Ўзбекистон Республикаси Президентининг «Қурилиш ва уй-жой коммунал хўжалиги соҳасида давлат назоратини самарали ташкил қилиш чора-тадбирлари тўғрисида» 2025 йил 14 апрелдаги ПФ-66-сон Фармони ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси тўғрисидаги низом 1-иловага мувофиқ;

Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг ҳудудий назорат қилиш инспекциялари тўғрисидаги намунавий низом 2-иловага мувофиқ;

Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси ходимларининг идоравий формали кийим-бошлари ва фарқлаш белгилари намуналари ҳамда тавсифи 3-иловага мувофиқ тасдиқлансин.

2. Ўзбекистон Республикаси Ҳукуматининг 4-иловага мувофиқ айрим қарорларига ўзгартириш ва қўшимчалар киритилсин.

3. Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ҳамда Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси бошлиғи С.Қ. Эшқувватов зиммасига юклансин.

1. Ушбу Низом Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг (кейинги ўринларда — Инспекция) мақоми, асосий вазифалари, функциялари, ҳуқуқлари ва жавобгарлиги, фаолиятини ташкил этиш, раҳбарларининг функционал вазифалари, ҳуқуқлари ва жавобгарлигини, шунингдек, ходимларини моддий рағбатлантириш тартибини белгилайди.

Инспекция ўз ваколатлари доирасида қурилиш-монтаж ишларининг сифати ва тасдиқланган лойиҳа ҳужжатларига мувофиқлиги (автомобиль йўллари ва йўл сунъий иншоотлари бундан мустасно), шунингдек, кўп квартирали уй-жой фондини бошқариш (хўжалик юритувчи субъектларнинг молиялаштириш манбаларидан қатъи назар, молия-хўжалик фаолиятига аралашмаган ҳолда), иссиқлик таъминотидан фойдаланиш, ичимлик суви таъминоти ва оқова сувларни чиқариб юбориш хизматини кўрсатиш ҳамда ундан фойдаланиш юзасидан давлат назорати ва текширувини амалга оширувчи мустақил республика ижро этувчи ҳокимият органи ҳисобланади.

2. Инспекция бевосита Ўзбекистон Республикаси Вазирлар Маҳкамасига (кейинги ўринларда — Вазирлар Маҳкамаси) бўйсунади ва ўз фаолияти тўғрисида ҳисобдор бўлади.

3. Инспекция ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, шунингдек, ушбу Низомга ва бошқа қонунчилик ҳужжатларига амал қилади.

4. Инспекция ўз фаолиятини республика ва маҳаллий ижро этувчи ҳокимият органлари, ҳуқуқни муҳофаза қилувчи органлар, хўжалик бирлашмалари ҳамда бошқа ташкилотлар билан ўзаро ҳамкорликда амалга оширади.

5. Инспекциянинг ўз ваколатлари доирасида қабул қилган қарорлари республика ва маҳаллий ижро этувчи ҳокимият органлари, бошқа ташкилотлар, мансабдор шахслар ва фуқаролар томонидан ижро этилиши мажбурий ҳисобланади.

6. Инспекция Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ҳамда бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, банк ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.

7. Инспекциянинг расмий номи:

а) давлат тилида:

тўлиқ номи — Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси;

қисқартирилган номи — Қурилиш ва коммунал хўжалиги назорати инспекцияси;

б) рус тилида:

тўлиқ номи — Инспекция по контролю в сфере строительства и жилищно-коммунального хозяйства при Кабинете Министров Республики Узбекистан;

қисқартирилган номи — Узстройкомхознадзор;

8. Инспекциянинг жойлашган манзили (почта манзили): Тошкент шаҳри Шайхонтоҳур тумани Абай кўчаси 6-уй.

9. Инспекция ҳудудий назорат қилиш инспекциялари (кейинги ўринларда — ҳудудий инспекциялар) фаолиятини ташкил этади, назорат қилади ва уларга умумий раҳбарлик қилади.

10. Қуйидагилар Инспекциянинг асосий вазифалари ҳисобланади:

тасдиқланган лойиҳа ҳужжатлари бўйича қурилиш-монтаж ишларининг амалга оширилишида ва қурилиш-монтаж ишлари тугалланган объектларнинг фойдаланишга қабул қилинишида (автомобиль йўллари ва йўл сунъий иншоотлари бундан мустасно) шаҳарсозлик тўғрисидаги қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар талабларига риоя этилиши юзасидан давлат назоратини амалга ошириш;

объектларда бино ва иншоотларнинг зилзилага бардошлилигига таъсир қилувчи, шунингдек, инсон саломатлиги ҳамда ҳаётига таҳдид солувчи сифатсиз қурилиш материаллари, конструкциялари ва буюмлари қўлланишининг олдини олиш;

буюртмачининг техник назорати ва лойиҳа ташкилотларининг муаллифлик назоратини, пудрат ташкилотининг ички назорат тизимининг ишлаши устидан давлат назоратини амалга ошириш ва мониторинг қилиш;

янги қурилаётган бино ва иншоотларнинг сейсмик жиҳатдан заифлигини баҳолаш, мавжуд бинолар ва иншоотларнинг инструментал-техник текширувдан шартнома асосида ўтказилишини таъминлаш ҳамда ҳудудий инспекцияларнинг синов лабораториялари фаолиятини мувофиқлаштириш;

ҳудудий инспекциялар томонидан қурилиш-монтаж ишларини бошлаш, қурилиш ишлари тугалланган объектдан фойдаланиш учун рухсатнома бериш бўйича ҳамда қурилиш объектларини онлайн кузатиш марказлари орқали келиб тушган маълумотларни таҳлил қилиш;

кўп квартирали уйларни бошқариш, уларга туташ ер участкаларини сақлаш ва улардан фойдаланишда техник фойдаланиш қоидалари ва нормаларига риоя этилишини назорат қилиш ҳамда мулкдорлар томонидан жойларнинг ўзбошимчалик билан қайта қурилишига ва қайта режалаштирилишига йўл қўймаслик;

кўп квартирали уйлардаги умумий мол-мулк ва унга туташ ер участкаларини мавсумий фойдаланишга тайёрлаш бўйича бажарилган таъмирлаш-тиклаш ишларининг манзилли дастурларига мувофиқлиги устидан амалга ошириладиган назорат ишларини мувофиқлаштириш;

кўп квартирали уйларни бошқариш фаолиятини амалга ошириш қоидаларига риоя этилишида давлат назоратини мувофиқлаштириш;

кўп квартирали уйларни бошқариш органлари ва жойлар мулкдорлари томонидан иссиқлик таъминотидан фойдаланишда норматив-ҳуқуқий ҳужжатлар талабларига риоя этилиши устидан давлат назоратини амалга ошириш;

кўп квартирали уйларнинг сейсмик мустаҳкамлиги ва зилзилага бардошлилиги мониторингини мувофиқлаштириш;

ичимлик сувини самарали ишлаб чиқариш, етказиб бериш, реализация қилиш, ичимлик сувидан оқилона фойдаланиш, шунингдек, оқова сувларни чиқариб юбориш ва тозалаш бўйича хизмат кўрсатиш соҳасида техник жиҳатдан тартибга солиш соҳасидаги норматив ҳужжатлар ҳамда бошқа қонунчилик ҳужжатлари талабларига риоя этилишини назорат қилиш;

ичимлик сувини ишлаб чиқариш учун мўлжалланган ер ости сувлари қудуқларининг техник ҳолати ва улардан фойдаланиш шартларига ҳамда қазишнинг (бурғилашнинг) белгиланган қоидаларига риоя этилишини назорат қилиш;

оқова сувларни чиқариб юбориш тармоқларидаги ва тозалаш иншоотларидаги оқова сувлар таркибида ифлослантирувчи моддаларнинг рухсат этилган меъёрлар даражасида чиқариб юборилиши ҳамда тозаланиши устидан давлат назоратини амалга ошириш;

ичимлик суви таъминоти ва оқова сувларни чиқариб юбориш тизими объектларининг технологик аудитдан ўтказилиши юзасидан назоратни мувофиқлаштириш;

истеъмолчиларнинг ичимлик суви таъминоти ва оқова сувларни чиқариб юбориш бўйича хизматлар билан қамраб олиниши устидан давлат назоратини амалга ошириш.

11. Инспекция ўзига юкланган вазифаларни бажариш учун қуйидаги функцияларни амалга оширади:

тасдиқланган лойиҳа ҳужжатлари бўйича шаҳарсозлик субъектлари (буюртмачи, лойиҳа ва пудрат ташкилотлари) томонидан қурилиш жараёнини қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатларга риоя этилишида ҳудудий инспекциялар томонидан амалга ошириладиган назорат тадбирларини мувофиқлаштиради;

ҳудудий инспекцияларда рўйхатдан ўтган қурилиш-монтаж ишларининг бажарилишида қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар талабларига риоя этилиши бўйича таъсирчан назоратни ўрнатади;

жисмоний ва юридик шахслар томонидан қурилишда қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатларга риоя этишлари юзасидан назорат ўрнатилишида таҳлилий маълумотларни юритади;

ҳудудий инспекцияларда рўйхатдан ўтган қурилиш объектларида қурилиш материаллари, буюмлари, конструкциялари ва бажарилаётган қурилиш-монтаж ишлари сифатини текшириш учун шаҳарсозлик фаолияти субъектларидаги лойиҳа, технологик ва ижро ҳужжатлари, шунингдек, бошқа зарур маълумотларни белгиланган тартибда ўрганади;

қурилиш объектларидаги авариялар ҳолатларини текшириш бўйича идоралараро комиссиялар ишида иштирок этади;

қурилиш объектларида буюртмачининг техник, лойиҳа ташкилотларида муаллифлик ва пудрат ташкилотида ички назорат амалга оширилиши бўйича ҳудудий инспекциялар фаолиятини назорат қилади;

объектларни қуриш ва реконструкция қилишда тегишли мутахассислар бириктирилгани ёки ушбу фаолият турини амалга ошириш ҳуқуқига эга бўлган юридик шахснинг шартнома асосида жалб қилингани ҳамда уларнинг қонунчилик ҳужжатларида белгиланган тартибда сертификатга эгалигини ўрганади;

сейсмик фаол зоналарда қурилиши режалаштирилаётган барча турдаги бинолар ва иншоотларнинг, шунингдек, кўп квартирали турар жойларнинг сейсмик жиҳатдан заифлигини баҳолаш учун зарур бўлган ахборотни ўз ичига олган электрон техник паспортларнинг буюртмачилар томонидан расмийлаштирилишини мувофиқлаштиради;

ҳудудий инспекцияларда рўйхатдан ўтиб қурилаётган бинолар ва иншоотларнинг зилзилага бардошлилигини таъминлаш, зарур ҳолларда инструментал-техник текширувдан ўтказиш ҳамда зилзилага бардошлилигини таъминлаш бўйича бажарилган ишларни ўрганади;

ҳудудий инспекцияларнинг синов-лабораторияларининг иш юритиш фаолиятини ҳамда хизмат кўрсатиш соҳасида амалга оширилган ишларни мувофиқлаштиради;

қурилиш-монтаж ишларини бошлаш, қурилиш-монтаж ишлари тугалланган объектдан фойдаланиш учун рухсатнома бериш тартибига риоя этилишини ўрганади;

қурилиш объектларини онлайн кузатиш марказларига мобил видеокамералар (бодикамера), махсус планшетлар ва қурилиш объектларидаги видеокамералардан келиб тушган маълумотларнинг тезкор таҳлил қилингани ҳамда натижасига кўра тегишли чоралар кўрилганлигини ўрганади;

мавжуд кўп квартирали уйлардаги таянч ва (ёки) тўсиқ конструкцияларни техник жиҳатдан тартибга солиш соҳасидаги норматив ҳужжатларни бузган ҳолда ўзгартириш ва (ёки) реконструкция қилиш, бузиш ҳамда бинонинг зилзилага бардошлилигига салбий таъсир қиладиган ишларни бажаришга йўл қўйилмаслиги устидан амалга оширилган назорат тадбирларини мувофиқлаштиради;

кўп квартирали уйлар ва уларга туташ ер участкаларидан фойдаланишда техник фойдаланиш қоидалари ва нормалари талабларига амал қилинишини юзасидан таҳлилий маълумотларни юритади;

кўп квартирали уйларда ва унга туташ ер участкаларида ўзбошимчалик билан иморатлар (иншоотлар) қуришга йўл қўйилмаслиги устидан давлат назоратини амалга оширади;

кўп квартирали уй-жой фондини бошқариш, жумладан, муҳандислик тармоқлари, кўп квартирали уйлар ускуналаридан фойдаланиш, авария ҳолатларининг бартараф этилишини тизимли ташкил этиш юзасидан мониторинг юритади;

кўп квартирали уйлардаги умумий мулк ва унга туташ ер участкаларида давлат дастурлари асосида амалга оширилган таъмирлаш-тиклаш ишларининг бажарилишини мониторинг қилади;

умумий фойдаланиладиган жойлар, фасадлар, уйларнинг ички муҳандислик коммуникацияларини таъмирлаш-тиклаш ишларини тизимли ўтказиш қоидаларига риоя этилишини ўрганади;

жойлар мулкдорларига ҳисоботларнинг белгиланган шартлар, тартиб ва муддатларда бериб борилишини мониторинг қилади ва улар юзасидан ўтказиладиган назорат тадбирларини мувофиқлаштиради;

умумий мол-мулкни сақлаш ва таъмирлаш учун хизматлар ҳамда ишлар шакллантирилганлиги ва белгиланган тартибда тасдиқланганлиги юзасидан ўтказилган ўрганиш ишларини мувофиқлаштиради;

кўп квартирали уйларни «Биллинг» тизими орқали бошқариш, мукаммал ва жорий таъмирлаш ишларини амалга ошириш, шунингдек, авария-диспетчерлик хизматларини ташкил этиш ва кўрсатиш чоралари таъминлангани юзасидан ўтказиладиган назорат ишларини мувофиқлаштиради;

