Oʻzbekiston Respublikasi Prezidentining 2017-yil 29-maydagi “Elektr energiyasi va tabiiy gaz yetkazib berish hamda isteʼmol qilish sohasida toʻlov intizomini yanada mustahkamlash, shuningdek, ijro ishi yuritish tizimini tubdan takomillashtirish chora-tadbirlari toʻgʻrisida”gi PF-5059-son Farmoni ijrosini taʼminlash maqsadida:

1. Quyidagilar:

Oʻzbekiston Respublikasi Bosh prokuraturasi huzuridagi Majburiy ijro byurosi markaziy apparatining tashkiliy-shtat tuzilmasi 1-ilovaga muvofiq;

Majburiy ijro byurosi Qoraqalpogʻiston Respublikasi, viloyatlar va Toshkent shahar boshqarmalari, tuman (shahar) boʻlimlarining namunaviy tuzilmalari 2-3-ilovalarga muvofiq;

Oʻzbekiston Respublikasi Bosh prokuraturasi huzuridagi Majburiy ijro byurosi toʻgʻrisidagi Nizom 4-ilovaga muvofiq;

Oʻzbekiston Respublikasi Bosh prokuraturasi huzuridagi Majburiy ijro byurosida xizmatni oʻtash toʻgʻrisidagi Nizom 5-ilovaga muvofiq;

Oʻzbekiston Respublikasi Bosh prokuraturasi huzuridagi Majburiy ijro byurosi markaziy apparati, Majburiy ijro byurosi Qoraqalpogʻiston Respublikasi, viloyatlar va Toshkent shahar boshqarmalari, Majburiy ijro byurosi shahar boʻlimlari, Majburiy ijro byurosi tuman boʻlimlari xodimlarining yagona tarif setkasi boʻyicha mehnatga haq toʻlash razryadlari 6 — 9-ilovalarga muvofiq tasdiqlansin.

2. Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda Byuro deb ataladi) boshqaruv va ishlab chiqarish xodimlarining cheklangan soni 9 222 nafar, shu jumladan, markaziy apparatda 126 nafar etib belgilansin, shundan 1 301 nafari Oʻzbekiston Respublikasining Davlat budjetidan, 7 921 nafari Majburiy ijro byurosini rivojlantirish jamgʻarmasi mablagʻlari hisobidan moliyalashtiriladi.

Oʻzbekiston Respublikasi Bosh prokuroriga:

zarur hollarda Byuro va uning hududiy tuzilmalarining tashkiliy-shtat tuzilmalariga oʻzgartishlar kiritish;

Byuro va uning hududiy tuzilmalariga Majburiy ijro byurosini rivojlantirish jamgʻarmasi mablagʻlari hisobidan qoʻshimcha shtat birliklari kiritish huquqi berilsin.

3. Belgilansinki, Byuro:

Oʻzbekiston Respublikasi Prezidenti tomonidan tayinlanadigan va ozod etiladigan direktor tomonidan boshqariladi;

oʻz faoliyatida Oʻzbekiston Respublikasi Bosh prokurori oldida hisobdor hisoblanadi.

Byuro direktori maqomi, mehnatga haq toʻlash, tibbiy va transport taʼminoti shart-sharoitlari boʻyicha Oʻzbekiston Respublikasi Bosh prokurorining oʻrinbosariga tenglashtirilsin.

4. Byuro Oʻzbekiston Respublikasi Oliy sudi, Markaziy banki, Moliya vazirligi, Iqtisodiyot vazirligi, Uy-joy kommunal xizmat koʻrsatish vazirligi, Davlat soliq qoʻmitasi, Davlat statistika qoʻmitasi hamda boshqa vazirlik va idoralarning statistik axboroti yuborilishi shart boʻlgan reyestrga kiritilsin.

5. Belgilab qoʻyilsinki:

Byuroga tugatilgan Oʻzbekiston Respublikasi Adliya vazirligi huzuridagi Sud departamenti, shuningdek, huquqni muhofaza qiluvchi va boshqa organlardan ishga qabul qilingan xodimlarga darajali unvonlar berilishi Oʻzbekiston Respublikasi Bosh prokurori tomonidan hal etiladi;

darajali unvonga ega Byuro xodimlari prokuratura organlari xodimlari hisoblanadi hamda ularga prokuratura organlari xodimlari uchun belgilangan imtiyozlar, moddiy va ijtimoiy muhofaza qilish choralari tatbiq etiladi.

6. Davlat hokimiyati va boshqaruvi organlari, huquqni muhofaza qiluvchi va nazorat tuzilmalari tomonidan Byuro xodimlari zimmasiga ularning vakolatiga kirmaydigan vazifalarni yuklash taqiqlanadi.

7. Oʻzbekiston Respublikasi Bosh prokuraturasi va Moliya vazirligi:

ikki hafta muddatda Byuroning shtat jadvallari hamda xarajatlar smetasini tasdiqlasin;

2017-yil 1-iyulga qadar oʻziga yuklatilgan vazifalarni lozim darajada bajarganligi uchun Byuro xodimlarini moddiy ragʻbatlantirish tartibini ishlab chiqsin va tasdiqlasin.

8. Belgilab qoʻyilsinki, Byuroning buyurtmasiga asosan:

“Oʻzavtosanoat” AK Oʻzbekiston Respublikasi Bosh prokuraturasi va Moliya vazirligi tomonidan tasdiqlanadigan meʼyorlarga muvofiq, xizmatda foydalanish uchun avtotransport vositalari ajratilishini taʼminlaydi;

“Oʻzbekneftgaz” MXK “Oʻzdavneftgazinspeksiya” DI bilan kelishilgan holda oʻrnatilgan tartibda xizmat va maxsus avtotransport vositalari hamda generatorlar uchun kerakli hajmda benzin va dizel yoqilgʻisini ajratilishini taʼminlaydi.

9. “Oʻzstandart” agentligi Byuroga tabiiy gaz isteʼmolini hisobga olish uskunalarining yaroqlilik holatini monitoring qilish maqsadida koʻchma laboratoriyalar uchun tegishli ruxsat beruvchi hujjatlarni tayyorlanishini taʼminlasin.

10. Oʻzbekiston Respublikasi Bosh prokuraturasi, Moliya vazirligi, Axborot texnologiyalari va kommunikatsiyalarini rivojlantirish vazirligi, “Oʻzbekenergo” AJ va “Oʻztransgaz” AK boshqa manfaatdor vazirliklar hamda idoralar bilan birgalikda bir oy muddatda Byuro va uning hududiy tuzilmalarining mebel, kompyuter texnikasi, aloqa vositalari va boshqa moddiy-texnika resurslariga boʻlgan ehtiyojini oʻrgansin hamda jihozlanishini taʼminlasin.

11. Oʻzbekiston Respublikasi Moliya vazirligi mazkur qarorda nazarda tutilgan tadbirlarni amalga oshirish uchun asoslantirilgan hisob-kitoblar asosida zarur mablagʻlar ajratilishini taʼminlasin.

12. Oʻzbekiston Respublikasi Vazirlar Mahkamasi Bosh prokuratura bilan hamkorlikda bir oy muddatda:

Oʻzbekiston Respublikasi Bosh prokuraturasi huzuridagi Majburiy ijro byurosining elektr energiyasi va tabiiy gaz yetkazib beruvchilar bilan oʻzaro hamkorlik tartibi toʻgʻrisidagi nizomni;

Isteʼmolchilarni elektr va gaz tarmoqlaridan uzib qoʻyish tartibi toʻgʻrisidagi nizomni ishlab chiqilishi va tasdiqlanishini taʼminlasin.

13. Oʻzbekiston Respublikasi Bosh prokuraturasi:

ikki oy muddatda Byuro xodimlarining xizmat kiyimi va farqlovchi belgilari namunalarini tasdiqlashni nazarda tutuvchi Oʻzbekiston Respublikasi Vazirlar Mahkamasining qarori loyihasini kiritishni;

uch oy muddatda Byuro va uning hududiy tuzilmalarini yuklatilgan vazifalarni yuqori va professional darajada bajarilishini taʼminlay oladigan malakali kadrlar bilan, shu jumladan, “Oʻzbekenergo” AJ va “Oʻztransgaz” AK, shuningdek, tugatilayotgan Sud departamenti xodimlari tarkibidan toʻldirilishini taʼminlasin.

14. Byuro Toshkent shahri, Yunusobod tumani, Xalqobod koʻchasi, 3-tor koʻchasi, 2-A uyda joylashtirilsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi bilan birgalikda bir oy muddatda Byuro hududiy tuzilmalarining toʻlaqonli faoliyat yuritishini taʼminlash uchun joylashtirish, jihozlash va boshqa tashkiliy masalalarni hal etsin.

15. Oʻzbekiston Respublikasi Prezidentining hamda Oʻzbekiston Respublikasi Hukumatining ayrim qarorlari 10-ilovaga muvofiq oʻz kuchini yoʻqotgan deb hisoblansin.

16. Oʻzbekiston Respublikasi Adliya vazirligi Bosh prokuratura, manfaatdor vazirliklar va idoralar bilan birgalikda ikki oy muddatda:

qonun hujjatlariga ushbu qarordan kelib chiqadigan oʻzgartish va qoʻshimchalar kiritish toʻgʻrisida Oʻzbekiston Respublikasi Vazirlar Mahkamasiga takliflar kiritsin;

idoraviy normativ-huquqiy hujjatlarni ushbu qarorga muvofiqlashtirilishini taʼminlasin.

17. Oʻzbekiston Respublikasi Bosh prokuraturasi Byuroning 2017-yildagi faoliyati samaradorligini oʻrgansin va zarurat tugʻilganda, uning tashkiliy-shtat tuzilmasini yanada takomillashtirish boʻyicha Oʻzbekiston Respublikasi Prezidenti devoniga takliflar kiritsin.

18. Mazkur qarorning bajarilishini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi O.B. Murodov va Oʻzbekiston Respublikasi Bosh prokurori I.B. Abdullayev zimmalariga yuklansin.

1. Ushbu Nizom Oʻzbekiston Respublikasi Bosh prokuraturasi huzuridagi Majburiy ijro byurosining (keyingi oʻrinlarda Byuro deb yuritiladi) asosiy vazifalari, funksiyalari, huquqlari va javobgarligini, shuningdek, faoliyatini tashkil etish tartibini belgilaydi.

2. Byuro Oʻzbekiston Respublikasi Bosh prokuraturasi (keyingi oʻrinlarda Bosh prokuratura deb yuritiladi) huzuridagi mustaqil huquqni muhofaza qiluvchi organ hisoblanadi.

3. Byuro oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, boshqa qonun hujjatlariga, shuningdek, Oʻzbekiston Respublikasi Bosh prokurorining (keyingi oʻrinlarda Bosh prokuror deb yuritiladi) buyruq va koʻrsatmalariga amal qiladi.

4. Byuro tizimiga:

Byuroning markaziy apparati;

Byuroning Qoraqalpogʻiston Respublikasi, viloyatlar va Toshkent shahar boshqarmalari;

Byuroning tuman (shahar) boʻlimlari kiradi.

5. Byuro quyi turuvchi rahbarlarning yuqori turuvchi rahbarlarga, shuningdek, Bosh prokurorga, tegishincha Qoraqalpogʻiston Respublikasi, viloyatlar, Toshkent shahar, tuman (shahar) prokurorlariga boʻysunishi hamda hisobdorligi asosida faoliyat koʻrsatadi.

6. Byuro oʻz vazifa va funksiyalarini amalga oshirishda davlat organlari va boshqa tashkilotlar bilan oʻzaro hamkorlik qiladi.

7. Byuro faoliyati Oʻzbekiston Respublikasi Davlat budjeti va Majburiy ijro byurosini rivojlantirish jamgʻarmasi (keyingi oʻrinlarda Jamgʻarma deb yuritiladi) mablagʻlari hisobidan moliyalashtiriladi.

