O‘zbekiston Respublikasi Prezidentining “Kambag‘allikni qisqartirish va bandlik sohasida davlat siyosatini takomillashtirish va samaradorlikni oshirish chora-tadbirlari to‘g‘risida” 2024-yil 4-oktabrdagi PQ-347-son qarori ijrosini ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Kambag‘allikni qisqartirish va bandlik vazirligi to‘g‘risidagi nizom 1-ilovaga muvofiq;

O‘zbekiston Respublikasi Bandlikka ko‘maklashish davlat jamg‘armasi mablag‘larini shakllantirish va ulardan foydalanish tartibi to‘g‘risidagi nizom 2-ilovaga muvofiq tasdiqlansin.

2. Belgilansinki, O‘zbekiston Respublikasi Kambag‘allikni qisqartirish va bandlik vazirligi xodimlarining malakasini oshirish markazi xodimlariga oliy ta’lim muassasalari uchun belgilangan mehnatga haq to‘lash miqdorlari tatbiq etiladi.

3. O‘zbekiston Respublikasi Hukumatining 3-ilovaga muvofiq ayrim qarorlari o‘z kuchini yo‘qotgan deb hisoblansin.

4. O‘zbekiston Respublikasi Kambag‘allikni qisqartirish va bandlik vazirligi manfaatdor vazirlik va idoralar bilan birgalikda bir oy muddatda o‘zlari qabul qilgan normativ-huquqiy hujjatlarni ushbu qarorga muvofiqlashtirsin.

5. Ushbu qarorning bajarilishini nazorat qilish O‘zbekiston Respublikasi Bosh vazirining o‘rinbosari — iqtisodiyot va moliya vaziri J.A. Qo‘chqorov hamda O‘zbekiston Respublikasi kambag‘allikni qisqartirish va bandlik vaziri B.E. Zaxidov zimmasiga yuklansin.

1. Ushbu Nizom O‘zbekiston Respublikasi Kambag‘allikni qisqartirish va bandlik vazirligining (keyingi o‘rinlarda — Vazirlik) maqomi, asosiy vazifalari, funksiyalari, huquqlari va javobgarligi, faoliyatini tashkil etish tartibi, shuningdek, rahbarlarining huquqlari, funksional vazifalari va javobgarligini belgilaydi.

2. Vazirlik kambag‘allikni qisqartirish, aholi bandligi va mehnat munosabatlari sohasida yagona siyosat yurituvchi respublika ijro etuvchi hokimiyat organi hisoblanadi.

Vazirlik o‘z faoliyatida O‘zbekiston Respublikasi Vazirlar Mahkamasiga bo‘ysunadi.

3. Vazirlik o‘z faoliyatida O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari, ushbu Nizom hamda boshqa qonunchilik hujjatlariga amal qiladi.

4. Vazirlikning o‘z vakolatlari doirasida qabul qilgan qarorlari respublika va mahalliy ijro etuvchi hokimiyat organlari hamda boshqa tashkilotlar, shuningdek, fuqarolar tomonidan bajarilishi majburiydir.

5. Vazirlik hamda uning hududiy bo‘linmalari yuridik shaxs hisoblanadi, O‘zbekiston Respublikasining Davlat gerbi tasviri tushirilgan, o‘z nomi davlat tilida yozilgan muhrga va blankalarga, mustaqil balansga, O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasining tegishli bo‘linmalarida shaxsiy g‘azna hisobvaraqlariga, shu jumladan, chet el valyutasidagi shaxsiy g‘azna hisobvaraqlariga ega bo‘ladi.

Vazirlik huzuridagi jamg‘armalarning mablag‘lari O‘zbekiston Respublikasi Iqtisodiyot va moliya vazirligi huzuridagi G‘aznachilik xizmati qo‘mitasida ochilgan shaxsiy g‘azna hisobvaraqlarida jamlanadi hamda Qoraqalpog‘iston Respublikasi G‘aznachilik xizmati qo‘mitasi, viloyatlar va Toshkent shahri G‘aznachilik xizmati boshqarmalari tomonidan Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari uchun ochiladigan shaxsiy g‘azna hisobvaraqlariga o‘tkazib beriladi.

6. Vazirlikning rasmiy nomi:

1) davlat tilida:

to‘liq nomi — O‘zbekiston Respublikasi Kambag‘allikni qisqartirish va bandlik vazirligi;

qisqartirilgan nomi — Bandlik vazirligi;

2) rus tilida:

to‘liq nomi — Ministerstvo zanyatosti i sokrasheniye bednosti Respubliki Uzbekistan;

qisqartirilgan nomi — Minzanyatosti.

3) ingliz tilida:

to‘liq nomi — Ministry of employment and poverty reduction of the Republic of Uzbekistan;

qisqartirilgan nomi — Ministry of employment;

7. Vazirlikning joylashgan manzili (pochta manzili): 100031, Toshkent shahri, Nukus ko‘chasi, 8-uy.

8. Vazirlik tizimiga quyidagilar kiradi:

Vazirlik markaziy apparati;

Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari;

tuman (shahar) kambag‘allikni qisqartirish va bandlikka ko‘maklashish bo‘limlari;

Kambag‘allikni qisqartirish va bandlik vazirligi xodimlarining malakasini oshirish markazi (keyingi o‘rinlarda — Markaz);

malakani baholash markazlari;

Kambag‘allik va mehnat bozori tadqiqotlari instituti;

Milliy texnik malakani baholash va malaka oshirish markazi;

“Yagona milliy mehnat tizimi” idoralararo dasturiy-apparat kompleksini boshqarish direksiyasi;

Bandlikka ko‘maklashish davlat jamg‘armasi (keyingi o‘rinlarda — Bandlik jamg‘armasi);

Hokim yordamchilari faoliyatini qo‘llab-quvvatlash jamg‘armasi;

Yangi ish o‘rinlari tashkil etishni rag‘batlantirish hududiy jamg‘armalari;

“Kambag‘allik va mehnat sohasidagi loyihalarni boshqarish markazi” MCHJ (keyingi o‘rinlarda — Loyihalarni boshqarish markazi);

Toshkent shahridagi xodimlarni boshqarish va mehnatni muhofaza qilish kolleji.

Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari, tuman (shahar) kambag‘allikni qisqartirish va bandlikka ko‘maklashish bo‘limlari Vazirlikka va tegishli ravishda Qoraqalpog‘iston Respublikasi Vazirlar Kengashiga, viloyatlar va Toshkent shahri, shuningdek, tumanlar (shaharlar) hokimliklariga bo‘ysunadi va hisob beradi.

9. Vazirlik o‘z vazifalari va funksiyalarini bajarishda respublika va mahalliy ijro etuvchi hokimiyat organlari va boshqa tashkilotlar bilan hamkorlik qiladi.

10. Quyidagilar Vazirlikning asosiy vazifalari hisoblanadi:

mehnat bozorini, band va ishsiz aholini tarkibiy tahlil qilish, ishsizlarni manzilli aniqlash va ularning hisobini yuritish;

aholi bandligini ta’minlash dasturlarini shakllantirish, bo‘sh ish o‘rinlari hisobini yuritish, ishsizlarni ishga joylashtirish;

kambag‘allikni qisqartirish;

mahallalarda tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimining yordamchilari faoliyatini muvofiqlashtirish;

kasbiy standartlarni ishlab chiqish, vaucher va buyurtmalar asosida kasb-hunar va xorijiy tillarga o‘qitish, malakani baholash;

munosib mehnat sharoitlarini yaratish, mehnat me’yorlariga rioya etilishini o‘rganish, mehnat huquqini ta’minlash hamda mehnatni muhofaza qilish;

mehnatga haq to‘lashni normalashtirish, mehnat standartlarini joriy etish va mehnat munosabatlarini takomillashtirish;

tomorqa yerlari va dehqon xo‘jaliklari yer maydonlaridan samarali foydalanish, sohaga zamonaviy boshqaruv tizimini joriy etish, mahallalarning ixtisoslashuvidan kelib chiqqan holda yuqori daromadli va eksportbop mahsulotlar yetishtirishni tashkil qilish;

qonunchilikda belgilangan boshqa vazifalar.

11. Vazirlik o‘ziga yuklangan vazifalarga muvofiq quyidagi funksiyalarni bajaradi:

mehnat bozorini tahlil qilish va ishsizlarning hisobini manzilli (nomma-nom) yuritadi;

iqtisodiyotning rivojlanib kelayotgan tarmoq va sohalarida mehnat resurslariga bo‘lgan talabni prognoz qiladi;

mehnat bozoridagi tarkibiy muammolarni aniqlash va nomutanosibliklarning oldini oladi;

Xalqaro mehnat tashkiloti bilan hamkorlikni amalga oshirish va Xalqaro mehnat tashkiloti konvensiyalari hamda tavsiyalarini milliy qonunchilikka implementatsiya qiladi;

respublikada demografik o‘zgarishlar, mehnat bozorida yuzaga kelayotgan tendensiyalar, ixtisosliklar bo‘yicha mehnat resurslariga nisbatan talab va ehtiyojlar hamda kambag‘allikni qisqartirish bo‘yicha har chorakda kamida bir marta tadqiqotlar o‘tkazadi;

mehnat bozoridagi o‘zgarishlarni tarkibiy tahlil qilish orqali bandlik va ishsizlik darajasi va tuzilmasiga ta’sir qiluvchi omillar va tendensiyalarni o‘rganadi;

respublikada amalga oshiriladigan islohotlarning maqsadlari va ustuvorliklaridan kelib chiqib, zamonaviy bozor mexanizmlari va vositalari asosida aholi bandligini va mehnat bozori barqaror rivojlanishini ta’minlashga doir strategik dasturlarni ishlab chiqishda respublika va mahalliy ijro etuvchi hokimiyat, xo‘jalik birlashmalari, ilmiy-tadqiqot institutlari ishlarini tashkil etadi va muvofiqlashtiradi;

O‘zbekiston Respublikasining mehnat resurslari balansini ishlab chiqadi;

respublika va hududlarni demografik va iqtisodiy rivojlantirish prognozlaridan kelib chiqib, mehnat resurslari balanslarining asoslantirilgan prognoz parametrlarini, shuningdek, aholi bandligini ta’minlashga doir samarali kompleks chora-tadbirlarni ishlab chiqadi;

mehnat bozorini tahlil qiladi, ishsizlar va ishga joylashishga muhtoj aholi hisobini yuritadi;

mehnat va bandlik masalalari yuzasidan Xalqaro mehnat tashkiloti va boshqa xalqaro tashkilotlar bilan belgilangan tartibda hamkorlik qiladi va O‘zbekiston Respublikasining manfaatlari bo‘yicha ish ko‘radi;

Xalqaro mehnat tashkilotining O‘zbekiston Respublikasi tomonidan ratifikatsiya qilingan konvensiyalarining, mehnat va bandlik masalalari bo‘yicha tuzilgan boshqa xalqaro shartnomalar bajarilishi monitoringi yuritilishini tashkil etadi, belgilangan tartibda tegishli hisobot va ma’ruzalarni tayyorlaydi hamda taqdim etadi;

manfaatdor vazirlik va idoralar bilan birgalikda mehnat huquqlariga rioya etish masalalari bo‘yicha xalqaro tashkilotlar missiyasi ishini tashkil etadi;

aholini ish bilan ta’minlash va mehnatni muhofaza qilishga ko‘maklashish maqsadlariga yo‘naltiriladigan xorijiy donorlar va kredit tashkilotlari mablag‘larining belgilangan tartibda jalb qilinishini va ulardan foydalanishni tashkil etadi;

kambag‘allikni qisqartirish va bandlik hamda mehnat munosabatlari sohasida xalqaro shartnomalar tuzish to‘g‘risida takliflar kiritadi;

O‘zbekiston Respublikasi Hukumati, manfaatdor vazirlik va idoralar hamda ish beruvchilar va xodimlarning respublika birlashmalari o‘rtasida respublika darajasidagi uch tomonlama ijtimoiy sheriklikda, shuningdek, uch tomonlama maslahatlashuvlarda xalqaro mehnat standartlarini qo‘llashga ko‘maklashish maqsadida ishtirok etadi;

chet davlatlarning tuzilmalari va xalqaro tashkilotlar bilan Vazirlik vakolatiga kiradigan masalalar yuzasidan hamkorlik qiladi;

xalqaro reyting va indekslarda O‘zbekiston Respublikasining bandlik sohasiga oid ko‘rsatkichlarida dunyo mamlakatlari orasida yuqori o‘rinlarni egallashiga to‘sqinlik qilayotgan muammolarni aniqlaydi hamda bartaraf etish chora-tadbirlarini ishlab chiqadi va amalga oshiradi;

mehnat bozorini tartibga solish, bandlik, kambag‘allikni qisqartirish, mehnat munosabatlari, mehnatni muhofaza qilish, kasb va mehnat standartlari, band bo‘lmagan aholini kasbga tayyorlash va qayta tayyorlash, ishsizlarni ijtimoiy himoya qilish sohasida bozor shart-sharoitlariga mos keladigan normativ-huquqiy hujjatlar loyihalarini ishlab chiqadi;

har yil uchun hududlar, tarmoq va sohalar kesimida aholi bandligini ta’minlash dasturini ishlab chiqadi va uning amalga oshirilishini muvofiqlashtiradi;

mavjud bo‘sh ish o‘rinlari hisobini yuritadi va monitoring qiladi, ishsiz fuqarolarni ishga joylashtirishni tashkil etadi va ish beruvchilar bilan hamkorlik qiladi;

talab yuqori bo‘lgan kasblar va mutaxassisliklarni aniqlash, taklif etilayotgan ish haqi, talab qilinadigan malaka talablari, mehnat sharoitlari, ish vaqti rejimi va boshqa ma’lumotlarni o‘z ichiga olgan platformani shakllantiradi, yuritadi va doimiy takomillashtirib boradi;

manfaatdor davlat organlari va boshqa tashkilotlar bilan birgalikda oilaviy tadbirkorlik va hunarmandchilik faoliyati bilan shug‘ullanayotgan, tomorqa va dehqon xo‘jaliklarida mehnat shartnomasi yoki fuqarolik-huquqiy shartnomani rasmiylashtirmay chorvachilik, dehqonchilik, parrandachilik, baliqchilik hamda tomorqa va dehqon xo‘jaliklarida boshqa turdagi qishloq xo‘jaligi faoliyati bilan shug‘ullanuvchi fuqarolarning hisobga olinishini tashkil etadi;

respublika va ma’muriy-hududiy tuzilmalar mehnat resurslari soni va tarkibini muntazam ravishda tahlil qiladi, uni takomillashtirish yuzasidan takliflar ishlab chiqadi;

ilmiy-tadqiqot tashkilotlari bilan birgalikda yoshlar va band bo‘lmagan aholi qaysi kasbni ma’qul ko‘rishini va mehnat yo‘nalishini aniqlash uchun muntazam ravishda ijtimoiy tadqiqotlar o‘tkazadi;

mehnat bozorida teng shartlar asosida raqobatlasha olmaydigan shaxslarni ishga joylashtirish uchun ish o‘rinlarining eng kam sonini (kvota) belgilash bo‘yicha mahalliy ijro etuvchi hokimiyat organlari faoliyatini muvofiqlashtiradi hamda ularni ishga joylashtirish uchun ish beruvchilar tomonidan belgilangan miqdorda ish o‘rinlari ajratilishini nazorat qiladi;

tashkilotlarda eng kam ish o‘rinlarini ajratish va ularga ish izlashda muayyan qiyinchiliklarga duch kelayotgan va teng shartlar asosida mehnat bozorida raqobatlasha olmaydigan ayrim toifadagi shaxslarni qabul qilish masalalarini muntazam ravishda o‘rganadi va tahlil qiladi, bunday shaxslarni ishga joylashtirish yuzasidan tashkilotlar uchun kvotalar belgilashga doir takliflar ishlab chiqadi;

aholi bandligi darajasini va tarkibini to‘liq va xolis baholash, mehnat bozoridagi tarkibiy mavjud nomutanosibliklarni va ularning kelib chiqish sabablarini aniqlash, ishga joylashtirilishi zarur shaxslarni aniqlash maqsadida mehnat bozori rivojini muntazam ravishda tahlil qiladi va shu asosda tarmoqlar va hududlar bo‘yicha yangi ish o‘rinlarini tashkil etish uchun yillik buyurtmalarni shakllantiradi;

ichki mehnat bozorini himoya qilish, shuningdek, O‘zbekiston Respublikasida mehnat qilayotgan xorijiy fuqarolar hisobini yuritish maqsadida xorijiy fuqarolarga O‘zbekiston Respublikasi hududida mehnat faoliyatini amalga oshirish huquqini beruvchi tasdiqnomani beradi;

ish beruvchilar tomonidan taqdim etilayotgan bo‘sh (vakant) ish o‘rinlari hisobini yuritadi, tahlil qiladi va takomillashtiradi;

ish o‘rinlarini tashkil etish, aholini ishga joylashtirish jarayonlari va mehnat bozori holatini muntazam monitoring qiladi hamda ularni tahlil qiladi va shu asosda aholi bandligini oshirish bo‘yicha samarali chora-tadbirlarni ishlab chiqadi;

ishsizlik va norasmiy bandlik darajasini va tarkibini muntazam ravishda, shu jumladan, aholi bandligini aholi o‘rtasida so‘rovlar o‘tkazish orqali tahlil qiladi;

aholi, shu jumladan, yoshlar, xotin-qizlar, nogironligi bo‘lgan shaxslar, ishdan bo‘shatilgan shaxslar va boshqa toifadagi shaxslar bandligi va ularni ishga joylashtirish bo‘yicha axborotni shakllantirishni va kompleks tahlil qilishni tashkil etadi;

manfaatdor vazirlik va idoralar, shuningdek, mahalliy ijro etuvchi hokimiyat organlari bilan birgalikda aholi bandligini ta’minlash, bandlikning samarali shakllarini rivojlantirish hududiy va tarmoq dasturlarini ishlab chiqish va amalga oshirishning tizimli muvofiqlashtirib borilishini ta’minlaydi;

O‘zbekiston Respublikasi Iqtisodiyot va moliya vazirligi bilan birgalikda ish o‘rinlari tashkil etish bo‘yicha davlat buyurtmalarini iqtisodiyotni tuzilmaviy isloh va diversifikatsiya qilish bo‘yicha dasturlar, hududlarni ijtimoiy-iqtisodiy rivojlantirishga doir kompleks dasturlarni uzviy bog‘lagan holda, qisqa muddatli (bir yil), o‘rta muddatli (ikki, uch yil) va uzoq muddatli (uch yildan ortiq) davrlar uchun shakllantiradi;

mahalliy ijro etuvchi hokimiyat organlari bilan birgalikda ixtisoslashtirilgan bo‘sh ish o‘rinlari yarmarkalarini tashkil etadi va o‘tkazadi, mehnat organlari tomonidan aholiga va ish beruvchilarga ko‘rsatilayotgan xizmatlar sifatini oshirish va ulardan qulay foydalanishni ta’minlash orqali ishsizlarni, birinchi navbatda, yoshlarni, professional va oliy ta’lim tashkilotlarining bitiruvchilarini hamda aholining boshqa ijtimoiy ehtiyojmand toifalarini ishga joylashtirish dasturlarini ishlab chiqadi va tasdiqlaydi;

