O‘zbekiston Respublikasi Prezidentining “Qurilish va uy-joy kommunal xo‘jaligi sohasida davlat nazoratini samarali tashkil qilish chora-tadbirlari to‘g‘risida” 2025-yil 14-apreldagi PF-66-son Farmoni ijrosini ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi to‘g‘risidagi nizom 1-ilovaga muvofiq;

O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasining hududiy nazorat qilish inspeksiyalari to‘g‘risidagi namunaviy nizom 2-ilovaga muvofiq;

O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi xodimlarining idoraviy formali kiyim-boshlari va farqlash belgilari namunalari hamda tavsifi 3-ilovaga muvofiq tasdiqlansin.

2. O‘zbekiston Respublikasi Hukumatining 4-ilovaga muvofiq ayrim qarorlariga o‘zgartirish va qo‘shimchalar kiritilsin.

3. Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Ushbu qarorning bajarilishini nazorat qilish O‘zbekiston Respublikasi Bosh vazirining o‘rinbosari A.J. Ramatov hamda Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi boshlig‘i S.Q. Eshquvvatov zimmasiga yuklansin.

1. Ushbu Nizom O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasining (keyingi o‘rinlarda — Inspeksiya) maqomi, asosiy vazifalari, funksiyalari, huquqlari va javobgarligi, faoliyatini tashkil etish, rahbarlarining funksional vazifalari, huquqlari va javobgarligini, shuningdek, xodimlarini moddiy rag‘batlantirish tartibini belgilaydi.

Inspeksiya o‘z vakolatlari doirasida qurilish-montaj ishlarining sifati va tasdiqlangan loyiha hujjatlariga muvofiqligi (avtomobil yo‘llari va yo‘l sun’iy inshootlari bundan mustasno), shuningdek, ko‘p kvartirali uy-joy fondini boshqarish (xo‘jalik yurituvchi subyektlarning moliyalashtirish manbalaridan qat’i nazar, moliya-xo‘jalik faoliyatiga aralashmagan holda), issiqlik ta’minotidan foydalanish, ichimlik suvi ta’minoti va oqova suvlarni chiqarib yuborish xizmatini ko‘rsatish hamda undan foydalanish yuzasidan davlat nazorati va tekshiruvini amalga oshiruvchi mustaqil respublika ijro etuvchi hokimiyat organi hisoblanadi.

2. Inspeksiya bevosita O‘zbekiston Respublikasi Vazirlar Mahkamasiga (keyingi o‘rinlarda — Vazirlar Mahkamasi) bo‘ysunadi va o‘z faoliyati to‘g‘risida hisobdor bo‘ladi.

3. Inspeksiya o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonunchilik hujjatlariga amal qiladi.

4. Inspeksiya o‘z faoliyatini respublika va mahalliy ijro etuvchi hokimiyat organlari, huquqni muhofaza qiluvchi organlar, xo‘jalik birlashmalari hamda boshqa tashkilotlar bilan o‘zaro hamkorlikda amalga oshiradi.

5. Inspeksiyaning o‘z vakolatlari doirasida qabul qilgan qarorlari respublika va mahalliy ijro etuvchi hokimiyat organlari, boshqa tashkilotlar, mansabdor shaxslar va fuqarolar tomonidan ijro etilishi majburiy hisoblanadi.

6. Inspeksiya O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga hamda blankalarga, mustaqil balansga, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida shaxsiy g‘azna hisobvaraqlariga, bank hisobvaraqlariga, shu jumladan, xorijiy valyutadagi shaxsiy g‘azna hisobvaraqlariga ega bo‘ladi.

7. Inspeksiyaning rasmiy nomi:

a) davlat tilida:

to‘liq nomi — O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi;

qisqartirilgan nomi — Qurilish va kommunal xo‘jaligi nazorati inspeksiyasi;

b) rus tilida:

to‘liq nomi — Inspeksiya po kontrolyu v sfere stroitelstva i jilishno-kommunalnogo xozyaystva pri Kabinete Ministrov Respubliki Uzbekistan;

qisqartirilgan nomi — Uzstroykomxoznadzor;

8. Inspeksiyaning joylashgan manzili (pochta manzili): Toshkent shahri Shayxontohur tumani Abay ko‘chasi 6-uy.

9. Inspeksiya hududiy nazorat qilish inspeksiyalari (keyingi o‘rinlarda — hududiy inspeksiyalar) faoliyatini tashkil etadi, nazorat qiladi va ularga umumiy rahbarlik qiladi.

10. Quyidagilar Inspeksiyaning asosiy vazifalari hisoblanadi:

tasdiqlangan loyiha hujjatlari bo‘yicha qurilish-montaj ishlarining amalga oshirilishida va qurilish-montaj ishlari tugallangan obyektlarning foydalanishga qabul qilinishida (avtomobil yo‘llari va yo‘l sun’iy inshootlari bundan mustasno) shaharsozlik to‘g‘risidagi qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlar talablariga rioya etilishi yuzasidan davlat nazoratini amalga oshirish;

obyektlarda bino va inshootlarning zilzilaga bardoshliligiga ta’sir qiluvchi, shuningdek, inson salomatligi hamda hayotiga tahdid soluvchi sifatsiz qurilish materiallari, konstruksiyalari va buyumlari qo‘llanishining oldini olish;

buyurtmachining texnik nazorati va loyiha tashkilotlarining mualliflik nazoratini, pudrat tashkilotining ichki nazorat tizimining ishlashi ustidan davlat nazoratini amalga oshirish va monitoring qilish;

yangi qurilayotgan bino va inshootlarning seysmik jihatdan zaifligini baholash, mavjud binolar va inshootlarning instrumental-texnik tekshiruvdan shartnoma asosida o‘tkazilishini ta’minlash hamda hududiy inspeksiyalarning sinov laboratoriyalari faoliyatini muvofiqlashtirish;

hududiy inspeksiyalar tomonidan qurilish-montaj ishlarini boshlash, qurilish ishlari tugallangan obyektdan foydalanish uchun ruxsatnoma berish bo‘yicha hamda qurilish obyektlarini onlayn kuzatish markazlari orqali kelib tushgan ma’lumotlarni tahlil qilish;

ko‘p kvartirali uylarni boshqarish, ularga tutash yer uchastkalarini saqlash va ulardan foydalanishda texnik foydalanish qoidalari va normalariga rioya etilishini nazorat qilish hamda mulkdorlar tomonidan joylarning o‘zboshimchalik bilan qayta qurilishiga va qayta rejalashtirilishiga yo‘l qo‘ymaslik. Bunda ko‘p kvartirali uylarga tutash yer uchastkalarida o‘zboshimchalik bilan imoratlar (inshootlar) qurish ishlarini amalga oshirgan huquqbuzarlarga tegishli choralar ko‘rish faqatgina “E-YER NAZORAT” tizimi orqali amalga oshiriladi;

ko‘p kvartirali uylardagi umumiy mol-mulk va unga tutash yer uchastkalarini mavsumiy foydalanishga tayyorlash bo‘yicha bajarilgan ta’mirlash-tiklash ishlarining manzilli dasturlariga muvofiqligi ustidan amalga oshiriladigan nazorat ishlarini muvofiqlashtirish;

ko‘p kvartirali uylarni boshqarish faoliyatini amalga oshirish qoidalariga rioya etilishida davlat nazoratini muvofiqlashtirish;

ko‘p kvartirali uylarni boshqarish organlari va joylar mulkdorlari tomonidan issiqlik ta’minotidan foydalanishda normativ-huquqiy hujjatlar talablariga rioya etilishi ustidan davlat nazoratini amalga oshirish;

ko‘p kvartirali uylarning seysmik mustahkamligi va zilzilaga bardoshliligi monitoringini muvofiqlashtirish;

ichimlik suvini samarali ishlab chiqarish, yetkazib berish, realizatsiya qilish, ichimlik suvidan oqilona foydalanish, shuningdek, oqova suvlarni chiqarib yuborish va tozalash bo‘yicha xizmat ko‘rsatish sohasida texnik jihatdan tartibga solish sohasidagi normativ hujjatlar hamda boshqa qonunchilik hujjatlari talablariga rioya etilishini nazorat qilish;

ichimlik suvini ishlab chiqarish uchun mo‘ljallangan yer osti suvlari quduqlarining texnik holati va ulardan foydalanish shartlariga hamda qazishning (burg‘ilashning) belgilangan qoidalariga rioya etilishini nazorat qilish;

oqova suvlarni chiqarib yuborish tarmoqlaridagi va tozalash inshootlaridagi oqova suvlar tarkibida ifloslantiruvchi moddalarning ruxsat etilgan me’yorlar darajasida chiqarib yuborilishi hamda tozalanishi ustidan davlat nazoratini amalga oshirish;

ichimlik suvi ta’minoti va oqova suvlarni chiqarib yuborish tizimi obyektlarining texnologik auditdan o‘tkazilishi yuzasidan nazoratni muvofiqlashtirish;

iste’molchilarning ichimlik suvi ta’minoti va oqova suvlarni chiqarib yuborish bo‘yicha xizmatlar bilan qamrab olinishi ustidan davlat nazoratini amalga oshirish.

11. Inspeksiya o‘ziga yuklangan vazifalarni bajarish uchun quyidagi funksiyalarni amalga oshiradi:

tasdiqlangan loyiha hujjatlari bo‘yicha shaharsozlik subyektlari (buyurtmachi, loyiha va pudrat tashkilotlari) tomonidan qurilish jarayonini qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlarga rioya etilishida hududiy inspeksiyalar tomonidan amalga oshiriladigan nazorat tadbirlarini muvofiqlashtiradi;

hududiy inspeksiyalarda ro‘yxatdan o‘tgan qurilish-montaj ishlarining bajarilishida qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlar talablariga rioya etilishi bo‘yicha ta’sirchan nazoratni o‘rnatadi;

jismoniy va yuridik shaxslar tomonidan qurilishda qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlarga rioya etishlari yuzasidan nazorat o‘rnatilishida tahliliy ma’lumotlarni yuritadi;

hududiy inspeksiyalarda ro‘yxatdan o‘tgan qurilish obyektlarida qurilish materiallari, buyumlari, konstruksiyalari va bajarilayotgan qurilish-montaj ishlari sifatini tekshirish uchun shaharsozlik faoliyati subyektlaridagi loyiha, texnologik va ijro hujjatlari, shuningdek, boshqa zarur ma’lumotlarni belgilangan tartibda o‘rganadi;

qurilish obyektlaridagi avariyalar holatlarini tekshirish bo‘yicha idoralararo komissiyalar ishida ishtirok etadi;

qurilish obyektlarida buyurtmachining texnik, loyiha tashkilotlarida mualliflik va pudrat tashkilotida ichki nazorat amalga oshirilishi bo‘yicha hududiy inspeksiyalar faoliyatini nazorat qiladi;

obyektlarni qurish va rekonstruksiya qilishda tegishli mutaxassislar biriktirilgani yoki ushbu faoliyat turini amalga oshirish huquqiga ega bo‘lgan yuridik shaxsning shartnoma asosida jalb qilingani hamda ularning qonunchilik hujjatlarida belgilangan tartibda sertifikatga egaligini o‘rganadi;

seysmik faol zonalarda qurilishi rejalashtirilayotgan barcha turdagi binolar va inshootlarning, shuningdek, ko‘p kvartirali turar joylarning seysmik jihatdan zaifligini baholash uchun zarur bo‘lgan axborotni o‘z ichiga olgan elektron texnik pasportlarning buyurtmachilar tomonidan rasmiylashtirilishini muvofiqlashtiradi;

hududiy inspeksiyalarda ro‘yxatdan o‘tib qurilayotgan binolar va inshootlarning zilzilaga bardoshliligini ta’minlash, zarur hollarda instrumental-texnik tekshiruvdan o‘tkazish hamda zilzilaga bardoshliligini ta’minlash bo‘yicha bajarilgan ishlarni o‘rganadi;

hududiy inspeksiyalarning sinov-laboratoriyalarining ish yuritish faoliyatini hamda xizmat ko‘rsatish sohasida amalga oshirilgan ishlarni muvofiqlashtiradi;

qurilish-montaj ishlarini boshlash, qurilish-montaj ishlari tugallangan obyektdan foydalanish uchun ruxsatnoma berish tartibiga rioya etilishini o‘rganadi;

qurilish obyektlarini onlayn kuzatish markazlariga mobil videokameralar (bodikamera), maxsus planshetlar va qurilish obyektlaridagi videokameralardan kelib tushgan ma’lumotlarning tezkor tahlil qilingani hamda natijasiga ko‘ra tegishli choralar ko‘rilganligini o‘rganadi;

mavjud ko‘p kvartirali uylardagi tayanch va (yoki) to‘siq konstruksiyalarni texnik jihatdan tartibga solish sohasidagi normativ hujjatlarni buzgan holda o‘zgartirish va (yoki) rekonstruksiya qilish, buzish hamda binoning zilzilaga bardoshliligiga salbiy ta’sir qiladigan ishlarni bajarishga yo‘l qo‘yilmasligi ustidan amalga oshirilgan nazorat tadbirlarini muvofiqlashtiradi;

ko‘p kvartirali uylar va ularga tutash yer uchastkalaridan foydalanishda texnik foydalanish qoidalari va normalari talablariga amal qilinishini yuzasidan tahliliy ma’lumotlarni yuritadi;

ko‘p kvartirali uylarda va unga tutash yer uchastkalarida o‘zboshimchalik bilan imoratlar (inshootlar) qurishga yo‘l qo‘yilmasligi ustidan davlat nazoratini amalga oshiradi;

ko‘p kvartirali uy-joy fondini boshqarish, jumladan, muhandislik tarmoqlari, ko‘p kvartirali uylar uskunalaridan foydalanish, avariya holatlarining bartaraf etilishini tizimli tashkil etish yuzasidan monitoring yuritadi;

ko‘p kvartirali uylardagi umumiy mulk va unga tutash yer uchastkalarida davlat dasturlari asosida amalga oshirilgan ta’mirlash-tiklash ishlarining bajarilishini monitoring qiladi;

umumiy foydalaniladigan joylar, fasadlar, uylarning ichki muhandislik kommunikatsiyalarini ta’mirlash-tiklash ishlarini tizimli o‘tkazish qoidalariga rioya etilishini o‘rganadi;

joylar mulkdorlariga hisobotlarning belgilangan shartlar, tartib va muddatlarda berib borilishini monitoring qiladi va ular yuzasidan o‘tkaziladigan nazorat tadbirlarini muvofiqlashtiradi;

umumiy mol-mulkni saqlash va ta’mirlash uchun xizmatlar hamda ishlar shakllantirilganligi va belgilangan tartibda tasdiqlanganligi yuzasidan o‘tkazilgan o‘rganish ishlarini muvofiqlashtiradi;