8. Byuro yuridik shaxs hisoblanadi, Oʻzbekiston Respublikasi Davlat gerbi tasvirlangan va oʻz nomi yozilgan muhrga, shuningdek, qonun hujjatlariga muvofiq ochiladigan bank hisob raqamlariga ega boʻladi.

9. Quyidagilar Byuroning asosiy vazifalari hisoblanadi:

sud hujjatlari va boshqa organlar hujjatlarining soʻzsiz ijrosini taʼminlash, ijro hujjatlari hamda undirilgan mablagʻlarning haqqoniy hisobini yuritish, ijro ishi yuritishda sansalorlik va suiisteʼmolchilik holatlarini oldini olish;

elektr, gaz uzatish va gaz taqsimlash tarmoqlariga noqonuniy ulanish, talon-toroj holatlarini aniqlash, bartaraf etish va oldini olish;

elektr energiyasi va tabiiy gaz (keyingi oʻrinlarda energiya resurslari deb ataladi) uchun toʻlovlarning oʻz vaqtida va toʻliq undirilishini, isteʼmolchilarning qarzdorligi kamaytirilishini taʼminlash;

energiya resurslari isteʼmolini nazorat qilish va hisobga olishning zamonaviy avtomatlashtirilgan tizimlari, shuningdek, muqobil energiya manbalarining joriy etilishi ustidan monitoring oʻtkazish;

energiya resurslarini sotish va isteʼmoli hisobini yuritishda ishtirok etish;

energiya resurslari isteʼmolchilarining masʼuliyati va huquqiy madaniyatini oshirish choralarini koʻrish;

kompleks tahlil oʻtkazish, tizimli muammolarni aniqlash, energiya resurslari uchun hisob-kitob qilinishini taʼminlash va majburiy ijro tizimini takomillashtirish boʻyicha takliflar ishlab chiqish;

qonun hujjatlarida belgilangan tartibda maʼmuriy huquqbuzarliklar toʻgʻrisidagi ishlarni yuritish, surishtiruv va tezkor-qidiruv faoliyatini amalga oshirish.

10. Byuro oʻziga yuklatilgan vazifalarni bajarish uchun quyidagi funksiyalarni amalga oshiradi:

sud hujjatlari va boshqa organlar hujjatlarining majburiy ijrosini taʼminlaydi, majburiy ijro etish qonun bilan boshqa davlat organlariga yuklatilgan hujjatlar bundan mustasno;

vakolatli organlarning mol-mulkni, shu jumladan, huquqbuzarlik buyumlari va qurollari hamda ashyoviy dalillarni davlat daromadiga oʻtkazish yoki yoʻq qilib tashlashni nazarda tutuvchi qarorlarini qonun hujjatlarida belgilangan tartibda ijro qiladi;

xatlangan va olib qoʻyilgan mol-mulkning baholanishi, saqlanishi va sotilishini tashkil qiladi;

banklar, kredit tashkilotlari, shuningdek, qarzdorga ish haqi va boshqa daromadlar toʻlovini amalga oshiradigan tashkilotlar (shaxslar) tomonidan sud hujjatlari va boshqa organlar hujjatlarining ijro etilishi ustidan qonun hujjatlarida belgilangan tartibda nazoratni amalga oshiradi;

sud hujjatlari va boshqa organlar hujjatlari majburiy ijrosini taʼminlashda, shu jumladan, qarzdorlarning pul mablagʻlari va boshqa mol-mulkini qidirishda davlat organlari, kredit va boshqa tashkilotlar bilan oʻzaro hamkorlik qiladi, ushbu maqsadlarda koʻrsatilgan davlat organlarining maʼlumotlar bazalaridan belgilangan tartibda foydalanadi;

xalqaro shartnomalar yuzasidan Oʻzbekiston Respublikasi majburiyatlarining sud qarorlari ijrosiga oid qismi boʻyicha bajarilishini tashkil qiladi;

Byuro vakolatiga taalluqli masalalar boʻyicha xorijiy davlatlarning davlat organlari va xalqaro tashkilotlari bilan belgilangan tartibda oʻzaro hamkorlik qiladi;

sud hujjatlari va boshqa organlar hujjatlarini ijro qilish sohasida hamkorlik masalalari boʻyicha xalqaro shartnomalar loyihalarini ishlab chiqishda qatnashadi;

sud hujjatlari va boshqa organlar hujjatlarini ijro etishga oid qonun hujjatlari buzilishini oldini olish, bartaraf etish, shuningdek, buzilgan huquqlarni tiklash choralarini koʻradi;

sud hujjatlari va boshqa organlar hujjatlarini ijro qilmaslik holatlarini aniqlash, bartaraf etish va oldini olishda ichki ishlar organlari, boshqa huquqni muhofaza qiluvchi va nazorat idoralari bilan oʻzaro hamkorlik qiladi;

oʻz vakolatlari doirasida jismoniy va yuridik shaxslarning arizalari, takliflari va shikoyatlarini koʻrib chiqadi;

elektr, gaz uzatish va gaz taqsimlash tarmoqlariga noqonuniy ulanish, talon-toroj qilish, energiya resurslarini noqonuniy isteʼmol qilishning boshqa holatlarini, shuningdek, ularni sodir etishga imkon beruvchi sabab va shart-sharoitlarni aniqlash, bartaraf etish va oldini olish choralarini koʻradi;

elektr, gaz uzatish va gaz taqsimlash tarmoqlariga noqonuniy ulanish, talon-toroj qilish hamda energiya resurslarini noqonuniy isteʼmol qilishning boshqa holatlarini aniqlash, bartaraf etish va oldini olish maqsadida tezkor-qidiruv faoliyatni amalga oshiradi;

bevosita isteʼmolchilar tomonidan foydalanilgan hamda tegishli hududlar chegarasidagi tarmoqlarga yetkazib berilgan energiya resurslari hajmi oʻrtasidagi tafovutlarni aniqlash, bartaraf etish va oldini olish choralarini koʻradi;

elektr, gaz uzatish va gaz taqsimlash tarmoqlariga noqonuniy ulanish, talon-toroj qilish holatlarini aniqlash, bartaraf etish va oldini olishda ichki ishlar organlari, boshqa huquqni muhofaza qiluvchi va nazorat idoralari bilan hamkorlik qiladi;

isteʼmolchilar, isteʼmol qilingan energiya resurslari hajmlari, ular uchun amalga oshirilgan toʻlovlar, shuningdek, yuzaga kelgan qarzdorlik hisobini shakllantirish va yuritishda qatnashadi;

isteʼmolchilar, elektr va gaz tarmoqlariga ulanish nuqtalari toʻgʻrisida elektr va gaz taʼminoti korxonalari va boshqa tashkilotlar bilan, shuningdek, isteʼmol qilingan energiya resurslari hajmlarini aniqlashda maʼlumotlar almashinuvini amalga oshiradi;

energiya resurslari uchun toʻlovlarni toʻliq va oʻz vaqtida undirilishini tashkil qiladi;

isteʼmolchi — yuridik shaxslar va yakka tartibdagi tadbirkorlarning qarzdorligini soʻzsiz undirilishini amalga oshiradi, elektr energiyasi va tabiiy gaz taʼminoti korxonalari manfaatida qarzdorlikni undirish boʻyicha talabnoma-daʼvo ishlarini olib boradi;

ijro hujjatlari asosida energiya resurslari boʻyicha qarzdorlikni majburiy undirishni amalga oshiradi;

energiya resurslari isteʼmolini nazorat qilish va hisobga olishning zamonaviy avtomatlashtirilgan tizimlarini, shuningdek, muqobil energiya manbalarini joriy qilish boʻyicha loyiha va dasturlarning oʻz muddatida, toʻliq va sifatli amalga oshirilishi ustidan monitoring olib boradi;

vazirliklar, idoralar va boshqa tashkilotlardan energiya resurslari isteʼmolini nazorat qilish va hisobga olishning zamonaviy avtomatlashtirilgan tizimlarini, shuningdek, muqobil energiya manbalarini joriy qilish bilan bogʻliq maʼlumotlarni talab qilib oladi;

energiya resurslari isteʼmolini nazorat qilish va hisobga olishning zamonaviy avtomatlashtirilgan tizimlarini, shuningdek, muqobil energiya manbalarini joriy qilish boʻyicha loyiha va dasturlarning ijrosini oʻz vaqtida hamda sifatli taʼminlamagan mansabdor shaxslarga nisbatan tegishli choralar koʻradi;

energiya resurslarini taqsimlash, sotish va isteʼmol qilish hajmlarini, shu jumladan, nazorat qilish va hisobga olishning avtomatlashtirilgan tizimlari orqali monitoring qiladi;

belgilangan muddatlarda isteʼmolchilarning hisobga olish uskunalari koʻrsatkichlarini oladi, ularning shaxsiy varaqlariga maʼlumotlarni kiritadi, energiya resurslarini isteʼmol qilishning oylik hajmlarini aniqlaydi (elektr energiyasini nazorat qilish va hisobga olishning avtomatlashtirilgan tizimiga ulangan isteʼmolchilar bundan mustasno);

isteʼmol qilingan energiya resurslari uchun toʻlovlarning har bir isteʼmolchiga toʻliq va oʻz vaqtida hisoblanishini oʻrganadi;

energiya resurslarini taqsimlash va sotishning belgilangan tartibini buzgan shaxslarni javobgarlikka tortish boʻyicha oʻz vakolatlari doirasida choralarni koʻradi;

sud hujjatlari va boshqa organlar hujjatlarini soʻzsiz va ixtiyoriy ijro etilishi, energiya resurslari uchun toʻlovlarning oʻz vaqtida va toʻliq amalga oshirilishi yuzasidan isteʼmolchilarning madaniyatini yuksaltirish boʻyicha kompleks chora-tadbirlar koʻradi;

ommaviy axborot vositalari va keng jamoatchilik bilan hamkorlik qiladi, ularni oʻz faoliyati natijalari toʻgʻrisida xabardor qiladi, ushbu maqsadlarda seminarlar, brifinglar, press-konferensiyalar, davra suhbatlari va boshqa tadbirlar oʻtkazadi;

sud hujjatlari va boshqa organlar hujjatlarini ijro etish, energiya resurslari uchun hisob-kitob qilinishini taʼminlash sohasida huquqni qoʻllash amaliyotini tahlil qiladi va umumlashtiradi, shuningdek, uni takomillashtirish boʻyicha takliflar kiritadi;

Byuro faoliyatining natijalari, ijro ishi yuritish va energiya resurslari uchun toʻlovlarning undirilishi haqida statistik maʼlumotlar bazasini shakllantiradi hamda ularning haqqoniyligini taʼminlaydi;

energiya resurslaridan foydalanish sohasida shartnoma-toʻlov intizomini mustahkamlash, shuningdek, ijro ishi yuritish tizimini takomillashtirishga qaratilgan normativ-huquqiy hujjatlar loyihalarini ishlab chiqadi va ularni tayyorlashda ishtirok etadi;

samarali ish uslublarini ishlab chiqadi va amaliyotga joriy qiladi, xodimlarning kasb mahoratini oshirish choralarini koʻradi;

Byuro faoliyatiga zamonaviy axborot-kommunikatsiya texnologiyalarini joriy qiladi va axborot xavfsizligini taʼminlaydi;

maʼmuriy huquqbuzarliklar toʻgʻrisidagi ishlarni yuritadi, Byuro vakolatiga taalluqli ishlarni koʻrib chiqadi va maʼmuriy jazo qoʻllaydi;

maʼmuriy huquqbuzarliklar toʻgʻrisidagi ishlarni yuritish amaliyotini tahlil qiladi, ularning hisobini olib boradi hamda ushbu sohada yagona amaliyotni shakllantirish choralarini koʻradi;

Byuro vakolatiga taalluqli ishlar boʻyicha tergovga qadar tekshiruv va surishtiruv oʻtkazadi, shuningdek, tezkor-qidiruv faoliyatini amalga oshiradi;

tergovga qadar tekshiruv va surishtiruv oʻtkazish, protsessual qarorlar qabul qilish, tezkor-qidiruv tadbirlarini amalga oshirish amaliyotini oʻrganib boradi, ularning hisobini yuritadi va bu borada faoliyat samaradorligini oshirish choralarini koʻradi.

