«Ўзбекистон ҳаво йўллари» МАК ҳаво кемалари паркини «Боинг» компанияси (АҚШ) ишлаб чиқарган «Боинг-767-300ER» самолётлари билан янада янгилашни таъминлаш мақсадида Вазирлар Маҳкамаси қарор қилади:

1. Қуйидагилар:

Ислом тараққиёт банки (ИТБ) Ижрочи директорлар кенгаши томонидан 2013 йил 19 майда «Ўзбекистон ҳаво йўллари» Миллий авиакомпаниясининг ҳаво кемалари паркини янгилаш ва унификациялаш» инвестиция лойиҳасини амалга ошириш доирасида «Боинг-767-300ER» русумли учинчи ва тўртинчи самолётларни «Сотиш (харид қилиш) ва қайта лизинг» шартлари асосида 12 йил муддатга умумий қиймати 170 миллион АҚШ доллари миқдорида молиялаштириш маъқуллангани;

«Боинг» компанияси лойиҳа доирасида 2013 йил май ойида «Ўзбекистон ҳаво йўллари» МАКга учинчи самолётни етказиб бергани ва 2013 йил июнь ойида қурилган ҳамда фойдаланишга тайёр бўлган тўртинчи «Боинг-767-300ER» самолётини қиймати тўлангандан сўнг етказиб беришга тайёрлигини маълум қилгани;

сотиб олинадиган самолётлар қиймати ИТБнинг молиявий маблағлари ҳисобига қопланишини ҳисобга олиб, «Боинг» компанияси «Ўзбекистон ҳаво йўллари» МАК томонидан илгари тўланган 60,63 млн АҚШ доллари миқдоридаги аванс ва етказиб бериш тўловлари қайтарилишини кафолатлагани маълумот учун қабул қилинсин.

2. Ўзбекистон Республикаси Молия вазирлиги, Ташқи иқтисодий алоқалар, инвестициялар ва савдо вазирлиги, Ташқи иқтисодий фаолият миллий банки, «Ўзбекистон ҳаво йўллари» миллий авиакомпанияси, Ислом тараққиёт банки ва «Боинг» компанияси билан келишилган ҳолда учинчи ва тўртинчи «Боинг-767-300ER» самолётларини сотиб олишни молиялаштириш тартиби 1* ва 1-а иловаларга мувофиқ маъқуллансин.

3. Белгилансинки:

ИТБ молиявий маблағларидан мақсадли ва самарали фойдаланиш учун масъул ижро этувчи орган «Ўзбекистон ҳаво йўллари» Миллий авиакомпанияси ҳисобланади;

сублизинг тўловларини тўлаш ва уларга хизмат кўрсатиш билан боғлиқ харажатлар «Ўзбекистон ҳаво йўллари» МАКнинг ўз маблағлари ҳисобига амалга оширилади;

тузилган битимлар бўйича Ўзбекистон Республикаси Ташқи иқтисодий фаолият миллий банки ва «Ўзбекистон ҳаво йўллари» миллий авиакомпаниясининг мажбуриятлари юзасидан, шунингдек, сублизинг тўғрисидаги битимлар бўйича «Ўзбекистон ҳаво йўллари» миллий авиакомпаниясининг мажбуриятлари юзасидан Ўзбекистон Республикаси Ташқи иқтисодий фаолият миллий банкига ИТБ томонидан Ўзбекистон Республикаси Ҳукумати кафолатлари берилганлиги учун тўлов ундирилмайди.

4. Лойиҳа доирасида 2013 йилда учинчи ва тўртинчи «Боинг-767-300ER» самолётларини сотиб олиш учун ИТБ томонидан бериладиган молиявий маблағларни қайтариш жадваллари 2 ва 3-иловаларга* мувофиқ тасдиқлансин.

5. Ўзбекистон Республикаси Молия вазири:

Ўзбекистон Республикаси Ташқи иқтисодий фаолият миллий банкига «Ўзбекистон ҳаво йўллари» МАКнинг сублизинг тўғрисидаги битимлар бўйича мажбуриятлари юзасидан Ўзбекистон Республикаси кафолатларини берсин;

лойиҳа доирасида Ўзбекистон Республикаси Ташқи иқтисодий фаолият миллий банкига «Ўзбекистон ҳаво йўллари» МАК мажбуриятлари бўйича Ўзбекистон Республикасининг аввал берилган кафолатларига ушбу қарордан келиб чиқадиган ўзгартиришлар киритсин.

