Oʻzbekiston Respublikasi Prezidentining “Yer qaʼridan foydalanish, sanoat, radiatsiya va yadro xavfsizligi hamda atom energiyasidan foydalanish sohalarida davlat boshqaruvi va nazorati tizimini takomillashtirish chora-tadbirlari toʻgʻrisida” 2024-yil 24-maydagi PF-79-son Farmoni hamda “Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi faoliyatini samarali tashkil etish chora-tadbirlari toʻgʻrisida” 2024-yil 24-maydagi PQ-187-son qarori ijrosini taʼminlash maqsadida Vazirlar Mahkamasi qaror qiladi:

1. Shunday tartib oʻrnatilsinki, unga muvofiq:

a) foydali qazilmalarni qazib olish uchun foydalanishga berilgan yer qaʼri uchastkalarida yer qaʼridan foydalanuvchilar tomonidan barcha marksheyderlik oʻlchovlari, ularni rasmiylashtirish va hisobotlarda aks ettirish yagona shartli koordinatalar tizimi — 1984-yilgi xalqaro geodezik tizim (WGS-84) asosida amalga oshiriladi;

b) yer qaʼridan foydalanuvchilar tomonidan marksheyderlik oʻlchovlari asosida haqiqatda qazib olingan (ajratib olingan) foydali qazilmalar hajmi toʻgʻrisidagi hisobotlar quyidagi talablarga rioya etilgan holda topshiriladi:

birlamchi hujjatlarning (hisob-kitoblar, oʻlchov asboblarining koʻrsatkichlari va boshqa zarur maʼlumotlar) elektron nusxalari soliq toʻlovchilarning axborot tizimidagi shaxsiy kabinetiga kiritiladi;

shaxsiy kabinetga kiritilgan maʼlumotlar xabardor qilish tartibi asosida faoliyat yuritayotgan marksheyderlik tashkilotlari hamda yer qaʼridan foydalanuvchilar tomonidan elektron raqamli imzo bilan tasdiqlanadi;

tasdiqlangan maʼlumotlar Togʻ-kon sanoati va geologiya vazirligi huzuridagi “Yer qaʼridan foydalanish markazi” davlat muassasasi hamda soliq organlariga yer qaʼridan foydalanuvchilarning shaxsiy kabineti orqali avtomatik tarzda har chorak yakuni boʻyicha keyingi oyning 20-sanasiga qadar taqdim etiladi.

Bunda haqiqatda qazib olingan (ajratib olingan) foydali qazilmalar hajmi toʻgʻrisidagi hisobotlarda aks ettiriladigan maʼlumotlarning haqqoniyligi tasdiqlanmagan taqdirda, yer qaʼridan foydalanuvchilar bilan birga marksheyderlik oʻlchovlarini bajargan subyektlarga (tashkilotlarga) nisbatan qonunchilik hujjatlarida belgilangan javobgarlik choralari koʻriladi.

2. Belgilansinki:

Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining (keyingi oʻrinlarda — Inspeksiya) faoliyatning asosiy yoʻnalishlari boʻyicha nazoratni amalga oshiruvchi mansabdor shaxslari tegishliligi boʻyicha nazorat ostidagi obyektlarga biriktiriladi;

Inspeksiyaning nazorat faoliyatini amalga oshiruvchi mansabdor shaxslarining mehnat sharoitlari boʻyicha belgilangan kafolatlar va imtiyozlar tegishli ish oʻrinlari boʻyicha mehnat sharoitlari va asbob-uskunalarning jarohatlash xavfliligi boʻyicha oʻtkazilgan attestatsiya natijalari asosida belgilanadi;

Inspeksiyaning Olmaliq va Qizilqum kon-texnika inspeksiyalarining boshqaruv xodimlari soni sanoat xavfsizligi sohasining tegishli yoʻnalishlariga muvofiq “Navoiy KMK” AJ va “Olmaliq KMK” AJ bilan kelishilgan holda belgilanadi, shuningdek, ushbu inspeksiyalarning moliyalashtirilishi va moddiy-texnik jihatdan taʼminlanishi tegishlicha “Navoiy KMK” AJ va “Olmaliq KMK” AJ mablagʻlari hisobidan amalga oshiriladi.

Inspeksiyaning Olmaliq va Qizilqum kon-texnika inspeksiyalari xodimlari tarkibi tegishli ravishda “Navoiy KMK” AJ va “Olmaliq KMK” AJ ning shtatdagi xodimlari soniga kiritiladi.

3. Quyidagilar:

Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi toʻgʻrisida nizom 1-ilovaga muvofiq;

Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining Harbiylashtirilgan kon-qutqaruv qismi toʻgʻrisida nizom 2-ilovaga muvofiq tasdiqlansin.

4. Davlat aktivlarini boshqarish agentligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Togʻ-kon sanoati va geologiya vazirligi bilan birgalikda bir oy muddatda Inspeksiyaning hududiy boshqarmalari va tizim tashkilotlarini hududlardagi Davlat aktivlarini boshqarish agentligiga tegishli boʻsh turgan maʼmuriy binolarga operativ boshqaruv huquqi asosida bepul joylashtirilishini taʼminlasin.

5. Vazirlar Mahkamasining “Faoliyatni boshlash yoki tugatish uchun vakolatli organni xabardor etish tartibi toʻgʻrisidagi yagona nizomni tasdiqlash haqida” 2022-yil 25-fevraldagi 88-son qaroriga 3-ilovaga muvofiq oʻzgartirish va qoʻshimchalar kiritilsin.

6. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

7. Togʻ-kon sanoati va geologiya vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

8. Ushbu qarorning 1-bandi qaror rasmiy eʼlon qilingan kundan eʼtiboran uch oy oʻtgach kuchga kiradi.

9. Ushbu qarorning bajarilishini nazorat qilish Oʻzbekiston Respublikasi togʻ-kon sanoati va geologiya vaziri B.F. Islamov zimmasiga yuklansin.

1. Ushbu Nizom Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining (keyingi oʻrinlarda — Inspeksiya) maqomi, asosiy vazifalari, funksiyalari, huquqlari, javobgarligi, faoliyatini tashkil etish tartibini belgilaydi.

2. Inspeksiya Oʻzbekiston Respublikasi Togʻ-kon sanoati va geologiya vazirligi huzuridagi respublika ijro etuvchi hokimiyat organi hisoblanib, togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, uglevodorod xomashyosining qazib olinishini, konchilikni, qattiq foydali qazilmalarning qayta ishlanishini hamda portlatish ishlarini amalga oshirishda sanoat xavfsizligi talablariga rioya etilishini, shuningdek, yerosti suvlaridan oqilona foydalanilishini nazorat qilish sohalarida yagona davlat siyosatini yuritishda yordam koʻrsatadi.

Inspeksiya nazorati ostidagi obyektlarga togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, uglevodorod xomashyosining qazib olinishini, konchilikni, qattiq foydali qazilmalarning qayta ishlanishini hamda portlatish ishlarini amalga oshirishda sanoat xavfsizligi talablariga rioya etilishini, shuningdek, yerosti suvlaridan oqilona foydalanilishini amalga oshiruvchi obyektlar (keyingi oʻrinlarda — nazorat ostidagi obyektlar) kiradi.

3. Inspeksiya bevosita Oʻzbekiston Respublikasi Togʻ-kon sanoati va geologiya vazirligiga (keyingi oʻrinlarda — Vazirlik) boʻysunadi va oʻz faoliyati yuzasidan hisobot berib boradi.

4. Inspeksiya oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizom va boshqa qonunchilik hujjatlariga amal qiladi.

5. Inspeksiya, uning tarmoq inspeksiyalari, hududiy boshqarmalari va kon-texnika inspeksiyalarining oʻz vakolatlari doirasida qabul qilingan qarorlari respublika va mahalliy ijro etuvchi hokimiyat organlari hamda boshqa tashkilotlar, shuningdek, fuqarolar tomonidan bajarilishi majburiy hisoblanadi.

6. Inspeksiya oʻzining faoliyat sohasiga tegishli boʻlgan masalalarni, shu jumladan, yer qaʼridan foydalanish yoʻnalishida qabul qilingan texnik jihatdan tartibga solish sohasidagi normativ hujjatlar talablari asosida ishlashni, nazorat ostidagi tashkilotlarda sodir boʻlgan avariyalarni, portlatish ishlari va portlovchi materiallarning aylanmasi sohasidagi qonunchilik buzilishi holatlarini, oqibatida oʻlim va ogʻir tan jarohati bilan tugagan baxtsiz hodisalarni va boshqa masalalarni tegishli tashkilot rahbarlari ishtirokida Inspeksiyaning ilmiy-texnik kengashida koʻrib chiqadi.

7. Inspeksiya va uning tuzilmasiga kiradigan tashkilotlar yuridik shaxs hisoblanadi, Oʻzbekiston Respublikasi Davlat gerbi tasviri tushirilgan muhr va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, bank hisobvaraqlariga, shu jumladan, chet el valyutasidagi bank hisobvaraqlariga ega boʻladi.

8. Inspeksiyaning rasmiy nomi:

a) davlat tilida:

toʻliq nomi — Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi;

qisqartma nomi — Kongeotexnazorat;

b) rus tilida:

toʻliq nomi — Inspeksiya po kontrolyu v sfere gornodobivayushey promishlennosti i geologii pri Ministerstve gornodobivayushey promishlennosti i geologii Respubliki Uzbekistan;

qisqartma nomi — Gorgeotexnadzor;

v) ingliz tilida:

toʻliq nomi — Inspectorate for control of the sphere of mining industry and geology under the Ministry of mining industry and geology of the Republic of Uzbekistan;

qisqartma nomi — Minegeotechcontrol.

9. Inspeksiyaning joylashgan joyi va pochta manzili: 100164, Toshkent shahri Mirzo Ulugʻbek tuman, Olimlar koʻchasi 49a-uy.

10. Inspeksiya belgilangan shtatlar birligi doirasida markaziy apparat, hududiy boshqarmalar va kon-texnika inspeksiyalari tashkiliy tuzilmasini va nizomlarini Togʻ-kon sanoati va geologiya vazirligi bilan kelishilgan holda tasdiqlaydi.

11. Inspeksiya tizimiga quyidagilar kiradi:

markaziy apparat;

hududiy boshqarmalar;

Angren kon-texnika inspeksiyasi;

Qizilqum kon-texnika inspeksiyasi;

Olmaliq kon-texnika inspeksiyasi;

Harbiylashtirilgan kon-qutqaruv qismi (keyingi oʻrinlarda — HKQQ).

12. Inspeksiya, uning hududiy boshqarmalari va kon-texnika inspeksiyalari togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, uglevodorod xomashyosining qazib olinishini, konchilikni, qattiq foydali qazilmalarning qayta ishlanishini hamda portlatish ishlarini amalga oshirishda sanoat xavfsizligi talablariga rioya etilishini, shuningdek, yerosti suvlaridan oqilona foydalanilish sohalarida yagona davlat nazorat tizimini tashkil etadi.

13. Hududiy boshqarmalar, kon-texnika inspeksiyalari hamda HKKQ respublika va mahalliy ijro etuvchi hokimiyat organlaridan mustaqil faoliyat olib boradi va bevosita Inspeksiyaga boʻysunadi.

14. Davlat organlari va boshqa tashkilotlarga Inspeksiya xodimlariga ularning vakolatiga kirmaydigan ishlarni bajarishni yuklash taqiqlanadi.

15. Quyidagilar Inspeksiyaning asosiy vazifalari hisoblanadi:

Oʻzbekiston Respublikasining “Yer qaʼri toʻgʻrisida”gi va “Xavfli ishlab chiqarish obyektlarining sanoat xavfsizligi toʻgʻrisida”gi qonunlari, yer qaʼrini geologik oʻrganishda undan foydalanish va muhofaza qilish, foydali qazilmalarni (shu jumladan chuchuk, mineral, termal va sanoat yerosti suvlarini) qazib olish, mineral xomashyoni qayta ishlashda yer qaʼridan foydalanuvchilar tomonidan qonunchilik hujjatlari va texnik jihatdan tartibga solish sohasidagi normativ hujjatlar talablariga hamda yer qaʼridan foydalanish shartlariga yuridik va jismoniy shaxslar tomonidan rioya etilishi ustidan davlat nazoratini amalga oshirish;

togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, uglevodorod xomashyosining qazib olinishini, konchilikni, qattiq foydali qazilmalarning qayta ishlanishini hamda portlatish ishlari va portlovchi materiallarning aylanmasi sohasida sanoat xavfsizligi talablariga rioya etilishini, shuningdek, yerosti suvlaridan oqilona foydalanilishini taʼminlashga oid qonunchilik hujjatlari va texnik jihatdan tartibga solish sohasidagi normativ hujjatlar talablariga yuridik va jismoniy shaxslar tomonidan rioya etilishi ustidan davlat nazoratini amalga oshirish;

togʻ-kon tarmogʻida, geologiya, neft va gaz tarmogʻida geologiya-qidiruv ishlari, foydali qazilmalarni qazib olish, konchilik, qattiq foydali qazilmalarni qayta ishlash hamda portlatish ishlari sohasiga oid xavfli ishlab chiqarish obyektlarida sanoat xavfsizligi ekspertizasi va deklaratsiyalash tartibini takomillashtirish hamda texnogen xavfi yuqori boʻlgan zonalarning davlat kadastrini yuritish va ushbu yoʻnalishlardagi ekspertlarni attestatsiyadan oʻtkazishda ishtirok etish;

yer qaʼridan foydalanishda marksheyderlik oʻlchov ishlarini oʻz vaqtida amalga oshirilishi va qazib (ajratib) olingan foydali qazilmalarning haqqoniy hisobi yuritilishi ustidan nazoratni taʼminlash, shuningdek, mineral xomashyoni qazib olish va qayta ishlashda foydali qazilmalarning normativdan ortiqcha yoʻqotilishiga yoʻl qoʻyilganligini aniqlash va qonunchilik hujjatlariga muvofiq javobgarlik choralarini koʻrish;

konchilik, portlatish ishlari, portlovchi materiallarning aylanmasi sohasida hamda sanoat xavfsizligining tegishli yoʻnalishlarida litsenziyalash, ruxsatnomalar berish va xabardor qilish tartib-taomillarini amalga oshirish;

togʻ-kon tarmogʻi, geologiya hamda konchilik, shu jumladan, qattiq foydali qazilmalarni qazib olish va qayta ishlash, portlatish ishlari, portlovchi materiallarning aylanmasi sohasida sanoat xavfsizligiga oid normativ-huquqiy hujjatlar loyihalari va texnik jihatdan tartibga solish sohasidagi normativ hujjatlarni belgilangan tartibda ishlab chiqishda ishtirok etish;

texnika va texnologiyalarning jadal rivojlanishini hisobga olgan holda togʻ-kon tarmogʻi, geologiya, yer qaʼridan foydalanish hamda konchilik, portlatish ishlari, portlovchi materiallarning aylanmasi sohasida faoliyat yurituvchi mutaxassislarning malakasini oshirish;

Inspeksiya faoliyatida zamonaviy raqamli texnologiyalarni va kosmik masofaviy monitoringni tatbiq etish orqali togʻ-kon sanoati va geologiya sohasida huquqbuzarliklarning oldini olishning samarali tizimlarini joriy etish;

yer qaʼridan noqonuniy foydalanish holatlarini aniqlash va ularga nisbatan tezkor choralar koʻrish yuzasidan idoralararo hamkorlikni rivojlantirish;

yer qaʼridan foydalanishda aniqlangan huquqbuzarliklar va ularning oqibatlari toʻgʻrisida keng jamoatchilikni xabardor qilib borish, sohada huquqni qoʻllash amaliyoti va qonunchilikni takomillashtirish yuzasidan takliflar ishlab chiqish;

yerosti suvlariga quduqlarni burgʻilash va suv olish inshootlarini ishlatishda qonunchilik va texnik jihatdan tartibga solish sohasidagi normativ hujjatlar talablarining buzilishi holatlari ustidan taʼsirchan nazorat choralarini koʻrib borish.

