Oʻzbekiston Respublikasi Prezidentining 2011-yil 27-sentabrdagi PQ–1621-sonli “2012-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qaroriga muvofiq, don va dukkakli don ekinlari ilmiy tadqiqot instituti va uning filiallariga, urugʻchilik hamda boshqa xoʻjaliklardan davlat resursiga xarid qilinadigan urugʻlik don uchun nav ustamalaridan 3 foizgacha ajratish maqsadida Oʻzbekiston Respublikasi Qishloq va suv xoʻjaligi vazirligi, Moliya vazirligi va Iqtisodiyot vazirligi qaror qiladi:

1. Don va dukkakli don ekinlari ilmiy tadqiqot instituti va uning filiallariga, urugʻchilik hamda boshqa xoʻjaliklardan davlat resursiga xarid qilinadigan urugʻlik don uchun nav ustamalaridan 3 foizgacha ajratish tartibi toʻgʻrisidagi Nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining “Urugʻchilik toʻgʻrisida”gi (Oʻzbekiston Respublikasi Oliy Majlisining Axborotnomasi, 1996-y., 9-son, 130-modda), “Seleksiya yutuqlari toʻgʻrisida”gi (Oʻzbekiston Respublikasi Oliy Majlisining Axborotnomasi, 2002-y., 9-son, 156-modda) qonunlari hamda Oʻzbekiston Respublikasi Prezidentining 2011-yil 27-sentabrdagi PQ–1621-sonli “2012-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qaroriga muvofiq, Don va dukkakli don ekinlari ilmiy tadqiqot instituti va uning filiallariga urugʻchilik hamda boshqa xoʻjaliklardan davlat resursiga xarid qilinadigan urugʻlik don uchun nav ustamalaridan (keyingi oʻrinlarda nav ustamalari deb yuritiladi) 3 foizgacha ajratish tartibini belgilaydi.

1. Oʻzbekiston Respublikasi Prezidentining 2010-yil 15-sentabrdagi PQ–1404-sonli “2011-yil hosili uchun kuzgi boshoqli don ekinlarini ekish, navlarni joylashtirish va xarid qilishning tashkiliy chora-tadbirlari toʻgʻrisida”gi qarorining (Oʻzbekiston Respublikasi Oliy Majlisi palatalarining Axborotnomasi, 2010-y., 9-son, 377-modda) 4-bandiga muvofiq, 2011-yilgi boshoqli don hosilidan boshlab, urugʻchilik xoʻjaliklari va boshqa xoʻjaliklardan davlat resurslariga xarid qilinadigan urugʻlik don uchun amaldagi preyskurant xarid narxlariga nav ustamalari belgilangan.

2. Etishtirilgan boshoqli don ekinlari urugʻlarining hajmini aniqlash va ularni xarid qilish, shuningdek ular boʻyicha hisob-kitoblarni amalga oshirish Urugʻchilik fermer xoʻjaliklarida yetishtirilgan boshoqli don ekinlarining superelita va elita urugʻlarini toʻliq hajmda xarid qilish tartibi toʻgʻrisidagi nizomga (roʻyxat raqami 1789, 2008-yil 11-aprel) (Oʻzbekiston Respublikasi qonun hujjatlari toʻplami, 2008-y., 14-15-son, 115-modda) muvofiq amalga oshiriladi.

3. Urugʻchilik va boshqa xoʻjaliklardan davlat ehtiyojlari uchun boshoqli don ekinlari urugʻlarini don korxonalariga qabul qilish Urugʻlik donni qabul qilish, tayyorlash, dorilash, tarqatish va sifatini nazorat qilish tartibi toʻgʻrisidagi yoʻriqnomaga (roʻyxat raqami 1499, 2005-yil 29-iyul) (Oʻzbekiston Respublikasi qonun hujjatlari toʻplami, 2005-y., 30-31-son, 237-modda) muvofiq amalga oshiriladi.