Byuro qonun hujjatlariga muvofiq boshqa funksiyalarni ham amalga oshirishi mumkin.

11. Byuro oʻziga yuklatilgan vazifa va funksiyalarni bajarishda quyidagi huquqlarga ega:

davlat organlaridan va boshqa organlardan, tashkilotlardan hamda ularning mansabdor shaxslaridan zarur hujjatlar va maʼlumotlarni olish;

davlat organlariga va boshqa organlarga, tashkilotlarga hamda ularning mansabdor shaxslariga, shuningdek, fuqarolarga bajarilishi majburiy boʻlgan koʻrsatmalar berish;

ishlayotgan qarzdorlarga nisbatan korxonalar, muassasalar va tashkilotlarda sud hujjatlari va boshqa organlar hujjatlarining ijro etilishini hamda moliyaviy hujjatlarning ijro ishi yuritishga muvofiqligi yuzasidan tekshirishlar oʻtkazish;

ijro ishi yuritishda ishtirok etayotgan shaxslarga muayyan ijro harakatlarini amalga oshirish masalalari yuzasidan topshiriqlar berish;

qarzdorlar egallab turgan yoki ularga qarashli boʻlgan joylarga, shu jumladan, turar joylarga va omborlarga kirish, zarur boʻlgan hollarda joylar hamda omborlarni majburan ochish, xolislar ishtirokida koʻzdan kechirish;

oʻzga shaxslarda qarzdorga tegishli boʻlgan mol-mulk borligini tasdiqlovchi hujjatli maʼlumotlar mavjud boʻlganda, oʻzga shaxslar egallab turgan yoki ularga qarashli boʻlgan joylarga va omborlarga kirish, zarur boʻlgan hollarda ushbu joylar va omborlarni majburan ochish hamda xolislar ishtirokida koʻzdan kechirish;

oʻzga shaxslarda qarzdorga tegishli boʻlgan mol-mulk borligini tasdiqlovchi hujjatli maʼlumotlar mavjud boʻlmaganda, sud ajrimi asosida oʻzga shaxslar egallab turgan yoki ularga qarashli boʻlgan joylarga va omborlarga kirish, zarur boʻlgan hollarda ushbu joylar va omborlarni majburan ochish hamda xolislar ishtirokida koʻzdan kechirish;

qonun hujjatlariga muvofiq mol-mulkni xatlash, xatlangan mol-mulkni olib qoʻyish, saqlashga topshirish va realizatsiya qilish;

qarzdorning banklardagi va boshqa kredit tashkilotlaridagi hisobvaraqlarida, omonatlarida turgan yoki saqlash uchun qoʻyilgan pul mablagʻlari hamda oʻzga qimmatliklarini xatlash;

qarzdor va uning debitorlarining hisobvaraqlariga ijro hujjatlari boʻyicha qarz summalarni undirish haqida inkasso topshiriqnomalarini qoʻyish;

olib qoʻyilgan mol-mulkni vaqtincha saqlash uchun davlat mulkidagi yashash uchun moʻljallanmagan joylardan, mulkdorning roziligi bilan esa, xususiy mulkdagi binolardan foydalanish, bunday mol-mulkni saqlash majburiyatini tegishli shaxslar zimmasiga yuklash, undiruvchining yoki qarzdorning transportidan mol-mulkni tashish uchun xarajatlarni qarzdor hisobiga kiritgan holda foydalanish;

ijro harakatlari amalga oshirilayotganda asos boʻlgan ijro hujjatidagi talablar noaniq boʻlgan taqdirda, ijro hujjatini bergan sud yoki boshqa organga uni ijro etish tartibini tushuntirib berishni soʻrab murojaat etish;

ijro ishi yuritishda ishtirok etuvchi shaxslarni chaqirish;

ijro yigʻimlarini, jarimalarni va ijro xarajatlarini undirish;

qarzdor jismoniy shaxsga, uning mol-mulkiga yoki olib qoʻyilishi lozim boʻlgan bolaga nisbatan qidiruv eʼlon qilish;

ijro harakatlarini amalga oshirishda yuzaga kelgan masalalar boʻyicha, shu jumladan, ijro usuli va tartibini oʻzgartirish masalasida sudga yoki boshqa organga ariza bilan murojaat qilish;

ijro harakatlarini amalga oshirish davomida, zarur hollarda, ichki ishlar organlarining xodimlarini jalb qilish choralarini koʻrish;

ijro hujjatlari talablarini uzrsiz sabablarga koʻra ixtiyoriy ravishda bajarmagan, sud hujjatlari va boshqa organlar hujjatlarini ijro etish toʻgʻrisidagi qonun hujjatlarini buzgan qarzdorlarni maʼmuriy javobgarlikka tortish, shuningdek, sud hujjatlarini ijro etishdan boʻyin tovlagan yoki sud hujjatining ijro etilishiga toʻsqinlik qilgan shaxslarni qonunda belgilangan tartibda jinoiy javobgarlikka tortish choralarini koʻrish;

qonunda belgilangan hollarda va tartibda mol-mulkni baholash;

mol-mulkni baholash uchun baholash faoliyatini amalga oshirish uchun litsenziyaga ega boʻlgan shaxsni jalb etish;

qarzdor jismoniy shaxsning Oʻzbekiston Respublikasidan chiqib ketishiga vaqtincha cheklash belgilash;

maʼmuriy huquqbuzarliklar toʻgʻrisidagi ishlarni yuritish, Byuro vakolatiga taalluqli ishlarni koʻrib chiqish va maʼmuriy jazo qoʻllash;

Byuro vakolatiga taalluqli ishlar boʻyicha tergovga qadar tekshiruv va surishtiruv oʻtkazish, shuningdek, tezkor-qidiruv faoliyatini amalga oshirish.

energiya resurslari yetkazib berilishi va isteʼmolini hisobga olishning toʻliqligi hamda haqqoniyligi, hisob-kitoblarning oʻz vaqtida amalga oshirilishi yuzasidan, shu jumladan, xoʻjalik yurituvchi subyektlarda Nazorat qiluvchi organlar faoliyatini muvofiqlashtiruvchi Respublika kengashi bilan kelishmagan holda tekshirishlar oʻtkazish;

energiya resurslari isteʼmoli, toʻlovlarning oʻz vaqtida va toʻliqligini nazorat qilish va monitoringini amalga oshirish uchun zarur boʻlgan maʼlumotlarni vazirliklar, idoralar, boshqa tashkilotlar va fuqarolardan talab qilib olish;

jismoniy va yuridik shaxslarga energiya resurslari uchun qarzdorlikni bartaraf etish haqida bajarilishi majburiy boʻlgan talabnomalar yuborish;

energiya resurslari uchun hisob-kitoblar oʻz vaqtida amalga oshirilmagan, Byuro talabnomalari ijro etilmagan hollarda, shuningdek, elektr, gaz uzatish va gaz taqsimlash tarmoqlariga noqonuniy ulanish, talon-toroj holatlari aniqlanganda, isteʼmolchilarni elektr hamda gaz tarmoqlaridan uzish;

elektr energiyasi uchun toʻlovlar oʻz vaqtida amalga oshirilmagan hamda Byuroning talabnomalari ijro etilmagan hollarda alohida isteʼmolchilarni 6 — 10 kV va undan yuqori kuchlanishli elektr energiya tarmoqlaridan uzish haqida elektr taʼminot korxonalariga talabnomalar berish;

energiya resurslaridan foydalanish qoidalarini buzish holatlari bartaraf etilgan hamda toʻlovlar toʻliq amalga oshirilganda, ilgari elektr va gaz tarmoqlaridan uzib qoʻyilgan isteʼmolchilarni qayta ulash (alohida isteʼmolchilarni ulash haqida talabnomalar yuborish);

elektr va gaz tarmoqlariga qayta ulab berilganligi uchun qonun hujjatlarida belgilangan tartibda toʻlov undirish;

energiya resurslari isteʼmolini hisobga olish uskunalarini plombalashda ishtirok etish;

vazirliklar, idoralar, boshqa tashkilotlar, shu jumladan, fuqarolarning oʻzini oʻzi boshqarish organlariga energiya resurslarini yetkazib berish hamda isteʼmol qilish sohasidagi huquqbuzarliklar sodir etilishiga imkon berayotgan sabab va shart-sharoitlarni bartaraf etish, shuningdek, energiya resurslari uchun hisob-kitoblarni muntazam ravishda amalga oshirmayotgan isteʼmolchilarga nisbatan jamoat taʼsir choralarini koʻrish haqida taqdimnomalar kiritish;

yetkazib berilgan energiya resurslari uchun qarzdorlikni isteʼmolchilar — yuridik shaxslar va yakka tartibdagi tadbirkorlarning bank hisobraqamlaridan soʻzsiz undirish haqida bajarilishi majburiy boʻlgan inkasso topshiriqnomalari qoʻyish;

yetkazib berilgan energiya resurslari uchun eng kam oylik ish haqining ikki baravaridan koʻp boʻlmagan miqdordagi qarzdorlikni xodim — isteʼmolchilarning ish haqidan ushlab qolish haqida ish beruvchilarga bajarilishi majburiy boʻlgan talabnomalar yuborish;

maʼmuriy huquqbuzarliklar toʻgʻrisidagi ishlarni yuritish, Byuro vakolatiga taalluqli ishlarni koʻrib chiqish va maʼmuriy jazo qoʻllash;

Byuro vakolatiga taalluqli ishlar boʻyicha tergovga qadar tekshiruv va surishtiruv oʻtkazish, shuningdek, tezkor-qidiruv faoliyatini amalga oshirish;

davlat organlariga va boshqa tashkilotlarga, shuningdek, mansabdor shaxslar va fuqarolarga oʻziga taalluqli vakolatlar doirasida bajarilishi majburiy boʻlgan koʻrsatmalar berish.

Byuro qonun hujjatlariga muvofiq boshqa huquqlarga ham ega boʻlishi mumkin.

12. Byuro quyidagilar uchun javobgardir:

sud hujjatlari va boshqa organlar hujjatlarning oʻz vaqtida va toʻliq ijro etilishini taʼminlash;

energiya resurslari uchun toʻlovlarning oʻz vaqtida va toʻliq undirilishini, isteʼmolchilarning qarzdorligi kamaytirilishini taʼminlash;

energiya resurslaridan noqonuniy foydalanish holatlarini, shuningdek, bevosita isteʼmolchilar tomonidan foydalanilgan va tegishli hududlar chegarasidagi tarmoqlarga yetkazib berilgan energiya resurslari hajmi oʻrtasidagi tafovutlarni aniqlash, bartaraf etish va oldini olish;

energiya resurslari hajmi oʻrtasidagi aniqlangan tafovutlarni bartaraf qilish mexanizmi boʻyicha takliflar kiritish hamda aybdor shaxslarni javobgarlikka tortish choralarini koʻrish;

yuklatilgan boshqa vazifalarni samarali bajarish.

13. Byuroga Bosh prokurorning taqdimnomasiga asosan Oʻzbekiston Respublikasi Prezidenti tomonidan lavozimiga tayinlanadigan hamda Oʻzbekiston Respublikasi Prezidenti tomonidan lavozimidan ozod etiladigan direktor rahbarlik qiladi.

14. Byuro direktori:

Byuro direktorining taqdimnomasiga asosan Bosh prokuror tomonidan lavozimiga tayinlanadigan uchta oʻrinbosarlarga, shu jumladan, birinchi oʻrinbosarga ega boʻladi;

maqomi, mehnatga haq toʻlash, tibbiy va transport taʼminoti shart-sharoitlari boʻyicha Bosh prokurorning oʻrinbosariga tenglashtiriladi;

lavozimi boʻyicha Oʻzbekiston Respublikasi Bosh davlat ijrochisi hisoblanadi;

oʻzining faoliyati boʻyicha Bosh prokurorga boʻysunadi va unga hisobdordir.

