O‘zbekiston Respublikasi Prezidentining “O‘zbekiston Respublikasi Tashqi iqtisodiy faoliyat milliy banki faoliyatini yanada takomillashtirish chora-tadbirlari to‘g‘risida” 2017-yil 13-noyabrdagi PQ-3383-son qaroriga muvofiq Vazirlar Mahkamasi qaror qiladi:

1. Quyidagilar:

O‘zbekiston Respublikasi Tashqi iqtisodiy faoliyat milliy banki Ustavi 1-ilovaga muvofiq;

O‘zbekiston Respublikasi Tashqi iqtisodiy faoliyat milliy banki kengashi (keyingi o‘rinlarda Kengash deb ataladi) tarkibi 2-ilovaga muvofiq tasdiqlansin.

2. O‘zbekiston Respublikasi Tashqi iqtisodiy faoliyat milliy banki ushbu qaror bilan tasdiqlangan Ustavning O‘zbekiston Respublikasi Markaziy bankida qonun hujjatlarida belgilangan tartibda ro‘yxatdan o‘tkazilishini ta’minlasin.

3. O‘zbekiston Respublikasi Hukumatining 3-ilovaga muvofiq ba’zi qarorlari o‘z kuchini yo‘qotgan deb hisoblansin.

4. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari S.R. Xolmuradov hamda O‘zbekiston Respublikasi Tashqi iqtisodiy faoliyat milliy banki boshqaruvi raisi A.K. Mirsoatov zimmasiga yuklansin.

1. Mazkur Ustav O‘zbekiston Respublikasi tashqi iqtisodiy faoliyat milliy bankining (keyingi o‘rinlarda Bank deb ataladi) maqomi, asosiy vazifalari, funksiyalari, huquq va javobgarligi, faoliyatini tashkil qilish tartibi, shuningdek, uning tomonidan amalga oshiriladigan operatsiyalarni belgilaydi.

2. O‘zbekiston Respublikasi Vazirlar Mahkamasi Bank muassisi (keyingi o‘rinlarda muassis deb ataladi) hisoblanadi.

3. Bank xo‘jalik yuritish huquqiga asoslangan unitar korxona shaklidagi yuridik shaxs hisoblanadi, mustaqil balansiga ega, o‘z nomidan huquqlarga egalik qiladi va majburiyatlar oladi, sudda da’vogar va javobgar bo‘ladi.

Bank xo‘jalik yuritish huquqida o‘ziga tegishli bo‘lgan mulkka egalik qiladi, undan foydalanadi va uni taqsimlaydi, shuningdek, qonunchilik va mazkur Ustavda belgilangan tartibda bank mulkiga kiradigan va bank faoliyatini amalga oshirish davomida olingan boshqa mulkka ham egalik qiladi.

4. Bank, uning filiallari va vakolatxonalari O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga, shuningdek, shtampga, o‘z nomi o‘zbek, ingliz va rus tillarida yozilgan blankalarga, o‘z emblemasiga ega.

O‘zbekiston Respublikasi Tashqi iqtisodiy faoliyat milliy bankining manzili: Toshkent shahri, Istiqbol ko‘chasi, 23.

Bankning elektron pochta manzili: info@central.nbu.uz va webmaster@central.nbu.uz.

Bankning firma nomi:

davlat tilida: to‘liq — O‘zbekiston Respublikasi Tashqi iqtisodiy faoliyat milliy banki, qisqartirilgani — “O‘zmilliybank”;

rus tilida: to‘liq — Natsionalniy bank vneshneekonomicheskoy deyatelnosti Respubliki Uzbekistan, qisqartirilgani — “Uznatsbank”;

ingliz tilida: to‘liq — National Bank for Foreign Economic Activity of the Republic of Uzbekistan, qisqartirilgani — NBU.

5. Bank o‘z faoliyatini tijorat asosida amalga oshiradi.

6. Bank belgilangan tartibda xorijiy mamlakatlarda — respublikaning iqtisodiy sheriklarida tashqi iqtisodiy faoliyat va ikki tomonlama munosabatlarni yanada rivojlantirish, buning asosida milliy ishlab chiqaruvchilar mahsulotlarining eksporti hajmlarini qo‘llab-quvvatlash va rag‘batlantirish maqsadida vakolatxonalar, filiallar, shu’ba banklar tashkil qiladi.

7. Bank Hukumat topshirig‘iga binoan boshqa davlatlar banklari, xalqaro moliya institutlari va boshqa moliya-kredit tashkilotlari bilan munosabatlarda O‘zbekiston Respublikasi manfaatlarini himoya qiladi.

8. Bank o‘z faoliyatida O‘zbekiston Respublikasi Konstitutsiyasiga, O‘zbekiston Respublikasi qonunlariga, O‘zbekiston Respublikasi Oliy Majlisi qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga hamda O‘zbekiston Respublikasining boshqa me’yoriy-huquqiy hujjatlariga, shuningdek, mazkur Ustavga amal qiladi.

9. Bank O‘zbekiston Respublikasi majburiyatlari bo‘yicha javob bermaydi, O‘zbekiston Respublikasi Bank majburiyatlari bo‘yicha, bunday majburiyatlarni o‘ziga qabul qilgan holatlardan tashqari, javob bermaydi.

