O‘zbekiston Respublikasining “Qimmatli qog‘ozlar bozori to‘g‘risida”gi Qonuni (O‘zbekiston Respublikasi qonun hujjatlari to‘plami, 2008-y., 29-30-son, 278-modda) va O‘zbekiston Respublikasi Vazirlar Mahkamasining 1996-yil 30-martdagi 126-son qarori bilan tasdiqlangan O‘zbekiston Respublikasi Davlat raqobat qo‘mitasi huzuridagi Qimmatli qog‘ozlar bozorini muvofiqlashtirish va rivojlantirish markazi to‘g‘risidagi nizomga (O‘zbekiston Respublikasi Hukumatining qarorlari to‘plami, 1996-y., 3-son, 11-modda) muvofiq buyuraman:

1. Qimmatli qog‘ozlar bozorining mutaxassislariga qo‘yiladigan malaka talablari to‘g‘risidagi nizom ilovaga muvofiq tasdiqlansin.

2. O‘zbekiston Respublikasi Davlat mulki qo‘mitasi huzuridagi Qimmatli qog‘ozlar bozori faoliyatini muvofiqlashtirish va nazorat qilish markazi bosh direktorining 2011-yil 11-apreldagi 2011-06-son “Qimmatli qog‘ozlar bozorining mutaxassislariga qo‘yiladigan malaka talablari to‘g‘risidagi nizomni tasdiqlash haqida”gi buyrug‘i (ro‘yxat raqami 2221, 2011-yil 30-aprel) (O‘zbekiston Respublikasi qonun hujjatlari to‘plami, 2011-y., 18-son, 182-modda) o‘z kuchini yo‘qotgan deb hisoblansin.

3. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan kundan boshlab o‘n kun o‘tgandan keyin kuchga kiradi.

Mazkur Nizom O‘zbekiston Respublikasining “Qimmatli qog‘ozlar bozori to‘g‘risida”gi Qonuni (O‘zbekiston Respublikasi qonun hujjatlari to‘plami, 2008-y., 29-30-son, 278-modda), O‘zbekiston Respublikasi Prezidentining 2010-yil 26-noyabrdagi PQ-1438-son “2011 — 2015-yillarda respublika moliya-bank tizimini yanada isloh qilish va barqarorligini oshirish hamda yuqori xalqaro reyting ko‘rsatkichlariga erishishning ustuvor yo‘nalishlari to‘g‘risida”gi qaroriga (O‘zbekiston Respublikasi qonun hujjatlari to‘plami, 2010-y., 48-son, 442-modda) muvofiq qimmatli qog‘ozlar bozorining mutaxassislariga qo‘yiladigan malaka talablarini belgilaydi.

1. Mazkur Nizom talablari qimmatli qog‘ozlar bozorining professional ishtirokchilarida (keyingi o‘rinlarda professional ishtirokchi deb yuritiladi), fond birjalarida, boshqa birjalar fond bo‘limlarida ishlashga talabgor yoki ishlayotgan qimmatli qog‘ozlar bozori mutaxassislariga tatbiq qilinadi.

2. Qimmatli qog‘ozlar bozori mutaxassisining malaka guvohnomasi — qimmatli qog‘ozlar bozorini tartibga solish bo‘yicha vakolatli davlat organi tomonidan jismoniy shaxsga toifasi ko‘rsatilgan holda beriladigan va qimmatli qog‘ozlar bozorida professional ishtirokchi, fond birjasi, boshqa birjalarning fond bo‘limi nomidan qimmatli qog‘ozlarga doir operatsiyalarni amalga oshirish va xizmatlar ko‘rsatish va (yoki) ishlarni bajarish huquqini tasdiqlovchi hujjat.

3. Qimmatli qog‘ozlar bozorining mutaxassislariga qo‘yiladigan malaka talablari professional ishtirokchilarda, fond birjalarida, boshqa birjalar fond bo‘limlarida ishlash uchun zarur bo‘lgan bilim va ko‘nikmalarining mavjudligidan iborat bo‘ladi.

4. O‘zbekiston Respublikasi Kapital bozorini rivojlantirish agentligi qimmatli qog‘ozlar bozorini tartibga solish bo‘yicha vakolatli davlat organi bo‘lib hisoblanadi.

