Oʻzbekiston Respublikasi Prezidentining 2011-yil 27-sentabrdagi PQ-1621-son “2012-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi, 2014-yil 8-oktabrdagi PQ-2241-son “Boshoqli don ekinlari urugʻchiligini yanada rivojlantirish, navlarni joylashtirishning ilmiy asoslangan uslublarini takomillashtirish va 2015-yil hosilini xarid qilish chora-tadbirlari toʻgʻrisida”gi qarorlariga muvofiq Oʻzbekiston Respublikasi Qishloq va suv xoʻjaligi vazirligi, Moliya vazirligi, Iqtisodiyot vazirligi qaror qiladi:

1. Davlat resurslariga urugʻchilik va boshqa xoʻjaliklardan xarid qilinadigan urugʻlik don uchun navlarga ustama haq ajratish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran uch oydan keyin kuchga kiradi.

Mazkur Nizom Oʻzbekiston Respublikasining “Urugʻchilik toʻgʻrisida”gi, “Seleksiya yutuqlari toʻgʻrisida”gi qonunlari hamda Oʻzbekiston Respublikasi Prezidentining 2011-yil 27-sentabrdagi PQ-1621-son “2012-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi, 2014-yil 8-oktabrdagi PQ-2241-son “Boshoqli don ekinlari urugʻchiligini yanada rivojlantirish, navlarni joylashtirishning ilmiy asoslangan uslublarini takomillashtirish va 2015-yil hosilini xarid qilish chora-tadbirlari toʻgʻrisida”gi qarorlariga muvofiq, davlat resurslariga urugʻchilik va boshqa xoʻjaliklardan xarid qilinadigan urugʻlik don uchun navlarga ustama haq ajratish tartibini belgilaydi.

1. Oʻzbekiston Respublikasi Prezidentining 2010-yil 15-sentabrdagi PQ-1404-son “2011-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qarorining 4-bandiga muvofiq, 2011-yilgi boshoqli don hosilidan boshlab, urugʻchilik xoʻjaliklari va boshqa xoʻjaliklardan davlat resurslariga xarid qilinadigan urugʻlik don uchun amaldagi preyskurant xarid narxlariga nav ustamalari belgilangan.

2. Etishtirilgan boshoqli don ekinlari urugʻlarining hajmini aniqlash va ularni xarid qilish, shuningdek ular boʻyicha hisob-kitoblarni amalga oshirish Urugʻchilik fermer xoʻjaliklarida yetishtirilgan boshoqli don ekinlarining superelita va elita urugʻlarini toʻliq hajmda xarid qilish tartibi toʻgʻrisidagi nizomga (roʻyxat raqami 1789, 2008-yil 11-aprel) muvofiq amalga oshiriladi.

3. Urugʻchilik va boshqa xoʻjaliklardan davlat ehtiyojlari uchun boshoqli don ekinlari urugʻlarini don korxonalariga qabul qilish Urugʻlik donni qabul qilish, tayyorlash, dorilash, tarqatish va sifatini nazorat qilish tartibi toʻgʻrisidagi yoʻriqnomaga (roʻyxat raqami 1499, 2005-yil 29-iyul) muvofiq amalga oshiriladi.

4. Oʻzbekiston Respublikasi Qishloq va suv xoʻjaligi vazirligi huzuridagi Qishloq xoʻjaligi ekinlari urugʻini sertifikatsiyalash va sifatini nazorat qilish davlat markazi (“Oʻzdavurugʻnazoratmarkaz”) tomonidan boshoqli don ekinlari urugʻlarining davlat standarti talablariga mos kelishi haqida sertifikat berilgandan soʻng, davlat resurslariga urugʻchilik va boshqa xoʻjaliklardan xarid qilingan urugʻlik don uchun navlarga ajratilgan ustamadan jamgʻarilgan mablagʻlarning:

2,1 foizi — Boshoqli don ekinlari urugʻchiligi respublika markazining maxsus hisobvaragʻiga;

3 foizigacha — Don va dukkakli ekinlar ilmiy-tadqiqot institutining maxsus hisobvaragʻiga qonunchilik hujjatlarida belgilangan tartibda “Oʻzdonmahsulot” aksiyadorlik kompaniyasining tarkibiga kiruvchi don mahsulotlari korxonalari va ular filiallarining 22602 — “Mijozlarning akkreditivlar boʻyicha depozitlari” bank hisobvaragʻidan besh ish kuni ichida toʻgʻridan toʻgʻri oʻtkazib beriladi.

5. Boshoqli don ekinlari urugʻchiligi respublika markazining maxsus hisobvaragʻiga tushgan mablagʻlar Oʻzbekiston Respublikasi Qishloq va suv xoʻjaligi vazirligi tomonidan tasdiqlangan yillik xarajatlar smetasiga asosan Boshoqli don ekinlari urugʻchiligi respublika markazi va uning hududiy boʻlimlarini saqlash, ish haqi va unga tenglashtirilgan toʻlovlarni amalga oshirish, ularning moddiy-texnik bazasini mustahkamlashga sarflanadi.

6. Don va dukkakli ekinlar ilmiy-tadqiqot institutining maxsus hisobvaragʻiga oʻtkazilgan mablagʻlar Don va dukkakli don ekinlari ilmiy tadqiqot instituti va uning filiallariga urugʻchilik hamda boshqa xoʻjaliklardan davlat resursiga xarid qilinadigan urugʻlik don uchun nav ustamalaridan 3 foizgacha ajratish tartibi toʻgʻrisidagi nizomda (roʻyxat raqami 2382, 2012-yil 25-iyul) belgilangan tartibda taqsimlanadi.

7. Mazkur Nizom “Oʻzdonmahsulot” aksiyadorlik kompaniyasi, Oʻzbekiston Fermerlari Kengashi va Oʻzbekiston Respublikasi Savdo-sanoat palatasi bilan kelishilgan.