15. Yuklatilgan vazifalarni bajarish uchun Byuro direktori:

a) Byuro faoliyatiga umumiy rahbarlik qiladi;

b) Byuro xodimlarini belgilangan tartibda lavozimga tayinlaydi va lavozimidan ozod etadi;

v) Byuro hududiy tuzilmalari boshliqlarining hisobotlarini eshitadi;

g) Bosh prokurorga quyidagilarni kiritadi (taqdim etadi):

Byuro vakolatiga kiruvchi masalalar boʻyicha normativ-huquqiy hujjatlar va boshqa hujjatlar loyihalarini;

Byuro va uning hududiy tuzilmalarining tashkiliy-shtat tuzilmalariga oʻzgartish kiritish toʻgʻrisidagi takliflarni;

ushbu Nizomning 19-bandi ikkinchi xatboshisida koʻrsatilgan shaxslarni lavozimga tayinlash va lavozimidan ozod etish toʻgʻrisida taqdimnomalarni;

Byuroning tegishli xodimlariga darajali unvonlarni berish boʻyicha takliflarni;

Byuro xodimlarini ragʻbatlantirish, ularni Oʻzbekiston Respublikasining davlat mukofotlariga tavsiya etish toʻgʻrisidagi taqdimnomalarni;

Byuro faoliyati natijalari haqidagi hisobotni;

d) Byuro va uning hududiy tuzilmalarining shtatlar jadvalini, Byuro markaziy apparati boshqarmalari va boʻlimlari toʻgʻrisidagi nizomlarni belgilangan tartibda tasdiqlaydi;

e) oʻz vakolatlari doirasida Byuro faoliyatini tashkil etish masalalari boʻyicha barcha xodimlar tomonidan bajarilishi majburiy boʻlgan buyruqlar, koʻrsatmalar va farmoyishlar chiqaradi;

j) ajratilgan mablagʻlar doirasida Byuro xodimlariga ustama haqi, mukofotlar va boshqa ragʻbatlantirishlar toʻlash tartibi va shartlarini qonun hujjatlariga muvofiq belgilaydi;

z) Byuroga yuklatilgan vazifalarning bajarilishi uchun shaxsan javob beradi;

i) Byuroning tegishli xodimlariga maxsus toifalar beradi;

k) Byuroning kuch va vositalari samarali taqsimlanishini, shu jumladan, muayyan funksiyalarni bajaradigan xodimlarning Byuroga yuklatilgan boshqa ishlarga jalb etilishini tashkil etadi;

l) Byuro faoliyatiga taalluqli masalalar boʻyicha tezkor yigʻilishlar oʻtkazadi;

m) qonun hujjatlariga va ushbu Nizomga muvofiq boshqa vakolatlarni amalga oshiradi.

16. Byuro direktori boʻlmagan hollarda uning vakolatlarini Bosh prokurorning buyrugʻiga asosan uning oʻrinbosarlaridan biri amalga oshiradi.

17. Byuroning hududiy boshqarmalari boshliqlari tegishincha Qoraqalpogʻiston Respublikasi, viloyatlar va Toshkent shahrining bosh davlat ijrochilari hisoblanadi.

18. Byuroning tuman (shahar) boʻlimlari boshliqlari katta davlat ijrochilari hisoblanadi.

19. Lavozimga tayinlash va lavozimdan ozod etish:

Byuroning markaziy apparati tarkibiy tarmoqlari va uning hududiy boshqarmalari boshliqlari Byuro direktorining taqdimnomasiga binoan Bosh prokuror tomonidan amalga oshiriladi;

Byuroning markaziy apparati tarkibiy tarmoqlari va uning hududiy boshqarmalari boshliqlarining oʻrinbosarlari Bosh prokuratura bilan kelishilgan holda Byuro direktori tomonidan amalga oshiriladi;

Byuro markaziy apparatining boshqa xodimlari, hududiy boshqarmalarning tarkibiy tarmoqlari, tuman (shahar) boʻlimlari boshliqlari Byuro direktori tomonidan amalga oshiriladi;

Byuroning tuman (shahar) boʻlimlari boshliqlarining oʻrinbosarlari Byuro direktori bilan kelishilgan holda hududiy boshqarmalar boshliqlari tomonidan amalga oshiriladi;

Byuroning hududiy tuzilmalarining boshqa xodimlari hududiy boshqarmalar boshliqlari tomonidan amalga oshiriladi.

20. Oʻzbekiston Respublikasi Bosh davlat ijrochisi, Qoraqalpogʻiston Respublikasi, viloyatlar va Toshkent shahrining bosh davlat ijrochilari hamda ularning oʻrinbosarlari, tuman (shahar) katta davlat ijrochilari, shuningdek, Byuroning surishtiruv va maʼmuriy amaliyot boʻlimi boshligʻi Oʻzbekiston Respublikasi Jinoyat-protsessual kodeksiga muvofiq oʻz vakolatlari doirasida surishtiruv organi boshliqlari huquqlariga ega boʻladi.

21. Byuroning markaziy apparati va hududiy boshqarmalarining boshqaruv xodimlari (moliya-xoʻjalik tuzilmalari bundan mustasno), tuman (shahar) boʻlimlari boshliqlari, ularning oʻrinbosarlari, davlat ijrochilari, surishtiruvchilar, shuningdek, Byuroning elektr va gaz taʼminoti sohasida huquqbuzarliklarga qarshi kurashish boʻyicha tuzilmalari xodimlari oʻzining maqomi boʻyicha prokuratura organlari xodimlari hisoblanadi. Ushbu xodimlarga darajali unvonlar beriladi va ular Oʻzbekiston Respublikasi Prezidenti tomonidan tasdiqlanadigan Oʻzbekiston Respublikasi Bosh prokuraturasi huzuridagi Majburiy ijro byurosida xizmatni oʻtash toʻgʻrisidagi nizomga muvofiq xizmatni oʻtaydilar.

Byuroning boshqa xodimlari faoliyatni mehnat shartnomalariga asosan, prokuratura organlariga qabul qilishda qoʻyiladigan talablar hisobga olingan holda, amalga oshiradi. Byuroning tuman (shahar) boʻlimlari elektr energiya va tabiiy gazdan foydalanish tartibini nazorat qilish guruhlari (shuʼbalari)ning davlat inspektori lavozimi xodimlar, qoida tariqasida, olti oy muddatga tuziladigan mehnat shartnomalariga asosan ishga qabul qilinadi. Ushbu xodimlar bilan mehnat munosabatlarini davom ettirishning asosiy sharti — biriktirilgan hududda energiya resurslaridan qarzdorlikning kamida 80 foizdan kam boʻlmagan miqdorda undirilishini taʼminlash hisoblanadi.

Mazkur bandning ikkinchi xatboshisida koʻrsatilgan:

xodimlarga Bosh prokuror tomonidan oʻrnatilgan tartibda maxsus toifalar beriladi, shuningdek, ularga maxsus toifalar va uzoq yil xizmat qilganlik uchun ustama haqi toʻlanadi;

prokuratura organlaridan oʻtkazilgan xodimlarda prokuratura organlari xodimlari uchun qonun hujjatlarida nazarda tutilgan huquq, imtiyoz va boshqa afzalliklar saqlanib qolinadi.

22. Byuroning daraja unvonlariga ega boʻlgan, shuningdek, maxsus toifalar beriladigan mansablarni egallab turgan xodimlari belgilangan tartibda tasdiqlanadigan namunadagi tegishli xizmat kiyimi va alohida koʻrinishdagi belgilarni kiyadilar.

Xizmat kiyimi bilan taʼminlash meʼyorlari Byuro direktori tomonidan tasdiqlanadi.

Xizmat kiyimlari bilan taʼminlash Oʻzbekiston Respublikasi Davlat budjeti mablagʻlari hisobidan amalga oshiriladi.

23. Byuro xodimlari oʻz xizmat vazifalarini bajarishlari uchun maxsus avtotransport vositalari, shu jumladan, Byuroga mansubligini anglatuvchi maxsus chiroqli signallarga, boʻyoqlarning rangli grafik sxemalariga ega boʻlgan avtotransport vositalari, shuningdek, boshqa maxsus vositalar bilan taʼminlanadi.

Maxsus avtotransport va maxsus vositalar bilan taʼminlash meʼyorlari Bosh prokuror tomonidan Oʻzbekiston Respublikasi Moliya vazirligi bilan kelishilgan holda belgilanadi.

24. Byuro xodimlarini moddiy ragʻbatlantirish budjetdan ajratiladigan mablagʻlar, Jamgʻarma mablagʻlari, shuningdek, qonunda taqiqlanmagan boshqa manbalar hisobidan Bosh prokuror tomonidan belgilangan tartibda amalga oshiriladi.

25. Byuro talabnomalari, koʻrsatmalari, taqdimnomalari va boshqa hujjatlarining ijrosini bajarmaslik, shuningdek, Byuro faoliyatiga aralashish hamda yuklatilgan vazifalar va funksiyalarni qonuniy ijro etilishiga toʻsqinlik qilish maqsadida uning xodimlariga har qanday shaklda taʼsir koʻrsatish taqiqlanadi va qonunda belgilangan tartibda javobgarlikka sabab boʻladi.

26. Byuroni qayta tashkil etish yoki tugatish Oʻzbekiston Respublikasi Prezidentining qarori bilan amalga oshiriladi.

1. Ushbu Nizom Oʻzbekiston Respublikasi Bosh prokuraturasi huzuridagi Majburiy ijro byurosi (keyingi oʻrinlarda — Byuro) va Agrosanoat majmui va oziq-ovqat xavfsizligi taʼminlanishi ustidan nazorat qilish inspeksiyasiga (keyingi oʻrinlarda — Inspeksiya) xizmatga qabul qilish va xizmatni oʻtash, xodimlarga darajali unvonlar berish va ulardan mahrum qilish, ragʻbatlantirish va intizomiy javobgarlikka tortish tartibini belgilaydi.

2. Ushbu Nizom talablari Byuroning va Inspeksiyaning darajali unvonlar berilishi nazarda tutilgan lavozimlarda xizmat qilayotgan xodimlariga (keyingi oʻrinlarda xodimlar deb yuritiladi) tatbiq etiladi.

3. Byuroda va Inspeksiyada xizmatni oʻtashning huquqiy asoslarini Oʻzbekiston Respublikasining Konstitutsiyasi, Oʻzbekiston Respublikasining “Prokuratura toʻgʻrisida”gi Qonuni, ushbu Nizom, boshqa qonun hujjatlari, shuningdek Oʻzbekiston Respublikasi Bosh prokurori (keyingi oʻrinlarda Bosh prokuror deb yuritiladi) va Byuro direktorining va Inspeksiya boshligʻining buyruqlari tashkil qiladi.

4. Byuroda va Inspeksiyada xizmat qilish qonuniylik, inson va fuqaroning huquq va erkinliklarini hurmat qilish hamda ularga rioya etish, ochiqlik, nazorat qilinish va hisobot berish tamoyillariga muvofiq amalga oshiriladi.

5. Xodimlar prokuratura organlarining oʻquv muassasalari va boshqa oʻquv muassasalarida Bosh prokuror tomonidan belgilangan tartibda tayyorgarlik, qayta tayyorgarlik va malaka oshirishni oʻtaydilar.

6. Byuroda va Inspeksiyada xizmat qilish uchun yurisprudensiya, moliya, iqtisodiyot, qishloq va suv xoʻjaligi va boshqa sohalarda oliy yoki oʻrta maxsus maʼlumotli, sogʻligʻiga koʻra xizmat majburiyatlarini bajarishga qodir boʻlgan, zarur kasb-kor va maʼnaviy fazilatlarga ega Oʻzbekiston Respublikasi fuqarolari qabul qilinadilar.

Bunda Byuroning davlat ijrochilari lavozimlariga oliy yoki oʻrta maxsus yuridik maʼlumotga ega, ayrim hollarda boshqa mutaxassislikdagi oliy maʼlumotga ega shaxslar, Byuroning boshqa lavozimlariga — oliy yoki oʻrta maxsus maʼlumotli boshqa mutaxassislikka (iqtisodchi, moliyachi, muhandislar va boshqalar) ega shaxslar ham tayinlanadi.