16. Inspeksiya oʻziga yuklangan vazifalarga muvofiq quyidagi funksiyalarni amalga oshiradi:

a) Oʻzbekiston Respublikasining “Yer qaʼri toʻgʻrisida”gi va “Xavfli ishlab chiqarish obyektlarining sanoat xavfsizligi toʻgʻrisida”gi Qonunlari, yer qaʼrini geologik oʻrganishda undan foydalanish va muhofaza qilish, foydali qazilmalarni (shu jumladan, chuchuk, mineral, termal va sanoat yerosti suvlarini) qazib olish, mineral xomashyoni qayta ishlashda yer qaʼridan foydalanuvchilar tomonidan qonunchilik hujjatlari va texnik jihatdan tartibga solish sohasidagi normativ hujjatlar talablariga hamda yer qaʼridan foydalanish shartlariga yuridik va jismoniy shaxslar tomonidan rioya etilishi ustidan davlat nazoratini amalga oshirish yoʻnalishi boʻyicha:

yuridik va jismoniy shaxslar tomonidan yer qaʼrini geologik oʻrganishda undan foydalanish va muhofaza qilish, foydali qazilmalarni (shu jumladan, chuchuk, mineral, termal va sanoat yerosti suvlarini) qazib olish, mineral xomashyoni qayta ishlashda yer qaʼridan foydalanuvchilar geologiya-marksheyderlik nazorati hamda marksheyderlik (geodeziya) ishlarini olib boruvchi tadbirkorlik subyektlari tomonidan qonunchilik hujjatlari va texnik jihatdan tartibga solish sohasidagi normativ hujjatlar talablariga hamda yer qaʼridan foydalanish shartlariga rioya etilishi ustidan davlat nazoratini va tekshiruvini amalga oshiradi;

foydali qazilmalar konlari va istiqbolli uchastkalarni oʻrganish yuzasidan monitoringini amalga oshiradi;

mineral xomashyo zaxiralariga ega konlar va istiqbolli uchastkalarda geologik oʻrganishlar, qazib olish va qayta ishlashda, sanoat va tajriba-sanoat usulida qazib olishda yer qaʼridan oqilona foydalanish hamda uning muhofaza etilishi ustidan nazorat qiladi;

yer qaʼridan foydalanish bilan bogʻliq ishlarni amalga oshirish uchun yer qaʼridan foydalanish ruxsatnomalari, texnik loyihalar va boshqa hujjatlarda belgilangan shartlarni tegishli subyektlar tomonidan oʻz vaqtida va sifatli bajarilishini nazorat qiladi;

yer qaʼridan oqilona foydalanish hamda sanoat xavfsizligi talablariga rioya etmagan holda olib borilayotgan yoki baxtsiz hodisa va avariya sodir boʻlishiga olib kelishi mumkin boʻlgan ishlarni toʻxtatib turadi;

yer qaʼrini oʻrganish, foydali qazilma konlarini qidirish va qazib olish, shuningdek, foydali qazilmalarni qazib olish bilan bogʻliq boʻlmagan maqsadlarda yer qaʼridan foydalanishda qoʻllanishi mumkin boʻlgan qidiruv quduqlarni, geologiya va texnik hujjatlarning, maʼdanlar va togʻ jinslari namunalari, kern, foydali qazilma namunalari dublikatlarining belgilangan talablarga muvofiq saqlanishini nazorat qiladi;

gidrogeologiya quduqlarini burgʻilash va ishlatishda texnik jihatdan tartibga solish sohasidagi normativ hujjatlar talablariga rioya etilishini, yer qaʼrining noyob obyektlari, yerosti suvlarini (shu jumladan, shifobaxsh va ichimlik suvlarini) muhofaza qilish ishlarining bajarilishini nazorat qiladi;

yer qaʼridan foydalanuvchilar tomonidan qonunchilik hujjatlarida belgilangan talablarga muvofiq taqdim etiladigan kon ajratmasi boʻyicha ajratish dalolatnomasini va kon oʻzlashtirish loyihasini kelishadi;

foydali qazilmalarni qazib olish boʻyicha korxonalar, obyektlarni tugatish va konservatsiya qilishda yer qaʼridan foydalanuvchilar bajarishi shart boʻlgan texnik (foydali qazilmalar konlaridan foydalanishda ishlarning xavfsizligi, iqtisodiyot tarmoqlarida foydalanish uchun iqtisodiy jihatdan maqsadga muvofiq boʻlgan kon ishlanmalarini saqlab qolish yuzasidan) talablarni belgilaydi;

yer qaʼrini geologik oʻrganishda, qidirilayotgan foydali qazilma konlarida, foydali qazilmalarni qazib olishda, shu jumladan, uglevodorodlarni yerostida saqlash uchun foydali qazilmalarni qazib olish bilan bogʻliq boʻlmagan yerosti inshootlari qurish va ulardan foydalanishda yer qaʼri uchastkalarida ishlarni bajarishda gidrogeologik, geologik-iqtisodiy va boshqa shartlarga rioya etilishini nazorat qiladi;

asosiy va ular bilan birgalikda joylashgan foydali qazilmalar hamda ularning tarkibidagi asosiy va birgalikda uchraydigan komponentlar zaxiralarining miqdorlari va sifati, shuningdek, foydali qazilmalarni qazish bilan bogʻliq boʻlmagan maqsadlarda foydalaniladigan yer qaʼri uchastkalarining tabiiy xususiyatlari haqida dastlabki materiallar va axborotlarning toʻliqligi va haqqoniyligini nazorat qiladi;

oʻz vakolatlari doirasida hududlarda buzilgan yerlarni rekultivatsiya qilish hamda ularning unumdorligini tiklash, tuproqning unumdor qatlamini sidirib olish, saqlash va undan foydalanish ishlarining sifati va oʻz vaqtida bajarilishi ustidan nazorat qiladi va monitoring yuritadi;

b) togʻ-kon tarmogʻida, geologiya hamda yer qaʼridan foydalanish, portlatish ishlari va portlovchi materiallarning aylanmasi sohasida sanoat xavfsizligini taʼminlashga oid qonunchilik va texnik jihatdan tartibga solish sohasidagi normativ hujjatlar talablariga yuridik va jismoniy shaxslar tomonidan rioya etilishi ustidan davlat nazoratini amalga oshirish yoʻnalishi boʻyicha:

yuridik va jismoniy shaxslar tomonidan togʻ-kon, neft va gaz tarmogʻida geologiya-qidiruv ishlari, quduqlarini burgʻilash (qurish), ularni joriy va mukammal taʼmirlash, sinash va oʻzlashtirish, uglevodorod xomashyosini qazib olish, geologiya hamda yer qaʼridan foydalanish, portlatish ishlari va portlovchi materiallarning aylanmasi yoʻnalishlari sanoat xavfsizligiga oid qonunchilik hujjatlari va texnik jihatdan tartibga solish sohasidagi normativ hujjatlar talablariga rioya etilishi ustidan nazorat tadbirlari va tekshiruvlarini amalga oshiradi;

nazorat ostidagi obyektlarda avariya holatining va ishlab chiqarishdagi baxtsiz hodisalarning oldini olish maqsadida togʻ-kon ishlari va sanoat xavfsizligi talablariga rioya qilinishi zarurligi toʻgʻrisida tushuntirish ishlarini olib boradi;

nazorat ostidagi obyektlarda avariyalar, ishlab chiqarishdagi baxtsiz hodisalarni, portlatish ishlari va portlovchi materiallar aylanmasi bilan bogʻliq qonunchilik buzilishi holatlarining sabablarini texnik jihatdan tekshiradi;

HKQQni operativ boshqaradi va metodik rahbarlik qiladi, shuningdek, kon favvoralariga qarshi kurashish, gazdan qutqarish va avariya-dispetcherlik xizmatlari korxonalari, boʻlinmalarining boʻlishi mumkin boʻlgan avariyalarni lokalizatsiya qilish va oqibatlarini tugatishga tayyorligini nazorat qilish, shuningdek, koʻrsatib oʻtilgan boʻlinmalarning joylashishi sxemalarini kelishish;

nazorat ostidagi xavfli ishlab chiqarish obyektlarining foydalanishga qabul qilinishida ishtirok etish uchun oʻz ishining masʼul vakillarini tayinlaydi, ushbu obyektlarda foydalanishga qabul qilish qoidalariga rioya etilishi ustidan nazoratni amalga oshiradi;

nazorat ostidagi obyektlardan foydalanishda tashkilotlarning tayyorligini, shuningdek, nazorat ostidagi obyektlarda avariyalar va ishlab chiqarishdagi baxtsiz hodisalarning oldini olish tadbirlari ishlab chiqilishi va amalga oshirilishini nazorat qiladi;

nazorat ostidagi obyektlarda sanoat xavfsizligi deklaratsiyalari ishlab chiqilishi va mutasaddi organlarga toʻgʻri va oʻz vaqtida taqdim etilishining monitoringini yuritadi;

nazorat ostidagi obyektlarda sanoat xavfsizligi yoʻnalishlarida zamonaviy texnik yechimlarni va uskunalarni hamda yangi portlovchi materiallarni qoʻllashning texnik jihatdan maqsadga muvofiqligi yuzasidan tegishli ekspert xulosalarni koʻrib chiqadi va maʼqullaydi;

xavfli ishlab chiqarish obyektlarida amalga oshirilgan ishlarning alohida yoʻnalishlarida texnologik bosqichlarni, texnologik reglamentlarni kelishadi;

ishlab turgan va qurilayotgan nazorat ostidagi xavfli ishlab chiqarish obyektlarida sanoat xavfsizligini deklaratsiya qilishni nazorat qiladi;

nazorat ostidagi obyektlarda avariyalarni bartaraf etish rejasini ishlab chiqishda ishtirok etadi hamda avariyalarni bartaraf etishga shayligi taʼminlanganligi ustidan nazoratini amalga oshiradi;

konchilik, geologiya, neft va gaz geologiya-qidiruv ishlari va ularni qazib olish va mineral xomashyoni qayta ishlash hamda portlovchi materiallarning aylanmasi sohalarida qoʻllanadigan texnologiyalar, ishlanmalar, obyektlar, asbob-uskunalar va texnik qurilmalarning roʻyxatini yuritadi;

nazorat ostidagi obyektlarda qoʻllanadigan texnik qurilmalarni sertifikatlashni nazorat qiladi;

nazorat ostidagi obyektlarda qoʻllanadigan texnik qurilmalar, asbob-uskunalar, transport vositalari, portlovchi moddalar, portlatish vositalari, oʻq otuvchi va portlatuvchi apparatlarni sinovdan oʻtkazishda ishtirok etadi;

konchilik, portlovchi materiallarni ishlab chiqarish va portlatish ishlari amalga oshiriladigan obyektlarda qoʻllanadigan texnologiyalar, ishlanmalar va texnik qurilmalarning kelishuvini amalga oshiradi;

Inspeksiyaning vakolatiga kiradigan masalalar boʻyicha sanoatda, kon nazoratida va ilmiy tadqiqotlarda ishlarni xavfsiz olib borishni nazorat qilish sohasida xalqaro hamkorlikni amalga oshiradi, xalqaro tashkilotlar, boshqa mamlakatlarning tegishli nazorat organlari bilan hamkorlik aloqalarini yoʻlga qoʻyadi;

v)togʻ-kon tarmogʻida, geologiya, neft va gaz tarmogʻida geologiya-qidiruv ishlari, foydali qazilmalarni qazib olish, konchilik, qattiq foydali qazilmalarni qayta ishlash hamda portlatish ishlari sohasiga oid xavfli ishlab chiqarish obyektlarida sanoat xavfsizligi ekspertizasi va deklaratsiyalash tartibini takomillashtirish hamda texnogen xavfi yuqori boʻlgan zonalarning davlat kadastrini yuritish va ushbu yoʻnalishlardagi ekspertlarni attestatsiyadan oʻtkazishda ishtirok etish yoʻnalishi boʻyicha:

nazorat ostidagi obyektlar reyestrining yuritilishida ishtirok etadi;

nazorat ostidagi obyektlarni identifikatsiya qilish va majburiy sugʻurtalashni nazorat qiladi;

nazorat ostidagi obyektlarda texnogen xavfi yuqori boʻlgan zonalar davlat kadastri yuritilishini nazorat qiladi;

nazorat ostidagi obyektlarda sanoat xavfsizligi talablariga rioya etilishi ustidan ishlab chiqarish toʻgʻrisidagi nizomni kelishadi hamda maʼlumotlarni toʻplaydi va tahlil qiladi;

g) yer qaʼridan foydalanishda marksheyderlik oʻlchov ishlarini oʻz vaqtida amalga oshirilishi va qazib (ajratib) olingan foydali qazilmalarning haqqoniy hisobining yuritilishi ustidan nazoratni taʼminlash, shuningdek, mineral xomashyoni qazib olish va qayta ishlashda foydali qazilmalarning normativdan ortiqcha yoʻqotilishiga yoʻl qoʻyilganligini aniqlash va qonunchilik hujjatlariga muvofiq javobgarlik choralarini koʻrish yoʻnalishi boʻyicha:

foydali qazilmalardan noqonuniy foydalanish aniqlangan holatlar boʻyicha tegishli hujjatlarni rasmiylashtiradi, marksheyderlik ishlarini amalga oshirgan holda yetkazilgan zarar miqdorini (hajm koʻrinishida) aniqlaydi;

yer qaʼridan foydalanish sohasidagi qonunchilik talablarini buzgan, qazib olingan foydali qazilmalar hajmi toʻgʻrisidagi maʼlumotlarni soxtalashtirishga yoʻl qoʻygan yer qaʼridan foydalanuvchilar hamda marksheyderlik tashkilotlari, shuningdek, ularning rahbarlari va taʼsischilar boʻyicha yer qaʼridan foydalanish sohasidagi qonunchilikni buzuvchilar reyestrini yuritadi va tegishli maʼlumotlarni “Kon-geologiya xizmatlari” modulida joylashtirib boriladi;

reyestrga kiritilgan tashkilotlarni belgilangan muddat davomida qonunchilik talablarini va maʼlumotlarni toʻgʻri taqdim etish yoʻnalishidagi faoliyatining monitoringini yuritadi, natijalari boʻyicha ularni yer qaʼridan foydalanish sohasidagi qonun buzuvchilar reyestridan belgilangan tartibga muvofiq chiqarish ishlarini tashkillashtiradi;

togʻ-kon va qayta ishlash korxonalarining loyihalarini, shuningdek, mineral xomashyoni qazib olish va qayta ishlashda foydali qazilmalarni yoʻqotish va ularning kamayish normativlarini kelishadi;

barcha turdagi foydali qazilmalarni qazib olishda hamda qayta ishlashda (uglevodorod xomashyosini qayta ishlashdan tashqari) ularning yoʻqotilishi va kamayishi boʻyicha belgilangan normativlarga rioya etilishini nazorat qiladi;

qazilmalarni, qazib olish boʻyicha ishlatilayotgan konlar toʻgʻrisida yillik hisobot balanslarida foydali qazilmalar zaxiralarini qazib olish bilan bogʻliq yer qaʼrini oʻrganish ishlari hisobini yuritadi, shuningdek, geologik oʻrganish ishlari natijalarining, qazib oluvchi korxonalar hisobidan chiqarilayotgan qazib olingan va yoʻqotilgan qazilmalarning hakqoniyligini oʻrganadi;

yer qaʼrini oʻrganishni, ulardan foydali qazilmalarni qazib olish, samarali foydalanishni hamda yoʻldosh komponentlar ajratib olinishini nazorat qiladi;

mineral xomashyoni qazib olish va qayta ishlashda foydali qazilmalarning (uglevodorod xomashyosini qayta ishlashdan tashqari) normativdan ortiqcha yoʻqotilishiga yoʻl qoʻyilganligini aniqlaydi va tegishli subyektlarga nisbatan qonunchilik hujjatlariga muvofiq javobgarlik choralarini koʻradi;

d) konchilik, portlatish ishlari, portlovchi materiallarning aylanmasi sohasida hamda sanoat xavfsizligining tegishli yoʻnalishlarida litsenziyalash, ruxsatnomalar berish va xabardor qilish tartib-taomillarini amalga oshirish yoʻnalishi boʻyicha:

portlovchi moddalarni, ularni qoʻllagan holda materiallar va mahsulotlarni, shuningdek, portlatish vositalarini yaratish, ishlab chiqarish, tashish, saqlash va realizatsiya qilish faoliyatini litsenziyalashni amalga oshiradi, litsenziya talablari va shartlariga rioya etilishini nazorat qiladi, shu jumladan, bevosita joyiga chiqqan holda qonunchilik hujjatlarida belgilangan talablar asosida tekshiruvlarni amalga oshiradi;

konchilik, portlatish ishlari, portlovchi materiallarning aylanmasi sohalarida hamda nazorat ostidagi obyektlarda sanoat xavfsizligining tegishli yoʻnalishlarida ruxsat etish xususiyatiga ega hujjatlarni beradi, ruxsat berish tartib-taomillarini amalga oshiradi, ushbu hujjatlarni amal qilishini belgilangan tartibda toʻxtatib turadi, tugatadi va bekor qiladi, ruxsat etish xususiyatiga ega hujjatlar talablari va shartlariga rioya etilishini nazorat qiladi, shu jumladan, bevosita joyiga chiqqan holda tegishli tekshiruvlarni amalga oshiradi;

qazilmalarga ega boʻlgan va boshqa konlarni oʻzlashtirish va ishlatish loyiha hujjatlarini kelishadi;

oʻz vakolatlari doirasida faoliyatning ayrim turlarini litsenziyalashda va ruxsat etish xususiyatiga ega hujjatlarni berishda (rasmiylashtirishda) ishtirok etadi;

yer qaʼridan foydalanish faoliyati boʻyicha ruxsat berishga doir hujjatlarda belgilangan talablar va shartlarni buzgan subyektlarni yer qaʼridan foydalanish faoliyatini toʻxtatib turish, tugatish va bekor qilish boʻyicha takliflarni tayyorlaydi;

yangi ishlab chiqilgan va respublika hududida foydalanilmagan portlovchi materiallarning sinov ishlarida ishtirok etadi va ularni respublika hududidagi xavfli ishlab chiqarish obyektlarida qoʻllash mumkinligi toʻgʻrisida xulosa beradi;

e) togʻ-kon tarmogʻi, geologiya hamda konchilik, shu jumladan qattiq foydali qazilmalarni qazib olish va qayta ishlash, portlatish ishlari, portlovchi materiallarning aylanmasi sohasida sanoat xavfsizligiga oid normativ-huquqiy hujjatlar loyihalari va texnik jihatdan tartibga solish sohasidagi normativ hujjatlarni belgilangan tartibda ishlab chiqishda ishtirok etish yoʻnalishi boʻyicha:

togʻ-kon, neft va gaz tarmogʻida geologiya-qidiruv ishlari, quduqlarini burgʻilash (qurish), ularni joriy va mukammal taʼmirlash, sinash va oʻzlashtirish, xomashyosini qazib olish, geologiya hamda yer qaʼridan foydalanish, portlatish ishlari va portlovchi materiallarning aylanmasidagi yoʻnalishlarida sanoat xavfsizligi sohalarida qonunchilik hujjatlari va texnik jihatdan tartibga solish sohasidagi normativ hujjatlar loyihalarini ishlab chiqadi, shuningdek, mavjud huquqiy bazani takomillashtirish boʻyicha takliflar tayyorlaydi;

Inspeksiya vakolatiga kiradigan masalalar boʻyicha ilgʻor texnologiyalar, innovatsiyalar va yechimlarini joriy etishga, sohani rivojlantirishga qaratilgan qisqa, oʻrta va uzoq muddatli dasturlarni va yoʻl xaritalarni tayyorlashga doir takliflarni kiritadi;

j) texnika va texnologiyalarning jadal rivojlanishini hisobga olgan holda togʻ-kon tarmogʻi, geologiya, yer qaʼridan foydalanish hamda konchilik, portlatish ishlari, portlovchi materiallarning aylanmasi sohasida faoliyat yurituvchi mutaxassislarning malakasini oshirish yoʻnalishi boʻyicha:

nazorat ostidagi obyektlar xodimlarining togʻ-kon sanoati sohasidagi sanoat xavfsizligi boʻyicha malakasini tizimli asosda oshirilishini, shuningdek, texnika va texnologiyalarning doimiy rivojlanishini hisobga olgan holda mutaxassislarni tayyorlash ishlarini tashkil etadi va nazoratini amalga oshiradi;

nazorat ostidagi obyektlardagi xodimlarni yer qaʼridan foydalanish va ularni muhofaza qilish, portlovchi materiallar aylanmasi va portlatish ishlaridagi xavfsizlik sohasi boʻyicha xodimlarni tayyorlash, qayta tayyorlash, malakasini oshirish va attestatsiyadan oʻtkazish tartibini tasdiqlaydi hamda attestatsiyadan oʻtkazishda ishtirok etadi;

nazorat ostidagi obyektlar xodimlarining bilim va koʻnikmalari boʻyicha tekshiruvlarni qonunchilik hujjatlarida belgilangan talablar asosida amalga oshiradi;

nazorat ostidagi obyektlarda togʻ-kon, portlatish ishlarini bajarish va rahbarlik qilish huquqiga tayyorlashni va oʻqitishni tashkil etadi va amalga oshiradi, belgilangan tartibda portlatish va boshqa alohida xavfli ishlarni bajarish uchun tayyorgarlikdan oʻtgan shaxslarga tegishli guvohnomalarning berilishini tashkil etadi va nazorat qiladi;

z) Inspeksiya faoliyatida zamonaviy raqamli texnologiyalarni va kosmik masofaviy monitoringni tatbiq etish orqali togʻ-kon sanoati va geologiya sohasida huquqbuzarliklarning oldini olishning samarali tizimlarini joriy etish yoʻnalishi boʻyicha:

“Oʻzbekkosmos” agentligi bilan hamkorlikda kosmik maʼlumotlarni tahlil qilish orqali “xavfi yuqori” boʻlgan noqonuniy foydalanish holatlarini aniqlash boʻyicha doimiy ravishda nazorat tadbirlarini amalga oshiradi;

aholi tomonidan Vazirlikning Internet jahon axborot tarmogʻidagi maxsus axborot tizimiga yuborilgan yer qaʼridan foydalanish qoidalarini buzish bilan bogʻliq huquqbuzarlik holatlari haqidagi fotosuratlar va videoyozuvli maʼlumotlarni belgilangan tartibda koʻrib chiqadi va tegishli choralarni koʻradi;

Vazirlikning rasmiy veb-saytida togʻ-kon sanoati va geologiya sohasida xizmat koʻrsatish bozorini muvofiqlashtirish va rivojlantirish boʻyicha “Geomonitoring” axborot tizimi doirasida “Kon-geologiya xizmatlari” modulida ushbu sohada faoliyat yurituvchi yuridik va jismoniy shaxslarning reytingini yuritishda ishtirok etadi;

yerosti suvlariga quduqlarni burgʻilash va suv olish inshootlarini ishlatishda qonunchilik va texnik jihatdan tartibga solish sohasidagi normativ hujjatlar talablarining buzilishi holatlari boʻyicha taʼsirchan nazorat choralarini koʻrib boradi;

Oʻzbekiston Respublikasi hududiga olib kirilayotgan va respublikada mavjud geologiya-qidiruv va kon ishlarida qoʻllanadigan burgʻilash qurilmalari va uskunalarning yagona roʻyxatini yuritadi;

i) yer qaʼridan noqonuniy foydalanish holatlarini aniqlash va ularga nisbatan tezkor choralar koʻrish yuzasidan idoralararo hamkorlikni rivojlantirish yoʻnalishi boʻyicha:

huquqni muhofaza qilish organlari bilan hamkorlikda yer qaʼridan foydalanishda noqonuniy holatlarning oldini olish va ularni bartaraf etish boʻyicha muntazam ravishda tezkor-nazorat tadbirlarini amalga oshiradi;

Oʻzbekiston Respublikasi Bosh prokuraturasi, Ichki ishlar vazirligi, Ekologiya, atrof-muhitni muhofaza qilish va iqlim oʻzgarishi vazirligi, Soliq qoʻmitasi, boshqa mutasaddi davlat organlari va tashkilotlari bilan birgalikda foydali qazilmalardan noqonuniy foydalanish holatlarini aniqlash boʻyicha doimiy ravishda nazorat tadbirlarini amalga oshiradi;

k) yer qaʼridan foydalanishda aniqlangan huquqbuzarliklar va ularning oqibatlari toʻgʻrisida keng jamoatchilikni xabardor qilib borish, sohada huquqni qoʻllash amaliyoti va qonunchilikni takomillashtirish yuzasidan takliflar ishlab chiqish yoʻnalishi boʻyicha:

sohada amalga oshirilayotgan ishlar va yer qaʼridan oqilona foydalanish hamda qonunchilik hujjatlarida belgilangan talablarning buzilishi natijasida aniqlangan huquqbuzarliklar va ularning oqibatlari toʻgʻrisida keng jamoatchilikni xabardor qilish boʻyicha ommaviy axborot vositalarida chiqishlarni amalga oshiradi;

Vazirlik maxsus axborot tizimiga yuborilgan yer qaʼridan foydalanish qoidalarini buzish bilan bogʻliq huquqbuzarlik holatlari toʻgʻrisidagi fotosuratlar va videoyozuvlar koʻrib chiqish va xabar bergan shaxslarni pul mukofoti bilan ragʻbatlantirish ishlarini belgilangan tartibda amalga oshiradi;

l) yerosti suvlariga quduqlarni burgʻilash va suv olish inshootlarini ishlatishda qonunchilik va texnik jihatdan tartibga solish sohasidagi normativ hujjatlar talablarining buzilishi holatlari ustidan taʼsirchan nazorat choralarini koʻrib borish yoʻnalishi boʻyicha:

yerosti suvlarini, shu jumladan, shifobaxsh va ichimlik suvlarini muhofaza qilish ishlari ustidan nazoratni amalga oshiradi;

yuridik va jismoniy shaxslar tomonidan gidrogeologiya quduqlarini burgʻilash va ishlatishda normativ hujjatlar talablariga rioya etilishi ustidan nazoratni amalga oshiradi;

yerosti suvlariga quduqlarni burgʻilash ishlarini olib borishga doir huquqbuzarliklar holatlari boʻyicha tekshiruvlarni belgilangan tartibda amalga oshiradi;

yerosti suvlariga quduq burgʻilash, yerosti suvlaridan maxsus foydalanish yoki ularni maxsus isteʼmol qilish boʻyicha nazoratni olib boradi.

Inspeksiya oʻziga yuklangan vazifalar va funksiyalarni bevosita hamda oʻzining tarkibiy boshqarmalari orqali amalga oshiradi.

17. Inspeksiya markaziy apparatining asosiy vazifalari uning tizimidagi tashkilotlar bilan birgalikda Inspeksiyaga yuklangan vazifa va funksiyalarning samarali bajarilishini tashkil etish hamda taʼminlash hisoblanadi.

