Oʻzbekiston Respublikasi Prezidentining “Mustaqil teleradio kanallarini isloh qilish va rivojlantirish chora-tadbirlari toʻgʻrisida” 2005-yil 8-noyabrdagi PF-3678-son Farmoniga, Oʻzbekiston Respublikasi Prezidentining “Oʻzbekiston Milliy teleradiokompaniyasi faoliyatini tashkil etish chora-tadbirlari toʻgʻrisida” 2005-yil 27-dekabrdagi PQ-245-son qaroriga muvofiq hamda Oʻzbekiston Milliy teleradiokompaniyasiga ajratiladigan budjet mablagʻlaridan samarali va oqilona foydalanish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasining 2006-yilgi asosiy makroiqtisodiy koʻrsatkichlari prognozi va davlat budjeti parametrlari toʻgʻrisida” 2005-yil 27-dekabrdagi PQ-244-son qarori bilan tasdiqlangan 2006-yilgi Davlat budjeti parametrlarida Oʻzbekiston MTRKga 14,759 mlrd soʻm miqdorida budjet mablagʻlari ajratilishi nazarda tutilganligi maʼlumot uchun qabul qilinsin.

2. Quyidagilar:

Oʻzbekiston MTRK tashkilotlari va markaziy apparatining 2006-yilgi konsolidatsiyalashgan daromadlari va xarajatlari prognozi 1-ilovaga* muvofiq;

Oʻzbekiston MTRK tashkilotlari va markaziy apparatini budjetdan mablagʻ bilan taʼminlashning tasdiqlangan xarajatlar smetalariga muvofiq ularni alohida-alohida mablagʻ bilan taʼminlashni nazarda tutuvchi sxemasi 2-ilovaga* muvofiq tasdiqlansin.

3. Oʻzbekiston Milliy teleradiokompaniyasi (A. Xadjayev) belgilangan tartibda tasdiqlasin va Oʻzbekiston Respublikasi Moliya vazirligida roʻyxatdan oʻtkazilsin:

Oʻzbekiston Milliy teleradiokompaniyasining barcha tashkilotlari boʻyicha shtat jadvallari;

“O`zbekiston” teleradiokanali”, “Sport” teleradiokanali,” “Toshkent” teleradiokanali”, “Respublika Teleradiomarkazi”, “O`zbektelefilm”, davlat unitar korxonalari, “Yoshlar” teleradiokanali” yopiq aksiyadorlik jamiyati, shuningdek Qoraqalpogʻiston Respublikasi va viloyatlar teleradiokompaniyalari uchun budjet va budjetdan tashqari mablagʻlar hisobidan xarajatlar smetasi, shu jumladan jamlanma xarajatlar smetasi.

4. Oʻzbekiston Respublikasi Moliya vazirligi (R. Azimov):

Oʻzbekiston MTRK bilan birgalikda “Respublika Teleradiomarkazi” DUK va Oʻzbekiston aloqa va axborotlashtirish agentligining aloqa korxonalari tomonidan koʻrsatilayotgan xizmatlar uchun tariflar darajasi, dinamikasi va tuzilmasini doimiy tahlil qilishni taʼminlasin, bunda tariflarning asossiz oʻsishiga yoʻl qoʻymaslikka alohida eʼtibor qaratsin;

Oʻzbekiston Milliy teleradiokompaniyasining budjet va budjetdan tashqari mablagʻlaridan maqsadli foydalanilishi ustidan muntazam nazorat oʻrnatsin.

5. “O`zbekiston” teleradiokanali”, “Sport” teleradiokanali,” “Toshkent” teleradiokanali” davlat unitar korxonalari va “Yoshlar” teleradiokanali” yopiq aksiyadorlik jamiyati:

yoʻl qoʻyiladigan vaqt meʼyorlari doirasida, shu jumladan, “Yoshlar” teleradiokanali” YAJning toʻliq oʻzini oʻzi moliyalashtirishga bosqichma-bosqich oʻtishini hisobga olgan holda, pulli xizmatlar koʻrsatish, boshqa tashkilotlar uchun shartnomalar boʻyicha ishlarni bajarish, shuningdek, reklama faoliyati hisobiga budjetdan tashqari daromadlarni koʻpaytirish boʻyicha kompleks chora-tadbirlarni ishlab chiqsin va amalga oshirsin;

budjet va budjetdan tashqari mablagʻlardan qatʼiy maqsadli, oqilona va samarali foydalanish, shuningdek ularni har tomonlama tejash asosida teleradiokanallarning moliyaviy barqarorligini taʼminlasin;

teleradiokanallarning moliya-iqtisod va buxgalteriya xizmatlarini malakali kadrlar bilan taʼminlasin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari V.A. Golishev va A.N. Aripov zimmasiga yuklansin.