олти ойда бир марта кўп квартирали уйлардаги таянч ва тўсиқ конструкцияларнинг бутлигини хатловдан ўтказиш чоралари таъминлангани устидан давлат назоратини мувофиқлаштиради;

кўп квартирали уйларни бошқариш ҳуқуқини берувчи малака сертификатининг мавжудлигини ўрганиш бўйича амалга ошириладиган назорат тадбирини мувофиқлаштиради;

уй ичидаги иссиқлик тармоқларига ўзбошимчалик билан уланиб олиш, иссиқлик ва иссиқ сув таъминотининг уй ичидаги тизимларига ўзгартиришлар киритиш ҳолатини мониторинг қилади ва ушбу ҳолат юзасидан ўтказиладиган давлат назорати тадбирини мувофиқлаштиради;

уйнинг иситиш асбобларини ўзбошимчалик билан демонтаж қилиш орқали иситиш тизимидан узиб қўйиш ҳолати юзасидан ўтказиладиган давлат назорати тадбирини мувофиқлаштиради;

кўп квартирали уйларни бошқариш органлари томонидан иситиш тизимидан иссиқлик манбаини чиқариб ташлаш ҳолатларини бартараф этиш юзасидан амалга ошириладиган давлат назорати ишларини мониторинг қилади ва мувофиқлаштиради;

уй ичидаги иссиқлик энергиясидан унинг бевосита вазифасидан (иситиш, иссиқ сув таъминоти) бошқа мақсадда фойдаланиш ҳолати юзасидан ўтказиладиган назорат тадбирларини мувофиқлаштиради;

уй ичидаги иситиш тизимини гидравлик пресслаши ва кейинчалик уни тармоқдаги сув билан тўлдирган ҳолда ювиш ишлари таъминланганлигини аниқлаш юзасидан ўтказиладиган назорат тадбирларини мувофиқлаштиради;

иситиш тизимидан тармоқ сувининг оқиши ва чиқиб кетишининг олдини олишни таъминлаш мақсадида кўрилган чоралар юзасидан ўтказиладиган назорат ишларини мувофиқлаштиради;

кўп квартирали уйларнинг сейсмик мустаҳкамлиги ва зилзилага бардошлилигини аниқлаш бўйича визуал тартибда ўтказиладиган хатлов ишларини мувофиқлаштиради;

кўп квартирали уйларнинг сейсмик мустаҳкамлиги ва зилзилага бардошлилиги ҳолати юзасидан ўтказилган хатлов натижалари тўғрисидаги маълумотларни умумлаштиради;

таҳлил натижаларига асосан эксплуатация муддатини ўтаб бўлган сейсмик заиф ва авария аломатлари аниқланган кўп квартирали уйлар ўрнида босқичма-босқич янги уй-жойлар қуриш бўйича таклифларни ишлаб чиқиб, маҳаллий ижро этувчи ҳокимият органларига киритиб боради;

ичимлик суви таъминоти ва оқова сувларни чиқариб юбориш тизимларига уланишда техник шартлар талабларига риоя этилиши, шунингдек, ичимлик суви ва оқова сув тармоқларига ўзбошимчалик билан уланишнинг олдини олиш чораларини кўради;

истеъмолчилар томонидан ичимлик суви таъминоти ва оқова сувларни чиқариб юбориш хизматларидан фойдаланишга оид талабларга амал қилинишини мониторинг қилади;

ичимлик суви таъминоти ва оқова сувларни чиқариб юбориш тармоқларидаги ва бошқа иншоотлардаги авариялар бартараф этилишини, улар юзага келишининг олдини олиш бўйича ишлаб чиқилган чора-тадбирлар бажарилишини назорат қилади;

ичимлик сувининг технологик жиҳатдан сарфланиши ва йўқотилишининг йўл қўйиладиган нормаларига риоя этилиши устидан давлат назорати амалга оширилишини таъминлайди;

ичимлик суви таъминоти ва оқова сувларни чиқариб юбориш соҳасида хизмат кўрсатиш қоидаларига амал қилинишини назорат қилади;

ичимлик суви таъминоти ташкилотлари томонидан иншоотларда ичимлик сувининг технологик ҳисоби юритилиши таъминланганлигини ва ҳисоблаш ускуналари ишлашини назорат қилади;

ичимлик суви таъминоти ташкилотлари томонидан ичимлик сувини йўқотишларнинг белгиланган меъёрларига риоя этилиши назорат қилинишини таъминлайди;

манфаатдор вазирликлар ва идоралар билан биргаликда ташкилий-ҳуқуқий шаклидан қатъи назар, сув таъминоти ташкилотлари томонидан аҳолига етказиб берилаётган ичимлик сувининг сифати, стандартлар ва белгиланган талабларга жавоб бериши устидан назоратни мувофиқлаштиради;

ичимлик суви таъминоти ташкилотлари томонидан истеъмолчиларга етказиб берилаётган ичимлик сувининг сифати, сувни тозалаш, зарарсизлантириш ускуналари билан таъминланганлиги ва белгиланган талабларга мувофиқлигини ўрганади;

ичимлик суви эҳтиёжлари учун ер ости сувларидан фойдаланишда техник жиҳатдан тартибга солиш соҳасидаги норматив ҳужжатлар талаблари бажарилиши устидан таъсирчан назорат ўрнатади;

ичимлик суви эҳтиёжлари учун ер ости сув қудуқларини қазишнинг белгиланган қоидаларини ва технологиясига риоя этилиши устидан давлат назоратини амалга оширади;

оқова сувларни тозалаш иншоотларидаги оқова сувлар таркибидаги ифлослантирувчи моддаларни рухсат этилган меъёрлар даражасида тозаланиши устидан давлат назорати амалга оширилишини таъминлайди;

оқова сувларни чиқариб юбориш тармоқларига меъёрдан ортиқ ифлослантирилган оқова сувларни оқизганлик ва оқова сувларни чиқариб юбориш тармоқларидан фойдаланиш қоидаларининг бошқача тарзда бузилиши ҳолатларига чора кўрилиши юзасидан давлат назоратини амалга оширади;

ичимлик суви таъминоти ва оқова сувларни чиқариб юбориш тизими таркибидаги объектлар ва тармоқларнинг самарадорлигини ошириш (техник жараён ва энергияни тежаш) бўйича технологик аудитдан ўтказилиши юзасидан назоратни таъминлайди;

инвестиция дастурлари ва бошқа дастурлар асосида ичимлик суви таъминоти ва оқова сув объектларида амалга оширилган қурилиш, реконструкция ва модернизация ишлари натижасида истеъмолчиларнинг сув таъминоти ва оқова сувларни чиқариб юбориш хизматлари билан қамраб олиниши ҳамда ташкилий-ҳуқуқий шаклидан қатъи назар, сув таъминоти ташкилотлари билан истеъмолчилар ўртасида шартномавий муносабатлар йўлга қўйилгани устидан давлат назоратини амалга оширишни таъминлайди.

12. Инспекция қонунчилик ҳужжатларига мувофиқ бошқа функцияларни ҳам амалга ошириши мумкин.

13. Инспекция ўзига юкланган вазифалар ва функцияларни бевосита ҳамда ҳудудий инспекциялар орқали амалга оширади.

14. Инспекция ўзига юкланган вазифалар ва функцияларни амалга оширишда қуйидаги ҳуқуқларга эга:

а) объектларда ўтказиладиган текширишларни ташкил этиш соҳасида:

ташкилий-ҳуқуқий шаклидан қатъи назар, давлат назоратини амалга ошириш юзасидан ваколат доирасига кирувчи масалаларда белгиланган тартибда текширув ўтказиш;

тадбиркор ҳамда ҳудудий инспекциялар ўртасида шартнома (оммавий оферта) тузилган тадбиркорлик субъектларининг қурилиш объектларида қисқа муддатли давлат қурилиш назорати тадбирларини шартнома шартлари доирасида «Ягона давлат назорати» ахборот тизимида рўйхатдан ўтказмаган ҳолда амалга ошириш;

«хавфни таҳлил этиш» тизими доирасида тадбиркорлик субъектларининг қонунчилик ҳужжатларини бузиш хавфи даражасидан келиб чиқиб, текширувни ташаббус қилиш;

давлат назоратини амалга оширишда жисмоний ва юридик шахслардан, шунингдек, ўз ваколатига кирувчи масалаларни ҳал этиш учун зарур бўлган маълумотларни вазирликлар, идоралар, хўжалик бирлашмалари, маҳаллий ижро этувчи ҳокимият органлари ҳамда ташкилотлардан белгиланган тартибда олиш;

ҳудудий инспекциялар томонидан ўтказилган назорат тадбирлари бўйича таҳлилий маълумотларни юритиш;

назорат ишларини электрон тизим ҳамда қурилиш объектларини онлайн кузатиш марказлари орқали таҳлил қилиш, умумлаштириш ва мониторинг қилиб бориш, шунингдек, уларнинг натижалари бўйича ҳудудий инспекцияларга тегишли кўрсатмалар бериш;

ўз функционал вазифалари ва функцияларини бажариш учун кўп квартирали уйлардаги хонадонларга мулкдорни олдиндан хабардор қилган ҳолда, унинг розилиги асосида кўп квартирали уйларни бошқариш органи билан бирга кириш;

б) ўтказилган текширишларнинг натижадорлигини таъминлаш соҳасида:

қуйидаги ҳолатларда жисмоний ва юридик шахсларга нисбатан бажарилиши мажбурий бўлган ёзма кўрсатмалар киритиш:

бино ва иншоотларнинг зилзилага бардошлилигига таъсир қилувчи, шунингдек, инсон саломатлиги ва ҳаётига таҳдид солувчи конструктив бузилишлар аниқланган ҳолатларда, қурилиш-монтаж ишларини тўхтатиб туриш ва демонтаж (буздириш) ишларини амалга оширишни талаб қилиш бўйича;

кўп квартирали уйларни бошқариш органларига ва мулкдорларига кўп квартирали уйларни бошқариш фаолиятини амалга ошириш ҳамда уйлардан техник фойдаланиш қоидалари ва нормаларига, санитария нормалари, қоидалари ва гигиена нормативларининг ҳамда шаҳарсозлик нормалари ва қоидаларига мувофиқ кўп квартирали уйларга туташ ер участкасини сақлашга доир талабларнинг бузилиш ҳолатларини ўн беш кун муддатда бартараф этиш бўйича;

кўп квартирали уйларнинг конструктив қисмларининг таянч қобилиятини ҳамда зилзилага бардошлилигини бузадиган, шунингдек, инсон ҳаёти, соғлиғи ёки мол-мулкига ва атроф-муҳитга зарар етказилиши ҳамда таҳдид солувчи ўзбошимчалик билан амалга оширилаётган ўзгартириш ва реконструкция ишлари аниқланган ҳолларда, уларни тўхтатиш ва уларнинг оқибатларини ўттиз кун муддатда ихтиёрий равишда бартараф этиш бўйича;

ичимлик суви таъминоти ва оқова сувларни чиқариб юбориш соҳасида аниқланган ҳуқуқбузарликларни бартараф этиш бўйича;

ер ости сувларидан самарасиз фойдаланиш ҳолатлари аниқланганда ер ости сувларини олишни тўхтатиш ёки бу борада ажратилган лимитни белгиланган тартибда қисқартириш бўйича;

Инспекция ўз ваколатлари доирасида:

маҳаллий ижро этувчи ҳокимият органларига ва махсус ваколатли давлат органининг ҳудудий бўлинмаларига шаҳарсозлик тўғрисидаги қонунчилик ҳужжатларини бузган ҳолда қабул қилинган қарорларни бекор қилиш ҳақида;

шаҳарсозлик фаолиятини амалга оширишга доир лицензияларнинг ҳамда рухсат берувчи ҳужжатларнинг амал қилишини тўхтатиб туриш, тугатиш ёки уларни бекор қилиш тўғрисидаги масалани ҳал этиш учун тегишли давлат органлари ҳамда ташкилотларга қонунчилик ҳужжатларида белгиланган тартибда;

бинолар ва иншоотларнинг зилзилага бардошлилигига таъсир қилувчи, шунингдек, инсон ҳаёти ва соғлиғига таҳдид солувчи сифатсиз қурилиш материаллари, конструкциялари ҳамда буюмлари қўлланилгани аниқланган ҳолларда, қурилиш материалларини, конструкцияларини ва буюмларини ишлаб чиқаришни, реализация қилиш ҳамда қўллашни тўхтатиб туриш ҳақида тегишли давлат органлари ва ташкилотларга;

давлат органлари ва ташкилотлари ҳамда хўжалик бирлашмалари ва бошқа ташкилотларга кўп квартирали уй-жой фондини бошқариш ҳамда ичимлик суви таъминоти ва оқова сувларни чиқариб юбориш соҳасида ҳуқуқбузарликларни бартараф этиш бўйича тақдимномалар киритади;

ичимлик суви таъминоти ва оқова сувларни чиқариб юбориш хизматларини кўрсатиш ва улардан фойдаланиш бўйича ишларни кўриб чиқиш учун суд мажлисида ёки процессуал ҳаракатларда эксперт, мутахассис сифатида иштирок этиши ва хулосалар бериши мумкин;

сув таъминоти ташкилотларининг «Биллинг» тизимидаги истеъмолчиларнинг манзили ва сони, сув ҳисоблагичлари кўрсаткичлари, сарфланган сув миқдори ва қарздорлик, оқова сувларни чиқариш, янги қамраб олинган истеъмолчилар тўғрисида ва бошқа маълумотлардан фойдаланади;

қуйидаги ҳолатларда судларга даъво аризалари киритади:

давлат органлари ва ташкилотлари ҳамда бошқа ташкилотларга нисбатан кўп квартирали уйларни бошқариш, иссиқлик таъминотидан фойдаланиш ҳамда ичимлик суви таъминоти ва оқова сувларни чиқариб юбориш соҳасида ҳуқуқбузарликларни бартараф этиш бўйича;

ҳудудий инспекциядан рўйхатдан ўтган ва тасдиқланган лойиҳа ҳужжатларига риоя қилмаган ҳолда қурилиш ишларини бажарганлик ҳолати аниқланганда, қурилиш-монтаж ишларини тўхтатиб қўйиш, демонтаж ёки буздириш ишларини амалга ошириш тўғрисида;

ўтказилган текширув натижасида аниқланган қонунбузарликларни бартараф этишга доир кўрсатмалар талаблари бажарилмаган ҳолатларда жисмоний ёхуд юридик шахс фаолиятини қисман ёки тўлиқ тўхтатиш ёхуд тақиқлаш тўғрисида;

инспекция манфаатларини ҳимоя қилиш мақсадида;

норматив-ҳуқуқий базани янада такомиллаштириш бўйича тегишли ҳужжатларни ишлаб чиқади ёки бошқа ваколатли органлар билан ишлаб чиқишда иштирок этади;

Инспекция ва ҳудудий инспекциялар фаолиятида фойдаланиши учун услубий ва методик қўлланмалар, йўриқномалар ишлаб чиқади ва тасдиқлайди;

қурилиш соҳасида ва кўп квартирали уй-жой фондини бошқариш ҳамда ичимлик суви таъминоти ва оқова сувларни чиқариб юбориш соҳасида давлат назоратини амалга ошириш юзасидан электрон ахборот тизимини ташкил этади;

Инспекция ва ҳудудий инспекцияларда қурилиш объектларини онлайн кузатиш марказлари фаолиятини ташкил этади;

Инспекция ва ҳудудий инспекциялар ходимларини тайёрлаш, қайта тайёрлаш ва уларнинг малакасини узлуксиз оширишни ташкил этади;

хорижий давлатлар мутахассисларини жалб қилган ҳолда тажриба алмашиш ҳамда Инспекция ва ҳудудий инспекциялар ходимларининг хорижий мамлакатларда малакасини оширишни ташкил этади;

ходимларни қонунчилик ҳужжатларида белгиланган тартибда аттестациядан ўтказишни ва уларнинг натижаларига кўра тегишли махсус гувоҳномалар беришни ташкил этади;

қурилиш, уй-жой фондини бошқариш ва ичимлик суви таъминоти ҳамда оқова сувларни чиқариб юбориш масалалари бўйича ўқув-семинарларни ташкил қилади ва ўтказади.

15. Инспекция ҳуқуқбузарлик ҳолати бўйича эътироз билдирилганда ишни кўриб чиқиш учун судга тақдим этиш тартибини сақлаб қолган ҳолда, қонунчилик ҳужжатларининг бузилишига оид маъмурий ҳуқуқбузарликлар тўғрисидаги ишларни кўриб чиқади.

16. Кўп квартирали турар жойни нотурар жой тоифасига ёки кўп квартирали нотурар жойни турар жой тоифасига ўтказишга рухсатнома беришда хулоса беради.

17. Инспекция:

унга юкланган вазифалар ва функцияларни самарали бажариш, шунингдек, қурилиш, кўп квартирали уй-жой фондини бошқариш, иссиқлик таъминотидан фойдаланиш ҳамда ичимлик суви таъминоти ва оқова сувларни чиқариб юбориш хизмати соҳасида давлат назоратини самарали амалга ошириш;

Вазирлар Маҳкамасига Инспекция томонидан киритиладиган норматив-ҳуқуқий ҳужжатлар ва бошқа ҳужжатлар лойиҳалари, шунингдек, Инспекция томонидан қабул қилинадиган қарорларнинг сифати ва пировард натижалари учун жавобгардир.

18. Қуйидагилар Инспекция бошлиғининг асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Инспекция фаолиятига умумий раҳбарлик қилиш, Ўзбекистон Республикаси Президентининг тегишли ҳужжатлари, Вазирлар Маҳкамасининг қарорлари ва бошқа қонунчилик ҳужжатлари билан Инспекцияга юкланган вазифа ва функциялар бажарилишини ташкил этиш;

Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган Инспекция фаолиятини янада такомиллаштириш бўйича концепциялар, комплекс дастурлар ва комплекс чора-тадбирлар ижросини танқидий ва чуқур таҳлил қилиш;

бошлиқ ўринбосарлари ва таркибий тузилмалар раҳбарларининг ваколатларини белгилаш ва вазифаларини тақсимлаш;

Инспекция фаолияти режалаштирилишини ташкил этиш, Инспекциянинг даврий иш режаларини тасдиқлаш, уларнинг бажарилиши юзасидан назоратни таъминлаш;

Ўзбекистон Республикаси Президенти Администрациясининг тегишли таркибий бўлинмалари ва Вазирлар Маҳкамаси, шунингдек, тегишли республика ва маҳаллий ижро этувчи ҳокимият органлари ҳамда бошқа ташкилотлар билан Инспекция фаолияти соҳасига кирадиган масалалар бўйича ўзаро ҳамкорлик қилиш, Вазирлар Маҳкамаси ва унинг Раёсати мажлисларида масалаларнинг кўриб чиқилишида иштирок этиш;

Ўзбекистон Республикаси Президенти, Вазирлар Маҳкамаси топшириқларига ва ўз ташаббусига кўра норматив-ҳуқуқий ҳужжатлар лойиҳаларининг сифатли ишлаб чиқилишини, улар Ўзбекистон Республикасининг «Норматив-ҳуқуқий ҳужжатлар тўғрисида»ги, «Қонунлар лойиҳаларини тайёрлаш ва Ўзбекистон Республикаси Олий Мажлисининг Қонунчилик палатасига киритиш тартиби тўғрисида»ги қонунлари, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамаси Регламенти талабларига қатъий риоя қилган ҳолда, Вазирлар Маҳкамасига ўз вақтида киритилишини таъминлаш, уларни Вазирлар Маҳкамасининг раҳбарияти ҳузурида ҳимоя қилиш ҳамда Вазирлар Маҳкамасида ишлаб чиқилишида ва Ўзбекистон Республикаси Президенти Администрациясида кўриб чиқилишида иштирок этиш;

Ўзбекистон Республикаси Президенти фармонлари, қарорлари, фармойишлари, Вазирлар Маҳкамаси қарорлари, фармойишлари ва топшириқлари бажарилишини таъминлаш, Инспекция фаолиятида ижро интизомини мустаҳкамлаш бўйича комплекс чора-тадбирларни амалга ошириш, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон ҳамда «Давлат органлари ва ташкилотларда ижро интизомини янада мустаҳкамлашнинг қўшимча чора-тадбирлари тўғрисида» 2025 йил 25 июлдаги ПФ-117-сон фармонларига ҳамда «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида» 2021 йил 31 майдаги ПҚ-5132-сон қарорига мувофиқ таркибий бўлинма раҳбарларининг шахсий масъулиятини ошириш чораларини кўриш;

Инспекция раҳбарлари ва ходимлари хизмат сафарларини Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида» 2014 йил 5 мартдаги ПҚ-2142-сон ва «Хорижий хизмат сафарларида бўлиш самарадорлиги ва хорижий делегацияларнинг Ўзбекистон Республикасига ташрифларини ташкил этиш учун мансабдор шахсларнинг шахсий масъулиятини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

Инспекция ваколатига кирадиган масалалар бўйича кўрсатмалар чиқариш, буйруқлар ва норматив-ҳуқуқий ҳужжатлар қабул қилиш, зарур бўлганда бошқа вазирликлар ва идоралар билан биргаликда тегишли қарорлар қабул қилиш;

Инспекция ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Инспекция ходимлари одоб-ахлоқ қоидаларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга чиқиб қабул қилишни ташкил этиш;

давлат органлари ва бошқа ташкилотларда, Ўзбекистон Республикаси судларида, шунингдек, давлат органлари, халқаро ташкилотлар ва хорижий мамлакат вакиллари иштирокида ўтказиладиган расмий тадбирларда Инспекция номидан иштирок этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига риоя этиш, фаолиятда коррупциявий хавф-хатарларни ва манфаатлар тўқнашувини ўз вақтида аниқлаш ҳамда уларга чек қўйиш, коррупцияга оид ҳуқуқбузарликларнинг олдини олиш чораларини кўриш ҳамда тизимда коррупциянинг олдини олиш ва унга қарши муросасиз курашишга доир ишларга раҳбарлик қилиш ва мувофиқлаштириш;

Ўзбекистон Республикасининг «Манфаатлар тўқнашуви тўғрисида»ги Қонуни ва манфаатлар тўқнашуви билан боғлиқ муносабатларни тартибга солишга доир ишларга раҳбарлик қилиш ва мувофиқлаштириш;

Ўзбекистон Республикаси Президентининг Халқ қабулхоналари билан самарали ҳамкорлик қилишни ташкил этиш, Инспекция раҳбарлари ва ходимлари уларнинг фаолиятида фаол иштирок этишини, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушган мурожаатларини ўз вақтида ва тўлақонли кўриб чиқилишини таъминлаш;

Инспекция Ҳайъат мажлисларида раислик қилиш;

қонунчилик ҳужжатлари талабларига мувофиқ топшириқлар ўз вақтида ва сифатли бажарилиши учун марказий аппаратнинг мансабдор шахслари ва ҳудудий инспекциялар раҳбарларининг шахсий жавобгарлигини ошириш чора-тадбирларини белгилаш;

ҳудудий инспекциялар фаолиятининг самарадорлиги ва натижадорлигини танқидий таҳлилини мунтазам равишда ўтказиш, уларнинг ҳисоботларини Инспекция мажлисларида эшитиш, якунлари бўйича, зарур ҳолларда, уларни белгиланган тартибда интизомий жавобгарликка тортиш чораларини кўриш;

Инспекцияга юкланган вазифаларни бажариш учун шартнома асосида жалб этиладиган малакали хорижий мутахассислар хизматига ҳақ тўлаш шартларини халқаро амалиётдан келиб чиққан ҳолда белгилаш ҳамда уларга Инспекциянинг бюджетдан ташқари маблағлари ҳисобидан иш ҳақи ва бошқа тўловларни амалга ошириш;

Инспекция ходимларини уларнинг кўп йиллик ва самарали фаолияти, алоҳида хизматлари учун Ўзбекистон Республикаси давлат мукофотлари билан тақдирлаш учун белгиланган тартибда таклифлар киритишни таъминлаш ва тавсиялар бериш;

Инспекция мулкини қонунчилик ҳужжатларида белгиланган тартибда тасарруф этиш;

Инспекция ваколатига кирадиган масалалар юзасидан Ўзбекистон Республикасининг халқаро шартномаларини белгиланган тартибда имзолаш;

Инспекциянинг ички ташкилий масалалари юзасидан қарорлар қабул қилиш;

Инспекция ходимларини лавозимга тайинлаш ва лавозимдан озод этиш, меҳнат шартномалари (буйруқлари)ни имзолаш;

Инспекция ходимларига вазифаларни юклаш;

Инспекция ходимларининг малакасини ошириш ва уларни хорижий давлатларга стажировка ва тажриба алмашиш учун юборишни ташкил этиш;

Инспекция ходимларини рағбатлантириш ва интизомий жавобгарликка тортиш масалаларини ҳал қилиш, бошлиқ ўринбосарларини рағбатлантириш ва интизомий жавобгарликка тортиш масалаларини, шу жумладан, келгусида унинг эгаллаб турган лавозимида қолишининг мақсадга мувофиқлиги масалаларини кўриб чиқиш тўғрисида Вазирлар Маҳкамасига таклифлар киритиш, уларнинг шахсий жавобгарлигини ошириш бўйича тизимли чоралар кўриш;

Инспекциянинг ташқи ва ички ташкилий фаолияти устидан доимий ва қатъий назорат ўрнатиш;

Инспекцияга киритилган таклифлар ва тақдим этилган норматив-ҳуқуқий ҳужжатлар лойиҳаларининг тўлиқ ва ҳар томонлама кўриб чиқилишини, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамасининг Регламентида белгиланган муддатларда келишилишини (виза қўйилиши) таъминлаш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш;

бошқарув ходимларининг белгиланган чекланган сони ва меҳнатга ҳақ тўлаш фонди доирасида Инспекция штат бирликлари ҳамда харажатлар сметасини тасдиқлаш, заруратга кўра уларга штат бирликларининг умумий чекланган сонидан чиқмаган ҳолда ўзгартириш киритиш;

Инспекциянинг таркибий бўлинмалари низомлари, лавозим йўриқномаларини ва ҳудудий инспекциялар тўғрисидаги низомларни ҳамда Инспекциянинг бошқа ички ҳужжатларини белгиланган тартибда тасдиқлаш;

ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

19. Қуйидагилар Инспекция бошлиғи ўринбосарларининг ўзлари мутасаддилик қиладиган соҳалар бўйича асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Инспекция бошлиғи муайян сабабларга кўра (хизмат сафари, меҳнат таътили, бетоблиги даврида) йўқлигида унинг вазифаларини бажариш;

Инспекциянинг ўзи назорат қиладиган таркибий тузилмалари фаолиятини мувофиқлаштириш, назорат ва бевосита раҳбарлик қилиш, ходимлар ўртасида вазифаларни тақсимлаш;

Инспекция фаолиятининг ўзи мутасаддилик қиладиган йўналишларини янада такомиллаштириш юзасидан Ўзбекистон Республикаси Президентининг ҳужжатлари ва Вазирлар Маҳкамаси қарорлари билан тасдиқланган комплекс дастур ва комплекс чора-тадбирлар ижросини танқидий ва чуқур таҳлил қилиш;