18. Inspeksiyaning markaziy apparati unga yuklangan asosiy vazifalarga muvofiq quyidagi funksiyalarni amalga oshiradi:

Inspeksiya va uning rahbariyati faoliyatini tashkiliy va axborot-tahlil jihatidan taʼminlaydi;

Inspeksiya va uning tizimidagi tashkilotlar tomonidan Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining Farmonlari, qarorlari va farmoyishlariga, Vazirlar Mahkamasining qarorlariga va farmoyishlariga shuningdek, mazkur Nizomga va boshqa qonunchilik hujjatlariga muvofiq talablarning bajarilishida tizimli nazoratni taʼminlaydi;

Inspeksiya tomonidan oʻzining vakolatiga kiradigan masalalar boʻyicha Vazirlar Mahkamasi, Oʻzbekiston Respublikasi Prezidenti Administratsiyasiga kiritiladigan hujjatlarning sifatli hamda oʻz vaqtida ishlab chiqilishini va ularning iqtisodiy va huquqiy ekspertizadan oʻtkazilishini tashkil etadi;

Inspeksiya va uning tizimidagi tashkilotlar faoliyatiga belgilangan tartibda rahbarlik qiladi, ularning faoliyatini muvofiqlashtiradi va nazorat qiladi;

Inspeksiyaning faoliyati, shu jumladan, norma ijodkorligi sohasidagi faoliyati huquqiy taʼminlanishini tashkil etadi;

Inspeksiyaning vakolatiga tegishli operativ, tashkiliy, kadrlar, moliya, ishlab chiqarish-xoʻjalik masalalari va boshqa masalalarni hal etadi.

19. Inspeksiya oʻziga yuklangan vazifalar va funksiyalarni amalga oshirishda quyidagi huquqlarga ega:

normativ-huquqiy hujjatlar loyihalarini, shuningdek, Inspeksiyaga yuklangan vazifalar va funksiyalarni bajarish bilan bogʻliq boshqa hujjatlarni ishlab chiqish va belgilangan tartibda Vazirlikka kiritish, Inspeksiya vakolatiga kiruvchi masalalar boʻyicha qonunchilik hujjatlari va texnik jihatdan tartibga solish sohasidagi normativ hujjatlar loyihalarini koʻrib chiqish, muvofiqlashtirishda ishtirok etish hamda ular yuzasidan xulosalar berish;

Inspeksiya vakolatiga kiradigan masalalarni hal etish uchun zarur boʻlgan axborotni davlat organlari, xoʻjalik birlashmalari va mahalliy ijro etuvchi hokimiyat organlaridan soʻrab olish;

Inspeksiya vakolatiga kiradigan masalalar boʻyicha zarur maʼlumotlarni, shu jumladan, statistika axborotlarini davlat statistika organlaridan, Oʻzbekiston Texnik jihatdan tartibga solish agentligi va Vazirlar Mahkamasi huzuridagi Sanoat, radiatsiya va yadro xavfsizligi qoʻmitasidan standartlar va reglamentlarni elektron shaklda bepul olish;

Inspeksiya va unga idoraviy mansub tuzilmalarning davlat mulkini bir boʻlinmadan boshqasiga oʻzining tashkiliy tuzilmasi doirasida operativ boshqaruv huquqi asosida Oʻzbekiston Respublikasi Davlat aktivlarini boshqarish agentligi bilan kelishgan holda berish;

Inspeksiya vakolatiga kiradigan masalalar boʻyicha takliflarni Vazirlik, respublika ijro etuvchi hokimiyat organlari va xoʻjalik birlashmalari, mahalliy ijro etuvchi hokimiyat organlariga koʻrib chiqish uchun kiritish;

Inspeksiya xodimlarini Inspeksiyaning budjetdan tashqari mablagʻlar hisobidan moddiy ragʻbatlantirish;

Inspeksiya vakolatiga kiradigan masalalar boʻyicha xalqaro darajada Oʻzbekiston Respublikasi manfaatlarini ifodalash;

Inspeksiya vakolatiga kiradigan masalalar boʻyicha idoralararo tusdagi xalqaro shartnomalarni tuzishda ishtirok etish;

Inspeksiya nazorati ostidagi obyektlarga toʻsiqsiz kirish;

togʻ-kon, neft va gaz sohalarida geologiya-qidiruv ishlari, quduqlarini burgʻilash (qurish), ularni joriy va mukammal taʼmirlash, sinash va oʻzlashtirish, xomashyosini qazib olish, geologiya hamda yer qaʼridan foydalanish, portlatish ishlari va portlovchi materiallarning aylanmasi sohalarida sanoat xavfsizligi talablarining nazoratini amalga oshirish maqsadida davlat organlari, xoʻjalik birlashmalari va mahalliy ijro etuvchi hokimiyat organlari, maxfiy rejimdagi obyektlar, shuningdek, idoraviy mansubligi va mulkchilik shaklidan qatʼi nazar, yuridik va jismoniy shaxslarning hududlarida belgilangan tartibda boʻlish;

Inspeksiya nazorati ostidagi obyektlarda qonunchilik talablariga rioya etilishini belgilangan tartibda nazorat qilish (tekshirish);

nazorat ostidagi obyektlarda yer qaʼridan foydalanish va sanoat xavfsizligi talablari buzilgan holda olib borilayotgan yoki avariya va baxtsiz hodisalar yuzaga keltirishi mumkin boʻlgan ishlarni toʻxtatib turish, shuningdek, odamlarning hayoti xavf ostida qolganda yoki avariya holatlari yuzaga kelganda ularni ish joylaridan olib chiqishda ishtirok etish;

oʻz vakolatlari doirasida qonunchilik hujjatlari va texnik jihatdan tartibga solish sohasidagi normativ hujjatlar talablarini buzganlik uchun Inspeksiya nazorati ostidagi obyektlarning, shu jumladan, tadbirkorlik subyektlarining mansabdor shaxslari va jismoniy shaxslarni qonunchilikda belgilangan tartibda maʼmuriy javobgarlikka tortish hamda boshqa organlarga ularning vakolatlariga kiruvchi masalalar boʻycha jazo choralarini koʻrish yuzasidan taqdimnomalarni kiritish;

nazorat ostidagi obyektlarda oʻtkazilgan tekshiruvlar natijalari boʻyicha aybdor shaxslarni maʼmuriy va jinoiy javobgarlikka tortish choralarini koʻrish uchun materiallarni huquqni muhofaza qilish organlariga yuborish;

Inspeksiya nazorati ostidagi obyektlarga ega boʻlgan vazirliklar, qoʻmitalar, idoralar, xoʻjalik birlashmalari rahbarlariga sanoat xavfsizligi sohasidagi tegishli yoʻnalishlarda aniqlangan buzilishlarini bartaraf etish toʻgʻrisida ijro etilishi majburiy boʻlgan koʻrsatmalar berish;

Inspeksiya nazorati ostidagi obyektlar rahbarlari va xodimlarining yer qaʼridan foydalanish va ularni muhofaza qilish, sanoat xavfsizligi, portlovchi materiallarning aylanmasi va portlatish ishlaridagi xavfsizlik qoidalari va normalarini, texnologik reglamentlarni va tegishli yoʻriqnomalarni bilishlarini tekshirish, shu jumladan, kadrlarni tayyorlovchi va qayta tayyorlovchi xodimlarning imtihonlarida qatnashish va bilimini tekshirish;

nazorat ostidagi ishlab chiqarish obyektlari uchun xodimlarni tayyorlash boʻyicha kurslar, shuningdek, kon ishlari va portlatish ishlarini bajarish va rahbarlik qilish huquqiga ega mutaxassislarni tayyorlash boʻyicha kurslarni tashkil etish, portlatish va boshqa alohida xavfli ishlarni bajarish uchun tayyorgarlikdan oʻtgan shaxslarga beriladigan tegishli guvohnomalarni tasdiqlash;

kon ishlari va portlatish ishlariga texnik jihatdan rahbarlik qilish va ularni bajarish huquqini beruvchi tegishli hujjatlar mavjudligini, xavflilik darajasi yuqori boʻlgan ishlarning bajarilishida maxsus belgilangan talablarga rioya etilishini tekshirish;

Inspeksiyaning vakolatiga kiradigan masalalar boʻyicha xavfli ishlab chiqarish obyektlaridan foydalanuvchi tashkilotlar rahbarlarining hisobotlarini eshitish;

Inspeksiyaning nazorat ostidagi obyektlarda sanoat xavfsizligi ekspertizasini oʻtkazish huquqiga ega ekspert tashkilotlarining akkreditatsiya attestatining amal qilishini belgilangan tartibda toʻxtatib qoʻyish, tugatish yoki bekor qilish boʻyicha vakolatli organga takliflarni kiritish;

Inspeksiyaning vakolatiga kiruvchi yoʻnalishlarda faoliyatning ayrim turlarini amalga oshirish huquqini beruvchi litsenziyalarning, ruxsat berish xususiyatiga ega hujjatlarning amal qilishini belgilangan tartibda toʻxtatib qoʻyish, tugatish yoki bekor qilish yuzasidan amaliy choralarni koʻrish;

yer qaʼridan foydalanishda marksheyderlik oʻlchovlarini amalga oshiradigan tashkilotlarni joyiga chiqib monitoring qilish orqali qonunchilik hujjatlari buzilishi holatlari boʻyicha faoliyatni bekor qilish yuzasidan taqdimnoma kiritish;

nazorat ostidagi obyektlar, vazirliklar, qoʻmitalar, idoralar, xoʻjalik birlashmalari, mahalliy davlat hokimiyati organlariga qoidalar, yoʻriqnomalar va boshqa normativ hujjatlar talablarini buzayotgan mansabdor shaxslarning mehnat shartnomasini toʻxtatish, intizomiy jazo berish yoki ishlarga texnik rahbarlik qilish huquqidan bir yilgacha boʻlgan muddatda mahrum qilish toʻgʻrisida taqdimnomalar kiritish;

sanoat xavfsizligi va yer qaʼrini muhofaza qilish sohasini raqamlashtirish orqali natijadorlikka erishish, shaffof va korrupsiyadan xoli samarali tizimni joriy etish;

Inspeksiyaning vakolatiga kiradigan masalalar boʻyicha avariyalarning, ishlab chiqarish jarohati holatlarining sabablarini belgilangan tartibda tekshirish va tekshirish natijalari boʻyicha bajarilishi majburiy boʻlgan qarorlar qabul qilish;

zarurat boʻlganda tashkilotlar tomonidan uskunalar va materiallarni nazorat tartibida sinashni, ishchi va atrof tabiiy muhit tahlilini, loyiha va loyiha-konstruktorlik yechimlarining mustaqil ekspertizasini tayinlash;

ehtiyot qismlar tayyorlovchi zavodlarda va taʼmirlash korxonalarida sanoatning nazorat ostidagi tarmoqlari uchun uskunalarning sanoat xavfsizligi talablariga muvofiqligini tekshirish, ularning sanoat xavfsizligi standartlari, qoidalari va normalari talablariga va tasdiqlangan loyiha yechimlariga muvofiq boʻlmagan hollarda ishlab chiqarilishini belgilangan tartibda toʻxtatib qoʻyish;

Inspeksiya vakolatiga kiradigan masalalar boʻyicha vazirliklar, qoʻmitalar, idoralar, xoʻjalik birlashmalari, mahalliy davlat hokimiyati organlari, tashkilotlardan zarur axborotni olish;

Inspeksiya vakolatiga kiradigan masalalar boʻyicha yuridik va jismoniy shaxslarga nisbatan moliyaviy sanksiyalarni qoʻllash yuzasidan sudga murojaat qilish;

mansabdor va jismoniy shaxslarda ishlarga texnik rahbarlik qilish va ularni bajarish huquqini beradigan tegishli hujjatlar mavjudligini, xavfliligi yuqoriligi bilan bogʻliq ishlar uchun maxsus belgilangan talablarga rioya qilinishini tekshirish;

vazirliklar, idoralar, mahalliy ijro etuvchi hokimiyat organlari va boshqa tashkilotlar bilan kelishuv boʻyicha ularning mutaxassislarini ishlab chiqarishlarning, obyektlar va ishlarning xavfsizligi bilan bogʻliq mustaqil ekspertizalar oʻtkazishni tatbiq etish va ishlanmalar uchun shartnoma asosida jalb etish;

Inspeksiya qonunchilik hujjatlariga muvofiq boshqa huquqlarga ham ega boʻladi.

Inspeksiyaning davlat inspektorlari tomonidan oʻz majburiyatlari bajarilishida nazorat ostidagi obyektlar ularni xizmat xonalari, internet va aloqa vositalari, navbatchi maxsus kiyim-bosh va himoya vositalari, transport bilan taʼminlaydilar va hududiy boshqarmalarning ularga doimiy biriktirilgan inspektorlariga esa kommunal xizmatlar koʻrsatiladigan, internet va telefon aloqasi bor boʻlgan idoraviy turar joy berilishida koʻmaklashadilar, shuningdek, idoraviy bolalar maktabgacha va sanatoriy-kurort muassasalaridan joy beradilar, tibbiy xizmat koʻrsatish va ijtimoiy-maishiy taʼminlash masalalarini hal etadilar.

20. Inspeksiya:

Inspeksiyaga yuklangan vazifa va funksiyalarning samarali bajarilishi, shuningdek, togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, xomashyoning qazib olinishini, konchilikni, qattiq foydali qazilmalarning qayta ishlanishini hamda portlatish ishlarini amalga oshirishda sanoat xavfsizligi talablariga rioya etilishini, shuningdek, yerosti suvlaridan oqilona foydalanilish sohasidagi davlat siyosatini amalga oshirish;

Inspeksiyaning faoliyati bilan bogʻliq boʻlgan prognoz koʻrsatkichlarga erishishni soʻzsiz taʼminlash;

Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Inspeksiya tomonidan qabul qilinadigan buyruqlar amalga oshirilishining sifati, pirovard natijalari va oqibatlari;

togʻ-kon tarmogʻi, geologiya hamda yer qaʼridan foydalanish sohasida, shu jumladan, neft-gaz tarmogʻida geologiya-qidiruv ishlarini, xomashyoning qazib olinishini, konchilikni, qattiq foydali qazilmalarning qayta ishlanishini hamda portlatish ishlarini amalga oshirishda sanoat xavfsizligi talablariga rioya etilishini, shuningdek, yerosti suvlaridan oqilona foydalanilish sohasini rivojlantirish, shuningdek, koʻrsatilgan sohalarda hududlarni ijtimoiy-iqtisodiy rivojlantirish va ulardagi muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa hujjatlarning samarali amalga oshirilishi;

oʻz vakolati doirasida fuqarolar va tadbirkorlik subyektlarining qonuniy huquq va manfaatlari himoya qilinishi va ularga rioya etilishi taʼminlanishi uchun javob beradi.

