Jahonda kuchayib borayotgan turli xavf-xatar va ziddiyatlar, el-yurt tinchligi va osoyishtaligiga tahdidlar, pandemiya, tabiiy va texnogen ofatlar masʼul davlat tuzilmalariga oʻz faoliyatini “Barcha saʼy-harakatlar inson qadri uchun” degan ustuvor gʻoya asosida yanada takomillashtirish vazifasini yuklamoqda.

Respublikada ommaviy tadbirlarni tashkil etishda jamoat tartibini saqlash va jamoat xavfsizligini taʼminlash vazifasi Oʻzbekiston Respublikasi Ichki ishlar vazirligi va Milliy gvardiyasi organlariga yuklangan boʻlib, ushbu jarayonlarda masʼul vazirlik va idoralar kuch hamda vositalarining birgalikdagi harakatlarini samarali tashkil etish hamda ularning har birining aniq vazifalarini belgilab berish muhim hisoblanadi.

Oʻzbekiston Respublikasi Milliy gvardiyasining hamda Ichki ishlar vazirligining ommaviy tadbirlarni tashkil etish va oʻtkazish vaqtida jamoat tartibini saqlash va fuqarolar xavfsizligini taʼminlash borasidagi vazifalari, huquqlari va majburiyatlarini aniq belgilab berish maqsadida, shuningdek, Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonuni hamda Oʻzbekiston Respublikasi Prezidentining “Oʻzbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari toʻgʻrisida” 2021-yil 29-noyabrdagi PF-27-son Farmoniga muvofiq Vazirlar Mahkamasi qaror qiladi:

1. Quyidagilar:

Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonuniga 2-ilovaning 101-bandida ommaviy tadbirlarni oʻtkazish uchun ruxsat etish tartib-taomillari sohasidagi vakolatli organ sifatida Oʻzbekiston Respublikasi Ichki ishlar vazirligi belgilanganligi;

Oʻzbekiston Respublikasi Prezidentining “Oʻzbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari toʻgʻrisida” 2021-yil 29-noyabrdagi PF-27-son Farmonining 3-bandida Qoraqalpogʻiston Respublikasi, viloyatlar markazlari va Toshkent shahrida ommaviy tadbirlarni oʻtkazishda hamda istirohat bogʻlari, xiyobonlar va bozorlarda jamoat tartibini saqlashni tashkil etish bevosita Oʻzbekiston Respublikasi Milliy gvardiyasi boʻlinmalari tomonidan amalga oshirilishi nazarda tutilganligi maʼlumot uchun qabul qilinsin.

2. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

ommaviy tadbirlarni, ularning ahamiyati, koʻlami va ular oʻtkaziladigan hududga bogʻliq holda alohida, birinchi va ikkinchi toifalardagi tadbirlarga boʻlinishini belgilash;

ommaviy tadbirlar oʻtkazilishini nazorat qilish komissiyalarining faoliyatini ichki ishlar organlari huzurida tashkil etish hamda ularning tarkibi, maqomi va vakolatlarini belgilash;

alohida va ikkinchi toifalardagi ommaviy tadbirlarni oʻtkazishda fuqarolarning xavfsizligini va jamoat tartibini taʼminlash chora-tadbirlari ichki ishlar organlari, birinchi toifadagi ommaviy tadbirlar Oʻzbekiston Respublikasi Milliy gvardiyasi boʻlinmalari tomonidan amalga oshirilishini taʼminlash.

3. Oʻzbekiston Respublikasi Milliy gvardiyasi va Ichki ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Milliy gvardiyasi qoʻmondoni R.M. Djurayev va Oʻzbekiston Respublikasi ichki ishlar vaziri P.R. Bobojonov zimmasiga yuklansin.