ko‘p kvartirali uylarni “Billing” tizimi orqali boshqarish, mukammal va joriy ta’mirlash ishlarini amalga oshirish, shuningdek, avariya-dispetcherlik xizmatlarini tashkil etish va ko‘rsatish choralari ta’minlangani yuzasidan o‘tkaziladigan nazorat ishlarini muvofiqlashtiradi;

olti oyda bir marta ko‘p kvartirali uylardagi tayanch va to‘siq konstruksiyalarning butligini xatlovdan o‘tkazish choralari ta’minlangani ustidan davlat nazoratini muvofiqlashtiradi;

ko‘p kvartirali uylarni boshqarish huquqini beruvchi malaka sertifikatining mavjudligini o‘rganish bo‘yicha amalga oshiriladigan nazorat tadbirini muvofiqlashtiradi;

uy ichidagi issiqlik tarmoqlariga o‘zboshimchalik bilan ulanib olish, issiqlik va issiq suv ta’minotining uy ichidagi tizimlariga o‘zgartirishlar kiritish holatini monitoring qiladi va ushbu holat yuzasidan o‘tkaziladigan davlat nazorati tadbirini muvofiqlashtiradi;

uyning isitish asboblarini o‘zboshimchalik bilan demontaj qilish orqali isitish tizimidan uzib qo‘yish holati yuzasidan o‘tkaziladigan davlat nazorati tadbirini muvofiqlashtiradi;

ko‘p kvartirali uylarni boshqarish organlari tomonidan isitish tizimidan issiqlik manbaini chiqarib tashlash holatlarini bartaraf etish yuzasidan amalga oshiriladigan davlat nazorati ishlarini monitoring qiladi va muvofiqlashtiradi;

uy ichidagi issiqlik energiyasidan uning bevosita vazifasidan (isitish, issiq suv ta’minoti) boshqa maqsadda foydalanish holati yuzasidan o‘tkaziladigan nazorat tadbirlarini muvofiqlashtiradi;

uy ichidagi isitish tizimini gidravlik presslashi va keyinchalik uni tarmoqdagi suv bilan to‘ldirgan holda yuvish ishlari ta’minlanganligini aniqlash yuzasidan o‘tkaziladigan nazorat tadbirlarini muvofiqlashtiradi;

isitish tizimidan tarmoq suvining oqishi va chiqib ketishining oldini olishni ta’minlash maqsadida ko‘rilgan choralar yuzasidan o‘tkaziladigan nazorat ishlarini muvofiqlashtiradi;

ko‘p kvartirali uylarning seysmik mustahkamligi va zilzilaga bardoshliligini aniqlash bo‘yicha vizual tartibda o‘tkaziladigan xatlov ishlarini muvofiqlashtiradi;

ko‘p kvartirali uylarning seysmik mustahkamligi va zilzilaga bardoshliligi holati yuzasidan o‘tkazilgan xatlov natijalari to‘g‘risidagi ma’lumotlarni umumlashtiradi;

tahlil natijalariga asosan ekspluatatsiya muddatini o‘tab bo‘lgan seysmik zaif va avariya alomatlari aniqlangan ko‘p kvartirali uylar o‘rnida bosqichma-bosqich yangi uy-joylar qurish bo‘yicha takliflarni ishlab chiqib, mahalliy ijro etuvchi hokimiyat organlariga kiritib boradi;

ichimlik suvi ta’minoti va oqova suvlarni chiqarib yuborish tizimlariga ulanishda texnik shartlar talablariga rioya etilishi, shuningdek, ichimlik suvi va oqova suv tarmoqlariga o‘zboshimchalik bilan ulanishning oldini olish choralarini ko‘radi;

iste’molchilar tomonidan ichimlik suvi ta’minoti va oqova suvlarni chiqarib yuborish xizmatlaridan foydalanishga oid talablarga amal qilinishini monitoring qiladi;

ichimlik suvi ta’minoti va oqova suvlarni chiqarib yuborish tarmoqlaridagi va boshqa inshootlardagi avariyalar bartaraf etilishini, ular yuzaga kelishining oldini olish bo‘yicha ishlab chiqilgan chora-tadbirlar bajarilishini nazorat qiladi;

ichimlik suvining texnologik jihatdan sarflanishi va yo‘qotilishining yo‘l qo‘yiladigan normalariga rioya etilishi ustidan davlat nazorati amalga oshirilishini ta’minlaydi;

ichimlik suvi ta’minoti va oqova suvlarni chiqarib yuborish sohasida xizmat ko‘rsatish qoidalariga amal qilinishini nazorat qiladi;

ichimlik suvi ta’minoti tashkilotlari tomonidan inshootlarda ichimlik suvining texnologik hisobi yuritilishi ta’minlanganligini va hisoblash uskunalari ishlashini nazorat qiladi;

ichimlik suvi ta’minoti tashkilotlari tomonidan ichimlik suvini yo‘qotishlarning belgilangan me’yorlariga rioya etilishi nazorat qilinishini ta’minlaydi;

manfaatdor vazirliklar va idoralar bilan birgalikda tashkiliy-huquqiy shaklidan qat’i nazar, suv ta’minoti tashkilotlari tomonidan aholiga yetkazib berilayotgan ichimlik suvining sifati, standartlar va belgilangan talablarga javob berishi ustidan nazoratni muvofiqlashtiradi;

ichimlik suvi ta’minoti tashkilotlari tomonidan iste’molchilarga yetkazib berilayotgan ichimlik suvining sifati, suvni tozalash, zararsizlantirish uskunalari bilan ta’minlanganligi va belgilangan talablarga muvofiqligini o‘rganadi;

ichimlik suvi ehtiyojlari uchun yer osti suvlaridan foydalanishda texnik jihatdan tartibga solish sohasidagi normativ hujjatlar talablari bajarilishi ustidan ta’sirchan nazorat o‘rnatadi;

ichimlik suvi ehtiyojlari uchun yer osti suv quduqlarini qazishning belgilangan qoidalarini va texnologiyasiga rioya etilishi ustidan davlat nazoratini amalga oshiradi;

oqova suvlarni tozalash inshootlaridagi oqova suvlar tarkibidagi ifloslantiruvchi moddalarni ruxsat etilgan me’yorlar darajasida tozalanishi ustidan davlat nazorati amalga oshirilishini ta’minlaydi;

oqova suvlarni chiqarib yuborish tarmoqlariga me’yordan ortiq ifloslantirilgan oqova suvlarni oqizganlik va oqova suvlarni chiqarib yuborish tarmoqlaridan foydalanish qoidalarining boshqacha tarzda buzilishi holatlariga chora ko‘rilishi yuzasidan davlat nazoratini amalga oshiradi;

ichimlik suvi ta’minoti va oqova suvlarni chiqarib yuborish tizimi tarkibidagi obyektlar va tarmoqlarning samaradorligini oshirish (texnik jarayon va energiyani tejash) bo‘yicha texnologik auditdan o‘tkazilishi yuzasidan nazoratni ta’minlaydi;

investitsiya dasturlari va boshqa dasturlar asosida ichimlik suvi ta’minoti va oqova suv obyektlarida amalga oshirilgan qurilish, rekonstruksiya va modernizatsiya ishlari natijasida iste’molchilarning suv ta’minoti va oqova suvlarni chiqarib yuborish xizmatlari bilan qamrab olinishi hamda tashkiliy-huquqiy shaklidan qat’i nazar, suv ta’minoti tashkilotlari bilan iste’molchilar o‘rtasida shartnomaviy munosabatlar yo‘lga qo‘yilgani ustidan davlat nazoratini amalga oshirishni ta’minlaydi.

12. Inspeksiya qonunchilik hujjatlariga muvofiq boshqa funksiyalarni ham amalga oshirishi mumkin.

13. Inspeksiya o‘ziga yuklangan vazifalar va funksiyalarni bevosita hamda hududiy inspeksiyalar orqali amalga oshiradi.

14. Inspeksiya o‘ziga yuklangan vazifalar va funksiyalarni amalga oshirishda quyidagi huquqlarga ega:

a) obyektlarda o‘tkaziladigan tekshirishlarni tashkil etish sohasida:

tashkiliy-huquqiy shaklidan qat’i nazar, davlat nazoratini amalga oshirish yuzasidan vakolat doirasiga kiruvchi masalalarda belgilangan tartibda tekshiruv o‘tkazish;

tadbirkor hamda hududiy inspeksiyalar o‘rtasida shartnoma (ommaviy oferta) tuzilgan tadbirkorlik subyektlarining qurilish obyektlarida qisqa muddatli davlat qurilish nazorati tadbirlarini shartnoma shartlari doirasida “Yagona davlat nazorati” axborot tizimida ro‘yxatdan o‘tkazmagan holda amalga oshirish;

“xavfni tahlil etish” tizimi doirasida tadbirkorlik subyektlarining qonunchilik hujjatlarini buzish xavfi darajasidan kelib chiqib, tekshiruvni tashabbus qilish;

davlat nazoratini amalga oshirishda jismoniy va yuridik shaxslardan, shuningdek, o‘z vakolatiga kiruvchi masalalarni hal etish uchun zarur bo‘lgan ma’lumotlarni vazirliklar, idoralar, xo‘jalik birlashmalari, mahalliy ijro etuvchi hokimiyat organlari hamda tashkilotlardan belgilangan tartibda olish;

hududiy inspeksiyalar tomonidan o‘tkazilgan nazorat tadbirlari bo‘yicha tahliliy ma’lumotlarni yuritish;

nazorat ishlarini elektron tizim hamda qurilish obyektlarini onlayn kuzatish markazlari orqali tahlil qilish, umumlashtirish va monitoring qilib borish, shuningdek, ularning natijalari bo‘yicha hududiy inspeksiyalarga tegishli ko‘rsatmalar berish;

o‘z funksional vazifalari va funksiyalarini bajarish uchun ko‘p kvartirali uylardagi xonadonlarga mulkdorni oldindan xabardor qilgan holda, uning roziligi asosida ko‘p kvartirali uylarni boshqarish organi bilan birga kirish;

b) o‘tkazilgan tekshirishlarning natijadorligini ta’minlash sohasida:

quyidagi holatlarda jismoniy va yuridik shaxslarga nisbatan bajarilishi majburiy bo‘lgan yozma ko‘rsatmalar kiritish:

bino va inshootlarning zilzilaga bardoshliligiga ta’sir qiluvchi, shuningdek, inson salomatligi va hayotiga tahdid soluvchi konstruktiv buzilishlar aniqlangan holatlarda, qurilish-montaj ishlarini to‘xtatib turish va demontaj (buzdirish) ishlarini amalga oshirishni talab qilish bo‘yicha;

ko‘p kvartirali uylarni boshqarish organlariga va mulkdorlariga ko‘p kvartirali uylarni boshqarish faoliyatini amalga oshirish hamda uylardan texnik foydalanish qoidalari va normalariga, sanitariya normalari, qoidalari va gigiyena normativlarining hamda shaharsozlik normalari va qoidalariga muvofiq ko‘p kvartirali uylarga tutash yer uchastkasini saqlashga doir talablarning buzilish holatlarini o‘n besh kun muddatda bartaraf etish bo‘yicha;

ko‘p kvartirali uylarning konstruktiv qismlarining tayanch qobiliyatini hamda zilzilaga bardoshliligini buzadigan, shuningdek, inson hayoti, sog‘lig‘i yoki mol-mulkiga va atrof-muhitga zarar yetkazilishi hamda tahdid soluvchi o‘zboshimchalik bilan amalga oshirilayotgan o‘zgartirish va rekonstruksiya ishlari aniqlangan hollarda, ularni to‘xtatish va ularning oqibatlarini o‘ttiz kun muddatda ixtiyoriy ravishda bartaraf etish bo‘yicha;

ichimlik suvi ta’minoti va oqova suvlarni chiqarib yuborish sohasida aniqlangan huquqbuzarliklarni bartaraf etish bo‘yicha;

yer osti suvlaridan samarasiz foydalanish holatlari aniqlanganda yer osti suvlarini olishni to‘xtatish yoki bu borada ajratilgan limitni belgilangan tartibda qisqartirish bo‘yicha;

Inspeksiya o‘z vakolatlari doirasida:

mahalliy ijro etuvchi hokimiyat organlariga va maxsus vakolatli davlat organining hududiy bo‘linmalariga shaharsozlik to‘g‘risidagi qonunchilik hujjatlarini buzgan holda qabul qilingan qarorlarni bekor qilish haqida;

shaharsozlik faoliyatini amalga oshirishga doir litsenziyalarning hamda ruxsat beruvchi hujjatlarning amal qilishini to‘xtatib turish, tugatish yoki ularni bekor qilish to‘g‘risidagi masalani hal etish uchun tegishli davlat organlari hamda tashkilotlarga qonunchilik hujjatlarida belgilangan tartibda;

binolar va inshootlarning zilzilaga bardoshliligiga ta’sir qiluvchi, shuningdek, inson hayoti va sog‘lig‘iga tahdid soluvchi sifatsiz qurilish materiallari, konstruksiyalari hamda buyumlari qo‘llanilgani aniqlangan hollarda, qurilish materiallarini, konstruksiyalarini va buyumlarini ishlab chiqarishni, realizatsiya qilish hamda qo‘llashni to‘xtatib turish haqida tegishli davlat organlari va tashkilotlarga;

davlat organlari va tashkilotlari hamda xo‘jalik birlashmalari va boshqa tashkilotlarga ko‘p kvartirali uy-joy fondini boshqarish hamda ichimlik suvi ta’minoti va oqova suvlarni chiqarib yuborish sohasida huquqbuzarliklarni bartaraf etish bo‘yicha taqdimnomalar kiritadi;

ichimlik suvi ta’minoti va oqova suvlarni chiqarib yuborish xizmatlarini ko‘rsatish va ulardan foydalanish bo‘yicha ishlarni ko‘rib chiqish uchun sud majlisida yoki protsessual harakatlarda ekspert, mutaxassis sifatida ishtirok etishi va xulosalar berishi mumkin;

suv ta’minoti tashkilotlarining “Billing” tizimidagi iste’molchilarning manzili va soni, suv hisoblagichlari ko‘rsatkichlari, sarflangan suv miqdori va qarzdorlik, oqova suvlarni chiqarish, yangi qamrab olingan iste’molchilar to‘g‘risida va boshqa ma’lumotlardan foydalanadi;

quyidagi holatlarda sudlarga da’vo arizalari kiritadi:

davlat organlari va tashkilotlari hamda boshqa tashkilotlarga nisbatan ko‘p kvartirali uylarni boshqarish, issiqlik ta’minotidan foydalanish hamda ichimlik suvi ta’minoti va oqova suvlarni chiqarib yuborish sohasida huquqbuzarliklarni bartaraf etish bo‘yicha;

hududiy inspeksiyadan ro‘yxatdan o‘tgan va tasdiqlangan loyiha hujjatlariga rioya qilmagan holda qurilish ishlarini bajarganlik holati aniqlanganda, qurilish-montaj ishlarini to‘xtatib qo‘yish, demontaj yoki buzdirish ishlarini amalga oshirish to‘g‘risida;

o‘tkazilgan tekshiruv natijasida aniqlangan qonunbuzarliklarni bartaraf etishga doir ko‘rsatmalar talablari bajarilmagan holatlarda jismoniy yoxud yuridik shaxs faoliyatini qisman yoki to‘liq to‘xtatish yoxud taqiqlash to‘g‘risida;

inspeksiya manfaatlarini himoya qilish maqsadida;

normativ-huquqiy bazani yanada takomillashtirish bo‘yicha tegishli hujjatlarni ishlab chiqadi yoki boshqa vakolatli organlar bilan ishlab chiqishda ishtirok etadi;