O‘zbekiston Respublikasi Iqtisodiyot va moliya vazirligi hamda Oliy ta’lim, fan va innovatsiyalar vazirligi bilan birgalikda mehnat resurslari balansining prognoz parametrlari asosida hududlar va iqtisodiyot tarmoqlari bo‘yicha oliy va professional ta’lim yo‘nalishlari uchun mutaxassislar tayyorlash yuzasidan davlat buyurtmalarini shakllantiradi;

mehnat bozorida vaziyat tang bo‘lgan mintaqalarda ish o‘rinlarini tashkil etish bo‘yicha maqsadli dasturlarni ishlab chiqishni muvofiqlashtiradi hamda manfaatdor vazirlik va idoralar hamda mahalliy ijro etuvchi hokimiyat organlari bilan birgalikda ularni ishlab chiqishda ishtirok etadi;

iqtisodiyotni isloh qilish va tarkibiy qayta o‘zgartirish davomida, shuningdek, tashkilotlar qayta tashkil etilganda, to‘lovga qobiliyatsiz bo‘lishi va tugatilishi natijasida ishdan bo‘shatiladigan xodimlarni ish bilan ta’minlash va ijtimoiy muhofaza qilishga doir maqsadli mintaqaviy dasturlar ishlab chiqilishini muvofiqlashtiradi;

bandlik va ish o‘rinlarini tashkil etish hududiy dasturlarini ishlab chiqishda mahalliy ijro etuvchi hokimiyat organlariga metodik va amaliy yordam ko‘rsatadi;

manfaatdor vazirlik va idoralar, mahalliy ijro etuvchi hokimiyat organlari, tijorat banklari bilan birgalikda o‘z biznesini boshlamoqchi bo‘lgan fuqarolarni, shu jumladan, kasbiy ta’lim tashkilotlarining bitiruvchilarini iqtisodiy jihatdan qo‘llab-quvvatlash va rag‘batlantirish bo‘yicha maqsadli dasturlarni ishlab chiqadi va amalga oshiradi;

tuman (shahar) kambag‘allikni qisqartirish va bandlikka ko‘maklashish bo‘limlariga ish izlab murojaat qilgan fuqarolarning ishga joylashtirilishiga ko‘maklashadi;

Vazirlikning yangi ish o‘rinlari tashkil etishni rag‘batlantirish hududiy jamg‘armalari hamda tadbirkorlik subyektlari bilan birgalikda, shu jumladan, davlat-xususiy sheriklik shartlari asosida faoliyatni yangi ish o‘rinlarini tashkil etishga va aholini ish bilan ta’minlashga qaratilgan ijtimoiy yo‘naltirilgan loyihalarni amalga oshiradi;

Bandlik jamg‘armasi mablag‘lari hisobidan ishsizlarni moddiy qo‘llab-quvvatlashni ta’minlashni belgilangan tartibda tashkil etadi;

kasanachilikni, oilaviy tadbirkorlikni, hunarmandchilik faoliyatini va aholining o‘zini o‘zi band qilishning boshqa shakllarini rag‘batlantirish va rivojlanishini qo‘llab-quvvatlash bo‘yicha takliflar tayyorlaydi;

kasanachilik faoliyatini kengaytirish, shu jumladan, yirik korxonalar va fuqarolar o‘rtasidagi hamkorlikni rivojlantirish, shuningdek, oilaviy tadbirkorlik va hunarmandchilikni rivojlantirish asosida kengaytirish masalalarida respublika va mahalliy ijro etuvchi hokimiyat organlari hamda boshqa tashkilotlarga ko‘maklashadi;

nogironligi bo‘lgan shaxslar uchun ish o‘rinlari yaratishda va ularni ishga joylashtirishda nodavlat notijorat tashkilotlariga va boshqa tashkilotlarga ko‘maklashadi;

nogironligi bo‘lgan shaxslar mehnatidan foydalanish, kasanachilik turlarini va nogironligi bo‘lgan shaxslarni ish bilan ta’minlashning boshqa shakllarini rivojlantirish bo‘yicha ixtisoslashtirilgan korxonalarni tashkil etish va rivojlantirishga ko‘maklashadi;

bandlikning yangi shakllarini joriy etishga va an’anaviy shakllarini kengaytirishga qaratilgan aholi bandligini kengaytirishning uslubiy va normativ-huquqiy asoslarini ishlab chiqadi;

ijtimoiy sheriklik doirasida aholi bandligini ta’minlash chora-tadbirlarini ishlab chiqish va amalga oshirishga hamda mehnat va bandlik masalalari bo‘yicha qabul qilingan normativ-huquqiy hujjatlarning amalda bajarilishi yuzasidan jamoat nazoratini takomillashtirishga ish beruvchilarni jalb etishga ko‘maklashadi;

“Yagona milliy mehnat tizimi” idoralararo dasturiy-apparat kompleksiga kiruvchi Bo‘sh (vakant) ish o‘rinlari milliy bazasini shakllantiradi va muntazam yangilab boradi hamda aholining interaktiv rejimda undan foydalanishini ta’minlaydi;

mehnat va aholini ish bilan ta’minlash masalalari bo‘yicha axborot-ma’lumotnoma tizimlari va interaktiv xizmatlarning yanada rivojlanishini ta’minlaydi;

ishga joylashtirish va aholini ish bilan ta’minlash sohasida aholiga xizmat ko‘rsatishda nodavlat sektorni rivojlantirishga va uning rolini kuchaytirishga qaratilgan qonunchilik hujjatlarini takomillashtirish va kompleks chora-tadbirlarni amalga oshirish bo‘yicha takliflar ishlab chiqadi;

ishga joylashtirish va bandlikka ko‘maklashish bo‘yicha xizmatlar sohasiga axborot-kommunikatsiya xizmatlari keng joriy etilishini, fuqarolarga ishga joylashish jarayonlarini yengillashtiruvchi hamma uchun ochiq ma’lumotlar bazalari tashkil etilishini ta’minlaydi;

o‘zini o‘zi band qilgan shaxslarga rag‘batlantiruvchi imtiyozlar berish choralarini ko‘radi;

mehnat organlariga murojaat qilgan ishsizlarning ishga joylashtirilishini ta’minlashda, birinchi navbatda, yirik investitsiya loyihalarini amalga oshirish, yo‘l va uy-joy kommunal infratuzilma obyektlarini qurish, ta’mirlash va rekonstruksiya qilish, shahar va tumanlarni obod qilish, mavsumiy qishloq xo‘jaligi ishlarini tashkil etish sohalariga jalb qiladi;

kambag‘allik dinamikasi va tarkibini tahlil qiladi, kambag‘allik sabablari va omillarini bartaraf etish bo‘yicha xorijiy tajribani hamda joylardagi holatni, shu jumladan, ilmiy-tadqiqot muassasalarini jalb etgan holda muntazam o‘rganib boradi;

Ijtimoiy reyestrga kiritilgan oilalarning ishlab chiqilishini tashkil etadi va ijrosini muvofiqlashtiradi, shu jumladan, ushbu rejalarning to‘g‘ri, maqsadli, manzilli tuzilgani va natijadorligini hamda eng og‘ir ahvoldagi mahallalarning infratuzilmasini yaxshilash bo‘yicha ishlarning o‘z vaqtida va sifatli amalga oshirilishini tahlil qiladi va takomillashtirish yuzasidan takliflar tayyorlaydi;

aholini kambag‘allikdan chiqarish bo‘yicha amalga oshirilgan ishlarni joylarga chiqqan holda o‘rganish hamda natijasi bo‘yicha “Kambag‘allikdan farovonlik sari” dasturini amalga oshirish bo‘yicha respublika komissiyasiga har oyda ma’lumot kiritib boradi;

individual rejalarning ijrosini muvofiqlashtiradi, zarur hollarda ularga tegishli o‘zgartirishlar kiritish orqali samarali natijaga erishilishini ta’minlaydi;

individual rejalarni amalga oshirishda aniqlangan muammolarni mutasaddi tashkilotlar bilan birgalikda hal qiladi hamda tizimli muammolar yechimi bo‘yicha takliflarni “Kambag‘allikdan farovonlik sari” dasturini amalga oshirish bo‘yicha respublika komissiyasiga kiritib boradi;

Ijtimoiy reyestrning “kambag‘al oila” toifasidagi oilalarga va eng og‘ir ahvoldagi mahallalarga biriktirilgan tashkilotlar rahbariyatining faoliyati samaradorligini monitoring qiladi;

Vazirlik hududiy bo‘linmalarining kambag‘allikni qisqartirish va kasb-hunarga o‘qitish yo‘nalishlari bo‘yicha faoliyatini loyihaviy yondashuv tamoyili asosida tashkil etadi;

mahallalarda aniqlangan, Ijtimoiy reyestrga kiritilgan oilalarni mazkur reyestrdan chiqarishga qaratilgan choralarni ko‘radi;

kambag‘allik darajasi yuqori bo‘lgan tuman (shahar) yoki mahalla bo‘yicha aniq chora-tadbirlardan iborat loyihaviy boshqaruv tizimini joriy etadi. Bunda eng og‘ir ahvoldagi mahallalar infratuzilmasini yaxshilash, shu jumladan, tomorqalarni sug‘orishga, mahallalarni elektr energiyasi va internet bilan uzluksiz ta’minlashga mablag‘lar ajratilishi uchun aniq loyihalar ishlab chiqadi va belgilangan tartibda Vazirlar Mahkamasiga kiritadi;

kambag‘allikni qisqartirish, tadbirkorlikni rivojlantirish sohasida xalqaro va davlatlararo hamkorlikni yo‘lga qo‘yish va rivojlantirishda ishtirok etadi;

mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimining yordamchisi faoliyatini uslubiy jihatdan qo‘llab-quvvatlaydi;

istiqbolli loyihalar bilan ishlash ko‘nikmasi va malakasini oshirib borishni doimiy tahlil qiladi;

eng muhim samaradorlik ko‘rsatkichlarini ishlab chiqadi va baholaydi;

faoliyatida aniqlangan tizimli muammolarni bartaraf etish bo‘yicha takliflar ishlab chiqadi;

respublika va mahalliy ijro etuvchi hokimiyat organlari, xo‘jalik birlashmalari va boshqa tashkilotlar, shuningdek, hokim yordamchilari ishini samarali tashkil etish bo‘yicha takliflar ishlab chiqadi;

mahallabay ishlash va tadbirkorlikni rivojlantirish sohasida yuqori natijalarga erishib kelayotgan, ijobiy tajribaga ega bo‘lgan hokim yordamchilari orasidan tanlab olingan “loyiha menejerlari” va hokim yordamchilari faoliyatini muvofiqlashtiradi;

tadbirkorlikni va iqtisodiy rivojlantirish borasida respublika va mahalliy ijro etuvchi hokimiyat organlari, xo‘jalik birlashmalari va boshqa tashkilotlarga amaliy ko‘maklashadi;

tadbirkorlikni va mahallalarni iqtisodiy rivojlantirish bo‘yicha asosiy yo‘nalishlar yuzasidan takliflar ishlab chiqadi;

hududlarning xususiyatlari va salohiyatidan kelib chiqib, tadbirkorlikni rivojlantirish yo‘nalishlarini aniqlaydi va rivojlantirish bo‘yicha takliflar ishlab chiqadi;

kambag‘allikni qisqartirishga qaratilgan vositalarni joriy etishga oid ilg‘or xorijiy tajribani o‘rganadi hamda amaliyotga tatbiq etish bo‘yicha takliflar ishlab chiqadi;

hududlarda mahallabay ishlash asosida oilaviy tadbirkorlikni, yetakchi tadbirkorlik subyektlari va aholi o‘rtasida iqtisodiy kooperatsiyani rivojlantirish choralarini ko‘radi;

respublika va mahalliy ijro etuvchi hokimiyat organlari hamda boshqa tashkilotlar bilan birgalikda mahallalarning “o‘sish nuqtalari”ni aniqlash, mavjud muammolarni hal etish orqali aholini kasb-hunarga o‘qitish, bandligini ta’minlash va tadbirkorlikka jalb etish, “drayver” loyihalarni amalga oshirish bo‘yicha yangi yo‘nalishlarning ishlab chiqilishida ishtirok etadi;

hududlarda tadbirkorlikni rivojlantirish bo‘yicha davlat va hududiy dasturlar bajarilishini muvofiqlashtiradi, tadbirkorlikni rivojlantirish dasturlarining amaldagi ijrosini ta’minlashga qaratilgan kompleks chora-tadbirlar ishlab chiqadi, ularning bajarilishi ustidan samarali monitoring yuritadi;

mahallabay ishlash va tadbirkorlikni rivojlantirishga salbiy ta’sir ko‘rsatuvchi omillarning sabab va shart-sharoitlarini aniqlaydi hamda bartaraf etishga qaratilgan chora-tadbirlarni amalga oshiradi;

ishbilarmonlik muhitini yaxshilash, tadbirkorlik sohasida mavjud talablar va tartib-taomillarni soddalashtirish bo‘yicha muntazam ravishda o‘rganishlar o‘tkazadi, muammolarni chuqur o‘rganish va aniqlangan byurokratik to‘siqlar, g‘ovlarni bartaraf etish bo‘yicha takliflar ishlab chiqadi;

tadbirkorlikni qo‘llab-quvvatlash loyihalarini amalga oshirishda, shuningdek, vazirlikka yuklangan vazifalarni amalga oshirish uchun xalqaro moliya institutlari, xorijiy hukumat moliya tashkilotlarining grantlari, kreditlari va texnik ko‘magini jalb etish yuzasidan hamkorlikni yo‘lga qo‘yadi;

mahallabay ishlashning vertikal tizimi asosida mahalladagi iqtisodiy holatni, xonadonbay o‘rganishni, jumladan, aholining bandlik darajasini, oilalarning daromad manbalarini, tomorqa yerlaridan foydalanish holatlarini hamda daromadli mehnatga bo‘lgan ehtiyojlarni tahlil qilish ishlarini tashkil qiladi va muvofiqlashtiradi;

aholini tadbirkorlikka jalb qilish va o‘zini o‘zi band qilish faoliyatiga yo‘naltirish uchun belgilangan tartibda subsidiya ajratilishini tashkil etadi;

aholining daromadli mehnat bilan bandligini ta’minlash, ularni tadbirkorlikka jalb qilish va o‘qitish hamda o‘zini o‘zi band qilishning boshqa shakllarini rag‘batlantirish va rivojlantirishni qo‘llab-quvvatlash bo‘yicha takliflar tayyorlaydi;

aholida tadbirkorlik sohasida zarur ko‘nikmalarni shakllantirishga qaratilgan o‘qitish jarayoniga nodavlat notijorat tashkilotlari va nodavlat ta’lim tashkilotlarini keng jalb qiladi;

hududlar kesimida aholini kasb-hunar va tadbirkorlikka o‘qitish dasturlarida ishtirok etuvchi nodavlat ta’lim tashkilotlarining elektron reyestrini shakllantiradi va nazorat qilib boradi;

xalqaro tan olingan kasb standartlarini ishlab chiqish uchun yuqori malakali xorijiy va mahalliy ekspertlarni shartnoma asosida jalb etadi;

talab yuqori bo‘lgan kasb va xorijiy tillarga o‘qitish bo‘yicha davlat buyurtmasini shakllantiradi;

standartlar asosida malakani baholash xizmatlari bozorini tartibga soladi, sohaga xususiy sektorni keng jalb qiladi;

ish beruvchilar talabiga moslashuvchan o‘qitish muddati va vaqtini nazarda tutuvchi vaucher va buyurtmalar asosida tezkor kurslarni yo‘lga qo‘yadi;

amaliy kasbiy ko‘nikmalarni bevosita ish joyida shakllantirish imkonini beruvchi tizimni joriy etadi;

malakani baholash markazlarida xalqaro baholash tashkilotlari orqali xorijda tan olinadigan sertifikatlar (malaka pasportlari) berilishini ta’minlaydi;

yetakchi xorijiy tashkilotni jalb qilgan holda, Xalqaro standartlar bo‘yicha kasbiy malakani baholovchi markazni tashkil qiladi va xorijiy davlatlarda tan olinadigan malaka sertifikati berishni yo‘lga qo‘yadi;

xalqaro tan olingan kasb standartlarini ishlab chiqish uchun yuqori malakali xorijiy va mahalliy ekspertlarni shartnoma asosida jalb etadi;

talab yuqori bo‘lgan kasb va xorijiy tillar ro‘yxati hamda ushbu jarayonga jalb etiladigan xususiy o‘quv markazlarining reyestrini shakllantiradi;

kasblar va xorijiy tillarga o‘qitish uchun Bandlik jamg‘armasi hisobidan ajratiladigan grantlar qiymatini belgilaydi;

mehnat resurslarini kasblar bo‘yicha tahlil qiladi, shuningdek, mehnat unumdorligi, mehnat munosabatlari va mehnatga haq to‘lash hamda rag‘batlantirish tizimini takomillashtirish bo‘yicha takliflar ishlab chiqadi;

mehnat va kasbiy faoliyatning yordamchi tarmoqlararo turlari sohasida kasbiy malakalarni rivojlantirish bo‘yicha tarmoq kengashi faoliyatiga oid tadqiqotlarni amalga oshiradi va tegishli takliflarni ishlab chiqadi;

mehnatga layoqatli aholi, ayniqsa, band bo‘lmagan yoshlarga kasbiy bilim, malaka va ko‘nikmalar olishi uchun shart-sharoit yaratadi;

mehnat va kasbiy faoliyatning yordamchi tarmoqlararo turlari sohasida kasbiy malakalarni rivojlantirish bo‘yicha tarmoq kengashi faoliyatiga oid tadqiqotlarni amalga oshiradi va tegishli takliflarni ishlab chiqadi;

mehnatga layoqatli aholi, ayniqsa band bo‘lmagan yoshlarga kasbiy bilim, malaka va ko‘nikmalar olishi uchun shart-sharoit yaratadi;

ishsizlarni “usta-shogird” usulida kasbga yakka tartibda qayta tayyorlashni tashkil etadi;

mehnat bozorida teng shartlar asosida raqobatlasha olmaydigan ishsiz fuqarolar, nogironligi bo‘lgan shaxslar va aholining boshqa toifalarini kasbga o‘qitish va ularning malakasini oshirishning samarali tizimini tashkil etishda ishtirok etadi;

ishsizlarni va mehnat bozorida teng sharoitlar asosida raqobatlasha olmaydigan shaxslarni kasbga o‘qitishni tashkil etish masalalarida davlat-xususiy sheriklikning samarali mexanizmlarini shakllantirishda ko‘maklashadi;

mehnat bozoriga ilk bor kirib keluvchi, o‘z biznesini tashkil etishni xohlayotgan yoshlarni rag‘batlantirish va ularning tadbirkorlik tashabbuslarini qo‘llab-quvvatlash bo‘yicha takliflar ishlab chiqish va kiritish, ishga muhtoj band bo‘lmagan aholi manfaatlarini ko‘zlab kasbga tayyorlash va qayta tayyorlash samarali tizimini yaratish maqsadida Bandlik jamg‘armasidan ushbu maqsadlarga ajratiladigan mablag‘larni mutanosib tarzda yo‘naltiradi;

tuman (shahar) kambag‘allikni qisqartirish va bandlikka ko‘maklashish bo‘limlarida ro‘yxatga olingan ishsiz fuqarolarni, ayniqsa, Ijtimoiy reyestrga kiritilgan oilalarning a’zosi bo‘lgan xotin-qizlarni kasbga o‘qitishga sarflanadigan xarajatlarni moliyalashtirish uchun Bandlik jamg‘armasidan professional ta’lim tashkilotlariga grantlar ajratadi;

tuman (shahar) kambag‘allikni qisqartirish va bandlikka ko‘maklashish bo‘limlarida ro‘yxatga olingan ishsiz va ish qidirayotgan fuqarolarni kasbga o‘qitishga sarflanadigan xarajatlarni moliyalashtirish uchun Bandlik jamg‘armasidan nodavlat ta’lim muassasalarga grantlar ajratadi;

tuman (shahar) kambag‘allikni qisqartirish va bandlikka ko‘maklashish bo‘limlari yo‘llanmasi bo‘yicha ishga qabul qilingan aholining ijtimoiy ehtiyojmand toifalariga mansub xodimlarni, shu jumladan, nogironligi bo‘lgan shaxslarni kasbga o‘qitish va ularning malakasini oshirish uchun sarflanadigan xarajatlarni moliyalashtirish uchun ish beruvchilarga bir martalik subsidiyalar beradi;

