzidagi ehtiyot chorasini qoʻllash haqidagi iltimosnoma ham sakkiz soat ichida koʻrib chiqilishi lozim”;

13-bandining ikkinchi va uchinchi xatboshilari quyidagi tahrirda bayon etilsin:

“Qonunga koʻra, qamoqqa olish tarzidagi ehtiyot chorasini qoʻllash toʻgʻrisidagi iltimosnoma prokuror, gumon qilinuvchi yoki ayblanuvchi, himoyachi (agar u ishda qatnashayotgan boʻlsa) ishtirokida koʻrib chiqiladi. Bunday iltimosnomani sud majlisida koʻrishda gumon qilinuvchi yoki ayblanuvchining qonuniy vakili (agar u ishda qatnashayotgan boʻlsa) va surishtiruvchi, tergovchi ishtirok etishi mumkin. Zarurat tugʻilganda sud majlisiga surishtiruvchi, tergovchi taklif qilinishi mumkin.

Qamoqda saqlab turish muddatini uzaytirish toʻgʻrisidagi iltimosnoma prokuror, ayblanuvchi va himoyachi (agar u ishda qatnashayotgan boʻlsa) ishtirokida koʻriladi. Bunday iltimosnomani sud majlisida koʻrishda surishtiruvchi, tergovchi ham ishtirok etishi mumkin. Zarurat tugʻilganda sud majlisiga surishtiruvchi, tergovchi taklif qilinishi mumkin”;

16-bandining uchinchi xatboshisi quyidagi tahrirda bayon etilsin:

“Iltimosnomani koʻrib chiqish prokuror maʼruzasi bilan boshlanadi, u qamoqqa olish tarzidagi ehtiyot chorasini qoʻllash yoki qamoqda saqlash muddatini uzaytirishning zaruratini asoslab beradi. Soʻngra gumon qilinuvchi yoki ayblanuvchi, uning himoyachisi, qonuniy vakili, shuningdek sudda hozir boʻlgan boshqa shaxslar eshitiladi, taqdim etilgan materiallar tekshiriladi. Soʻngra sudya ajrim chiqarish uchun alohida xonaga kiradi”;

23-bandi quyidagi tahrirda bayon etilsin:

“23. Iltimosnoma qanoatlantirilmay qamoqqa olish tarzidagi ehtiyot chorasini qoʻllash rad qilinganda, gumon qilinuvchi, ayblanuvchi (ushlab turish oxirgi muddati tugagan yoki tugamaganligidan qatʼiy nazar) unga nisbatan JPK 243-moddasi oʻninchi qismi 2¹-bandida nazarda tutilgan ehtiyot choralaridan birini qoʻllagan holda sud zalida qamoqdan ozod qilinadi”;

30-bandining ikkinchi xatboshisidagi uchinchi jumlasi quyidagi tahrirda bayon etilsin:

“Sud zarurat yuzaga kelganda surishtiruvchi, tergovchini eshitadi, taqdim etilgan materiallarni tekshiradi”;

31-bandi quyidagi tahrirda bayon etilsin:

“31. Apellatsiya instansiyasi sudi qamoqqa olish tarzidagi ehtiyot chorasini qoʻllash yoki qamoqda saqlab turish muddatini uzaytirish toʻgʻrisidagi masala boʻyicha chiqarilgan ajrim ustidan berilgan shikoyat (protest)ni koʻrib chiqib, oʻzining ajrimi bilan JPK 243-moddasining oʻn uchinchi qismida nazarda tutilgan qarorlardan birini qabul qiladi.

Apellatsiya instansiyasi sudining ajrimi prokurorga ijro qilish uchun, sud majlisining boshqa ishtirokchilariga — maʼlumot uchun taqdim etiladi”.