Inspeksiya va hududiy inspeksiyalar faoliyatida foydalanishi uchun uslubiy va metodik qo‘llanmalar, yo‘riqnomalar ishlab chiqadi va tasdiqlaydi;

qurilish sohasida va ko‘p kvartirali uy-joy fondini boshqarish hamda ichimlik suvi ta’minoti va oqova suvlarni chiqarib yuborish sohasida davlat nazoratini amalga oshirish yuzasidan elektron axborot tizimini tashkil etadi;

Inspeksiya va hududiy inspeksiyalarda qurilish obyektlarini onlayn kuzatish markazlari faoliyatini tashkil etadi;

Inspeksiya va hududiy inspeksiyalar xodimlarini tayyorlash, qayta tayyorlash va ularning malakasini uzluksiz oshirishni tashkil etadi;

xorijiy davlatlar mutaxassislarini jalb qilgan holda tajriba almashish hamda Inspeksiya va hududiy inspeksiyalar xodimlarining xorijiy mamlakatlarda malakasini oshirishni tashkil etadi;

xodimlarni qonunchilik hujjatlarida belgilangan tartibda attestatsiyadan o‘tkazishni va ularning natijalariga ko‘ra tegishli maxsus guvohnomalar berishni tashkil etadi;

qurilish, uy-joy fondini boshqarish va ichimlik suvi ta’minoti hamda oqova suvlarni chiqarib yuborish masalalari bo‘yicha o‘quv-seminarlarni tashkil qiladi va o‘tkazadi.

15. Inspeksiya huquqbuzarlik holati bo‘yicha e’tiroz bildirilganda ishni ko‘rib chiqish uchun sudga taqdim etish tartibini saqlab qolgan holda, qonunchilik hujjatlarining buzilishiga oid ma’muriy huquqbuzarliklar to‘g‘risidagi ishlarni ko‘rib chiqadi.

16. Ko‘p kvartirali turar joyni noturar joy toifasiga yoki ko‘p kvartirali noturar joyni turar joy toifasiga o‘tkazishga ruxsatnoma berishda xulosa beradi.

17. Inspeksiya:

unga yuklangan vazifalar va funksiyalarni samarali bajarish, shuningdek, qurilish, ko‘p kvartirali uy-joy fondini boshqarish, issiqlik ta’minotidan foydalanish hamda ichimlik suvi ta’minoti va oqova suvlarni chiqarib yuborish xizmati sohasida davlat nazoratini samarali amalga oshirish;

Vazirlar Mahkamasiga Inspeksiya tomonidan kiritiladigan normativ-huquqiy hujjatlar va boshqa hujjatlar loyihalari, shuningdek, Inspeksiya tomonidan qabul qilinadigan qarorlarning sifati va pirovard natijalari uchun javobgardir.

18. Quyidagilar Inspeksiya boshlig‘ining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Inspeksiya faoliyatiga umumiy rahbarlik qilish, O‘zbekiston Respublikasi Prezidentining tegishli hujjatlari, Vazirlar Mahkamasining qarorlari va boshqa qonunchilik hujjatlari bilan Inspeksiyaga yuklangan vazifa va funksiyalar bajarilishini tashkil etish;

O‘zbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Inspeksiya faoliyatini yanada takomillashtirish bo‘yicha konsepsiyalar, kompleks dasturlar va kompleks chora-tadbirlar ijrosini tanqidiy va chuqur tahlil qilish;

boshliq o‘rinbosarlari va tarkibiy tuzilmalar rahbarlarining vakolatlarini belgilash va vazifalarini taqsimlash;

Inspeksiya faoliyati rejalashtirilishini tashkil etish, Inspeksiyaning davriy ish rejalarini tasdiqlash, ularning bajarilishi yuzasidan nazoratni ta’minlash;

O‘zbekiston Respublikasi Prezidenti Administratsiyasining tegishli tarkibiy bo‘linmalari va Vazirlar Mahkamasi, shuningdek, tegishli respublika va mahalliy ijro etuvchi hokimiyat organlari hamda boshqa tashkilotlar bilan Inspeksiya faoliyati sohasiga kiradigan masalalar bo‘yicha o‘zaro hamkorlik qilish, Vazirlar Mahkamasi va uning Rayosati majlislarida masalalarning ko‘rib chiqilishida ishtirok etish;

O‘zbekiston Respublikasi Prezidenti, Vazirlar Mahkamasi topshiriqlariga va o‘z tashabbusiga ko‘ra normativ-huquqiy hujjatlar loyihalarining sifatli ishlab chiqilishini, ular O‘zbekiston Respublikasining “Normativ-huquqiy hujjatlar to‘g‘risida”gi, “Qonunlar loyihalarini tayyorlash va O‘zbekiston Respublikasi Oliy Majlisining Qonunchilik palatasiga kiritish tartibi to‘g‘risida”gi qonunlari, O‘zbekiston Respublikasi Prezidenti Administratsiyasi Reglamenti va O‘zbekiston Respublikasi Vazirlar Mahkamasi Reglamenti talablariga qat’iy rioya qilgan holda, Vazirlar Mahkamasiga o‘z vaqtida kiritilishini ta’minlash, ularni Vazirlar Mahkamasining rahbariyati huzurida himoya qilish hamda Vazirlar Mahkamasida ishlab chiqilishida va O‘zbekiston Respublikasi Prezidenti Administratsiyasida ko‘rib chiqilishida ishtirok etish;

O‘zbekiston Respublikasi Prezidenti farmonlari, qarorlari, farmoyishlari, Vazirlar Mahkamasi qarorlari, farmoyishlari va topshiriqlari bajarilishini ta’minlash, Inspeksiya faoliyatida ijro intizomini mustahkamlash bo‘yicha kompleks chora-tadbirlarni amalga oshirish, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son hamda “Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida” 2025-yil 25-iyuldagi PF-117-son farmonlariga hamda “Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq tarkibiy bo‘linma rahbarlarining shaxsiy mas’uliyatini oshirish choralarini ko‘rish;

Inspeksiya rahbarlari va xodimlari xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lish samaradorligi va xorijiy delegatsiyalarning O‘zbekiston Respublikasiga tashriflarini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

Inspeksiya vakolatiga kiradigan masalalar bo‘yicha ko‘rsatmalar chiqarish, buyruqlar va normativ-huquqiy hujjatlar qabul qilish, zarur bo‘lganda boshqa vazirliklar va idoralar bilan birgalikda tegishli qarorlar qabul qilish;

Inspeksiya xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Inspeksiya xodimlari odob-axloq qoidalariga rioya etilishini ta’minlash;

jismoniy va yuridik shaxslarning murojaatlarini ko‘rib chiqish bo‘yicha ishlarni O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsiy qabullar o‘tkazish, shu jumladan, jismoniy va yuridik shaxslarning vakillarini joylarga chiqib qabul qilishni tashkil etish;

davlat organlari va boshqa tashkilotlarda, O‘zbekiston Respublikasi sudlarida, shuningdek, davlat organlari, xalqaro tashkilotlar va xorijiy mamlakat vakillari ishtirokida o‘tkaziladigan rasmiy tadbirlarda Inspeksiya nomidan ishtirok etish;

O‘zbekiston Respublikasining “Korrupsiyaga qarshi kurashish to‘g‘risida”gi Qonuni va korrupsiyaga qarshi kurashishga doir boshqa qonunchilik hujjatlariga rioya etish, faoliyatda korrupsiyaviy xavf-xatarlarni va manfaatlar to‘qnashuvini o‘z vaqtida aniqlash hamda ularga chek qo‘yish, korrupsiyaga oid huquqbuzarliklarning oldini olish choralarini ko‘rish hamda tizimda korrupsiyaning oldini olish va unga qarshi murosasiz kurashishga doir ishlarga rahbarlik qilish va muvofiqlashtirish;

O‘zbekiston Respublikasining “Manfaatlar to‘qnashuvi to‘g‘risida”gi Qonuni va manfaatlar to‘qnashuvi bilan bog‘liq munosabatlarni tartibga solishga doir ishlarga rahbarlik qilish va muvofiqlashtirish;

O‘zbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Inspeksiya rahbarlari va xodimlari ularning faoliyatida faol ishtirok etishini, jismoniy va yuridik shaxslarning O‘zbekiston Respublikasi Prezidentining Virtual qabulxonasidan kelib tushgan murojaatlarini o‘z vaqtida va to‘laqonli ko‘rib chiqilishini ta’minlash;

Inspeksiya Hay’at majlislarida raislik qilish;

qonunchilik hujjatlari talablariga muvofiq topshiriqlar o‘z vaqtida va sifatli bajarilishi uchun markaziy apparatning mansabdor shaxslari va hududiy inspeksiyalar rahbarlarining shaxsiy javobgarligini oshirish chora-tadbirlarini belgilash;

hududiy inspeksiyalar faoliyatining samaradorligi va natijadorligini tanqidiy tahlilini muntazam ravishda o‘tkazish, ularning hisobotlarini Inspeksiya majlislarida eshitish, yakunlari bo‘yicha, zarur hollarda, ularni belgilangan tartibda intizomiy javobgarlikka tortish choralarini ko‘rish;

Inspeksiyaga yuklangan vazifalarni bajarish uchun shartnoma asosida jalb etiladigan malakali xorijiy mutaxassislar xizmatiga haq to‘lash shartlarini xalqaro amaliyotdan kelib chiqqan holda belgilash hamda ularga Inspeksiyaning budjetdan tashqari mablag‘lari hisobidan ish haqi va boshqa to‘lovlarni amalga oshirish;

Inspeksiya xodimlarini ularning ko‘p yillik va samarali faoliyati, alohida xizmatlari uchun O‘zbekiston Respublikasi davlat mukofotlari bilan taqdirlash uchun belgilangan tartibda takliflar kiritishni ta’minlash va tavsiyalar berish;

Inspeksiya mulkini qonunchilik hujjatlarida belgilangan tartibda tasarruf etish;

Inspeksiya vakolatiga kiradigan masalalar yuzasidan O‘zbekiston Respublikasining xalqaro shartnomalarini belgilangan tartibda imzolash;

Inspeksiyaning ichki tashkiliy masalalari yuzasidan qarorlar qabul qilish;

Inspeksiya xodimlarini lavozimga tayinlash va lavozimdan ozod etish, mehnat shartnomalari (buyruqlari)ni imzolash;

Inspeksiya xodimlariga vazifalarni yuklash;

Inspeksiya xodimlarining malakasini oshirish va ularni xorijiy davlatlarga stajirovka va tajriba almashish uchun yuborishni tashkil etish;

Inspeksiya xodimlarini rag‘batlantirish va intizomiy javobgarlikka tortish masalalarini hal qilish, boshliq o‘rinbosarlarini rag‘batlantirish va intizomiy javobgarlikka tortish masalalarini, shu jumladan, kelgusida uning egallab turgan lavozimida qolishining maqsadga muvofiqligi masalalarini ko‘rib chiqish to‘g‘risida Vazirlar Mahkamasiga takliflar kiritish, ularning shaxsiy javobgarligini oshirish bo‘yicha tizimli choralar ko‘rish;

Inspeksiyaning tashqi va ichki tashkiliy faoliyati ustidan doimiy va qat’iy nazorat o‘rnatish;

Inspeksiyaga kiritilgan takliflar va taqdim etilgan normativ-huquqiy hujjatlar loyihalarining to‘liq va har tomonlama ko‘rib chiqilishini, O‘zbekiston Respublikasi Prezidenti Administratsiyasi Reglamenti va O‘zbekiston Respublikasi Vazirlar Mahkamasining Reglamentida belgilangan muddatlarda kelishilishini (viza qo‘yilishi) ta’minlash;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish;

boshqaruv xodimlarining belgilangan cheklangan soni va mehnatga haq to‘lash fondi doirasida Inspeksiya shtat birliklari hamda xarajatlar smetasini tasdiqlash, zaruratga ko‘ra ularga shtat birliklarining umumiy cheklangan sonidan chiqmagan holda o‘zgartirish kiritish;

Inspeksiyaning tarkibiy bo‘linmalari nizomlari, lavozim yo‘riqnomalarini va hududiy inspeksiyalar to‘g‘risidagi nizomlarni hamda Inspeksiyaning boshqa ichki hujjatlarini belgilangan tartibda tasdiqlash;

ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

19. Quyidagilar Inspeksiya boshlig‘i o‘rinbosarlarining o‘zlari mutasaddilik qiladigan sohalar bo‘yicha asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Inspeksiya boshlig‘i muayyan sabablarga ko‘ra (xizmat safari, mehnat ta’tili, betobligi davrida) yo‘qligida uning vazifalarini bajarish;

Inspeksiyaning o‘zi nazorat qiladigan tarkibiy tuzilmalari faoliyatini muvofiqlashtirish, nazorat va bevosita rahbarlik qilish, xodimlar o‘rtasida vazifalarni taqsimlash;

Inspeksiya faoliyatining o‘zi mutasaddilik qiladigan yo‘nalishlarini yanada takomillashtirish yuzasidan O‘zbekiston Respublikasi Prezidentining hujjatlari va Vazirlar Mahkamasi qarorlari bilan tasdiqlangan kompleks dastur va kompleks chora-tadbirlar ijrosini tanqidiy va chuqur tahlil qilish;

mutasaddiligidagi tarkibiy tuzilmalar bo‘linma rahbarlarining hisobotlarini muntazam eshitib borish va belgilangan ko‘rsatkichlarga erishish uchun ularning shaxsiy javobgarligini oshirish;

Inspeksiya boshlig‘ining qonunchilik doirasidagi buyruq hamda topshiriqlari ijrosini o‘z vaqtida va sifatli ta’minlash;