10. Quyidagilar Bankning asosiy vazifalari hisoblanadi:

tashqi iqtisodiy faoliyatni amalga oshirish;

kichik biznes va xususiy tadbirkorlikni qo‘llab-quvvatlash;

chakana bank xizmatlari ko‘rsatish;

innovatsion va investitsion faoliyatni amalga oshirish.

11. Bank o‘ziga yuklangan vazifalarga muvofiq quyidagi funksiyalarni amalga oshiradi:

a) tashqi iqtisodiy faoliyat sohasida:

yetakchi xorijiy banklar va xalqaro moliya institutlari bilan hamkorlik aloqalarini faol rivojlantirishni, shu jumladan, amalga oshiriladigan loyihalarni birgalikda moliyalashtirish va o‘zaro hisob-kitoblar mexanizmining xorij amaliyotida keng qo‘llaniladigan usullarni joriy qilish yo‘li bilan amalga oshiradi;

iqtisodiyot tarmoqlariga ilg‘or texnologiyalarni joriy qilish, xomashyoni chuqur qayta ishlash, sanoat korxonalarini modernizatsiyalash va texnologik qayta qurollantirish, respublikaning eksport salohiyatini kengaytirishga qaratilgan loyihalarni moliyalashtirish uchun xorijiy kredit liniyalarini jalb qilishni ta’minlaydi;

xalqaro miqyosda Bank imijini oshirish va tashqi iqtisodiy faoliyatni, shu jumladan xorijiy mamlakatlarda vakolatxonalar, filiallar, shu’ba banklar ochish, xorijiy hamkorlar va tashqi iqtisodiy faoliyat subyektlari ishonchini mustahkamlash uchun bank ishini yuritish tajribasi va ilg‘or amaliyotini faol joriy qilish yo‘li bilan yanada rivojlantiradi;

eksport, import, valyuta operatsiyalari, shuningdek, boshqa xalqaro hisob-kitoblar bo‘yicha respublikaning xalqaro to‘lovlarini tashkil qiladi va o‘tkazadi, loyihalarni birgalikda moliyalashtirish va o‘zaro hisob-kitoblarni amalga oshirishning xorij amaliyotida keng qo‘llaniladigan mexanizmlarini joriy qiladi, tashqi iqtisodiy faoliyatni rivojlantiradi;

kreditlar, depozitlar, omonatlar, qarzlar, shuningdek, qonunchilik va xalqaro bank amaliyotiga muvofiq boshqa shakllarda xorijiy valyutadagi mablag‘larni jalb qiladi;

xorijiy davlatlar va xalqaro moliya institutlari bilan valyuta-moliyaviy hamda kredit-hisob-kitob munosabatlarini takomillashtiradi, ularning samaradorligini oshiradi, kreditlash va hisob-kitoblarning eng tejamkor va ilg‘or shakllarini qo‘llaydi;

xorijiy banklar, konsern, firma va boshqa hamkorlar aybi bilan shartnomani bajarishda to‘lanmagan mablag‘larni undirish bo‘yicha Bank mijozlariga yordam ko‘rsatadi;

xorijiy banklar bilan bevosita korrespondent munosabatlarini o‘rnatadi, ular va xalqaro moliya institutlari bilan hamkorlik munosabatlarini rivojlantiradi;

b) kichik biznes va xususiy tadbirkorlikni qo‘llab-quvvatlash sohasida:

respublikada kichik biznes va xususiy tadbirkorlikni rivojlantirishga yordam beradi, tadbirkorlik subyektlariga biznesni tashkil qilish, yuritish va kengaytirishda amaliy va moliyaviy yordam ko‘rsatadi;

kichik biznes va xususiy tadbirkorlik subyektlariga barcha turdagi bank xizmatlari, moliyaviy maslahat va axborot ko‘magi, shu jumladan yangi investitsion va innovatsion g‘oyalarni izlash va amalga oshirish, jahon bozorlarini tahlil qilish, ishlab chiqarilgan mahsulot eksportini moliyalashtirish masalalarida yordam ko‘rsatadi;

innovatsion tadbirkorlikni joriy qilishni, yangi tadbirkorlik tashabbuslari — startaplar — yoshlar, eng avvalo, oliy va o‘rta maxsus, kasb-hunar ta’limi muassasalari bitiruvchilarining loyihalarini faol qo‘llab-quvvatlaydi;

yangi investitsion va innovatsion g‘oyalarni izlash va amalga oshirish, jahon bozorlarini tahlil qilish, ishlab chiqarilgan mahsulot eksportini moliyalashtirish masalalarida amaliy, moliyaviy va axborot ko‘magi ko‘rsatadi;

v) chakana bank xizmatlari ko‘rsatish sohasida:

aholi va tadbirkorlik subyektlariga chakana bank xizmatlari ko‘rsatishni rivojlantiradi, mavjud xizmatlarni kengaytirish va takomillashtirish, kredit, moliya, kassa va boshqa bank xizmatlarining yangi shakllarini zamonaviy axborot-kommunikatsion va innovatsion texnologiyalarni keng qo‘llash yo‘li bilan joriy qiladi;

yetakchi xorijiy banklar va moliya institutlari tomonidan keng qo‘llaniladigan tadbirkorlik subyektlari uchun bank mahsulotlari va xizmatlarining yangi shakllarini ishlab chiqadi va joriy qiladi;