6. Ўзбекистон Республикаси Адлия вазирлиги «Ўзбекистон ҳаво йўллари» МАК ва ИТБ, Ўзбекистон Республикаси Ташқи иқтисодий фаолият миллий банки ва ИТБ ўртасидаги битимлар, шунингдек, Ўзбекистон Республикаси Ҳукумати ва ИТБ ўртасидаги Кафолат битимлари бўйича белгиланган тартибда юридик хулоса берсин.

7. «Ўзбекистон ҳаво йўллари» МАК:

ушбу қарор доирасида имзоланадиган битимларни тайёрлаш учун жалб қилинган халқаро консультантлар ва юридик компаниялар хизматлари учун ҳақ тўланиши таъминлансин;

Ўзбекистон Республикаси Ташқи иқтисодий фаолият миллий банки ҳамда Ўзбекистон Республикаси Тикланиш ва тараққиёт жамғармаси билан биргаликда лойиҳа доирасида илгари тузилган кредит шартномаларига мазкур қарордан келиб чиқадиган ўзгартиришлар киритилсин.

8. Ушбу қарор доирасида имзоланадиган келишувларнинг амал қилиш даври мобайнида:

2013 йилда «Ўзбекистон ҳаво йўллари» МАК учун сотиб олинадиган учинчи ва тўртинчи «Боинг-767-300ER» самолётлари божхона тўловларидан (божхона расмийлаштируви йиғимларидан ташқари);

Ўзбекистон Республикаси Ташқи иқтисодий фаолият миллий банки, «Ўзбекистон ҳаво йўллари» миллий авиакомпанияси ва Ислом тараққиёт банки ҳаво кемаларининг олди-сотди, лизинг ва сублизинг битимларини тузиш билан боғлиқ барча турдаги солиқларни тўлашдан;

ИТБ тузиладиган битимлар доирасида Ўзбекистон Республикасидаги тўлов манбаида даромад (фойда) солиқларини тўлашдан озод этилсин.

9. Ўзбекистон Республикаси Ҳукуматининг 4-иловага мувофиқ айрим қарорларига ўзгартиришлар киритилсин.

10. Ушбу қарор ижросини назорат қилиш Ўзбекистон Республикаси Бош вазири Ш.М. Мирзиёев зиммасига юклатилсин.

1. «Боинг» компанияси «Ўзбекистон ҳаво йўллари» МАКга иккита самолёт етказиб бермоқда, улардан учинчиси 2013 йилнинг май ойида, тўртинчиси 2013 йилнинг июнь ойида етказиб берилади.

2. Ўзбекистон Республикаси Ҳукумати, Ўзбекистон Республикаси Ташқи иқтисодий фаолият миллий банки, «Ўзбекистон ҳаво йўллари» миллий авиакомпанияси ҳамда Ислом тараққиёт банки ўртасида 2013 йилда иккита «Боинг-767-300ER» самолётини харид қилишни молиялаштиришга доир тегишли битимлар (ҳар бир самолёт учун алоҳида) имзоланади.

3. «Ўзбекистон ҳаво йўллари» МАК самолётларни олди-сотди шартномалари асосида самолётларга бўлган бенефициар мулкчилик ҳуқуқини «Боинг» компаниясидан харид қилиш қиймати бўйича ИТБга ўтказади.

4. Ислом тараққиёт банки «Ўзбекистон ҳаво йўллари» миллий авиакомпаниясига «Боинг» компанияси билан ҳисоб-китоб қилиши учун ҳар бир самолётнинг тўлиқ қиймати миқдорида маблағ ажратмоқда.

5. «Ўзбекистон ҳаво йўллари» МАК ИТБдан олган маблағларни ҳар бир самолётнинг қиймати ҳисобига «Боинг» компаниясига ўтказади.

6. «Боинг» компанияси «Ўзбекистон ҳаво йўллари» Миллий авиакомпаниясига ушбу самолётлар бўйича олдиндан тўланган 60,63 миллион АҚШ доллари миқдоридаги аванс ва етказиб бериш тўловларининг бир қисмини қайтармоқда. Бу суммага Ўзбекистон Республикаси Тикланиш ва тараққиёт жамғармасининг 50,38 миллион АҚШ доллари ҳамда «Ўзбекистон ҳаво йўллари» Миллий авиакомпаниясининг 10,25 миллион АҚШ доллари миқдоридаги ўз маблағлари киради.