Inspeksiyaga kiritilgan takliflar va taqdim etilgan normativ-huquqiy hujjatlar loyihalarini to‘liq va har tomonlama ko‘rib chiqish;

kadrlarni belgilangan tartibda tanlash va joy-joyiga qo‘yish bo‘yicha Inspeksiya boshlig‘iga takliflar taqdim etish, ularning professionalligi, o‘z ishini bilishi, yuksak darajadagi ishchanlik va ma’naviy-axloqiy fazilatlarga ega bo‘lishini ta’minlash, ularning kasbiy malakasini oshirish, mutasaddilik bo‘yicha tarkibiy tuzilmalarda kadrlar zaxirasini shakllantirish choralarini ko‘rish;

O‘zbekiston Respublikasi Prezidentining farmonlari, qarorlari, farmoyishlari, Vazirlar Mahkamasi qarorlari, farmoyishlari va topshiriqlari bajarilishini ta’minlash, Inspeksiya faoliyatida ijro intizomini mustahkamlash bo‘yicha kompleks chora-tadbirlarni amalga oshirish, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son hamda “Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida” 2025-yil 25-iyuldagi PF-117-son farmonlariga hamda “Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq tarkibiy bo‘linma rahbarlarining shaxsiy mas’uliyatini oshirish choralarini ko‘rish;

Inspeksiya rahbarlari va xodimlari xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son va “Xorijiy xizmat safarlarida bo‘lish samaradorligi va xorijiy delegatsiyalarning O‘zbekiston Respublikasiga tashriflarini tashkil etish uchun mansabdor shaxslarning shaxsiy mas’uliyatini yanada oshirish chora-tadbirlari to‘g‘risida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

Inspeksiya xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Inspeksiya xodimlarining odob-axloq qoidalari talablariga rioya etilishini ta’minlash;

jismoniy va yuridik shaxslarning murojaatlarini ko‘rib chiqish bo‘yicha ishlarni O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsiy qabullar o‘tkazish, shu jumladan, jismoniy va yuridik shaxslarning vakillarini joylarga chiqib qabul qilishni tashkil etish;

O‘zbekiston Respublikasining “Korrupsiyaga qarshi kurashish to‘g‘risida”gi Qonuni va korrupsiyaga qarshi kurashishga doir boshqa qonunchilik hujjatlariga hamda O‘zbekiston Respublikasining “Manfaatlar to‘qnashuvi to‘g‘risida”gi Qonuniga rioya qilish va manfaatlar to‘qnashuvi bilan bog‘liq munosabatlarni tartibga solishga doir ishlarni muvofiqlashtirish;

tarkibiy bo‘linmalar rahbarlari faoliyati samaradorligi va natijadorligini muntazam ravishda tanqidiy tahlil qilish, ularni rag‘batlantirish va intizomiy javobgarlikka tortish bo‘yicha Inspeksiya boshlig‘iga takliflar kiritish;

Inspeksiya faoliyatini takomillashtirish bo‘yicha amaliy choralar ko‘rish, ushbu sohada qonunchilikni takomillashtirishga doir takliflarni ishlab chiqib, ko‘rib chiqish uchun Inspeksiya boshlig‘iga kiritish;

xorijiy davlatlar, xalqaro va xorijiy tashkilotlar bilan sohani rivojlantirish va tartibga solish masalalari bo‘yicha hamkorlik qilish;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish;

ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

20. Inspeksiya boshlig‘i:

Inspeksiyaga yuklangan vazifa va funksiyalarning bajarilishi uchun;

Inspeksiyaning ushbu Nizomda nazarda tutilgan javobgarlik sohalari bo‘yicha hamda mazkur Nizomning 18-bandida ko‘rsatilgan o‘z funksional majburiyatlari sifatli bajarilishi uchun shaxsan javob beradi.

21. Inspeksiya boshlig‘i o‘rinbosarlari:

mutasaddilik qilinadigan yo‘nalish va tarkibiy bo‘linmalarda Inspeksiyaga yuklangan vazifalar va funksiyalarning bajarilishi uchun;

ushbu Nizomning 19-bandida ko‘rsatilgan o‘z funksional vazifalarining sifatli bajarilishi uchun shaxsan javob beradilar.

22. Inspeksiyaga O‘zbekiston Respublikasi Prezidenti tomonidan lavozimga tayinlanadigan va lavozimidan ozod etiladigan boshliq rahbarlik qiladi.

23. Inspeksiya boshlig‘ining o‘rinbosarlari O‘zbekiston Respublikasi Prezidenti bilan kelishgan holda, Vazirlar Mahkamasining qarori bilan lavozimga tayinlanadi va lavozimdan ozod etiladi.

24. Inspeksiya boshlig‘i:

Inspeksiya faoliyatiga umumiy rahbarlik qiladi;

o‘rinbosarlar o‘rtasida aniq vazifalar va funksiyalarni taqsimlaydi, xodimlar o‘rtasida vakolatlarni belgilaydi va majburiyatlarni taqsimlaydi, hududiy inspeksiyalar mansabdor shaxslarining vakolatlarini belgilaydi;

Inspeksiya markaziy apparati xodimlari, hududiy inspeksiyalarning boshliqlari va ularning o‘rinbosarlarini belgilangan tartibda lavozimga tayinlaydi va lavozimdan ozod etadi;

hududiy inspeksiyalarning komplayens-nazorat bo‘yicha mutaxassislarini lavozimga tayinlaydi va lavozimdan ozod etadi;

malakali xorijiy mutaxassislar va ekspertlarni shartnomaviy-huquqiy asosda Vazirlar Mahkamasi bilan kelishilgan holda jalb qiladi;

hududiy inspeksiyalar faoliyatini muvofiqlashtiradi, ularga moddiy-texnik bazasini tashkil etish va rivojlantirishda ko‘maklashadi;

Inspeksiya va hududiy inspeksiyalar xodimlari uchun majburiy bo‘lgan buyruqlar chiqaradi va ko‘rsatmalar beradi hamda ularning bajarilishi nazoratini tashkil etadi;

laboratoriya va binolarni texnik ko‘rikdan o‘tkazish xizmatlari qiymatini aniqlash metodikasini tasdiqlaydi;

hududiy inspeksiyalardan ro‘yxatdan o‘tgan obyektlar sonidan, hajmidan va masofasidan kelib chiqqan holda, hududiy inspeksiyalar tuzilmasi va shtat birliklari normativlarini tasdiqlaydi;

hududiy inspeksiyalarning xarajatlar smetasini kelishadi;

hududiy inspeksiyalarning ko‘rsatadigan xizmatlaridan oladigan daromadlari hisobidan Inspeksiyaning budjetdan tashqari hisobvarag‘iga yo‘naltiriladigan mablag‘lar miqdorini belgilaydi;

zarur hollarda Vazirlar Mahkamasi bilan kelishilgan holda, Inspeksiya tuzilmasiga boshqaruv xodimlarining belgilangan soni doirasida o‘zgartirishlar kiritadi, shuningdek, hududiy inspeksiyalarning shaharsozlik sohasida ko‘rsatadigan xizmatlari va bajaradigan ishlaridan olingan daromadlarini qayta taqsimlaydi.

Inspeksiya boshlig‘i qonunchilik hujjatlariga muvofiq boshqa vakolatlarni ham amalga oshirishi mumkin.

25. Inspeksiya boshlig‘i bo‘lmagan vaqtda, uning vakolatlari Inspeksiya boshlig‘ining birinchi o‘rinbosari tomonidan, u bo‘lmagan vaqtda esa Inspeksiya boshlig‘ining tegishli buyrug‘iga asosan boshqa o‘rinbosar tomonidan amalga oshiriladi.

26. Hay’at Inspeksiyaning kollegial organi hisoblanib, Inspeksiya boshlig‘i (hay’at raisi), uning o‘rinbosarlari (lavozim bo‘yicha), shuningdek, Inspeksiya faoliyatining asosiy yo‘nalishlarini muvofiqlashtiruvchi tarkibiy bo‘linmalar rahbarlaridan iborat tarkibda tashkil etiladi.

Hay’at tarkibining soni va shaxsiy tarkibi belgilangan tartibda Vazirlar Mahkamasi tomonidan tasdiqlanadi.

27. Hay’atga quyidagi vazifalar yuklanadi:

Inspeksiya vazifalarining eng muhim samaradorlik ko‘rsatkichlarini ishlab chiqish va amalga oshirilishini nazorat qilish;

Inspeksiya faoliyati bilan bog‘liq dolzarb masalalarning joylarda muhokama etilishini ta’minlagan holda hay’atning kengaytirilgan majlislari o‘tkazilishini tashkil etish, shuningdek, yuzaga kelgan muammolarni o‘z vakolatlari doirasida bartaraf etish bo‘yicha tegishli qarorlarni ishlab chiqish va qabul qilish;

Inspeksiya tarkibiga kiruvchi lavozimlar nomenklaturasini ko‘rib chiqish va tasdiqlash;

O‘zbekiston Respublikasi Prezidenti va Vazirlar Mahkamasining qaror va topshiriqlarida belgilangan vazifalarning o‘z vaqtida va sifatli amalga oshirilishini ta’minlash maqsadida Inspeksiya rahbarlari va xodimlarining ijro intizomini mustahkamlash va shaxsiy javobgarligini oshirish.

Hay’at, shuningdek, Inspeksiya vakolatiga kiritilgan boshqa masalalarni ham ko‘rib chiqishga haqli.

28. Inspeksiya boshlig‘ining qarori bilan quyidagilar:

hay’at ish rejalari va belgilangan vazifalarni bajarish muddatlari;

takliflar tashabbusi bilan chiqish, loyihalarni boshlash va hisobot berish tartiblari;

hay’atning faoliyatini samarali ta’minlash uchun Inspeksiya mas’ul tarkibiy bo‘linmalarining vazifalari tasdiqlanishi mumkin.

29. Hay’at yig‘ilishiga Inspeksiya vakolatiga tegishli masalalar yuzasidan respublika va mahalliy ijro etuvchi hokimiyat organlari, boshqa tashkilotlar rahbarlari va ekspert mutaxassislar taklif etilishi mumkin.

30. Hay’at majlisi a’zolarining yarmidan ko‘pi ishtirok etgan taqdirda, vakolatli hisoblanadi. Hay’at qarorlari oddiy ko‘pchilik ovozi bilan qabul qilinadi.

31. Inspeksiya boshlig‘i va Hay’at a’zolari o‘rtasida kelishmovchiliklar yuzaga kelgan taqdirda, Inspeksiya boshlig‘i ushbu kelishmovchiliklar xususida Vazirlar Mahkamasiga va O‘zbekiston Respublikasi Prezidenti Administratsiyasiga axborot berib, mustaqil ravishda qaror qabul qiladi. Hay’at a’zolari ham o‘z fikrlarini Vazirlar Mahkamasiga va O‘zbekiston Respublikasi Prezidenti Administratsiyasiga bildirishlari mumkin.

32. Hay’at o‘z faoliyati uchun zarur bo‘lgan hujjatlar, hisobotlar va boshqa ma’lumotlarni so‘rab olishga haqli.

33. Hay’at qarorlari Hay’at raisi tomonidan imzolanadi va Inspeksiya buyrug‘i (qarori) bilan amalga oshiriladi.

34. Inspeksiya faoliyatining samaradorligi muntazam baholanadi.

35. Inspeksiya faoliyati samaradorligi va natijadorligiga berilgan baho Vazirlar Mahkamasi tomonidan tasdiqlanadigan Inspeksiya faoliyati samaradorligi va natijadorligini baholash mezonlari va ish indikatorlariga asoslanadi.

36. Inspeksiya faoliyati samaradorligi va natijadorligini baholash yakunlari bo‘yicha:

Inspeksiya rahbarlari va xodimlarini qo‘shimcha rag‘batlantirish (mukofotlash) yoki intizomiy javobgarlikka tortish;

Inspeksiya faoliyatida aniqlangan kamchiliklarni bartaraf etish va uning faoliyatini yanada takomillashtirish choralari ko‘riladi.

37. Inspeksiya faoliyati samaradorligi va natijadorligini baholash tartibi va uslubi qonunchilik hujjatlari bilan belgilanadi.

38. Inspeksiya faoliyatini moliyalashtirish, xodimlarining mehnatiga haq to‘lash va ularni moddiy rag‘batlantirish quyidagilar hisobidan amalga oshiriladi;

xarajatlar smetasi asosida budjetdan ajratiladigan mablag‘lar;

Inspeksiyaning budjetdan tashqari mablag‘lari;

homiylik mablag‘lari;

qonunchilik hujjatlari bilan taqiqlanmagan boshqa mablag‘lar.

39. Inspeksiya xodimlari mehnatiga haq to‘lashni moliyalashtirishda respublika budjetidan quyidagilar nazarda tutiladi:

a) yagona tarif setkasi bo‘yicha tasdiqlangan razryadlarga muvofiq lavozim maoshi, bunda lavozim maoshini hisoblashda, tasdiqlangan tarif razryadlari tarif koeffitsiyenti 1,8 baravarga oshirilgan miqdorida qo‘llanadi;

b) 40 foiz miqdorida mehnatni rag‘batlantirish (rag‘batlantiruvchi koeffitsiyent) uchun oshirilgan tarif koeffitsiyentni hisobga olgan holda ustama haq;

v) yilda bir oylik mehnatga haq to‘lash fondi miqdorida moddiy yordam;

g) yilda ikki oylik mehnatga haq to‘lash fondi miqdorida mukofot puli;

d) 15 foizlik moddiy rag‘batlantirish fondi;

e) Inspeksiya boshqaruv, texnik va xizmat ko‘rsatuvchi hamda boshqa xodimlariga ko‘p yillik xizmati uchun har oylik qo‘shimcha ustama haqi:

2 yildan 5 yilgacha — 10 foiz miqdorida;

5 yildan 10 yilgacha — 20 foiz miqdorida;

10 yildan 15 yilgacha — 30 foiz miqdorida;

15 yildan 20 yilgacha — 40 foiz miqdorida;

20 yildan 25 yilgacha — 50 foiz miqdorida;

25 yil va undan ortiq — 60 foiz miqdorida.