aholi va tadbirkorlar uchun xaridorgir bo‘lgan mahsulot va xizmatlarni joriy qilish maqsadida respublikaning moliya institutlari bilan faol hamkorlikni amalga oshiradi;

butunjahon axborot Internet tarmog‘i imkoniyatlari vositasida onlayn tartibida va plastik kartochkalar orqali bank xizmatlarini amalga oshirish mexanizmini takomillashtiradi;

chakana bank xizmatlarini rivojlantiradi, kengaytiradi va takomillashtiradi, shuningdek, yetakchi xorijiy banklar va moliya institutlari tomonidan keng qo‘llaniladigan yangi turdagi bank xizmatlari va mahsulotlarini joriy qiladi;

respublika moliya institutlari bilan hamkorlikni amalga oshiradi, butun jahon axborot Internet tarmog‘i imkoniyatlari vositasida onlayn tartibida va plastik kartochkalar orqali bank xizmatlarini amalga oshirish mexanizmini takomillashtiradi;

g) innovatsion va investitsion faoliyat sohasida:

eksportga yo‘naltirilgan va import o‘rnini bosuvchi ishlab chiqarishlarni tashkil qilish va rivojlantirish uchun milliy va xorijiy valyutada kreditlar berishni amalga oshiradi;

iqtisodiyot tarmoqlariga ilg‘or texnologiyalarni joriy qilish, xomashyoni chuqur qayta ishlash, sanoat korxonalarini modernizatsiyalash va texnologik qayta qurollantirish, respublikaning eksport salohiyatini kengaytirishga qaratilgan loyihalar va dasturlarni moliyalashtiradi;

innovatsion tadbirkorlikni joriy qilish, yoshlarning yangi tadbirkorlik tashabbuslarini amalga oshirishni qo‘llab-quvvatlaydi;

valyuta mablag‘larini to‘playdi;

ichki, xalqaro moliya bozorlariga valyuta mablag‘larini joylashtiradi.

Bank, shuningdek, qonunchilik doirasida, xalqaro bank amaliyotiga muvofiq milliy va xalqaro valyutada boshqa bank operatsiyalarini amalga oshiradi.

12. Bank o‘ziga yuklangan vazifa va funksiyalarni amalga oshirish uchun quyidagi huquqlarga ega:

O‘zbekiston Respublikasi Prezidenti va Vazirlar Mahkamasining qarorlariga muvofiq amalga oshiriladigan iqtisodiyotning ustuvor tarmoqlaridagi loyihalarni, shu jumladan belgilangan tartibda xo‘jalik jamiyatlariga investitsiyalar kiritish yo‘li bilan amalga oshirish;

ishonchnoma asosida xo‘jalik boshqaruvi organlarida va moliya organlarida tashkilot manfaatlarini himoya qilish;

kreditlanayotgan tashkilotlardan ularning to‘lov qobiliyatini tasdiqlovchi hisobotlar, balans va boshqa hujjatlarni olish;

Bank kreditlari ishtirokida amalga oshiriladigan qurilish, obyektlarni texnik qayta qurollantirish va boshqa faoliyat bo‘yicha loyiha qarorlarni ekspertizadan o‘tkazishni talab qilish;

kredit shartnomalarida ko‘zda tutilgan majburiyatlar buzilganda, noto‘g‘ri hisobotlar aniqlanganda kredit berishni to‘xtatish, berilgan kreditlarni muddatidan ilgari undirish;

aktiv va passiv operatsiyalarni yuritish uchun shartnoma asosida foiz stavkalarini belgilash, shuningdek, ko‘rsatilgan xizmatlar uchun komission mukofot miqdorlarini o‘rnatish;

xorijiy mamlakatlarda — respublikaning iqtisodiy sheriklarida belgilangan tartibda vakolatxonalar, filiallar, shu’ba banklar tashkil qilish;

O‘zbekiston Respublikasi Davlat budjeti mablag‘larini depozit sifatida jalb qilish;

yosh, istiqbolli, mutaxassislar hamda oliy va o‘rta maxsus ta’lim muassasalarining bitiruvchilariga moliyaviy yordam ko‘rsatish;

majburiyatlarni, shu jumladan soliqlar va boshqa majburiy to‘lovlar bo‘yicha, moliyaviy holatidan qat’i nazar, tashkil qilingan bo‘limlar bo‘yicha majburiyatlarni to‘lash.

Bank qonunchilikka muvofiq boshqa huquqlarga ham ega bo‘lishi mumkin.

13. Bank o‘ziga yuklangan vazifa va funksiyalarni samarali bajarish uchun javob beradi.

14. Xo‘jalik yuritish huquqi asosida o‘ziga tegishli bo‘lgan bank mulki pul mablag‘lari va bankka tegishli bo‘lgan bino, inshoot, uskuna, transport vositalari hamda boshqa qimmatliliklardan iborat bo‘ladi.

Bankning ko‘chmas mulki Bank kengashi qarori asosida sotilishi, ijaraga berilishi yoki boshqacha tarzda topshirilishi mumkin.

Bankning qolgan mulki, shu jumladan majburiyatlarni (Bank oldidagi qarzlarni) to‘lash hisobiga o‘tkazilgan mulk Bank kengashi tomonidan belgilangan tartibda sotilishi, ijaraga berilishi yoki boshqacha tarzda topshirilishi mumkin.