7. «Ўзбекистон ҳаво йўллари» МАК илгари «Боинг» компаниясига аванс тўловлари сифатида тўланган 50,38 миллион АҚШ доллари миқдоридаги маблағни Ўзбекистон Республикаси Тикланиш ва тараққиёт жамғармасига муддатидан олдин қайтармоқда.

8. ИТБ Ўзбекистон Республикаси Ташқи иқтисодий фаолият миллий банкига самолётларни лизинг битимлари бўйича 12 йил муддатга лизингга беради.

9. Ўзбекистон Республикаси Ташқи иқтисодий фаолият миллий банки сублизинг битимлари бўйича самолётларни «Ўзбекистон ҳаво йўллари» миллий авиакомпаниясига сублизингга беради.

10. «Ўзбекистон ҳаво йўллари» МАК ва ИТБ суғурта ҳуқуқларини ўтказиш тўғрисидаги битимларни имзолайдилар. Бу битимлар «Ўзбекистон ҳаво йўллари» МАКнинг иккита «Боинг-767-300ER» самолётини суғурталаш бўйича товон олиш ҳуқуқини ИТБ фойдасига ўтказишни назарда тутади.

11. Ўзбекистон Республикаси Ташқи иқтисодий фаолият миллий банки ва ИТБ хизмат кўрсатувчи агент тўғрисидаги битимларни, шунингдек, ҳаво кемаларини сотиб олиш ва сотиш мажбуриятларини имзолайди.

12. Ўзбекистон Республикаси Ташқи иқтисодий фаолият миллий банки ва «Ўзбекистон ҳаво йўллари» миллий авиакомпанияси Ўзбекистон Республикаси Ташқи иқтисодий фаолият миллий банки томонидан ИТБ билан сервис агенти тўғрисидаги битимлар бўйича ўз функциялари ва мажбуриятларини «Ўзбекистон ҳаво йўллари» миллий авиакомпанияси фойдасига ўтказиш тўғрисидаги битимларни имзолайди.

13. Ўзбекистон Республикаси Ҳукумати ва ИТБ тузилган битимлар доирасида Ўзбекистон Республикаси Ташқи иқтисодий фаолият миллий банки ва «Ўзбекистон ҳаво йўллари» миллий авиакомпаниясининг мажбуриятлари бўйича Кафолат битимларини имзолайди.

1. Вазирлар Маҳкамасининг «Ўзбекистон ҳаво йўллари» МАК ҳаво кемалари паркини янгилаш ва унификациялаш чора-тадбирлари тўғрисида» 2009 йил 13 июлдаги 198-сон қарори 3-бандида:

биринчи хатбошидаги «техника» сўзидан сўнг «(тўртта «Боинг-767-300ER» самолёти ва уларга мўлжалланган захира двигатели бундан мустасно)» сўзлари киритилсин;

тўртинчи хатбошидан кейин қуйидаги мазмундаги хатбошилар қўшилсин:

«Тўртта « Боинг-767-300ER» самолёти ва уларга мўлжалланган захира двигатель бўйича қуйидагилар молиялаштириш манбалари эканлиги маълумот учун қабул қилинсин:

биринчи ва иккинчи самолётлар, шунингдек, захира двигатель учун — техника қийматининг 90 фоизи миқдорида Ўзбекистон Республикаси Тикланиш ва тараққиёт жамғармасининг кредитлари ҳамда техника қийматининг 10 фоизи миқдорида «Ўзбекистон ҳаво йўллари» МАКнинг ўз маблағлари;

учинчи ва тўртинчи самолётлар учун — Ислом тараққиёт банкининг (ИТБ) техника қийматининг 100 фоизи миқдоридаги молиявий маблағлари»;

бешинчи хатбоши саккизинчи хатбоши деб ҳисоблансин.

2. Вазирлар Маҳкамасининг «Ўзбекистон ҳаво йўллари» МАК ҳаво кемалари паркини янгилаш ва унификациялаш» инвестиция лойиҳасини амалга оширишга доир қўшимча чора-тадбирлар тўғрисида» 2012 йил 3 февралдаги 29-сон қарорининг 3-банди иккинчи хатбоши ва қарорга 1-илова чиқариб ташлансин.