40. Inspeksiya xodimlarining budjetdan tashqari mablag‘lar hisobidan mehnatiga haq to‘lashda lavozim maoshlariga ustama haqlar, mukofot, moddiy yordam puli hamda boshqa barcha qo‘shimcha to‘lovlar quyidagilardan iborat:

a) quyidagi miqdorlardagi har oylik ustama haqlardan:

inspeksiya xodimlariga mehnat faoliyatini moddiy rag‘batlantirish va ijtimoiy qo‘llab-quvvatlash uchun eng muhim samaradorlik ko‘rsatkichlari (KPI) natijalariga ko‘ra qabul qilinadigan Inspeksiya boshlig‘i buyrug‘iga asosan tayinlanadigan 200 foizgacha har oylik belgilanadigan qo‘shimcha ustama to‘lovi;

lavozim maoshiga (jamoa shartnomasida belgilangan miqdorda) shaxsiy ustama;

b) quyidagilarni o‘z ichiga oladigan rag‘batlantiruvchi, mukofot, kompensatsiya va boshqa to‘lovlardan:

mehnat qonunchiligida belgilangan bayram sanalari munosabati bilan xodim lavozim maoshining ikki baravarigacha miqdorda;

xodimlarni ijtimoiy qo‘llab-quvvatlash va ularning ish samaradorligini oshirish maqsadida har oyda yo‘l transporti xarajatlari uchun bazaviy hisoblash miqdorining ikki baravari (xizmat avtotransporti biriktirilgan xodimlar bundan mustasno) hamda xodimlarning ovqatlanishi xarajatlariga ko‘maklashish maqsadida bazaviy hisoblash miqdorining ikki baravari miqdorda kompensatsiya to‘lovlari;

zarur hollarda bazaviy hisoblash miqdorining o‘n besh baravari miqdorida (xodimning davolanishi, yubiley yoshi munosabati bilan, shuningdek, pensiyaga chiqqanda, to‘y, dafn marosimi va boshqalar uchun) xodimlarga kasaba uyushmasi bilan kelishgan holda moddiy yordam puli;

xodimlarga qishloq xo‘jaligi mahsulotlari sotib olish uchun har yili bir marta bazaviy hisoblash miqdorining o‘n besh baravarigacha miqdorda to‘lov;

v) bazaviy hisoblash miqdorining o‘n besh baravarigacha miqdorda quyidagilarni o‘z ichiga oladigan moddiy yordam va boshqa to‘lovlardan:

xodim vafot etgan hollarda, moddiy yordam (agar xodim vafot etgan yilda bevosita unga moddiy yordam ko‘rsatilmagan bo‘lsa) uning turmush o‘rtog‘iga, turmush o‘rtog‘i yo‘qligida — u bilan birga yashovchi voyaga yetgan farzandlariga yoki qonuniy vakillariga (vasiylar va homiylarga) yoxud voyaga yetmagan bolalarni (bolalikdan nogironligi bo‘lganlar shaxslarni — yoshidan qat’i nazar) farzandlikka olganlarga, shuningdek, agar xodimlar nikohda bo‘lmaganda va farzandlari bo‘lmagan hollarda, xodimning qaramog‘idagi shaxslarga yoki ota-onalariga teng ulushda to‘lab beriladi.

Istisno tariqasida, xodimning asoslantirilgan arizasiga asosan Inspeksiya rahbarining roziligi bilan mehnatga haq to‘lash fondiga ajratilgan mablag‘lar doirasida quyidagi hollarda qo‘shimcha tarzda moddiy yordam ko‘rsatilishi mumkin:

yaqin qarindoshlari vafot etganda — o‘lim to‘g‘risidagi guvohnoma nusxasiga asosan;

alohida ehtiyoj tug‘ilganda (baxtsiz hodisa, avariya, uzoq muddatli kasallik sababli maxsus davolanish yoki oilasi og‘ir moddiy ahvolda bo‘lsa).

41. Davlat budjetidan va budjetdan tashqari mablag‘lar bo‘yicha lavozim maoshiga ustama haqlar, bayram puli, choraklik mukofot puli hamda boshqa qo‘shimcha to‘lovlar oshirilgan tarif va rag‘batlantiruvchi koeffitsiyentlarni hisobga olgan holda to‘lanadi.

42. Inspeksiya xodimlariga qonunchilik hujjatlarida nazarda tutilgan mehnatga haq to‘lash razryadlari qo‘llanadi.

43. Inspeksiya qonunchilik hujjatlarida belgilangan tartibda qayta tashkil etiladi va tugatiladi.

44. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.

1. Ushbu Namunaviy nizom O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasining hududiy nazorat qilish inspeksiyalari (keyingi o‘rinlarda — Hududiy inspeksiya) maqomi, asosiy vazifalari, funksiyalari, huquqlari va javobgarligi, faoliyatini tashkil etish, rahbarlarining funksional vazifalari, huquqlari va javobgarligini, shuningdek, xodimlarini moddiy rag‘batlantirish tartibini belgilaydi.

Hududiy inspeksiya o‘z vakolatlari doirasida qurilish-montaj ishlarining sifati va tasdiqlangan loyiha hujjatlariga muvofiqligi (avtomobil yo‘llari va yo‘l sun’iy inshootlari bundan mustasno), shuningdek, ko‘p kvartirali uy-joy fondini boshqarish (xo‘jalik yurituvchi subyektlarning moliyalashtirish manbalaridan qat’i nazar moliya-xo‘jalik faoliyatiga aralashmagan holda), issiqlik ta’minotidan foydalanish, ichimlik suvi ta’minoti va oqova suvlarni chiqarib yuborish xizmatini ko‘rsatish hamda foydalanish yuzasidan davlat nazorati va tekshiruvini amalga oshiradi.

2. Hududiy inspeksiya O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasi (keyingi o‘rinlarda — Inspeksiya) tarkibiga kiradi va bo‘ysunadi hamda o‘z faoliyati yuzasidan hisobdor bo‘ladi.

3. Hududiy inspeksiya o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, ushbu Nizomga, shuningdek, Inspeksiyaning buyruqlari, qarorlariga hamda boshqa qonunchilik hujjatlariga amal qiladi.

4. Hududiy inspeksiya o‘z faoliyatini respublika va mahalliy ijro etuvchi hokimiyat organlari, huquqni muhofaza qiluvchi organlar, xo‘jalik birlashmalari hamda boshqa tashkilotlar bilan o‘zaro hamkorlikda amalga oshiradi.

5. Hududiy inspeksiya xo‘jalik hisobidagi tashkilot hisoblanadi.

6. Hududiy inspeksiya O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga va blankalarga, mustaqil balansga, banklarda hisobvaraqlariga, shu jumladan, xorijiy valyutadagi shaxsiy hisobvaraqlariga ega bo‘ladi.

7. Hududiy inspeksiyaning rasmiy nomi:

a) davlat tilida:

to‘liq nomi — O‘zbekiston Respublikasi Vazirlar Mahkamasi huzuridagi Qurilish va uy-joy kommunal xo‘jaligi sohasida nazorat qilish inspeksiyasining hududiy nazorat qilish inspeksiyasi;

qisqartirilgan nomi — Hududiy qurilish va uy-joy kommunal xo‘jaligi nazorati inspeksiyasi;

b) rus tilida:

to‘liq nomi — Territorialnaya inspeksiya Inspeksii po kontrolyu v sfere stroitelstva i jilishno-kommunalnogo xozyaystva pri Kabinete Ministrov Respubliki Uzbekistan;

qisqartirilgan nomi — Territorialnaya inspeksiya po kontrolyu v sfere stroitelstva i jilishno-kommunalnogo xozyaystva.

8. Quyidagilar Hududiy inspeksiyaning asosiy vazifalari hisoblanadi:

Hududiy inspeksiyada ro‘yxatdan o‘tgan, tasdiqlangan loyiha hujjatlari bo‘yicha qurilish-montaj ishlarining amalga oshirilishida va qurilish-montaj ishlari tugallangan obyektlarning foydalanishga qabul qilinishida (avtomobil yo‘llari va yo‘l sun’iy inshootlari bundan mustasno) shaharsozlik to‘g‘risidagi qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlar talablariga rioya etilishi yuzasidan davlat nazoratini tanlab amalga oshirish;

obyektlarda bino va inshootlarning zilzilaga bardoshliligiga ta’sir qiluvchi, shuningdek, inson salomatligi hamda hayotiga tahdid soluvchi sifatsiz qurilish materiallari, konstruksiyalari va buyumlari qo‘llanishining oldini olish;

buyurtmachining texnik nazorati va loyiha tashkilotlarining mualliflik nazoratini, pudrat tashkilotining ichki nazorat tizimining ishlashi ustidan davlat nazoratini amalga oshirish;

yangi qurilayotgan bino va inshootlarni seysmik jihatdan texnik baholash, mavjud binolar va inshootlarning instrumental-texnik tekshiruvdan shartnoma asosida o‘tkazilishini ta’minlash hamda sinov laboratoriyalari faoliyatini amalga oshirish;

qurilish-montaj ishlarini boshlash uchun ro‘yxatdan o‘tkazish hamda qurilishi tugallangan obyektlarni foydalanishga ruxsat berish;

ko‘p kvartirali uylarni boshqarish, ularga tutash yer uchastkalarini saqlash va ulardan foydalanishda texnik foydalanish qoidalari va normalariga rioya etilishini nazorat qilish hamda mulkdorlar tomonidan joylarning o‘zboshimchalik bilan qayta qurilishiga va qayta rejalashtirilishiga yo‘l qo‘ymaslik;

ko‘p kvartirali uy-joy fondidagi umumiy mulk va unga tutash yer uchastkalarini mavsumiy foydalanishga tayyorlash bo‘yicha bajarilgan ta’mirlash-tiklash ishlarining manzilli dasturlarga muvofiqligi ustidan davlat nazoratini amalga oshirish;

ko‘p kvartirali uylarni boshqarish faoliyatini amalga oshirish qoidalariga rioya etilishidagi davlat nazoratini ta’minlash;

ko‘p kvartirali uylarni boshqarish organlari va joylar mulkdorlari tomonidan issiqlik ta’minotidan foydalanishda normativ-huquqiy hujjatlar talablariga rioya etilishi ustidan davlat nazoratini amalga oshirish;

ko‘p kvartirali uylarning seysmik mustahkamligi va zilzilaga bardoshliligini monitoring qilish;

ichimlik suvini samarali ishlab chiqarish, yetkazib berish, realizatsiya qilish, ichimlik suvidan oqilona foydalanish, shuningdek, oqova suvlarni chiqarib yuborish va tozalash bo‘yicha xizmat ko‘rsatish sohasida texnik jihatdan tartibga solish sohasidagi normativ hujjatlar hamda boshqa qonunchilik hujjatlari talablariga rioya etilishini nazorat qilish;

ichimlik suvi ishlab chiqarish uchun mo‘ljallangan yer osti suvlari quduqlarining texnik holati va ulardan foydalanish shartlariga hamda qazishning (burg‘ilashning) belgilangan qoidalariga rioya etilishini nazorat qilish;

oqova suvlarni chiqarib yuborish tarmoqlaridagi va tozalash inshootlaridagi oqova suvlar tarkibida ifloslantiruvchi moddalarning ruxsat etilgan me’yorlar darajasida chiqarib yuborilishi hamda tozalanishi ustidan davlat nazoratini amalga oshirish;

ichimlik suvi ta’minoti va oqova suvlarni chiqarib yuborish tizimi obyektlarining texnologik auditdan o‘tkazilishi yuzasidan nazoratni amalga oshirish;

iste’molchilarning ichimlik suvi ta’minoti va oqova suvlarni chiqarib yuborish bo‘yicha xizmatlar bilan qamrab olinishi ustidan davlat nazoratini amalga oshirish.

9. Hududiy inspeksiya o‘ziga yuklangan vazifalarni bajarish uchun quyidagi funksiyalarni amalga oshiradi:

Hududiy inspeksiyada ro‘yxatdan o‘tgan qurilish obyektlarida tasdiqlangan loyiha hujjatlari bo‘yicha shaharsozlik subyektlari (buyurtmachi, loyiha va pudrat tashkilotlari) tomonidan qurilish jarayonini qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlarga rioya etilishini nazorat qiladi;

hududiy inspeksiyada ro‘yxatdan o‘tgan qurilish-montaj ishlarining bajarilishida qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlar talablariga rioya etilishi bo‘yicha ta’sirchan davlat nazoratini amalga oshiradi;

jismoniy va yuridik shaxslar tomonidan qurilishda qonunchilik hujjatlari, shaharsozlik normalari va qoidalari, texnik jihatdan tartibga solish sohasidagi normativ hujjatlarga rioya etilishini nazorat qiladi;

qonunchilikda belgilangan tartibda loyiha hujjatlariga o‘zgartirish kiritmasdan yoki qurilish normalari hamda qoidalarini buzgan holda bino va inshootlar qurilishi ustidan nazorat o‘rnatadi;

hududiy inspeksiyada ro‘yxatdan o‘tgan qurilish obyektlarida qurilish materiallari, buyumlari, konstruksiyalari va bajarilayotgan qurilish-montaj ishlari sifatini tekshirish uchun shaharsozlik faoliyati subyektlaridagi loyiha, texnologik va ijro hujjatlari, shuningdek, boshqa zarur ma’lumotlarni belgilangan tartibda o‘rganadi;

obyektlarda ularning zilzilaga bardoshliligiga ta’sir qiluvchi, shuningdek, inson salomatligi va hayotiga tahdid soluvchi sifatsiz qurilish materiallari va buyumlari qo‘llanishining oldini olishda davlat nazoratini amalga oshiradi;

qurilish obyektlarida qo‘llanayotgan qurilish materiallari, buyumlari, konstruksiyalari va bajarilayotgan qurilish-montaj ishlari sifatini tekshirish uchun shaharsozlik faoliyati subyektlaridan belgilangan tartibda loyiha, texnologik va ijro hujjatlari, shuningdek, boshqa zarur ma’lumotlarni so‘raydi va o‘rganadi;

qurilish obyektlaridagi avariyalar holatlarini tekshirish bo‘yicha idoralararo komissiyalar ishida ishtirok etadi;

qurilish obyektlarida buyurtmachining texnik, loyiha tashkilotlarida mualliflik va pudrat tashkilotida ichki nazorat amalga oshirilishini nazorat qiladi;

obyektlarni qurish va rekonstruksiya qilishda tegishli mutaxassislar biriktirilganligi yoki ushbu faoliyat turini amalga oshirish huquqiga ega bo‘lgan yuridik shaxsning shartnoma asosida jalb qilinganligi hamda ularning qonunchilik hujjatlarida belgilangan tartibda sertifikatga egaligini o‘rganadi;

qurilish obyektida buyurtmachi, loyiha va pudrat tashkilotlari tomonidan ijro hujjatlari “Qurilishda davlat nazorati” elektron tizimida yuritilishining hamda qurilish sohasidagi qonunchilik hujjatlarida ko‘rsatilgan litsenziyali faoliyat turlarini amalga oshirish huquqini beruvchi hujjatlarning mavjudligini nazorat qiladi;

loyiha tashkiloti tomonidan buyurtmachiga qurilish-montaj ishlari davomida loyihaga muvofiq beriladigan majburiy ko‘rsatmalarining bajarilishini o‘rganadi, aniqlangan huquqbuzarliklar yuzasidan choralar ko‘radi;

seysmik faol zonalarda qurilishi rejalashtirilayotgan barcha turdagi binolar va inshootlarning, shuningdek, ko‘p kvartirali uylarning seysmik jihatdan texnik baholash uchun zarur bo‘lgan axborotni o‘z ichiga olgan elektron texnik pasportlarning buyurtmachilar tomonidan rasmiylashtirilishini tekshiradi;

hududiy inspeksiyada ro‘yxatdan o‘tib qurilayotgan binolar va inshootlarning zilzilaga bardoshliligini ta’minlash, zarur hollarda instrumental-texnik tekshiruvdan o‘tkazish hamda zilzilaga bardoshliligini ta’minlash bo‘yicha bajarilgan ishlar ustidan davlat nazoratini amalga oshiradi;

qurilish obyektlarida sinov-laboratoriya ishlarini hamda mavjud binolar va inshootlarning texnik holatini shartnoma asosida o‘rganadi va tegishli xulosa beradi;

qurilish-montaj ishlarini boshlash, qurilish-montaj ishlari tugallangan obyektdan foydalanish uchun ruxsatnoma beradi;

qurilish obyektlarini onlayn kuzatish markazlariga mobil videokameralar (bodikamera), maxsus planshetlar va qurilish obyektlaridagi videokameralardan kelib tushgan ma’lumotlarni tezkor tahlil qiladi hamda natijasiga ko‘ra tegishli choralar ko‘radi;