21. Quyidagilar Inspeksiya boshligʻining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

Inspeksiya faoliyatiga umumiy rahbarlik qilish va nazorat qilish, Oʻzbekiston Respublikasi Prezidenti va Vazirlar Mahkamasi hujjatlari va topshiriqlari, Vazirlik buyruqlari va boshqa qonunchilik hujjatlari bilan Inspeksiyaga yuklangan vazifalar va funksiyalar bajarilishini tashkil etish;

ushbu Nizomga muvofiq sanoat xavfsizligi boʻyicha texnik jihatdan tartibga solish, shuningdek, sanoat xavfsizligini taʼminlash, yer qaʼridan foydalanishda ishlarni xavfsiz yuritish sohasida profilaktik chora-tadbirlarni ishlab chiqish va amalga oshirish sohasida yuridik va jismoniy shaxslarning qonunchilik hujjatlariga rioya etishi ustidan davlat nazoratini taʼminlash boʻyicha Inspeksiya faoliyatini tashkil etish va muvofiqlashtirish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari bilan tasdiqlangan Inspeksiya faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

Inspeksiya nazorati ostidagi obyektlarda roʻy berishi mumkin boʻlgan avariyalar, noxush va baxtsiz hodisalardan ogohlantirish va ularning oldini olish boʻyicha chora-tadbirlarni kelishish va qabul qilish;

Inspeksiya faoliyati sohasiga kiradigan masalalar boʻyicha Oʻzbekiston Respublikasi Prezidenti Administratsiyasi boʻlinmalari, Oʻzbekiston Respublikasi Oliy Majlisi palatalari va Vazirlar Mahkamasining tarkibiy boʻlinmalari, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida hamda Vazirlik tomonidan belgilangan masalalarni koʻrib chiqishda ishtirok etish;

Inspeksiya rahbarlari va xodimlari xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi, Oʻzbekiston Respublikasining Bosh vaziri va uning oʻrinbosarlari topshiriqlarini bajarish;

oʻz oʻrinbosarlari vakolatlarini belgilash, ular oʻrtasida vazifalarni taqsimlash, Inspeksiyaning boshqa mansabdor shaxslari vakolatlarini belgilash, Inspeksiya faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy masʼuliyati darajasini belgilash;

Inspeksiya faoliyatining rejalashtirilishini tashkil etish, yillik, yarim yillik ish rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari ijrosini tashkil etish va monitoring olib borishning amaliy tizimini yaratish, Inspeksiya faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida” 2021-yil 31-maydagi PQ-5132-son va “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat boshqaruvi organlari va boshqa tashkilotlar, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarorlariga muvofiq Inspeksiya hududiy boshqarmalari, kon-texnika inspeksiyalari va HKQQ rahbarlarining shaxsiy masʼuliyatini oshirish choralarini koʻrish;

Inspeksiya tarkibiy boʻlinmalari xodimlarini belgilangan tartibda lavozimga tayinlash va lavozimdan ozod qilish;

Inspeksiya xodimlarini tayyorlash, qayta tayyorlash, ularning malakasini oshirish va attestatsiyadan oʻtkazish, shuningdek, kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Inspeksiyaning kadrlar zaxirasini shakllantirish;

Inspeksiyaga ishga qabul qilinayotgan xodimlarning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash;

“Normativ-huquqiy hujjatlar toʻgʻrisida”gi, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasining qonunlariga va boshqa qonunchilik hujjatlariga muvofiq Inspeksiya faoliyatiga aloqador qonunchilik hujjatlari loyihalarini tayyorlashni tashkil etish;

Inspeksiya rahbarlari va xodimlari xizmat safarlarini qonunchilik hujjatlari talablariga muvofiq tashkil etish, xizmat safarlarining asoslanganligi, natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

oʻz oʻrinbosarlari hamda tarkibiy boʻlinmalar rahbarlari faoliyati natijadorligini muntazam tanqidiy tahlil qilish, ularning shaxsiy hisobotlarini eshitish va yakunlari boʻyicha zarur choralar koʻrish;

Inspeksiya xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishining maqsadga muvofiqligiga doir masalalarni koʻrib chiqish;

Inspeksiya xodimlari tomonidan Odob-axloq qoidalari talablariga rioya etilishini taʼminlash;

“Korrupsiyaga qarshi kurashish toʻgʻrisida”gi hamda “Manfaatlar toʻqnashuvi toʻgʻrisida”gi Oʻzbekiston Respublikasining qonunlari talablariga muvofiq Inspeksiya tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

Inspeksiya hamda uning tarkibiy boʻlinmalari ishini tashkil etishning zamonaviy shakllari joriy etilishini taʼminlash;

HKQQning avariyalarda odamlarni qutqarish, yuzaga kelayotgan avariyalarni lokalizatsiya qilish va oqibatlarini bartaraf etishga hamda korxonalarda avariya-texnik ishlarni bajarishga tayyorligini taʼminlash boʻyicha HKQQ ustidan nazorat qilishni tashkil etish;

aholi va tadbirkorlik subyektlari bilan hamkorlik qilishda, shu jumladan, “yagona darcha” prinsipini joriy etish orqali davlat xizmatlari sifati va samaradorligini hamda ulardan erkin foydalanish hamda Oʻzbekiston Respublikasining “Elektron hukumat toʻgʻrisida”gi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Inspeksiya xodimlari va rahbarlarining faol ishtirok etishini tashkil etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan tushgan murojaatlari oʻz vaqtida va toʻliq koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

markaziy apparat, hududiy boshqarmalar va kon-texnika inspeksiyalari tuzilmasiga zarurat boʻlganda boshqaruv xodimlarining cheklangan soni va mehnatga haq toʻlash fondi doirasida oʻzgartirishlar kiritish;

Inspeksiyaning markaziy apparati, hududiy boshqarmalari va kon-texnika inspeksiyalari toʻgʻrisidagi nizomlarni belgilangan tartibda tasdiqlash;

Inspeksiya tarkibiy boʻlinmalarning xodimlarini belgilangan tartibda lavozimga tayinlash va lavozimdan ozod qilish;

ushbu Nizomda belgilangan sohalar boʻyicha profilaktika chora-tadbirlarini ishlab chiqish va amalga oshirish sohalarida barcha jismoniy va yuridik shaxslarning qonunchilik hujjatlari va normativ hujjatlarga rioya qilishi ustidan davlat nazoratini taʼminlash boʻyicha Inspeksiya faoliyatining asosiy yoʻnalishlarini tashkil etish va muvofiqlashtirish;

Inspeksiyani moddiy-texnik taʼminlash ishlarini amalga oshirish;

mehnat va ijro intizomini oshirish, kadrlarni joy-joyiga qoʻyishni taʼminlash, shuningdek, xodimlarga yuklangan vazifalarni bajarish boʻyicha ularning shaxsiy masʼuliyati boʻyicha kechiktirib boʻlmaydigan choralar koʻrish;

Inspeksiya boshligi qonunchilik hujjatlariga muvofiq boshqa vakolatlarni ham amalga oshirishi mumkin.

22. Quyidagilar Inspeksiya boshligi oʻrinbosarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

Inspeksiya boshligi vaqtincha boʻlmaganda, tegishli buyruq asosida uning vazifalarini bajarish;

Inspeksiyaning mutasaddilik qilinadigan tarkibiy boʻlinmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

Inspeksiya faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidenti va Vazirlar Mahkamasi hujjatlari va topshiriqlari bilan tasdiqlangan respublika ijro etuvchi hokimiyat organlari faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

mutasaddilik qilinadigan tarkibiy boʻlinmalar tomonidan prognoz koʻrsatkichlarga erishishni soʻzsiz taʼminlash choralarini koʻrish, boʻlinmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

mutasaddilik qilinadigan tarkibiy boʻlinmalar rahbarlarining yillik va yarim yillik rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Vazirlar Mahkamasining hujjatlari va topshiriqlari ijrosini taʼminlash, Inspeksiyaning mutasaddilik qilinadigan tarkibiy boʻlinmalarida ijro intizomi boʻyicha kompleks amaliy chora-tadbirlarni amalga oshirish, shuningdek, qonunchilik hujjatlariga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish choralarini koʻrish;

Ilmiy-texnik kengash qarorlari, Inspeksiya boshligining buyruqlari va topshiriqlarini oʻz vaqtida va sifatli bajarilishini taʼminlash;

mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha Inspeksiya boshligiga takliflar taqdim etish, ularning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish choralarini koʻrish, mutasaddilik qilinadigan boʻlinmalarda kadrlar zaxirasini shakllantirish;

normativ-huquqiy hujjatlar loyihalari mutasaddilik qilinadigan tarkibiy boʻlinmalar tomonidan sifatli va oʻz vaqtida ishlab chiqilishini tashkil etish, Inspeksiyaning tarkibiy boʻlinmalarida tayyorlangan hujjatlar loyihalarini koʻrib chiqish va ular keyinchalik Inspeksiya boshligʻi tomonidan koʻrib chiqilishi, imzolanishi uchun kelishish;

Inspeksiyaga taqdim etilgan normativ-huquqiy hujjatlar loyihalarini toʻliq va har tomonlama koʻrib chiqish, ular boʻyicha vakolatlari doirasida takliflar tayyorlash;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

mutasaddilik qilinadigan tarkibiy boʻlinmalar rahbarlari va xodimlari faoliyati samaradorligini muntazam tanqidiy tahlil qilish, majlislarda ularning shaxsiy hisobotlarini eshitish va yakunlari boʻyicha zarur choralar koʻrish;

faoliyat sohasiga tegishli masalalar boʻyicha Inspeksiya faoliyatini takomillashtirishga doir amaliy choralar koʻrish, qonunchilik hujjatlarini takomillashtirish boʻyicha takliflar ishlab chiqish va ularni Inspeksiya boshligʻiga kiritish;

Inspeksiya xodimlarining Odob-axloq qoidalari talablariga, mutasaddilik qilinadigan tarkibiy boʻlinmalar rahbarlari va xodimlarining ushbu qoidalarga rioya etishini taʼminlash;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi hamda “Manfaatlar toʻqnashuvi toʻgʻrisida”gi Oʻzbekiston Respublikasining qonunlari talablariga muvofiq Inspeksiya tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

davlat xizmatlari samaradorligi, sifati va ulardan erkin foydalanishni oshirishga doir takliflarni Inspeksiya boshligʻiga kiritish;

qonunchilik hujjatlarida belgilangan muddatlarda va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining Oʻzbekiston Respublikasi Prezidentining Virtual qabulxonasidan tushgan murojaatlari oʻz vaqtida va toʻlaqonli koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

ushbu Nizomda belgilangan sohalarda profilaktika chora-tadbirlarini ishlab chiqish va amalga oshirish sohasida jismoniy va yuridik shaxslarning qonunchilik hujjatlari va normativ hujjatlarga rioya qilishi ustidan davlat nazoratini taʼminlash boʻyicha Inspeksiya faoliyatining asosiy yoʻnalishlarini tashkil etish va muvofiqlashtirish;

ijro intizomining holatini, Inspeksiya faoliyatini tahlil qilish boʻyicha apparat yigʻilishlarini oʻtkazish;

Inspeksiya boshligining oʻrinbosarlari qonunchilik hujjatlariga muvofiq boshqa vakolatlarni ham amalga oshirishi mumkin.

23. Kuyidagilar markaziy apparat va tarkibiy boʻlinmalari rahbarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari ijrosini tashkil etish va monitoring olib borishning amaliy tizimini yaratish, Inspeksiya faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga, “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida” 2021-yil 31-maydagi PQ-5132-son va “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat boshqaruvi organlari va boshqa tashkilotlar, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarorlariga muvofiq shaxsiy masʼuliyatini oshirish choralarni koʻrish;

tarkibiy boʻlinmalar faoliyatiga bevosita rahbarlik qilish, rejalashtirish va nazorat qilish, oʻz oʻrinbosarining vazifalarini belgilash hamda ushbu boʻlinmalarga yuklangan vazifalar va funksiyalar bajarilishini tashkil etish;

tarkibiy boʻlinmalar faoliyatini oʻz vakolatlari doirasida muvofiqlashtirish;

ushbu Nizomda belgilangan sohalarda nazorat-profilaktik ishlar va boshqa tadbirlar bajarilishini tizimli tahlil qilish va tarkibiy boʻlinmalar tomonidan koʻrsatib oʻtilgan sohalarda baxtsiz hodisalar va avariyalarning oldini olishga va ularni qisqartirishga yoʻnaltirilgan qoʻshimcha choralar koʻrilishi boʻyicha takliflarni Inspeksiya rahbariyatiga kiritish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari ijrosini taʼminlash, Inspeksiya tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, qonunchilik hujjatlariga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish choralarini koʻrish;

Inspeksiyaning ilmiy-texnik kengashi qarorlari, Inspeksiya boshligi va uning oʻrinbosarlari buyruqlari hamda topshiriqlari oʻz vaqtida va sifatli bajarilishini taʼminlash;

xavfli ishlab chiqarish obyektlarida boʻlishi mumkin boʻlgan avariyalar, noxush va baxtsiz hodisalardan ogohlantirish va ularning oldini olish boʻyicha amaliy chora-tadbirlarni ishlab chiqish va ijrosini taʼminlash;

tarkibiy boʻlinmalarning yarim yillik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalar bajarilishini nazorat qilish va muvofiqlashtirish, ularning faoliyatiga amaliy va metodik yordam koʻrsatish;

tarkibiy boʻlinmalar faoliyatiga oid masalalar yuzasidan qonunchilik hujjatlarini takomillashtirish boʻyicha takliflarni ishlab chiqish va koʻrib chiqish uchun Inspeksiya boshligining tegishli oʻrinbosarlariga kiritish;

tarkibiy boʻlinmalarda kadrlarni tanlash va joy-joyiga qoʻyishda Inspeksiya boshligʻining oʻrinbosarlariga takliflar taqdim etish, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

tarkibiy boʻlinmalar xodimlari faoliyati samaradorligi muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur choralar koʻrish;

Inspeksiya xodimlarining Odob-axloq qoidalari talablariga rioya etishini, tarkibiy boʻlinmalar xodimlari ushbu qoidalarga rioya etishini taʼminlash;

“Korrupsiyaga qarshi kurashish toʻgʻrisida”gi hamda “Manfaatlar toʻqnashuvi toʻgʻrisida”gi Oʻzbekiston Respublikasining qonunlari talablariga muvofiq tarkibiy boʻlinmalarda korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

tegishliligicha hududiy boshqarmalar, kon-texnika inspeksiyalari va Harbiy kon-qutqaruv qismi xodimlari faoliyatining samaradorligini tizimli ravishda tahlil qilish, ularning shaxsiy hisobotlarini eshitib borish va natijalari boʻyicha zarur choralar koʻrish;

tegishliligicha hududiy boshqarmalar, kon-texnika inspeksiyalari va HKQQ xodimlarini oʻrnatilgan tartibda ragʻbatlantirish va intizomiy javobgarlikka tortish choralarini koʻrish, ularning shaxsiy masʼuliyatini oshirish boʻyicha tizimli chora-tadbirlarni amalga oshirish, shuningdek, egallab turgan lavozimlarda qolishi maqsadga muvofiqligi toʻgʻrisidagi masalalari koʻrib chiqish boʻyicha takliflar kiritish;

alohida oʻrnak koʻrsatgan xodimlarni davlat mukofotlari va idoraviy mukofotlar bilan taqdirlash toʻgʻrisidagi takliflarni Inspeksiya rahbariyatiga kiritish;

davlat xizmatlarining samaradorligi, sifati va ulardan erkin foydalanishni oshirishga doir takliflarni Inspeksiya rahbariyatiga kiritish;

jismoniy va yuridik shaxslarning murojaatlarini koʻrib chiqish, qonunchilik hujjatlarida belgilangan muddatlarda va tartibda aholi bilan toʻgʻridan-toʻgʻri va ochiq muloqotni yoʻlga qoʻyish;

Oʻzbekiston Respublikasi Prezidentining Xalq qabulxonalari va Virtual qabulxonasidan tushgan murojaatlarni oʻz vaqtida va toʻlaqonli koʻrib chiqish;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish.