manfaatdor vazirlik va idoralar bilan birgalikda umumta’lim maktablari, oliy va o‘rta maxsus, professional ta’lim tashkilotlari bitiruvchilari bandligini o‘rganadi va o‘rganish natijalari asosida oliy va o‘rta maxsus, professional ta’lim tashkilotlarida ishchi kadrlar va mutaxassislarni kasbga tayyorlash yo‘nalishlarini takomillashtirish yuzasidan takliflar ishlab chiqadi;

kelgusida mehnat faoliyati yo‘nalishlarini tanlash hamda mehnat bozori va bandlikni rivojlantirish istiqbollariga mutanosib kasbiy rejalarni shakllantirish masalalari bo‘yicha yoshlar o‘rtasida targ‘ibot ishlarini va kasbga yo‘naltirish ishlarini muvofiqlashtiradi;

mehnat bozorida kadrlarga bo‘lgan, shu jumladan, yangi kasblarga bo‘lgan ehtiyojlarni va ishchi kuchi taklifini aniqlash hamda baholash uslubiyotini ishlab chiqadi;

munosib mehnat tamoyillari va xalqaro standartlarni joriy etadi;

mehnat munosabatlarini tartibga solishning samarali mexanizmlarini ishlab chiqadi;

mehnat huquqlarini himoya qiladi;

fuqarolarning xavfsizlik va gigiyena talablariga javob beradigan qulay mehnat sharoitlarida ishlash bo‘yicha huquqlarini himoya qiladi;

tashkilotlar buyurtmalariga binoan shartnoma asosida mehnatni me’yorlash bo‘yicha hujjatlarni ishlab chiqadi, ekspertizadan o‘tkazadi va amalga oshiradi;

mehnatni me’yorlash bo‘yicha normativ hujjatlarni ishlab chiquvchilar bilan o‘zaro hamkorlik qiladi;

mehnat me’yorlariga oid hujjatlar loyihalarini tayyorlashda tegishli normativ-huquqiy hujjatlarni, ilmiy-uslubiy ko‘rsatmalarni ishlab chiqadi;

manfaatdor vazirlik va idoralar bilan birgalikda mehnat va mehnatni muhofaza qilish to‘g‘risidagi qonunchilik hujjatlarini amalga oshirish maqsadida normativ-huquqiy hujjatlar va boshqa hujjatlar loyihalarini ishlab chiqadi;

mehnat munosabatlari va mehnatni muhofaza qilish sohasida davlat dasturlari, normativ-huquqiy hujjatlar va boshqa hujjatlar, shuningdek, fuqarolarning xavfsizlik va gigiyena talablariga javob beradigan qulay mehnat sharoitlarida ishlash bo‘yicha huquqlarini ta’minlashga qaratilgan takliflar hamda chora-tadbirlarni ishlab chiqish va amalga oshirishda ishtirok etadi;

mehnat va bandlik masalalarini tartibga soluvchi normativ-huquqiy bazani kompleks va tizimli tahlil qilish asosida aholi bandligi oshishini ta’minlash uchun mavjud to‘siq va g‘ovlarni aniqlaydi hamda ularni yengib o‘tish choralarini belgilaydi;

manfaatdor vazirlik va idoralar hamda jamoat tashkilotlari bilan birgalikda majburiy mehnatning oldini olish va unga to‘liq barham berish, shu jumladan, aybdor mansabdor shaxslarni qonunchilik hujjatlariga muvofiq javobgarlikka tortish bo‘yicha choralar ko‘radi;

manfaatdor vazirlik va idoralar bilan birgalikda xavfsizlik va gigiyena talablariga javob beradigan mehnat sharoitlarini ta’minlash uchun qonunchilik bazasini yaratish maqsadida mehnat xavfsizligi masalalari yuzasidan texnik jihatdan tartibga solish sohasida normativ hujjatlar ishlab chiqilishini, qayta ko‘rilishini, kelishilishini va tasdiqlanishini tashkil etadi;

o‘z vakolatlari doirasida yuridik va jismoniy shaxslarga mehnat va mehnatni muhofaza qilish qonunchiligini qo‘llash masalalari bo‘yicha tushuntirishlar beradi;

mehnat, mehnatni muhofaza qilish va ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlariga rioya etilishi yuzasidan belgilangan tartibda tekshiruvlar o‘tkazadi;

mehnat huquqlari va mehnatni muhofaza qilish, ish beruvchining fuqarolik javobgarligini majburiy sug‘urta qilish, aholi bandligi to‘g‘risidagi qonunchilik hujjatlariga rioya etilishi bo‘yicha kameral nazorat o‘tkazadi;

mehnat huquqlari va mehnatni muhofaza qilish to‘g‘risidagi qonunchilikni buzgan, Davlat mehnat inspeksiyasi va uning hududiy bo‘linmalari mansabdor shaxslarining qonuniy faoliyatiga aralashgan, to‘sqinlik qilgan yoki ta’sir o‘tkazgan shaxslarga nisbatan javobgarlik belgilanishi tashabbusi bilan chiqadi;

“Shaffof qurilish” milliy axborot tizimi ma’lumotlaridan foydalangan holda Davlat budjeti mablag‘lari hisobidan qurilayotgan, ta’mirlanayotgan yoki rekonstruksiya qilinayotgan obyektlardagi ishchilar sonining loyiha-smeta hujjatlari hamda pudrat ishlari hajmiga muvofiqligi yuzasidan nazorat tadbirlarini o‘tkazadi;

mehnat faoliyati bilan bog‘liq baxtsiz hodisalarning oldini olish hamda xavfsiz mehnat sharoitlarini ta’minlash maqsadida mehnat xavfsizligi standartlarini ishlab chiqadi va joriy qiladi;

xodimlar vakillik organlari a’zolari uchun qo‘shimcha mehnat kafolatlari taqdim etishga, ish beruvchi tomonidan biror-bir tarzda ta’qib qilishdan himoya qilishga, intizomiy jazolar berishga, vakillik organlari tarkibiga saylangan va ishlab chiqarish ishlaridan ozod etilmagan xodimlar bilan ish beruvchining tashabbusiga ko‘ra mehnat shartnomasini tugatishga, shuningdek, mahalliy mehnat organining oldindan roziligisiz o‘z saylov vakolatlari tugagandan keyin ikki yil ichida vakillik organlari tarkibiga saylangan xodimlar bilan ish beruvchining tashabbusiga ko‘ra mehnat munosabatlarini tugatishga rioya etilishini davlat tomonidan nazorat qiladi;

mulkchilik va tashkiliy-huquqiy shaklidan qat’i nazar, tashkilotlar tomonidan mehnat to‘g‘risidagi qonunchilik hujjatlariga va mehnatni muhofaza qilish talablariga rioya etilishini, ish beruvchining fuqarolik javobgarligi majburiy sug‘urta qilinishini, shu jumladan, noqulay va o‘ziga xos mehnat sharoitlaridagi ishlarda band bo‘lgan xodimlarga imtiyozlar va kompensatsiyalar to‘g‘ri va o‘z vaqtida berilishini nazorat qiladi;

xodimlarning kafolatlangan mehnat huquqlarini ta’minlash, biror-bir shaklda majburiy mehnatdan foydalanish ehtimollarini o‘z vaqtida aniqlash va bartaraf etish bo‘yicha qonunchilik hujjatlari normalari amalga oshirilishini nazorat qiladi;

qishloq xo‘jaligi ishlari vaqtida xodimlar huquqlari va manfaatlariga rioya etish bo‘yicha davlat organlari, shu jumladan, mahalliy davlat organlari faoliyatining tizimli monitoringini yuritadi;

monitoring yakunlari bo‘yicha fuqarolik jamiyati institutlarini jalb qilgan holda ommaviy eshituvlarni, shu jumladan, hududlarda o‘tkazadi, eshituvlarda majburiy mehnatdan foydalanilgan har bir holatni tanqidiy o‘rganib chiqadi;

korxonalar, muassasalar, ishlar va kasblar, lavozimlar hamda imtiyozli shartlar asosida pensiya, qo‘shimcha ta’til, qisqartirilgan ish kuni olish huquqini beruvchi ko‘rsatkichlar ro‘yxatlaridagi o‘zgarishlar to‘g‘risida respublika va mahalliy ijro etuvchi hokimiyat organlari, xo‘jalik birlashmalarining takliflari bo‘yicha xulosalar beradi;

imtiyozli shartlarda pensiyaga chiqish huquqini beruvchi ishlab chiqarishlar, muassasalar, ishlar, kasblar, lavozimlar va ko‘rsatkichlar, qo‘shimcha mehnat ta’til hamda ish vaqtining cheklangan davomiyligining amaldagi ro‘yxatlariga o‘zgartirish va qo‘shimchalar kiritish to‘g‘risida Vazirlar Mahkamasiga takliflar kiritadi;

kambag‘allikni qisqartirish, mehnat, mehnatni muhofaza qilish va aholi bandligi to‘g‘risidagi qonunchilik hujjatlarida nazarda tutilgan mehnat munosabatlari subyektlari huquqlari doimiy monitoringi va himoyasini amalga oshiradi;

mehnat, aholi bandligi to‘g‘risidagi bitimlar va ish beruvchilarning mehnat haqidagi boshqa huquqiy hujjatlarining qonunchilik hujjatlariga muvofiqligini tizimli tahlil qiladi;

jamoa shartnomalari va mehnat haqidagi boshqa huquqiy hujjatlarda nazarda tutilgan majburiyatlarning bajarilishi yuzasidan davlat nazoratini amalga oshiradi;

fuqarolarning xavfsizlik va gigiyena talablariga javob beradigan qulay mehnat sharoitlarida ishlashga doir huquqlarini ta’minlash va xodimlarning huquqiy himoyalanganligini kuchaytirish bo‘yicha takliflar va chora-tadbirlar ishlab chiqadi;

mehnatni muhofaza qilish sohasidagi davlat dasturlari va boshqa dasturlarni ishlab chiqish hamda amalga oshirishda ishtirok etadi;

ish o‘rinlarini mehnat sharoitlari va asbob-uskunaning jarohat yetkazish xavfi yuzasidan attestatsiyadan o‘tkazish sifati ustidan davlat nazoratini va ekspertizadan o‘tkazilishini amalga oshiradi hamda uslubiy yordam beradi;

mehnat va mehnatni muhofaza qilish to‘g‘risidagi qonunchilik hujjatlarini qo‘llash va ularga rioya qilish masalalari bo‘yicha xodimlar va ish beruvchilarga, shu jumladan, tadbirkorlik subyektlariga maslahat va metodologik yordam beradi, mehnat faoliyati bilan bog‘liq baxtsiz hodisalarning oldini olish yuzasidan amaliy ishlarni bajaradi;

respublika va mahalliy ijro etuvchi hokimiyat organlari hamda boshqa tashkilotlar bilan mehnatni muhofaza qilish masalalari bo‘yicha hamkorlik qiladi va ularning bu boradagi faoliyatini muvofiqlashtiradi;

mehnat faoliyati bilan bog‘liq baxtsiz hodisalarning maxsus tekshiruvi o‘tkazilishini va hisobga olinishini ta’minlaydi;

mehnat sharoitlari ekspertizadan o‘tkazilishini va tegishli xulosa berilishini ta’minlaydi;

mehnatni muhofaza qilish sohasida xizmatlar bozorining professional ishtirokchilari faoliyati yuzasidan qonunchilik hujjatlarida belgilangan tartibda monitoring o‘tkazadi;

tashkilotlarda mehnatni muhofaza qilish holati bo‘yicha monitoring yuritadi;

mehnat faoliyati bilan bog‘liq baxtsiz hodisalar sabablarini tahlil qiladi, respublika va mahalliy ijro etuvchi hokimiyat organlari, xo‘jalik birlashmalari, yuridik va jismoniy shaxslarga ularning oldini olish bo‘yicha takliflar kiritadi;

ish beruvchilar tomonidan O‘zbekiston Respublikasida xorijiy ishchi kuchidan foydalanishni tartibga soluvchi normativ-huquqiy hujjatlarga rioya etilishini nazorat qiladi;

xodimlarning mehnat huquqlarini himoya qilish va mehnatni muhofaza qilishni kuchaytirish, ish beruvchilar bilan xodimlar o‘rtasidagi muvozanatli mehnat munosabatlarini yanada qo‘llab-quvvatlash hamda mehnat sohasidagi nizolarni hal etishni mediatsiya usulida, shu jumladan, videokonferensaloqa shaklida amalga oshiradi;

mulkchilik va tashkiliy-huquqiy shaklidan qat’i nazar, barcha tashkilotlarda mehnat huquqlari va mehnatni muhofaza qilishni ta’minlanganlik holatini onlayn reyting asosida baholaydi;

manfaatdor respublika ijro etuvchi hokimiyat organlari, xo‘jalik birlashmalari bilan birgalikda eng muhim ijtimoiy-mehnat normalari va normativlarining ro‘yxatini aniqlaydi va ularning ishlab chiqilishini muvofiqlashtiradi;

manfaatdor vazirlik va idoralar ishtirokida mehnat va bandlik sohasiga oid normativ-huquqiy hujjatlar va boshqa hujjatlarning loyihalarini ishlab chiqadi, mehnat sohasida xodimlarning ijtimoiy himoyalanganligini kuchaytirish bo‘yicha takliflar ishlab chiqadi;

xodimlarning mehnat sohasida ijtimoiy himoyasini kuchaytirish bo‘yicha takliflar ishlab chiqadi;

belgilangan tartibda xizmatchilarning asosiy lavozimlari va ishchi kasblar ro‘yxati, tarmoqlararo xarakterga ega bo‘lgan alohida lavozimlar va kasblar bo‘yicha kasbiy-malakaviy tasniflarni ishlab chiqadi;

xizmatchilarning asosiy lavozimlari va ishchi kasblar ro‘yxatida ko‘rsatilgan ishchi kasblari va xizmatchilar lavozimlari nomlarining ilgari normativ-huquqiy va boshqa hujjatlarda ishlatilgan kasblar va lavozimlarga aynanligini va mutanosibligini belgilaydi;

respublika va mahalliy ijro etuvchi hokimiyat organlariga hamda boshqa tashkilotlarga mehnatni normalashtirish, zamonaviy mehnat standartlarini joriy etish, mehnatga haq to‘lashni tashkil etish, ishlar, kasblar va lavozimlarning tarif-malaka ma’lumotnomalarida aks ettirilmagan lavozimlar va ishlarni tarif setkasining tegishli razryadlariga kiritish masalalarida amaliy va uslubiy yordam beradi;

davlat organlari va tashkilotlari hamda davlat ulushi 50 foiz va undan yuqori bo‘lgan xo‘jalik jamiyatlarining inson resurslari bilan ishlashga mas’ul tarkibiy tuzilmalarining rahbar va xodimlarini har uch yilda kamida bir marta mehnat munosabatlarini tashkil etish bo‘yicha Kambag‘allikni qisqartirish va bandlik vazirligi xodimlarining malakasini oshirish markazida shartnoma asosida malakasi oshirib borilishini ta’minlaydi;

O‘zbekiston Respublikasi Iqtisodiyot va moliya vazirligi hamda boshqa manfaatdor vazirlik va idoralar bilan birgalikda iqtisodiyotning alohida tarmoqlari hamda sektorlari uchun xodimlar sonining va mehnatga haq to‘lash fondining minimal normativlarini ishlab chiqadi va tasdiqlaydi;

manfaatdor respublika va mahalliy ijro etuvchi hokimiyat organlari bilan birgalikda ushbu organlar uchun lavozimlar kiritish va boshqaruv xodimlari, xizmat ko‘rsatuvchi va texnik xodimlar sonining normativlarini belgilash shartlarini ishlab chiqishda qatnashadi;

O‘zbekiston Respublikasi Iqtisodiyot va moliya vazirligi hamda manfaatdor vazirlik va idoralar bilan birgalikda ish haqi, pensiyalar, nafaqalar va stipendiyalarning eng kam miqdorini belgilash bo‘yicha takliflar tayyorlaydi;

O‘zbekiston Respublikasi Iqtisodiyot va moliya vazirligi hamda Soliq qo‘mitasi bilan birgalikda aholi daromadlarini davlat tomonidan tartibga solish mexanizmini takomillashtirish yuzasidan takliflar tayyorlashda ishtirok etadi;

mehnatni moddiy rag‘batlantirish mexanizmlarini va mehnatga haq to‘lashni tartibga solish usullarini takomillashtirish chora-tadbirlarini ishlab chiqishda ishtirok etadi;

mehnatga haq to‘lash tizimini, yagona tarif setkasini takomillashtirish, ish haqini tuman bo‘yicha tartibga solish yuzasidan takliflar ishlab chiqadi;

mehnat shartnomalarini, shu jumladan, elektron shaklda (masofaviy) tuziladigan mehnat shartnomalarini tuzishning shakllarini ishlab chiqadi va joriy etadi;

ish vaqtini yarim yillik, choraklar va oylarga bo‘lib chiqqan holda, kalendar yilga mo‘ljallangan ish vaqti normasi hisob-kitoblarini har yili ishlab chiqadi va tasdiqlaydi;

ish vaqtini hisobga olish masalalarida tashkilotlarga uslubiy yordam beradi;

fuqarolarning mehnat huquqlariga rioya qilish va xavfsiz mehnat shart-sharoitlarini yaratish va mehnatni muhofaza qilish zarurligi to‘g‘risida jismoniy va yuridik shaxslar o‘rtasida keng axborot-tushuntirish ishlarini amalga oshiradi;

kambag‘allikni qisqartirish, mehnat, bandlik va mehnatni muhofaza qilish sohasidagi qonunchilik hujjatlarining mazmun-mohiyatini izohlovchi materiallar tayyorlaydi va aholi o‘rtasida, shu jumladan, ommaviy axborot vositalari va internet tarmoqlari orqali tarqatadi;