O‘zbekiston Respublikasining ijtimoiy va ishlab chiqarish infratuzilmasini rivojlantirish dasturiga va Davlat budjeti mablag‘lari hisobidan amalga oshiriladigan dasturlarga kiritilgan loyihalar va namunaviy loyihalar bo‘yicha quriladigan, shuningdek, tashabbusli budjetlashtirish jarayonlari asosida moliyalashtiriladigan, xavf-xatar toifasidan qat’i nazar, barcha bino va inshootlarda qurilish-montaj ishlarining bajarilishini (joriy ta’mirlash va jihozlash bundan mustasno) to‘g‘ridan-to‘g‘ri ro‘yxatdan o‘tkazadi;

mavjud ko‘p kvartirali uylardagi tayanch va (yoki) to‘siq konstruksiyalarni texnik jihatdan tartibga solish sohasidagi normativ hujjatlarni buzgan holda o‘zgartirish va (yoki) rekonstruksiya qilish, buzish hamda binoning zilzilaga bardoshliligiga salbiy ta’sir qiladigan ishlarni bajarishga yo‘l qo‘ymaslik ustidan davlat nazoratini amalga oshiradi;

ko‘p kvartirali uylar va ularga tutash yer uchastkalaridan foydalanishda texnik foydalanish qoidalari va normalari, sanitariya normalari va qoidalari, ko‘p kvartirali uylarga tutash yer uchastkalarini saqlash bo‘yicha talablariga rioya qilinishini nazorat qiladi;

ko‘p kvartirali uylarda va unga tutash yer uchastkalarida o‘zboshimchalik bilan imoratlar (inshootlar) qurishga yo‘l qo‘yilmasligini ta’minlaydi;

ko‘p kvartirali uy-joy fondini boshqarish, jumladan muhandislik tarmoqlari, ko‘p kvartirali uylar uskunalaridan foydalanish, avariya holatlari bartaraf etilishini tizimli nazorat qiladi;

ko‘p kvartirali uylardagi umumiy mulk va unga tutash yer uchastkalarida davlat dasturlari asosida amalga oshirilgan ta’mirlash-tiklash ishlarining bajarilishini monitoring qiladi;

umumiy foydalaniladigan joylar, fasadlar, uylarning ichki muhandislik kommunikatsiyalarini ta’mirlash-tiklash ishlarini tizimli o‘tkazish qoidalariga rioya etilishini o‘rganadi;

ko‘p kvartirali uy-joy fondi, ko‘p kvartirali uylardagi joylar mulkdorlarining umumiy mulki va unga tutash hududlardan mavsumiy foydalanishga tayyorlash tadbirlarining o‘tkazilishini nazorat qiladi;

joylar mulkdorlariga hisobotlarning belgilangan shartlar, tartib va muddatlarda berib borilishi yuzasidan nazorat tadbirlarini o‘tkazadi;

umumiy mol-mulkni saqlash va ta’mirlash uchun xizmatlar hamda ishlar shakllantirilgani va belgilangan tartibda tasdiqlanganligini nazorat qiladi;

ko‘p kvartirali uylarni “Billing” tizimi orqali boshqarish, mukammal va joriy ta’mirlash ishlarining amalga oshirish, shuningdek, avariya-dispetcherlik xizmatlarini tashkil etish va ko‘rsatish choralari ta’minlanganligini nazorat qiladi;

olti oyda bir marta ko‘p kvartirali uylardagi tayanch va to‘siq konstruksiyalarning butligini xatlovdan o‘tkazilganligini nazorat qiladi;

ko‘p kvartirali uylarni boshqarish huquqini beruvchi malaka sertifikatining mavjudligini nazorat qiladi;

uy ichidagi issiqlik tarmoqlariga o‘zboshimchalik bilan ulanib olish issiqlik va issiq suv ta’minotining uy ichidagi tizimlariga o‘zgartirishlar kiritish holati yuzasidan davlat nazoratini amalga oshiradi;

uyning isitish asboblarini o‘zboshimchalik bilan demontaj qilish orqali isitish tizimidan uzib qo‘yish holati yuzasidan davlat nazoratini amalga oshiradi;

ko‘p kvartirali uylarni boshqarish organlari tomonidan isitish tizimidan issiqlik manbaini chiqarib tashlash holatlari yuzasidan davlat nazoratini amalga oshiradi;

uy ichidagi issiqlik energiyasidan uning bevosita vazifasidan (isitish, issiq suv ta’minoti) boshqa maqsadda foydalanish holati yuzasidan nazorat tadbirlarini amalga oshiradi;

uy ichidagi isitish tizimini gidravlik presslash va keyinchalik uni tarmoqdagi suv bilan to‘ldirgan holda yuvish ishlari ta’minlanganligini aniqlash yuzasidan nazorat tadbirlarini amalga oshiradi;

isitish tizimidan tarmoq suvining oqishi va chiqib ketishining oldini olish choralari ko‘rilganligini nazorat qiladi;

ko‘p kvartirali uylarning seysmik mustahkamligi va zilzilaga bardoshliligini aniqlash bo‘yicha vizual tartibda o‘tkaziladigan xatlov ishlarini monitoring qiladi;

ko‘p kvartirali uylarning seysmik mustahkamligi va zilzilaga bardoshliligi holati yuzasidan o‘tkazilgan xatlov natijalari to‘g‘risidagi ma’lumotlarni umumlashtiradi;

tahlil natijalariga asosan ekspluatatsiya muddatini o‘tab bo‘lgan seysmik zaif va avariya alomatlari aniqlangan ko‘p kvartirali uylar o‘rnida bosqichma-bosqich yangi uy-joylar qurish bo‘yicha takliflarni ishlab chiqib, mahalliy ijro etuvchi hokimiyat organlariga kiritib boradi;

ichimlik suvi ta’minoti va oqova suvlarni chiqarib yuborish tizimlariga ulanishda texnik shartlar talablariga rioya etilishi, shuningdek, ichimlik suvi va oqova suv tarmoqlariga o‘zboshimchalik bilan ulanishning oldini olish choralarini ko‘radi;

iste’molchilar tomonidan ichimlik suvi ta’minoti va oqova suvlarni chiqarib yuborish xizmatlaridan foydalanishga oid talablarga amal qilinishini monitoring qiladi;

ichimlik suvi ta’minoti va oqova suvlarni chiqarib yuborish tarmoqlaridagi va boshqa inshootlardagi avariyalar bartaraf etilishini, ular yuzaga kelishining oldini olish bo‘yicha ishlab chiqilgan chora-tadbirlar amalga oshirilishini nazorat qiladi;

ichimlik suvining texnologik jihatdan sarflanishi va yo‘qotilishining yo‘l qo‘yiladigan normalariga rioya etilishi ustidan davlat nazoratini amalga oshiradi;

ichimlik suvi ta’minoti va oqova suvlarni chiqarib yuborish sohasida xizmat ko‘rsatish qoidalariga amal qilinishini nazorat qiladi;

ichimlik suvi ta’minoti tashkilotlari tomonidan inshootlarda ichimlik suvining texnologik hisobi yuritilishi ta’minlanganligi va hisoblash uskunalari ishlashi va mavjudligini nazorat qiladi;

ichimlik suvi ta’minoti tashkilotlari tomonidan ichimlik suvini yo‘qotishlarning belgilangan me’yorlariga rioya etilishini nazorat qiladi;

manfaatdor vazirliklar va idoralar bilan birgalikda tashkiliy-huquqiy shaklidan qat’i nazar, suv ta’minoti tashkilotlari tomonidan aholiga yetkazib berilayotgan ichimlik suvining sifati, standartlar va belgilangan talablarga javob berishini nazorat qiladi;

ichimlik suvi ta’minoti tashkilotlari tomonidan iste’molchilarga yetkazib berilayotgan ichimlik suvining sifati, suvni tozalash, zararsizlantirish uskunalari bilan ta’minlanganligi va belgilangan talablarga muvofiqligini o‘rganadi;

ichimlik suvi ehtiyojlari uchun yer osti suvlaridan foydalanishda texnik jihatdan tartibga solish sohasidagi normativ hujjatlar talablari bajarilishi ustidan ta’sirchan nazorat o‘rnatadi;

oqova suv tozalash inshootlaridagi oqova suvlar tarkibidagi ifloslantiruvchi moddalarni ruxsat etilgan me’yorlar darajasida tozalanishi ustidan davlat nazoratini amalga oshiradi;

oqova suvlarni chiqarib yuborish tarmoqlariga me’yordan ortiq ifloslantirilgan oqova suvlarni oqizganlik va oqova suvlarni chiqarib yuborish tarmoqlaridan foydalanish qoidalarining boshqacha tarzda buzilishi holatlari yuzasidan choralar ko‘radi;

ichimlik suvi ta’minoti va oqova suvlarni chiqarib yuborish tizimi tarkibidagi obyektlar va tarmoqlarning samaradorligini oshirish (texnik jarayon va energiyani tejash) bo‘yicha texnologik auditdan o‘tkazadi;

ijtimoiy va ishlab chiqarish infratuzilmasini rivojlantirish dasturi va boshqa dasturlar asosida ichimlik suvi ta’minoti va oqova suv obyektlarida amalga oshirilgan qurilish, rekonstruksiya va modernizatsiya ishlari natijasida iste’molchilarning suv ta’minoti va oqova suvlarni chiqarib yuborish xizmatlari bilan qamrab olinishi hamda tashkiliy-huquqiy shaklidan qat’i nazar, suv ta’minoti tashkilotlari bilan iste’molchilar o‘rtasida shartnomaviy munosabatlar yo‘lga qo‘yilganligi ustidan davlat nazoratini amalga oshiradi.

10. Hududiy inspeksiya qonunchilik hujjatlariga muvofiq boshqa funksiyalarni ham amalga oshirishi mumkin.

11. Hududiy inspeksiya o‘ziga yuklangan vazifalar va funksiyalarni amalga oshirishda quyidagi huquqlarga ega:

tashkiliy-huquqiy shaklidan qat’i nazar, davlat nazoratini amalga oshirish yuzasidan vakolat doirasiga kiruvchi masalalarda belgilangan tartibda tekshiruv o‘tkazish;

tadbirkor hamda hududiy inspeksiyalar o‘rtasida shartnoma (ommaviy oferta) tuzilgan tadbirkorlik subyektlarining qurilish obyektlarida qisqa muddatli davlat qurilish nazorati tadbirlarini shartnoma shartlari doirasida “Yagona davlat nazorati” axborot tizimida ro‘yxatdan o‘tkazmagan holda amalga oshirish;

“xavfni tahlil etish” tizimi doirasida tadbirkorlik subyektlarining qonunchilik hujjatlarini buzish xavfi darajasidan kelib chiqib, tekshiruvni tashabbus qilish;

davlat nazoratini amalga oshirishda jismoniy va yuridik shaxslardan, shuningdek, o‘z vakolatiga kiruvchi masalalarni hal etish uchun zarur bo‘lgan ma’lumotlarni vazirliklar, idoralar, xo‘jalik birlashmalari, mahalliy ijro etuvchi hokimiyat organlari hamda tashkilotlardan belgilangan tartibda olish;

o‘tkazilgan nazorat tadbirlari bo‘yicha tahliliy ma’lumotlarni yuritish;

nazorat ishlarini elektron tizim hamda qurilish obyektlarini onlayn kuzatish markazlari orqali tahlil qilish, umumlashtirish va monitoring qilib borish;

o‘z funksional vazifalari va funksiyalarini bajarish uchun ko‘p kvartirali uylardagi xonadonlarga mulkdorni oldindan xabardor qilgan holda, uning roziligi asosida ko‘p kvartirali uylarni boshqarish organi bilan birga kirish;

pudrat tashkilotlariga konstruksiyalarning alohida detallarini ochish, poydevordagi va qayta to‘ldiriladigan tuproqni tekshirish ishlarini topshirish, zarurat bo‘lganda tegishli xulosa tayyorlash uchun ilmiy-tadqiqot tashkilotlaridan ekspert-mutaxassislarni jalb qilish;

avariya holatidagi binolar, inshootlar, ularning qismlari, konstruktiv elementlari va avariyaga olib kelgan sabablarni tekshirish, ularni noturar joy toifasiga o‘tkazish bo‘yicha texnik komissiyalar ishida ishtirok etish;

qurilish obyektlarida sinov laboratoriya ishlarini hamda mavjud binolar va inshootlarning texnik holatini shartnoma asosida o‘rganish va tegishli xulosa berish;

zarurat bo‘lganda ichimlik suvi va oqova suvlarni, uskuna hamda materiallarni tegishli tashkilotlar tomonidan nazorat sinovidan va tahlildan o‘tkazishni tayinlash;

quyidagi holatlarda jismoniy va yuridik shaxslarga nisbatan bajarilishi majburiy bo‘lgan yozma ko‘rsatmalar kiritish:

bino va inshootlarning zilzilaga bardoshliligiga ta’sir qiluvchi, shuningdek, inson salomatligi va hayotiga tahdid soluvchi konstruktiv buzilishlar aniqlangan holatlarda, qurilish-montaj ishlarini to‘xtatib turish va demontaj (buzdirish) ishlarini amalga oshirishni talab qilish bo‘yicha;