мутасаддилигидаги таркибий тузилмалар бўлинма раҳбарларининг ҳисоботларини мунтазам эшитиб бориш ва белгиланган кўрсаткичларга эришиш учун уларнинг шахсий жавобгарлигини ошириш;

Инспекция бошлиғининг қонунчилик доирасидаги буйруқ ҳамда топшириқлари ижросини ўз вақтида ва сифатли таъминлаш;

Инспекцияга киритилган таклифлар ва тақдим этилган норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

кадрларни белгиланган тартибда танлаш ва жой-жойига қўйиш бўйича Инспекция бошлиғига таклифлар тақдим этиш, уларнинг профессионаллиги, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлаш, уларнинг касбий малакасини ошириш, мутасаддилик бўйича таркибий тузилмаларда кадрлар захирасини шакллантириш чораларини кўриш;

Ўзбекистон Республикаси Президентининг фармонлари, қарорлари, фармойишлари, Вазирлар Маҳкамаси қарорлари, фармойишлари ва топшириқлари бажарилишини таъминлаш, Инспекция фаолиятида ижро интизомини мустаҳкамлаш бўйича комплекс чора-тадбирларни амалга ошириш, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон ҳамда «Давлат органлари ва ташкилотларда ижро интизомини янада мустаҳкамлашнинг қўшимча чора-тадбирлари тўғрисида» 2025 йил 25 июлдаги ПФ-117-сон фармонларига ҳамда «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида» 2021 йил 31 майдаги ПҚ-5132-сон қарорига мувофиқ таркибий бўлинма раҳбарларининг шахсий масъулиятини ошириш чораларини кўриш;

Инспекция раҳбарлари ва ходимлари хизмат сафарларини Ўзбекистон Республикаси Президентининг «Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида» 2014 йил 5 мартдаги ПҚ-2142-сон ва «Хорижий хизмат сафарларида бўлиш самарадорлиги ва хорижий делегацияларнинг Ўзбекистон Республикасига ташрифларини ташкил этиш учун мансабдор шахсларнинг шахсий масъулиятини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

Инспекция ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Инспекция ходимларининг одоб-ахлоқ қоидалари талабларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга чиқиб қабул қилишни ташкил этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига ҳамда Ўзбекистон Республикасининг «Манфаатлар тўқнашуви тўғрисида»ги Қонунига риоя қилиш ва манфаатлар тўқнашуви билан боғлиқ муносабатларни тартибга солишга доир ишларни мувофиқлаштириш;

таркибий бўлинмалар раҳбарлари фаолияти самарадорлиги ва натижадорлигини мунтазам равишда танқидий таҳлил қилиш, уларни рағбатлантириш ва интизомий жавобгарликка тортиш бўйича Инспекция бошлиғига таклифлар киритиш;

Инспекция фаолиятини такомиллаштириш бўйича амалий чоралар кўриш, ушбу соҳада қонунчиликни такомиллаштиришга доир таклифларни ишлаб чиқиб, кўриб чиқиш учун Инспекция бошлиғига киритиш;

хорижий давлатлар, халқаро ва хорижий ташкилотлар билан соҳани ривожлантириш ва тартибга солиш масалалари бўйича ҳамкорлик қилиш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш;

ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

20. Инспекция бошлиғи:

Инспекцияга юкланган вазифа ва функцияларнинг бажарилиши учун;

Инспекциянинг ушбу Низомда назарда тутилган жавобгарлик соҳалари бўйича ҳамда мазкур Низомнинг 18-бандида кўрсатилган ўз функционал мажбуриятлари сифатли бажарилиши учун шахсан жавоб беради.

21. Инспекция бошлиғи ўринбосарлари:

мутасаддилик қилинадиган йўналиш ва таркибий бўлинмаларда Инспекцияга юкланган вазифалар ва функцияларнинг бажарилиши учун;

ушбу Низомнинг 19-бандида кўрсатилган ўз функционал вазифаларининг сифатли бажарилиши учун шахсан жавоб берадилар.

22. Инспекцияга Ўзбекистон Республикаси Президенти томонидан лавозимга тайинланадиган ва лавозимидан озод этиладиган бошлиқ раҳбарлик қилади.

23. Инспекция бошлиғининг ўринбосарлари Ўзбекистон Республикаси Президенти билан келишган ҳолда, Вазирлар Маҳкамасининг қарори билан лавозимга тайинланади ва лавозимдан озод этилади.

24. Инспекция бошлиғи:

Инспекция фаолиятига умумий раҳбарлик қилади;

ўринбосарлар ўртасида аниқ вазифалар ва функцияларни тақсимлайди, ходимлар ўртасида ваколатларни белгилайди ва мажбуриятларни тақсимлайди, ҳудудий инспекциялар мансабдор шахсларининг ваколатларини белгилайди;

Инспекция марказий аппарати ходимлари, ҳудудий инспекцияларнинг бошлиқлари ва уларнинг ўринбосарларини белгиланган тартибда лавозимга тайинлайди ва лавозимдан озод этади;

ҳудудий инспекцияларнинг комплаенс-назорат бўйича мутахассисларини лавозимга тайинлайди ва лавозимдан озод этади;

малакали хорижий мутахассислар ва экспертларни шартномавий-ҳуқуқий асосда Вазирлар Маҳкамаси билан келишилган ҳолда жалб қилади;

ҳудудий инспекциялар фаолиятини мувофиқлаштиради, уларга моддий-техник базасини ташкил этиш ва ривожлантиришда кўмаклашади;

Инспекция ва ҳудудий инспекциялар ходимлари учун мажбурий бўлган буйруқлар чиқаради ва кўрсатмалар беради ҳамда уларнинг бажарилиши назоратини ташкил этади;

лаборатория ва биноларни техник кўрикдан ўтказиш хизматлари қийматини аниқлаш методикасини тасдиқлайди;

ҳудудий инспекциялардан рўйхатдан ўтган объектлар сонидан, ҳажмидан ва масофасидан келиб чиққан ҳолда, ҳудудий инспекциялар тузилмаси ва штат бирликлари нормативларини тасдиқлайди;

ҳудудий инспекцияларнинг харажатлар сметасини келишади;

ҳудудий инспекцияларнинг кўрсатадиган хизматларидан оладиган даромадлари ҳисобидан Инспекциянинг бюджетдан ташқари ҳисобварағига йўналтириладиган маблағлар миқдорини белгилайди;

зарур ҳолларда Вазирлар Маҳкамаси билан келишилган ҳолда, Инспекция тузилмасига бошқарув ходимларининг белгиланган сони доирасида ўзгартиришлар киритади, шунингдек, ҳудудий инспекцияларнинг шаҳарсозлик соҳасида кўрсатадиган хизматлари ва бажарадиган ишларидан олинган даромадларини қайта тақсимлайди.

Инспекция бошлиғи қонунчилик ҳужжатларига мувофиқ бошқа ваколатларни ҳам амалга ошириши мумкин.

25. Инспекция бошлиғи бўлмаган вақтда, унинг ваколатлари Инспекция бошлиғининг биринчи ўринбосари томонидан, у бўлмаган вақтда эса Инспекция бошлиғининг тегишли буйруғига асосан бошқа ўринбосар томонидан амалга оширилади.

26. Ҳайъат Инспекциянинг коллегиал органи ҳисобланиб, Инспекция бошлиғи (ҳайъат раиси), унинг ўринбосарлари (лавозим бўйича), шунингдек, Инспекция фаолиятининг асосий йўналишларини мувофиқлаштирувчи таркибий бўлинмалар раҳбарларидан иборат таркибда ташкил этилади.

Ҳайъат таркибининг сони ва шахсий таркиби белгиланган тартибда Вазирлар Маҳкамаси томонидан тасдиқланади.

27. Ҳайъатга қуйидаги вазифалар юкланади:

Инспекция вазифаларининг энг муҳим самарадорлик кўрсаткичларини ишлаб чиқиш ва амалга оширилишини назорат қилиш;

Инспекция фаолияти билан боғлиқ долзарб масалаларнинг жойларда муҳокама этилишини таъминлаган ҳолда ҳайъатнинг кенгайтирилган мажлислари ўтказилишини ташкил этиш, шунингдек, юзага келган муаммоларни ўз ваколатлари доирасида бартараф этиш бўйича тегишли қарорларни ишлаб чиқиш ва қабул қилиш;

Инспекция таркибига кирувчи лавозимлар номенклатурасини кўриб чиқиш ва тасдиқлаш;

Ўзбекистон Республикаси Президенти ва Вазирлар Маҳкамасининг қарор ва топшириқларида белгиланган вазифаларнинг ўз вақтида ва сифатли амалга оширилишини таъминлаш мақсадида Инспекция раҳбарлари ва ходимларининг ижро интизомини мустаҳкамлаш ва шахсий жавобгарлигини ошириш.

Ҳайъат, шунингдек, Инспекция ваколатига киритилган бошқа масалаларни ҳам кўриб чиқишга ҳақли.

28. Инспекция бошлиғининг қарори билан қуйидагилар:

ҳайъат иш режалари ва белгиланган вазифаларни бажариш муддатлари;

таклифлар ташаббуси билан чиқиш, лойиҳаларни бошлаш ва ҳисобот бериш тартиблари;

ҳайъатнинг фаолиятини самарали таъминлаш учун Инспекция масъул таркибий бўлинмаларининг вазифалари тасдиқланиши мумкин.

29. Ҳайъат йиғилишига Инспекция ваколатига тегишли масалалар юзасидан республика ва маҳаллий ижро этувчи ҳокимият органлари, бошқа ташкилотлар раҳбарлари ва эксперт мутахассислар таклиф этилиши мумкин.

30. Ҳайъат мажлиси аъзоларининг ярмидан кўпи иштирок этган тақдирда, ваколатли ҳисобланади. Ҳайъат қарорлари оддий кўпчилик овози билан қабул қилинади.

31. Инспекция бошлиғи ва Ҳайъат аъзолари ўртасида келишмовчиликлар юзага келган тақдирда, Инспекция бошлиғи ушбу келишмовчиликлар хусусида Вазирлар Маҳкамасига ва Ўзбекистон Республикаси Президенти Администрациясига ахборот бериб, мустақил равишда қарор қабул қилади. Ҳайъат аъзолари ҳам ўз фикрларини Вазирлар Маҳкамасига ва Ўзбекистон Республикаси Президенти Администрациясига билдиришлари мумкин.

32. Ҳайъат ўз фаолияти учун зарур бўлган ҳужжатлар, ҳисоботлар ва бошқа маълумотларни сўраб олишга ҳақли.

33. Ҳайъат қарорлари Ҳайъат раиси томонидан имзоланади ва Инспекция буйруғи (қарори) билан амалга оширилади.

34. Инспекция фаолиятининг самарадорлиги мунтазам баҳоланади.

35. Инспекция фаолияти самарадорлиги ва натижадорлигига берилган баҳо Вазирлар Маҳкамаси томонидан тасдиқланадиган Инспекция фаолияти самарадорлиги ва натижадорлигини баҳолаш мезонлари ва иш индикаторларига асосланади.

36. Инспекция фаолияти самарадорлиги ва натижадорлигини баҳолаш якунлари бўйича:

Инспекция раҳбарлари ва ходимларини қўшимча рағбатлантириш (мукофотлаш) ёки интизомий жавобгарликка тортиш;

Инспекция фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

37. Инспекция фаолияти самарадорлиги ва натижадорлигини баҳолаш тартиби ва услуби қонунчилик ҳужжатлари билан белгиланади.

38. Инспекция фаолиятини молиялаштириш, ходимларининг меҳнатига ҳақ тўлаш ва уларни моддий рағбатлантириш қуйидагилар ҳисобидан амалга оширилади;

харажатлар сметаси асосида бюджетдан ажратиладиган маблағлар;

Инспекциянинг бюджетдан ташқари маблағлари;

ҳомийлик маблағлари;

қонунчилик ҳужжатлари билан тақиқланмаган бошқа маблағлар.

39. Инспекция ходимлари меҳнатига ҳақ тўлашни молиялаштиришда республика бюджетидан қуйидагилар назарда тутилади:

а) ягона тариф сеткаси бўйича тасдиқланган разрядларга мувофиқ лавозим маоши, бунда лавозим маошини ҳисоблашда, тасдиқланган тариф разрядлари тариф коэффициенти 1,8 бараварга оширилган миқдорида қўлланади;

б) 40 фоиз миқдорида меҳнатни рағбатлантириш (рағбатлантирувчи коэффициент) учун оширилган тариф коэффициентни ҳисобга олган ҳолда устама ҳақ;

в) йилда бир ойлик меҳнатга ҳақ тўлаш фонди миқдорида моддий ёрдам;

г) йилда икки ойлик меҳнатга ҳақ тўлаш фонди миқдорида мукофот пули;

д) 15 фоизлик моддий рағбатлантириш фонди;

е) Инспекция бошқарув, техник ва хизмат кўрсатувчи ҳамда бошқа ходимларига кўп йиллик хизмати учун ҳар ойлик қўшимча устама ҳақи:

2 йилдан 5 йилгача — 10 фоиз миқдорида;

5 йилдан 10 йилгача — 20 фоиз миқдорида;

10 йилдан 15 йилгача — 30 фоиз миқдорида;

15 йилдан 20 йилгача — 40 фоиз миқдорида;

20 йилдан 25 йилгача — 50 фоиз миқдорида;

25 йил ва ундан ортиқ — 60 фоиз миқдорида.

