Ushbu Qonun Oʻzbekiston Respublikasida geodeziya va kartografiyaga oid faoliyatning huquqiy asoslarini belgilaydi hamda davlatning, yuridik va jismoniy shaxslarning geodeziya va kartografiya mahsulotiga boʻlgan ehtiyojlarini qondirish uchun shart-sharoitlar yaratishga qaratilgan.

Geodeziya va kartografiyaga oid faoliyat sohasidagi munosabatlar ushbu Qonun va Oʻzbekiston Respublikasining boshqa qonun hujjatlari bilan tartibga solinadi.

Agar Oʻzbekiston Respublikasining xalqaro shartnomasida geodeziya va kartografiya toʻgʻrisidagi qonun hujjatlarida nazarda tutilganidan boshqacha qoidalar belgilab qoʻyilgan boʻlsa, xalqaro shartnoma qoidalari qoʻllaniladi.

Oʻzbekiston Respublikasining hududi, tabiiy osmon jismlarini qoʻshgan holda kosmik fazo geodeziya va kartografiyaga oid faoliyatning obyektlari hisoblanadi.

Oʻz vakolatiga muvofiq geodeziya va kartografiyaga oid faoliyatni tartibga soluvchi davlat hokimiyati va boshqaruv organlari, geodeziya va kartografiya ishlarining buyurtmachilari yoki ijrochilari yoxud geodeziya va kartografiya materiallarining (maʼlumotlarining) egalari hisoblanuvchi, shuningdek geodeziya va kartografiya mahsulotini sotuvchi yuridik hamda jismoniy shaxslar geodeziya va kartografiyaga oid faoliyatning subyektlari jumlasiga kiradi.

Oʻzbekiston Respublikasi Hukumati:

Oʻzbekiston Respublikasi hududida geodeziya va kartografiya ishi bilan shugʻullanuvchi barcha subyektlarning faoliyatini muvofiqlashtiradi;

davlat hokimiyati va boshqaruv organlarining buyurtmalari boʻyicha umumdavlat ahamiyatiga molik geodeziya va kartografiya ishlari, shuningdek maxsus (tarmoqqa oid) ishlar bajarilishini tashkil etadi;

davlat topografiya xaritalari va rejalarining yagona davlat koordinatalar, balandliklar, gravimetriya oʻlchovlari tizimlarini, masshtab qatorlarini belgilaydi;

geodeziya va kartografiyaga oid faoliyatni boshqaruvchi davlat organini belgilaydi;

oʻz vakolati doirasida boshqa vazifalarni amalga oshiradi.

Davlat geodeziya nazoratining asosiy vazifalari quyidagilardan iborat:

geodeziya va kartografiyaga oid faoliyat bilan shugʻullanuvchi barcha subyektlar normativ-texnikaviy hujjatlar talablariga rioya etishi ustidan nazorat qilish;

Oʻzbekiston Respublikasining davlat chegaralari va hududi kartografiya xaritalari va boshqa hujjatlarda toʻgʻri aks ettirilishi ustidan nazorat qilish;

geodeziya va kartografiyaga oid ishlarni roʻyxatga olish;

geodeziya punktlarini hisobga olish;

davlat kartografiya-geodeziya fondining ishlashini taʼminlash;

Oʻzbekiston Respublikasining oʻzgartishlar kiritib boriladigan maʼlumotnoma tariqasidagi xaritasini yuritish.

Davlat geodeziya nazoratining mansabdor shaxslari ushbu moddaning birinchi qismida nazarda tutilgan vazifalarni amalga oshirish uchun quyidagi huquqlarga ega:

geodeziya va kartografiyaga oid ishlarni tashkil qilish hamda amalga oshirish, shuningdek ana shu ishlarni va aerokosmik suratga olishlarni bajarish natijasida olingan materiallarni (maʼlumotlarni) jamlash, hisobga olish, saqlash, foydalanish va sotish tartibini buzish hollari aniqlanganida ularni bartaraf etishni talab qilish;

geodeziya va kartografiyaga oid faoliyat masalalari yuzasidan barcha zarur hujjatlar bilan tanishish uchun korxonalar, muassasalar va tashkilotlarga kirish;

korxonalar, muassasalar va tashkilotlardan ushbu Qonunda nazarda tutilgan vazifalarni bajarish uchun zarur boʻlgan axborotni olish.

Oʻzbekiston Respublikasida Davlat geodeziya nazorati toʻgʻrisidagi nizom Oʻzbekiston Respublikasi Hukumati tomonidan tasdiqlanadi.