yuridik va jismoniy shaxslarga obyektdagi huquqbuzarliklarni bartaraf qilish uchun mos ravishda, biroq oltmish kundan ortiq bo‘lmagan muddatni belgilagan holda, aniqlangan huquqbuzarliklarni bartaraf etish bo‘yicha;

bajarilgan ishlar loyiha yechimlari, texnik reglamentlar, shaharsozlik normalari va qoidalari, texnik jihatdan tartibga solish sohasidagi normativ hujjatlar va boshqa qonunchilik hujjatlari talablariga mos kelmasligi aniqlangan hollarda, shuningdek, qurilish materiallari, buyumlari va konstruksiyalarini laboratoriyada sinovdan o‘tkazishning salbiy natijalariga hamda talablari buzilgan hujjatga asoslangan holda qurilishi nihoyasiga yetkazilgan bosqichda bajarilgan ishlarning nomuvofiqligi bo‘yicha;

ko‘p kvartirali uylarni boshqarish organlariga va mulkdorlariga ko‘p kvartirali uylarni boshqarish faoliyatini amalga oshirish hamda uylardan texnik foydalanish qoidalari va normalariga, sanitariya normalari, qoidalari va gigiyena normativlarining hamda shaharsozlik normalari va qoidalariga muvofiq, ko‘p kvartirali uylarga tutash yer uchastkasini saqlashga doir talablarning buzilish holatlarini o‘n besh kun muddatda bartaraf etish bo‘yicha;

ko‘p kvartirali uylarning konstruktiv qismlarining tayanch qobiliyatini hamda zilzilaga bardoshliligini buzadigan, shuningdek, inson hayoti, sog‘lig‘i yoki mol-mulkiga va atrof-muhitga zarar yetkazilishi hamda tahdid soluvchi o‘zboshimchalik bilan amalga oshirilayotgan o‘zgartirish va rekonstruksiya qilish ishlari aniqlangan hollarda, ularni to‘xtatish va ularning oqibatlarini o‘ttiz kun muddatda ixtiyoriy ravishda bartaraf etish bo‘yicha;

ichimlik suvi ta’minoti va oqova suvlarni chiqarib yuborish sohasida aniqlangan huquqbuzarliklarni bartaraf etish bo‘yicha;

yer osti suvlaridan samarasiz foydalanish holatlari aniqlanganda yer osti suvlarini olishni to‘xtatish yoki bu borada ajratilgan limitni belgilangan tartibda qisqartirish bo‘yicha;

Hududiy inspeksiya o‘z vakolatlari doirasida:

mahalliy ijro etuvchi hokimiyat organlariga va maxsus vakolatli davlat organining hududiy bo‘linmalariga shaharsozlik to‘g‘risidagi qonunchilik hujjatlarini buzgan holda qabul qilingan qarorlarni bekor qilish haqida;

shaharsozlik faoliyatini amalga oshirishga doir litsenziyalarning hamda ruxsat beruvchi hujjatlarning amal qilishini to‘xtatib turish, tugatish yoki ularni bekor qilish to‘g‘risidagi masalani hal etish uchun tegishli davlat organlari hamda tashkilotlarga qonunchilik hujjatlarida belgilangan tartibda;

binolar va inshootlarning zilzilaga bardoshliligiga ta’sir qiluvchi, shuningdek, inson hayoti va sog‘lig‘iga tahdid soluvchi sifatsiz qurilish materiallari, konstruksiyalari hamda buyumlari qo‘llangani aniqlangan hollarda, qurilish materiallarini, konstruksiyalarini va buyumlarini ishlab chiqarishni, realizatsiya qilish hamda qo‘llashni to‘xtatib turish haqida tegishli davlat organlari va tashkilotlarga;

qurilish obyektlarining barcha bosqichlarida pudrat tashkilotining ichki, loyiha tashkilotining mualliflik va texnik nazoratni amalga oshiruvchi mutaxassislarning maxsus sertifikatlari mavjudligini tekshirish, nazorat davomida sertifikat mavjud bo‘lmaganda buyurtmachi, pudrat va loyiha tashkilotlariga mas’ul shaxslarni qurilish obyektlaridan chetlashtirish va tegishli sertifikatni bekor qilish yuzasidan;

davlat organlari va tashkilotlari hamda xo‘jalik birlashmalari va boshqa tashkilotlarga ko‘p kvartirali uy-joy fondini boshqarish hamda ichimlik suvi ta’minoti va oqova suvlarni chiqarib yuborish sohasida huquqbuzarliklarni bartaraf etish bo‘yicha taqdimnomalar kiritadi;

ichimlik suvi ta’minoti va oqova suvlarni chiqarib yuborish xizmatlarini ko‘rsatish va ulardan foydalanish bo‘yicha ishlarni ko‘rib chiqish uchun sud majlisida yoki protsessual harakatlarda ekspert, mutaxassis sifatida ishtirok etishi va xulosalar berishi mumkin;

suv ta’minoti tashkilotlarining “Billing” tizimidagi iste’molchilarning manzili va soni, suv hisoblagichlari ko‘rsatkichlari, sarflangan suv miqdori va qarzdorlik, oqova suvlarni chiqarish, yangi qamrab olingan iste’molchilar to‘g‘risida va boshqa ma’lumotlardan foydalanadi;

quyidagi holatlarda sudlarga arizalar kiritadi:

davlat organlari va tashkilotlari hamda boshqa tashkilotlarga nisbatan ko‘p kvartirali uylarni boshqarish, issiqlik ta’minotidan foydalanish hamda ichimlik suvi ta’minoti va oqova suvlarni chiqarib yuborish sohasida huquqbuzarliklarni bartaraf etish bo‘yicha;

Hududiy inspeksiyada ro‘yxatdan o‘tgan va tasdiqlangan loyiha hujjatlariga rioya qilmagan holda qurilish ishlarini bajarganlik holati aniqlanganda, qurilish-montaj ishlarini to‘xtatib qo‘yish, demontaj ishlarini amalga oshirish yoki buzdirish ishlarini amalga oshirish to‘g‘risida;

o‘tkazilgan tekshiruv natijasida aniqlangan qonunbuzarliklarni bartaraf etishga doir ko‘rsatmalar talablari bajarilmagan holatlarda jismoniy yoxud yuridik shaxs faoliyatini qisman yoki to‘liq to‘xtatish yoxud taqiqlash to‘g‘risida;

Hududiy inspeksiya manfaatlarini himoya qilish maqsadida;

nazorat natijalarini tahlil qiladi, xalqaro tajribalarni o‘rgangan holda, normativ-huquqiy bazani yanada takomillashtirish bo‘yicha Inspeksiyaga takliflar taqdim etadi;

Hududiy inspeksiya faoliyatida foydalanishi uchun uslubiy va metodik qo‘llanmalar, yo‘riqnomalar ishlab chiqish bo‘yicha takliflar tayyorlaydi;

qurilish sohasida va ko‘p kvartirali uy-joy fondini boshqarish hamda ichimlik suvi ta’minoti va oqova suvlarni chiqarib yuborish sohasida davlat nazoratini amalga oshirish yuzasidan elektron axborot tizimini tashkil etadi;

Hududiy inspeksiyada qurilish obyektlarini onlayn kuzatish markazlari faoliyatini tashkil etadi;

Hududiy inspeksiya xodimlarini tayyorlash, qayta tayyorlash va ularning malakasini uzluksiz oshirishni tashkil etadi, shuningdek, bu masalalar bo‘yicha Inspeksiyaga aniq takliflar kiritadi;

xorijiy davlatlar mutaxassislarini jalb qilgan holda tajriba almashish hamda xodimlarning xorijiy mamlakatlarda malakasini oshirishni tashkil etadi;

xodimlarni qonunchilik hujjatlarida belgilangan tartibda attestatsiyadan o‘tkazishni va ularning natijalariga ko‘ra tegishli maxsus guvohnomalar berishni tashkil etadi;

qurilish, uy-joy fondini boshqarish va ichimlik suvi ta’minoti hamda oqova suvlarni chiqarib yuborish masalalari bo‘yicha o‘quv-seminarlarni tashkil qiladi va o‘tkazadi;

Hududiy inspeksiyani zamonaviy sinov-laboratoriya o‘lchov asboblari bilan ta’minlaydi;

shartnoma asosida qurilish obyektidagi qurilish mahsulotlari, materiallari, buyumlari, konstruksiyalaridan tanlab namunalar oladi, sinovdan o‘tkazadi va bayonnomalar rasmiylashtiradi;

mavjud binolar va inshootlarning texnik holatini shartnoma asosida o‘rganadi va tegishli xulosa beradi;

qurilish ishlarida mustahkamlik, seysmik qoidalarning buzilishi natijasida aholi sog‘lig‘i va hayotiga zarar yetkazilishi yoki og‘ir oqibatlarga olib kelishining oldini olish maqsadida huquqni muhofaza qiluvchi organlarga choralar ko‘rish yuzasidan tegishli hujjatlarni ilova qilgan holda xabar beradi;

elektron reytinglarni joriy etish uchun belgilangan muddatlarda “Shaffof qurilish” milliy axborot tizimida ma’lumotlarni taqdim etadi.

12. Hududiy inspeksiya huquqbuzarlik holati bo‘yicha e’tiroz bildirilgan hollarda ishni ko‘rib chiqish uchun sudga taqdim etish tartibini saqlab qolgan holda, o‘z vakolati doirasida qonunchilik hujjatlarining buzilishiga oid ma’muriy huquqbuzarliklar to‘g‘risidagi ishlarni ko‘rib chiqadi.

13. Ko‘p kvartirali uylarning birinchi qavatini noturar joy toifasiga yoki noturar joyni ko‘p kvartirali turar joy toifasiga o‘tkazishga ruxsatnoma berishda xulosa beradi.

14. Hududiy inspeksiya:

unga yuklangan vazifalar va funksiyalarni samarali bajarish, shuningdek, qurilish, ko‘p kvartirali uy-joy fondini boshqarish, issiqlik ta’minotidan foydalanish hamda ichimlik suvi ta’minoti va oqova suvlarni chiqarib yuborish xizmati sohasida davlat nazoratini samarali amalga oshirish;

qurilish obyektlarida ishlatilayotgan qurilish materiallari, konstruksiyalari va buyumlarining texnik jihatdan tartibga solish sohasidagi normativ hujjatlar talablariga muvofiqligini nazorat qilish;

jismoniy va yuridik shaxslarning huquqlariga rioya etilishini va qonuniy manfaatlari himoya qilinishini ta’minlash;

qurilish sohasida qonunchilikning ijro etilishi, aniqlangan qonunbuzarlik holatlarining o‘z vaqtida ko‘rib chiqilishini ta’minlash hamda o‘z vakolati doirasida tegishli choralar ko‘rish;

har oylik, choraklik va yillik hisobotlar, ma’lumotlar va statistika ma’lumotlarining o‘z vaqtida taqdim etilishini ta’minlash;

ko‘p kvartirali uy-joy fondini boshqarish (xo‘jalik yurituvchi subyektlarning moliyalashtirish manbalaridan qat’i nazar, moliya-xo‘jalik faoliyatiga aralashmagan holda), issiqlik ta’minotidan foydalanish, ichimlik suvi ta’minoti va oqova suvlarni chiqarib yuborish xizmatini ko‘rsatish hamda foydalanish yuzasidan davlat nazorati va tekshiruvini amalga oshirish (avtomobil yo‘llari va yo‘l sun’iy inshootlari bundan mustasno);

sohada aniqlangan muammolarni har tomonlama va chuqur o‘rganish hamda umumlashtirish asosida hududlarda tegishli sohani rivojlantirishga doir takliflar tayyorlash uchun javobgardir.

12. Quyidagilar Hududiy inspeksiya boshlig‘ining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Hududiy inspeksiya faoliyatiga umumiy rahbarlik qilish, O‘zbekiston Respublikasi Prezidentining tegishli hujjatlari, Vazirlar Mahkamasining qarorlari, boshqa qonunchilik hujjatlari hamda Inspeksiyaning hujjatlari bilan Hududiy inspeksiyaga yuklangan vazifa va funksiyalar bajarilishini tashkil etish;

boshliq o‘rinbosarlari va tarkibiy tuzilmalar rahbarlarining vakolatlarini belgilash va vazifalarni taqsimlash;

Hududiy inspeksiya faoliyati rejalashtirilishini tashkil etish, Hududiy inspeksiyaning davriy ish rejalarini tasdiqlash, ularning bajarilishi yuzasidan nazoratni ta’minlash;

O‘zbekiston Respublikasi Prezidentining farmonlari, qarorlari, farmoyishlari, Vazirlar Mahkamasi qarorlari, farmoyishlari va topshiriqlari bajarilishini ta’minlash, Inspeksiya faoliyatida ijro intizomini mustahkamlash bo‘yicha kompleks chora-tadbirlarni amalga oshirish, O‘zbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida” 2021-yil 10-fevraldagi PF-6166-son hamda “Davlat organlari va tashkilotlarda ijro intizomini yanada mustahkamlashning qo‘shimcha chora-tadbirlari to‘g‘risida” 2025-yil 25-iyuldagi PF-117-son farmonlariga hamda “Ijro.gov.uz” ijro intizomi idoralararo yagona elektron tizimi samarali faoliyat ko‘rsatishini ta’minlashga qaratilgan qo‘shimcha chora-tadbirlar to‘g‘risida” 2021-yil 31-maydagi PQ-5132-son qaroriga muvofiq tarkibiy bo‘linma rahbarlarining shaxsiy mas’uliyatini oshirish choralarini ko‘rish;

Hududiy inspeksiya rahbarlari va xodimlari xizmat safarlarini qonunchilik hujjatlarida belgilangan talablarga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablag‘lardan maqsadli va oqilona foydalanishni ta’minlash;

Hududiy inspeksiya vakolatiga kiradigan masalalar bo‘yicha ko‘rsatmalar chiqarish, buyruqlar qabul qilish;

Hududiy inspeksiya xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Inspeksiya xodimlari odob-axloq qoidalariga rioya etilishini ta’minlash;

jismoniy va yuridik shaxslarning murojaatlarini ko‘rib chiqish bo‘yicha ishlarni O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsiy qabullar o‘tkazish, shu jumladan, jismoniy va yuridik shaxslarning vakillarini joylarga chiqib qabul qilishni tashkil etish;

davlat organlari va boshqa tashkilotlarda, O‘zbekiston Respublikasi sudlarida, shuningdek, davlat organlari, xalqaro tashkilotlar va xorijiy mamlakat vakillari ishtirokida o‘tkaziladigan rasmiy tadbirlarda Hududiy inspeksiya nomidan ishtirok etish;