Ijtimoiy reyestrga kiritilgan oilalarni mazkur reyestrdan chiqarish, oilaviy tadbirkorlikka va hunarmandchilikka jalb qilish, shuningdek, o‘zini o‘zi band qilishning turli shakllarini rivojlantirishni rag‘batlantirish bo‘yicha yakka tartibdagi dasturlarni mahalliy ijro etuvchi hokimiyat organlari, fuqarolarining o‘zini o‘zi boshqarish organlari, tijorat banklari, aholini ijtimoiy himoya qiluvchi va unga yordam ko‘rsatuvchi boshqa davlat organlari, shu jumladan, nodavlat notijorat tashkilotlari bilan hamkorlikda ishlab chiqadi va amalga oshiradi;

tashkilotlarda mehnatni muhofaza qilish bo‘yicha ishlarni hamda mehnatni muhofaza qilish xizmati faoliyatini muvofiqlashtiradi, ular bajarayotgan ishlar holatini o‘rganadi, qonunchilik hujjatlari talablari buzilgan holatlarni bartaraf etadi, shuningdek, aybdor shaxslarni qonun hujjatlarida nazarda tutilgan javobgarlikka tortish choralarini ko‘radi;

davlat organlari va muassasalarining mehnatni muhofaza qilish xizmatlari rahbarlari va xodimlarini lavozimga tayinlashda va lavozimdan ozod etishda ishtirok etadi;

tashkilotlarning mehnatni muhofaza qilish xizmatlari xodimlarini lavozimga tayinlash va lavozimdan ozod qilish masalasini mehnat organlari bilan kelishish tartibini belgilaydi;

tashkilotlarning mehnatni muhofaza qilish xizmatlari faoliyatini uslubiy jihatdan ta’minlaydi;

aholi tomorqalari va dehqon xo‘jaliklaridagi yer maydonlarini to‘liq xatlovdan o‘tkazadi va ularda yetishtirilayotgan qishloq xo‘jaligi mahsulotlari hisobini yuritadi hamda “Online mahalla” platformasida aniq va batafsil ma’lumotlar bazasini shakllantiradi;

hududlarning ixtisoslashuv bo‘yicha salohiyat va imkoniyatlaridan kelib chiqib, tomorqalarda yuqori daromadli mahsulotlar yetishtirishni “yashil” va innovatsion yondashuvlar asosida tashkil etish orqali aholining yuqori daromadli mehnat bilan bandligini ta’minlaydi va ularni kambag‘allikdan chiqaradi;

mahallalarda har bir aholi tomorqasidan maqsadli va samarali foydalanish, jumladan, yerni tayyorlash, urug‘, ko‘chat va daraxtlar ekish, issiqxonalar qurish ishlarini tashkil etish va yuzaga kelayotgan muammo va kamchiliklarni aniqlash hamda ularni bartaraf etish bo‘yicha vazifalar va chora-tadbirlarning ijrosi ustidan qat’iy nazorat qilish tizimini yo‘lga qo‘yadi;

suv ta’minoti og‘ir bo‘lgan mahallalarda sug‘orish tizimini yaxshilash hamda yetakchi eksport qiluvchi tadbirkorlarni jalb qilish orqali aholi tomorqalarida bir xil tur va standartdagi eksportbop mahsulotlar yetishtirishni ta’minlaydi;

tomorqalar va uzoq muddatga ijaraga berilgan ekin yer maydonlaridan foydalanishda aholi va yetakchi tadbirkorlarning ko‘p yillik tajribasi va ko‘nikmalari hamda hududning tabiiy va iqlim sharoitidan kelib chiqib, tashqi va ichki bozorlar uchun xaridorgir mahsulotlar yetishtirish bo‘yicha ixtisoslashuvni chuqurlashtiradi;

yetakchi eksportchi tadbirkorlar salohiyatidan tomorqalarda yuqori daromadli va eksportbop mahsulotlarni yetishtirish bilan birga aholining tadbirkorlik ko‘nikmasini shakllantirish va bank mijoziga aylanishiga ko‘maklashish maqsadlarida ham foydalanish amaliyotini kengaytiradi;

aholi tomorqalarida energotejamkor, yashil yondashuvlar asosidagi issiqxonalar qurish, kichik intensiv bog‘lar barpo etish va innovatsion sug‘orish texnologiyalaridan foydalanishni kengaytiradi;

ishga muhtoj shaxslarni, ayniqsa, band bo‘lmagan yoshlarni iqtisodiyot tarmoqlari va mehnat bozorining real ehtiyojlaridan kelib chiqib, kasbga tayyorlash, qayta tayyorlash va ularning malakasini oshirish bo‘yicha takliflar ishlab chiqadi;

respublika va mahalliy ijro etuvchi hokimiyat organlari, xo‘jalik birlashmalari bilan birgalikda umumta’lim maktablari, oliy va o‘rta maxsus ta’lim tashkilotlari bitiruvchilarini egallagan mutaxassisliklariga muvofiq ishga joylashtirish choralarini ko‘radi;

jismoniy va yuridik shaxslar murojaatlarini ko‘rib chiqadi, shuningdek, Vazirlik vakolatiga kiradigan masalalar bo‘yicha qonunchilik hujjatlari buzilishini bartaraf etish yuzasidan zarur xatti-harakatlarni amalga oshiradi;

bandlik va ishga joylashtirish muammolarini hal qilish bo‘yicha fuqarolarning va ish beruvchilarning fikrlari, takliflari va qonuniy talablarini o‘rganadi hamda tahlil qiladi va shu asosda ularni hal qilishga qaratilgan amaliy chora-tadbirlar yuzasidan takliflar ishlab chiqilishini ta’minlaydi;

manfaatdor vazirliklar hamda idoralar bilan birgalikda mehnat organlarining yuridik va jismoniy shaxslar murojaatlari bilan ishlashini takomillashtirish bo‘yicha amaliy chora-tadbirlar va takliflar ishlab chiqadi;

Bandlik jamg‘armasi faoliyatini, shu jumladan, mablag‘larni sarflash samaradorligi va natijadorligini nazorat qiladi;

kadrlarning qayta tayyorlanishini va malakasi oshirilishini tashkil etadi, Vazirlik va idora bo‘ysunuvidagi tashkilotlar rahbarlari hamda mutaxassislarini attestatsiyadan o‘tkazadi;

o‘z vazifa va funksiyalari doirasida elektron hukumat sohasida axborot tizimlari va axborot resurslarining, shuningdek, elektron davlat xizmatlarining joriy etilishini, rivojlantirilishini hamda integratsiyalashuvini ta’minlaydi, elektron davlat xizmatlarini ko‘rsatish uchun zarur bo‘lgan ma’lumotlarni o‘z ichiga olgan axborot tizimlari va axborot resurslarining uzluksiz ishlashini ta’minlaydi;

O‘zbekiston Respublikasi Iqtisodiyot va moliya vazirligi, boshqa vazirliklar, idoralar va ilmiy-tadqiqot tashkilotlari bilan birgalikda aholi turmush darajasi va farovonligini o‘rganishda hamda uni yanada oshirish bo‘yicha takliflar ishlab chiqishda ishtirok etadi;

mehnat jarayonida tazyiq va zo‘ravonlikka yo‘l qo‘ymaslik hamda uni har qanday shaklda namoyon bo‘lishining oldini oladi;

xorijiy va xalqaro tashkilotlarda mehnat masalalari bo‘yicha O‘zbekiston vakilining funksiyasi, vakolat va vazifalarini belgilab beradi;

Vazirlik va ularning bo‘linmalari faoliyatiga oid muhim va keng qamrovli ma’lumotlarni davriy ravishda nashr etib boradi;

chet el fuqarolarining O‘zbekiston hududida ishlashi uchun ularning malaka talablariga mosligini baholash tizimini yo‘lga qo‘yadi;

Tasdiqlangan malakaga ega bo‘lgan shaxslarning milliy reyestrini, Kasbiy standartlarning milliy registrini, Mehnatni muhofaza qilish sohasidagi xizmatlar bozori professional ishtirokchilarining yagona reyestrini, Akkreditatsiya qilingan malakani baholash markazlarining registrini shakllantiradi va yuritadi;

mehnat bozorining holati, kasblar va mutaxassisliklarga bo‘lgan talab va taklif dinamikasi, mehnatni muhofaza qilish, shu jumladan, mehnat jarayonida tazyiq va zo‘ravonlikka yo‘l qo‘ymaslik va uning har qanday shaklda namoyon bo‘lishiga yo‘l qo‘ymaslik bo‘yicha har chorakda amalga oshirilgan ishlar hisobini yuritadi.

12. Vazirlik o‘ziga yuklangan vazifa va funksiyalarni bevosita, shuningdek, hududiy bo‘linmalar va uning bo‘ysunuvidagi boshqa tashkilotlar orqali amalga oshiradi.

Vazirlik qonunchilik hujjatlariga muvofiq boshqa funksiyalarni ham bajarishi mumkin.

13. Quyidagilar Vazirlik markaziy apparatining vazifalari hisoblanadi:

1) hududiy bo‘linmalar va tizimiga kiradigan tashkilotlar bilan birgalikda Vazirlikka yuklangan vazifalar va funksiyalarning samarali bajarilishini ta’minlash;

2) mamlakat mehnat bozorining amaldagi holatini puxta tahlil qilish asosida aholini ish bilan ta’minlashga doir hududiy va tarmoq dasturlarini amalga oshirishni muvofiqlashtirish, ishga muhtoj fuqarolarni kasbga tayyorlash, qayta tayyorlash va ularning malakasini oshirish tizimini takomillashtirish;

3) kambag‘allikni qisqartirish, mehnat bozorini tartibga solish, bandlik, mehnat munosabatlari, mehnatni muhofaza qilish, kasb va mehnat standartlari sohasida normativ-huquqiy hujjatlarni ishlab chiqish va amalga oshirish, shuningdek, ular yuzasidan nazoratni amalga oshirish;

4) ilg‘or axborot texnologiyalarini kambag‘allikni qisqartirish va ishga joylashtirish jarayonlariga joriy etish;

5) kambag‘allikni qisqartirish, mehnat, mehnatni muhofaza qilish, ish beruvchining fuqarolik javobgarligini majburiy sug‘urta qilish, kasbga o‘qitish va bandlik sohasidagi qonunchilik hujjatlari talablariga rioya etilishini nazorat qilish, mehnat sharoitlari ekspertizasini amalga oshirish, mehnat munosabatlarini, mehnatni moddiy rag‘batlantirish mexanizmlarini yanada takomillashtirish bo‘yicha aniq chora-tadbirlarni amalga oshirish;

6) mehnatga haq to‘lashni normalashtirish, mehnat standartlarini joriy etish va mehnat munosabatlarini takomillashtirish;

7) mehnat va mehnatni muhofaza qilish sohasida xalqaro hamkorlikni yo‘lga qo‘yish va mustahkamlash;

8) mehnat, huquqlari, mehnat xavfsizligi hamda mehnatni muhofaza qilish hamda ish beruvchining fuqarolik javobgarligini majburiy sug‘urta qilish bo‘yicha aholi va ish beruvchilar o‘rtasida keng axborot-tushuntirish ishlarini amalga oshirish;

9) tashkilotlarning mehnatni muhofaza qilish xizmatlari faoliyatini muvofiqlashtirish hamda uslubiy ta’minlash;

10) hududiy bo‘linmalar va tizimiga kiradigan tashkilotlarda kadrlar bilan ta’minlashni muvofiqlashtirish;

11) ishga joylashtirish, o‘qitish va malaka oshirish bo‘yicha xizmatlarga bo‘lgan davlat buyurtmasini moliyalashtirish, ishsizlarni va band bo‘lmagan aholini o‘qitishda vaucher va buyurtmalar asosida haq to‘lash;

12) ishga joylashtirish, o‘qitish va malaka oshirish bo‘yicha xizmatlarga bo‘lgan davlat buyurtmasini bajarish bo‘yicha Vazirlikning hududiy bo‘linmalari va idoraviy bo‘ysunuvidagi tashkilotlar faoliyati nazorat va tahlil qilinishini ta’minlash;

13) tizimiga kiradigan tashkilotlar rivojlanishiga ko‘maklashish, ularni rivojlantirish konsepsiyalari va istiqbollarini belgilash;

14) Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari, tuman (shahar) kambag‘allikni qisqartirish va bandlikka ko‘maklashish bo‘limlari va hokim yordamchilari faoliyatining samaradorligi va natijadorligini tanqidiy tahlil qilish, tahlil natijalariga ko‘ra zarur choralar ko‘rish.

14. Vazirlikning markaziy apparati o‘ziga yuklangan asosiy vazifalarga muvofiq quyidagi funksiyalarni bajaradi:

1) Vazirlik va uning rahbariyati faoliyatini tashkiliy hamda axborot-tahliliy jihatdan ta’minlaydi;

2) hududiy bo‘linmalar va tizimiga kiradigan tashkilotlar tomonidan O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari bajarilishi yuzasidan muntazam nazoratni ta’minlaydi;

3) O‘zbekiston Respublikasi kambag‘allikni qisqartirish va bandlik vazirining (keyingi o‘rinlarda — Vazir) buyruqlari va ko‘rsatmalari hamda vazir o‘rinbosarlarining topshiriqlari bajarilishini o‘z vakolatlari doirasida tashkil etadi;

4) Vazirlik tomonidan O‘zbekiston Respublikasi Prezidenti Administratsiyasi va Vazirlar Mahkamasiga kiritiladigan hujjatlarning sifatli va o‘z vaqtida qayta ishlanishini tashkil etadi, ularning iqtisodiy, moliyaviy, huquqiy, korrupsiyaga qarshi va gender ekspertizasini o‘tkazadi;

5) hududiy bo‘linmalar va tizimiga kiradigan tashkilotlar faoliyati monitoringini tashkil etadi;

6) kambag‘allikni qisqartirish, mehnat bozorini rivojlantirish maqsadida ilmiy-tadqiqot ishlarini o‘tkazishga ko‘maklashadi;

7) Vazirlik faoliyatini, shu jumladan, norma ijodkorligi sohasidagi faoliyatini huquqiy jihatdan ta’minlashni tashkil etadi;

8) kambag‘allikni qisqartirish, mehnat bozori rivojlanishi, aholini ish bilan ta’minlash darajasi va tuzilmasi, yangi ish o‘rinlari tashkil etilishi to‘g‘risida Vazirlik rahbariyati uchun axborot to‘playdi, umumlashtiradi va tahlil qiladi;

9) kambag‘allik darajasini qisqartirish, aholi bandligini ta’minlash, mehnat munosabatlari, mehnatni muhofaza qilish va mehnatga haq to‘lash masalalari va markaziy apparat vakolatiga kiradigan boshqa masalalar bo‘yicha tadbirkorlik subyektlarini axborot, uslubiy, tashkiliy va konsultativ jihatdan qo‘llab-quvvatlaydi;

10) operativ, tashkiliy, kadrlar, moliyaviy, ishlab chiqarish xo‘jalik va Vazirlik vakolatiga kiradigan boshqa masalalarning hal etilishi bilan shug‘ullanadi;

11) Vazirlik hududiy bo‘linmalari va tizimiga kiradigan tashkilotlar faoliyatini nazorat va tahlil qiladi;

12) Vazirlikning hududiy bo‘linmalari va tizimiga kiradigan tashkilotlar bilan birgalikda o‘ziga yuklangan vazifalarning samarali bajarilishini ta’minlaydi;

13) kambag‘allik darajasini qisqartirish, aholi bandligini ta’minlash va daromadlarini oshirish sohasida xizmatlar ko‘rsatish bilan bog‘liq faoliyatni amalga oshiruvchi yuridik shaxslar bilan hamkorlik qiladi;

14) Vazirlik tizimiga kiruvchi tashkilotlarda moliyaviy nazoratni tashkil etadi va amalga oshiradi;

15) aholi bandligini ta’minlash va daromadlarini oshirish, kasb-hunarga o‘qitish va malaka oshirish, malakani baholashga doir xizmatlarga bo‘lgan davlat buyurtmasini bajarish bo‘yicha Vazirlik hududiy bo‘linmalari va tizimiga kiradigan tashkilotlar faoliyatini nazorat va tahlil qiladi;

16) jismoniy va yuridik shaxslar murojaatlarini ko‘rib chiqadi va Vazirlik vakolati doirasida hal qilinishini tashkil etadi;

17) xorijiy investitsiyalar jalb etilishini tashkil qiladi va xalqaro hamkorlikni amalga oshiradi;

18) qonunchilik hujjatlarida nazarda tutilgan boshqa funksiyalarni amalga oshiradi.

15. Quyidagilar Qoraqalpog‘iston Respublikasi Kambag‘allikni qisqartirish va bandlik vazirligining, viloyatlar va Toshkent shahri kambag‘allikni qisqartirish va bandlik boshqarmalarining asosiy vazifalari hisoblanadi:

1) Vazirlikka yuklangan vazifalar va funksiyalarning samarali bajarilishini ta’minlashda ishtirok etish;

2) kambag‘allik darajasini qisqartirish, aholi bandligini ta’minlash, mehnatni muhofaza qilish sohasidagi va ular vakolatiga kiradigan boshqa masalalarga doir qonunchilik hujjatlariga, normativ-huquqiy hujjatlarga rioya etish yuzasidan monitoring va nazoratni amalga oshirish;

3) tuman (shahar) kambag‘allikni qisqartirish va bandlikka ko‘maklashish bo‘limlari va tizimiga kiradigan tashkilotlar faoliyatiga axborot-kommunikatsiya texnologiyalarini joriy etish;

4) bandlikka ko‘maklashish, o‘qitish va malaka oshirish, malakani baholash xizmatlari uchun davlat buyurtmasini shakllantirish bo‘yicha tuman (shahar) kambag‘allikni qisqartirish va bandlikka ko‘maklashish bo‘limlari faoliyatini muvofiqlashtirish hamda tahlil qilish;

5) tuman (shahar) kambag‘allikni qisqartirish va bandlikka ko‘maklashish bo‘limlari va tizimiga kiradigan tashkilotlarda moliyaviy nazoratni tashkil etish va amalga oshirish;

6) aholi tomorqasi va dehqon xo‘jaliklari yerlaridan samarali foydalanishni tashkil etish.

16. Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari o‘ziga yuklangan asosiy vazifalarga muvofiq quyidagi funksiyalarni bajaradi:

1) Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari faoliyatini tashkiliy va axborot-tahliliy jihatdan ta’minlaydi hamda unga rahbarlik qiladi;

2) O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisining palatalari qarorlari, O‘zbekiston Respublikasi Prezidentining hujjatlari, Vazirlar Mahkamasi qarorlari hamda Vazirlik buyruqlarining tuman (shahar) kambag‘allikni qisqartirish va bandlikka ko‘maklashish bo‘limlari hamda tizimiga kiradigan tashkilotlar tomonidan bajarilishini tizimli nazorat qiladi;

3) tuman (shahar) kambag‘allikni qisqartirish va bandlikka ko‘maklashish bo‘limlari, tizimiga kiradigan tashkilotlar tomonidan kiritiladigan hujjatlarning sifatli va o‘z vaqtida ishlab chiqilishini, ularning iqtisodiy, moliyaviy va huquqiy ekspertizasi o‘tkazilishini tashkil etadi;

4) tuman (shahar) kambag‘allikni qisqartirish va bandlikka ko‘maklashish bo‘limlari, tizimiga kiradigan tashkilotlar faoliyatiga rahbarlik qiladi, ularni muvofiqlashtiradi va nazorat qiladi;

5) kambag‘allikni qisqartirish, aholini ishga joylashtirish sohasida xizmatlar ko‘rsatish bo‘yicha faoliyat yurituvchi yuridik shaxslar bilan hamkorlik qiladi;

6) tuman (shahar) kambag‘allikni qisqartirish va bandlikka ko‘maklashish bo‘limlari va tizimiga kiradigan tashkilotlarda moliyaviy nazoratni tashkil etadi va amalga oshiradi;

7) kambag‘allik darajasini qisqartirish, aholi bandligini ta’minlash hududiy dasturlari bajarilishi monitoringini yuritish, band bo‘lmagan aholiga davlat xizmatlarini ko‘rsatish, mehnat munosabatlari va mehnatni muhofaza qilish bo‘yicha tuman (shahar) kambag‘allikni qisqartirish va bandlikka ko‘maklashish bo‘limlari, tizimiga kiradigan tashkilotlar faoliyatini muvofiqlashtiradi;

8) aholi bandligini ta’minlash, kasbga o‘qitish xizmatlariga bo‘lgan davlat buyurtmasini shakllantirish, moliyalashtirish va amalga oshirish, keyinchalik tegishli ravishda ishsizlar va band bo‘lmagan aholini o‘qitishga haq to‘lash bo‘yicha tuman (shahar) kambag‘allikni qisqartirish va bandlikka ko‘maklashish bo‘limlari faoliyatini muvofiqlashtiradi;

9) tuman (shahar) kambag‘allikni qisqartirish va bandlikka ko‘maklashish bo‘limlari va tizimiga kiradigan tashkilotlarning moddiy-texnik ta’minotini tashkil etadi;

10) tuman (shahar) kambag‘allikni qisqartirish va bandlikka ko‘maklashish bo‘limlari va tizimiga kiradigan tashkilotlar binolari va inshootlaridan joriy foydalanish bo‘yicha ishlar monitoringini o‘tkazadi va muvofiqlashtiradi;

11) jismoniy va yuridik shaxslar murojaatlari bilan bog‘liq ishlarni tashkil etadi;

12) operativ, tashkiliy, kadrlar, moliyaviy, ishlab chiqarish va o‘z vakolatiga kiradigan boshqa masalalar yuzasidan qarorlar qabul qiladi;

13) qonunchilik hujjatlarida nazarda tutilgan boshqa funksiyalarni amalga oshiradi.