4. Ajratmalar Oʻzbekiston Respublikasi Qishloq va suv xoʻjaligi vazirligi huzuridagi Qishloq xoʻjaligi ekinlari urugʻini sertifikatsiyalash va sifatini nazorat qilish davlat markazi (“Oʻzdavurugʻnazoratmarkaz”) tomonidan boshoqli don ekinlari urugʻlarining davlat standarti talablariga mos kelishi haqida sertifikat berilganidan soʻng davlat ehtiyojlari uchun xarid qilingan urugʻliklarning avlodlari boʻyicha toʻlanadigan ustamasidan jamgʻarilgan mablagʻning 3 foizigacha Don va dukkakli don ekinlari ilmiy tadqiqot institutining maxsus hisobvaragʻiga Oʻzbekiston Respublikasi Vazirlar Mahkamasining 2004-yil 6-avgustdagi 376-sonli qarori (Oʻzbekiston Respublikasi qonun hujjatlari toʻplami, 2004-y., 31-son, 358-modda) bilan tasdiqlangan “Oʻzdonmahsulot” aksiyadorlik kompaniyasining tarkibiga kiruvchi don mahsulotlari korxonalari va ularning filiallari roʻyxatida belgilangan tashkilotlar tomonidan oʻtkazib beriladi. “Oʻzdonmahsulot” aksiyadorlik kompaniyasi har yili Qishloq va suv xoʻjaligi vazirligi bilan birgalikda ustamadan ajratmalarni aniq miqdorini foizda kelishgan holda korxonalarga yetkazadi.

5. Don va dukkakli don ekinlari ilmiy tadqiqot institutining maxsus hisobvaragʻiga oʻtkazilgan, davlat resurslari uchun xarid qilingan urugʻliklarning avlodlari boʻyicha toʻlanadigan ustamadan jamgʻarilgan 3 foizgacha mablagʻ 100 foiz deb hisoblanib, quyidagi tartibda taqsimlanadi:

30 foizi — Don va dukkakli don ekinlari ilmiy tadqiqot institutining seleksiya va urugʻchilik sohasidagi ishlarini yaxshilash hamda uning moddiy-texnika bazasini mustahkamlash uchun;

50 foizi — Don va dukkakli don ekinlari ilmiy tadqiqot institutining hududiy filiallarining seleksiya va urugʻchilik sohasidagi ishlarini yaxshilash hamda uning moddiy-texnika bazasini mustahkamlash uchun;

10 foizi — boshoqli don ekinlarining mahalliy va xorijiy navlari urugʻini yetishtiruvchi ilmiy muassasalar – navlar originatorlarini, seleksiya va urugʻchilik sohasi olimlarini hamda urugʻlik sifatini taʼminlashda ishtirok etuvchi tashkilotlarni ragʻbatlantirish uchun;

10 foizi — boshoqli don urugʻchiligiga ixtisoslashgan xoʻjaliklarning rahbar va mutaxassislari malakasini oshirish, ularni zarur oʻquv qoʻllanmalar bilan taʼminlash, oʻquv-amaliy seminarlar tashkil etish xarajatlari uchun.

6. Don va dukkakli don ekinlari ilmiy tadqiqot institutining maxsus hisob varagʻiga oʻtkazilgan mablagʻning yillik xarajatlar smetasi Qishloq va suv xoʻjaligi vazirligi tomonidan tasdiqlanadi.

Tasdiqlangan xarajatlar smetasiga asosan mablagʻlar Don va dukkakli don ekinlari ilmiy tadqiqot institutining maxsus hisobvaragʻidan tegishli tashkilotlarga oʻtkazib beriladi.

7. Mazkur Nizom talablarining buzilishida aybdor shaxslar qonunchilik hujjatlarida belgilangan tartibda javobgarlikka tortiladilar.

8. Mazkur Nizom “Oʻzdonmahsulot” aksiyadorlik kompaniyasi bilan kelishilgan.

9. Mazkur Nizom Oʻzbekiston Fermer xoʻjaliklari uyushmasi va Oʻzbekiston Savdo-sanoat palatasi bilan kelishilgan.