O‘zbekiston Respublikasining “Korrupsiyaga qarshi kurashish to‘g‘risida”gi Qonuni va korrupsiyaga qarshi kurashishga doir boshqa qonunchilik hujjatlariga rioya etish, faoliyatda korrupsiyaviy xavf-xatarlarni va manfaatlar to‘qnashuvini o‘z vaqtida aniqlash hamda ularga chek qo‘yish, korrupsiyaga oid huquqbuzarliklarning oldini olish choralarini ko‘rish hamda tizimda korrupsiyaning oldini olish va unga qarshi murosasiz kurashishga doir ishlarga rahbarlik qilish va muvofiqlashtirish;

O‘zbekiston Respublikasining “Manfaatlar to‘qnashuvi to‘g‘risida”gi Qonuni va manfaatlar to‘qnashuvi bilan bog‘liq munosabatlarni tartibga solishga doir ishlarga rahbarlik qilish va muvofiqlashtirish;

O‘zbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Inspeksiya rahbarlari va xodimlari ularning faoliyatida faol ishtirok etishini, jismoniy va yuridik shaxslarning O‘zbekiston Respublikasi Prezidentining Virtual qabulxonasidan kelib tushgan murojaatlarini o‘z vaqtida va to‘laqonli ko‘rib chiqilishini ta’minlash;

Hududiy inspeksiya xodimlarini ularning ko‘p yillik va samarali faoliyati, alohida xizmatlari uchun O‘zbekiston Respublikasi davlat mukofotlari bilan taqdirlash uchun belgilangan tartibda takliflar kiritishni ta’minlash va tavsiyalar berish;

Hududiy inspeksiya mulkini qonunchilik hujjatlarida belgilangan tartibda tasarruf etish;

Hududiy inspeksiyaning ichki tashkiliy masalalari yuzasidan qarorlar qabul qilish;

Hududiy inspeksiya xodimlarini lavozimga tayinlash va lavozimdan ozod etish, mehnat shartnomalari (buyruqlari)ni imzolash;

Hududiy inspeksiya xodimlariga vazifalarni yuklash;

Hududiy inspeksiya xodimlarining malakasini oshirish va ularni xorijiy davlatlarga stajirovka va tajriba almashish uchun yuborishni tashkil etish;

Hududiy inspeksiya xodimlarini rag‘batlantirish va intizomiy javobgarlikka tortish masalalarini hal qilish, boshliq o‘rinbosarlarini rag‘batlantirish va intizomiy javobgarlikka tortish masalalarini, shu jumladan, kelgusida uning egallab turgan lavozimida qolishining maqsadga muvofiqligi masalalarini ko‘rib chiqish to‘g‘risida Inspeksiyaga takliflar kiritish, ularning shaxsiy javobgarligini oshirish bo‘yicha tizimli choralar ko‘rish;

Hududiy inspeksiyaning tashqi va ichki tashkiliy faoliyati ustidan doimiy va qat’iy nazorat o‘rnatish;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish;

Hududiy inspeksiya xarajatlari smetasini Inspeksiya bilan kelishgan holda tasdiqlash;

ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

13. Quyidagilar Hududiy inspeksiya boshlig‘i o‘rinbosarlarining o‘zlari mutasaddilik qiladigan sohalar bo‘yicha asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

Hududiy inspeksiya boshlig‘i muayyan sabablarga ko‘ra (xizmat safari, mehnat ta’tili, betobligi davrida) yo‘qligida uning vazifalarini bajarish;

Hududiy inspeksiyaning o‘zi nazorat qiladigan tarkibiy tuzilmalari faoliyatini muvofiqlashtirish, nazorat va bevosita rahbarlik qilish, xodimlar o‘rtasida vazifalarni taqsimlash;

Hududiy inspeksiya faoliyatining o‘zi mutasaddilik qiladigan yo‘nalishlarini yanada takomillashtirish yuzasidan O‘zbekiston Respublikasi Prezidentining hujjatlari va Vazirlar Mahkamasi qarorlari bilan tasdiqlangan kompleks dastur va kompleks chora-tadbirlar ijrosini tanqidiy va chuqur tahlil qilish;

mutasaddiligidagi tarkibiy tuzilmalar bo‘linma rahbarlarining hisobotlarini muntazam eshitib borish va belgilangan ko‘rsatkichlarga erishish uchun ularning shaxsiy javobgarligini oshirish;

Hududiy inspeksiya boshlig‘ining qonunchilik doirasidagi buyruq hamda topshiriqlari ijrosini o‘z vaqtida va sifatli ta’minlash;

Hududiy inspeksiyaga kiritilgan takliflar va taqdim etilgan normativ-huquqiy hujjatlar loyihalarini to‘liq va har tomonlama ko‘rib chiqish;

kadrlarni belgilangan tartibda tanlash va joy-joyiga qo‘yish bo‘yicha Hududiy inspeksiya boshlig‘iga takliflar taqdim etish, ularning professionalligi, o‘z ishini bilishi, yuksak darajadagi ishchanlik va ma’naviy-axloqiy fazilatlarga ega bo‘lishini ta’minlash, ularning kasbiy malakasini oshirish choralarini ko‘rish, mutasaddilik bo‘yicha tarkibiy tuzilmalarda kadrlar zaxirasini shakllantirish choralarini ko‘rish;

Hududiy inspeksiya xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Inspeksiya xodimlarining odob-axloq qoidalari talablariga rioya etilishini ta’minlash;

jismoniy va yuridik shaxslarning murojaatlarini ko‘rib chiqish bo‘yicha ishlarni O‘zbekiston Respublikasining “Jismoniy va yuridik shaxslarning murojaatlari to‘g‘risida”gi Qonuni, Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi to‘g‘risidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsiy qabullar o‘tkazish, shu jumladan, jismoniy va yuridik shaxslarning vakillarini joylarga chiqib qabul qilishni tashkil etish;

O‘zbekiston Respublikasining “Korrupsiyaga qarshi kurashish to‘g‘risida”gi Qonuni va korrupsiyaga qarshi kurashishga doir boshqa qonunchilik hujjatlariga hamda O‘zbekiston Respublikasining “Manfaatlar to‘qnashuvi to‘g‘risida”gi Qonuniga rioya qilish va manfaatlar to‘qnashuvi bilan bog‘liq munosabatlarni tartibga solish yuzasidan choralar ko‘rib borish;

Hududiy inspeksiya faoliyatini takomillashtirish bo‘yicha amaliy choralar ko‘rish, ushbu sohada qonunchilikni takomillashtirishga doir takliflarni ishlab chiqib, ko‘rib chiqish uchun Hududiy inspeksiya boshlig‘iga kiritish;

davlat siri toifasiga kiritilgan va maxfiy axborot bilan ishlashda qonunchilik talablariga rioya qilish;

o‘zi mutasaddilik qiladigan tarkibiy bo‘linmalarda xodimlarni tanlash va joy-joyiga qo‘yish bo‘yicha Hududiy inspeksiya boshlig‘iga takliflar kiritish;

o‘zi mutasaddilik qiladigan tarkibiy bo‘linmalar rahbarlari faoliyati samaradorligi va natijadorligini muntazam ravishda tanqidiy tahlil qilish;

o‘zi mutasaddilik qiladigan tarkibiy bo‘linmalar rahbarlari va xodimlarini rag‘batlantirish va intizomiy javobgarlikka tortish bo‘yicha Hududiy inspeksiya boshlig‘iga takliflar kiritish;

ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

14. Hududiy inspeksiya boshlig‘i:

Hududiy inspeksiyaga yuklangan vazifalar va funksiyalarning bajarilishi uchun;

Hududiy inspeksiyaning ushbu Nizomda nazarda tutilgan javobgarlik sohalari bo‘yicha hamda mazkur Nizomning 12-bandida ko‘rsatilgan o‘z funksional majburiyatlari sifatli bajarilishi uchun shaxsan javob beradi.

15. Hududiy inspeksiya boshlig‘i o‘rinbosarlari:

mutasaddilik qilinadigan yo‘nalish va tarkibiy bo‘linmalarda Hududiy inspeksiyaga yuklangan vazifalar va funksiyalarning bajarilishi uchun;

ushbu Nizomning 13-bandida ko‘rsatilgan o‘z funksional vazifalarining sifatli bajarilishi uchun shaxsan javob beradilar.

16. Hududiy inspeksiyalarning boshliqlari va ularning o‘rinbosarlari Inspeksiya boshlig‘i tomonidan qonunchilikda belgilangan tartibda lavozimga tayinlanadi va lavozimidan ozod etiladi.

17. Hududiy inspeksiya boshlig‘i:

Hududiy inspeksiya xodimlari uchun majburiy bo‘lgan buyruqlar chiqaradi hamda ularning bajarilishini nazorat qiladi;

o‘rinbosarlar o‘rtasida aniq vazifalar va funksiyalarni taqsimlaydi, xodimlar o‘rtasida vakolatlarni belgilaydi va majburiyatlarni taqsimlaydi, tarkibiy bo‘linmalar mansabdor shaxslarining vakolatlarini belgilaydi;

Hududiy inspeksiya bo‘lim boshliqlarini Inspeksiya bilan kelishgan holda lavozimga tayinlaydi;

Hududiy inspeksiya xodimlarini lavozimga tayinlaydi va lavozimdan ozod etadi;

Hududiy inspeksiya xodimlari faoliyatini rag‘batlantirish uchun tegishli buyruqlar chiqaradi;

Hududiy inspeksiya faoliyatini, shu jumladan, moddiy-texnik bazasini tashkil etish va rivojlantirishni tashkil etadi;

Hududiy inspeksiyani malakali, amaliy tajribaga ega kadrlar bilan to‘ldirish, shuningdek, ularni saralab olish, tayyorlash, qayta tayyorlash va ularning uzluksiz malakasini oshirish sohasida kadrlar siyosatini yuritadi.

Hududiy inspeksiya boshlig‘i qonunchilik hujjatlariga muvofiq boshqa vakolatlarni ham amalga oshirishi mumkin.

18. Hududiy inspeksiya boshlig‘i bo‘lmagan vaqtda, uning vakolatlari Hududiy inspeksiya boshlig‘ining birinchi o‘rinbosari tomonidan, u bo‘lmagan vaqtda esa Hududiy inspeksiya boshlig‘ining tegishli buyrug‘iga asosan boshqa o‘rinbosar tomonidan amalga oshiriladi.

19. Hududiy inspeksiyalar tuzilmasi va shtat jadvallari (mehnatga haq to‘lash razryadlari Inspeksiya markaziy apparati xodimlari uchun belgilangan mehnatga haq to‘lash razryadlaridan bir pog‘ona past miqdorda qo‘llanadi) Inspeksiya boshlig‘i tomonidan tasdiqlanadi.

20. Hududiy inspeksiya faoliyatining samaradorligi muntazam baholanadi.

21. Hududiy inspeksiya faoliyati samaradorligi va natijadorligiga berilgan baho Inspeksiya boshlig‘i tomonidan tasdiqlanadigan Hududiy inspeksiya faoliyati samaradorligi va natijadorligini baholash mezonlari va ish indikatorlariga asoslanadi.

22. Hududiy inspeksiya faoliyati samaradorligi va natijadorligini baholash yakunlari bo‘yicha:

Hududiy inspeksiya rahbarlari va xodimlarini qo‘shimcha rag‘batlantirish (mukofotlash) yoki intizomiy javobgarlikka tortish;

Hududiy inspeksiya faoliyatida aniqlangan kamchiliklarni bartaraf etish va uning faoliyatini yanada takomillashtirish choralari ko‘riladi.

23. Hududiy inspeksiya faoliyati samaradorligi va natijadorligini baholash tartibi va uslubi qonunchilik hujjatlari bilan belgilanadi.

24. Hududiy inspeksiya faoliyati quyidagi manbalar hisobidan moliyalashtiriladi:

davlat qurilish nazorati amalga oshiriladigan barcha obyektlar uchun Hududiy inspeksiyaga ajratmalarning qurilish-montaj ishlari qiymatining (qo‘shilgan qiymat solig‘isiz) Hududiy inspeksiya ixtiyorida qoldiriladigan mablag‘lar;

Inspeksiyaning budjetdan tashqari mablag‘lari;

mavjud binolar va inshootlarning texnik holatini tekshirish bo‘yicha shartnoma asosida ishlarni bajarish va xizmatlar ko‘rsatishdan, shuningdek, laboratoriya xizmatlari va qonunchilik hujjatlarida taqiqlanmagan xizmatlarning boshqa turlarini ko‘rsatishdan olingan daromadlar;

Hududiy inspeksiya xo‘jalik faoliyati hisobidan moliyalashtiriladi va ularning inspektorlari soni ro‘yxatdan o‘tgan obyektlarning umumiy sonidan, hajmidan va masofasidan kelib chiqqan holda belgilanadi.

25. Mavjud binolar va inshootlarning texnik holatini tekshirish bo‘yicha bajarilayotgan ishlar va ko‘rsatilayotgan xizmatlarning, shuningdek, sinov-laboratoriya xizmatlari va Inspeksiya tomonidan ko‘rsatilayotgan xizmatlar boshqa turlarining qiymatini aniqlash metodikasi Inspeksiya tomonidan tasdiqlanadi.

26. Hududiy inspeksiya xodimlariga mehnatga haq to‘lash, moddiy rag‘batlantirish va ijtimoiy himoya qilishda Inspeksiya markaziy apparati xodimlarini mehnatiga haq to‘lash va moddiy rag‘batlantirish tartibida belgilangan barcha to‘lovlar tatbiq etilgan holda, Hududiy inspeksiya mablag‘lari hisobidan amalga oshiriladi.

Hududiy inspeksiyaning moddiy-texnik bazasini mustahkamlash, shuningdek, xodimlarini moddiy rag‘batlantirish, shu jumladan, qo‘shimcha to‘lovlar, ustama haqlar, mukofotlar, ijtimoiy va boshqa to‘lovlarni to‘lash Hududiy inspeksiyalar va Inspeksiyaning budjetdan tashqari mablag‘lari hisobidan qo‘shimcha moliyalashtirish orqali amalga oshirilishi mumkin.

27. Mehnatga haq to‘lash bo‘yicha yagona tarif setkasidan foydalanadigan xo‘jalik hisobidagi korxonalar va tashkilotlarga ularning moliyaviy imkoniyatlaridan va xo‘jalik faoliyati natijalaridan kelib chiqqan holda, xodimlar mehnatiga haq to‘lashni tashkil etish uchun asos sifatida Yagona tarif setkasining oshirilgan tarif koeffitsiyentlarini belgilash huquqi berilishi mumkin.

28. Hududiy inspeksiya qonunchilik hujjatlarida belgilangan tartibda qayta tashkil etiladi va tugatiladi.

29. Ushbu Nizom talablari buzilishida aybdor bo‘lgan shaxslar qonunchilik hujjatlarida belgilangan tartibda javob beradilar.