10. “Bir necha jinoyat sodir etilganda qilmishni kvalifikatsiya qilishga doir masalalar toʻgʻrisida” 2008-yil 15-maydagi 13-sonli qarori:

20-bandining beshinchi xatboshisi quyidagi tahrirda bayon etilsin:

“Jinoyat qonunida alohida nazarda tutilgan ayrim hollarda, shaxs ilgari sudlangan jinoyatlarga aynan oʻxshash boʻlmagan yangi jinoyatning qasddan sodir etilishi ham xavfli retsidiv jinoyat deb topiladi (masalan, JK 105, 118, 119, 210, 211, 212, 274, 276-moddalari ikkinchi qismlari, 104, 164, 213, 214, 273-moddalari uchinchi qismlari, 131-moddasi toʻrtinchi qismi)”;

23-bandining rus tili matnidagi “JK 59-moddasi oltinchi qismi” degan soʻzlar “JK 59-moddasi sakkizinchi qismi” degan soʻzlar bilan almashtirilsin;

31-bandidagi “Jinoyat ishlari boʻyicha Qoraqalpogʻiston Respublikasi Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

11. “Ruhiy kasallikka chalingan shaxslarga nisbatan tibbiy yoʻsindagi majburlov choralarini qoʻllash boʻyicha sud amaliyoti toʻgʻrisida” 2008-yil 12-dekabrdagi 23-sonli qarori:

27-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

12. “Sud hujjatlarini bajarishdan boʻyin tovlash va ularning ijro etilishiga toʻsqinlik qilish uchun jinoiy javobgarlikka doir qonunlarni qoʻllashning ayrim masalalari toʻgʻrisida” 2009-yil 10-apreldagi 7-sonli qarori:

2-bandi quyidagi tahrirda bayon etilsin:

“Jinoyat kodeksi 232-moddasi dispozitsiyasida nazarda tutilgan sud hujjati deganda, qonuniy kuchga kirgan sud buyrugʻi, ajrim, qaror, hal qiluv qarori, hukm tushunilishi lozim”;

4-bandining ikkinchi xatboshisidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

5-bandining birinchi va uchinchi xatboshisidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

6-bandidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

9-bandining ikkinchi xatboshisidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

10-bandining toʻrtinchi xatboshisidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

11-bandining toʻrtinchi xatboshisidagi “sud ijrochisi” degan soʻzlar “davlat ijrochisi” degan soʻzlar bilan almashtirilsin;

14-bandi quyidagi tahrirda bayon etilsin:

“14. Quyidagilar shaxsni JK 122-moddasiga muvofiq jinoiy javobgarlikka tortish shartlari hisoblanadi:

moddiy yordamga muhtoj boʻlgan voyaga yetmagan yoki mehnatga layoqatsiz shaxsni moddiy taʼminlash haqida sudning qonuniy kuchga kirgan hal qiluv qarori yoki sud buyrugʻi mavjudligi;

bunday shaxsni moddiy taʼminlashdan boʻyin tovlaganlik uchun shaxsga nisbatan muqaddam maʼmuriy jazo chorasi qoʻllanilganligi;

ushbu mablagʻ jami boʻlib ikki oydan ortiq muddat mobaynida toʻlanmasligi”;

15-bandi quyidagi tahrirda bayon etilsin:

“15. Surishtiruv, tergov organlari va sudlarga tushuntirilsinki, shaxsni voyaga yetmagan yoki mehnatga layoqatsiz shaxslarni moddiy taʼminlashdan boʻyin tovlaganlik, shuningdek ota-onani moddiy taʼminlashdan boʻyin tovlaganlik uchun jinoiy javobgarlikka tortish uchun qarzdorlikning umumiy muddati ketma-ketligidan qatʼi nazar, ikki oydan ortiq boʻlishi lozim.

Bunda, voyaga yetmagan yoki mehnatga layoqatsiz shaxslarni moddiy taʼminlashdan boʻyin tovlash deb, shaxsning sud hujjatida belgilangan aliment miqdorini toʻliq hajmda toʻlamasligi holati ham tushunilishi lozim.