1. Vazirlar Mahkamasining 2014-yil 29-iyuldagi 205-son qarori bilan tasdiqlangan Ommaviy tadbirlarni oʻtkazish qoidalarida:

a) 3-bandda:

quyidagi mazmundagi toʻrtinchi xatboshi bilan toʻldirilsin:

“alohida toifadagi ommaviy tadbir — “Yangi yil”, “Navroʻz bayrami”, “Mustaqillik kuni”, “Xotira va qadrlash kuni”, “Xalqaro bolalarni himoya qilish”, “Roʻza hayit” (Iyd al-Fitr), “Qurbon hayit” (Iyd al-Adha), “Rojdestvo Xristovo”, “Pasxa” bayramlarini nishonlashga doir tadbirlar, taʼlim muassasalariga oʻqishga qabul qilish boʻyicha test sinovlarini oʻtkazish, umumtaʼlim maktablarida oʻquv yilining boshlanishi va tugashiga bagʻishlangan, saylov va referendumlarni oʻtkazish bilan bogʻliq, shuningdek, xalqaro hamkorlik tashkilotiga aʼzo davlat rahbarlari ishtirokida oʻtkaziladigan tadbirlar hamda futbol boʻyicha xalqaro miqyosdagi uchrashuvlar”;

toʻrtinchi — oʻn ikkinchi xatboshilar tegishlicha beshinchi — oʻn uchinchi xatboshilar deb hisoblansin;

beshinchi — yettinchi xatboshilar quyidagi tahrirda bayon etilsin:

“birinchi toifadagi ommaviy tadbir — Toshkent, Nukus shaharlari va viloyat markazlari hududida oʻtkaziladigan alohida toifadagi ommaviy tadbir toifalariga kirmaydigan ommaviy tadbir;

ikkinchi toifadagi ommaviy tadbir — alohida va birinchi toifadagi ommaviy tadbirlar toifasiga kirmaydigan ommaviy tadbir;

ommaviy tadbirni oʻtkazish obyekti — ommaviy tadbirlarni oʻtkazish uchun maxsus moʻljallangan yoki moslashtirilgan, yongʻinga qarshi texnik himoya vositalari, tez tibbiy yordam koʻrsatish, evakuatsiya qilish, kommunikatsiya, muhandis-texnik himoya vositalari va ommaviy tadbir ishtirokchilarining xavfsizligini taʼminlashning boshqa vositalari va tizimlari bilan jihozlangan, alohida, birinchi va ikkinchi toifadagi ommaviy tadbirlarni oʻtkazish obyektlari roʻyxatlariga kiritilgan ochiq joy uchastkalari, binolar, inshootlar, shuningdek, ommaviy tadbirlar oʻtkazishga qulay boʻlgan keng maydonlar (madaniyat-maʼrifat muassasalari, sport majmualari, tarixiy obidalar, dalalar, istirohat bogʻlari, xiyobonlar va boshqalar)”;

oʻn ikkinchi xatboshi quyidagi tahrirda bayon etilsin:

“vakolatli organ — Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmasi, viloyatlar ichki ishlar boshqarmalari, tumanlar (shaharlar) ichki ishlar boshqarmalari (boʻlimlari)”;

b) quyidagi mazmundagi 5¹, 5² va 5³-bandlar bilan toʻldirilsin:

“5¹. Ruxsatnomalarni berish yoki ruxsatnomalar berishni rad etish, ularning amal qilish muddatini uzaytirish, toʻxtatib turish, amal qilishini toʻxtatish yoxud ruxsatnomani bekor qilish toʻgʻrisidagi takliflarni tayyorlash va vakolatli organlar tomonidan koʻrib chiqishga kiritish, shuningdek, ommaviy tadbirlarni tashkil qilish va oʻtkazish tartibiga rioya etilishini nazorat qilish vakolatli organ huzurida tashkil qilinadigan ommaviy tadbirlar oʻtkazilishini nazorat qilish komissiyalari (keyingi oʻrinlarda — komissiyalar) tomonidan amalga oshiriladi.

Komissiyalar tarkibiga Oʻzbekiston Respublikasi Favqulodda vaziyatlar vazirligi, Sogʻliqni saqlash vazirligi, Madaniyat vazirligi, Davlat xavfsizlik xizmati, ommaviy tadbirlarning turiga koʻra boshqa manfaatdor vazirlik va idoralarning hududiy boʻlinmalari vakillari hamda ommaviy tadbirlarni oʻtkazish obyekti maʼmuriyati (kelishuv asosida) kiradi.

Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmasi, viloyatlar ichki ishlar boshqarmalari huzuridagi komissiyalar tarkibiga Oʻzbekiston Respublikasi Milliy gvardiyasining hududiy boʻlinmalari vakillari kiradi.

Komissiyaning tarkibi va uning ish reglamenti vakolatli organ tomonidan tasdiqlanadi.

Komissiya yigʻilishlari zarurat boʻlganda oʻtkaziladi.

Komissiyaga vakolatli organ rahbarining oʻrinbosari raislik qiladi.

5². Komissiya:

ruxsatnoma berish toʻgʻrisidagi arizalarni koʻrib chiqadi;

ruxsatnoma berish yoki ruxsatnomalar berishni rad etish, ularning amal qilish muddatini uzaytirish, toʻxtatib turish, ularni tugatish yoki bekor qilish toʻgʻrisidagi takliflarni tayyorlaydi va vakolatli organlar tomonidan koʻrib chiqishga kiritadi;

ommaviy tadbirlarni tashkil qilish va oʻtkazish tartibiga rioya etilishini nazorat qiladi;

bevosita joyiga chiqqan holda, ommaviy tadbirni oʻtkazish obyektining maʼmuriyatida va ommaviy tadbirning tashkilotchisida uni oʻtkazish uchun talab qilinadigan sharoitlarni tekshiradi, bunday tekshiruvlarni amalga oshirish uchun ishchi guruhlar tashkil qiladi, zarur xulosalar va maʼlumotlarni taqdim etish uchun manfaatdor tashkilotlarning malakali mutaxassislari va ekspertlarini kelishilgan holda jalb qiladi.

5³. Oʻz vazifalarini bajarishda komissiya bevosita joyiga borgan holda, ommaviy tadbirni oʻtkazish obyektining maʼmuriyatida va ommaviy tadbirning tashkilotchisida uni oʻtkazish uchun talab qilinadigan sharoitlarni tekshirish, bunday tekshiruvlarni amalga oshirish uchun ishchi guruhlar tashkil qilish, zarur xulosalar va maʼlumotlarni taqdim etish uchun manfaatdor tashkilotlarning malakali mutaxassislari va ekspertlarini belgilangan tartibda jalb qilish huquqiga ega”;

v) 15-band quyidagi tahrirda bayon etilsin:

“15. Ommaviy tadbirlarni oʻtkazishda fuqarolarning xavfsizligini va jamoat tartibini taʼminlash chora-tadbirlari:

alohida va ikkinchi toifadagi ommaviy tadbirlarni oʻtkazishda — Oʻzbekiston Respublikasi Ichki ishlar vazirligi va uning hududiy boʻlinmalari tomonidan manfaatdor davlat organlari hamda tashkilotlari bilan hamkorlikda amalga oshiriladi;

birinchi toifadagi ommaviy tadbirlarni oʻtkazishda — Oʻzbekiston Respublikasi Milliy gvardiyasi va uning hududiy boʻlinmalari tomonidan manfaatdor davlat organlari va tashkilotlari bilan hamkorlikda amalga oshiriladi.

Ommaviy tadbirlarni oʻtkazishda jamoat xavfsizligini taʼminlash zaruriyatini inobatga olgan holda, ichki ishlar va Milliy gvardiya organlarining asoslantirilgan soʻroviga asosan manfaatdor davlat organlari va tashkilotlarining zimmasiga yuklatilgan vazifalarni bajarish uchun zarur miqdordagi kuch va vositalari ajratiladi.

Oʻzbekiston Respublikasi Ichki ishlar vazirligining va Milliy gvardiyasining hududiy boʻlinmalari oʻzlariga biriktirilgan alohida, birinchi va ikkinchi toifadagi ommaviy tadbirlarni oʻtkazishda, jamoat tartibini saqlashni tashkil etish maqsadida manfaatdor davlat organlari va tashkilotlarining birgalikda qabul qilgan qarorida belgilangan tartibda hamkorlikdagi rejalar (namunaviy) ishlab chiqish hamda obyektlarda tadbir ishtirokchilarining xavfsizligini taʼminlash maqsadida evakuatsiya qilish, kommunikatsiya, videokuzatuv, zamonaviy muhandis-texnik himoya vositalari, yongin va texnik xavfsizligi hamda atrofni yoritish tizimlaridan kelib chiqqan holda har bir obyektning xavfsizligini taʼminlash pasportini ishlab chiqadi”;

g) 38-bandning ikkinchi xatboshisi quyidagi tahrirda bayon etilsin:

“Ishchi guruh tarkibiga ommaviy tadbirni oʻtkazish obyektining toifasi, xususiyatlarini, uning xarakterini va ishtirokchilarning sonini hisobga olgan holda vakolatli organ, hududiy ichki ishlar organlari, Oʻzbekiston Respublikasi Milliy gvardiyasi, Davlat xavfsizlik xizmati, Favqulodda vaziyatlar vazirligi, Sogʻliqni saqlash vazirligining hududiy boʻlinmalari, ommaviy tadbir tashkilotchisi va ommaviy tadbirni oʻtkazish obyektining maʼmuriyati, boshqa manfaatdor tashkilotlarning vakillari kiritiladi. Ishchi guruh tarkibiga, shuningdek, ommaviy tadbirni oʻtkazish vaqtida zimmasiga fuqarolarning xavfsizligini va jamoat tartibini taʼminlash chora-tadbirlarini amalga oshirish yuklangan Oʻzbekiston Respublikasi Milliy gvardiyasining hududiy boʻlinmasi va ichki ishlar organining vakillari kiritiladi”;

d) 44-banddagi “ichki ishlar organi va Oʻzbekiston Respublikasi Milliy gvardiyasining tegishli boʻlinmasini” soʻzlari “Oʻzbekiston Respublikasi Milliy gvardiyasining hududiy boʻlinmasini va hududiy ichki ishlar organini” soʻzlari bilan almashtirilsin;

e) 58-band “Oʻzbekiston Respublikasi Milliy gvardiyasi boʻlinmalari” soʻzlaridan keyin “harbiy xizmatchilari va” soʻzlari bilan toʻldirilsin;

j) 61-bandning uchinchi xatboshisidagi “yongʻin xavfsizligi” soʻzlari “yongʻin-qutqaruv boʻlinmalari” soʻzlari bilan almashtirilsin;

z) 67-bandning beshinchi xatboshisi quyidagi tahrirda bayon etilsin:

“ommaviy tadbirni oʻtkazish obyektining koʻrinarli joylarida xavfsizlik va yongʻin xavfsizligi belgilari, evakuatsiya qilish koʻrsatkichlarini, harakatlanish qoidalarini, sxemalari, rejalari va yoʻriqnomalarini, yongʻin xavfsizligi qoidalarini joylashtirish”;

i) 69-bandda:

birinchi xatboshi quyidagi tahrirda bayon etilsin:

“69. Ommaviy tadbirlarni oʻtkazishda ichki ishlar organlari va Oʻzbekiston Respublikasi Milliy gvardiyasi boʻlinmalarining majburiyatlari:”;

uchinchi xatboshi quyidagi tahrirda bayon etilsin:

“ommaviy tadbirni tayyorlash va oʻtkazish davrida fuqarolarning xavfsizligini va jamoat tartibini, yoʻl va yongʻin xavfsizligini taʼminlash masalalari boʻyicha oʻzaro, shuningdek, Oʻzbekiston Respublikasi Davlat xavfsizlik xizmati, Favqulodda vaziyatlar vazirligi, Sogʻliqni saqlash vazirligining boʻlinmalari, boshqa manfaatdor tashkilotlar, ommaviy tadbir tashkilotchisi va ommaviy tadbirni oʻtkazish obyektining maʼmuriyati bilan hamkorlikni amalga oshirish”;

oʻn ikkinchi xatboshidagi “yongʻinga qarshi” soʻzlari “yongʻin xavfsizligi talablariga rioya qilinishi” soʻzlari bilan almashtirilsin;

oʻn beshinchi xatboshidagi “Oʻzbekiston Respublikasi Favqulodda vaziyatlar vazirligi, Milliy gvardiyasi” soʻzlari “oʻzaro, shuningdek, Oʻzbekiston Respublikasi Favqulodda vaziyatlar vazirligi” soʻzlari bilan almashtirilsin;

quyidagi mazmundagi oʻn oltinchi va oʻn yettinchi xatboshilar bilan toʻldirilsin:

“ommaviy tadbirlarni oʻtkazishda obyektning koʻrsatilgan joylarida zaxira kuchlari va vositalarining jangovar shay holatini taʼminlash;

terrorchilarni qoʻlga olish, zararsizlantirish va yoʻq qilish tadbirlarini amalga oshirishda ishtirok etish”;

oʻn oltinchi xatboshi oʻn sakkizinchi xatboshi deb hisoblansin;

oʻn sakkizinchi xatboshi quyidagi tahrirda bayon etilsin:

“Oʻzbekiston Respublikasi Milliy gvardiyasi hududiy boʻlinmalari va ichki ishlar organlari qonunchilikka muvofiq boshqa majburiyatlarni ham bajarishlari mumkin”;

k) 70-bandda:

birinchi xatboshi quyidagi tahrirda bayon etilsin:

“70. Ommaviy tadbirlarni oʻtkazishda ichki ishlar organlarining va Oʻzbekiston Respublikasi Milliy gvardiyasi boʻlinmalarining huquqlari:”;

yettinchi xatboshi quyidagi tahrirda bayon etilsin:

“zaxira kuchlarini shakllantirish”;

quyidagi mazmundagi sakkizinchi xatboshi bilan toʻldirilsin:

“ommaviy tadbirni oʻtkazish obyektida favqulodda vaziyatlar yuzaga kelganda, manfaatdor vazirliklar va idoralar bilan birgalikda amaldagi maxsus rejalarga muvofiq zarur choralar koʻrish”;

sakkizinchi xatboshi toʻqqizinchi xatboshi deb hisoblansin;

toʻqqizinchi xatboshi quyidagi tahrirda bayon etilsin:

“Ichki ishlar organlari va Oʻzbekiston Respublikasi Milliy gvardiyasi boʻlinmalari qonunchilikka muvofiq boshqa huquqlardan ham foydalanishlari mumkin”;

l) 70¹ va 70²-bandlar oʻz kuchini yoʻqotgan deb hisoblansin;

m) 70⁵-bandda:

quyidagi mazmundagi beshinchi va oltinchi xatboshilar bilan toʻldirilsin:

“ommaviy tadbirni oʻtkazish obyekti maʼmuriyatining yongin xavfsizligi talablariga rioya etilishini belgilangan tartibda nazorat qilish;

ommaviy tadbirlarni oʻtkazish davrida favqulodda vaziyatlar xavfi yuzaga kelganda yoki sodir boʻlganda ular toʻgʻrisida ommaviy tadbir ishtirokchilarini oʻz vaqtida ogohlantirish va xabardor qilishni tashkillashtirish”;

beshinchi xatboshi yettinchi xatboshi deb hisoblansin;

n) 70⁶-bandda:

ikkinchi xatboshidagi “obyektini oldindan tekshirish” soʻzlari “obyektida belgilangan tartibda profilaktik tadbirlarni amalga oshirish” soʻzlari bilan almashtirilsin;

quyidagi mazmundagi toʻrtinchi va beshinchi xatboshilar bilan toʻldirilsin:

“ommaviy tadbirlar oʻtkaziladigan obyektlar toʻgʻrisida vazirlik zimmasiga yuklangan vazifalarni bajarish uchun davlat boshqaruvi organlari, xoʻjalik birlashmalari, mahalliy davlat hokimiyati organlari, jismoniy va yuridik shaxslardan zarur maʼlumotlar va axborotlarni soʻrab olish;

ommaviy tadbirlar oʻtkaziladigan obyektlarda vazirlik faoliyatiga oid hujjatlar talablari buzilishi holatlari aniqlanganda, belgilangan tartibda maʼmuriy javobgarlikka tortish choralarini koʻrish hamda zarur hollarda kamchiliklar aniqlangan obyektlarda ommaviy tadbirlar oʻtkazilishini taqiqlash”;

toʻrtinchi xatboshi oltinchi xatboshi deb hisoblansin;

o) 70¹¹ va 70¹²-bandlar quyidagi tahrirda bayon etilsin:

“70¹¹. Ommaviy tadbirlarni oʻtkazishda quyidagilar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining vazifalari hisoblanadi:

ommaviy tadbirlarni oʻtkazish obyektlari roʻyxatini oʻzining rasmiy veb-saytlarida eʼlon qilish;

zaruratga koʻra Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmasi, viloyatlar ichki ishlar boshqarmalari soʻroviga asosan oʻz xodimlarining komissiya faoliyatida ishtirokini taʼminlash.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari qonunchilikka muvofiq boshqa vazifalarni ham amalga oshirishi mumkin.

70¹². Ommaviy tadbirlarni oʻtkazishda quyidagilar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining huquqlari hisoblanadi:

ommaviy tadbir oʻtkaziladigan obyektni tegishli hududda joylashgan birinchi toifadagi ommaviy tadbirlarni oʻtkazish obyektlari roʻyxatiga kiritish boʻyicha takliflarni Oʻzbekiston Respublikasi Vazirlar Mahkamasiga taqdim etish;

tumanlar (shaharlar) hokimliklarining takliflariga muvofiq ikkinchi toifadagi ommaviy tadbirlarni oʻtkazish obyektlarining roʻyxatini tasdiqlash;

ayrim ommaviy tadbirlarni alohida, birinchi va ikkinchi toifadagi ommaviy tadbirlarni oʻtkazish obyektlarining roʻyxatlariga kiritilmagan joylarda oʻtkazish toʻgʻrisidagi qarorlarni qabul qilish;

ushbu Qoidalarning 9-bandida koʻrsatilgan ommaviy tadbirlarni oʻtkazish obyektlarini (joylarini), ularni tashkil etish va oʻtkazish tartibini belgilash toʻgʻrisidagi qarorlarni qabul qilish hamda ularning bajarilishini nazorat qilish.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari qonunchilikka muvofiq boshqa huquqlarga ham ega boʻlishi mumkin”;

p) quyidagi mazmundagi 70¹³ va 70¹⁴-bandlar bilan toʻldirilsin:

“70¹³. Ommaviy tadbirlarni oʻtkazishda quyidagilar tumanlar (shaharlar) hokimliklarining vazifalari hisoblanadi:

tegishli hududda joylashgan ommaviy tadbirlarni oʻtkazish obyektlari roʻyxatini oʻzining rasmiy veb-saytlarida eʼlon qilish;

zaruratga koʻra tumanlar (shaharlar) ichki ishlar boshqarmalari (boʻlimlari) soʻroviga asosan oʻz xodimlarining komissiya faoliyatida ishtirokini taʼminlash;

saylovchilar bilan uchrashuvlar kabi ommaviy tadbirlar oʻtkazish haqida xabarnomani olgan kunning oʻzida jamoat tartibini saqlash va xavfsizlikni taʼminlashga qaratilgan chora-tadbirlarni koʻrish uchun Oʻzbekiston Respublikasi Milliy gvardiyasining hududiy boʻlinmasiga (ommaviy tadbir birinchi toifadagi obyektda oʻtkazilganda) yoki hududiy ichki ishlar organiga (ommaviy tadbir ikkinchi toifadagi obyektda oʻtkazilganda) bildirishnoma yuborish.

Tumanlar (shaharlar) hokimliklari qonunchilikka muvofiq boshqa vazifalarni ham amalga oshirishi mumkin.

70¹⁴. Ommaviy tadbirlarni oʻtkazishda quyidagilar tumanlar (shaharlar) hokimliklarining huquqlari hisoblanadi:

ommaviy tadbir oʻtkaziladigan obyektni tegishli hududda joylashgan alohida, birinchi va ikkinchi toifalardagi ommaviy tadbirlarni oʻtkazish obyektlari roʻyxatlariga kiritish boʻyicha takliflarni Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga taqdim etish;

ommaviy tadbirni oʻtkazish obyektlariga tutash hududlarning chegaralarini belgilash.