15. Bankning ustav kapitali 4.321.067.384.252,00 so‘mni (to‘rt trillion uch yuz yigirma bir milliard oltmish yetti million uch yuz sakson to‘rt ming ikki yuz ellik ikki so‘mni) tashkil qiladi.

16. Ustav kapitali maqsadli tushumlar, O‘zbekiston Respublikasi respublika budjeti mablag‘laridan va qonunchilikda taqiqlanmagan boshqa manbalardan shakllantiriladi va tegishli qaror bilan o‘zgartirilishi mumkin.

17. Bankda bank operatsiyalari bo‘yicha ehtimoliy zararlarni qoplash uchun mo‘ljallangan va sof foydaning olti foizi miqdorida ustav kapitalining ellik foiziga yetgunga qadar har yili ajratiladigan mablag‘lar hisobidan zaxira fondi shakllantiriladi.

18. Bank mulkini sotish va ijaraga berishdan tushgan mablag‘lar Bank ixtiyorida qoladi va ulardan Ustavdagi faoliyatga muvofiq mustaqil foydalanilishi mumkin.

19. Bankning kredit resurslari quyidagilar hisobidan shakllanadi:

ustav kapitali, zaxira va boshqa fondlar mablag‘lari;

Bank schyotlaridagi mijozlar mablag‘lari, shu jumladan muddatli omonat va depozitlar;

boshqa fond va banklarning, shu jumladan xorijiy, xalqaro moliya institutlari, xorijiy mamlakatlar kredit va qarzlari;

imzolangan shartnoma va kelishuvlarga muvofiq jalb qilingan tashkilotlar, shu jumladan, xorijiy tashkilotlar mablag‘lari;

qimmatli qog‘ozlar chiqarish natijasida olingan mablag‘lar;

muddatli va talab qilib olingungacha jalb qilingan fuqarolar omonatlari;

qonunchilikda taqiqlanmagan boshqa jalb qilingan mablag‘lar.

Bankning taqsimlanmagan foydasi kreditlash resursi sifatida ishlatilishi mumkin.

20. Bank qonunchilikka muvofiq kredit, moliya, hisob-kitob, kassa va boshqa bank xizmatlarini milliy va xorijiy valyutada ko‘rsatadi, shu jumladan:

boshqa davlatlar banklari, kredit va boshqa tashkilotlari bilan korrespondentlik munosabatlari o‘rnatish, eksport, import, nosavdo va boshqa operatsiyalar bo‘yicha xalqaro hisob-kitoblarni amalga oshirish tartibi va shartlari to‘g‘risida, bank schyotlarini yuritish tartibi to‘g‘risida, loyihalarni birgalikda amalga oshirish to‘g‘risida hamda mazkur Ustavda ko‘zda tutilgan boshqa operatsiyalarni amalga oshirish to‘g‘risida shartnomalar tuzadi;

xorijiy va xalqaro banklardan va boshqa tashkilotlardan xalqaro bank amaliyotida qo‘llanadigan shakllarda kredit va qarzlar oladi, shuningdek, olingan kredit va qarzlar bo‘yicha Bank veksellari, obligatsiyalari va boshqa majburiyatlari tarzida ta’minot taqdim qiladi;

Bankning tashqi iqtisodiy faoliyatni amalga oshiruvchi mijozlariga eksportga yo‘naltirilgan va import o‘rnini bosuvchi ishlab chiqarishlar uchun milliy va xorijiy valyutada kreditlar beradi;

banklarda, shu jumladan xorijiy banklarda pul mablag‘lari operatsiyalarini amalga oshirish va saqlash uchun korrespondentlik schyotlari ochadi;

milliy va xalqaro valyutada schyotlar va omonatlarga banklar, xalqaro va boshqa tashkilotlar, shuningdek, O‘zbekiston Respublikasi fuqarolaridan, xorijiy fuqarolardan mablag‘lar qabul qiladi va ularni qimmatli qog‘ozlar hamda badallarga joylashtiradi;

O‘zbekiston Respublikasi banklari, xorijiy va xalqaro banklar va boshqa moliya institutlari korrespondentlik schyotlarida bo‘lgan mablag‘larni tasarruf etish tartibini, ushbu schyotlarni ochish va yuritish tartibini hamda mablag‘larni Bank omonatlariga joylashtirish shartlarini shartnoma asosida belgilaydi;

O‘zbekiston Respublikasi hududida va undan tashqarida xorijiy valyutani sotish va sotib olish, boshqa valyuta qimmatliliklarini (cheklar, veksellar, akkreditivlar va shu kabilarni) xarid qilish va sotishni, shuningdek, valyuta qimmatliliklari bilan operatsiyalar va bitimlarni amalga oshiradi;

xorijda xalqaro bank amaliyotiga muvofiq xorijiy valyutani sotish va sotib olish (diling) hamda boshqa valyuta operatsiyalarini amalga oshiradi;

pul shaklidagi majburiyatlar ijrosini ko‘zda tutuvchi uchinchi shaxslar uchun topshiriq, kafolat va boshqa majburiyatlar beradi;

tovarlarni yetkazish va xizmatlar ko‘rsatishdan kelib chiqadigan talablarga huquqlarni xarid qiladi, bunday talablarni bajarish tavakkalchiligini, ushbu talablar inkassatsiyalarini (faktoringni) qabul qiladi;

uskunalar, hisob terminallari, bankomat, transport vositalari va boshqa mulkni xarid qiladi va ijaraga beradi;