Qonunga koʻra, agar shaxs aliment majburiyatlari boʻyicha qarzdorlikni toʻliq toʻlasa, u jinoiy javobgarlikdan ozod qilinishi lozim”;

20-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

13. “Nomusga tegish va jinsiy ehtiyojni gʻayritabiiy usulda qondirishga doir ishlar boʻyicha sud amaliyoti toʻgʻrisida” 2010-yil 29-oktabrdagi 13-sonli qarori:

19-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

14. “Jinoiy faoliyatdan olingan daromadlarni legallashtirishga oid ishlar boʻyicha sud amaliyotining ayrim masalalari toʻgʻrisida” 2011-yil 11-fevraldagi 1-sonli qarori:

10-bandidagi “Jinoyat ishlari boʻyicha Qoraqalpogʻiston Respublikasi Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

15. “Oʻzbekiston Respublikasining Davlat chegarasini kesib oʻtish tartibini buzishga oid ishlar boʻyicha sud amaliyoti toʻgʻrisida” 2011-yil 25-noyabrdagi 9-sonli qarori:

12-bandining ikkinchi xatboshisi quyidagi tahrirda bayon etilsin:

“Dastlabki tergov organlari va sudlar tomonidan jinoyat-protsessual qonuni talablariga rioya etilmasligi ishning JPK 416 va 417-moddalari talablaridan kelib chiqib hal qilinishiga sabab boʻladi”;

14-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

16. “Jinoyat ishlari boʻyicha ashyoviy dalillarga oid qonunchilikni qoʻllashning ayrim masalalari toʻgʻrisida” 2012-yil 13-dekabrdagi 17-sonli qarori:

2-bandining uchinchi xatboshisi quyidagi tahrirda bayon etilsin:

“a) jinoyat quroli — ashyoviy dalil deb eʼtirof etilgan, jinoyatga tayyorgarlik koʻrish yoki jinoyat sodir etish uchun maxsus moʻljallangan, tayyorlangan yoki moslashtirilgan narsalar (masalan, odam oʻldirish qurollari, qimmatliklarni talon-toroj qilish yoki egallashda vosita boʻlgan narsalar, oʻqotar qurol, brakonyerlik qurollari — qopqonlar, toʻrlar, soxta hujjat va h.k.), shuningdek jinoiy maqsadga erishish uchun jinoyat sodir etish jarayonida bevosita foydalanilgan mol-mulk (masalan, transport vositalari);”;

9-bandining uchinchi xatboshisi quyidagi tahrirda bayon etilsin:

“jinoyat qurollari — gumon qilinuvchiga, ayblanuvchiga, sudlanuvchiga, mahkumga tegishli boʻlganda musodara qilinishi kerak va ular tegishli muassasalarga topshiriladi yoki yoʻq qilib yuboriladi. Gumon qilinuvchiga, ayblanuvchiga, sudlanuvchiga, mahkumga tegishli boʻlmagan mol-mulk qonuniy egalariga, mulkdorlariga yoki ularning huquqiy vorislariga, shuningdek merosxoʻrlariga qaytarib beriladi. Gumon qilinuvchiga, ayblanuvchiga, sudlanuvchiga, mahkumga tegishli boʻlmagan mol-mulkning qonuniy egalari, mulkdorlari yoki ularning huquqiy vorislari, xuddi shuningdek merosxoʻrlari aniqlanmagan taqdirda, ushbu mol-mulk davlat daromadiga oʻtkaziladi;”;

12-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

17. “Soliqlar va boshqa majburiy toʻlovlarni toʻlashdan boʻyin tovlaganlik uchun javobgarlikka oid qonunchilikning sudlar tomonidan qoʻllanilishi toʻgʻrisida” 2013-yil 31-maydagi 8-sonli qarori:

3-bandi quyidagi tahrirda bayon etilsin:

“3. MJtK 174-moddasining birinchi qismi, JK 184-moddasining birinchi qismi dispozitsiyasi blanket (havolaki) boʻlib, shu sababli “daromadlar”, “foyda”, “soliq solinadigan obyektlar”, “soliqlar”, “boshqa majburiy toʻlovlar” kabi tushunchalar mazmunini aniqlash uchun qilmish sodir etilgan paytda amalda boʻlgan Soliq kodeksi (bundan buyon matnda — SK) normalaridan kelib chiqish lozim.

