“Mahalliy davlat hokimiyati toʻgʻrisida”gi Oʻzbekiston Respublikasi Qonunining 6, 25-moddalari (Oʻzbekiston Respublikasi Oliy Kengashining Axborotnomasi, 1993-yil, 9-son, 320-modda), “Yoʻl harakati xavfsizligi toʻgʻrisida”gi Oʻzbekiston Respublikasi Qonunining (Oʻzbekiston Respublikasi Qonun hujjatlari toʻplami, 2013-yil, 15-son 197-moddasi) 7-moddasi, Vazirlar Mahkamasining 2003-yil 31-yanvardagi 54-son qarori bilan tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizom (Oʻzbekiston Respublikasi Qonun hujjatlari toʻplami, 2003-y, 1-2-son, 17-modda) hamda 2017-yil 22-dekabrdagi 1010-son “Transport vositalarini majburiy texnik koʻrikdan oʻtkazish tartibini takomillashtirishga doir qoʻshimcha chora-tadbirlar toʻgʻrisida”gi qarorining tegishli bandlariga muvofiq 2019-yilda Xovos tumanidagi yuridik va jismoniy shaxslarga tegishli avtomototransport vositalari va ularga tirkamalarning majburiy texnik koʻrigini tashkil qilish maqsadida, qaror qilaman:

1. Tuman hududidagi mulkchilik shaklidan qatʼiy nazar yuridik va jismoniy shaxslarga tegishli avtomototransport vositalari va ularga tirkamalar tegishli tartibda majburiy texnik koʻrikdan oʻtkazilsin.

2. Jismoniy shaxslarga tegishli M1 toifadagi transport vositalarining texnik reglamentlar yoki standartlar talablariga, yoʻl harakati xavfsizligi qoidalari, normalariga muvofiqligi tadbirkorlik subyektlari — yuridik shaxslar tomonidan ham baholanishi mumkin.

Bunda jismoniy shaxslar — M1 toifadagi transport vositalari egalari oʻz transport vositasining texnik holati va uskunalari muvofiqligini baholash uchun oʻz tanloviga koʻra, tuman davlat yoʻl harakati xavfsizligi xizmati organi, xususiy texnik xizmat koʻrsatish stansiyalari yoki tadbirkorlik subyektlariga murojaat qilishlari mumkin.

3. Transport vositalari quyidagi davriylikka muvofiq texnik koʻrikdan oʻtkazilsin:

a) tijorat asosida yoʻlovchilar tashish uchun foydalaniladigan yengil avtomobillar, avtobuslar, va oʻtiriladigan joylari soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalar — bir yilda ikki marta;

b) ishlab chiqarilganligiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (mazkur bandning “a” kichik bandida koʻrsatilgan transport vositalaridan tashqari)– ikki yilda bir marta;

v) ishlab chiqarilgan yilini hisobga olgan holda ishlab chiqarilganligiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari, (mazkur bandning “a” kichik bandida koʻrsatilgan transport vositalaridan tashqari) — bir yilda bir marta;

g) tirkamalar koʻrikka transport vositasi — shatakchi uchun belgilangan muddatlarda.

d) navbatdagi texnik koʻrikdan oʻtkazishning ilgari oʻrnatilgan muddatlaridan qatʼi nazar, ularni tuman davlat yoʻl harakati xavfsizligi xizmati organida roʻyxatdan oʻtkazish (qayta roʻyxatdan oʻtkazish) vaqtida;

e) ular ishlab chiqarilgan yildan qatʼi nazar tuman davlat yoʻl harakati xavfsizligi xizmati organi organida roʻyxatdan oʻtkazilgan kundan boshlab bir yil oʻtgach (loyihaning “a” kichik bandida koʻrsatilgan holatlar bundan mustasno).

4. Mazkur qarorning 3-bandi “a” kichik bandida koʻrsatilgan transport vositalarining texnik koʻrigi:

birinchi marta — 1-mart — 30-iyunda;

ikkinchi marta — 1-sentabr — 31-oktabrda oʻtkazilsin.

Yuridik shaxslarga qarashli boʻlgan transport vositalarining texnik koʻrigi 1-mart — 30-iyunda oʻtkazilsin.

Jismoniy shaxslarga qarashli boʻlgan transport vositalarining texnik koʻrigi 1-yanvar — 31-avgustda oʻtkazilsin.

Transport vositasi texnik koʻrikka belgilangan muddatlardan oldin taqdim etilishi mumkin. Ushbu holda transport vositasini texnik koʻrikka taqdim etish muddatini oʻzgartirish toʻgʻrisidagi qaror transport vositasi egasi — yuridik yoki jismoniy shaxsning yozma arizasi asosida tuman davlat yoʻl harakati xavfsizligi xizmati organi rahbari tomonidan qabul qilinadi.

5. Transport vositalarini texnik koʻrikdan oʻtkazilganlik uchun qonun hujjatlarida belgilangan tartibda va miqdorda yigʻim undiriladi.

6. Yuridik va jismoniy shaxslarning transport vositalarini texnik koʻrikdan oʻtkazish jadvali 1-ilovaga* muvofiq, yuridik va jismoniy shaxslarning transport vositalarini texnik koʻrikdan oʻtkazish komissiyasining tarkibi 2-ilovaga muvofiq tasdiqlansin.

7. Oʻzbekiston Respublikasi Vazirlar Mahkamasining 2003-yil 31-yanvardagi 54-sonli qarorining 3-bandi talabidan kelib chiqib, tuman mudofaa boʻlimi, ichki ishlar boʻlimi, davlat xavfsizlik xizmatining harbiy boʻlinmalari va milliy gvardiyaga tegishli transport vositalari ushbu idoralar tomonidan belgilangan tartibda majburiy texnik koʻrikdan oʻtkazilishi nazarda tutilsin.

8. Majburiy texnik koʻrik davomida komissiya tarkibida ish olib borgan xodimlarning doimiy ish joylaridagi oylik ish haqlari saqlanib qolinsin.

9. Mazkur qaror qabul qilinishi munosabati bilan tuman hokimining 2018-yil 10-martdagi 867-sonli qarori oʻz kuchini yoʻqotgan deb hisoblansin.

10. Qaror “Xovos ovozi” gazetasida rasmiy eʼlon qilinsin hamda tuman hokimligining veb-saytiga joylashtirilsin.

11. Mazkur qaror rasmiy eʼlon qilingan kundan boshlab kuchga kiradi.

12. Qarorning ijrosini nazorat qilish tuman hokimining oʻrinbosari J. Mansurov zimmasiga yuklatilsin.