mablag‘lar egasi va tasarrufchisining topshirig‘iga ko‘ra kapital qo‘yilmalarni moliyalashtiradi;

to‘lov hujjatlari va boshqa qimmatli qog‘ozlar chiqaradi;

davlat to‘lov hujjatlari va boshqa qimmatli qog‘ozlarni sotib oladi, sotadi va saqlaydi, ular bilan boshqa operatsiyalarni amalga oshiradi;

zamonaviy texnika va texnologiyalarni, kredit va elektron kartochkalarni joriy qilish, Bankni jahon banklararo telekommunikatsiyalar tarmog‘iga ulash yo‘li bilan Bank mijozlariga xizmat ko‘rsatish shakllarini takomillashtiradi;

qimmatbaho metallarni schyotlarga va omonatlarga jalb qiladi va joylashtiradi, ularni sotadi, sotib oladi va ham ichki, ham xalqaro bozorda tabiiy qimmatbaho metallar va toshlar bilan boshqa operatsiyalarni bajaradi;

ishontirish operatsiyalarini amalga oshiradi: mablag‘larni jalb qiladi va joylashtiradi, qimmatli qog‘ozlar va boshqa operatsiyalarni mijoz topshirig‘iga ko‘ra boshqaradi;

mijozlar va korrespondent banklar schyotlarini yuritadi;

mijozlar bilan tuzilgan shartnoma asosida xorijiy valyuta, qimmatbaho metallar, boshqa qimmatliliklarni saqlashga qabul qiladi;

bank faoliyati bilan bog‘liq maslahat va konsalting xizmatlari ko‘rsatadi;

qimmatbaho qog‘ozlar bilan savdolarda tuzilgan bitimlar natijalari bo‘yicha hisob-kitoblarni amalga oshiradi;

narx darajasi, qimmatli qog‘ozlarga talab va taklifni saqlash uchun market-meyker xizmatlari ko‘rsatadi;

zamonaviy, shu jumladan, bank schyotlariga masofaviy va kontaktsiz xizmatlar ko‘rsatishni ta’minlaydigan bank mahsulotlari va texnologiyalarini joriy qiladi;

qonunchilikka muvofiq boshqa bank operatsiyalarni amalga oshiradi.

21. Bankning mijozlar va boshqa hamkorlar bilan munosabatlari shartnoma asosida tashkil etiladi.

22. Bank muassisga hisobot beradi.

Muassis:

Bank Ustavini, unga o‘zgartirish va qo‘shimchalarni tasdiqlaydi;

Bank ustav kapitalini o‘zgartirish to‘g‘risida qaror qabul qiladi;

Bankni tugatish va qayta tashkil etish to‘g‘risida qaror qabul qiladi;

Bank faoliyati to‘g‘risidagi hisobotlarni eshitadi;

qonunchilikka muvofiq boshqa vakolatlarni amalga oshiradi.

23. Bank kengashi va Bank boshqaruvi Bankning boshqaruv organlari hisoblanadi.

24. Bank kengashi Bankning yuqori kollegial boshqaruv organi hisoblanadi, u beshta a’zodan, shu jumladan raisdan iborat bo‘ladi. Bank kengashi tarkibi O‘zbekiston Respublikasi Vazirlar Mahkamasi tomonidan tasdiqlanadi.

25. Bank kengashi majlislari yiliga kamida ikki marta o‘tkaziladi.

Bank kengashi majlisi, zarur hollarda, muassis tashabbusi bilan, O‘zbekiston Respublikasi Markaziy banki, Bank kengashi raisi, Bank kengashining ikki va undan ortiq a’zolari, Bank boshqaruvi, Bankning ichki audit xizmati rahbari, shuningdek, tashqi auditori tomonidan chaqirilishi mumkin.

Bank kengashi qarorlari qatnashadigan a’zolarning kamida to‘rtdan uch qismi ovoz berganda qabul qilinadi. Bank kengashi majlisida uning har bir a’zosi bir ovozga ega bo‘ladi.

Bank kengashi majlislari uning ro‘yxatdagi tarkibidan kamida yetmish besh foiz a’zo ishtirok etganda vakolatli sanaladi. Bunda kengash raisining majlisda ishtiroki majburiy hisoblanadi.

Bank kengashi o‘z faoliyatida O‘zbekiston Respublikasi qonunchiligiga va mazkur Ustavga amal qiladi.

Bank bank kengashiga belgilangan tartibda mukofot to‘laydi, shuningdek, xizmat safari, vakillik va boshqa xarajatlarni tasdiqlangan biznes-rejaga muvofiq amalga oshiradi.