5. I toifali malaka guvohnomasiga ega qimmatli qog‘ozlar bozori mutaxassisi:

quyidagi mutaxassisliklardan biri bo‘yicha oliy ma’lumotga: moliyaviy-iqtisodiy, yuridik, matematik yoxud axborot texnologiyalari;

qimmatli qog‘ozlar bozori mutaxassislarini qayta tayyorlash yoki malakasini oshirish kursini tugatganligi to‘g‘risidagi ta’lim muassasasining sertifikatiga;

qimmatli qog‘ozlar bozorida professional faoliyatni amalga oshiruvchi tashkilotlarda, fond birjalarida, boshqa birjalar fond bo‘limlarida yoxud iqtisodiy, moliyaviy va yuridik faoliyat sohalarida, axborot texnologiyalari sohasida yoki ko‘rsatib o‘tilgan yo‘nalishlar bo‘yicha davlat boshqaruv organlaridagi ishda oxirgi o‘n yilda kamida ikki yillik ish stajiga ega bo‘lishi lozim.

Yoki I toifali malaka guvohnomasiga ega qimmatli qog‘ozlar bozori mutaxassisi:

oliy ma’lumotga;

qimmatli qog‘ozlar bozori mutaxassislarini qayta tayyorlash yoki malakasini oshirish kursini tugatganligi to‘g‘risidagi ta’lim muassasasining sertifikatiga;

qimmatli qog‘ozlar bozorida professional faoliyatni amalga oshiruvchi tashkilotlarda, fond birjalarida, boshqa birjalar fond bo‘limlarida yoxud iqtisodiy, moliyaviy va yuridik faoliyat sohalarida, axborot texnologiyalari sohasida yoki ko‘rsatib o‘tilgan yo‘nalishlar bo‘yicha davlat boshqaruv organlaridagi ishda oxirgi o‘n yilda kamida besh yillik ish stajiga ega bo‘lishi lozim.

6. II toifali malaka guvohnomasiga ega qimmatli qog‘ozlar bozori mutaxassisi:

kamida umumiy o‘rta yoki o‘rta maxsus, kasb-hunar ma’lumotiga;

qimmatli qog‘ozlar bozori mutaxassislarini qayta tayyorlash yoki malakasini oshirish kursini tugatganligi to‘g‘risidagi ta’lim muassasasining sertifikatiga ega bo‘lishi lozim, bundan Qimmatli qog‘ozlar bilan operatsiyalarni amalga oshirish huquqini olish uchun jismoniy shaxslarni attestatsiya (qayta attestatsiya)dan o‘tkazish to‘g‘risidagi nizomda (ro‘yxat raqami 660, 1999-yil 3-mart) belgilangan holat mustasno.

7. Qimmatli qog‘ozlar markaziy depozitariysi va uning tarkibiy tuzilmalari, boshqa professional ishtirokchilar ijroiya organlari, fond birjasi ijroiya organi va uning tarkibiy tuzilmalari, boshqa birjalar fond bo‘limining rahbari I toifali malaka guvohnomasiga ega qimmatli qog‘ozlar bozori mutaxassislari uchun belgilangan malaka talablariga javob berishi lozim.

8. I yoki II toifali malaka guvohnomasiga ega professional ishtirokchi, fond birjasi, boshqa birja fond bo‘limining nazoratchisi:

quyidagi mutaxassisliklardan biri bo‘yicha oliy ma’lumotga: moliyaviy-iqtisodiy, yuridik, matematik axborot texnologiyalari;

yoxud qimmatli qog‘ozlar bozorida professional faoliyatni amalga oshiruvchi tashkilotlarda, fond birjalarida, boshqa birjalar fond bo‘limlarida yoxud iqtisodiy, moliyaviy va yuridik faoliyat sohalarida, axborot texnologiyalari sohasida yoki ko‘rsatib o‘tilgan yo‘nalishlar bo‘yicha davlat boshqaruv organlaridagi ishda oxirgi o‘n yilda kamida besh yillik ish stajiga ega bo‘lishi lozim.

9. Iqtisodiy yoki yuridik fanlari nomzodi doktori ilmiy darajasiga ega bo‘lgan qimmatli qog‘ozlar bozori mutaxassislaridan qimmatli qog‘ozlar bozori mutaxassislarini qayta tayyorlash yoki malakasini oshirish kursini tugatganligi to‘g‘risidagi ta’lim muassasasining sertifikati talab qilinmaydi.

10. Xorijiy davlatlarda olingan oliy ma’lumot va ilmiy daraja qonun hujjatlarida belgilangan tartibda nostrifikatsiya qilingan taqdirda e’tiborga olinadi.

11. Mazkur Nizom talablarini buzganlikda aybdor shaxslar qonun hujjatlariga muvofiq javobgar bo‘ladi.

12. Mazkur Nizom talablariga rioya etish ustidan nazoratni qimmatli qog‘ozlar bozorini tartibga solish bo‘yicha vakolatli davlat organi amalga oshiradi.