Oʻzbekiston Respublikasining “Aholini ish bilan taʼminlash toʻgʻrisida”gi Qonuni va Respublika Vazirlar Mahkamasining 1999-yil 19-iyuldagi 353-sonli “Haq toʻlanadigan jamoat ishlarini tashkil qilish toʻgʻrisidagi Nizomni tasdiqlash haqida”gi qarori ijrosini taʼminlash hamda mehnat bozoridagi vaziyatni yaxshilash maqsadida tuman Bandlikka koʻmaklashish va aholini ijtimoiy muhofaza qilish markazining shu hususidagi xatini koʻrib chiqib, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasiga asosan qaror qilaman:

1. Oʻzbekiston Respublikasi “Aholini ish bilan taʼminlash toʻgʻrisida”gi Qonunining 22-moddasi, Respublika Vazirlar Mahkamasining 1999-yil 19-iyuldagi 353-sonli qarori bilan tasdiqlangan “Haq toʻlanadigan jamoat ishlarini tashkil qilish toʻgʻrisida”gi Nizom talablaridan kelib chiqib, ish qidirayotgan shaxs sifatida tuman Bandlikka koʻmaklashish va aholini ijtimoiy muhofaza qilish markazida roʻyxatga olingan fuqarolarga ularning vaqtincha ish haqi olishi, ish qidirayotgan davrda moddiy jihatdan qoʻllab-quvvatlash maqsadida 2012-yil uchun tuman hududidagi tashkilot, korxona va muassasalar hamda xoʻjaliklarda haq toʻlanadigan jamoat ishlari tashkil qilinsin.

2. Haq toʻlanadigan jamoat ishlarini tashkil qiluvchi tashkilot, korxona va muassasa hamda xoʻjaliklarda bajariladigan ishlar roʻyxati ilovaga asosan tasdiqlansin.

3. Haq toʻlanadigan jamoat ishlarini tashkil qilish taklifi bilan chiqadigan barcha tashkilot, korxona va muassasalar rahbarlari tuman Bandlikka koʻmaklashish va aholini ijtimoiy muhofaza qilish markazi (Q. Xoliqov) bilan shartnomalar tuzsinlar.

4. Belgilab qoʻyilsinki:

haq toʻlanadigan jamoat ishlariga jalb qilingan fuqarolar mehnatiga haq toʻlash xarajatlari davlat hokimiyati organlariga qarashli korxonalar, muassasalar va tashkilotlar boʻyicha ellik foizi ish beruvchilar mablagʻlari va ellik foizi mahalliy budjet va Ish bilan taʼminlashga koʻmaklashish davlat jamgʻarmasi mablagʻlari hisobiga, boshqa korxonalar, muassasalar va tashkilotlar boʻyicha yetmish besh foizi ish beruvchilar mablagʻlari va yigirma besh foizi Ish bilan taʼminlashga koʻmaklashish davlat jamgʻarmasi mablagʻlari hisobiga amalga oshiriladi.

Vazirlar .Mahkamasining 1999-yil 19-iyuldagi 353-sonli qarori bilan tasdiqlangan “Haq toʻlanadigan jamoat ishlarini tashkil qilish toʻgʻrisida”gi Nizomning yigirma beshinchi bandiga muvofiq aholini ish bilan taʼminlashda noqulay vaziyatlar bilan bogʻliq istisno hollarda, shuningdek haq toʻlanadigan jamoat ishlarini tashkil qilish uchun ish beruvchilarni qiziqtirish maqsadida haq toʻlanadigan jamoat ishlariga jalb qilingan fuqarolar mehnatiga haq toʻlash xarajatlari Ish bilan taʼminlashga koʻmaklashish davlat jamgʻarmasi mablagʻlari hisobiga quyidagi miqdorlarda qoplanishi mumkin:

joylardagi davlat hokimiyati organlari mulki boʻlgan korxonalarda, xoʻjalik hisobidagi korxonalardan tashqari mehnatga haq toʻlash xarajatlarining koʻpi bilan yetmish besh foizi;

boshqa korxonalarda mehnatga haqtoʻlash uchun xarajatlarining koʻpi bilan ellik foizi.

5. Ushbu qarorning ijrosini nazorat qilish tuman hokimining oʻrinbosari O. Qobulov zimmasiga yuklatilsin.