17. Quyidagilar tuman (shahar) kambag‘allikni qisqartirish va bandlikka ko‘maklashish bo‘limlarining asosiy vazifalari hisoblanadi:

Vazirlikka yuklangan vazifalar va funksiyalarning samarali bajarilishini ta’minlashda ishtirok etish;

kambag‘allikni qisqartirish, aholi bandligi, mehnat munosabatlari, mehnatni muhofaza qilish sohasidagi va o‘z vakolatiga kiradigan boshqa masalalarga doir tashkilotlar bilan hamkorlik qilish;

mehnat va aholining bandligi sohasidagi qonunchilik hujjatlariga, normativ-huquqiy hujjatlarga rioya etilishi yuzasidan monitoring va nazoratni amalga oshirish;

ishga joylashtirish, o‘qitish va malaka oshirish xizmatlariga bo‘lgan davlat buyurtmasini moliyalashtirish;

aholini ishga joylashtirish sohasida xizmatlar ko‘rsatish faoliyatini amalga oshiruvchi yuridik shaxslarni qo‘llab-quvvatlash;

aholi tomorqasi va dehqon xo‘jaliklari yerlaridan samarali foydalanishni tashkil etish.

18. Tuman (shahar) kambag‘allikni qisqartirish va bandlikka ko‘maklashish bo‘limlari o‘ziga yuklangan asosiy vazifalarga muvofiq quyidagi funksiyalarni bajaradi:

tuman (shahar) kambag‘allikni qisqartirish va bandlikka ko‘maklashish bo‘limlari faoliyatini tashkiliy va axborot-tahliliy jihatdan ta’minlaydi hamda ularga rahbarlik qiladi;

O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining hujjatlari, Vazirlar Mahkamasining qarorlari hamda Vazirlik, Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari buyruqlari bajarilishini ta’minlaydi;

kambag‘allikni qisqartirish va bandlikka ko‘maklashish bo‘limlari tomonidan tumanlar (shaharlar) hokimliklariga kiritiladigan hujjatlarning sifatli va o‘z vaqtida ishlab chiqilishini, ularning iqtisodiy, moliyaviy va huquqiy ekspertizasi o‘tkazilishini tashkil etadi;

mehnat organlariga murojaat qilgan ishsizlarning ishga joylashtirilishiga ko‘maklashadi;

fuqarolarga mos ish tanlashda, zarur, malakali xodimlarni tanlashda korxonalar, muassasalar, tashkilotlar va boshqa ish beruvchilarga ko‘maklashadi;

mehnat organlariga murojaat qilgan fuqarolar va ish beruvchilarni ishga olish va ishchi kuchi bilan ta’minlash imkoniyatlari, xodimlarga qo‘yiladigan talablar to‘g‘risida va bandlikni ta’minlash bilan bog‘liq boshqa masalalar yuzasidan maslahat beradi;

ishlamaydigan fuqarolarni kasbga o‘qitish, qayta o‘qitish va ularning malakasini oshirish to‘g‘risida o‘quv muassasalari, korxonalar, muassasalar va tashkilotlar bilan shartnomalar tuzadi;

ishsizlarning ro‘yxatdan o‘tkazilishini ta’minlaydi va ularga yordam beradi, shu jumladan, nafaqalar tayinlaydi va to‘laydi;

mehnat bozorining holatini va uni rivojlantirish istiqbollarini baholaydi, uning monitoringini tashkil etadi va o‘tkazadi;

ish izlab murojaat qilgan fuqarolar, shuningdek, tegishli hududdagi bo‘sh ish o‘rinlari (vakant lavozimlar) hisobini yuritadi;

aholini ish bilan ta’minlash dasturlarini ishlab chiqish va amalga oshirishda ishtirok etadi;

ish o‘rinlari tashkil etish va aholi bandligini ta’minlash dasturlariga kiritilgan korxonalar, muassasalar va tashkilotlar tomonidan taqdim etiladigan axborot, shuningdek, Milliy statistika qo‘mitasining ma’lumotlari asosida mazkur dasturlar bajarilishi monitoringini yuritadi;

mehnat organlariga murojaat qilgan fuqarolarni o‘z kasbiy tayyorgarligi va malaka darajasiga ko‘ra ishga joylashtirish uchun korxonalarga, muassasalarga va tashkilotlarga, agar ularda bo‘sh ish o‘rinlari (vakant lavozimlar) bo‘lsa, yuboradi;

ijtimoiy himoyaga muhtoj shaxslarni ishga qabul qilish uchun korxonalar, muassasalar va tashkilotlarga eng kam ish o‘rinlari sonini belgilash to‘g‘risidagi takliflarni ishlab chiqadi va mahalliy ijro etuvchi hokimiyat organlariga ko‘rib chiqish uchun kiritadi, shuningdek, mazkur fuqarolarni ishga joylashtirish uchun korxonalar, muassasalar va tashkilotlarga yuboradi;

Bandlik jamg‘armasining mablag‘larini belgilangan tartibda tasarruf etadi;

fuqarolarga ishsizlik nafaqasini belgilangan tartibda tayinlaydi;

mehnat va aholi bandligi sohasidagi qonunchilik hujjatlari talablariga, mehnat munosabatlarini, moddiy rag‘batlantirish va mehnatni muhofaza qilish mexanizmlarini takomillashtirishga doir chora-tadbirlarga rioya etilishini nazorat qiladi;

kambag‘allikni qisqartirish, aholini ishga joylashtirish sohasida xizmatlar ko‘rsatish bo‘yicha faoliyat yurituvchi yuridik shaxslar bilan hamkorlik qiladi;

ishga joylashtirish, o‘qitish va malaka oshirish bo‘yicha xizmatlarga bo‘lgan davlat buyurtmasini moliyalashtiradi, keyinchalik tegishli ravishda xususiy bandlik agentliklariga, ishsizlarni va band bo‘lmagan aholini o‘qitishga haq to‘laydi;

ish bilan ta’minlash davlat dasturlari bajarilishi yuzasidan monitoring yuritadi;

jismoniy va yuridik shaxslar murojaatlari bilan bog‘liq ishlarni tashkil etadi;

operativ, tashkiliy, kadrlar, moliyaviy, ishlab chiqarish, xo‘jalik, tuman (shahar) kambag‘allikni qisqartirish va bandlikka ko‘maklashish bo‘limlarining vakolatiga kiradigan boshqa masalalar yuzasidan qarorlar qabul qiladi;

qonunchilik hujjatlarida nazarda tutilgan boshqa funksiyalarni amalga oshiradi.

19. Vazirlik o‘ziga yuklangan vazifalar va funksiyalarni bajarish uchun quyidagi huquqlarga ega:

Vazirlikka yuklangan vazifalar va funksiyalarni bajarish bilan bog‘liq normativ-huquqiy hujjatlar loyihalarini, shuningdek, boshqa hujjatlarni Vazirlar Mahkamasiga yoki O‘zbekiston Respublikasi Prezidenti Administratsiyasiga belgilangan tartibda kiritish;

kambag‘allikni qisqartirish, mehnat, bandlik va mehnatni muhofaza qilish sohasida davlat siyosatini amalga oshirish masalalarida respublika va mahalliy ijro etuvchi hokimiyat organlari faoliyatini belgilangan tartibda muvofiqlashtirish;

Vazirlik vakolatiga kiradigan masalalarni hal qilish uchun respublika va mahalliy ijro etuvchi hokimiyat organlari va xo‘jalik birlashmalaridan belgilangan tartibda axborotni so‘rash va olish;

statistika organlaridan Vazirlik vakolatiga kiradigan masalalarga doir zarur statistik axborotni bepul olish;

tashkilotlarda mehnat, bandlik va mehnatni muhofaza qilish to‘g‘risidagi qonunchilik hujjatlariga, mehnat xavfsizligi standartlariga, shu jumladan, O‘zbekiston Respublikasi tomonidan ratifikatsiya qilingan konvensiyalarning qoidalari va talablariga rioya etilishini belgilangan tartibda o‘rganish va tekshirish;

mehnat faoliyati bilan bog‘liq baxtsiz hodisalarni maxsus tekshirish yoki tekshirishda ishtirok etish;

mehnat, bandlik va mehnatni muhofaza qilish to‘g‘risidagi qonunchilik hujjatlarini buzganlik uchun mansabdor shaxslarga qonunchilik hujjatlarida belgilangan tartibda ma’muriy jazolar qo‘llash;

mehnatni muhofaza qilish talablariga javob bermaydigan va xodimlar sog‘lig‘i yoki hayotiga xavf tug‘diradigan tashkilotlar faoliyatini o‘z vakolatlari doirasida va qonunchilik hujjatlarida belgilangan tartibda to‘xtatish;

Vazirlik va uning idoraviy bo‘ysunuvidagi tuzilmalardagi davlat mulkini bir bo‘linmadan boshqa bo‘linmaga bepul foydalanish huquqlari asosida o‘z tashkiliy tuzilmasi doirasida belgilangan tartibda o‘tkazish;

Bandlik jamg‘armasi, Hokim yordamchilari faoliyatini qo‘llab-quvvatlash jamg‘armasi mablag‘larini belgilangan tartibda tasarruf etish hamda ulardan maqsadli foydalanish yuzasidan nazoratni ta’minlash ishlarini tashkil etish;

Vazirlik va uning tizimiga kiradigan tashkilotlarning mol-mulkini beg‘araz foydalanish huquqi asosida bir bo‘linmadan boshqa bo‘linmaga, o‘z tashkiliy tuzilmasi doirasida balansdan balansga belgilangan tartibda o‘tkazish, shtat jadvallarini muvofiqlashtirish masalalarini, idora bo‘ysunuvidagi tashkilotlar moliya-xo‘jalik faoliyati balanslari va hisobotlarini ko‘rib chiqish;

tizimidagi tashkilotlarning moddiy-texnik bazasini mustahkamlash tadbirlarini amalga oshirish;

tizimidagi tashkilotlar tomonidan markazlashgan kapital mablag‘lardan samarali foydalanish yuzasidan nazoratni ta’minlash;

Vazirlik tizimidagi obyektlarni qurish va rekonstruksiya qilish bo‘yicha istiqbolli dasturlarni tayyorlash tashabbusi bilan chiqish;

Kambag‘allik va mehnat bozori tadqiqotlari institutida ilmiy ishlarni bajarish, Vazirlik vakolatiga kiradigan masalalar bo‘yicha tadqiqotlar va so‘rovlar o‘tkazish;

Loyihalarni boshqarish markazida kambag‘allikni qisqartirish, bandlik va mehnat munosabatlari sohasiga oid loyihalarni ishlab chiqish, amalga oshirish va muvofiqlashtirish;

Kambag‘allikni qisqartirish va bandlik vazirligi xodimlarining malakasini oshirish markazida mehnat organlari xodimlari malakasini oshirish;

yangi ish o‘rinlari tashkil etgan ish beruvchilarga, shuningdek, aholining ijtimoiy ehtiyojmand toifalariga kiruvchi shaxslarni, eng avvalo, kasbiy ta’lim tashkilotlari bitiruvchilarini, imkoniyatlari cheklangan shaxslarni, harbiy xizmatdan bo‘shatilgan shaxslarni ishga qabul qilgan ish beruvchilarni ijtimoiy rag‘batlantirish, ularni Vazirlikning faxriy nishonlari, yorliqlari va guvohnomalari bilan taqdirlash, shuningdek, ommaviy axborot vositalarida eng yaxshi ish beruvchilar to‘g‘risida materiallar joylashtirilishini tashkil etish choralarini ko‘rish;

ish beruvchilar o‘rtasida ijtimoiy javobgarlikni oshirishga hamda yangi ish o‘rinlari tashkil etish va aholini ishga joylashtirish bo‘yicha samarali faoliyatni kengaytirishga rag‘batlantirishni kuchaytirishga qaratilgan tanlovlarni belgilangan tartibda o‘tkazish;

belgilangan tartibda noshirlik faoliyatini amalga oshirish, mehnat, aholini ish bilan ta’minlash, mehnatni muhofaza qilish va ish beruvchining fuqarolik javobgarligini majburiy sug‘urta qilish sohasida belgilangan tartibda davriy nashrlar ta’sis etish;

kambag‘allikni qisqartirish, mehnat, aholi bandligi va mehnatni muhofaza qilish masalalari bo‘yicha ijtimoiy reklama mahsulotlariga buyurtmalar berish, shuningdek, ularni davlat ommaviy axborot vositalarida, stendlarda, bannerlarda va aholi keng tanishishi mumkin bo‘lgan boshqa usullarda bepul joylashtirish;

binolarga xizmat ko‘rsatish, inventar va xo‘jalik asboblarini, avtotransportni, aloqa vositalarini, kompyuter va ofis texnikasini ta’minlab turish va ulardan foydalanish, dasturiy ta’minot xarid qilish, shu jumladan, autsorsing shartlari asosida xarid qilish bo‘yicha ishlarni bajarish uchun belgilangan tartibda shartnomalar tuzish;

Vazirlik vakolatiga kiradigan masalalarni hal qilishga ilmiy tashkilotlarni, olimlar va mutaxassislarni, shu jumladan, xorijiy mutaxassislarni shartnoma asosida jalb qilish;

kambag‘allikni qisqartirish, mehnat, aholi bandligi va mehnatni muhofaza qilish to‘g‘risidagi qonunchilik hujjatlarini buzgan holda qabul qilingan respublika va mahalliy ijro etuvchi hokimiyat organlari va boshqa tashkilotlarning buyruqlari va boshqa hujjatlarini bekor qilish to‘g‘risida belgilangan tartibda ko‘rsatmalar kiritish;

Internet jahon axborot tarmog‘ida va ijtimoiy tarmoqlarda belgilangan tartibda rasmiy veb-saytlar yaratish;

Hukumat topshirig‘iga binoan xalqaro tashkilotlarda O‘zbekiston Respublikasi manfaatlarini ifodalash hamda qonunchilik hujjatlarida belgilangan tartibda va xalqaro huquq normalariga muvofiq boshqa davlatlarning vakolatli tashkilotlari bilan kambag‘allikni qisqartirish, mehnat, bandlik masalalari bo‘yicha shartnomalar tuzish;

davlat-xususiy sheriklik shartlari asosida yangi ish o‘rinlarini tashkil etishga va aholini ish bilan ta’minlashga qaratilgan loyihalarni amalga oshirish;

korrupsiya va boshqa suiiste’molliklarning oldini olish va ularga yo‘l qo‘ymaslik, xodimning shaxsiy va ishchanlik xususiyatlarini, uning faoliyati samaradorligini muntazam o‘rganish, shuningdek, malakaga va ishlash tajribasiga ega kadrlar zaxirasini shakllantirish maqsadida xodimlar rotatsiyasini amalga oshirish;

yuridik shaxslarni ta’sis etish va ularning ishtirokchisi bo‘lish;

mehnat organlari reytingini tuzish maqsadida ular faoliyatining samaradorligini oshirish mezonlarini tasdiqlash;

o‘z vakolati doirasida konferensiyalar, seminarlar, simpoziumlar, ko‘rgazmalar, yarmarkalar o‘tkazish, shuningdek, boshqa tashkilotlar tomonidan tashkil etilgan tadbirlarda ishtirok etish;

Vazirlik vakolatiga kiradigan masalalar yuzasidan uslubiy materiallar va tavsiyalar ishlab chiqish;

O‘zbekiston Respublikasi Konstitutsiyasi va qonunlari, O‘zbekiston Respublikasi Oliy Majlisi palatalarining qarorlari, O‘zbekiston Respublikasi Prezidentining farmonlari, qarorlari va farmoyishlari, Vazirlar Mahkamasi qarorlari va farmoyishlarini bajarish bo‘yicha Vazirlik hududiy bo‘linmalari va tizimiga kiradigan boshqa tashkilotlar faoliyatini belgilangan tartibda o‘rganish va tekshirish;

Vazirlik hududiy bo‘linmalari va uning tizimiga kiradigan tashkilotlari rahbarlari va vakillari ishtirokida kengashlar o‘tkazish;

Vazirlikka yuklangan vazifalar va funksiyalarning bajarilishi bilan bog‘liq bo‘lgan hamda tezkor hal etishni talab qiladigan masalalar yuzasidan Vazirlik hududiy bo‘linmalari va tizimiga kiradigan boshqa tashkilotlar rahbarlariga belgilangan tartibda topshiriqlar berish;

Vazirlik qonunchilik hujjatlariga muvofiq boshqa huquqlarga ham ega bo‘lishi mumkin.

20. Vazirlik respublika va mahalliy ijro etuvchi hokimiyat organlari, xo‘jalik birlashmalari, boshqa tashkilotlar, mansabdor shaxslar va fuqarolar tomonidan ijro etilishi shart bo‘lgan idoraviy normativ-huquqiy hujjatlarni o‘z vakolatlari doirasida qabul qilishga haqli.

Vazirlik zarur hollarda boshqa respublika ijro etuvchi hokimiyat organlari bilan birgalikda qo‘shma qarorlar va boshqa hujjatlarni belgilangan tartibda qabul qilishga haqli.