7. Byuroga va Inspeksiyaga xizmatga qabul qilishda nomzodlarning ushbu Nizomda belgilangan talablarga muvofiqligini oʻrganish maqsadida tekshirish hamda maxsus komissiya tomonidan bilim saviyasi, zarur kasb malakasi va ishchanlik qobiliyatini aniqlashga qaratilgan majburiy suhbat oʻtkaziladi.

Byuroga va Inspeksiyaga xizmatga qabul qilishda zimmalariga yuklanadigan xizmat vazifalarini bajarishga sogʻligʻi imkon berishini aniqlash maqsadida nomzodlar majburiy tartibda tibbiy koʻrikdan oʻtkaziladi.

8. Xodimlarni xizmatga qabul qilish va lavozimga tayinlash Bosh prokuror, Byuro direktori, Inspeksiya boshligʻining yoki Byuroning va Inspeksiyaning Qoraqalpogʻiston Respublikasi, viloyatlar va Toshkent shahar boshqarmalari (keyingi oʻrinlarda hududiy boshqarmalar deb yuritiladi) boshliqlarining buyruqlari bilan rasmiylashtiriladi.

Xizmatga qabul qilish toʻgʻrisidagi buyruq xodimga imzo qoʻydirib eʼlon qilinadi.

9. Agar shaxs:

Oʻzbekiston Respublikasi fuqarosi boʻlmasa;

sudning qarori bilan muomalaga layoqatsiz yoki muomala layoqati cheklangan deb eʼtirof etilgan boʻlsa;

sudlangan boʻlsa;

nojoʻya xatti-harakatlar sodir etganligi uchun huquqni muhofaza qiluvchi, sud yoki boshqa davlat organlaridan hamda boshqa tashkilotlardan boʻshatilgan shaxslar boʻlsa, Byuroga va Inspeksiyaga xizmatga qabul qilinishi mumkin emas.

Byuroga va Inspeksiyaga xizmatga qabul qilinganda xodimlar oʻz xizmat davrida siyosiy partiyalarga aʼzolikni toʻxtatib turadilar.

10. Oʻzaro yaqin qarindoshlik yoki quda-andachilikda boʻlgan Byuro va Inspeksiya xodimlarining (ota-onalar, aka-ukalar, opa-singillar, oʻgʻil va qizlar, er-xotinlar, shuningdek, er-xotinlarning ota-onalari, aka-ukalari, opa-singillari va bolalari), basharti ulardan biri ikkinchisiga bevosita boʻysunib yoki uning nazorati ostida xizmat qiladigan boʻlsa, birgalikda xizmat qilishlari taqiqlanadi.

11. Xodimlar ilmiy, pedagogik va ijodiy faoliyatdan tashqari haq toʻlanadigan faoliyatning biror-bir turi bilan shugʻullanishi mumkin emas. Ular bunday faoliyat bilan faqat asosiy ish vaqtidan boʻsh paytda shugʻullanishlari mumkin.

12. Xodimlarning lavozimlari roʻyxati Byuro direktori va Inspeksiya boshligʻi tomonidan tasdiqlanadigan shtat jadvali bilan belgilanadi.

Byuro va Inspeksiya faoliyatining ichki tizimini tashkil etish tegishlicha Byuro direktori va Inspeksiya boshligʻi tomonidan tasdiqlanadigan Byuro va Inspeksiya Reglamentlari hamda hududiy boshqarmalarning Namunaviy reglamenti bilan belgilanadi.

13. Xodim birinchi marotaba xizmatga qabul qilinayotganda prokuratura xodimlarining qasamyodini qabul qiladi. Qasamyod Byuro va Inspeksiyaning rahbarlari hozirligida tantanali vaziyatda qabul qilinadi.

Qasamyod yakka tartibda qabul qilinadi. Qasamyod qabul qiluvchi shaxs qasamyod matnini ovoz chiqarib oʻqiydi va unga imzo chekadi.

Imzolangan qasamyod matni varagʻi xodimning shaxsiy hujjatlari yigʻmajildida saqlanadi.

14. Xodimlar xizmatni oʻtash davrida tegishlicha Byuro direktori va Inspeksiya boshligʻi tomonidan tasdiqlanadigan Byuro, Inspeksiya xodimlarining kasbiy odobnomasiga rioya qilishlari shart.

Byuro va Inspeksiya xodimining kasb odobnomasi talablarini buzish belgilangan tartibda javobgarlikni keltirib chiqaradi. Mazkur qoidalar buzilishining har bir holati boʻyicha xizmat tekshiruvi oʻtkaziladi.

Xizmat tekshiruvi oʻtkazilishi davrida Byuro xodimi vaqtinchalik, lekin bir oydan ortiq boʻlmagan muddatga xizmat vazifalarini bajarishdan ozod qilinishi mumkin.

Xizmat tekshiruvini oʻtkazish va Byuro va Inspeksiya xodimini vaqtinchalik xizmat vazifalarini bajarishdan ozod qilish tartibi Byuro direktori va Inspeksiya boshligʻi tomonidan Bosh prokuror bilan kelishilgan holda belgilanadi.

15. Xodimlarining xizmat pogʻonalarida yuqorilab borishi ularning ishchanlik, professional va shaxsiy sifatlari, topshirilgan sohada erishgan natijalariga muvofiq ravishda amalga oshiriladi. Bunda xodimning yuqori lavozimga tayinlanishga roziligi talab qilinmaydi.

16. Korrupsiya va boshqa suiisteʼmolchiliklarning profilaktikasi va ularga yoʻl qoʻymaslik, xodimning shaxsiy va ishchanlik fazilatlarini, uning faoliyati samaradorligini muntazam oʻrganish, shuningdek Byuro va Inspeksiya faoliyatining turli yoʻnalishlarida malaka va ish tajribasiga ega boʻlgan kadrlar zaxirasini shakllantirish maqsadida xodimlarning rotatsiyasi oʻtkaziladi.

Byuro xodimlarining rotatsiyasi, qoida tariqasida, egallab turgan lavozimida uch yil oʻtishi bilan oʻtkaziladi.

Xodimlarni rotatsiya qilish tartibi Byuro direktori va Inspeksiya boshligʻi tomonidan belgilanadi.

17. Byuro va Inspeksiya xodimlariga Byuro direktori, Inspeksiya boshligʻi tomonidan belgilangan shaklda va tartibda xizmat guvohnomalari beriladi.

Byuroning davlat inspektorlariga Byuro direktori tomonidan oʻrnatilgan shaklda va tartibda jetonlar beriladi.

Byuro direktori va Inspeksiya boshligʻiga xizmat guvohnomalari Oʻzbekiston Respublikasi Prezidenti imzosi qoʻyilgan holda beriladi.

Byuro va Inspeksiyaning Bosh prokuror tomonidan lavozimga tayinlanadigan xodimlariga xizmat guvohnomalari Bosh prokuratura tomonidan beriladi.

Guvohnoma va jetonning Byuro xodimining aybi bilan yoʻqotilishi lavozimdagi nojoʻya xatti-harakat hisoblanadi va intizomiy javobgarlikni keltirib chiqaradi. Guvohnoma va jeton yoʻqotilishining har bir holati boʻyicha xizmat tekshiruvi oʻtkaziladi.

18. Xodimlarni egallab turgan lavozimlariga xizmat boʻyicha muvofiqligini aniqlash maqsadida Byuro direktori va Inspeksiya boshligʻi tomonidan belgilangan tartibda va muddatlarda attestatsiya oʻtkaziladi.

Lavozimiga Bosh prokurorning buyruqlari bilan tayinlanadigan xodimlar Oʻzbekiston Respublikasi Bosh prokuraturasining (keyingi oʻrinlarda Bosh prokuratura deb yuritiladi) attestatsiya komissiyasi tomonidan, lavozimiga Byuro direktori, Inspeksiya boshligʻi, Byuro va Inspeksiyaning hududiy boshqarmalari boshliqlarining buyruqlari bilan tayinlanadigan xodimlar esa — tegishlicha Byuro, Inspeksiya va ularning hududiy boshqarmalarining attestatsiya komissiyalari tomonidan attestatsiyadan oʻtkaziladi.

19. Darajali unvonga ega boʻlgan xodimlar xizmat vazifalarini bajarish davrida prokuratura organlari xodimlari uchun tasdiqlangan namunadagi alohida belgili xizmat kiyimi kiyib yuradilar.

Darajali unvonga ega boʻlgan xodimlar bepul xizmat kiyimi bilan taʼminlanadi.

Xodimlarning xizmat kiyimini kiyib yurish tartibi tegishlicha Byuro direktori va Inspeksiya boshligʻi tomonidan belgilanadi.

Darajali unvonlarga ega boʻlib, pensiyaga chiqishi munosabati bilan xizmatdan boʻshagan xodimlar oʻtkaziladigan tantanalar va rasmiy tadbirlarda alohida belgili xizmat kiyimini kiyib yurish huquqini saqlab qoladi.

Xizmat kiyimi bilan taʼminlash Oʻzbekiston Respublikasi Davlat budjeti mablagʻlari hisobiga amalga oshiriladi.

20. Darajali unvonlar berish xodimlarning ishchanlik va shaxsiy fazilatlarini hisobga olgan holda hamda egallab turgan lavozimi va ish stajiga muvofiq izchil tartibda amalga oshiriladi.

21. Xodimlarga quyidagi darajali unvonlar beriladi:

3-darajali yurist;

2-darajali yurist;

1-darajali yurist;

adliya kichik maslahatchisi;

adliya maslahatchisi;

adliya katta maslahatchisi;

3-darajali Davlat adliya maslahatchisi;

2-darajali Davlat adliya maslahatchisi;

Oʻrta maxsus maʼlumotga ega xodimlarga 3, 2 va 1-darajali yurist darajali unvonlari beriladi.

22. Xodimlarga egallab turgan lavozimiga mutanosib ravishda quyidagi darajali unvonlar beriladi:

2-darajali Davlat adliya maslahatchisi — Byuro direktori, Inspeksiya boshligʻi;

3-darajali Davlat adliya maslahatchisi — Byuro direktori, Inspeksiya boshligʻi oʻrinbosarlari;

adliya katta maslahatchisi — Byuro va Inspeksiyaning markaziy apparati boshqarma va boʻlim boshliqlari, Byuroning Axborot-kommunikatsiya texnologiyalarini joriy etish markazi direktori (keyingi oʻrinlarda — Markaz), Byuro va Inspeksiyaning hududiy boshqarma boshliqlari;

adliya maslahatchisi — Byuro direktori va Inspeksiya boshligʻi yordamchilari, boshqarma va boʻlim boshliqlari oʻrinbosarlari, Byuroning markaziy apparati bosh surishtiruvchisi, bosh revizori, bosh inspektorlari, Markaz direktori oʻrinbosari, boʻlim boshliqlari, Inspeksiyaning markaziy apparati boshqarma boshliqlari oʻrinbosarlari, Byuro va Inspeksiyaning hududiy boshqarma boshliqlari oʻrinbosarlari, Byuro hududiy boshqarmalarining boʻlim boshliqlari, jamoatchilik bilan aloqalar va huquqiy axborot boʻyicha katta inspektorlari, ichki xavfsizlikni taʼminlash boʻyicha katta inspektorlari, Inspeksiya hududiy boshqarmalarining boʻlim boshliqlari, bosh inspektorlari, Byuro tuman (shahar) boʻlim boshliqlari — katta davlat ijrochilari, Inspeksiyaning tumanlar (Quvasoy shahar) boʻlimlari boshliqlari;

adliya kichik maslahatchisi — Byuro markaziy apparati katta surishtiruvchilari, katta inspektorlari, katta kriminalisti va kriminalisti, Markaz dasturchilari, maʼmurlari, muhandislari, shuʼba mudirlari, veb-dizayneri, axborot xavfsizligi boʻyicha mutaxassisi, axborot texnologiyalari mutaxassisi, Byuro hududiy boshqarmalarining katta surishtiruvchilari, surishtiruvchilari, katta inspektorlari, inspektorlari, bosh revizorlari, katta revizorlari, axborot texnologiyalari mutaxassislari, tuman (shahar) boʻlim boshliqlari oʻrinbosarlari, Inspeksiya markaziy apparatining bosh inspektorlari, katta inspektorlari, Inspeksiya hududiy boshqarmalarining katta inspektorlari, inspektorlari, tumanlar (Quvasoy shahar) boʻlimlari boshliq oʻrinbosarlari;

1 va 2-darajali yurist — Byuro tuman (shahar) boʻlimlari davlat ijrochilari, surishtiruvchilari, shuningdek, katta inspektorlari, inspektorlari, tezkor shuʼbalar kriminalistlari, qidiruv boʻyicha katta inspektorlari, inspektorlari, Inspeksiyaning tumanlar (Quvasoy shahar) boʻlimlari bosh inspektorlari, katta inspektorlari, inspektorlari;

3-darajali yurist — birinchi marta attestatsiyadan oʻtgan va lavozimga tayinlangan xodimlarga beriladi.