SK 23-moddasi ikkinchi qismiga muvofiq soliqlarga quyidagilar kiradi:

1) yuridik shaxslardan olinadigan foyda soligʻi;

2) jismoniy shaxslardan olinadigan daromad soligʻi;

3) qoʻshilgan qiymat soligʻi;

4) aksiz soligʻi;

5) yer qaʼridan foydalanuvchilar uchun soliqlar va maxsus toʻlovlar;

6) suv resurslaridan foydalanganlik uchun soliq;

7) mol-mulk soligʻi;

8) yer soligʻi;

9)transport vositalariga benzin, dizel yoqilgʻisi va gaz ishlatganlik uchun olinadigan soliq.

SKda nazarda tutilgan hollarda va tartibda soliq solishning soddalashtirilgan tartibi qoʻllanilishi mumkin (yagona soliq toʻlovi, yagona yer soligʻi, tadbirkorlik faoliyatining ayrim turlari boʻyicha qatʼiy belgilangan soliq).

Boshqa majburiy toʻlovlarga (SK 23-moddasi uchinchi qismi) quyidagilar kiradi:

1) davlat maqsadli jamgʻarmalariga majburiy toʻlovlar:

yagona ijtimoiy toʻlov;

budjetdan tashqari Pensiya jamgʻarmasiga fuqarolarning sugʻurta badallari;

davlat maqsadli jamgʻarmalariga majburiy ajratmalar;

Respublika yoʻl jamgʻarmasiga yigʻimlar;

2) davlat boji;

3) bojxona toʻlovlari;

4) ayrim turdagi tovarlar bilan chakana savdo qilish va ayrim turdagi xizmatlarni koʻrsatish huquqi uchun yigʻim.

Qonunga koʻra (SK 23-moddasi yettinchi qismi), davlat umummilliy dasturlarini amalga oshirish davrida tegishli jamgʻarmalar tashkil etilishi mumkin boʻlib, ularga qonun hujjatlarida nazarda tutilgan tartibda majburiy toʻlovlar belgilanadi”;

14-bandi quyidagi tahrirda bayon etilsin:

“14. Soliqlarni toʻlashdan boʻyin tovlash shaxs tomonidan soliqqa oid qonunchilikning muayyan normasi talablarini bajarmaslik bilan bogʻliq. Shu tufayli, JK 184-moddasida nazarda tutilgan jinoyatlarga oid ishlar boʻyicha surishtiruv, tergov organlari va sudlarning eʼtibori shaxsni ayblanuvchi tariqasida javobgarlikka tortish haqidagi qarorda, ayblov dalolatnomasida, ayblov xulosasi va ayblov hukmida ayblanuvchi yoki sudlanuvchi tomonidan soliqqa oid qonunchilikning jinoyat sodir etilgan vaqtda amalda boʻlgan aynan qaysi normasi talablari buzilganligi koʻrsatilishi shartligiga qaratilsin”;

20-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

18. “Bojxona toʻgʻrisidagi qonunchilikni buzish va kontrabandaga oid ishlar boʻyicha sud amaliyoti toʻgʻrisida” 2013-yil 6-sentabrdagi 18-sonli qarori:

20-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

19. “Tadbirkorlik faoliyati bilan bogʻliq ishlar boʻyicha sud amaliyotining ayrim masalalari toʻgʻrisida” 2013-yil 11-dekabrdagi 20-sonli qarori:

15-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

20. “Sud hukmi toʻgʻrisida” 2014-yil 23-maydagi 7-sonli qarori:

6-bandining uchinchi xatboshisi quyidagi tahrirda bayon etilsin:

“Ishda toʻplangan dalillarning yetarli emasligi, dalillar qonunga zid ravishda olinganligi sababli ular dalil hisoblanmasligi yoki qoʻyilgan ayblovda sudlanuvchining toʻliq aybdorligi toʻgʻrisidagi shubhani bartaraf qilishning imkoni yoʻqligi haqidagi sudning asoslantirilgan xulosasi oqlov hukmi chiqarish uchun asos boʻladi, bu JPK 464-moddasi mazmunidan kelib chiqadi”;