40. Инспекция ходимларининг бюджетдан ташқари маблағлар ҳисобидан меҳнатига ҳақ тўлашда лавозим маошларига устама ҳақлар, мукофот, моддий ёрдам пули ҳамда бошқа барча қўшимча тўловлар қуйидагилардан иборат:

а) қуйидаги миқдорлардаги ҳар ойлик устама ҳақлардан:

инспекция ходимларига меҳнат фаолиятини моддий рағбатлантириш ва ижтимоий қўллаб-қувватлаш учун энг муҳим самарадорлик кўрсаткичлари (KPI) натижаларига кўра қабул қилинадиган Инспекция бошлиғи буйруғига асосан тайинланадиган 200 фоизгача ҳар ойлик белгиланадиган қўшимча устама тўлови;

лавозим маошига (жамоа шартномасида белгиланган миқдорда) шахсий устама;

б) қуйидагиларни ўз ичига оладиган рағбатлантирувчи, мукофот, компенсация ва бошқа тўловлардан:

меҳнат қонунчилигида белгиланган байрам саналари муносабати билан ходим лавозим маошининг икки бараваригача миқдорда;

ходимларни ижтимоий қўллаб-қувватлаш ва уларнинг иш самарадорлигини ошириш мақсадида ҳар ойда йўл транспорти харажатлари учун базавий ҳисоблаш миқдорининг икки баравари (хизмат автотранспорти бириктирилган ходимлар бундан мустасно) ҳамда ходимларнинг овқатланиши харажатларига кўмаклашиш мақсадида базавий ҳисоблаш миқдорининг икки баравари миқдорда компенсация тўловлари;

зарур ҳолларда базавий ҳисоблаш миқдорининг ўн беш баравари миқдорида (ходимнинг даволаниши, юбилей ёши муносабати билан, шунингдек, пенсияга чиққанда, тўй, дафн маросими ва бошқалар учун) ходимларга касаба уюшмаси билан келишган ҳолда моддий ёрдам пули;

ходимларга қишлоқ хўжалиги маҳсулотлари сотиб олиш учун ҳар йили бир марта базавий ҳисоблаш миқдорининг ўн беш бараваригача миқдорда тўлов;

в) базавий ҳисоблаш миқдорининг ўн беш бараваригача миқдорда қуйидагиларни ўз ичига оладиган моддий ёрдам ва бошқа тўловлардан:

ходим вафот этган ҳолларда, моддий ёрдам (агар ходим вафот этган йилда бевосита унга моддий ёрдам кўрсатилмаган бўлса) унинг турмуш ўртоғига, турмуш ўртоғи йўқлигида — у билан бирга яшовчи вояга етган фарзандларига ёки қонуний вакилларига (васийлар ва ҳомийларга) ёхуд вояга етмаган болаларни (болаликдан ногиронлиги бўлганлар шахсларни — ёшидан қатъи назар) фарзандликка олганларга, шунингдек, агар ходимлар никоҳда бўлмаганда ва фарзандлари бўлмаган ҳолларда, ходимнинг қарамоғидаги шахсларга ёки ота-оналарига тенг улушда тўлаб берилади.

Истисно тариқасида, ходимнинг асослантирилган аризасига асосан Инспекция раҳбарининг розилиги билан меҳнатга ҳақ тўлаш фондига ажратилган маблағлар доирасида қуйидаги ҳолларда қўшимча тарзда моддий ёрдам кўрсатилиши мумкин:

яқин қариндошлари вафот этганда — ўлим тўғрисидаги гувоҳнома нусхасига асосан;

алоҳида эҳтиёж туғилганда (бахтсиз ҳодиса, авария, узоқ муддатли касаллик сабабли махсус даволаниш ёки оиласи оғир моддий аҳволда бўлса).

41. Давлат бюджетидан ва бюджетдан ташқари маблағлар бўйича лавозим маошига устама ҳақлар, байрам пули, чораклик мукофот пули ҳамда бошқа қўшимча тўловлар оширилган тариф ва рағбатлантирувчи коэффициентларни ҳисобга олган ҳолда тўланади.

42. Инспекция ходимларига қонунчилик ҳужжатларида назарда тутилган меҳнатга ҳақ тўлаш разрядлари қўлланади.

43. Инспекция қонунчилик ҳужжатларида белгиланган тартибда қайта ташкил этилади ва тугатилади.

44. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

1. Ушбу Намунавий низом Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг ҳудудий назорат қилиш инспекциялари (кейинги ўринларда — Ҳудудий инспекция) мақоми, асосий вазифалари, функциялари, ҳуқуқлари ва жавобгарлиги, фаолиятини ташкил этиш, раҳбарларининг функционал вазифалари, ҳуқуқлари ва жавобгарлигини, шунингдек, ходимларини моддий рағбатлантириш тартибини белгилайди.

Ҳудудий инспекция ўз ваколатлари доирасида қурилиш-монтаж ишларининг сифати ва тасдиқланган лойиҳа ҳужжатларига мувофиқлиги (автомобиль йўллари ва йўл сунъий иншоотлари бундан мустасно), шунингдек, кўп квартирали уй-жой фондини бошқариш (хўжалик юритувчи субъектларнинг молиялаштириш манбаларидан қатъи назар молия-хўжалик фаолиятига аралашмаган ҳолда), иссиқлик таъминотидан фойдаланиш, ичимлик суви таъминоти ва оқова сувларни чиқариб юбориш хизматини кўрсатиш ҳамда фойдаланиш юзасидан давлат назорати ва текширувини амалга оширади.

2. Ҳудудий инспекция Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси (кейинги ўринларда — Инспекция) таркибига киради ва бўйсунади ҳамда ўз фаолияти юзасидан ҳисобдор бўлади.

3. Ҳудудий инспекция ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, ушбу Низомга, шунингдек, Инспекциянинг буйруқлари, қарорларига ҳамда бошқа қонунчилик ҳужжатларига амал қилади.

4. Ҳудудий инспекция ўз фаолиятини республика ва маҳаллий ижро этувчи ҳокимият органлари, ҳуқуқни муҳофаза қилувчи органлар, хўжалик бирлашмалари ҳамда бошқа ташкилотлар билан ўзаро ҳамкорликда амалга оширади.

5. Ҳудудий инспекция хўжалик ҳисобидаги ташкилот ҳисобланади.

6. Ҳудудий инспекция Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга, банкларда ҳисобварақларига, шу жумладан, хорижий валютадаги шахсий ҳисобварақларига эга бўлади.

7. Ҳудудий инспекциянинг расмий номи:

а) давлат тилида:

тўлиқ номи — Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг ҳудудий назорат қилиш инспекцияси;

қисқартирилган номи — Ҳудудий қурилиш ва уй-жой коммунал хўжалиги назорати инспекцияси;

б) рус тилида:

тўлиқ номи — Территориальная инспекция Инспекции по контролю в сфере строительства и жилищно-коммунального хозяйства при Кабинете Министров Республики Узбекистан;

қисқартирилган номи — Территориальная инспекция по контролю в сфере строительства и жилищно-коммунального хозяйства.

8. Қуйидагилар Ҳудудий инспекциянинг асосий вазифалари ҳисобланади:

Ҳудудий инспекцияда рўйхатдан ўтган, тасдиқланган лойиҳа ҳужжатлари бўйича қурилиш-монтаж ишларининг амалга оширилишида ва қурилиш-монтаж ишлари тугалланган объектларнинг фойдаланишга қабул қилинишида (автомобиль йўллари ва йўл сунъий иншоотлари бундан мустасно) шаҳарсозлик тўғрисидаги қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар талабларига риоя этилиши юзасидан давлат назоратини танлаб амалга ошириш;

объектларда бино ва иншоотларнинг зилзилага бардошлилигига таъсир қилувчи, шунингдек, инсон саломатлиги ҳамда ҳаётига таҳдид солувчи сифатсиз қурилиш материаллари, конструкциялари ва буюмлари қўлланишининг олдини олиш;

буюртмачининг техник назорати ва лойиҳа ташкилотларининг муаллифлик назоратини, пудрат ташкилотининг ички назорат тизимининг ишлаши устидан давлат назоратини амалга ошириш;

янги қурилаётган бино ва иншоотларни сейсмик жиҳатдан техник баҳолаш, мавжуд бинолар ва иншоотларнинг инструментал-техник текширувдан шартнома асосида ўтказилишини таъминлаш ҳамда синов лабораториялари фаолиятини амалга ошириш;

қурилиш-монтаж ишларини бошлаш учун рўйхатдан ўтказиш ҳамда қурилиши тугалланган объектларни фойдаланишга рухсат бериш;

кўп квартирали уйларни бошқариш, уларга туташ ер участкаларини сақлаш ва улардан фойдаланишда техник фойдаланиш қоидалари ва нормаларига риоя этилишини назорат қилиш ҳамда мулкдорлар томонидан жойларнинг ўзбошимчалик билан қайта қурилишига ва қайта режалаштирилишига йўл қўймаслик;

кўп квартирали уй-жой фондидаги умумий мулк ва унга туташ ер участкаларини мавсумий фойдаланишга тайёрлаш бўйича бажарилган таъмирлаш-тиклаш ишларининг манзилли дастурларга мувофиқлиги устидан давлат назоратини амалга ошириш;

кўп квартирали уйларни бошқариш фаолиятини амалга ошириш қоидаларига риоя этилишидаги давлат назоратини таъминлаш;

кўп квартирали уйларни бошқариш органлари ва жойлар мулкдорлари томонидан иссиқлик таъминотидан фойдаланишда норматив-ҳуқуқий ҳужжатлар талабларига риоя этилиши устидан давлат назоратини амалга ошириш;

кўп квартирали уйларнинг сейсмик мустаҳкамлиги ва зилзилага бардошлилигини мониторинг қилиш;

ичимлик сувини самарали ишлаб чиқариш, етказиб бериш, реализация қилиш, ичимлик сувидан оқилона фойдаланиш, шунингдек, оқова сувларни чиқариб юбориш ва тозалаш бўйича хизмат кўрсатиш соҳасида техник жиҳатдан тартибга солиш соҳасидаги норматив ҳужжатлар ҳамда бошқа қонунчилик ҳужжатлари талабларига риоя этилишини назорат қилиш;

ичимлик суви ишлаб чиқариш учун мўлжалланган ер ости сувлари қудуқларининг техник ҳолати ва улардан фойдаланиш шартларига ҳамда қазишнинг (бурғилашнинг) белгиланган қоидаларига риоя этилишини назорат қилиш;

оқова сувларни чиқариб юбориш тармоқларидаги ва тозалаш иншоотларидаги оқова сувлар таркибида ифлослантирувчи моддаларнинг рухсат этилган меъёрлар даражасида чиқариб юборилиши ҳамда тозаланиши устидан давлат назоратини амалга ошириш;

ичимлик суви таъминоти ва оқова сувларни чиқариб юбориш тизими объектларининг технологик аудитдан ўтказилиши юзасидан назоратни амалга ошириш;

истеъмолчиларнинг ичимлик суви таъминоти ва оқова сувларни чиқариб юбориш бўйича хизматлар билан қамраб олиниши устидан давлат назоратини амалга ошириш.

9. Ҳудудий инспекция ўзига юкланган вазифаларни бажариш учун қуйидаги функцияларни амалга оширади:

Ҳудудий инспекцияда рўйхатдан ўтган қурилиш объектларида тасдиқланган лойиҳа ҳужжатлари бўйича шаҳарсозлик субъектлари (буюртмачи, лойиҳа ва пудрат ташкилотлари) томонидан қурилиш жараёнини қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатларга риоя этилишини назорат қилади;

ҳудудий инспекцияда рўйхатдан ўтган қурилиш-монтаж ишларининг бажарилишида қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар талабларига риоя этилиши бўйича таъсирчан давлат назоратини амалга оширади;

жисмоний ва юридик шахслар томонидан қурилишда қонунчилик ҳужжатлари, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатларга риоя этилишини назорат қилади;

қонунчиликда белгиланган тартибда лойиҳа ҳужжатларига ўзгартириш киритмасдан ёки қурилиш нормалари ҳамда қоидаларини бузган ҳолда бино ва иншоотлар қурилиши устидан назорат ўрнатади;

ҳудудий инспекцияда рўйхатдан ўтган қурилиш объектларида қурилиш материаллари, буюмлари, конструкциялари ва бажарилаётган қурилиш-монтаж ишлари сифатини текшириш учун шаҳарсозлик фаолияти субъектларидаги лойиҳа, технологик ва ижро ҳужжатлари, шунингдек, бошқа зарур маълумотларни белгиланган тартибда ўрганади;

объектларда уларнинг зилзилага бардошлилигига таъсир қилувчи, шунингдек, инсон саломатлиги ва ҳаётига таҳдид солувчи сифатсиз қурилиш материаллари ва буюмлари қўлланишининг олдини олишда давлат назоратини амалга оширади;

қурилиш объектларида қўлланаётган қурилиш материаллари, буюмлари, конструкциялари ва бажарилаётган қурилиш-монтаж ишлари сифатини текшириш учун шаҳарсозлик фаолияти субъектларидан белгиланган тартибда лойиҳа, технологик ва ижро ҳужжатлари, шунингдек, бошқа зарур маълумотларни сўрайди ва ўрганади;

қурилиш объектларидаги авариялар ҳолатларини текшириш бўйича идоралараро комиссиялар ишида иштирок этади;

қурилиш объектларида буюртмачининг техник, лойиҳа ташкилотларида муаллифлик ва пудрат ташкилотида ички назорат амалга оширилишини назорат қилади;

объектларни қуриш ва реконструкция қилишда тегишли мутахассислар бириктирилганлиги ёки ушбу фаолият турини амалга ошириш ҳуқуқига эга бўлган юридик шахснинг шартнома асосида жалб қилинганлиги ҳамда уларнинг қонунчилик ҳужжатларида белгиланган тартибда сертификатга эгалигини ўрганади;

қурилиш объектида буюртмачи, лойиҳа ва пудрат ташкилотлари томонидан ижро ҳужжатлари «Қурилишда давлат назорати» электрон тизимида юритилишининг ҳамда қурилиш соҳасидаги қонунчилик ҳужжатларида кўрсатилган лицензияли фаолият турларини амалга ошириш ҳуқуқини берувчи ҳужжатларнинг мавжудлигини назорат қилади;