23. Har bir darajali unvonda boʻlishning quyidagi muddatlari belgilanadi:

3-darajali yurist — 2 yil;

2-darajali yurist — 2 yil 6 oy;

1-darajali yurist — 3 yil;

adliya kichik maslahatchisi — 3 yil;

adliya maslahatchisi — 3 yil 6 oy;

2 va 3-darajali Davlat adliya maslahatchisi hamda adliya katta maslahatchisi darajali unvonlarda boʻlishning muddatlari belgilanmaydi.

24. 2 va 3-darajali davlat adliya maslahatchisi darajali unvonlari Bosh prokurorning taqdimnomasiga koʻra Oʻzbekiston Respublikasi Prezidenti tomonidan beriladi.

3-darajali yurist, adliya kichik maslahatchisi, adliya maslahatchisi va adliya katta maslahatchisi unvonlari Bosh prokuror tomonidan Byuro direktorining va Inspeksiya boshligʻining taqdimnomasiga asosan beriladi.

3-darajali yurist unvoni birinchi marta Byuro va Inspeksiyaga xizmatga qabul qilingan va darajali unvonga ega boʻlmagan xodimlarga attestatsiyadan oʻtganidan soʻng beriladi.

25. Navbatdagi adliya katta maslahatchisi darajali unvoni, qoidaga koʻra, prokuratura organlari va boshqa davlat organlarining oʻquv muassasalarini rahbarlik lavozimlarini egallash uchun zaxirada turuvchi kadrlarni kasbiy qayta tayyorlash dasturi boʻyicha yoki magistraturasini boʻyicha muvaffaqiyatli tamomlagan xodimlariga beriladi.

Adliya katta maslahatchisining darajali unvoni, istisno tariqasida fidokorona mehnati va namuna koʻrsatgan xodimlariga alohida xizmatlari uchun ham berilishi mumkin.

26. Boshqa huquqni muhofaza qilish organlaridan va oʻzga tashkilotlardan Byuroga, Inspeksiyaga xizmatga oʻtgan xodimlarga darajali unvonlar ularning Byuroda, Inspeksiyada tayinlangan lavozimi, oldingi darajali unvoni yoki ish tajribasi hisobga olingan holda beriladi, qonunchilikda belgilangan holatlar bundan mustasno.

Ularga navbatdagi darajali unvon ushbu Nizomda nazarda tutilgan tartibda beriladi.

27. Bosh prokuror va Byuro direktori, istisno tariqasida, quyidagi huquqlarga ega:

alohida hollarda xodimlariga xizmat majburiyatlarini namunali bajarganligi uchun navbatdagi darajali unvonlarni belgilangan muddatidan avval berish;

yuqoriroq lavozimga tayinlaganda darajali unvonni navbatdan tashqari, lekin xodim egallab turgan darajali unvondan koʻpi bilan ikki pogʻona yuqori darajali unvon berish.

ushbu Nizomda belgilangan tartibda darajali unvonlar berilishi nazarda tutilmagan lavozimlarda ishlayotgan xodimlarga ishda oʻrnak koʻrsatganligi uchun darajali unvonlar berish.

28. Darajali unvonlar berilgan xodimlar mazkur unvonga umrbod ega boʻlib qoladilar. Xodim oʻzini badnom qiladigan qilmishi uchun Byurodan, Inspeksiyadan boʻshatilganda darajali unvondan mahrum etilishi mumkin. Xodim oʻz xizmat burchini qoʻpol ravishda buzgan taqdirda yoki noloyiq xulq-atvori uchun uning unvoni pasaytirilishi mumkin.

29. Xodimlarni oliy darajali unvonlardan mahrum etish yoki ularning oliy darajali unvonlarini pasaytirish Oʻzbekiston Respublikasi Prezidenti tomonidan, boshqa darajali unvonlardan mahrum etish yoki unvonni pasaytirish Bosh prokuror, shuningdek vakolat doirasida Byuro direktori tomonidan amalga oshiriladi.

Xodimlarni darajali unvonlardan mahrum etish sudning hukmi boʻyicha ham amalga oshirilishi mumkin.

30. Darajali unvonlarga ega boʻlgan xodimlarga lavozim maoshlariga oylik qoʻshimcha haq toʻlanadi.

31. Xodimlar xizmatdagi tashabbuskorligi, tezkorligi, xizmat vazifalarini vijdonan va namunali bajarganliklari uchun ragʻbatlantiriladilar.

32. Ragʻbatlantirishning quyidagi turlari mavjud:

tashakkurnoma;

pul mukofoti;

ilgari berilgan intizomiy jazoni amal qilish muddati tugashidan avval olib tashlash;

faxriy yorliq;

sovgʻa

qimmatbaho sovgʻa;

navbatdan tashqari darajali unvon yoki navbatdagi darajali unvonni belgilangan muddat tugagunga qadar yoxud egallab turgan lavozimidan qatʼi nazar berish;

I, II, III-darajali “Aʼlo xizmatlari uchun” koʻkrak nishoni bilan taqdirlash;

“Majburiy ijro byurosining Faxriy xodimi” koʻkrak nishoni bilan taqdirlash.

Xodimlar, shuningdek:

Byuro direktori hamda davlat muassasalari va jamoat xizmati xodimlari kasaba uyushmasi Respublika kengashining Faxriy yorligʻi;

tegishlicha Bosh prokuror, Qoraqalpogʻiston Respublikasi, viloyatlar, Toshkent shahar prokurorlari va ularga tenglashtirilgan prokurorlar tomonidan prokuratura organlari xodimlari uchun nazarda tutilgan ragʻbatlantirish turlari bilan ragʻbatlantirilishi mumkin.

Xodimlar alohida xizmatlari uchun Oʻzbekiston Respublikasi davlat mukofotlariga taqdim etilishi mumkin.

Ish haqi, mukofotlar, qoʻshimcha toʻlovlar, ustamalar va mehnatga haq toʻlash tizimida nazarda tutilgan boshqa toʻlovlar ragʻbatlantirish turlariga kirmaydi.

33. Intizomiy jazosi boʻlgan xodimlar faqat berilgan intizomiy jazoni olib tashlash tariqasida ragʻbatlantirilishlari mumkin.

34. Ragʻbatlantirish quyidagi tartibda amalga oshiriladi:

tashakkurnoma eʼlon qilish, pul mukofoti yoki sovgʻa bilan taqdirlash, muqaddam berilgan intizomiy jazoni amal qilish muddatidan avval olib tashlash tegishlicha Bosh prokuror, Byuro direktori, Inspeksiya boshligʻi, Byuro va Inspeksiyaning hududiy boshqarma boshliqlari tomonidan amalga oshiriladi;

faxriy yorliq, qimmatbaho sovgʻa, “Majburiy ijro byurosining Faxriy xodimi” koʻkrak nishoni bilan taqdirlash, navbatdan tashqari darajali unvon yoki navbatdagi darajali unvonni belgilangan muddatdan oldin, yoxud egallab turgan lavozimidan qatʼi nazar berish, shuningdek Byuro direktori va Inspeksiya boshligʻi hamda Davlat muassasalari va ijtimoiy xizmat koʻrsatish xodimlari respublika kasaba uyushmasining Faxriy yorligʻi bilan taqdirlash Byuro direktori va Inspeksiya boshligʻi tomonidan amalga oshiriladi.

faxriy yorliq, qimmatbaho sovgʻa, navbatdan tashqari darajali unvon yoki navbatdagi darajali unvonni belgilangan muddatdan oldin, yoxud egallab turgan lavozimidan qatʼi nazar berish, I, II, III-darajali “Aʼlo xizmatlari uchun” koʻkrak nishoni bilan taqdirlash, shuningdek Oʻzbekiston Respublikasining davlat mukofotlariga taqdim etish Bosh prokuror tomonidan amalga oshiriladi.

35. Ragʻbatlantirish haqida buyruq chiqarilib, xodim ishlayotgan Byuro, Inspeksiya tuzilmasi xodimlariga eʼlon qilinadi, zarur hollarda esa barcha xodimlar eʼtiboriga yetkaziladi.

Ragʻbatlantirish toʻgʻrisidagi buyruq nusxasi xodimning shaxsiy hujjatlari yigʻma jildiga qoʻshiladi.

36. Xodimlarga nisbatan intizomiy jazolar oʻz xizmat vazifalarini bajarmaganligi yoki lozim darajada bajarmaganligi, Byuro va Inspeksiya xodimi degan nomga dogʻ tushiradigan nojoʻya xatti-harakat sodir etganligi uchun qoʻllaniladi.

37. Quyidagilar intizomiy jazolar hisoblanadi:

hayfsan;

oʻrtacha oylik ish haqining ellik foizidan ortiq boʻlmagan miqdordagi jarima;

lavozimda pasaytirish;

darajali unvonni bir pogʻonaga pasaytirish;

xizmat vazifalarini muntazam yoki bir marta qoʻpol ravishda buzganligi uchun xizmatdan boʻshatish.

Quyidagilar xizmat vazifalarini bir marta qoʻpol ravishda buzish hisoblanadi:

uzrli sabablarsiz progul qilish (shu jumladan, ish kuni mobaynida uch soatdan ortiq xizmatda boʻlmaslik);

xizmatga mast holda kelish, shuningdek ish joyida spirtli ichimliklar isteʼmol qilish;

jinoiy jazolanadigan qilmish yoki nojoʻya xatti-harakat sodir etish;

qasamyodni buzish.

38. Bosh prokuror barcha intizomiy jazo turlarini qoʻllashga haqlidir, Oʻzbekiston Respublikasi Prezidenti tomonidan berilgan darajali unvonlarda pasaytirish bundan mustasno.

Byuro direktori, Inspeksiya boshligʻi, Byuro va Inspeksiyaning hududiy boshqarmalari boshliqlari boʻysunuvidagi xodimlarga nisbatan hayfsan va jarima shaklidagi intizomiy jazolarni qoʻllashlari mumkin. Bundan tashqari, ular qonun hujjatlarida nazarda tutilgan holatlardagi kelishish tartibiga rioya qilgan holda xizmatga qabul qilish va lavozimiga tayinlash oʻz vakolatiga kiruvchi xodimlarning lavozimini pasaytirishi yoxud xizmatdan boʻshatishi mumkin.

39. Intizomiy jazo qoʻllash masalasini hal etayotgan rahbar sodir etilgan xatti-harakatni shaxsan oʻzi oʻrganib chiqishi shart. Zarur hollarda, xizmat tekshiruvi oʻtkazilishi mumkin.

Intizomiy jazo qoʻllashdan avval xodimdan yozma ravishda tushuntirish xati talab qilib olinishi lozim. Xodimning tushuntirish xati berishdan bosh tortishi uning sodir qilgan nojoʻya xatti-harakati uchun jazo qoʻllashga toʻsiq boʻla olmaydi.

Har bir nojoʻya xatti-harakat uchun faqat bitta intizomiy jazo qoʻllanishi mumkin.