24-bandi quyidagi tahrirda bayon etilsin:

“24. Jinoyatni Jinoyat qonunining u yoki bu moddasi, uning qismi yoki bandi bilan tavsiflash boʻyicha sudning asoslantirilgan xulosasi ayblov hukmining tavsif qismining muhim belgisi hisoblanadi. Bunda sudlanuvchining harakatlari nima uchun aynan shu modda, qism, band bilan tavsiflanayotganligi aniq koʻrsatilishi kerak. Sud sudlanuvchini baholovchi kategoriyalarga tegishli (masalan, jiddiy ziyon, ogʻir oqibatlar va h.k) belgilarga qarab aybdor deb topishda, ushbu belgining jinoiy qilmishda mavjudligini tasdiqlovchi dalillarni keltirishi shart.

JPK 467-moddasiga binoan ayblovning oʻzgartirilishi sud tomonidan hukmning tavsif qismida asoslantirilgan boʻlishi kerak.

JPK 415-moddasiga binoan sud ayblovni oʻzgartirishga haqli. Bunda ayblovning bir qismi yoki jinoyatni kvalifikatsiyalovchi belgilari chiqarib tashlanadi.

Sud JPK 416 va 417-moddalarida nazarda tutilgan tartibda surishtiruv, dastlabki tergov organlari tomonidan eʼlon qilingan aybni oʻzgartirishga yoki toʻldirishga haqli”;

25-bandi quyidagi tahrirda bayon etilsin:

“25. Sud sudlanuvchiga avval eʼlon qilingan aybni jabrlanuvchining shikoyatiga asosan qoʻzgʻatiladigan jinoyat uchun javobgarlikni nazarda tutuvchi JK moddasiga (JK 105-moddasining birinchi qismida, 109-moddasida, 110-moddasining birinchi qismida, 111-moddasida, 118-moddasining birinchi qismida, 119-moddasining birinchi qismida, 121-moddasining birinchi qismida, 136-moddasida, 139-moddasining birinchi va ikkinchi qismlarida, 140-moddasining birinchi va ikkinchi qismlarida, 141¹-moddasining birinchi qismida, 149-moddasida, 167, 170, 172, 173-moddalari) oʻzgartirish zarurligi toʻgʻrisida xulosaga kelganda, jabrlanuvchining sudlanuvchini jinoiy javobgarlikka tortish haqidagi arizasi ishda mavjud-mavjud emasligidan kelib chiqib, qaror qabul qiladi”;

29-bandining ikkinchi xatboshisi quyidagi tahrirda bayon etilsin:

“Agarda JK moddasining sanksiyasida asosiy jazo bilan birga majburiy qoʻshimcha jazoni qoʻllash koʻzda tutilgan boʻlsa, sud tomonidan qoʻshimcha jazo faqat JK 45-moddasining beshinchi qismi va 57-moddasida koʻrsatilgan asoslar boʻyicha qoʻllanmasligi mumkin”.

21. “Transport harakati va undan foydalanish xavfsizligiga qarshi jinoyatlar bilan bogʻliq ishlar yuzasidan sud amaliyotining ayrim masalalari toʻgʻrisida” 2015-yil 26-iyundagi 10-sonli qarori:

19-bandining ikkinchi xatboshisi chiqarib tashlansin;

27-bandi quyidagi tahrirda bayon etilsin:

“27. Sudlarning eʼtibori shunga qaratilsinki, transport vositalari harakati va ulardan foydalanish xavfsizligiga qarshi jinoyatlarga oid ishlarni koʻrishda mazkur jinoyatlar oqibatida yetkazilgan moddiy zararni undirish muhim ahamiyatga ega. Ushbu masalalarni hal etishda, sudlar Oʻzbekiston Respublikasi Oliy sudi Plenumining “Jinoyat natijasida yetkazilgan mulkiy ziyonni qoplashga oid qonunchilikni qoʻllash boʻyicha sud amaliyoti toʻgʻrisida” 2016-yil 27-dekabrdagi 26-sonli, shuningdek, “Maʼnaviy zararni qoplash haqidagi qonunlarni qoʻllashning ayrim masalalari toʻgʻrisida” 2000-yil 28-apreldagi 7-sonli qarorlarida bayon etilgan tushuntirishlarga amal qilishlari lozim”.