Quyidagilar davlat ahamiyatiga molik geodeziya va kartografiya ishlari jumlasiga kiradi:

Yer shaklining va tashqi gravitatsiya maydonining parametrlarini aniqlash;

davlat topografiya xaritalari va rejalarini grafik, raqamli, fotografik va boshqa shakllarda yaratish, yangilab turish va nashr qilish;

davlat geodeziya va nivelir tarmoqlarini yaratish, rivojlantirish va ish holatida saqlab turish;

Yerni masofadan turib zondlash va geodinamik tadqiq etish;

Oʻzbekiston Respublikasining kartografiya-geodeziya fondini shakllantirish va uni boshqarish;

geografik axborot tizimlarini yaratish va uni boshqarish;

umumiy geografik, siyosiy-maʼmuriy, ilmiy-axborot beradigan va boshqa tarmoqlararo ahamiyatga molik tematik xaritalar va atlaslar, oʻquv kartografiya qoʻllanmalari tuzish va nashr kilish;

Oʻzbekiston Respublikasining davlat chegaralari dyelimitatsiya, demarkatsiya qilinishini va davlat chegarasi chizigʻining oʻtishi tekshirilishini geodeziya, topografiya, kartografiya va gidrografiya jihatidan taʼminlash;

geodeziya, topografiya va kartografiya ishlarini metrologiya jihatidan taʼminlash;

geografik nomlarni standartlash, hisobga olish va ularning qoʻllanilishini tartibga solish;

geodeziya va kartografiya texnikasini koʻplab ishlab chiqarishni tashkil etish.

Quyidagilar maxsus (tarmoqqa oid) ahamiyatga molik geodeziya va kartografiya ishlari jumlasiga kiradi:

shaharlar, aholi punktlarining, turli obyektlar kurilish uchastkalarining bosh rejalarini, yer osti tarmoqlari va inshootlari loyihalarini tuzish, binolar va inshootlarni qurilish uchastkalariga bogʻlash, shuningdek boshqa maxsus ishlarni bajarish uchun moʻljallangan topografik rejalarni yaratish va ularni yangilab turish;

maxsus ahamiyatga molik geografik axborot tizimlarini yaratish va ularni boshqarish;

maxsus ahamiyatga molik tematik xaritalar va atlaslar nashr qilish;

muhandislik qidiruv ishlari, turli inshootlarni qurish va ulardan foydalanish, yer uchastkalarining chegaralarini ajratish, kadastrlarni yuritish va boshqa qidiruv ishlari chogʻida geodeziya, topografiya ishlari, aero suratga olish va boshqa maxsus ishlarni bajarish.

Geodeziya va kartografiyaga oid faoliyat sohasidagi normativ-texnikaviy hujjatlar geodeziya va kartografiya ishlarini tashkil etish tartibini, ularga nisbatan qoʻyiladigan texnikaviy talablarni, ularni bajarish normalari va qoidalarini belgilaydi hamda Oʻzbekiston Respublikasi Hukumati yoki u vakolat bergan organ tomonidan tasdiqlanadi.

Geodeziya va kartografiyaga oid faoliyat sohasidagi normativ-texnikaviy hujjatlar geodeziya va kartografiyaga oid faoliyatning barcha subyektlari ijro etishi uchun majburiydir.

Geodeziya oʻlchovlarining bir xilligini taʼminlash, geodeziya oʻlchov vositalarining sinovini amalga oshirish, koʻrsatilgan vositalarni hamda geodeziya, topografiya va kartografiya mahsulotini majburiy sertifikatlash boʻyicha oʻtkazilgan ishlarni standartlashtirishda, geodeziya va kartografiyaga oid faoliyat sohasida metrologiya nazoratini amalga oshirishda ishtirok etish geodeziya va kartografiyaga oid faoliyatni boshqaruvchi organ zimmasiga yuklatiladi.

Davlat ahamiyatiga molik geodeziya va kartografiyaga oid faoliyat davlat budjeti mablagʻlari hisobidan moliyaviy taʼminlanadi.

Maxsus ahamiyatga molik geodeziya va kartografiyaga oid faoliyat buyurtmachining mablagʻlari hisobidan moliyaviy taʼminlanadi.

Geodeziya va kartografiya mahsuloti, shu jumladan davlat budjeti mablagʻlari hisobidan amalga oshiriladigan faoliyat natijasida olingan topografiya, gidrografiya, aerokosmik surat, geodeziya va gravimetriya materiallari (maʼlumotlari) davlat mulki hisoblanadi.

Oʻzbekiston Respublikasining kartografiya-geodeziya fondi tarkibida davlat va idoraviy kartografiya-geodeziya fondlari boʻladi.

Davlat kartografiya-geodeziya fondi umumdavlat, tarmoqlararo ahamiyatga ega boʻlgan materiallardan (maʼlumotlardan) tashkil topadi hamda geodeziya va kartografiyaga oid faoliyatni boshqaruvchi organ ixtiyorida boʻladi.

Idoraviy kartografiya-geodeziya fondlari maxsus (tarmoqqa oid) ahamiyatga ega boʻlgan materiallardan (maʼlumotlardan) tashkil topadi hamda tegishli organlar ixtiyorida boʻladi.