Tumanlar (shaharlar) hokimliklari qonunchilikka muvofiq boshqa huquqlarga ham ega boʻlishi mumkin”.

2. Vazirlar Mahkamasining 2021-yil 8-iyuldagi 431-son qarori bilan tasdiqlangan Maʼmuriy huquqbuzarlik toʻgʻrisida yagona elektron ish yurituv tizimi orqali maʼmuriy huquqbuzarlikka oid ishlarni yuritish tartibi haqidagi nizomda:

a) 31-bandda:

ikkinchi xatboshi quyidagi tahrirda bayon etilsin:

“Huquqbuzar unga maʼmuriy jazo qoʻllash toʻgʻrisidagi qaror topshirilgan kundan boshlab oʻn besh kun ichida jarima miqdorining ellik foizini yoki oʻttiz kun ichida jarima miqdorining yetmish foizini ixtiyoriy ravishda toʻlagan taqdirda, u jarimaning qolgan qismini toʻlashdan ozod qilinadi va bu “E-maʼmuriy ish” tizimida aks ettiriladi, qonunchilik hujjatlarida belgilangan holatlar bundan mustasno”;

quyidagi mazmundagi uchinchi xatboshi bilan toʻldirilsin:

“Mazkur tartib sud qarorlariga asosan qoʻllaniladigan jarimalarga nisbatan ham tatbiq etiladi”;

b) 58-bandning toʻrtinchi xatboshisi quyidagi tahrirda bayon etilsin:

“jarima solish toʻgʻrisidagi qaror topshirilgan kundan boshlab oʻn besh kun ichida jarima miqdorining ellik foizini yoki oʻttiz kun ichida jarima miqdorining yetmish foizini ixtiyoriy ravishda toʻlagan taqdirda, u jarimaning qolgan qismini toʻlashdan ozod qilinishi mumkinligi”.

3. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga 11-ilovada:

a) 4-pozitsiyaning uchinchi ustuni quyidagi tahrirda bayon etilsin:

“a) Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmasi, viloyatlar ichki ishlar boshqarmalari — birinchi toifadagi ommaviy tadbirlarni oʻtkazish uchun;

tumanlar (shaharlar) ichki ishlar boʻlimlari — ikkinchi toifadagi ommaviy tadbirlarni oʻtkazish uchun”;

b) 10-pozitsiyaning uchinchi ustuni quyidagi tahrirda bayon etilsin:

“Mavjud emas”;

v) 12-pozitsiyaning uchinchi ustunida:

quyidagi mazmundagi ikkinchi xatboshi bilan toʻldirilsin:

“Alohida toifadagi ommaviy tadbir — “Yangi yil”, “Navroʻz bayrami”, “Mustaqillik kuni”, “Xotira va qadrlash kuni”, “Xalqaro bolalarni himoya qilish”, “Roʻza hayit” (Iyd al-Fitr), “Qurbon hayit” (Iyd al-Adha), “Rojdestvo Xristovo”, “Pasxa” bayramlarini nishonlashga doir tadbirlar, taʼlim muassasalariga oʻqishga qabul qilish boʻyicha test sinovlarini oʻtkazish, umumtaʼlim maktablarida oʻquv yilining boshlanishi va tugashiga bagʻishlangan, saylov va referendumlarni oʻtkazish bilan bogʻliq, shuningdek, xalqaro hamkorlik tashkilotiga aʼzo davlat rahbarlari ishtirokida oʻtkaziladigan tadbirlar hamda futbol boʻyicha xalqaro miqyosdagi uchrashuvlar”;

ikkinchi — beshinchi xatboshilar tegishlicha uchinchi — oltinchi xatboshilar deb hisoblansin;

uchinchi va toʻrtinchi xatboshilar quyidagi tahrirda bayon etilsin:

“birinchi toifadagi ommaviy tadbir — Toshkent, Nukus shaharlari va viloyat markazlari hududida oʻtkaziladigan alohida toifadagi ommaviy tadbir toifalariga kirmaydigan ommaviy tadbir;

ikkinchi toifadagi ommaviy tadbir — alohida va birinchi toifadagi ommaviy tadbirlar toifasiga kirmaydigan ommaviy tadbir”.