“Geodeziya va kartografiya to‘g‘risida” O‘zbekiston Respublikasi Qonuniga muvofiq O‘zbekiston Respublikasi hududida geodeziya punktlarining saqlanishini ta’minlash maqsadida Vazirlar Mahkamasi qaror qiladi:

1. O‘zbekiston Respublikasi hududida Qo‘riqlanadigan geodeziya zonalari va geodeziya punktlarini qo‘riqlash to‘g‘risidagi ilova qilinayotgan Nizom tasdiqlansin.

2. Mazkur qarorning bajarilishini nazorat qilish O‘zbekiston Respublikasi Vazirlar Mahkamasining Industriyani rivojlantirish kompleksi Kotibiyatiga yuklansin.

1. Mazkur Nizom “Geodeziya va kartografiya to‘g‘risida” O‘zbekiston Respublikasi Qonuniga muvofiq O‘zbekiston Respublikasi hududida geodeziya punktlari qo‘riqlanishini ta’minlash tartibini belgilaydi.

2. Geodeziya punkti maxsus markaz, sirtqi belgi va geodeziya punktining chegarasi hisoblanadigan zovur yoki tuproq devor ko‘rinishidagi tashqi shakldan iborat bo‘ladi.

Geodeziya punktining tashqi shakli mavjud bo‘lmagan taqdirda sirtqi belgining asosi uning chegarasi hisoblanadi.

Sirtqi belgilarga ega bo‘lmagan, maxsus markazlari esa imoratlar va boshqa inshootlarning devorlariga joylashtirilgan geodeziya punktlari uchun punktlarning chegaralari va Qo‘riqlanadigan zonalari belgilanmaydi.

3. Geodeziya punkti joylashgan yer uchastkasi va tashqi tomondan punkt chegarasiga tutashib ketuvchi 1 metr kenglikdagi yer geodeziya punktining Qo‘riqlanadigan zonasi hisoblanadi.

4. Geodeziya punktining Qo‘riqlanadigan zonasi doirasida O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasining ruxsatisiz sirtqi belgining shikastlanishi va yo‘q qilinishiga, maxsus markaz joylashgan joyning o‘zgarmasligi buzilishiga olib kelishi yoki geodeziya punktidan uning bevosita vazifasiga ko‘ra foydalanishda va unga erkin borishda qiyinchilik tug‘dirishi mumkin bo‘lgan faoliyat turlarini amalga oshirish va ishlarni bajarish taqiqlanadi.

5. Geodeziya punktlari qo‘riqlanishini ta’minlash zarur bo‘lgan hollarda fuqarolik qonun hujjatlarida belgilangan tartibda servitut* o‘rnatiladi.

6. O‘z ishida geodeziya punktlaridan foydalanuvchi tashkilotlar O‘zbekiston Respublikasi Geodeziya nazorati davlat inspeksiyasiga ushbu punktlarning holati to‘g‘risida axborot taqdim etadilar.

7. Geodeziya punktlari saqlanishi ustidan kuzatishni tashkil etish ular o‘rnatilgan hududlardagi tumanlar, shaharlar hokimliklariga yuklanadi. Geodeziya punktlarining shikastlanishi yoki yo‘q qilinishi, shuningdek ular tayyorlangan materiallarning o‘g‘irlanishi O‘zbekiston Respublikasi qonun hujjatlariga muvofiq aybdor shaxslarning javobgarligiga olib keladi.

8. Geodeziya punktlarini muntazam ravishda tekshirib turish va tiklash O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi tomonidan amalga oshiriladi.

9. O‘zbekiston Respublikasi hududida geodeziya punktlarini hisobga olish O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi huzuridagi Davlat geodeziya nazorati inspeksiyasi tomonidan amalga oshiriladi.