Davlat va idoraviy kartografiya-geodeziya fondlari toʻgʻrisidagi nizomlar hamda ularning tarkibidagi materiallarning (maʼlumotlarning) roʻyxatlari Oʻzbekiston Respublikasi Hukumati belgilaydigan tartibda tasdiqlanadi.

Oʻzbekiston Respublikasi davlat kartografiya-geodeziya fondining belgilangan tartibda Oʻzbekiston Respublikasi Arxiv fondi tarkibiga kiritilgan materiallari (maʼlumotlari) qonun hujjatlariga muvofiq saqlanadi.

Oʻzbekiston Respublikasi davlat kartografiya-geodeziya fondining materiallarini (maʼlumotlarini) uchinchi shaxslarga berishga va ulardan nusxalar olishga ixtiyorida ana shu materiallar (maʼlumotlar) boʻlgan organlarning ruxsatisiz yoʻl qoʻyilmaydi.

Oʻzbekiston Respublikasi xududida geodeziya va kartografiyaga oid faoliyatni amalga oshirayotgan yuridik va jismoniy shaxslar oʻzlari yaratgan geodeziya va kartografiya materiallarining (maʼlumotlarining) bir nusxasini tegishli kartografiya-geodeziya qoidalariga bepul berishlari shart.

Yuridik va jismoniy shaxslar tomonidan materiallarning (maʼlumotlarning) tegishli kartografiya-geodeziya fondlariga berilishi, ana shu materiallar va maʼlumotlarning saqlanishi va ulardan foydalanilishi ustidan davlat geodeziya nazoratini, idoraviy kartografiya-geodeziya fondlarining davlat reyestrini yuritishni geodeziya va kartografiyaga oid faoliyatni boshqaruvchi organ amalga oshiradi.

Oʻzbekiston Respublikasi kartografiya-geodeziya fondining materiallaridan (maʼlumotlaridan) foydalanuvchilar olingan materiallarning (maʼlumotlarning) asralishini taʼminlashlari, ularni belgilangan muddatlarda qaytarishlari hamda ulardagi davlat siri boʻlgan maʼlumotni oshkor etmasliklari shart.

Oʻzbekiston Respublikasi davlat kartografiya-geodeziya fondining materiallaridan (maʼlumotlaridan) foydalanganlik uchun qonun hujjatlarida belgilangan tartibda haq toʻlanadi.

Geodeziya va kartografiya mahsulotiga, shu jumladan geodeziya va kartografiyaga oid faoliyat natijasida olingan topografiya, gidrografiya va aerokosmik surat materiallariga, geodeziya va gravimetriya maʼlumotlariga boʻlgan mualliflik huquqlari qonun hujjatlari bilan tartibga solinadi.

Geodeziya va kartografiyaga oid faoliyat qonun hujjatlarida belgilangan tartibda litsenziyalanishi lozim.

Yuridik va jismoniy shaxslar tomonidan geodeziya va kartografiyaga oid faoliyatni litsenziyasiz yoxud litsenziyada koʻrsatilgan shartlarni buzgan holda amalga oshirish qonun hujjatlariga muvofiq javobgarlikka sabab boʻladi.

Davlat organlari va ular mansabdor shaxslarining geodeziya va kartografiyaga oid faoliyatni litsenziyalash bilan bogʻliq xatti-harakati ustidan sudga shikoyat qilinishi mumkin.

Astronomiya-geodeziya, geodeziya, nivelir va gravimetriya punktlarining yer ustidagi belgilari hamda markazlari, shu jumladan yorugʻlik mayoqlarida, navigatsiya belgilarida va boshqa muxandislik konstruksiyalarida joylashtirilgan geodeziya punktlari davlat mulki hisoblanadi va davlat muhofazasi ostida boʻladi.

Geodeziya punktlari joylashgan yerning mulkdorlari, yer uchastkalarining egalari va foydalanuvchilari geodeziya punktlari shikastlantirilgan yoki yoʻq qilingan barcha hollar toʻgʻrisida davlat geodeziya nazoratini amalga oshiruvchi, organni xabardor qilishlari, shuningdek geodeziya va kartografiyaga oid ishlarni amalga oshirish paytida geodeziya punktlariga kirishga (borishga) imkon berishlari shart.

Geodeziya punktlarini joylashtirish uchun yer uchastkalarini ajratish qonun hujjatlariga muvofiq amalga oshiriladi.

Geodeziya punktlarini qoʻriqlash toʻgʻrisidagi nizom Oʻzbekiston Respublikasi Hukumati tomonidan tasdiqlanadi.

Geodeziya va kartografiyaga oid faoliyat natijasida shaxsga yoxud yuridik yoki jismoniy shaxsning mol-mulkiga yetkazilgan zarar qonunda belgilangan tartibda qoplanishi lozim.

Geodeziya va kartografiyaga oid faoliyat toʻgʻrisidagi qonun hujjatlarini buzish qonun hujjatlariga muvofiq javobgarlikka tortishga sabab boʻladi.