лойиҳа ташкилоти томонидан буюртмачига қурилиш-монтаж ишлари давомида лойиҳага мувофиқ бериладиган мажбурий кўрсатмаларининг бажарилишини ўрганади, аниқланган ҳуқуқбузарликлар юзасидан чоралар кўради;

сейсмик фаол зоналарда қурилиши режалаштирилаётган барча турдаги бинолар ва иншоотларнинг, шунингдек, кўп квартирали уйларнинг сейсмик жиҳатдан техник баҳолаш учун зарур бўлган ахборотни ўз ичига олган электрон техник паспортларнинг буюртмачилар томонидан расмийлаштирилишини текширади;

ҳудудий инспекцияда рўйхатдан ўтиб қурилаётган бинолар ва иншоотларнинг зилзилага бардошлилигини таъминлаш, зарур ҳолларда инструментал-техник текширувдан ўтказиш ҳамда зилзилага бардошлилигини таъминлаш бўйича бажарилган ишлар устидан давлат назоратини амалга оширади;

қурилиш объектларида синов-лаборатория ишларини ҳамда мавжуд бинолар ва иншоотларнинг техник ҳолатини шартнома асосида ўрганади ва тегишли хулоса беради;

қурилиш-монтаж ишларини бошлаш, қурилиш-монтаж ишлари тугалланган объектдан фойдаланиш учун рухсатнома беради;

қурилиш объектларини онлайн кузатиш марказларига мобил видеокамералар (бодикамера), махсус планшетлар ва қурилиш объектларидаги видеокамералардан келиб тушган маълумотларни тезкор таҳлил қилади ҳамда натижасига кўра тегишли чоралар кўради;

Ўзбекистон Республикасининг ижтимоий ва ишлаб чиқариш инфратузилмасини ривожлантириш дастурига ва Давлат бюджети маблағлари ҳисобидан амалга ошириладиган дастурларга киритилган лойиҳалар ва намунавий лойиҳалар бўйича қуриладиган, шунингдек, ташаббусли бюджетлаштириш жараёнлари асосида молиялаштириладиган, хавф-хатар тоифасидан қатъи назар, барча бино ва иншоотларда қурилиш-монтаж ишларининг бажарилишини (жорий таъмирлаш ва жиҳозлаш бундан мустасно) тўғридан-тўғри рўйхатдан ўтказади;

мавжуд кўп квартирали уйлардаги таянч ва (ёки) тўсиқ конструкцияларни техник жиҳатдан тартибга солиш соҳасидаги норматив ҳужжатларни бузган ҳолда ўзгартириш ва (ёки) реконструкция қилиш, бузиш ҳамда бинонинг зилзилага бардошлилигига салбий таъсир қиладиган ишларни бажаришга йўл қўймаслик устидан давлат назоратини амалга оширади;

кўп квартирали уйлар ва уларга туташ ер участкаларидан фойдаланишда техник фойдаланиш қоидалари ва нормалари, санитария нормалари ва қоидалари, кўп квартирали уйларга туташ ер участкаларини сақлаш бўйича талабларига риоя қилинишини назорат қилади;

кўп квартирали уйларда ва унга туташ ер участкаларида ўзбошимчалик билан иморатлар (иншоотлар) қуришга йўл қўйилмаслигини таъминлайди;

кўп квартирали уй-жой фондини бошқариш, жумладан муҳандислик тармоқлари, кўп квартирали уйлар ускуналаридан фойдаланиш, авария ҳолатлари бартараф этилишини тизимли назорат қилади;

кўп квартирали уйлардаги умумий мулк ва унга туташ ер участкаларида давлат дастурлари асосида амалга оширилган таъмирлаш-тиклаш ишларининг бажарилишини мониторинг қилади;

умумий фойдаланиладиган жойлар, фасадлар, уйларнинг ички муҳандислик коммуникацияларини таъмирлаш-тиклаш ишларини тизимли ўтказиш қоидаларига риоя этилишини ўрганади;

кўп квартирали уй-жой фонди, кўп квартирали уйлардаги жойлар мулкдорларининг умумий мулки ва унга туташ ҳудудлардан мавсумий фойдаланишга тайёрлаш тадбирларининг ўтказилишини назорат қилади;

жойлар мулкдорларига ҳисоботларнинг белгиланган шартлар, тартиб ва муддатларда бериб борилиши юзасидан назорат тадбирларини ўтказади;

умумий мол-мулкни сақлаш ва таъмирлаш учун хизматлар ҳамда ишлар шакллантирилгани ва белгиланган тартибда тасдиқланганлигини назорат қилади;

кўп квартирали уйларни «Биллинг» тизими орқали бошқариш, мукаммал ва жорий таъмирлаш ишларининг амалга ошириш, шунингдек, авария-диспетчерлик хизматларини ташкил этиш ва кўрсатиш чоралари таъминланганлигини назорат қилади;

олти ойда бир марта кўп квартирали уйлардаги таянч ва тўсиқ конструкцияларнинг бутлигини хатловдан ўтказилганлигини назорат қилади;

кўп квартирали уйларни бошқариш ҳуқуқини берувчи малака сертификатининг мавжудлигини назорат қилади;

уй ичидаги иссиқлик тармоқларига ўзбошимчалик билан уланиб олиш иссиқлик ва иссиқ сув таъминотининг уй ичидаги тизимларига ўзгартиришлар киритиш ҳолати юзасидан давлат назоратини амалга оширади;

уйнинг иситиш асбобларини ўзбошимчалик билан демонтаж қилиш орқали иситиш тизимидан узиб қўйиш ҳолати юзасидан давлат назоратини амалга оширади;

кўп квартирали уйларни бошқариш органлари томонидан иситиш тизимидан иссиқлик манбаини чиқариб ташлаш ҳолатлари юзасидан давлат назоратини амалга оширади;

уй ичидаги иссиқлик энергиясидан унинг бевосита вазифасидан (иситиш, иссиқ сув таъминоти) бошқа мақсадда фойдаланиш ҳолати юзасидан назорат тадбирларини амалга оширади;

уй ичидаги иситиш тизимини гидравлик пресслаш ва кейинчалик уни тармоқдаги сув билан тўлдирган ҳолда ювиш ишлари таъминланганлигини аниқлаш юзасидан назорат тадбирларини амалга оширади;

иситиш тизимидан тармоқ сувининг оқиши ва чиқиб кетишининг олдини олиш чоралари кўрилганлигини назорат қилади;

кўп квартирали уйларнинг сейсмик мустаҳкамлиги ва зилзилага бардошлилигини аниқлаш бўйича визуал тартибда ўтказиладиган хатлов ишларини мониторинг қилади;

кўп квартирали уйларнинг сейсмик мустаҳкамлиги ва зилзилага бардошлилиги ҳолати юзасидан ўтказилган хатлов натижалари тўғрисидаги маълумотларни умумлаштиради;

таҳлил натижаларига асосан эксплуатация муддатини ўтаб бўлган сейсмик заиф ва авария аломатлари аниқланган кўп квартирали уйлар ўрнида босқичма-босқич янги уй-жойлар қуриш бўйича таклифларни ишлаб чиқиб, маҳаллий ижро этувчи ҳокимият органларига киритиб боради;

ичимлик суви таъминоти ва оқова сувларни чиқариб юбориш тизимларига уланишда техник шартлар талабларига риоя этилиши, шунингдек, ичимлик суви ва оқова сув тармоқларига ўзбошимчалик билан уланишнинг олдини олиш чораларини кўради;

истеъмолчилар томонидан ичимлик суви таъминоти ва оқова сувларни чиқариб юбориш хизматларидан фойдаланишга оид талабларга амал қилинишини мониторинг қилади;

ичимлик суви таъминоти ва оқова сувларни чиқариб юбориш тармоқларидаги ва бошқа иншоотлардаги авариялар бартараф этилишини, улар юзага келишининг олдини олиш бўйича ишлаб чиқилган чора-тадбирлар амалга оширилишини назорат қилади;

ичимлик сувининг технологик жиҳатдан сарфланиши ва йўқотилишининг йўл қўйиладиган нормаларига риоя этилиши устидан давлат назоратини амалга оширади;

ичимлик суви таъминоти ва оқова сувларни чиқариб юбориш соҳасида хизмат кўрсатиш қоидаларига амал қилинишини назорат қилади;

ичимлик суви таъминоти ташкилотлари томонидан иншоотларда ичимлик сувининг технологик ҳисоби юритилиши таъминланганлиги ва ҳисоблаш ускуналари ишлаши ва мавжудлигини назорат қилади;

ичимлик суви таъминоти ташкилотлари томонидан ичимлик сувини йўқотишларнинг белгиланган меъёрларига риоя этилишини назорат қилади;

манфаатдор вазирликлар ва идоралар билан биргаликда ташкилий-ҳуқуқий шаклидан қатъи назар, сув таъминоти ташкилотлари томонидан аҳолига етказиб берилаётган ичимлик сувининг сифати, стандартлар ва белгиланган талабларга жавоб беришини назорат қилади;

ичимлик суви таъминоти ташкилотлари томонидан истеъмолчиларга етказиб берилаётган ичимлик сувининг сифати, сувни тозалаш, зарарсизлантириш ускуналари билан таъминланганлиги ва белгиланган талабларга мувофиқлигини ўрганади;

ичимлик суви эҳтиёжлари учун ер ости сувларидан фойдаланишда техник жиҳатдан тартибга солиш соҳасидаги норматив ҳужжатлар талаблари бажарилиши устидан таъсирчан назорат ўрнатади;

оқова сув тозалаш иншоотларидаги оқова сувлар таркибидаги ифлослантирувчи моддаларни рухсат этилган меъёрлар даражасида тозаланиши устидан давлат назоратини амалга оширади;

оқова сувларни чиқариб юбориш тармоқларига меъёрдан ортиқ ифлослантирилган оқова сувларни оқизганлик ва оқова сувларни чиқариб юбориш тармоқларидан фойдаланиш қоидаларининг бошқача тарзда бузилиши ҳолатлари юзасидан чоралар кўради;

ичимлик суви таъминоти ва оқова сувларни чиқариб юбориш тизими таркибидаги объектлар ва тармоқларнинг самарадорлигини ошириш (техник жараён ва энергияни тежаш) бўйича технологик аудитдан ўтказади;

ижтимоий ва ишлаб чиқариш инфратузилмасини ривожлантириш дастури ва бошқа дастурлар асосида ичимлик суви таъминоти ва оқова сув объектларида амалга оширилган қурилиш, реконструкция ва модернизация ишлари натижасида истеъмолчиларнинг сув таъминоти ва оқова сувларни чиқариб юбориш хизматлари билан қамраб олиниши ҳамда ташкилий-ҳуқуқий шаклидан қатъи назар, сув таъминоти ташкилотлари билан истеъмолчилар ўртасида шартномавий муносабатлар йўлга қўйилганлиги устидан давлат назоратини амалга оширади.

10. Ҳудудий инспекция қонунчилик ҳужжатларига мувофиқ бошқа функцияларни ҳам амалга ошириши мумкин.

11. Ҳудудий инспекция ўзига юкланган вазифалар ва функцияларни амалга оширишда қуйидаги ҳуқуқларга эга:

ташкилий-ҳуқуқий шаклидан қатъи назар, давлат назоратини амалга ошириш юзасидан ваколат доирасига кирувчи масалаларда белгиланган тартибда текширув ўтказиш;

тадбиркор ҳамда ҳудудий инспекциялар ўртасида шартнома (оммавий оферта) тузилган тадбиркорлик субъектларининг қурилиш объектларида қисқа муддатли давлат қурилиш назорати тадбирларини шартнома шартлари доирасида «Ягона давлат назорати» ахборот тизимида рўйхатдан ўтказмаган ҳолда амалга ошириш;

«хавфни таҳлил этиш» тизими доирасида тадбиркорлик субъектларининг қонунчилик ҳужжатларини бузиш хавфи даражасидан келиб чиқиб, текширувни ташаббус қилиш;

давлат назоратини амалга оширишда жисмоний ва юридик шахслардан, шунингдек, ўз ваколатига кирувчи масалаларни ҳал этиш учун зарур бўлган маълумотларни вазирликлар, идоралар, хўжалик бирлашмалари, маҳаллий ижро этувчи ҳокимият органлари ҳамда ташкилотлардан белгиланган тартибда олиш;

ўтказилган назорат тадбирлари бўйича таҳлилий маълумотларни юритиш;

назорат ишларини электрон тизим ҳамда қурилиш объектларини онлайн кузатиш марказлари орқали таҳлил қилиш, умумлаштириш ва мониторинг қилиб бориш;

ўз функционал вазифалари ва функцияларини бажариш учун кўп квартирали уйлардаги хонадонларга мулкдорни олдиндан хабардор қилган ҳолда, унинг розилиги асосида кўп квартирали уйларни бошқариш органи билан бирга кириш;

пудрат ташкилотларига конструкцияларнинг алоҳида деталларини очиш, пойдевордаги ва қайта тўлдириладиган тупроқни текшириш ишларини топшириш, зарурат бўлганда тегишли хулоса тайёрлаш учун илмий-тадқиқот ташкилотларидан эксперт-мутахассисларни жалб қилиш;

авария ҳолатидаги бинолар, иншоотлар, уларнинг қисмлари, конструктив элементлари ва аварияга олиб келган сабабларни текшириш, уларни нотурар жой тоифасига ўтказиш бўйича техник комиссиялар ишида иштирок этиш;

қурилиш объектларида синов лаборатория ишларини ҳамда мавжуд бинолар ва иншоотларнинг техник ҳолатини шартнома асосида ўрганиш ва тегишли хулоса бериш;

зарурат бўлганда ичимлик суви ва оқова сувларни, ускуна ҳамда материалларни тегишли ташкилотлар томонидан назорат синовидан ва таҳлилдан ўтказишни тайинлаш;