Inspeksiya hududiy boshqarmalari, kon-texnika inspeksiyalari va HKQQ boshliqlari Inspeksiya boshligʻi, uning oʻrinbosarlari va Inspeksiyaning tegishli tarmoq inspeksiyalar rahbarlariga boʻysunadi.

24. Inspeksiyaga boshliq rahbarlik qiladi.

Boshliqning ikki nafar oʻrinbosari boʻladi.

Inspeksiya boshligʻi belgilangan tartibda Oʻzbekiston Respublikasi Prezidenti tomonidan lavozimga tayinlanadi va lavozimdan ozod qilinadi.

Inspeksiya boshligʻi oʻrinbosarlari Togʻ-kon sanoati va geologiya vazirining taqdimnomasiga qoʻra Oʻzbekiston Respublikasi Vazirlar Mahkamasi tomonidan, Inspeksiyaning boshqa tizim tashkilotlari rahbarlari Vazirlar Mahkamasi bilan kelishilgan holda Inspeksiya boshligʻi tomonidan lavozimga tayinlanadi va lavozimdan ozod qilinadi.

25. Inspeksiya boshligʻi togʻ-kon sanoati va geologiya sohasini nazorat qilish boʻyicha bosh davlat inspektori hisoblanadi.

Inspeksiya boshligʻi maqomi, mehnatga haq toʻlash, tibbiy va transport xizmat koʻrsatish sharoitlari boʻyicha vazir oʻrinbosariga tenglashtiriladi.

26. Inspeksiya boshligʻining oʻrinbosarlari:

geologiya sohasini nazorat qilish boʻyicha;

togʻ-kon sanoati sohasini nazorat qilish boʻyicha bosh davlat inspektorining oʻrinbosarlari hisoblanadi.

Inspeksiya boshligʻi boʻlmagan vaqtda uning vakolatlarini bajaradi.

27. Inspeksiyaning tarkibiy boʻlinmalari va HKQQga Inspeksiya boshligʻi tomonidan lavozimga tayinlanadigan va lavozimdan ozod etiladigan rahbarlar boshchilik qiladi.

28. Inspeksiyaning hududiy boshqarmalari (boʻlimlar) va idoraviy mansub tashkilotlariga Inspeksiya boshligʻi tomonidan lavozimga tayinlanadigan va lavozimdan ozod etiladigan rahbarlar boshchilik qiladi.

29. Inspeksiyaning hududiy boshqarmalari (boʻlimlar) va idoraviy mansub tashkilotlari rahbarlari:

ularga yuklangan vazifalar va funksiyalarning bajarilishi va javobgarligi sohalari boʻyicha:

oʻz funksional vazifalarining sifatli bajarilishi uchun shaxsan javob beradilar.

Inspeksiyaning tarkibiy tuzilmalari oʻz faoliyatini Inspeksiya boshligʻi tomonidan tasdiqlanadigan nizomlarga muvofiq amalga oshiradi.

30. Inspeksiya oʻz faoliyatida respublika va mahalliy ijro etuvchi hokimiyat organlari va boshqa tashkilotlar bilan hamkorlik qiladi.

31. Hududiy boshqarmalar va kon-texnika inspeksiyalari oʻz vakolatlari doirasida boshqa davlat organlari va xoʻjalik birlashmalarining hududiy organlari, mahalliy ijro etuvchi hokimiyat organlari va boshqa tashkilotlar bilan hamkorlik qiladi.

32. Inspeksiya boshligi:

Inspeksiyaga yuklangan vazifalar va funksiyalar bajarilishi;

ushbu Nizomda koʻrsatilgan oʻz funksional vazifalarining sifatli bajarilishi uchun shaxsan javobgardir.

33. Inspeksiya boshligi oʻrinbosarlari:

mutasaddilik qilinadigan yoʻnalish va tarkibiy boʻlinmalarda Inspeksiyaga yuklangan vazifalar va funksiyalarning bajarilishi;

ushbu Nizomda koʻrsatilgan oʻz funksional vazifalarining sifatli bajarilishi uchun shaxsan javobgardir;

Inspeksiya boshligi boʻlmagan vaqtda uning vakolatlarini bajaradi.

34. Inspeksiya tarkibiy boʻlinmalari rahbarlari:

tegishli tarkibiy boʻlinmalarga yuklangan vazifalar va funksiyalarning bajarilishi;

ushbu Nizomda koʻrsatilgan oʻz funksional vazifalarining sifatli bajarilishi uchun shaxsan javobgardir.

35. Inspeksiya faoliyatining samaradorligi muntazam baholanadi.

36. Inspeksiya faoliyatining samaradorligi va natijadorligini baholash tegishli mezonlar va ish indikatorlarga asoslanadi.

37. Inspeksiya faoliyatining samaradorligi va natijadorligini baholash yakunlari boʻyicha:

Inspeksiya, uning hududiy boshqarmalari va kon-texnika inspeksiyalari rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Inspeksiya faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

38. Inspeksiya faoliyatining samaradorligi va natijadorligini baholash tartibi va uslubi Vazirlar Mahkamasi tomonidan belgilanadi.

39. Inspeksiya boshligi va uning oʻrinbosarlari faoliyati boʻyicha samaradorlik koʻrsatkichlari qonunchilik hujjatlari bilan belgilanadi.

40. Inspeksiyaning tekshirish huquqiga ega inspektorlari ularning sohaga oid bilimlarini tekshirish maqsadida uch yilda bir marotaba attestatsiyadan oʻtkaziladi.

41. Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining vakolatiga kiradigan muhim masalalarni koʻrib chiqish va tavsiyalar berish Kengashi (keyingi oʻrinlarda — Kengash) Inspeksiya huzurida faoliyat yuritadigan maslahat organi hisoblanadi.

Kengash Inspeksiya boshligʻi, uning oʻrinbosarlari hamda tarkibiy boʻlinmalari rahbarlaridan iborat tarkibda tuziladi.

Inspeksiya boshligʻi lavozimiga koʻra Kengash raisi hisoblanadi.

Kengash aʼzolarining soni va shaxsiy tarkibi Inspeksiya boshligʻining taqdimnomasiga binoan Vazirlik tomonidan tasdiqlanadi.

42. Kengash quyidagi vazifalarni amalga oshiradi:

yer qaʼrini geologik oʻrganishda undan foydalanish va muhofaza qilish, foydali qazilmalarni (shu jumladan, chuchuk, mineral, termal va sanoat yerosti suvlarini) qazib olish, mineral xomashyoni qayta ishlash, shuningdek, kon ishlarini geologiya-marksheyderlik taʼminlash sohalarida qonunchilik hujjatlari va normativ hujjatlar talablariga yuridik va jismoniy shaxslarning rioya etishi ustidan davlat nazoratini taʼminlash boʻyicha Inspeksiya faoliyatining asosiy yoʻnalishlari boʻyicha takliflarni koʻrib chiqish va tayyorlash hamda tavsiflar ishlab chiqish;

togʻ-kon, neft va gaz tarmogʻida geologiya-qidiruv ishlari, xomashyosini qazib olish, saqlash va tashish, geologiya hamda yer qaʼridan foydalanish, portlatish ishlari va portlovchi materiallarning aylanmasi sohalarida sanoat xavfsizligi, yer qaʼrini geologik oʻrganishda undan foydalanish va muhofaza qilish, foydali qazilmalarni (shu jumladan, yerosti suvlarini) qazib olish, mineral xomashyoni qayta ishlash sohalarida qonunchilik hujjatlari va normativ hujjatlar talablariga yuridik va jismoniy shaxslarning rioya etishi ustidan davlat nazoratini taʼminlash boʻyicha Inspeksiya faoliyatining asosiy yoʻnalishlarini tayyorlash va amalga oshirish;

Inspeksiya nomenklaturasiga kiruvchi lavozimlarga kadrlarni tanlash, joy-joyiga qoʻyish, tayyorlash va qayta tayyorlash boʻyicha takliflarni Inspeksiya boshligʻiga kiritish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlarida belgilangan vazifalarni amalga oshirish boʻyicha ijro intizomini mustahkamlash, ular oʻz vaqtida va sifatli bajarilishini taʼminlash uchun Inspeksiya rahbarlari va xodimlarining shaxsiy masʼuliyatini oshirish choralarini koʻrish;

mutasaddilik qilinadigan tarkibiy boʻlinmalar rahbarlari va xodimlari faoliyati samaradorligini muntazam tahlil qilib borish, kengash majlislarida ularning shaxsiy hisobotlarini eshitish hamda natijalari boʻyicha zarur chora-tadbirlar belgilash;

nazorat ostidagi obyektlarda sodir boʻlgan avariyalar, portlovchi materiallarning oʻgʻirlanishi va yoʻqolishi holatlarini, guruhiy, oʻlim, oqibati ogʻir tan jarohati bilan tugagan baxtsiz hodisalarni va boshqa masalalarni tegishli korxona rahbarlari ishtirokida koʻrib chiqish;

Kengash Inspeksiya vakolatiga tegishli boʻlgan boshqa masalalarni ham koʻrib chiqish huquqiga ega.

43. Kengash yigʻilishlariga Inspeksiya vakolatiga kiradigan masalalar boʻyicha respublika ijro etuvchi hokimiyat organlari va xoʻjalik birlashmalari, nazorat osti obyektlariga ega boʻlgan korxona va tashkilotlar rahbarlari taklif etilishi mumkin.

44. Kengash oʻz majlislarida soha faoliyatiga oid ishlar holatini doimiy ravishda muhokama qilib boradi va natijasiga koʻra respublika ijro etuvchi hokimiyat organlari va xoʻjalik birlashmalari, nazorat osti obyektlariga ega boʻlgan korxona va tashkilotlar rahbarlariga tegishli tavsiyalar beradi.

45. Kengash, agar uning yigʻilishida Kengash aʼzolari tarkibining yarmidan ortigʻi ishtirok etgan taqdirda vakolatli hisoblanadi. Koʻrib chiqilayotgan masalalar boʻyicha qaror oddiy koʻpchilik ovozi bilan qabul qilinadi.

46. Kengash qarorlari Inspeksiya boshligʻining buyruqlari bilan amalga oshiriladi. Inspeksiya boshligʻi va Kengash aʼzolari oʻrtasida kelishmovchiliklar yuz bergan taqdirda Inspeksiya boshligʻi yuzaga kelgan kelishmovchiliklar toʻgʻrisida Togʻ-kon sanoati va geologiya vazirligiga axborot bergan holda qarorni mustaqil qabul qiladi.

Kengash Vazirlik tomonidan tasdiqlanadigan nizom asosida faoliyat olib boradi.

47. Inspeksiya budjet tashkiloti hisoblanadi hamda markaziy apparat, hududiy boshqarmalar, Angren kon-texnika inspeksiyasi faoliyatini moliyalashtirish:

Oʻzbekiston Respublikasining respublika budjeti;

Inspeksiyaning budjetdan tashqari mablagʻlari:

yer qaʼridan foydalanish sohalarida belgilangan talablarni buzganlik uchun qonunchilikda belgilangan tartibda va miqdorlarda undiriladigan jarimalar summalari;

yer qaʼri foydali qazilmalaridan noqonuniy foydalanish holatlari boʻyicha aniqlangan zarar summasining belgilangan miqdoridagi ajratmalar;

sanoat xavfsizligi talablarini buzganlik uchun belgilangan tartibda va miqdorlarda undiriladigan jarimalar summalari;

xalqaro moliya institutlari va xorijiy tashkilotlarning grantlari;

qonunchilik hujjatlarida taqiqlanmagan boshqa manbalar hisobidan amalga oshiriladi.

48. Qizilqum kon-texnika inspeksiyasi “Navoiy KMK” AJ va Olmaliq kon-texnika inspeksiyasi “Olmaliq KMK” AJ tomonidan moliyalashtiriladi, jumladan, tegishli aloqa va transport vositalari hamda xodimlarni maʼmuriy binolarga joylashtiradi.

49. Inspeksiya boshqaruv xodimlarining ish haqi mehnatga haq toʻlash yagona tarif setkasi boʻyicha tarif koeffitsiyentini qoʻllagan holda, 1,8 barobar miqdorda belgilanadi.

Vazirlik xodimlari uchun belgilangan lavozim maoshiga ustamalar, ish haqiga belgilangan miqdorlarda tuman (hududiy) koeffitsiyentlari, mukofotlar, qoʻshimcha haqlar va qonunchilik hujjatlarida belgilangan boshqa qoʻshimcha toʻlovlar Inspeksiya xodimlari uchun ham tatbiq etiladi.

50. Inspeksiyaning barcha xodimlariga uzluksiz ish staji (uzoq muddat uzluksiz xizmati) uchun ustamalarni ularning umumiy mehnat faoliyatini qamrab olgan holda, ustamalar faqat asosiy ish joyi boʻyicha har oyda va xodimning lavozim maoshiga nisbatan quyidagi foizlarda hisoblanadi:

51. Inspeksiya xodimlariga Oʻzbekiston Respublikasining tegishli mintaqalarida joylashgan nazorat ostidagi tashkilotlar xodimlari uchun qonunchilik hujjatlarida belgilangan miqdorlarda ish haqiga tuman (hududiy) koeffitsiyentlariga muvofiq ustamalar toʻlanadi.