Intizomiy jazo bevosita nojoʻya xatti-harakat aniqlangandan keyin, ammo bu xatti-harakat aniqlangandan boshlab xodimning kasal yoki taʼtilda boʻlgan vaqtini hisobga olmagan holda uzogʻi bilan bir oy ichida qoʻllaniladi.

Nojoʻya xatti-harakat sodir etilgan kundan boshlab olti oy oʻtganidan, xizmat tekshiruvi natijasida aniqlanganda esa, — sodir etilgan kundan boshlab ikki yil oʻtganidan keyin jazo qoʻllab boʻlmaydi. Jinoyat ishi boʻyicha oʻtkazilgan dastlabki tergov va sud davri bu muddatga kirmaydi.

Intizomiy jazo buyruq bilan beriladi va u xodimga maʼlum qilinib, tilxat olinadi hamda uning shaxsiy yigʻmajildiga qoʻshib qoʻyiladi. Intizomiy jazo qoʻllash haqidagi buyruq tegishli tuzilma xodimlariga, zarur hollarda esa Byuroning, Inspeksiyaning barcha xodimlariga ham eʼlon qilinishi mumkin.

Bosh prokuror tomonidan lavozimga tayinlangan xodim intizomiy javobgarlikka tortilgan hollarda, intizomiy jazo qoʻllash haqidagi buyruq nusxasi Bosh prokuraturaga yuboriladi.

40. Bosh prokuror, shuningdek, oʻz vakolati doirasida Byuro direktori, Inspeksiya boshligʻi intizomiy jazoni bekor qilish, qattiqroq intizomiy jazo qoʻllash yoki uni yengillashtirish huquqiga egadirlar. Agar intizomiy jazo sifatida xizmatdan asossiz boʻshatish qoʻllanilgan boʻlsa, Bosh prokuror yoki Byuro direktori, Inspeksiya boshligʻi xizmatdan boʻshatishni asossiz deb topib, xodimni ilgarigi lavozimiga tiklash yoki unga teng boshqa lavozimga tayinlash va majburiy progul vaqti uchun, biroq koʻpi bilan bir yildan ortiq boʻlmagan davrga haq toʻlanishi toʻgʻrisida buyruq chiqaradilar.

41. Xodim intizomiy jazo qoʻllanilgan kundan boshlab bir yil mobaynida qayta intizomiy jazoga tortilmasa, u intizomiy jazo olmagan deb hisoblanadi.

Qoʻllanilgan intizomiy jazo bu haqdagi buyruq qabul qilingan kundan kamida olti oy oʻtgach, ushbu jazoni qoʻllagan rahbar, Byuro direktori, Inspeksiya boshligʻi yoki Bosh prokuror tomonidan, xodim oʻz xizmat vazifasini vijdonan bajarib, xizmatda oʻrnak koʻrsatsa, muddatidan ilgari olib tashlanishi mumkin.

42. Intizomiy jazo mavjudligi xodimning lavozim boʻyicha yuqori koʻtarilishiga yoki unga darajali unvon berilishiga, shuningdek, rahbarlik lavozimlari uchun zaxiraga kiritilishiga (boʻlishiga) toʻsqinlik qiluvchi holat hisoblanadi.

43. Intizomiy jazoni qoʻllash borasida vakolat doirasidan chetga chiqqan yoki lozim boʻlgan hollarda jazo qoʻllamagan Byuro direktori, Inspeksiya boshligʻi va hududiy boshqarmalar boshliqlari belgilangan tartibda javobgar boʻladilar.

44. Xodim qoʻllanilgan intizomiy jazo ustidan Bosh prokurorga yoki Byuro direktoriga, Inspeksiya boshligʻiga buyruq eʼlon qilingandan keyin ikki haftalik muddatda shikoyat qilishi mumkin.

Shikoyat kelib tushgan kundan boshlab oʻn besh kun muddatda, qoʻshimcha tekshiruv oʻtkazish zarur boʻlgan hollarda esa bir oydan kechikmay koʻrib chiqiladi.

Shikoyat bilan murojaat qilinishi intizomiy jazo ijrosini toʻxtatib qoʻymaydi.

45. Xodimlar davlat himoyasida boʻladi.

Xizmat vazifasini bajarish vaqtida xodimni ushlab turishga, shaxsiy tintuv oʻtkazishga, uning narsalarini va foydalanayotgan transportini koʻzdan kechirishga yoʻl qoʻyilmaydi, qonunda nazarda tutilgan hollar bundan mustasno.

Xodimlarga, shuningdek xizmatdan boʻshatilgan shaxslarga nisbatan ularning Byuroda, Inspeksiyada xizmat vazifalarini bajarish jarayonida sodir etgan qilmishlari uchun jinoyat ishi qoʻzgʻatish masalasi Bosh prokuror, uning oʻrinbosarlari, Qoraqalpogʻiston Respublikasi, viloyatlar, Toshkent shahar prokurorlari va ularga tenglashtirilgan prokurorlar tomonidan vakolatlari doirasida qonun hujjatlarida belgilangan tartibda hal etiladi.

Xodimlarning maʼmuriy huquqbuzarliklari uchun javobgarlik masalasi Byuro direktori, Inspeksiya boshligʻi va hududiy boshqarmalar boshliqlari tomonidan vakolatlari doirasida hal etiladi.

46. Byuroda va Inspeksiyada kadrlar zaxirasi shakllantiriladi.

Kadrlar zaxirasini shakllantirishdan asosiy maqsad Byuroga, Inspeksiyaga zarur kasbiy fazilatlarga ega boʻlgan shaxslarning xizmatga qabul qilinishi, rahbarlik lavozimlariga yuklatilgan vazifalarni professional va samarali amalga oshirish uchun boshqaruvchilik qobiliyatiga ega xodimlar taqdim etilishini taʼminlash, shuningdek ularni tarbiyalash, oʻqitish va joy-joyiga qoʻyishdan iborat.

Kadrlar zaxirasini shakllantirish va u bilan ishlash kollegiallik va xolislik tamoyillariga asosan amalga oshiriladi.

47. Quyidagilar kadrlar zaxirasini shakllantirish va u bilan ishlash faoliyatining ustuvor yoʻnalishlari hisoblanadi:

Byuroga, Inspeksiyaga ushbu Nizom bilan belgilangan talablarga javob beradigan shaxslarni xizmatga qabul qilish;

xodimlarning nazariy bilimlari, amaliy va axborot-tahlil koʻnikmalarini yuksaltirish, ishchanlik va professional sifatlarini takomillashtirish, ularni yuridik, moliya, iqtisodiy, qishloq xoʻjaligi, texnikaviy taʼlim, tezkor-qidiruv faoliyati va axborot-kommunikatsiya texnologiyalarining zamonaviy yutuqlari bilan tanishtirish;

yuqori lavozimlar uchun masʼuliyatli, malakali hamda kasbiy tayyorgarlikka ega xodimlarni tanlab olish va ularni kadrlar zaxirasiga kiritish;

kadrlar zaxirasiga kiritilgan xodimlarni qayta tayyorlash va tarbiyalash, shuningdek ularda boshqaruvchilik qobiliyatlarini shakllantirish;

xodimlarning xizmat pogʻonalarida yuqorilab borishini tizimli rejalashtirish va tashkil etish.

Byuro va Inspeksiya tizimidagi yuqori lavozimlarga, qoida tariqasida, kadrlar zaxirasida turgan xodimlar tayinlanadi.

48. Rahbar kadrlar zaxirasiga kiritish uchun mezon boʻlib, Byuro va Inspeksiya tizimidagi rahbarlik lavozimlarida yuklatilgan vazifalarni bajara olish uchun zarur koʻnikma va sifatlarga egaligi hisoblanadi.

Bunda Byuro direktori oʻrinbosarlari, Inspeksiya boshligʻining oʻrinbosarlari, Byuro va Inspeksiya hududiy boshqarmalari boshliqlari, shuningdek Byuroning, Inspeksiyaning markaziy apparatlari tarkibiy tarmoqlari rahbarlari lavozimlari uchun kadrlar zaxirasiga yuklatilgan xizmat vazifalarini vijdonan bajarayotgan, keng dunyoqarashga, nazariy bilimga, ijobiy shaxsiy va ishchanlik sifatlariga, turli lavozimlarda amaliy ish tajribasiga, tashkiliy-tahliliy qobiliyatga, qatʼiyatlilik, prinsipiallik va masʼullik hissiga ega xodimlar kiritiladi.

49. Kadrlar zaxirasiga nomzodlar Byuro direktori, Inspeksiya boshligʻi, ularning oʻrinbosarlari, Byuro, Inspeksiya markaziy apparatlari tarkibiy tarmoqlari rahbarlari va hududiy boshqarmalar boshliqlari, shuningdek, prokuratura organlari, Byuro va Inspeksiya attestatsiya komissiyalari tomonidan taqdim etiladi.

Masʼuliyatli, malakali va tajribali xodimlarning xizmat pogʻonasida yuqorilab borishini taʼminlash maqsadida Byuroning, Inspeksiyaning kadrlar boshqarmalari tomonidan ichki xavfsizlikni taʼminlash boshqarmalari va Byuroning, Inspeksiyaning boshqa tuzilmalari bilan birgalikda kadrlar zaxirasiga nomzodlarni xolisona tanlash, ularni oʻrganish hamda kasbga tizimli ravishda tayyorlash amalga oshiriladi.

50. Kadrlar zaxirasi bilan ishlash tizimli asosda, mavjud vakansiyalardan qatʼi nazar olib boriladi. Rahbarlik lavozimlariga zaxira tarkibi yiliga kamida bir marotaba shakllantiriladi.

Byuro, Inspeksiya va ularning hududiy boshqarmalarining rahbar lavozimlariga kadrlar zaxirasi tegishlicha Byuro, Inspeksiya va ularning hududiy boshqarmalarining hayʼatlarida tasdiqlanadi.

51. Kadrlar zaxirasini shakllantirishga masʼul boʻlgan shaxslar kadrlar zaxirasiga nomzodlarni taqdim etish boʻyicha ishlarning toʻgʻri tashkillashtirilishi va uning xolisona shakllantirilishi uchun toʻliq javobgardirlar.

52. Kadrlar zaxirasini shakllantirish va u bilan ishlash ushbu Nizom va Bosh prokurorning buyruqlarida belgilangan tartibda amalga oshiriladi.

53. Xizmat vazifalarini bajarishda Byuro xodimlari xizmat, shu jumladan maxsus avtotransport hamda maxsus vositalar bilan Inspeksiya xodimlari xizmat avtotransporti va maxsus vositalar bilan taʼminlanadilar.

Xizmat, shu jumladan, maxsus avtotransport va maxsus vositalar bilan taʼminlash meʼyorlari Bosh prokuror tomonidan Oʻzbekiston Respublikasi Moliya vazirligi bilan kelishilgan holda belgilanadi.

54. Xodimlarning pul taʼminoti mansab maoshi, darajali unvon uchun har oylik qoʻshimcha toʻlovlar, koʻp yillik xizmat uchun toʻlanadigan ustamalardan hamda qonunchilik va idoraviy hujjatlarda nazarda tutilgan boshqa toʻlovlardan iborat.

Koʻp yillik xizmati uchun ustamani hisoblash huquqini beruvchi maxsus staj Bosh prokurorning buyrugʻi bilan tasdiqlangan va Oʻzbekiston Respublikasi Bandlik va mehnat munosabatlari vazirligi hamda Moliya vazirligi bilan kelishilgan Oʻzbekiston Respublikasi prokuratura organlarining darajali unvonga ega boʻlgan xodimlarga koʻp yillik xizmati uchun ustamalar toʻlash tartibi toʻgʻrisidagi nizomda belgilangan qoidalar boʻyicha hisoblab chiqariladi.

55. Byuro va Inspeksiya xodimlarini moddiy ragʻbatlantirish budjetdan ajratiladigan mablagʻlar, tegishlicha Majburiy ijro byurosini rivojlantirish jamgʻarmasi hamda Agrosanoat majmui va oziq-ovqat xavfsizligi taʼminlanishi ustidan nazorat qilish inspeksiyasini rivojlantirishjamgʻarmasi mablagʻlari, shuningdek, qonun hujjatlari bilan taqiqlanmagan boshqa manbalar hisobidan Bosh prokuror tomonidan belgilangan tartibda amalga oshiriladi.