26. Bank kengashi:

Bank faoliyatini (omonatchilar, kreditorlar va muassislar manfaatlarini himoya qilish maqsadida) nazorat qiladi, kreditlash va investitsiyalashning to‘g‘riligini tekshiradi;

Bankning adekvat kapitallashuvini ta’minlaydi;

Bank siyosatini shakllantiradi;

Bank Ustavi, unga qo‘shimcha va o‘zgarishlar loyihalarini O‘zbekiston Respublikasi Vazirlar Mahkamasiga tasdiqlash uchun kiritadi;

Bank ustav kapitalini o‘zgartirish to‘g‘risida takliflarni O‘zbekiston Respublikasi Vazirlar Mahkamasiga tasdiqlash uchun taqdim etadi;

Bank faoliyatining yillik natijalarini tasdiqlaydi;

Bank boshqaruvi taqdimnomasiga ko‘ra foydani taqsimlash, shuningdek, zararlarni qoplash tartibini tasdiqlaydi;

Bankning yillik biznes-rejasini tasdiqlaydi;

Bank boshqaruvi a’zolari tarkibini tasdiqlaydi, boshqaruv raisi va rais o‘rinbosarlari bundan mustasno;

kreditlash, aktivlar va passivlarni boshqarish, investitsiyalarni amalga oshirish, Bank mijozlariga yangi turdagi xizmatlar ko‘rsatish sohasidagi Bank siyosatining asosiy yo‘nalishlarini belgilaydi;

Bank boshqaruvi hisobotlarini, ichki audit xizmati rahbarining ma’ruzalarini eshitadi;

Bank bilan bog‘liq shaxslarga kredit taqdim qilish va kafolatlar berish to‘g‘risida qaror qabul qiladi;

qiymati bitim tuzish to‘g‘risida qaror qabul qilingan kunda Bank sof aktivlarining o‘n besh foizidan ortiqni tashkil etadigan bitimlar va bir nechta o‘zaro bog‘langan bitimlar tuzish to‘g‘risida qaror qabul qiladi;

qonunchilikda belgilangan tartibda Bankning ko‘chmas mulkini sotish, ijaraga berish va boshqacha tarzda topshirishni amalga oshirish to‘g‘risida qaror qabul qiladi (majburiyatlar va qarzlarni to‘lash hisobiga Bankka o‘tgan ko‘chmas mulk bundan mustasno);

majburiyat va qarzlarni to‘lash hisobiga Bank mulkiga o‘tgan mulkni sotish tartibini belgilaydi;

filiallar, vakolatxonalar, shu’ba banklarni (shu jumladan, chet ellarda) tashkil qilish, qayta tashkil qilish va tugatish to‘g‘risida qaror qabul qiladi, vakolatxonalar, shu’ba banklar ustav va nizomlarini tasdiqlaydi;

qonunchilikka va mazkur Ustavga muvofiq Bank kengashi vakolatlariga kiradigan boshqa masalalar bo‘yicha qarorlar qabul qiladi.

27. O‘n bitta a’zodan, shu jumladan boshqaruvga rahbarlik qiladigan raisdan iborat bo‘lgan boshqaruv Bankning ijro etuvchi organi hisoblanadi.

Bank boshqaruvi raisi va uning o‘rinbosarlari O‘zbekiston Respublikasi Vazirlar Mahkamasi tomonidan lavozimga tayinlanadi va lavozimdan ozod qilinadi.

Bank boshqaruvi raisi Bankning yuqori mansabdor shaxsi hisoblanadi. Bankning ushbu Ustavi bilan berilgan vakolatlarga muvofiq Bank faoliyatiga rahbarlik qiladi va Bankka yuklangan vazifalarning bajarilishi uchun shaxsan javob beradi.

Bank boshqaruvi raisi va uning o‘rinbosarlari bilan bir qatorda, Bankning tarkibiy bo‘linmalari rahbarlari boshqaruv tarkibiga kiradi.

28. Bank boshqaruvi:

Bankning operativ faoliyatini tashkil qiladi va amalga oshiradi, Ustav vazifalari, O‘zbekiston Respublikasi Prezidenti, Vazirlar Mahkamasi va Bank kengashi qarorlari ijrosini ta’minlaydi;

mazkur Ustavga muvofiq Bank kengashida va O‘zbekiston Respublikasi Vazirlar Mahkamasida ko‘riladigan masalalarni dastlab o‘rganib chiqadi, ular bo‘yicha tegishli materiallar, takliflar va qarorlar loyihalarini tayyorlaydi;

Bank filiali to‘g‘risidagi nizomni tasdiqlaydi;

boshqaruv ko‘rib chiqishiga kiritilgan boshqa masalalarni hal qiladi.

Bank boshqaruvi valyuta-moliya munosabatlari sohasida Hukumat siyosatini Bank tomonidan amalga oshirish, Bankni rivojlantirish va uning joriy faoliyatiga doir barcha masalalarni kollegiallik asosida va boshqaruv a’zolari fikrlarini hisobga olgan holda ko‘rib chiqadi.

Bank boshqaruvi qarorlari unda qatnashadigan a’zolarning kamida to‘rtdan uch qismi ular uchun ovoz berganda qabul qilingan hisoblanadi.

Bank boshqaruvi majlislari, agar unda boshqaruvning ro‘yxat bo‘yicha a’zolarining kamida yetmish besh foizi qatnashsa, vakolatli sanaladi. Majlislarda rais albatta ishtirok etishi kerak.