52. Inspeksiya qonunchilik hujjatlarida belgilangan tartibda qayta tashkil etiladi va tugatiladi.

53. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

1. Ushbu Nizom Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi Harbiylashtirilgan kon-qutqaruv qismi (keyingi oʻrinlarda — HKQQ) maqomi, asosiy vazifalari, funksiyalari, huquqlari, javobgarligi, faoliyatini tashkil etish tartibini belgilaydi.

2. Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining Harbiylashtirilgan kon-qutqaruv qismi ixtisoslashtirilgan davlat tashkiloti hisoblanadi va respublika hududida yerosti ishlarini olib boruvchi koʻmir, kon-ruda, geologiya-qidiruv, metallurgiya, kimyoviy korxonalarning xavfli ishlab chiqarish obyektlari va sanoatning boshqa tarmoqlarida, konchilik va boshqa ishlarni olib boruvchi xorijiy korxonalarda, shu bilan birga, yerosti inshootlarini qurish, kengaytirish, qayta qurish, foydalanish, tugatish yoki konservatsiya qilish ishlarida kon-qutqaruv (odamlarni qutqarishda tezkor va shoshilinch harakatlarni amalga oshirish, jarohatlanganlarga yordam koʻrsatish, portlash, yongin, gaz tarqalishi, koʻchkilar, toʻsatdan togʻ jinsining otilishi, suv toshqinlari kabi avariyalar va favqulodda vaziyatlar oqibatlarini qamrab olish va bartaraf qilish) ishlarini olib boradi.

3. HKQQ oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlis palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi (keyingi oʻrinlarda — Inspeksiya) buyruqlariga, shuningdek, ushbu Nizomga va boshqa qonunchilik hujjatlariga amal qiladi.

4. HKQQ respublika hududida yerosti ishlarini olib boruvchi koʻmir, kon-ruda, geologiya-qidiruv, metallurgiya, kimyoviy korxonalarning xavfli ishlab chiqarish obyektlari va sanoatning boshqa tarmoqlarida, konchilik va boshqa ishlarni olib boruvchi xorijiy korxonalarda, shu bilan birga, yerosti inshootlarini qurish, kengaytirish, qayta qurish, foydalanish, tugatish yoki konservatsiya qilish ishlarida kon-qutqaruv (odamlarni qutqarishda tezkor va shoshilinch harakatlarni amalga oshirish, jarohatlanganlarga yordam koʻrsatish, portlash, yongʻin, gaz tarqalishi, koʻchkilar, toʻsatdan togʻ jinsining otilishi, suv toshqinlari kabi avariyalar va favqulodda vaziyatlar oqibatlarini qamrab olish va bartaraf qilish) ishlari olib borilishini taʼminlashda Inspeksiya oldida javobgardir.

5. HKQQ faoliyati quyidagilar asosida amalga oshiriladi:

HKKQ avariyalar va ularni bartaraf etish ishlarini olib borishda tezkor harakatining doimiy tayyorligi;

avariya-qutqaruv va kechiktirib boʻlmas ishlarini olib borishda oʻzini oqlagan tavakkalchilik va xavfsizlikni taʼminlash;

HKQQ va uning boʻlinmalarida boshqaruvning yakkaboshchiligi;

insonlar hayotini va sogʻligʻini saqlab qolish boʻyicha vazifalarda, shuningdek, favqulodda vaziyatlar sodir boʻlganda atrof-muhitni himoya qilishda insonparvarlik va rahmdillikning ustuvorligi.

6. HKQQ yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, blankalarga va mustaqil balansga ega boʻladi.

7. HKQQ tomonidan oʻz vakolatlari doirasida beriladigan koʻrsatmalari, qabul qilingan koʻrsatmalari respublika va mahalliy ijro etuvchi hokimiyat organlari hamda yuridik va jismoniy shaxslar tomonidan bajarilishi majburiy hisoblanadi.

8. HKQQ rasmiy nomi:

a) davlat tilida:

toʻliq nomi — Oʻzbekiston Respublikasi Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasining Harbiylashtirilgan kon-qutqaruv qismi;

qisqartma nomi — HKQQ;

b) rus tilida:

toʻliq nomi — Voyenizirovannaya gorno-spasatelnaya chast Inspeksii po kontrolyu sferi gornodobivayushey promishlennosti i geologii pri Ministerstve gornodobivayushey promishlennosti i geologii Respubliki Uzbekistan;

qisqartma nomi — VGSCH;

v) ingliz tilida:

toʻliq nomi — Paramilitary mine rescue unit of the Inspectorate for control of the mining industry and geology under the Ministry of mining industry and geology of the Republic of Uzbekistan;

qisqartma nomi — PMRU.

9. HKQQ shtabi joylashgan joyi va pochta manzili: 100052, Toshkent shahri Mirzo Ulugʻbek tumani Oqqoʻrgʻon koʻchasi 16-uy.

10. HKQQ bevosita Inspeksiya boshligʻiga boʻysunadi va oʻz faoliyati yuzasidan hisobot beradi.

Davlat organlari va boshqa tashkilotlarga HKQQ xodimlariga ularning vakolatiga kirmaydigan ishlarni bajarishni yuklash taqiqlanadi.

11. Quyidagilar HKQQning asosiy vazifalari hisoblanadi:

xizmat koʻrsatilayotgan korxonalarda sodir boʻlishi mumkin boʻlgan avariyalar (kon lahmlarining amaldagi holati kutilmaganda buzilishi, kon havosi tarkibining oʻzgarishi, turli xil vositalarning, uskunalarning shikastlanishi, buning natijasida yer ostida ish olib borayotgan insonlar hayotiga xavf solishi va iqtisodiy zarar keltirishiga olib kelishi mumkin boʻlgan texnologik jarayonning uzoq vaqt buzilishi) haqida ogohlantirish boʻyicha tezkor va kechiktirib boʻlmaydigan choralarni amalga oshirish;

odamlarni qutqarish, avariya va uning oqibatlarini bartaraf etish;

nafas yoʻllarini himoya qiluvchi apparatlar va maxsus asbob-anjomlar talab etiladigan sharoitlarda texnik ishlarni bajarish.

12. HKQQ oʻziga yuklangan vazifalarga muvofiq quyidagi funksiyalarni amalga oshiradi:

a) xizmat koʻrsatilayotgan korxonalarda sodir boʻlishi mumkin boʻlgan avariyalar (kon lahmlarining amaldagi holati kutilmaganda buzilishi, kon havosi tarkibining oʻzgarishi, turli xildagi vositalarning, uskunalarning shikastlanishi, buning natijasida yer ostida ish olib borayotgan insonlar hayotiga xavf solishi va iqtisodiy zarar keltirishiga olib kelishi mumkin boʻlgan texnologik jarayonning uzoq vaqt buzilishi) haqida ogohlantirish boʻyicha tezkor va kechiktirib boʻlmaydigan choralarni amalga oshirish boʻyicha:

tasdiqlangan jadvalga muvofiq shartnoma asosida xizmat koʻrsatilayotgan korxonalarda sodir boʻlishi mumkin boʻlgan avariyalar haqida ogohlantirishga yoʻnaltirilgan profilaktika ishlarini olib borish;

favqulodda vaziyatlarda ogohlantirish va harakatlanishning davlat tizimi tomonidan yuklatilgan funksiyalaridan kelib chiquvchi obyekt darajasidagi majburiyatlarni bajarish;

xizmat koʻrsatilayotgan korxonalarda avariyalarni bartaraf etish rejasining ishlab chiqilishida ishtirok etish va kelishish;

avariyalarni bartaraf etish rejasiga muvofiq odamlarni qutqarish va kon-qutqaruv ishlarini olib borishiga tayyorgarligi holati yuzasidan monitoring yuritish;

ruda va koʻmirning (yonuvchan slanetslar) oʻz-oʻzidan yonishining boshlangʻich davrini aniqlash boʻyicha ishlarni olib borish;

xizmat koʻrsatilayotgan korxonalarda kon havosidan namuna olish va uning tarkibining sifati va changlanganligi boʻyicha tahlil qilish;

xizmat koʻrsatilayotgan korxonalarda umumshaxta depressiyasini va havoning taqsimlanishini oʻrnatish maqsadida depression va gaz oʻlchov ishlarini olib borish;

xizmat koʻrsatilayotgan korxonalar va boshqa xavfli ishlab chiqarish obyektlarida avariyalardan himoyalashga doir loyihalarni ishlab chiqishda ishtirok etish;

korxonaning yordamchi kon-qutqaruv xizmatlariga uslubiy rahbarlik qilish;

HKQQ xodimlarini tayyorlash va qayta tayyorlashni tashkillashtirish;

boshqa kon-qutqaruv, avariya-qutqaruv, shuningdek, xalqaro qutqaruv xizmatlari va tuzilmalari bilan tajriba almashishni tashkil qilish;

xizmat koʻrsatilayotgan korxonalar va boshqa xavfli ishlab chiqarish obyektlarida alohida shartnomalar boʻyicha odamlarni qutqarish va avariyalarni bartaraf etishga tayyorgarligini taʼminlashga, avariyaga qarshi himoyasini kuchaytirishga qaratilgan ishlarni bajarish;

b) odamlarni qutqarish, avariya va uning oqibatlarini bartaraf etish boʻyicha:

xizmat koʻrsatilayotgan korxonalardagi odamlarni qutqarish va koʻchirish boʻyicha kon-qutqaruv ishlarini bajarish;

jabrlanuvchilarga avariya joyida birinchi tibbiy yordam koʻrsatish, yerosti kon lahmlari sharoitida va yer ustida jonlantirish ishlarini olib borish, jabrlanuvchilarni koʻchirish;

yongʻinlarni oʻchirish, avariyalar oqibatlarini, shu jumladan, portlashlar, koʻmir, togʻ jinsi, gazning toʻsatdan otilishi, oquvchi moddalarning yorib chiqishi, kon lahmlarining koʻchishi (oʻpirilishi) va suv bosishini bartaraf qilish boʻyicha ishlarni bajarish;

avariyalarni bartaraf etish rejasiga muvofiq xizmat koʻrsatilayotgan korxonalar obyektlarida yer usti yongʻinlarini oʻchirish va avariya oqibatlarini bartaraf etish;

v) nafas yoʻllarini himoya qiluvchi apparatlar va maxsus asbob-anjomlar talab etiladigan sharoitlarda texnik ishlarni bajarish boʻyicha:

korxona ishchilari, muhandis-texnik xodimlariga konchilik ishlarini va yerosti sharoitidagi ishlarni xavfsiz olib borish usullari, avariya holatlarida xavfsiz xatti-harakatlar va shaxsiy himoya vositalaridan toʻgʻri foydalanish boʻyicha oʻquv mashgʻulotlarini tashkillashtirish;

xavfli ishlab chiqarish obyektlarida kon-qutqaruv ishlari hamda avariyalarga qarshi himoya qilish tizimlariga doir ilmiy-tadqiqot va tajriba-konstruktorlik ishlarini olib borish;

nafas yoʻllarini himoya qiluvchi apparatlar, nazorat uskunalari, avariya aloqa vositalari va boshqa maxsus asbob-anjomlardan foydalangan holda texnik ishlarni bajarish;

nafas yoʻllarini himoya qiluvchi apparatlar, nazorat uskunalari, avariya aloqa vositalari va boshqa maxsus asbob-anjomlarga texnik xizmat koʻrsatish va taʼmirlash.

13. HKQQ oʻziga yuklangan vazifalar va funksiyalarni amalga oshirishda quyidagi huquqlarga ega:

korxonalarda sodir boʻlishi mumkin boʻlgan avariyalar haqida ogohlantirish maqsadida xizmat koʻrsatilayotgan obyektlarda profilaktika tadbirlarini olib borish;

xavfli ishlab chiqarish obyektlarida avariyalarga qarshi himoya qilishda yoʻl qoʻyilgan qoidabuzarlik holatlari haqida korxonalar rahbariyatiga, joylardagi sanoat xavfsizligi sohasidagi davlat nazoratini amalga oshirish boʻyicha vakolatli davlat organlariga axborot yuborish;

xizmat koʻrsatilayotgan korxonalarda sodir boʻlgan avariyalarning sabablarini oʻrganish boʻyicha komissiyalar faoliyatida ishtirok etish;

xizmat koʻrsatilayotgan korxona va obyektlar hududiga avariya va favqulodda vaziyatlarni bartaraf qilish bilan bogʻliq ishlarni olib borish uchun toʻsiqlarsiz kirish;

avariyalarni bartaraf etish va favqulodda vaziyatlar boʻyicha ish joylariga borishda toʻsiqlarsiz harakatlanish, yonilgʻi-moylash materiallari bilan birinchi navbatda taʼminlash, texnik xizmat koʻrsatish shoxobchalarida HKQQ transport vositalarini birinchi navbatda taʼmirlash;

xizmat koʻrsatilayotgan korxona va obyektlarda avariyalarni bartaraf etish ishlariga masʼul mansabdor shaxslardan avariya va uning oqibatlarini bartaraf etishda maslahatlar va maxsus ishlarni bajarish uchun tegishli mutaxassislar jalb etilishini talab qilish;

xizmat koʻrsatilayotgan korxona va obyektlarda kon-qutqaruv ishlarini olib borish uchun zarur boʻlgan maʼlumotlarni mahalliy ijro hokimiyati organlari, fuqarolarning oʻzini oʻzi boshqarish organlari va korxonalardan olish;

xizmat koʻrsatilayotgan korxona va obyektlarda kon-qutqaruv asbob-uskunalari, avtotransport vositalari, HKQQ boʻlinmalarining joylashishi va ularni saqlash uchun xizmat binolari bilan taʼminlashni talab qilish, shuningdek, xizmat koʻrsatilayotgan korxonalar jamoa shartnomalarida belgilangan tartibda korxonaga tegishli maktabgacha taʼlim muassasasi, bolalar sogʻlomlashtirish lagerlari, sanatoriylar, profilaktoriylardan foydalanish;

bajargan ishlari yuzasidan qonunchilik hujjatlariga va tegishli shartnomalarda belgilangan moliyaviy tushumlarni olish;

HKQQ qonunchilik hujjatlariga muvofiq boshqa huquqlarga ham ega boʻladi.

14. HKQQ mansabdor shaxslari oʻz xizmat vazifalarini lozim darajada bajarmagani uchun belgilangan tartibda javobgardirlar. HKQQ xodimlarining javobgarligi lavozim yoʻriqnomalari bilan belgilanadi.