21. Quyidagilar vazirning asosiy funksional vazifalari hisoblanadi:

1) O‘zbekiston Respublikasi Konstitutsiyasi va qonunlari hamda boshqa normativ-huquqiy hujjatlarga rioya etish;

2) Vazirlikning faoliyatini umumiy boshqarishni amalga oshirish va rahbarlik qilish, O‘zbekiston Respublikasi Prezidenti hujjatlari, Vazirlar Mahkamasining qarorlari va boshqa qonunchilik hujjatlari bilan Vazirlikka yuklatilgan vazifalar va funksiyalarning bajarilishini tashkil etish;

3) O‘zbekiston Respublikasi Prezidentining hujjatlari, Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish bo‘yicha konsepsiyalar, kompleks dasturlar va chora-tadbirlarni amalga oshirish bo‘yicha tanqidiy va chuqur tahlillarni o‘tkazish;

4) Vazirlik, uning hududiy bo‘linmalari va idoraviy mansub tashkilotlari, oliy, o‘rta maxsus va professional ta’lim tashkilotlari faoliyati bilan bog‘liq prognoz ko‘rsatkichlariga erishishni so‘zsiz ta’minlash bo‘yicha amaliy chora-tadbirlarni ishlab chiqish va qabul qilish;

5) O‘zbekiston Respublikasi Prezidenti Administratsiyasining tegishli tarkibiy bo‘linmalari va Vazirlar Mahkamasi, shuningdek, tegishli respublika va mahalliy ijro etuvchi hokimiyat organlari hamda boshqa tashkilotlar bilan Vazirlik faoliyati sohasiga kiradigan masalalar bo‘yicha o‘zaro hamkorlik qilish, Vazirlar Mahkamasi va uning Rayosati majlislarida masalalarning ko‘rib chiqilishida ishtirok etish;

6) O‘zbekiston Respublikasi Prezidenti, O‘zbekiston Respublikasi Bosh vaziri va uning o‘rinbosarlari (maslahatchisi) topshiriqlarini bajarish;

7) o‘z o‘rinbosarlari vakolatlarini belgilash, ular o‘rtasida vazifalarni taqsimlash, Vazirlikning boshqa mansabdor shaxslari vakolatlarini belgilash, Vazirlik faoliyatining ma’lum bir sohalarini boshqarishda o‘z o‘rinbosarlari va boshqa mansabdor shaxslarning shaxsiy mas’uliyati darajasini belgilash;

8) Vazirlikning faoliyati rejalashtirilishini tashkil etish, davriy ish rejalarini tasdiqlash, ularning bajarilishi yuzasidan nazoratni ta’minlash;

9) O‘zbekiston Respublikasi Prezidenti va Vazirlar Mahkamasining hujjatlari va topshiriqlari ijrosini tashkil etish va monitoringini olib borishning amaliy tizimini yaratish, Vazirlik faoliyatida ijro intizomini mustahkamlash bo‘yicha amaliy chora-tadbirlarni bajarish, shuningdek, O‘zbekiston Respublikasi Prezidentining va Vazirlar Mahkamasining ijro intizomini mustahkamlash bo‘yicha qarorlariga muvofiq topshiriqlarning o‘z vaqtida va sifatli bajarilishi uchun tarkibiy va hududiy bo‘linmalar, idoraviy mansub tashkilotlar rahbarlarining shaxsiy mas’uliyatini oshirish choralarini ko‘rish;

10) Vazirlik xodimlari, hududiy boshqarmalari va idoraviy mansub tashkilotlari xodimlarining tizimli ravishda malakasini oshirishni tashkil etish;

11) Vazirlik tizimida xodimlarni tanlash va joy-joyiga qo‘yish, ularning samarali faoliyat ko‘rsatishlari uchun zarur sharoitlarni yaratish, Vazirlik tizimining kadrlar zaxirasini shakllantirish;

12) O‘zbekiston Respublikasi Prezidentining, O‘zbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan bo‘sh lavozimlarga taklif etilgan kadrlarning, shuningdek, Vazirlikka ishga qabul qilinadigan boshqa kadrlarning professionalligi, o‘z ishini bilishi, amaliy ish tajribasi, yuqori ishchanlik darajasi va ma’naviy-axloqiy fazilatlarga ega bo‘lishini ta’minlashga qaratilgan chora-tadbirlarni amalga oshirish;

13) O‘zbekiston Respublikasi Prezidenti, Vazirlar Mahkamasi topshiriqlariga va o‘z tashabbusiga ko‘ra normativ-huquqiy hujjatlar loyihalarining sifatli ishlab chiqilishini, ular O‘zbekiston Respublikasining “Normativ-huquqiy hujjatlar to‘g‘risida”gi, “Qonunlar loyihalarini tayyorlash va O‘zbekiston Respublikasi Oliy Majlisining Qonunchilik palatasiga kiritish tartibi to‘g‘risida”gi qonunlari, O‘zbekiston Respublikasi Prezidenti Administratsiyasi Reglamenti va O‘zbekiston Respublikasi Vazirlar Mahkamasi Reglamenti talablariga qat’iy rioya qilgan holda, Vazirlar Mahkamasiga o‘z vaqtida kiritilishini ta’minlash, ularni Vazirlar Mahkamasining rahbariyati huzurida himoya qilish hamda Vazirlar Mahkamasida ishlab chiqilishida va O‘zbekiston Respublikasi Prezidenti Administratsiyasida ko‘rib chiqilishida ishtirok etish;

14) “Normativ-huquqiy hujjatlar to‘g‘risida”gi, “Qonunlar loyihalarini tayyorlash va ularni O‘zbekiston Respublikasi Oliy Majlisining Qonunchilik palatasiga kiritish tartibi to‘g‘risida”gi O‘zbekiston Respublikasining qonunlariga va Vazirlar Mahkamasining 2016-yil 17-oktabrdagi 345-son qarori bilan tasdiqlangan Davlat va xo‘jalik boshqaruvi organlari, mahalliy ijro etuvchi hokimiyat organlarining qonun loyihalariga doir faoliyatining namunaviy reglamentiga muvofiq Vazirlikning qonun loyihalarini tayyorlash faoliyatini tashkil etish;

15) Vazirlikka taqdim etilgan takliflar va normativ-huquqiy hujjatlar loyihalarining to‘liq va har tomonlama ko‘rib chiqilishini ta’minlash, ularni O‘zbekiston Respublikasi Prezidenti Administratsiyasi Reglamenti va Vazirlar Mahkamasi Reglamentida belgilangan muddatlarda kelishish (viza qo‘yish);

16) Vazirlikning qonunchilik hujjatlari loyihalarini ishlab chiqish faoliyatini “Normativ-huquqiy hujjatlar to‘g‘risida”gi, “Qonunlar loyihalarini tayyorlash va O‘zbekiston Respublikasi Oliy Majlisining Qonunchilik palatasiga kiritish tartibi to‘g‘risida”gi O‘zbekiston Respublikasi qonunlari va boshqa qonunchilik hujjatlariga muvofiq tashkil etish;

17) Vazirlik vakolatiga tegishli masalalar bo‘yicha normativ-huquqiy hujjatlarni qabul qilish, zarur hollarda, boshqa vazirlik va idoralar bilan hamkorlikda tegishli qarorlar qabul qilish;

18) Vazirlik rahbarlari va xodimlarining xizmat safarlarini qonunchilik talablariga to‘la muvofiq ravishda tashkil etish, xizmat safarlarining asoslanganligi, samaradorligi va natijadorligini, xizmat safarlariga ajratiladigan mablag‘lardan oqilona foydalanishni ta’minlash;

19) o‘rinbosarlari, Vazirlik tizimiga kiruvchi tashkilotlar, tarkibiy va hududiy bo‘linmalar rahbarlari faoliyatining samaradorligi va natijadorligini doimiy tanqidiy tahlil qilish, Vazirlikning hay’at yig‘ilishlarida ularning shaxsiy hisobotlarini tinglash, muhokama yakunlari bo‘yicha zarur choralar ko‘rish;

20) Vazirlik xodimlarini rag‘batlantirish va intizomiy javobgarlikka tortish masalalarini hal etish, alohida o‘rnak ko‘rsatgan xodimlarni, o‘rinbosarlarini rag‘batlantirish va intizomiy javobgarlikka tortish to‘g‘risida, shu jumladan, ularning egallab turgan lavozimida qolishi maqsadga muvofiqligi masalasini ko‘rib chiqish bo‘yicha takliflar kiritish, O‘zbekiston Respublikasining davlat mukofotlari bilan taqdirlashga taqdim etish, ularning shaxsiy mas’uliyatini oshirish yuzasidan tizimli choralarni amalga oshirish;

21) Vazirlik xodimlari tomonidan Vazirlik odob-axloq qoidalariga rioya etilishini nazorat qilish;

22) korrupsiyaga qarshi kurashishga oid qonunchilik hujjatlari talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyoti va qonunchilikni takomillashtirish bo‘yicha chora-tadbirlarni ishlab chiqish va amalga oshirish yo‘li bilan ularni sodir etishga imkon yaratuvchi omillarni aniqlash, tahlil qilish, sabab va sharoitlarini bartaraf etish;

23) Vazirlik xodimlari tomonidan manfaatlar to‘qnashuvi to‘g‘risidagi qonunchilikka rioya etilishini ta’minlash, shu jumladan, ular tomonidan lavozim majburiyatlarini yoki xizmat vakolatlarini bajarish chog‘ida manfaatlar to‘qnashuviga olib keladigan yoki olib kelishi mumkin bo‘lgan shaxsiy manfaatdorlikka yo‘l qo‘ymaslik choralarini ko‘rish;

24) Vazirlik hamda uning tarkibiy va hududiy bo‘linmalari ishini tashkil etishning ilg‘or shakllarini joriy etishni ta’minlash;

25) jismoniy va yuridik shaxslarning murojaatlarini ko‘rib chiqish ishlarini qonunchilikka muvofiq samarali tashkil etish, jamoatchilik bilan bevosita va ochiq muloqot o‘rnatish, shaxsan qabul qilishni muntazam ravishda o‘tkazish, shu jumladan, jismoniy va yuridik shaxslarning vakillarini joylarga borib qabul qilishni belgilangan muddatlarda va tartibda amalga oshirish;

26) O‘zbekiston Respublikasi Prezidentining Xalq qabulxonalari bilan samarali hamkorlikni, Vazirlik rahbarlari va xodimlarining ular faoliyatida faol ishtirok etishini tashkil etish, O‘zbekiston Respublikasi Prezidentining Virtual qabulxonasidan kelib tushadigan jismoniy va yuridik shaxslar murojaatlarini o‘z vaqtida va to‘liq ko‘rib chiqilishini ta’minlash;

27) davlat sirlari bilan ishlashda qonunchilik talablariga rioya etish;

28) Vazirlik markaziy apparati shtat jadvali va xarajatlar smetasini, shuningdek, Vazirlikning tarkibiy va hududiy bo‘linmalari nizomlarini hamda idoraviy mansub tashkilotlar ustavlarini tasdiqlash;

29) Vazirlik markaziy apparati xodimlari, tarkibiy bo‘linmalar hamda idoraviy mansub tashkilotlar rahbarlarini qonunchilik hujjatlarida belgilangan tartibda lavozimga tayinlash va lavozimidan ozod etish;

30) Vazirlik, hududiy bo‘linmalar, idoraviy mansub tashkilotlar mansabdor shaxslari bajarishi majburiy bo‘lgan buyruqlar ishlab chiqish va topshiriqlar berish, shuningdek, ularning ijrosini o‘rnatilgan tartibda nazorat qilish;

31) Vazirlik markaziy apparati, hududiy bo‘linmalar, idoraviy mansub tashkilotlarning tasdiqlangan tuzilmalari va shtatlar jadvaliga xodimlarning cheklangan soni va ish haqi fondi doirasida o‘zgartirishlar kiritish;

32) oliy, o‘rta maxsus va professional ta’lim, ilm-fan va innovatsiyalar bo‘yicha xalqaro va hukumatlararo aloqalarni kengaytirish va mustahkamlash, xorijiy investitsiyalar va grantlarni jalb etish bo‘yicha xalqaro tadbirlarda ishtirok etish.

Vazir qonunchilik hujjatlariga muvofiq boshqa vazifalarni ham amalga oshirishi mumkin.

22. Quyidagilar vazir o‘rinbosarlarining asosiy funksional vazifalari hisoblanadi:

1) O‘zbekiston Respublikasi Prezidentining tegishli qarori bilan Vazirlikka yuklatilgan vazifa va funksiyalarni amalga oshirish, tegishli tarkibiy bo‘linmalar faoliyatini muvofiqlashtirish;

2) O‘zbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish bo‘yicha konsepsiyalar, kompleks dasturlar va chora-tadbirlarning ijrosini ta’minlash;

3) vazir vaqtincha bo‘lmaganda, tegishli buyruq asosida uning vazifalarini bajarish;

4) Vazirlikning tarkibiy bo‘linmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari o‘rtasida vazifalarni taqsimlash hamda shaxsiy javobgarligini belgilash;

5) Vazirlik va uning tuzilmaviy va bo‘ysunuvchi bo‘linmalari, oliy, o‘rta maxsus va professional ta’lim tashkilotlari faoliyati bilan bog‘liq prognoz ko‘rsatkichlarga erishish yuzasidan chora-tadbirlarni ishlab chiqish va rahbariyatga taqdim etish;

6) Vazirlar Mahkamasida, vazirlik va idoralarda bo‘lib o‘tadigan majlislarda vakolat doirasida ishtirok etish;

7) O‘zbekiston Respublikasi Prezidenti, O‘zbekiston Respublikasining Bosh vaziri va uning o‘rinbosarlari ko‘rsatmalarini so‘zsiz bajarish;

8) Vazirlikning tarkibiy bo‘linmalari faoliyatida ijro intizomini mustahkamlash bo‘yicha kompleks chora-tadbirlarni amalga oshirish, shuningdek, tarkibiy va bo‘ysunuvchi bo‘linmalar rahbarlarining shaxsiy javobgarligini oshirish bo‘yicha chora-tadbirlar bajarilishini nazorat qilish, shuningdek, ijro intizomi mustahkamlanishi uchun topshiriqlar o‘z vaqtida va sifatli bajarilishi uchun tarkibiy bo‘linmalar rahbarlarining shaxsiy mas’uliyatini oshirish choralarini ko‘rish;

9) davlat sirlari bilan ishlashda qonunchilik talablariga rioya qilish.

Vazir o‘rinbosarlari qonunchilik hujjatlariga muvofiq boshqa vazifalarni ham amalga oshirishi mumkin.

23. Quyidagilar Vazirlik markaziy apparati tarkibiy bo‘linmalari rahbarlarining asosiy funksional vazifalari hisoblanadi:

1) tarkibiy bo‘linmalar faoliyatiga bevosita rahbarlik qilish, ushbu bo‘linmalarga yuklangan vazifalar va funksiyalarning bajarilishini tashkil etish;

2) tegishli tarkibiy bo‘linmalar va Vazirlik tizimidagi tashkilotlar faoliyatini o‘z vakolatlari doirasida muvofiqlashtirish;

3) prognoz ko‘rsatkichlarning bajarilishini muntazam tahlil qilish hamda tarkibiy bo‘linmalar ushbu ko‘rsatkichlarga so‘zsiz erishishini ta’minlashga qaratilgan qo‘shimcha chora-tadbirlarni amalga oshirish bo‘yicha vazir yoki uning mutasaddilik qiladigan o‘rinbosarlariga takliflar kiritish;

4)O‘zbekiston Respublikasi Prezidenti va Vazirlar Mahkamasi qarorlari va topshiriqlari ijrosini ta’minlash, Vazirlik tarkibiy bo‘linmalari xodimlarining ijro intizomini mustahkamlash bo‘yicha kompleks chora-tadbirlarni amalga oshirish, topshiriqlar o‘z vaqtida va sifatli bajarilishi uchun tarkibiy bo‘linmalar xodimlarining shaxsiy mas’uliyatini oshirish choralarini ko‘rish;

5) Vazirlik hay’ati qarorlari, vazir buyruqlari hamda topshiriqlari o‘z vaqtida va sifatli bajarilishini ta’minlash;

6) tarkibiy bo‘linmalarning har choraklik ish rejalari ishlab chiqilishini ta’minlash, ularni tasdiqlash uchun kiritish, ko‘rsatilgan vazifalar va tadbirlar o‘z vaqtida va sifatli bajarilishini ta’minlash;

7) tarkibiy bo‘linmalarga yuklangan vazifalar bajarilishini nazorat qilish va muvofiqlashtirish, Vazirlik tizimidagi tashkilotlar va hududiy boshqarmalar faoliyatiga amaliy va metodik yordam ko‘rsatish;

8) tarkibiy bo‘linmalar faoliyatiga oid masalalar yuzasidan qonunchilikni takomillashtirish bo‘yicha takliflarni ishlab chiqish va ularni ko‘rib chiqish uchun Vazirlik rahbariyatiga kiritish;

9) tarkibiy bo‘linmalarda kadrlarning professional darajasini, amaliy tajribaga, yuksak darajada ishlash xususiyatlariga va ma’naviy-axloqiy fazilatlarga ega ekanligining kafolatini ta’minlash, kasb malakasini oshirish choralarini ko‘rish, kadrlar zaxirasini shakllantirish;

10) normativ-huquqiy hujjatlar loyihalarining tarkibiy bo‘linmalar tomonidan sifatli ishlab chiqilishini tashkil etish, Vazirlikning tarkibiy bo‘linmalarida tayyorlangan hujjatlar loyihalarini keyinchalik Vazirlik rahbariyati tomonidan ko‘rib chiqish, imzolash (viza qo‘yish), ularning O‘zbekiston Respublikasi Prezidenti Administratsiyasining Reglamenti va O‘zbekiston Respublikasi Vazirlar Mahkamasi Reglamenti talablariga qat’iy muvofiq ravishda Vazirlar Mahkamasiga o‘z vaqtida kiritilishini ta’minlash, Vazirlik rahbariyatining topshirig‘i bo‘yicha normativ-huquqiy hujjatlar loyihalarini Vazirlar Mahkamasida ishlab chiqishda ishtirok etish;

11) Vazirlikka taqdim etilgan takliflar va normativ-huquqiy hujjatlar loyihalarini to‘liq va har tomonlama ko‘rib chiqish, moliyaviy, iqtisodiy, huquqiy ekspertiza va boshqa ekspertizadan puxta o‘tkazish;

12) tarkibiy bo‘linmalar xodimlari faoliyatining samaradorligi va natijadorligini muntazam ravishda tanqidiy tahlil qilish, yig‘ilishlarda ularning shaxsiy hisobotlarini eshitish, yakunlari bo‘yicha zarur chora-tadbirlar ko‘rish;

13) tarkibiy bo‘linmalar xodimlarining odob-axloq qoidalari talablariga rioya etishini ta’minlash;

14) davlat sirlari bilan ishlashda qonunchilik talablariga rioya qilish.

Vazirlik markaziy apparati tarkibiy bo‘linmalari rahbarlari qonunchilik hujjatlariga muvofiq boshqa vazifalarni ham amalga oshirishi mumkin.

24. Quyidagilar Vazirlik tizimiga kiruvchi tashkilotlar va hududiy boshqarmalar rahbarlarining asosiy funksional vazifalari hisoblanadi:

1) Vazirlik tizimiga kiruvchi tashkilotlar va hududiy boshqarmalar faoliyatiga umumiy rahbarlik qilish, O‘zbekiston Respublikasi Prezidenti, Vazirlar Mahkamasining tegishli qarorlari va boshqa qonunchilik hujjatlari, shuningdek Vazirlik buyruqlari bilan ularga yuklangan vazifalar va funksiyalar bajarilishini tashkil etish;

2) Vazirlik tizimiga kiruvchi tashkilotlar va hududiy boshqarmalar faoliyati bilan bog‘liq prognoz ko‘rsatkichlarga erishishni so‘zsiz ta’minlash bo‘yicha amaliy chora-tadbirlarni ishlab chiqish va qabul qilish;

3) O‘zbekiston Respublikasi Prezidenti va Vazirlar Mahkamasining qarorlari va topshiriqlari ijrosini ta’minlash, ijro intizomini mustahkamlash bo‘yicha kompleks chora-tadbirlarni amalga oshirish, shuningdek, O‘zbekiston Respublikasi Prezidentining va Hukumatining ijro intizomini mustahkamlash yuzasidan qarorlariga muvofiq topshiriqlar o‘z vaqtida va sifatli bajarilishi uchun Vazirlik tizimiga kiruvchi tashkilotlar va hududiy boshqarmalar rahbarlarining shaxsiy mas’uliyatini oshirish choralarini ko‘rish;

4) Vazirlik hay’ati qarorlari, vazirning buyruqlari va topshiriqlari o‘z vaqtida va sifatli bajarilishini ta’minlash;

5) Vazirlik tizimiga kiruvchi tashkilotlar va hududiy boshqarmalar vakolati doirasidagi masalalar yuzasidan mahalliy ijro etuvchi hokimiyati organlari va boshqa tashkilotlar bilan hamkorlik qilish;

6) o‘z o‘rinbosarlari vakolatlarini belgilash, ular o‘rtasida vazifalarni taqsimlash, boshqa mansabdor shaxslar vakolatlarini, faoliyatning alohida uchastkalariga rahbarlik qilish uchun o‘z o‘rinbosarlari va boshqa mansabdor shaxslarning shaxsiy javobgarlik darajasini belgilash;

7) Vazirlik tizimiga kiruvchi tashkilotlar va hududiy boshqarmalar faoliyatini rejalashtirishni tashkil etish, o‘z o‘rinbosarlarining har choraklik ish rejalarini tasdiqlash, ularning bajarilishi yuzasidan nazoratni ta’minlash;

8) Vazirlik tizimiga kiruvchi tashkilotlar va hududiy boshqarmalarda kadrlarni tanlash va joy-joyiga qo‘yish, ularning samarali faoliyat ko‘rsatishi uchun zarur shart-sharoitlar yaratish, kadrlar zaxirasini shakllantirish;

9) vazir nomenklaturasiga kiradigan bo‘sh lavozimlarga taklif etilgan kadrlarning, shuningdek, ishga qabul qilinayotgan boshqa kadrlarning professional darajasini amaliy tajribaga, yuksak darajada ishlash xususiyatlariga va ma’naviy-axloqiy fazilatlarga ega ekanligining kafolatini ta’minlash;

10) xodimlarni, o‘z o‘rinbosarlarini rag‘batlantirish va intizomiy javobgarlikka tortish masalalarini hal qilish, shu jumladan, ular egallab turgan lavozimda qolishi maqsadga muvofiqligiga doir masalalarni ko‘rib chiqish, shaxsiy mas’uliyatini oshirish bo‘yicha muntazam chora-tadbirlar ko‘rish;

11) xodimlar tomonidan odob-axloq qoidalari talablariga rioya etilishini ta’minlash;

12) huquqni qo‘llash amaliyotini va qonunchilikni takomillashtirishga doir chora-tadbirlarni ishlab chiqish va amalga oshirish orqali hududiy boshqarmalar tizimida qonunchilik talablariga muvofiq korrupsiya va boshqa huquqbuzarliklarning oldini olish choralarini ko‘rish, shuningdek, ularning sodir etilishiga ko‘maklashuvchi sabablar va shart-sharoitlarni aniqlash, tahlil qilish, bartaraf etish;

13) prognoz ko‘rsatkichlarning bajarilishini muntazam tahlil qilish hamda ushbu ko‘rsatkichlarga so‘zsiz erishishni ta’minlashga qaratilgan qo‘shimcha chora-tadbirlarni amalga oshirish bo‘yicha vazirning mutasaddilik qiladigan o‘rinbosarlariga takliflar kiritish;

14) xodimlar faoliyatining samaradorligi va natijadorligini tizimli ravishda tanqidiy tahlil qilish, yig‘ilishlarda ularning shaxsiy hisobotlarini eshitish, yakunlari bo‘yicha zarur chora-tadbirlar ko‘rish;

15) faoliyatiga oid masalalar bo‘yicha qonunchilikni takomillashtirish, shuningdek, davlat xizmatlari samaradorligi, sifatini va ulardan erkin foydalanishni oshirish bo‘yicha takliflar ishlab chiqish hamda ularni Vazirlik rahbariyatiga kiritish;

16) jismoniy va yuridik shaxslarning murojaatlarini ko‘rib chiqish, qonunchilik bilan belgilangan muddatlarda va tartibda aholi bilan to‘g‘ridan-to‘g‘ri va ochiq muloqotni yo‘lga qo‘yish, jismoniy va yuridik shaxslarning vakillarini muntazam ravishda shaxsan, shu jumladan, joylarga borib qabul qilish;

17) O‘zbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslarning O‘zbekiston Respublikasi Prezidenti Virtual qabulxonasiga tushgan murojaatlarini o‘z vaqtida va to‘laqonli ko‘rib chiqish;

18) xodimlarning lavozim maoshiga mukofotlar, ustamalar to‘lash, ularga moddiy yordam berish, mukofotlash, rag‘batlantirish va ularga nisbatan intizomiy chora qo‘llash to‘g‘risida qaror qabul qilish, davlat mukofotlari va idoraviy mukofotlar bilan taqdirlash to‘g‘risida Vazirlikka takliflar kiritish;

19) davlat sirini yoki qonun bilan qo‘riqlanadigan boshqa sirni tashkil etuvchi ma’lumotlarning himoya qilinishini ta’minlash.