қуйидаги ҳолатларда жисмоний ва юридик шахсларга нисбатан бажарилиши мажбурий бўлган ёзма кўрсатмалар киритиш:

бино ва иншоотларнинг зилзилага бардошлилигига таъсир қилувчи, шунингдек, инсон саломатлиги ва ҳаётига таҳдид солувчи конструктив бузилишлар аниқланган ҳолатларда, қурилиш-монтаж ишларини тўхтатиб туриш ва демонтаж (буздириш) ишларини амалга оширишни талаб қилиш бўйича;

юридик ва жисмоний шахсларга объектдаги ҳуқуқбузарликларни бартараф қилиш учун мос равишда, бироқ олтмиш кундан ортиқ бўлмаган муддатни белгилаган ҳолда, аниқланган ҳуқуқбузарликларни бартараф этиш бўйича;

бажарилган ишлар лойиҳа ечимлари, техник регламентлар, шаҳарсозлик нормалари ва қоидалари, техник жиҳатдан тартибга солиш соҳасидаги норматив ҳужжатлар ва бошқа қонунчилик ҳужжатлари талабларига мос келмаслиги аниқланган ҳолларда, шунингдек, қурилиш материаллари, буюмлари ва конструкцияларини лабораторияда синовдан ўтказишнинг салбий натижаларига ҳамда талаблари бузилган ҳужжатга асосланган ҳолда қурилиши ниҳоясига етказилган босқичда бажарилган ишларнинг номувофиқлиги бўйича;

кўп квартирали уйларни бошқариш органларига ва мулкдорларига кўп квартирали уйларни бошқариш фаолиятини амалга ошириш ҳамда уйлардан техник фойдаланиш қоидалари ва нормаларига, санитария нормалари, қоидалари ва гигиена нормативларининг ҳамда шаҳарсозлик нормалари ва қоидаларига мувофиқ, кўп квартирали уйларга туташ ер участкасини сақлашга доир талабларнинг бузилиш ҳолатларини ўн беш кун муддатда бартараф этиш бўйича;

кўп квартирали уйларнинг конструктив қисмларининг таянч қобилиятини ҳамда зилзилага бардошлилигини бузадиган, шунингдек, инсон ҳаёти, соғлиғи ёки мол-мулкига ва атроф-муҳитга зарар етказилиши ҳамда таҳдид солувчи ўзбошимчалик билан амалга оширилаётган ўзгартириш ва реконструкция қилиш ишлари аниқланган ҳолларда, уларни тўхтатиш ва уларнинг оқибатларини ўттиз кун муддатда ихтиёрий равишда бартараф этиш бўйича;

ичимлик суви таъминоти ва оқова сувларни чиқариб юбориш соҳасида аниқланган ҳуқуқбузарликларни бартараф этиш бўйича;

ер ости сувларидан самарасиз фойдаланиш ҳолатлари аниқланганда ер ости сувларини олишни тўхтатиш ёки бу борада ажратилган лимитни белгиланган тартибда қисқартириш бўйича;

Ҳудудий инспекция ўз ваколатлари доирасида:

маҳаллий ижро этувчи ҳокимият органларига ва махсус ваколатли давлат органининг ҳудудий бўлинмаларига шаҳарсозлик тўғрисидаги қонунчилик ҳужжатларини бузган ҳолда қабул қилинган қарорларни бекор қилиш ҳақида;

шаҳарсозлик фаолиятини амалга оширишга доир лицензияларнинг ҳамда рухсат берувчи ҳужжатларнинг амал қилишини тўхтатиб туриш, тугатиш ёки уларни бекор қилиш тўғрисидаги масалани ҳал этиш учун тегишли давлат органлари ҳамда ташкилотларга қонунчилик ҳужжатларида белгиланган тартибда;

бинолар ва иншоотларнинг зилзилага бардошлилигига таъсир қилувчи, шунингдек, инсон ҳаёти ва соғлиғига таҳдид солувчи сифатсиз қурилиш материаллари, конструкциялари ҳамда буюмлари қўллангани аниқланган ҳолларда, қурилиш материалларини, конструкцияларини ва буюмларини ишлаб чиқаришни, реализация қилиш ҳамда қўллашни тўхтатиб туриш ҳақида тегишли давлат органлари ва ташкилотларга;

қурилиш объектларининг барча босқичларида пудрат ташкилотининг ички, лойиҳа ташкилотининг муаллифлик ва техник назоратни амалга оширувчи мутахассисларнинг махсус сертификатлари мавжудлигини текшириш, назорат давомида сертификат мавжуд бўлмаганда буюртмачи, пудрат ва лойиҳа ташкилотларига масъул шахсларни қурилиш объектларидан четлаштириш ва тегишли сертификатни бекор қилиш юзасидан;

давлат органлари ва ташкилотлари ҳамда хўжалик бирлашмалари ва бошқа ташкилотларга кўп квартирали уй-жой фондини бошқариш ҳамда ичимлик суви таъминоти ва оқова сувларни чиқариб юбориш соҳасида ҳуқуқбузарликларни бартараф этиш бўйича тақдимномалар киритади;

ичимлик суви таъминоти ва оқова сувларни чиқариб юбориш хизматларини кўрсатиш ва улардан фойдаланиш бўйича ишларни кўриб чиқиш учун суд мажлисида ёки процессуал ҳаракатларда эксперт, мутахассис сифатида иштирок этиши ва хулосалар бериши мумкин;

сув таъминоти ташкилотларининг «Биллинг» тизимидаги истеъмолчиларнинг манзили ва сони, сув ҳисоблагичлари кўрсаткичлари, сарфланган сув миқдори ва қарздорлик, оқова сувларни чиқариш, янги қамраб олинган истеъмолчилар тўғрисида ва бошқа маълумотлардан фойдаланади;

қуйидаги ҳолатларда судларга аризалар киритади:

давлат органлари ва ташкилотлари ҳамда бошқа ташкилотларга нисбатан кўп квартирали уйларни бошқариш, иссиқлик таъминотидан фойдаланиш ҳамда ичимлик суви таъминоти ва оқова сувларни чиқариб юбориш соҳасида ҳуқуқбузарликларни бартараф этиш бўйича;

Ҳудудий инспекцияда рўйхатдан ўтган ва тасдиқланган лойиҳа ҳужжатларига риоя қилмаган ҳолда қурилиш ишларини бажарганлик ҳолати аниқланганда, қурилиш-монтаж ишларини тўхтатиб қўйиш, демонтаж ишларини амалга ошириш ёки буздириш ишларини амалга ошириш тўғрисида;

ўтказилган текширув натижасида аниқланган қонунбузарликларни бартараф этишга доир кўрсатмалар талаблари бажарилмаган ҳолатларда жисмоний ёхуд юридик шахс фаолиятини қисман ёки тўлиқ тўхтатиш ёхуд тақиқлаш тўғрисида;

Ҳудудий инспекция манфаатларини ҳимоя қилиш мақсадида;

назорат натижаларини таҳлил қилади, халқаро тажрибаларни ўрганган ҳолда, норматив-ҳуқуқий базани янада такомиллаштириш бўйича Инспекцияга таклифлар тақдим этади;

Ҳудудий инспекция фаолиятида фойдаланиши учун услубий ва методик қўлланмалар, йўриқномалар ишлаб чиқиш бўйича таклифлар тайёрлайди;

қурилиш соҳасида ва кўп квартирали уй-жой фондини бошқариш ҳамда ичимлик суви таъминоти ва оқова сувларни чиқариб юбориш соҳасида давлат назоратини амалга ошириш юзасидан электрон ахборот тизимини ташкил этади;

Ҳудудий инспекцияда қурилиш объектларини онлайн кузатиш марказлари фаолиятини ташкил этади;

Ҳудудий инспекция ходимларини тайёрлаш, қайта тайёрлаш ва уларнинг малакасини узлуксиз оширишни ташкил этади, шунингдек, бу масалалар бўйича Инспекцияга аниқ таклифлар киритади;

хорижий давлатлар мутахассисларини жалб қилган ҳолда тажриба алмашиш ҳамда ходимларнинг хорижий мамлакатларда малакасини оширишни ташкил этади;

ходимларни қонунчилик ҳужжатларида белгиланган тартибда аттестациядан ўтказишни ва уларнинг натижаларига кўра тегишли махсус гувоҳномалар беришни ташкил этади;

қурилиш, уй-жой фондини бошқариш ва ичимлик суви таъминоти ҳамда оқова сувларни чиқариб юбориш масалалари бўйича ўқув-семинарларни ташкил қилади ва ўтказади;

Ҳудудий инспекцияни замонавий синов-лаборатория ўлчов асбоблари билан таъминлайди;

шартнома асосида қурилиш объектидаги қурилиш маҳсулотлари, материаллари, буюмлари, конструкцияларидан танлаб намуналар олади, синовдан ўтказади ва баённомалар расмийлаштиради;

мавжуд бинолар ва иншоотларнинг техник ҳолатини шартнома асосида ўрганади ва тегишли хулоса беради;

қурилиш ишларида мустаҳкамлик, сейсмик қоидаларнинг бузилиши натижасида аҳоли соғлиғи ва ҳаётига зарар етказилиши ёки оғир оқибатларга олиб келишининг олдини олиш мақсадида ҳуқуқни муҳофаза қилувчи органларга чоралар кўриш юзасидан тегишли ҳужжатларни илова қилган ҳолда хабар беради;

электрон рейтингларни жорий этиш учун белгиланган муддатларда «Шаффоф қурилиш» миллий ахборот тизимида маълумотларни тақдим этади.

12. Ҳудудий инспекция ҳуқуқбузарлик ҳолати бўйича эътироз билдирилган ҳолларда ишни кўриб чиқиш учун судга тақдим этиш тартибини сақлаб қолган ҳолда, ўз ваколати доирасида қонунчилик ҳужжатларининг бузилишига оид маъмурий ҳуқуқбузарликлар тўғрисидаги ишларни кўриб чиқади.

13. Кўп квартирали уйларнинг биринчи қаватини нотурар жой тоифасига ёки нотурар жойни кўп квартирали турар жой тоифасига ўтказишга рухсатнома беришда хулоса беради.

14. Ҳудудий инспекция:

унга юкланган вазифалар ва функцияларни самарали бажариш, шунингдек, қурилиш, кўп квартирали уй-жой фондини бошқариш, иссиқлик таъминотидан фойдаланиш ҳамда ичимлик суви таъминоти ва оқова сувларни чиқариб юбориш хизмати соҳасида давлат назоратини самарали амалга ошириш;

қурилиш объектларида ишлатилаётган қурилиш материаллари, конструкциялари ва буюмларининг техник жиҳатдан тартибга солиш соҳасидаги норматив ҳужжатлар талабларига мувофиқлигини назорат қилиш;

жисмоний ва юридик шахсларнинг ҳуқуқларига риоя этилишини ва қонуний манфаатлари ҳимоя қилинишини таъминлаш;

қурилиш соҳасида қонунчиликнинг ижро этилиши, аниқланган қонунбузарлик ҳолатларининг ўз вақтида кўриб чиқилишини таъминлаш ҳамда ўз ваколати доирасида тегишли чоралар кўриш;

ҳар ойлик, чораклик ва йиллик ҳисоботлар, маълумотлар ва статистика маълумотларининг ўз вақтида тақдим этилишини таъминлаш;

кўп квартирали уй-жой фондини бошқариш (хўжалик юритувчи субъектларнинг молиялаштириш манбаларидан қатъи назар, молия-хўжалик фаолиятига аралашмаган ҳолда), иссиқлик таъминотидан фойдаланиш, ичимлик суви таъминоти ва оқова сувларни чиқариб юбориш хизматини кўрсатиш ҳамда фойдаланиш юзасидан давлат назорати ва текширувини амалга ошириш (автомобиль йўллари ва йўл сунъий иншоотлари бундан мустасно);

соҳада аниқланган муаммоларни ҳар томонлама ва чуқур ўрганиш ҳамда умумлаштириш асосида ҳудудларда тегишли соҳани ривожлантиришга доир таклифлар тайёрлаш учун жавобгардир.

