Oʻzbekiston Respublikasi Prezidentining 2019-yil 17-yanvardagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi toʻgʻrisida”gi PF-5635-son Farmoni va Oʻzbekiston Respublikasi Prezidentining 2019-yil 2-apreldagi “Oʻzbekiston Respublikasi va Birlashgan Arab Amirliklari oʻrtasida ikki tomonlama hamkorlikni yanada mustahkamlash va kengaytirish chora-tadbirlari toʻgʻrisida”gi PQ-4256-son qaroriga asosan, shuningdek respublika iqtisodiyotiga toʻgʻridan-toʻgʻri xorijiy investitsiyalarni jalb qilish hajmlarini yanada kengaytirish maqsadida:

1. Quyidagilar:

Oʻzbekiston Respublikasining Tiklanish va taraqqiyot jamgʻarmasi hamda Abu Dabi rivojlanish jamgʻarmasi (BAA) oʻrtasida 2019-yil 24-martda ustav fondi miqdori 10 million AQSH dollarini tashkil etuvchi masʼuliyati cheklangan jamiyat shaklidagi Oʻzbekiston-Amirliklar investitsiya kompaniyasini tashkil etish toʻgʻrisidagi taʼsis shartnomasi imzolanganligi va kompaniya investitsiya portfeli shakllanib borishiga muvofiq ustav fondining bosqichma-bosqich 1 milliard AQSH dollariga teng boʻlgan miqdorga yetkazilishi;

koʻrsatib oʻtilgan kompaniyaning kapitalini shakllantirishda Abu Dabi rivojlanish jamgʻarmasining (BAA) ulushi 75 foizni hamda Oʻzbekiston Respublikasining Tiklanish va taraqqiyot jamgʻarmasining ulushi 25 foizni tashkil qilishi, belgilangan tartibda qoʻshimcha ishtirokchilarni jalb qilish mumkinligi maʼlumot uchun qabul qilinsin.

2. Belgilab qoʻyilsinki:

Oʻzbekiston-Amirliklar investitsiya kompaniyasi, shuningdek uning taʼsischilari daromad soligʻi, shu jumladan dividend va foizlar koʻrinishidagi daromadlar, mol-mulk soligʻi va yer soligʻidan, shuningdek, uning mol-mulki va aktivlarini realizatsiya qilishda qoʻshilgan qiymat soligʻidan istisno tariqasida 10 yil muddatga ozod qilinadi;

Oʻzbekiston-Amirliklar investitsiya kompaniyasining boshqaruv organlarida Oʻzbekiston Respublikasining Tiklanish va taraqqiyot jamgʻarmasi manfaatlarini Oʻzbekiston Respublikasining Tiklanish va taraqqiyot jamgʻarmasi ijrochi direktori ifodalaydi.

2¹. Oʻzbekiston-Amirliklar investitsiya kompaniyasiga, istisno tariqasida:

chet elda faoliyat yurituvchi xorijiy korxonalarning ustav fondida ishtirok etish va ulushlarga egalik qilishga;

xorijiy valyutadagi mablagʻlarni qabul qilish va ulardan foydalanish uchun Birlashgan Arab Amirliklari banklarida bank hisobvaraqlarini ochishga;

Oʻzbekiston Respublikasi Tiklanish va taraqqiyot jamgʻarmasiga AQSH dollarida dividendlar toʻlashga ruxsat berilsin.

3. Oʻzbekiston Respublikasining Tiklanish va taraqqiyot jamgʻarmasi uch oy muddatda Oʻzbekiston-Amirliklar investitsiya kompaniyasining qonun hujjatlarida belgilangan tartibda davlat roʻyxatidan oʻtkazilishini taʼminlasin.

4. Oʻzbekiston Respublikasi Tashqi ishlar vazirligi Oʻzbekiston Respublikasining Tiklanish va taraqqiyot jamgʻarmasi buyurtmanomalariga asosan Oʻzbekiston-Amirliklar investitsiya kompaniyasiga yollanib ishlash maqsadida jalb etilgan xorijiy mutaxassislarga hamda ularning oila aʼzolariga konsullik va boshqa yigʻimlarni undirmasdan belgilangan tartibda kirish vizalarining rasmiylashtirilishini taʼminlasin.

5. Oʻzbekiston Respublikasi Ichki ishlar vazirligi Oʻzbekiston Respublikasining Tiklanish va taraqqiyot jamgʻarmasi buyurtmanomalariga binoan Oʻzbekiston-Amirliklar investitsiya kompaniyasiga yollanib ishlash maqsadida jalb etilgan xorijiy mutaxassislarga hamda ularning oila aʼzolariga davlat bojini undirmasdan belgilangan tartibda koʻp martalik vizalar berishni va uzaytirishni, turgan joyi boʻyicha roʻyxatdan oʻtkazish hamda uning muddatini uzaytirishni taʼminlasin.

6. Oʻzbekiston Respublikasi Prezidentining ayrim hujjatlariga ilovaga muvofiq oʻzgartirishlar kiritilsin.

7. Mazkur Farmonning ijrosini nazorat qilish Oʻzbekiston Respublikasi Bosh vazirining oʻrinbosari E.M. Gʻaniyev zimmasiga yuklansin.

1. Oʻzbekiston Respublikasi Prezidentining 2019-yil 17-yanvardagi “2017 — 2021-yillarda Oʻzbekiston Respublikasini rivojlantirishning beshta ustuvor yoʻnalishi boʻyicha Harakatlar strategiyasini “Faol investitsiyalar va ijtimoiy rivojlanish yili”da amalga oshirishga oid davlat dasturi toʻgʻrisida”gi PF-5635-son Farmonida:

13-bandning ikkinchi xatboshidagi “5” raqami “10” raqami bilan almashtirilsin;

14-bandning ikkinchi xatboshi chiqarib tashlansin.

2. Oʻzbekiston Respublikasi Prezidentining 2009-yil 29-sentabrdagi “Oʻmon Sultonligi bilan investitsiyaviy hamkorlikni kengaytirish chora-tadbirlari toʻgʻrisida”gi PQ-1197-son qarorining rus tilidagi matni 4-bandi birinchi xatboshidagi “na 10 let” soʻzlari “do 1-yanvarya 2030 goda” soʻzlari bilan almashtirilsin.