Vazirlik tizimiga kiruvchi tashkilotlar va hududiy boshqarmalar rahbarlari qonunchilik hujjatlariga muvofiq boshqa vazifalarni ham amalga oshirishi mumkin.

25. Vazir Vazirlikka yuklangan vazifalar va funksiyalarning bajarilishi uchun shaxsan javob beradi.

26. Vazir o‘rinbosarlari:

Vazirlik nazoratidagi tarkibiy bo‘linmalarda Vazirlikka yuklangan vazifalar va funksiyalarning bajarilishi;

o‘z funksional majburiyatlarining sifatli bajarilishi uchun shaxsan javob beradilar.

27. Markaziy apparatning tarkibiy bo‘linmalari rahbarlari:

tegishli tarkibiy bo‘linmalarga yuklangan vazifalar va funksiyalar bajarilishi uchun;

o‘z funksional majburiyatlari sifatli bajarilishi uchun shaxsan javob beradilar.

28. Vazirlikning Qoraqalpog‘iston Respublikasi, viloyatlar, Toshkent shahri va tumanlar (shaharlar)dagi hududiy bo‘linmalari rahbarlari:

bo‘linmalarga yuklangan vazifalar va funksiyalarning bajarilishi uchun;

o‘z funksional majburiyatlarining sifatli bajarilishi uchun shaxsan javob beradilar.

29. Vazirlikka O‘zbekiston Respublikasi Bosh vaziri taqdimnomasiga binoan O‘zbekiston Respublikasi Oliy Majlisi Qonunchilik palatasi ma’qullaganidan keyin O‘zbekiston Respublikasi Prezidenti tomonidan tasdiqlanadigan va lavozimdan ozod etiladigan Vazir rahbarlik qiladi.

30. Vazir o‘z maqomiga ko‘ra Vazirlar Mahkamasining a’zosi hisoblanadi.

31. Vazirning O‘zbekiston Respublikasi Prezidenti tomonidan lavozimga tayinlanadigan va lavozimdan ozod etiladigan bir nafar birinchi o‘rinbosari hamda uch nafar o‘rinbosari bo‘ladi.

32. Vazir bo‘lmagan davrda uning vakolatlari vazirning birinchi o‘rinbosari, u bo‘lmaganda esa — Vazirning buyrug‘iga binoan boshqa o‘rinbosar tomonidan amalga oshiriladi.

33. Vazir:

Vazirlik faoliyatiga yakka boshchilik asosida umumiy rahbarlik qiladi va Vazirlikka yuklangan vazifalar va funksiyalarning bajarilishi uchun shaxsan javob beradi;

Vazirlik faoliyatining alohida yo‘nalishlari va tuzilmalariga rahbarlik qilish va tizimiga kiradigan tashkilotlar faoliyati uchun vazir o‘rinbosarlari va Vazirlik tizimining boshqa mansabdor shaxslari vakolatlarini va shaxsiy javobgarligi darajasini belgilaydi;

o‘z vakolati doirasida Vazirlik tizimi xodimlari tomonidan ijro etilishi shart bo‘lgan buyruqlar chiqaradi va ko‘rsatmalar beradi;

xodimlarning belgilangan umumiy soni doirasida markaziy apparat xarajatlar smetasini va shtat jadvalini tasdiqlaydi, Vazirlikning respublika budjetidan moliyalashtiriladigan idoraviy mansub tashkilotlarining xarajatlar va daromadlar smetalarini ro‘yxatdan o‘tkazadi;

vazir maslahatchilari, Vazirlik tizimiga kiradigan tashkilotlar, hududiy Davlat mehnat inspeksiyasi rahbari va o‘rinbosarlarini mustaqil tarzda lavozimga tayinlaydi va lavozimdan ozod etadi.

Qoraqalpog‘iston Respublikasi kambag‘allikni qisqartirish va bandlik vaziri, viloyatlar va Toshkent shahri kambag‘allikni qisqartirish va bandlik boshqarmalari boshliqlarini Qoraqalpog‘iston Respublikasi Vazirlar Kengashi Raisi, viloyatlar va Toshkent shahri hokimlari bilan kelishgan holda lavozimga tayinlaydi va lavozimdan ozod etadi.

Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari, tuman (shahar) kambag‘allikni qisqartirish va bandlikka ko‘maklashish bo‘limlari, shuningdek, Vazirlikning tizimiga kiradigan tashkilotlar tuzilmasiga, zarur bo‘lsa, xodimlarning umumiy soni va mehnatga haq to‘lash fondi doirasida o‘zgartirishlar kiritadi;

Vazirlik markaziy apparati, hududiy bo‘linma va Vazirlik tizimidagi tashkilotlarning rahbarlari va xodimlari uchun faoliyatining eng muhim samaradorlik ko‘rsatkichlarini (KPI) belgilaydi hamda nazorat qiladi;

markaziy apparat bo‘linmalari, Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar va Toshkent shahri kambag‘allikni qisqartirish va bandlik boshqarmalari to‘g‘risidagi nizomlarni, tuman (shahar) kambag‘allikni qisqartirish va bandlikka ko‘maklashish bo‘limlari to‘g‘risidagi namunaviy nizomlarni, Vazirlik tizimiga kiradigan tashkilotlar ustavlarini belgilangan tartibda tasdiqlaydi;

Vazirlik tizimida belgilangan tartibda moliyaviy ishlarni tashkil etadi, tizimiga kiradigan tashkilotlar tomonidan o‘tkaziladigan tadbirlarni, shuningdek, mazkur sohadagi ilmiy tadqiqotlarni moliyaviy jihatdan ta’minlaydi;

qonunchilik hujjatlariga muvofiq boshqa vakolatlarni amalga oshiradi.

34. Tuman (shahar) kambag‘allikni qisqartirish va bandlikka ko‘maklashish bo‘limlari boshliqlari tegishli tumanlar (shaharlar) hokimlari tomonidan Vazir, Qoraqalpog‘iston Respublikasi kambag‘allikni qisqartirish va bandlik vaziri, viloyatlar va Toshkent shahri kambag‘allikni qisqartirish va bandlik boshqarmalari boshliqlari bilan kelishilgan holda lavozimga tayinlanadi va lavozimdan ozod etiladi.

Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar hamda Toshkent shahri kambag‘allikni qisqartirish va bandlik boshqarmalari hamda tuman (shahar) kambag‘allikni qisqartirish va bandlikka ko‘maklashish bo‘limlariga ishga qabul qilingan xodimlar majburiy tartibda bir haftalik kirishish-moslashish kurslaridan, mehnat organlari xodimlari esa muntazam ravishda Kambag‘allikni qisqartirish va bandlik vazirligi xodimlarining malakasini oshirish markazida har uch yilda kamida bir marta malaka oshirish kurslaridan o‘tadilar.

35. Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar hamda Toshkent shahri kambag‘allikni qisqartirish va bandlik boshqarmalari to‘g‘risidagi nizomlar Vazirning buyruqlari bilan tasdiqlanadi.

Tuman (shahar) kambag‘allikni qisqartirish va bandlikka ko‘maklashish bo‘limlari to‘g‘risidagi nizomlar tumanlar (shaharlar) hokimlari bilan kelishilgan holda, Qoraqalpog‘iston Respublikasi Kambag‘allikni qisqartirish va bandlik vazirligi, viloyatlar hamda Toshkent shahri kambag‘allikni qisqartirish va bandlik boshqarmalari buyruqlari bilan tasdiqlanadi.

36. Markaz davlat muassasasi shaklidagi tashkilot hisoblanadi.

Markazga Vazir tomonidan lavozimga tayinlanadigan va lavozimdan ozod etiladigan direktor rahbarlik qiladi.

Markaz direktorining Vazir tomonidan lavozimga tayinlanadigan va lavozimdan ozod etiladigan ikki nafar o‘rinbosari, shu jumladan, bir nafar birinchi o‘rinbosari bo‘ladi.

Markaz Bandlik jamg‘armasi mablag‘lari hisobidan moliyalashtiriladi.

Malaka oshirish o‘quv kurslarini moliyalashtirish yo‘nalishlari va hajmlari, shuningdek, malaka oshirishga jalb qilingan mehnat organlari xodimlari soni Vazirlik tomonidan belgilanadi.

Markazda davlat organlari va tashkilotlari hamda davlat ulushi 50 foiz va undan yuqori bo‘lgan xo‘jalik jamiyatlarining inson resurslari bilan ishlashga mas’ul tarkibiy tuzilmalarining rahbar va xodimlari shartnoma asosida har uch yilda kamida bir marta mehnat munosabatlarini tashkil etish bo‘yicha malakasini oshirib boradi.

37. Malakani baholash markazlariga Vazir tomonidan lavozimga tayinlanadigan va lavozimdan ozod etiladigan direktor rahbarlik qiladi.

Malakani baholash markazlari direktorining Vazir tomonidan lavozimga tayinlanadigan va lavozimdan ozod etiladigan uch nafar o‘rinbosari, shu jumladan, bir nafar birinchi o‘rinbosari bo‘ladi.

Malakani baholash markazlari davlat muassasasi shaklidagi tashkilot hisoblanadi.

38. Milliy texnik malakani baholash va malaka oshirish markaziga Vazir tomonidan lavozimga tayinlanadigan va lavozimdan ozod etiladigan direktor rahbarlik qiladi.

Milliy texnik malakani baholash va malaka oshirish markazi davlat ta’lim muassasasi shaklidagi tashkilot hisoblanadi. Vazirlik Milliy texnik malakani baholash va malaka oshirish markazi muassisi hisoblanadi.

Milliy texnik malakani baholash va malaka oshirish markazi direktorining Vazir tomonidan lavozimga tayinlanadigan va lavozimdan ozod etiladigan ikki nafar o‘rinbosari, shu jumladan, bir nafar birinchi o‘rinbosari bo‘ladi.

39. Malakani baholash markazlari faoliyati Bandlik jamg‘armasi mablag‘lari, xo‘jalik faoliyati natijasida tushgan mablag‘lar va qonunchilik hujjatlari bilan taqiqlanmagan boshqa manbalar hisobidan moliyalashtiriladi.

40. Vazirlikda Vazir (Hay’at raisi), vazir o‘rinbosarlari, maslahatchilari, shuningdek, Vazirlik faoliyatining asosiy yo‘nalishlarini muvofiqlashtiruvchi tarkibiy bo‘linmalar rahbarlaridan iborat hay’at tuziladi.

Hay’atning soni va shaxsiy tarkibi Vazir taqdimnomasiga binoan Vazirlar Mahkamasi tomonidan tasdiqlanadi.

Hay’atga quyidagi vazifalar yuklanadi:

kambag‘allikni qisqartirish, bandlik va mehnat munosabatlari, mehnatni muhofaza qilish sohasida davlat siyosatini amalga oshirishni yanada takomillashtirish bo‘yicha aniq chora-tadbirlarni ishlab chiqqan holda, Vazirlik faoliyatining qonunchilikda belgilangan asosiy yo‘nalishlarini tanqidiy ko‘rib chiqish;

qonunchilik hujjatlarida, O‘zbekiston Respublikasi Prezidentining qarorlarida va Hukumat qarorlarida belgilangan vazifalarning o‘z vaqtida va sifatli amalga oshirilishini ta’minlash bo‘yicha Vazirlik va uning tuzilmaviy bo‘linmalari rahbarlarining shaxsiy mas’uliyatini oshirishga doir aniq choralar ko‘rgan holda, quyi tashkilotlar rahbarlarining hisobotlarini tizimli ravishda eshitib borishni tashkil qilish;

O‘zbekiston Respublikasi Prezidentining 2024-yil 23-sentabrda qabul qilingan “Kambag‘allikni qisqartirish va aholi turmush farovonligini oshirish borasidagi chora-tadbirlarni yangi bosqichga olib chiqish to‘g‘risida”gi PF-143-son Farmoni hamda “Kambag‘allikdan farovonlik sari” dasturini amalga oshirish bo‘yicha birinchi navbatdagi chora-tadbirlar to‘g‘risida”gi PQ-330-son qaroriga muvofiq “Kambag‘allikdan farovonlik sari” dasturi ijrosini tashkil qilishning yaxlit tizimini joriy etish;

ijro intizomi darajasini oshirish, jismoniy va yuridik shaxslar murojaatlarini, shu jumladan, O‘zbekiston Respublikasi Prezidentining Virtual qabulxonasi va Xalq qabulxonalaridan tushayotgan murojaatlarni o‘z vaqtida hamda sifatli ko‘rib chiqish asosida O‘zbekiston Respublikasi Prezidenti va Vazirlar Mahkamasi topshiriqlari bajarilishi yuzasidan samarali nazoratni ta’minlash va bandlik sohasidagi eng zarur muammolarni hal qilish bo‘yicha aniq chora-tadbirlarni ishlab chiqish;

Hay’atning kengaytirilgan ko‘chma majlislari o‘tkazilishini tashkil etish, kambag‘allikni qisqartirish va bandlik, mehnat bozori, mehnat munosabatlari bo‘yicha dolzarb masalalarning joylarda muhokama etilishini ta’minlash, shuningdek, yuzaga kelgan muammolarni bartaraf etish bo‘yicha tegishli qarorlar ishlab chiqish va qabul qilish;

Vazirlik nomenklaturasiga kiradigan lavozimlarga kadrlarni tanlash, joylashtirish, tayyorlash va qayta tayyorlash masalalarini ko‘rib chiqish.

Hay’at, shuningdek, Vazirlik vakolatiga kiradigan boshqa masalalarni ham ko‘rib chiqishga haqli.

Hay’at majlislariga Vazirlik vakolatiga kiradigan masalalar bo‘yicha boshqa vazirlik va idoralar, mahalliy ijro etuvchi hokimiyat organlari, boshqa davlat va jamoat tashkilotlari rahbarlari taklif etilishi mumkin.

Hay’at, agar uning majlisida hay’at tarkibining yarmidan ko‘pi qatnashgan taqdirda, vakolatli hisoblanadi. Ko‘rib chiqilayotgan masalalar yuzasidan qarorlar oddiy ko‘pchilik ovozi bilan qabul qilinadi.

Hay’at qarorlari Vazirning buyruqlari bilan amalga oshiriladi. Vazir va hay’at a’zolari o‘rtasida kelishmovchiliklar paydo bo‘lgan taqdirda, Vazir paydo bo‘lgan kelishmovchiliklar to‘g‘risida Vazirlar Mahkamasiga axborot bergan holda, mustaqil ravishda qaror qabul qiladi. Hay’at a’zolari ham o‘z fikr-mulohazalarini Vazirlar Mahkamasiga xabar qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

41. O‘zbekiston Respublikasi Kambag‘allikni qisqartirish va bandlik vazirligining Davlat mehnat inspeksiya (keyingi o‘rinlarda — Inspeksiya) O‘zbekiston Respublikasi Kambag‘allikni qisqartirish va bandlik vazirligining tarkibiy bo‘linmasi hisoblanadi.

42. Inspeksiya o‘z faoliyatini bevosita va o‘z hududiy inspeksiyalari orqali amalga oshiradi.

43. Mulkchilik va tashkiliy-huquqiy shaklidan qat’i nazar, barcha tashkilotlar mansabdor shaxslari, fuqarolar — ish beruvchilar, shuningdek, O‘zbekiston Respublikasi hududida mehnat faoliyati huquqiga doir tasdiqnoma asosida mehnat qilayotgan chet ellik fuqarolar tomonidan mehnat, aholi bandligi, mehnatni muhofaza qilish, ish beruvchining fuqarolik javobgarligini majburiy sug‘urtalash to‘g‘risidagi qonunchilik hujjatlari, mehnat xavfsizligi va gigiyenasi hamda mehnat jarayonida tazyiq va zo‘ravonlikka yo‘l qo‘ymaslik va uning har qanday shaklda namoyon bo‘lishining oldini olish masalalariga doir tartibga solish sohasidagi normativ hujjatlar hamda mehnat standartlari talablariga rioya etishini nazorat qilish — mehnat va mehnatni muhofaza qilish sohasidagi davlat nazoratining predmeti hisoblanadi.