12. Қуйидагилар Ҳудудий инспекция бошлиғининг асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Ҳудудий инспекция фаолиятига умумий раҳбарлик қилиш, Ўзбекистон Республикаси Президентининг тегишли ҳужжатлари, Вазирлар Маҳкамасининг қарорлари, бошқа қонунчилик ҳужжатлари ҳамда Инспекциянинг ҳужжатлари билан Ҳудудий инспекцияга юкланган вазифа ва функциялар бажарилишини ташкил этиш;

бошлиқ ўринбосарлари ва таркибий тузилмалар раҳбарларининг ваколатларини белгилаш ва вазифаларни тақсимлаш;

Ҳудудий инспекция фаолияти режалаштирилишини ташкил этиш, Ҳудудий инспекциянинг даврий иш режаларини тасдиқлаш, уларнинг бажарилиши юзасидан назоратни таъминлаш;

Ўзбекистон Республикаси Президентининг фармонлари, қарорлари, фармойишлари, Вазирлар Маҳкамаси қарорлари, фармойишлари ва топшириқлари бажарилишини таъминлаш, Инспекция фаолиятида ижро интизомини мустаҳкамлаш бўйича комплекс чора-тадбирларни амалга ошириш, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон ҳамда «Давлат органлари ва ташкилотларда ижро интизомини янада мустаҳкамлашнинг қўшимча чора-тадбирлари тўғрисида» 2025 йил 25 июлдаги ПФ-117-сон фармонларига ҳамда «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида» 2021 йил 31 майдаги ПҚ-5132-сон қарорига мувофиқ таркибий бўлинма раҳбарларининг шахсий масъулиятини ошириш чораларини кўриш;

Ҳудудий инспекция раҳбарлари ва ходимлари хизмат сафарларини қонунчилик ҳужжатларида белгиланган талабларга мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

Ҳудудий инспекция ваколатига кирадиган масалалар бўйича кўрсатмалар чиқариш, буйруқлар қабул қилиш;

Ҳудудий инспекция ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Инспекция ходимлари одоб-ахлоқ қоидаларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга чиқиб қабул қилишни ташкил этиш;

давлат органлари ва бошқа ташкилотларда, Ўзбекистон Республикаси судларида, шунингдек, давлат органлари, халқаро ташкилотлар ва хорижий мамлакат вакиллари иштирокида ўтказиладиган расмий тадбирларда Ҳудудий инспекция номидан иштирок этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига риоя этиш, фаолиятда коррупциявий хавф-хатарларни ва манфаатлар тўқнашувини ўз вақтида аниқлаш ҳамда уларга чек қўйиш, коррупцияга оид ҳуқуқбузарликларнинг олдини олиш чораларини кўриш ҳамда тизимда коррупциянинг олдини олиш ва унга қарши муросасиз курашишга доир ишларга раҳбарлик қилиш ва мувофиқлаштириш;

Ўзбекистон Республикасининг «Манфаатлар тўқнашуви тўғрисида»ги Қонуни ва манфаатлар тўқнашуви билан боғлиқ муносабатларни тартибга солишга доир ишларга раҳбарлик қилиш ва мувофиқлаштириш;

Ўзбекистон Республикаси Президентининг Халқ қабулхоналари билан самарали ҳамкорлик қилишни ташкил этиш, Инспекция раҳбарлари ва ходимлари уларнинг фаолиятида фаол иштирок этишини, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушган мурожаатларини ўз вақтида ва тўлақонли кўриб чиқилишини таъминлаш;

Ҳудудий инспекция ходимларини уларнинг кўп йиллик ва самарали фаолияти, алоҳида хизматлари учун Ўзбекистон Республикаси давлат мукофотлари билан тақдирлаш учун белгиланган тартибда таклифлар киритишни таъминлаш ва тавсиялар бериш;

Ҳудудий инспекция мулкини қонунчилик ҳужжатларида белгиланган тартибда тасарруф этиш;

Ҳудудий инспекциянинг ички ташкилий масалалари юзасидан қарорлар қабул қилиш;

Ҳудудий инспекция ходимларини лавозимга тайинлаш ва лавозимдан озод этиш, меҳнат шартномалари (буйруқлари)ни имзолаш;

Ҳудудий инспекция ходимларига вазифаларни юклаш;

Ҳудудий инспекция ходимларининг малакасини ошириш ва уларни хорижий давлатларга стажировка ва тажриба алмашиш учун юборишни ташкил этиш;

Ҳудудий инспекция ходимларини рағбатлантириш ва интизомий жавобгарликка тортиш масалаларини ҳал қилиш, бошлиқ ўринбосарларини рағбатлантириш ва интизомий жавобгарликка тортиш масалаларини, шу жумладан, келгусида унинг эгаллаб турган лавозимида қолишининг мақсадга мувофиқлиги масалаларини кўриб чиқиш тўғрисида Инспекцияга таклифлар киритиш, уларнинг шахсий жавобгарлигини ошириш бўйича тизимли чоралар кўриш;

Ҳудудий инспекциянинг ташқи ва ички ташкилий фаолияти устидан доимий ва қатъий назорат ўрнатиш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш;

Ҳудудий инспекция харажатлари сметасини Инспекция билан келишган ҳолда тасдиқлаш;

ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

13. Қуйидагилар Ҳудудий инспекция бошлиғи ўринбосарларининг ўзлари мутасаддилик қиладиган соҳалар бўйича асосий функционал вазифалари ҳисобланади:

Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

Ҳудудий инспекция бошлиғи муайян сабабларга кўра (хизмат сафари, меҳнат таътили, бетоблиги даврида) йўқлигида унинг вазифаларини бажариш;

Ҳудудий инспекциянинг ўзи назорат қиладиган таркибий тузилмалари фаолиятини мувофиқлаштириш, назорат ва бевосита раҳбарлик қилиш, ходимлар ўртасида вазифаларни тақсимлаш;

Ҳудудий инспекция фаолиятининг ўзи мутасаддилик қиладиган йўналишларини янада такомиллаштириш юзасидан Ўзбекистон Республикаси Президентининг ҳужжатлари ва Вазирлар Маҳкамаси қарорлари билан тасдиқланган комплекс дастур ва комплекс чора-тадбирлар ижросини танқидий ва чуқур таҳлил қилиш;

мутасаддилигидаги таркибий тузилмалар бўлинма раҳбарларининг ҳисоботларини мунтазам эшитиб бориш ва белгиланган кўрсаткичларга эришиш учун уларнинг шахсий жавобгарлигини ошириш;

Ҳудудий инспекция бошлиғининг қонунчилик доирасидаги буйруқ ҳамда топшириқлари ижросини ўз вақтида ва сифатли таъминлаш;

Ҳудудий инспекцияга киритилган таклифлар ва тақдим этилган норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

кадрларни белгиланган тартибда танлаш ва жой-жойига қўйиш бўйича Ҳудудий инспекция бошлиғига таклифлар тақдим этиш, уларнинг профессионаллиги, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлаш, уларнинг касбий малакасини ошириш чораларини кўриш, мутасаддилик бўйича таркибий тузилмаларда кадрлар захирасини шакллантириш чораларини кўриш;

Ҳудудий инспекция ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Инспекция ходимларининг одоб-ахлоқ қоидалари талабларига риоя этилишини таъминлаш;

жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни, Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга чиқиб қабул қилишни ташкил этиш;

Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига ҳамда Ўзбекистон Республикасининг «Манфаатлар тўқнашуви тўғрисида»ги Қонунига риоя қилиш ва манфаатлар тўқнашуви билан боғлиқ муносабатларни тартибга солиш юзасидан чоралар кўриб бориш;

Ҳудудий инспекция фаолиятини такомиллаштириш бўйича амалий чоралар кўриш, ушбу соҳада қонунчиликни такомиллаштиришга доир таклифларни ишлаб чиқиб, кўриб чиқиш учун Ҳудудий инспекция бошлиғига киритиш;

давлат сири тоифасига киритилган ва махфий ахборот билан ишлашда қонунчилик талабларига риоя қилиш;

ўзи мутасаддилик қиладиган таркибий бўлинмаларда ходимларни танлаш ва жой-жойига қўйиш бўйича Ҳудудий инспекция бошлиғига таклифлар киритиш;

ўзи мутасаддилик қиладиган таркибий бўлинмалар раҳбарлари фаолияти самарадорлиги ва натижадорлигини мунтазам равишда танқидий таҳлил қилиш;

ўзи мутасаддилик қиладиган таркибий бўлинмалар раҳбарлари ва ходимларини рағбатлантириш ва интизомий жавобгарликка тортиш бўйича Ҳудудий инспекция бошлиғига таклифлар киритиш;

ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

14. Ҳудудий инспекция бошлиғи:

Ҳудудий инспекцияга юкланган вазифалар ва функцияларнинг бажарилиши учун;

Ҳудудий инспекциянинг ушбу Низомда назарда тутилган жавобгарлик соҳалари бўйича ҳамда мазкур Низомнинг 12-бандида кўрсатилган ўз функционал мажбуриятлари сифатли бажарилиши учун шахсан жавоб беради.

15. Ҳудудий инспекция бошлиғи ўринбосарлари:

мутасаддилик қилинадиган йўналиш ва таркибий бўлинмаларда Ҳудудий инспекцияга юкланган вазифалар ва функцияларнинг бажарилиши учун;

ушбу Низомнинг 13-бандида кўрсатилган ўз функционал вазифаларининг сифатли бажарилиши учун шахсан жавоб берадилар.

16. Ҳудудий инспекцияларнинг бошлиқлари ва уларнинг ўринбосарлари Инспекция бошлиғи томонидан қонунчиликда белгиланган тартибда лавозимга тайинланади ва лавозимидан озод этилади.

17. Ҳудудий инспекция бошлиғи:

Ҳудудий инспекция ходимлари учун мажбурий бўлган буйруқлар чиқаради ҳамда уларнинг бажарилишини назорат қилади;

ўринбосарлар ўртасида аниқ вазифалар ва функцияларни тақсимлайди, ходимлар ўртасида ваколатларни белгилайди ва мажбуриятларни тақсимлайди, таркибий бўлинмалар мансабдор шахсларининг ваколатларини белгилайди;

Ҳудудий инспекция бўлим бошлиқларини Инспекция билан келишган ҳолда лавозимга тайинлайди;

Ҳудудий инспекция ходимларини лавозимга тайинлайди ва лавозимдан озод этади;

Ҳудудий инспекция ходимлари фаолиятини рағбатлантириш учун тегишли буйруқлар чиқаради;

Ҳудудий инспекция фаолиятини, шу жумладан, моддий-техник базасини ташкил этиш ва ривожлантиришни ташкил этади;

Ҳудудий инспекцияни малакали, амалий тажрибага эга кадрлар билан тўлдириш, шунингдек, уларни саралаб олиш, тайёрлаш, қайта тайёрлаш ва уларнинг узлуксиз малакасини ошириш соҳасида кадрлар сиёсатини юритади.

Ҳудудий инспекция бошлиғи қонунчилик ҳужжатларига мувофиқ бошқа ваколатларни ҳам амалга ошириши мумкин.

18. Ҳудудий инспекция бошлиғи бўлмаган вақтда, унинг ваколатлари Ҳудудий инспекция бошлиғининг биринчи ўринбосари томонидан, у бўлмаган вақтда эса Ҳудудий инспекция бошлиғининг тегишли буйруғига асосан бошқа ўринбосар томонидан амалга оширилади.

19. Ҳудудий инспекциялар тузилмаси ва штат жадваллари (меҳнатга ҳақ тўлаш разрядлари Инспекция марказий аппарати ходимлари учун белгиланган меҳнатга ҳақ тўлаш разрядларидан бир поғона паст миқдорда қўлланади) Инспекция бошлиғи томонидан тасдиқланади.

20. Ҳудудий инспекция фаолиятининг самарадорлиги мунтазам баҳоланади.

21. Ҳудудий инспекция фаолияти самарадорлиги ва натижадорлигига берилган баҳо Инспекция бошлиғи томонидан тасдиқланадиган Ҳудудий инспекция фаолияти самарадорлиги ва натижадорлигини баҳолаш мезонлари ва иш индикаторларига асосланади.

22. Ҳудудий инспекция фаолияти самарадорлиги ва натижадорлигини баҳолаш якунлари бўйича:

Ҳудудий инспекция раҳбарлари ва ходимларини қўшимча рағбатлантириш (мукофотлаш) ёки интизомий жавобгарликка тортиш;

Ҳудудий инспекция фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

23. Ҳудудий инспекция фаолияти самарадорлиги ва натижадорлигини баҳолаш тартиби ва услуби қонунчилик ҳужжатлари билан белгиланади.

24. Ҳудудий инспекция фаолияти қуйидаги манбалар ҳисобидан молиялаштирилади:

давлат қурилиш назорати амалга ошириладиган барча объектлар учун Ҳудудий инспекцияга ажратмаларнинг қурилиш-монтаж ишлари қийматининг (қўшилган қиймат солиғисиз) Ҳудудий инспекция ихтиёрида қолдириладиган маблағлар;

Инспекциянинг бюджетдан ташқари маблағлари;

мавжуд бинолар ва иншоотларнинг техник ҳолатини текшириш бўйича шартнома асосида ишларни бажариш ва хизматлар кўрсатишдан, шунингдек, лаборатория хизматлари ва қонунчилик ҳужжатларида тақиқланмаган хизматларнинг бошқа турларини кўрсатишдан олинган даромадлар;

Ҳудудий инспекция хўжалик фаолияти ҳисобидан молиялаштирилади ва уларнинг инспекторлари сони рўйхатдан ўтган объектларнинг умумий сонидан, ҳажмидан ва масофасидан келиб чиққан ҳолда белгиланади.

25. Мавжуд бинолар ва иншоотларнинг техник ҳолатини текшириш бўйича бажарилаётган ишлар ва кўрсатилаётган хизматларнинг, шунингдек, синов-лаборатория хизматлари ва Инспекция томонидан кўрсатилаётган хизматлар бошқа турларининг қийматини аниқлаш методикаси Инспекция томонидан тасдиқланади.

26. Ҳудудий инспекция ходимларига меҳнатга ҳақ тўлаш, моддий рағбатлантириш ва ижтимоий ҳимоя қилишда Инспекция марказий аппарати ходимларини меҳнатига ҳақ тўлаш ва моддий рағбатлантириш тартибида белгиланган барча тўловлар татбиқ этилган ҳолда, Ҳудудий инспекция маблағлари ҳисобидан амалга оширилади.

Ҳудудий инспекциянинг моддий-техник базасини мустаҳкамлаш, шунингдек, ходимларини моддий рағбатлантириш, шу жумладан, қўшимча тўловлар, устама ҳақлар, мукофотлар, ижтимоий ва бошқа тўловларни тўлаш Ҳудудий инспекциялар ва Инспекциянинг бюджетдан ташқари маблағлари ҳисобидан қўшимча молиялаштириш орқали амалга оширилиши мумкин.

27. Меҳнатга ҳақ тўлаш бўйича ягона тариф сеткасидан фойдаланадиган хўжалик ҳисобидаги корхоналар ва ташкилотларга уларнинг молиявий имкониятларидан ва хўжалик фаолияти натижаларидан келиб чиққан ҳолда, ходимлар меҳнатига ҳақ тўлашни ташкил этиш учун асос сифатида Ягона тариф сеткасининг оширилган тариф коэффициентларини белгилаш ҳуқуқи берилиши мумкин.

28. Ҳудудий инспекция қонунчилик ҳужжатларида белгиланган тартибда қайта ташкил этилади ва тугатилади.

29. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.