22. “Sudlanganlik holati tugallanishi va olib tashlanishiga oid qonunchilikni qoʻllash boʻyicha sud amaliyoti toʻgʻrisida” 2015-yil 18-sentabrdagi 13-sonli qarori:

7-bandining ikkinchi jumlasi quyidagi tahrirda bayon etilsin:

“Masalan, intizomiy qismga joʻnatish, ozodlikdan mahrum qilish jazolariga qoʻshimcha sifatida muayyan mansabni egallash yoki muayyan faoliyat bilan shugʻullanish huquqidan mahrum qilish tariqasidagi jazo tayinlangan holda, bu jazo qayd etilgan asosiy jazolarni oʻtashning barcha vaqtiga tatbiq etilib, sudlanganlik holati tugallanishi yoki olib tashlanishi muddatlari esa qoʻshimcha jazo oʻtab boʻlingan paytdan boshlab hisoblanadi”;

14-bandidagi “Qoraqalpogʻiston Respublikasi jinoyat ishlari boʻyicha Oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

23. “Jinoyat natijasida yetkazilgan mulkiy ziyonni qoplashga oid qonunchilikni qoʻllash boʻyicha sud amaliyoti toʻgʻrisida” 2016-yil 27-dekabrdagi 26-sonli qarori:

10-bandi quyidagi mazmundagi ikkinchi xatboshi bilan toʻldirilsin:

“Jinoyat natijasida yetkazilgan moddiy zararni undirish masalasini hal etishda mol-mulkning hukm chiqarilgan kundagi qiymatidan kelib chiqish lozim”;

10-bandining ikkinchi va uchinchi xatboshilari tegishincha uchinchi va toʻrtinchi xatboshilar deb hisoblansin;

18-bandining ikkinchi xatboshisi quyidagi tahrirda bayon etilsin:

“Mulkiy ziyon miqdorining oʻzgartirilishi jinoyat kvalifikatsiyasiga yoki ayblov hajmi mahkumning ahvolini ogʻirlashtiradigan darajada oʻzgarishiga taʼsir qilishi mumkin boʻlgan hollarda, basharti shu asoslarga koʻra prokuror protesti yoki jabrlanuvchi (uning vakili) tomonidan shikoyat keltirilgan boʻlsa, hukm oʻzgartirilib, tegishlicha jinoyat kvalifikatsiyasi yoki ayb hajmi oʻzgartiriladi.”;

21-bandidagi “Qoraqalpogʻiston Respublikasi jinoyat va fuqarolik ishlari boʻyicha Oliy sudlari” degan soʻzlar “jinoyat va fuqarolik ishlari boʻyicha Qoraqalpogʻiston Respublikasi sudlari” degan soʻzlar bilan almashtirilsin.

24. “Jinoyat ishlari boʻyicha sud qarorlarini ijro etishga oid qonunlarni qoʻllash amaliyoti toʻgʻrisida” 2016-yil 27-dekabrdagi 27-sonli qarori:

20-bandidagi “Jinoyat ishlari boʻyicha Qoraqalpogʻiston Respublikasi oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.

25. “Jazoni oʻtashdan muddatidan ilgari ozod qilish va jazoni yengilrogʻi bilan almashtirish boʻyicha sud amaliyoti toʻgʻrisida” 2016-yil 27-dekabrdagi 28-sonli qarori:

30-bandidagi “Jinoyat ishlari boʻyicha Qoraqalpogʻiston Respublikasi oliy sudi” degan soʻzlar “Qoraqalpogʻiston Respublikasi jinoyat ishlari boʻyicha sudi” degan soʻzlar bilan almashtirilsin.