44. Quyidagilar Inspeksiyaning asosiy vazifalari hisoblanadi:

mulkchilik va tashkiliy-huquqiy shaklidan qat’i nazar, barcha tashkilotlar mansabdor shaxslari, shuningdek, fuqarolar — ish beruvchilar tomonidan mehnat va mehnatni muhofaza qilish, aholi bandligi, ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlari, mehnat to‘g‘risidagi boshqa normativ-huquqiy hujjatlar, mehnat xavfsizligi va gigiyenasi hamda mehnat jarayonida tazyiq va zo‘ravonlikka yo‘l qo‘ymaslik va uning har qanday shaklda namoyon bo‘lishining oldini olish masalalariga doir normativ-huquqiy hujjatlar hamda mehnat standartlari talablariga rioya etilishi ustidan davlat nazoratini amalga oshirish;

respublikadagi mehnatni muhofaza qilish holatini, mehnat faoliyati bilan bog‘liq baxtsiz hodisalar sabablarini muntazam tahlil qilish, ularni bartaraf etish yo‘llarini ishlab chiqish;

mehnat va mehnatni muhofaza qilish sohasidagi qonunchilik hujjatlari normalari buzilishining oldini olish hamda mehnat to‘g‘risidagi bitimlar va mehnat haqidagi boshqa huquqiy hujjatlarning, ish beruvchilar tomonidan qabul qilinadigan buyruqlarning mehnat qonunchiligiga muvofiqligi yuzasidan monitoring o‘tkazish;

ish o‘rinlarini mehnat sharoitlari va asbob-uskunaning jarohat yetkazish xavfi yuzasidan attestatsiyadan o‘tkazish sifati ustidan davlat nazoratini va ekspertizadan o‘tkazilishini amalga oshirish;

majburiy mehnatga yo‘l qo‘ymaslik va uni to‘liq bartaraf etish choralarini ko‘rish hamda aybdor mansabdor shaxslarni qonunchilik hujjatlariga muvofiq javobgarlikka tortish, shuningdek, majburiy mehnatga yo‘l qo‘ymaslik va uni bartaraf etish chora-tadbirlarining ishlab chiqilishi va amalga oshirilishini manfaatdor vazirliklar, idoralar va jamoat tashkilotlari bilan birgalikda tashkil etish;

mehnatni muhofaza qilish sohasidagi xizmatlar bozori professional ishtirokchilarining faoliyati yuzasidan belgilangan tartibda monitoring yuritish va ularning faoliyatini takomillashtirish, shu jumladan, ular tomonidan ko‘rsatiladigan xizmatlar sifatini oshirish to‘g‘risida takliflar tayyorlash;

mehnat va mehnatni muhofaza qilish to‘g‘risidagi qonunchilik hujjatlarini qo‘llash va ularga rioya etish masalalari bo‘yicha xodimlar va ish beruvchilarga maslahat va uslubiy yordam berish, mehnat faoliyati bilan bog‘liq baxtsiz hodisalarning hamda mehnat jarayonida tazyiq va zo‘ravonlikka yo‘l qo‘ymaslik va uning har qanday shaklda namoyon bo‘lishining oldini olishga doir profilaktika ishlarini o‘tkazish;

mulkchilik va tashkiliy-huquqiy shaklidan qat’i nazar, barcha tashkilotlarda mehnat huquqlari va mehnatni muhofaza qilish, ish beruvchining fuqarolik javobgarligini majburiy sug‘urta qilish, aholi bandligi to‘g‘risidagi qonunchilik talablariga rioya etilishini kameral nazoratdan o‘tkazish;

mehnat, mehnatni muhofaza qilish va mehnat gigiyenasi sohasidagi davlat dasturlari, normativ-huquqiy hujjatlar va boshqa hujjatlar, shuningdek, fuqarolarning xavfsizlik va gigiyena talablariga javob beradigan qulay mehnat sharoitlarida ishlashga bo‘lgan huquqlarini ta’minlashga doir takliflar va chora-tadbirlarni ishlab chiqish va amalga oshirishda ishtirok etish;

Xalqaro mehnat tashkiloti hamda boshqa xalqaro tashkilotlar bilan Inspeksiya faoliyatiga oid masalalarda o‘zaro hamkorlik qilish.

45. Inspeksiya o‘ziga yuklangan vazifalarga muvofiq quyidagi funksiyalarni amalga oshiradi:

ish beruvchilar tomonidan mehnat to‘g‘risidagi qonunchilik hujjatlari, aholi bandligi, ish beruvchining fuqarolik javobgarligini majburiy sug‘urta qilish to‘g‘risidagi qonunchilik, mehnat to‘g‘risidagi boshqa normativ-huquqiy hujjatlar, mehnatni muhofaza qilish qoidalari, mehnat xavfsizligi va gigiyenasi hamda mehnat jarayonida tazyiq va zo‘ravonlikka yo‘l qo‘ymaslik va uning har qanday shaklda namoyon bo‘lishining oldini olish masalalariga doir texnik tartibga solish sohasidagi normativ hujjatlar hamda mehnat standartlari talablariga rioya etilishini tekshiradi;

nazorat predmetiga muvofiq qonunchilik hujjatlariga rioya etilishi ustidan monitoring o‘tkazadi va qonun buzilishi holatlarini bartaraf etish yuzasidan ish beruvchilarga (uning vakiliga) ko‘rsatmalar beradi;

jamoa shartnomalarida va boshqa ichki hujjatlarda nazarda tutilgan majburiyatlar bajarilishini nazorat qiladi;

xotin-qizlar mehnatidan foydalanish taqiqlangan noqulay mehnat sharoitlarida bajariladigan ishlar ro‘yxatini hamda og‘ir yuklarni ko‘tarishda va tashishda xotin-qizlar uchun cheklangan yuk normalari to‘g‘ri qo‘llanishi bo‘yicha davlat nazoratini amalga oshiradi;

o‘n sakkiz yoshga to‘lmagan shaxslarning mehnatidan foydalanilishi taqiqlangan og‘ir ishlarning hamda zararli yoki xavfli mehnat sharoitlaridagi ishlarning ro‘yxati, shuningdek, ularning og‘ir yuklarni ko‘tarishi va tashishi chog‘ida yo‘l qo‘yiladigan eng ko‘p normalari to‘g‘ri qo‘llanishi bo‘yicha nazoratni amalga oshiradi;

mehnatni muhofaza qilish bo‘yicha mutaxassislarga malaka sertifikati berilishini hamda berilgan malaka sertifikatlarining reyestri yuritilishini ta’minlaydi;

xodimlarning shaxsiy va jamoaviy himoya vositalari, ishlab chiqarish muhitini nazorat qilish uskunalari bilan to‘g‘ri ta’minlanganini, shuningdek, noqulay va alohida tusga ega bo‘lgan sharoitlarda ishlaganlik uchun xodimlarga imtiyozlar va kompensatsiyalar berilishini nazorat qiladi;

xodimlarning hayoti va sog‘lig‘iga yetkazilgan zararni qoplash bo‘yicha ish beruvchilar tomonidan to‘lovlar amalga oshirilishini qonunchilik hujjatlarida belgilangan tartibda nazorat qiladi;

xodimlarning muayyan toifalari (xotin-qizlar, voyaga yetmaganlar, oliy va o‘rta maxsus, professional ta’lim tashkilotlari talabalari, nogironligi bo‘lgan shaxslar, Qurolli Kuchlar safidan bo‘shatilgan shaxslar, odam savdosidan jabrlanganlar va boshqalar) uchun qonunchilik hujjatlarida nazarda tutilgan mehnat huquqlari hamda kafolatlariga rioya etilishini nazorat qiladi;

ish beruvchilar tomonidan taqdim etilgan O‘zbekiston Respublikasi hududida mehnat faoliyati huquqiga doir tasdiqnomalar shartlariga rioya etilishini, chet ellik fuqarolarning kasbiy-malakaviy mansubligi doirasida faoliyat yuritayotgani, yuqori malakali va malakali mutaxassislar uchun belgilangan miqdorda oylik ish haqi to‘lanishini tekshiradi;

o‘tkazilgan nazorat tadbirlari natijalariga ko‘ra mehnat xavfsizligi talablariga javob bermaydigan va xodimlarning sog‘lig‘i yoki hayotiga xavf soladigan tashkilotlar (uning ayrim bo‘linmalari) faoliyatini yoki ishlab chiqarish vositalaridan foydalanishni ular mehnat xavfsizligi talablariga muvofiqlashtirilguniga qadar 10 kundan ortiq bo‘lmagan muddatga qonunchilik hujjatlarida belgilangan tartibda to‘xtatib turadi;

mehnat faoliyati bilan bog‘liq baxtsiz hodisalarni qonunchilik hujjatlarida belgilangan tartibda tekshiradi va hisobini yuritadi;

mehnat faoliyati bilan bog‘liq baxtsiz hodisalar sabablarini tahlil qiladi va ularning oldini olish bo‘yicha takliflar ishlab chiqadi;

mehnat munosabatlari subyektlari, shu jumladan, kasanachilik shartlari asosida mehnat faoliyatini amalga oshiruvchi xodimlar hamda shaxsiy tomorqa, dehqon va fermer xo‘jaliklarida band bo‘lgan shaxslarning mehnat huquqlari himoyasini ta’minlaydi;

mehnat va mehnatni muhofaza qilish, aholi bandligi hamda ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlari buzilgani aniqlangan holatlar yuzasidan ularga barham berish va ularning yuzaga kelishiga ko‘maklashadigan shart-sharoitlarni bartaraf etish uchun huquqiy tartibga solish choralarini ko‘radi;

mehnat va mehnatni muhofaza qilish, aholi bandligi hamda ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlarida kasaba uyushmalariga va xodimlarning boshqa vakillik organlariga berilgan huquqlarni amalga oshirishga ko‘maklashadi, shuningdek, ularga ish beruvchilar rioya etishini o‘rganadi;

mehnat to‘g‘risidagi bitimlar va boshqa ichki hujjatlarning, ish beruvchilarning mehnat munosabatlari sohasidagi buyruqlari qonunchilik hujjatlariga mos kelishini tizimli tahlil qiladi;

tomonlar imzolagan tarmoq kelishuvlarni, uning ilovalarini belgilangan tartibda bildirish ro‘yxatidan o‘tkazadi;

mehnat va mehnatni muhofaza qilish to‘g‘risidagi bitimlar va boshqa ichki hujjatlarning, ish beruvchilarning mehnat munosabatlari masalalariga doir buyruqlari qonunchilik hujjatlariga mos kelmasligi aniqlanganda xulosalar beradi;

ish o‘rinlarini mehnat sharoitlari va asbob-uskunaning jarohat yetkazish xavfi yuzasidan attestatsiyadan o‘tkazish sifati ustidan davlat nazoratini amalga oshiradi;

mehnat sharoitlarini davlat ekspertizasidan o‘tkazadi;

davlat nazorati va tekshiruvi organlari, shuningdek, sud murojaatlari bo‘yicha mehnat sharoitlari yuzasidan davlat ekspertizasini o‘tkazadi hamda tegishli xulosalar beradi;

manfaatdor vazirliklar, idoralar va jamoat tashkilotlari bilan birgalikda majburiy mehnatga yo‘l qo‘ymaslik va uni to‘liq bartaraf etish, shu jumladan, aybdor shaxslarni qonun hujjatlariga muvofiq javobgarlikka tortish orqali bartaraf etish bo‘yicha chora-tadbirlarni ishlab chiqish va amalga oshirishni tashkil etadi;

biror-bir shaklda majburiy mehnatdan foydalanish bilan bog‘liq xavf-xatarni o‘z vaqtida aniqlash va bartaraf etish orqali xodimlarning kafolatlangan mehnat huquqlarini ta’minlash yuzasidan qonunchilik hujjatlari normalari ijrosini nazorat qiladi;

majburiy mehnatdan foydalanish va kamsitish yuzasidan aniqlangan har bir holat bo‘yicha qonun buzilishiga yo‘l qo‘ygan mansabdor shaxslarga nisbatan javobgarlikka tortish choralarini ko‘radi;

voyaga yetmagan shaxslarning mehnatga ma’muriy tarzda majburlash holati bo‘yicha ma’lumotlarni huquqni muhofaza qiluvchi organlarga huquqiy baho berish uchun yuboradi;

mehnatni muhofaza qilish sohasidagi xizmatlar bozori professional ishtirokchilari tomonidan amalga oshiradigan xizmatlari sifati yuzasidan tashkilotlarda bir yilda kamida bir marotaba so‘rovnomalar o‘tkazadi;

mehnatni muhofaza qilish sohasidagi xizmatlar bozori professional ishtirokchilarining amalga oshirilgan ishlari to‘g‘risidagi ma’lumotlari va hisobotlarini tanlov asosida joylarga borib o‘rganadi;

mehnatni muhofaza qilish sohasidagi xizmatlar bozori professional ishtirokchilari to‘g‘risidagi ma’lumotlarni doimiy ravishda tahlil qilib boradi;

monitoring natijasida qonunchilik talablarining buzilish holatlari aniqlangan taqdirda, kamchiliklar va ularni bartaraf etish muddatlarini belgilagan holda mehnatni muhofaza qilish sohasidagi xizmatlar bozori professional ishtirokchisiga yozma ko‘rsatma yuboradi;

mehnatni muhofaza qilish sohasidagi xizmatlar bozori professional ishtirokchilarining xizmat ko‘rsatish turlari bo‘yicha monitoring yakunlariga asosan ularning reytingini yuritadi;

mehnatni muhofaza qilish sohasidagi xizmatlar bozori professional ishtirokchilari faoliyatida o‘tkazilgan monitoring natijalarida jiddiy qonun buzilishi holatlari aniqlangan taqdirda, ularning faoliyatini qonunchilikda belgilangan tartibda to‘xtatib turish bo‘yicha sudga da’vo arizalari kiritadi;

monitoring va tahlillarga asosan mehnatni muhofaza qilish sohasidagi xizmatlar bozori professional ishtirokchilarining faoliyatini takomillashtirish, shu jumladan, ular tomonidan ko‘rsatiladigan xizmatlar sifatini oshirish yuzasidan takliflar tayyorlaydi;

Inspeksiya vakolatiga kiradigan masalalar yuzasidan amaliy, konsultativ va uslubiy yordam ko‘rsatish uchun ishonch telefonlari joriy etilishini va ishlab turishini ta’minlaydi;

ishonch telefoni raqamlariga kelib tushgan muammoli masalalar yuzasidan statistik hisobot yuritadi, ularni tahlil qiladi hamda muammoli va salbiy omillarni bartaraf etish yuzasidan, shu jumladan, inspektorlar faoliyati bo‘yicha takliflar ishlab chiqadi;

mehnat munosabati subyektlari uchun huquqiy targ‘ibot, seminarlar, tushuntirish ishlari va amaliy mashg‘ulotlar tashkil etadi;

tadbirkorlik subyektlariga pochta aloqasi yoki elektron axborot tizimlari orqali ularning faoliyati yuzasidan qonunchilik talablari buzilishining oldini olishga qaratilgan tavsiyalar, ish beruvchilar tomonidan sodir etilayotgan tizimli huquqbuzarliklarning sabablari va ularga imkon beruvchi shart-sharoitlar bo‘yicha xabarnomalar yuboradi;

amaldagi mehnat qonunchiligi talablarini tushuntirish yuzasidan ommaviy axborot vositalarida chiqishlar qiladi;

mehnat va mehnatni muhofaza qilish to‘g‘risidagi qonunchilik hujjatlari buzilishiga doir jismoniy va yuridik shaxslarning murojaatlarini ko‘rib chiqadi;

zarur hollarda, murojaatda ko‘rsatilgan holatlarni aniqlashtirish maqsadida ish beruvchini (uning vakilini) chaqirib oladi hamda ularning tushuntirishlarini oladi;

mehnat va mehnatni muhofaza qilish sohasidagi davlat nazoratiga muvofiq qonunchilik hujjatlari buzilishiga doir jismoniy va yuridik shaxslar murojaatlarini zarur hollarda joyning o‘ziga borib ko‘rib chiqadi;

murojaat predmetiga taalluqli hujjatlarni ish beruvchidan so‘rab oladi;

Inspeksiyada mavjud ma’lumotlar asosida tashkilotlarda mehnat huquqlari va mehnatni muhofaza qilish, ish beruvchining fuqarolik javobgarligini majburiy sug‘urta qilish, aholi bandligi to‘g‘risidagi qonunchilik talablariga rioya etilishini tahlil qiladi;

mehnat va mehnatni muhofaza qilish, aholini ish bilan ta’minlash va ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlariga rioya etilishi yuzasidan o‘tkazilgan tekshiruvlar va monitoring materiallarini tahlil qiladi hamda umumlashtiradi;

mehnat va mehnatni muhofaza qilish, aholi bandligiga doir amaldagi normativ-huquqiy hujjatlarni va xodimlarning mehnat huquqlari va manfaatlariga rioya etilishini va himoyasini, ularning ishlash jarayonida mehnat shart-sharoitlarini va xavfsizligini ta’minlashga doir mehnat huquqi normalarini o‘z ichiga olgan boshqa normativ-huquqiy hujjatlarni tahlil qiladi, zarur bo‘lganda, qonunchilik hujjatlariga o‘zgartirish va qo‘shimchalar yuzasidan takliflar kiritadi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sug‘urta qilish to‘g‘risidagi qonunchilik hujjatlarini takomillashtirish yuzasidan takliflar tayyorlaydi;

mehnatni muhofaza qilishga doir davlat dasturlari va boshqa dasturlarni ishlab chiqishda ishtirok etadi;

mehnat va mehnatni muhofaza qilish, aholi bandligi va ish beruvchining fuqarolik javobgarligini majburiy sug‘urta qilish sohasidagi normativ-huquqiy hujjatlar loyihalarini va hujjatlarni belgilangan tartibda ishlab chiqishda ishtirok etadi;

Xalqaro mehnat tashkilotining Inspeksiya faoliyatiga oid konvensiyalarini tahlil qilib boradi;

Xalqaro mehnat tashkiloti konvensiyalarini milliy qonunchilik hujjatlariga implementatsiya qilish bo‘yicha xalqaro tashkilotlar bilan hamkorlik qiladi;

Inspeksiya faoliyatiga oid Xalqaro mehnat tashkiloti va boshqa xalqaro tashkilotlarning forumlar, konferensiyalar, seminarlarda ishtirok etadi.

46. Inspeksiya qonunchilik hujjatlarida nazarda tutilgan boshqa funksiyalarni ham amalga oshirishi mumkin.

47. Inspeksiyaning mansabdor shaxslari o‘zlariga yuklangan vazifalar va funksiyalarni bajarish uchun quyidagi huquqlarga ega:

mulkchilik va tashkiliy-huquqiy shaklidan qat’i nazar, barcha tashkilotlar mansabdor shaxslaridan, shuningdek, fuqarolar — ish beruvchilardan nazorat funksiyalarini bajarish uchun zarur hujjatlar, axborot, statistik ma’lumotlar va ma’lumotnomalarni so‘rab olish;

Inspeksiyaga yuklangan vazifalarni amalga oshirishda davlat organlari va boshqa tashkilotlarning axborot dasturlaridan olinishi mumkin bo‘lgan ma’lumotlardan foydalanish;

ish beruvchilar tomonidan mehnat to‘g‘risidagi qonunchilik, aholining bandligi, ish beruvchining fuqarolik javobgarligini majburiy sug‘urta qilish, nogironligi bo‘lgan shaxslarning huquqlari to‘g‘risidagi qonunchilik, mehnat to‘g‘risidagi boshqa huquqiy hujjatlar, mehnatni muhofaza qilish qoidalari hamda mehnat standartlari talablariga rioya etilishi ustidan davlat nazoratini va tekshiruvini amalga oshirish;

tekshiruv va o‘rganish (monitoring) davomida foto-video tasvirga tushirish, tushuntirishlar hamda boshqa ma’lumotlarni olish, shuningdek, zaruratga ko‘ra, tarjimon, ekspertlarni jalb etish va ekspertiza tayinlash;

mulkchilik va tashkiliy-huquqiy shaklidan qat’i nazar, barcha tashkilotlar mansabdor shaxslariga, shuningdek, fuqarolar — ish beruvchilarga mehnat va mehnatni muhofaza qilish sohasidagi davlat nazorati predmetiga muvofiq qonunchilik hujjatlari buzilishini bartaraf etish, jumladan, qonunchilik hujjatlariga zid bo‘lgan buyruqlar va boshqa hujjatlarni belgilangan tartibda to‘xtatib turish, zarur hollarda ularni belgilangan tartibda bekor qilish to‘g‘risida bajarilishi majburiy bo‘lgan yozma ko‘rsatmalar berish;