56. Xodimlarga muddati oʻttiz kalendar kunidan iborat haq toʻlanadigan yillik taʼtil beriladi. Oʻn besh yildan ortiq umumiy ish stajiga ega boʻlgan xodimlarga besh kalendar kun, yigirma besh yildan ortiq ish stajiga ega boʻlganlarga esa oʻn kalendar kun qoʻshimcha taʼtil beriladi.

Xodimlarni navbatdagi yillik taʼtildan chaqirib olishga xizmat boʻyicha oʻta zarur hollarda xodimning roziligi bilan yoʻl qoʻyiladi. Taʼtilning foydalanilmay qolgan qismi keyingi vaqtga oʻtkaziladi.

Xodimlar soni yoki shtati qisqarganligi munosabati bilan (tashkiliy-shtat tadbirlari), kasalligi tufayli yoki pensiyaga chiqishi sababli ishdan boʻshatilgan xodimlarga ularning xohishiga koʻra, haq toʻlanadigan navbatdagi yillik mehnat taʼtili beriladi, undan foydalanilmagan taqdirda qonun hujjatlariga muvofiq pullik kompensatsiya toʻlanadi.

Xizmat oʻtashni tugatgan xodimga foydalanilmagan barcha yillik asosiy va qoʻshimcha taʼtillar uchun pullik kompensatsiya toʻlanadi.

57. Xodimlarga oilaviy sharoit, shuningdek, boshqa uzrli sabablarga koʻra ish haqi saqlanmagan holda, navbatdagi yillik taʼtil hisobiga kirmaydigan, qisqa muddatli taʼtil berilishi mumkin.

58. Yashash sharoitini yaxshilashga muhtoj boʻlgan xodimlarga belgilangan tartibda ijtimoiy-moddiy yordam beriladi.

59. Xodimlarning pensiya taʼminoti qonunda belgilangan tartibda amalga oshiriladi.

60. Xodimlar va ularning oila aʼzolari, shuningdek, pensiyaga chiqishi munosabati bilan xizmatdan boʻshatilgan xodimlar Oʻzbekiston Respublikasi Ichki ishlar vazirligining tibbiy muassasalarida tibbiy xizmatdan bepul foydalanish huquqiga ega.

61. Xodimlar xizmat safarlariga yuborilganida barcha turdagi transport vositalariga yoʻl chiptalari hamda mehmonxonada joylarni band qilish va navbatsiz olish huquqidan foydalanadilar.

62. Xodimlarning hayoti va sogʻligʻining majburiy davlat sugʻurtasi, belgilangan tartibda, Oʻzbekiston Respublikasi Davlat budjeti mablagʻlari hisobiga amalga oshiriladi.

63. Byuro va Inspeksiyada xizmatni oʻtash xodim ishdan boʻshatilganda tugatiladi.

Xizmatni oʻtash:

Bosh prokuror, Byuro direktori, Inspeksiya boshligʻi, Byuro va Inspeksiya hududiy boshqarmalari boshliqlarining tashabbusi bilan;

xodimning tashabbusi bilan;

taraflarning ixtiyoriga bogʻliq boʻlmagan hollarda tugatiladi.

Bosh prokuror, Byuro direktori, Inspeksiya boshligʻi, Byuro va Inspeksiyaning hududiy boshqarmalari boshliqlarining tashabbusi bilan xizmat oʻtashni tugatish uchun quyidagilar asos boʻladi.

xizmatni tashkil etishdagi oʻzgarishlar, xodimlar (shtatlar) sonining qisqarishi yoki xizmat xususiyatining oʻzgarishi;

xodimning malakasi yetarli boʻlmaganligi yoki sogʻligʻi holatiga koʻra bajarayotgan ishiga noloyiqligi sababli;

xodim tomonidan oʻz xizmat vazifalarini muntazam ravishda buzilishi. Xizmat vazifalarini muntazam ravishda buzish deb xodim ilgari sodir etgan xizmat vazifalarining buzganligi uchun intizomiy jazoga tortilgan kundan eʼtiboran bir yil mobaynida intizomiy qoidabuzarlikni takroran sodir etishi hisoblanadi (agar jazo muddatidan ilgari olib tashlangan boʻlmasa);

xodim tomonidan xizmat vazifalarini bir marta qoʻpol ravishda buzish;

ushbu Nizomning 11-bandida koʻrsatilgan faoliyatni xodimga ogohlantirish qilinganidan keyin ham davom ettirishi;

xodimning Byuroda va Inspeksiyada xizmatda boʻlishining eng yuqori yoshiga yetishi;

xodimning Oʻzbekiston Respublikasi fuqaroligini yoʻqotishi;

xodimning shaʼni va obroʻsiga putur yetkazuvchi nomunosib yoxud nojoʻya xatti-harakat sodir etishi.

Xizmatni oʻtashni taraflar ixtiyoriga bogʻliq boʻlmagan holatlar boʻyicha bekor qilinishiga quyidagilar asos boʻladi:

xodimning boshqa ishga, shu jumladan saylab qoʻyiladigan lavozimga oʻtishi;

xodim harbiy xizmatga chaqirilishi;

shu ishni ilgari bajarib kelgan xodimning xizmatga tiklanishi;

xodimning vafot etishi, uni bedarak yoʻqolgan deb topilishi yoki vafot etgan deb eʼlon qilinishi;

qonunda nazarda tutilgan boshqa holatlar.

64. Xodimlarning xizmatda boʻlish yoshining chegarasi erkaklar uchun 60 va ayollar uchun 55 yosh etib belgilanadi.

Xizmatda boʻlish yoshining chegarasiga yetgan, yuqori kasbiy tayyorgarlik va egallab turgan lavozimida katta amaliy ish tajribasiga ega, zimmasiga yuklanadigan xizmat vazifalarini bajarishga sogʻligʻi imkon beradigan xodim oʻz vakolatlari doirasida Bosh prokuror yoki Byuro direktorining yoxud Inspeksiya boshligʻining roziligi bilan Byuroda va Inspeksiyada xizmatni davom ettirishi mumkin.

65. Xodim egallab turgan lavozimidan ozod qilinganda oxirgi xizmat joyi boʻyicha oʻrtacha oylik ish haqi saqlangan holda kadrlar tarmoqlari ixtiyorida qoladi. Uni kelgusida lavozimga tayinlash yoki boʻshatish masalasi, egallab turgan lavozimdan ozod qilish haqidagi buyruq chiqarilgan vaqtdan boshlab bir oydan kech boʻlmagan muddat ichida hal etilishi lozim (xodimning mehnatga vaqtincha qobiliyatsizlik davri bu muddatga kirmaydi).

66. Pensiyaga chiqqan xodimlarga Byuro direktori, Inspeksiya boshligʻi tomonidan belgilanadigan shakl boʻyicha pensiya guvohnomasi beriladi.

67. Oʻzbekiston Respublikasi Oliy Majlisi Senati aʼzoligiga saylangan (tayinlangan) yoki Oʻzbekiston Respublikasi Oliy Majlisi Qonunchilik palatasi deputati etib saylangan, shuningdek Oʻzbekiston Respublikasi Prezidentining lavozimga tayinlash yoki tasdiqlash toʻgʻrisidagi qarori yoki taqdimnomasiga asosan davlat hokimiyati va boshqaruv organlariga oʻtgan yoxud Qoraqalpogʻiston Respublikasi Vazirlar Kengashi raisi, rais oʻrinbosari, viloyat, Toshkent shahar, tuman (shahar) hokimi yoki hokim oʻrinbosari lavozimiga tayinlangan va tasdiqlangan xodim Bosh prokurorning buyrugʻi bilan prokuratura organlarining amaldagi kadrlar zaxirasiga kiritilishi mumkin.

Alohida hollarda, boshqa ishga oʻtgan xodim Bosh prokuraturaning attestatsiya komissiyasi taklifiga asosan Bosh prokuror tomonidan prokuratura organlarining amaldagi kadrlar zaxirasiga kiritilishi mumkin.

Xodimning ushbu bandda koʻrsatilgan faoliyat muddati navbatdagi darajali unvonni berish huquqini beruvchi, koʻp yillik xizmati uchun toʻlanadigan ustamani toʻlash, pullik taʼminot okladini belgilash yoki pensiya tayinlash uchun Byurodagi va Inspeksiyadagi xizmat stajiga qoʻshiladi.

68. Ushbu Nizomning 67-bandida koʻrsatilgan prokuratura organlarining amaldagi kadrlar zaxirasiga kiritilgan va unda boʻlgan xodimlar, ular saylangan yoki tayinlangan organlardagi mehnat sharoitlarini hisobga olgan holda, Byuro va Inspeksiya xodimlari uchun belgilangan barcha imtiyozlar, moddiy va ijtimoiy muhofaza qilish choralaridan foydalanadilar.

Ushbu Nizomning 67-bandida koʻrsatilgan prokuratura organlarining amaldagi kadrlar zaxirasiga kiritilgan va unda boʻlgan xodimlarga ushbu Nizomning 3-bobida belgilangan tartibda darajali unvonlar, shuningdek Bosh prokuror tomonidan belgilangan shaklda prokuratura organlarining amaldagi kadrlar zaxirasi xodimi guvohnomasi beriladi.

Soliq va moliyaviy imtiyozlar, shuningdek, boshqa moddiy afzalliklarning qoʻllanilishi Byuro va Inspeksiya xodimi saylangan yoki tayinlangan organ tomonidan unda amalda boʻlgan lavozim boʻyicha maoshi va boshqa toʻlovlar miqdori saqlangan holda amalga oshiriladi

Shu bilan birga, bunday xodimlarga darajali unvonlari, koʻp yillik xizmat staji hamda Byuro va Inspeksiya xodimlari uchun belgilangan mehnatning alohida sharoitlari uchun hisoblanadigan oʻrtacha oylik ustamalar toʻlanadi.

69. Amaldagi kadrlar zaxirasiga oʻtkazilgan xizmat oʻtashni tugatgan xodimlar, shuningdek, ularning oila aʼzolari bevosita Byuroda xizmat oʻtashni tugatgan shaxslar va ularning oila aʼzolari kabi huquqlar, imtiyozlar va afzalliklardan foydalanadilar.

69¹. Ushbu Nizomning 67 — 69-bandlarining amal qilishi xodimlarga ular prokuratura organlarining amaldagi kadrlar zaxirasiga kiritilgan paytdan boshlab tatbiq etiladi.

70. Amaldagi kadrlar zaxirasiga kiritilgan va unda boʻlgan xodimlarga ularning boshqa davlat organlaridagi vakolat muddatlari tugaganidan soʻng, muqaddam Byuroda va Inspeksiyada egallagan yoki unga teng lavozim berilishi kafolatlari taʼminlanadi, xodimning egallab turgan lavozimiga noloyiqligi yoki sogʻligʻi holatiga yoxud mehnat (xizmat) majburiyatlarini bajarmaganligi uchun mehnat faoliyati tugatilgan hollar bundan mustasno

71. Ishdan noqonuniy boʻshatilgan, boshqa lavozimga oʻtkazilgan, darajali unvondan mahrum etilgan xodimlar muqaddam egallagan lavozimiga va darajali unvonida qayta tiklanadi. Muqaddam egallagan lavozimiga tayinlashning imkoni boʻlmaganida xodimlar boshqa teng lavozimga tayinlanadi.

Ishga tiklangan xodimlarning majburiy progul vaqti ularga koʻp yillik xizmati uchun toʻlanadigan ustamani hisoblash hamda navbatdagi darajali unvonni berish uchun ish stajlarida hisobga olinadi.

72. Byuro, Inspeksiya xodimlarining mehnat nizolari Bosh prokuror va Byuro direktori, Inspeksiya boshligʻi tomonidan koʻrib chiqiladi.