29. Bank boshqaruvi raisi:

Bank faoliyati masalalarini hal qiladi, mazkur Ustavga ko‘ra O‘zbekiston Respublikasi Vazirlar Mahkamasi, Bank kengashi va boshqaruvi vakolatiga tegishli masalalar bundan mustasno;

ishonchnomasiz Bank nomidan faoliyat yuritadi, barcha respublika tashkilotlari va organlarida Bank manfaatlarini ifodalaydi;

Bankning ko‘chmas mulkidan tashqari boshqa mulkini tasarruf etadi;

shartnomalar, shu jumladan, mehnat shartnomalari tuzadi;

ishonchnomalar beradi;

mablag‘larni, shu jumladan xayriya maqsadlari uchun tasarruf etish huquqidan foydalanadi, xizmat safari, vakillik va Bank kengashi a’zolari va xodimlarning boshqa xarajatlari me’yorlarini belgilaydi;

Bank, uning filiali va vakolatxonalarining shtat ro‘yxatlarini tasdiqlaydi;

mehnat haqini, Bank xodimlarining boshqa daromadlarini to‘lash shakli va miqdorlarini mustaqil belgilaydi;

xodimlarni, tarkibiy bo‘linmalardagi xodimlarni mukofotlash, Bank xodimlarining lavozim yo‘riqnomalari to‘g‘risidagi nizomlarni tasdiqlaydi;

Bankning barcha xodimlari uchun bajarish shart bo‘lgan buyruqlar chiqaradi va farmoyishlar beradi;

mini-banklarni tashkil qilish, shu jumladan ularni samarasiz faoliyati natijalari bo‘yicha tugatish to‘g‘risida qarorlar qabul qiladi;

Bank faoliyati bilan bog‘liq boshqa masalalarni ko‘rib chiqadi va hal qiladi.

30. Bankning sof foydasi O‘zbekiston Respublikasi Davlat budjetiga va davlat maqsadli jamg‘armalariga barcha soliqlar va majburiy to‘lovlar to‘langandan keyin Bank ixtiyorida qoladi va Bank kengashi tomonidan belgilanadigan tartibda ishlatiladi.

31. Bankda buxgalteriya hisobi va hisobot O‘zbekiston Respublikasi Markaziy banki tomonidan belgilangan qoidalarga muvofiq amalga oshiriladi. Bank Markaziy bankka O‘zbekiston Respublikasi Markaziy banki tomonidan belgilangan hajmda va muddatlarda buxgalteriya balansi, hisobotlar va boshqa materiallarni taqdim etadi.

32. Bank yillik balans, foyda va zararlar to‘g‘risidagi hisobotlarni, auditorlik tashkiloti ma’lumotlarning to‘g‘riligini tasdiqlagandan keyin, O‘zbekiston Respublikasi Markaziy banki tomonidan belgilanadigan shakllar va muddatlarda e’lon qiladi.

33. Bankning operatsion yili 1-yanvarda boshlanadi va 31-dekabrda tugaydi.

34. Bankning moliya-xo‘jalik faoliyatini nazorat qilish va tekshirish Bankning ichki audit xizmati, mustaqil auditorlik tashkilotlari, shuningdek, qonunchilikka muvofiq bunga vakolatli nazorat organlari tomonidan amalga oshiriladi.

35. Bank faoliyati qonun hujjatlariga muvofiq O‘zbekiston Respublikasi Hukumatining qaroriga binoan to‘xtatiladi.

1. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki to‘g‘risida” 1993-yil 21-yanvardagi 45-son qarorining 1-bandi, shuningdek, qarorga ilova.

2. Vazirlar Mahkamasining “O‘zbekiston Respublikasi Tashqi iqtisodiy faoliyat milliy bankining ustav sarmoyasini ko‘paytirish to‘g‘risida” 1996-yil 31-dekabrdagi 471-son qarorining 3-bandi, shuningdek, qarorga ilova.

3. Vazirlar Mahkamasining “Ustav sarmoyasida davlat ulushi 50 foizdan ortiq bo‘lgan tijorat banklari kengashlari raislarini tasdiqlash to‘g‘risida” 2000-yil 11-iyuldagi 265-son qarori.

4. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida” 2003-yil 28-fevraldagi 112-son qaroriga (O‘zbekiston Respublikasi QT, 2003-y., 2-son, 19-modda) ilovaning 1-bandi.

5. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki ustaviga o‘zgartirishlar kiritish to‘g‘risida” 2003-yil 3-noyabrdagi 480-son qarori.

6. Vazirlar Mahkamasining “O‘zbekiston Respublikasi hukumatining ayrim qarorlarini o‘z kuchini yo‘qotgan deb hisoblash hamda ba’zilariga o‘zgartirishlar kiritish to‘g‘risida” 2005-yil 22-fevraldagi 73-son qaroriga (O‘zbekiston Respublikasi QT, 2005-y., 2-son, 13-modda) 2-ilovaning 1-bandi.

7. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida” 2005-yil 10-avgustdagi 192-son qaroriga (O‘zbekiston Respublikasi QT, 2005-y., 8-son, 41-modda) 1-ilovaning 1-bandi.

8. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish haqida (O‘zbekiston Respublikasi Prezidentining “Qimmatli qog‘ozlar bozorini yanada rivojlantirish chora-tadbirlari to‘g‘risida” 2006-yil 27-sentabrdagi PQ-475-son qarori)” 2006-yil 9-noyabrdagi 234-son qaroriga (O‘zbekiston Respublikasi QT, 2006-y., 11-son, 85-modda) ilovaning 1-bandi.

9. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki Ustaviga o‘zgartirishlar kiritish to‘g‘risida (O‘zbekiston Respublikasi Prezidentining “Tijorat banklarining investitsiya loyihalarini moliyalashtirishga yo‘naltiriladigan uzoq muddatli kreditlari ulushini ko‘paytirishni rag‘batlantirish borasidagi qo‘shimcha chora-tadbirlar to‘g‘risida” 2009-yil 28-iyuldagi PQ-1166-son qarori)” 2009-yil 28-oktabrdagi 285-son qarori (O‘zbekiston Respublikasi QHT, 2009-y., 44-son, 469-modda).

10. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida (O‘zbekiston Respublikasi Prezidentining “O‘zbekiston Respublikasi Vazirlar Mahkamasining ijro etuvchi tuzilmasini qisman o‘zgartirish to‘g‘risida” 2009-yil 13-noyabrdagi PQ-1227-son qarori)” 2009-yil 28-dekabrdagi 336-son qaroriga (O‘zbekiston Respublikasi QHT, 2009-y., 52-son, 574-modda) ilovaning 1-bandi.

11. Vazirlar Mahkamasining “Davlat va xo‘jalik boshqaruvi organlari, mahalliy davlat hokimiyati organlari va boshqa tashkilotlarda xizmat yengil avtomobillaridan foydalanishni yanada tartibga solish bo‘yicha chora-tadbirlar to‘g‘risida” 2011-yil 26-maydagi 153-son qaroriga 2-ilovaning 61-pozitsiyasi.

12. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirishlar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘zbekiston Respublikasi Vazirlar Mahkamasining ijro etuvchi apparati tuzilmasiga qisman o‘zgartirish kiritish to‘g‘risida” 2011-yil 24-oktabrdagi PQ-1630-son hamda “O‘zbekiston Respublikasi Vazirlar Mahkamasi tuzilmasiga o‘zgartirish kiritish to‘g‘risida” 2012-yil 13-yanvardagi PQ-1686-son qarorlari)” 2012-yil 23-fevraldagi 48-son qaroriga (O‘zbekiston Respublikasi QT, 2012-y., 2-son, 11-modda) 1-ilovaning 1-bandi.

13. Vazirlar Mahkamasining “O‘zbekiston Respublikasi Tashqi iqtisodiy faoliyat milliy bankining Ustaviga o‘zgartirish va qo‘shimchalar kiritish to‘g‘risida” 2013-yil 23-yanvardagi 15-son qarorining (O‘zbekiston Respublikasi QHT, 2013-y., 4-son, 46-modda) 4 va 5-bandlari, shuningdek, qarorga 2-ilova.

14. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki kengashi tarkibini tasdiqlash to‘g‘risida” 2013-yil 6-sentabrdagi 242-son qarori (O‘zbekiston Respublikasi QHT, 2013-y., 37-son, 483-modda).

15. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki va uning shu’ba tuzilmalari faoliyati takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirishlar kiritish to‘g‘risida” 2014-yil 3-martdagi 44-son qaroriga (O‘zbekiston Respublikasi QT, 2014-y., 3-son, 15-modda) ilovaning 1-bandi.

16. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki va uning shu’ba tuzilmalari faoliyati takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 2015-yil 26-martdagi 70-son qaroriga (O‘zbekiston Respublikasi QHT, 2015-y., 12-son, 140-modda) ilovaning 1-bandi.

17. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida (O‘zbekiston Respublikasining “Qimmatli qog‘ozlar bozori to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida” 2015-yil 3-iyundagi O‘RQ-387-son hamda “Investitsiya va pay fondlari to‘g‘risida” 2015-yil 25-avgustdagi O‘RQ-392-son qonunlari)” 2015-yil 23-sentabrdagi 274-son qaroriga (O‘zbekiston Respublikasi QT, 2015-y., 9-son, 84-modda) ilovaning 1-bandi.

18. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki ustaviga o‘zgartirishlar kiritish to‘g‘risida” 2015-yil 18-dekabrdagi 367-son qarori (O‘zbekiston Respublikasi QHT, 2015-y., 51-son, 634-modda).

19. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasining “O‘zbekiston Respublikasining Budjet kodeksini tasdiqlash to‘g‘risida” 2013-yil 26-dekabrdagi O‘RQ-360-son hamda “Soliq va budjet siyosatining 2016-yilga mo‘ljallangan asosiy yo‘nalishlari qabul qilinganligi munosabati bilan O‘zbekiston Respublikasining Soliq kodeksiga o‘zgartish va qo‘shimchalar kiritish to‘g‘risida” 2015-yil 31-dekabrdagi O‘RQ-398-son qonunlari)” 2016-yil 26-apreldagi 122-son qaroriga (O‘zbekiston Respublikasi QT, 2016-y., 4-son, 28-modda) 1-ilovaning 4-bandi.

20. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish, shuningdek ba’zilarini o‘z kuchini yo‘qotgan deb hisoblash to‘g‘risida (O‘zbekiston Respublikasi Prezidentining “O‘zbekiston Respublikasi Xususiylashtirilgan korxonalarga ko‘maklashish va raqobatni rivojlantirish davlat qo‘mitasini tashkil etish to‘g‘risida” 2017-yil 18-apreldagi PF-5016-son Farmoni)” 2017-yil 16-avgustdagi 638-son qaroriga (O‘zbekiston Respublikasi QHT, 2017-y., 33-son, 863-modda) 1-ilovaning 68-bandi.

21. Vazirlar Mahkamasining “O‘zbekiston Respublikasi Tashqi iqtisodiy faoliyat milliy banki ustaviga o‘zgartirish va qo‘shimchalar kiritish to‘g‘risida” 2017-yil 30-sentabrdagi 776-son qarori.