HKQQ shtabi boshligʻining lavozim yoʻriqnomasi Inspeksiya boshligi tomonidan tasdiqlanadi.

15. Oʻn sakkiz yoshga toʻlgan, qutqaruvchilarni tayyorlash dasturi boʻyicha taʼlim olgan hamda favqulodda vaziyatlarning oldini olish va ularni bartaraf etish ishlarini olib borish uchun belgilangan tartibda attestatsiyadan oʻtgan shaxslarga HKQQ vazifalarini bajarishga ruxsat beriladi.

Attestatsiyadan oʻtmagan yoki tekshiruvlar davomida favqulodda vaziyatlarda tezkor harakat qilishga hamda ularni bartaraf etish ishlarini oʻtkazishga shayligini tasdiqlay olmagan shaxslarga HKQQ tarkibida xizmat qilishiga yoʻl qoʻyilmaydi hamda ular qutqaruv ishlarini olib borishga jalb etilmaydi.

16. Quyidagilar HKQQ shtab boshligining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari, Inspeksiya buyruqlari va boshqa qonunchilik hujjatlari bilan yuklangan vazifalar va funksiyalar bajarilishini vakolat doirasida tashkil etish;

shartnoma asosida xizmat koʻrsatilayotgan korxona va obyektlarda sodir boʻlishi mumkin boʻlgan avariyalar haqida ogohlantirish boʻyicha tezkor va kechiktirib boʻlmas choralarning amalga oshirilishini taʼminlash;

odamlarni qutqarish, avariya va uning oqibatlari bartaraf qilinishini taʼminlash;

nafas yoʻllarini himoya qiluvchi apparatlar va maxsus asbob-anjomlar talab etiladigan sharoitlarda texnik ishlarning bajarilishini taʼminlash;

HKQQ boʻlinmalari tomonidan moddiy-texnik baza mavjudligi va ishchi holatda boʻlishi taʼminlanishini nazorat qilish;

HKQQ boʻlinmalari xodimlarining oʻz vazifalarini bajarishga shay holatda ekanligi taʼminlanishini nazorat qilish;

HKQQ faoliyati rejalashtirilishini tashkil etish, HKQQ shtabi ish rejalarini tasdiqlash uchun Inspeksiyaga kiritish, ularning bajarilishi ustidan nazoratni taʼminlash;

HKQQ xodimlarini tizimli tayyorlash, qayta tayyorlash va malakasini oshirishni tashkil etish, ularning samarali faoliyati uchun zarur shart-sharoitlar yaratish;

HKQQ xodimlari xizmat safarlarini qonunchilik hujjatlari talablariga toʻliq muvofiq tashkil etish, xizmat safarlarining asoslanganligi, samaradorligini, safar uchun ajratiladigan mablagʻlardan maqsadli va oqilona foydalanishni taʼminlash;

oʻz oʻrinbosari faoliyati samaradorligini muntazam tahlil qilib borish;

HKQQ xodimlari tomonidan odob-axloq qoidalari talablariga rioya etilishini taʼminlash;

Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish va bartaraf etish;

jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

HKQQ boʻlinmalari moddiy-texnik jihozlanishini yaxshilash ishlarini nazorat qilish;

mehnat va ijro intizomini oshirish, xodimlarga yuklangan vazifalarni bajarish boʻyicha ularning shaxsiy masʼuliyati boʻyicha kechiktirib boʻlmaydigan chora-tadbirlar koʻrish.

HKQQ shtab boshligʻi qonunchilik hujjatlariga muvofiq boshqa vakolatlarni ham amalga oshirishi mumkin.

17. Quyidagilar HKQQ shtab boshligʻi oʻrinbosarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

HKQQ shtab boshligʻining topshiriq va koʻrsatmalarini bajarish, u vaqtincha boʻlmagan vaqtlarda tegishli buyruq asosida uning vazifalarini bajarish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari, Inspeksiya buyruqlari va boshqa qonunchilik hujjatlari bilan yuklangan vazifalar va funksiyalar bajarilishini nazorat qilish;

xizmat koʻrsatilayotgan korxona va obyektlarda odamlarni qutqarish, avariya va uning oqibatlarining bartaraf qilinishini taʼminlash tizimini, HKQQ boʻlinmalari xodimlarining oʻz vazifalarini bajarishga tayyorgarligi hamda moddiy-texnik bazasining holatini oʻrganib borish va ularni takomillashtirish boʻyicha HKQQ shtab boshligʻiga takliflar kiritish;

harbiylashtirilgan kon-qutqaruv punkti, guruh (vzvod) va otryadi, yordamchi (koʻngilli) kon-qutqaruv komandalari va shaxta kon-qutqaruv xizmatlari faoliyatini muvofiqlashtirish va nazorat qilish;

HKQQ shtabi ish rejalarining bajarilishi ustidan nazoratni amalga oshirish;

HKKD xodimlarini tizimli tayyorlash, qayta tayyorlash va malakasini oshirishni tashkil etish, ularning samarali faoliyati uchun zarur shart-sharoitlar yaratilishini taʼminlash;

HKQQ xodimlari xizmat safarlarini qonunchilik hujjatlari talablariga muvofiq tashkil etish, xizmat safarlarining asoslanganligi, samaradorligini, safar uchun ajratiladigan mablagʻlardan maqsadli va oqilona foydalanishni amalga oshirish;

HKQQ xodimlari tomonidan odob-axloq qoidalari talablariga rioya etilishini taʼminlash;

Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni talablariga muvofiq korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etilishini taʼminlash yuzasidan takliflar tayyorlash;

jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy shaxslarni va yuridik shaxslar vakillarini shaxsan qabul qilish, shu jumladan, joylarga borib qabul qilish;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

mehnat va ijro intizomini oshirish, xodimlarga yuklangan vazifalarni bajarish boʻyicha ularning shaxsiy masʼuliyatini oshirishda kechiktirib boʻlmaydigan chora-tadbirlar koʻrish.

18. HKQQ shtab boshligʻi va uning oʻrinbosari:

HKQQga yuklangan vazifalar va funksiyalarning bajarilishi;

ushbu Nizomda belgilangan oʻz funksional vazifalarining sifatli bajarilishi uchun shaxsan javobgardirlar.

19. Boshliq va uning oʻrinbosari oʻz faoliyatida bevosita Inspeksiya tomonidan qabul qilingan buyruq va farmoyishlar hamda topshiriqlar oʻz vaqtida va sifatli bajarilishi boʻyicha shaxsan javobgardirlar.

20. HKQQ hamda uning boʻlinmalari joylashishi, shuningdek boʻlinmalarning soni XKQQni tashkil etish normativlari bilan belgilanadi, bu normativlar Inspeksiya kelishuvi bilan oʻz faoliyatini yuritishida HKQQ bor boʻlgan sanoat tarmoqlarining idoralari va xoʻjalik birlashmalari tomonidan tasdiqlanadi.

21. HKQQni xodimlar bilan taʼminlash tibbiy koʻrik xulosaga koʻra jismonan sogʻlom, favqulodda sharoitlarda harakatlanishga qodir boʻlgan malakali xodimlardan muddatli mehnat shartnomalari tuzish asosida amalga oshiriladi.

22. HKQQ kon-qutqaruvchilariga qoʻyiladigan malakaviy talablar Inspeksiya tomonidan tasdiqlanadigan Harbiylashtirilgan kon-qutqaruv qismida xizmatni oʻtash toʻgʻrisidagi nizom bilan belgilanadi.

23. HKKQ oʻz faoliyatini odamlarni qutqarish va avariyalarni bartaraf etish yoʻnalishlarida va tunu kun shaylik tartibida olib boradi.

24. HKQQ kon-qutqaruv boʻlinmalarida safdor va komandirlar tarkibining xizmatni oʻtash tartibi Harbiylashtirilgan kon-qutqaruv qismida xizmatni oʻtash tartibi toʻgʻrisidagi nizom talablariga muvofiq oʻrnatiladi.

25. Murakkab avariyalarni bartaraf etishda vujudga keladigan alohida sharoitlarda, xizmat koʻrsatilayotgan hududdan tashqaridagi avariyaga borishda dam olishdagi shaxsiy tarkibning ish vaqti alohida rejimga oʻtkazilishi mumkin (barcha kuch va vositalarni jamlash, barcha shaxsiy tarkibning “xizmatda” vaziyatiga oʻtkazish (kazarma holatiga), mehnat va dam olishning alohida rejimini joriy etish).

26. HKQQ shaxsiy tarkibining “Tashvish” signali boʻyicha darhol chiqishga shayligi yuqorida koʻrsatilgan HKQQni tashkil etish normativlariga muvofiq taʼminlanadi.

27. HKQQ safdor va komandirlar tarkibining intizomiy javobgarligi masalalari Inspeksiya tomonidan tasdiqlanadigan Harbiylashtirilgan kon-qutqaruv qismi xodimlarining intizom nizomi bilan belgilanadi.

28. HKQQ boʻlinmalarida xizmatni oʻtash komandirlarning buyruq va farmoyishlari, odamlarni qutqarishda xatarni hisobga olgan holda avariya-qutqaruv ishlarini amalga oshirish boʻyicha topshiriqlarni bajarish asosida amalga oshiriladi.

29. Avariya-qutqaruv va profilaktika ishlarini tashkil etuvchi va bajaruvchi yoki unga shaxsiy tarkibni va texnik jihozlarning tayyorligini taʼminlovchi HKQQ xodimlaring harbiy xodimlar hisoblanadi.

30. HKQQ xodimlarining samarali ijtimoiy himoyasi uchun moʻljallangan davlat taʼminoti jamgʻarmasi tashkil etiladi.

31. HKQQ respiratorchilar va komandirlar tarkibining kasbiy tayyorgarligi va mashgʻuloti HKQQ oʻz majburiyatlarini bajarishga shayligi buzmagan holda amalga oshiriladi. Kasbiy mahoratni oshirish HKQQ har bir xodimining asosiy majburiyati hisoblanadi.

32. Mehnat faoliyati noqulay va xavfli sharoitlarda ish olib borish bilan uzviy bogʻliq boʻlgan HKQQ xodimlari belgilangan meʼyorlar asosida bepul maxsus kiyim-bosh, maxsus oyoq kiyim, boshqa shaxsiy himoya va gigiyena vositalari bilan taʼminlanadi.

33. HKQQ shaxsiy tarkibi xizmat majburiyatlarini bajarish vaqtida HKQQ mablagʻlari hisobidan beriladigan maxsus kiyim-bosh va farqlovchi belgilarga ega boʻlishlari kerak. Maxsus kiyim-bosh kiyish muddatlari va taʼminlash meʼyorlari Inspeksiya tomonidan tasdiqlanadigan Harbiylashtirilgan kon-qutqaruv qismi shaxsiy tarkibining kiyim-kechak taʼminoti toʻgʻrisidagi nizom bilan belgilanadi.

34. HKQQ boʻlinmalari Inspeksiya tomonidan tasdiqlanadigan Harbiylashtirilgan kon-qutqaruv qismini jihozlash meʼyorlariga muvofiq nomenklatura va miqdorda xizmat koʻrsatilayotgan korxonalar hamda maqsadli davlat dasturlari hisobidan apparatlar, asbob-uskunalar, shtatli zaxira materiallari va transport vositalari bilan jihozlanadi.

35. HKQQ boʻlinmalarining harakatlari, avariyalarni bartaraf etish vaqtida respiratorchi va komandirlarning huquq va majburiyatlari Inspeksiya tomonidan tasdiqlanadigan Kon-qutqaruv ishlarini tashkil etish va olib borish boʻyicha nizom bilan belgilanadi.

36. Xizmat koʻrsatilayotgan korxona va obyektlarda davomli va murakkab avariyalar vujudga kelgan vaqtda xizmat koʻrsatilayotgan korxonalarning obyektlarini himoyalanganlik darajasini taʼminlovchi choralar qabul qilinib, boʻlinmalarning ishlab chiqilgan oʻzaro yordam rejasiga (HKQQ boʻlinmalarning dispozitsiya boʻyicha chiqishlari) muvofiq yordam berish uchun HKQQ boshqa boʻlinmalarini jalb qilish mumkin. HKQQ boʻlinmalarining moddiy va moliyaviy xarajatlari ular jalb etilgan korxona va obyektlar mablagʻlari hisobidan amalga oshiriladi.

37. HKQQ xodimlarining korxonaning kon-qutqaruv ishlari bilan bogʻliq boʻlmagan va favqulodda vaziyatlarda harakatlarning yagona tizimi boʻyicha odamlarni qutqarish va yirik avariyalarni bartaraf etish bilan bevosita bogʻliq boʻlmagan ishlarga jalb etilishiga ruxsat etilmaydi.

38. Avariya holatlarida HKQQ boʻlinmalari yetib kelguniga qadar odamlarni qutqarish, ularga yordam koʻrsatish, avariya va uning oqibatlarini boshlangʻich davrida bartaraf etish boʻyicha tadbirlarni yordamchi (koʻngilli) kon-qutqaruv komandalari, shaxta kon-qutqaruv xizmatlari bajaradilar.

39. Yordamchi (koʻngilli) kon-qutqaruv komandalari va shaxta kon-qutqaruv xizmatlari mavjud va qurilayotgan shaxtalarda tashkil etiladi va gazdan himoya qiluvchi respiratorlar bilan ishlashga, favqulodda vaziyatlarda jismoniy va psixologik zoʻriqishlarga sogʻliq jihatdan yaroqli va tegishli tayyorgarlikdan oʻtgan tajribali yerosti ishlari mutaxassisligi boʻyicha kon ishchilari, kon ustalari va boshqa nazoratchi shaxslardan tuziladi.

40. Yordamchi (koʻngilli) kon-qutqaruv komandalari va shaxta kon-qutqaruv xizmatlari toʻgʻrisidagi nizom HKQQ bilan kelishilgan holda ular qarashli boʻlgan tegishli tarmoq vazirliklari va idoralar tomonidan tasdiqlanadi.

41. Avariyalarni bartaraf etishda 6 soatdan ortiq ishlagan HKQQ shaxsiy tarkibi, yordamchi (koʻngilli) kon-qutqaruv komandalari (shaxta kon-qutqaruv xizmatlari) aʼzolari Oʻzbekiston Respublikasi Sogʻliqni saqlash vazirligi bilan kelishilgan meʼyorlar boʻyicha korxonalarning mablagʻlari hisobidan ovqat va dam olish xonalari bilan taʼminlanadi.

42. HKQQ boʻlinmalarida navbatchi va zaxira smenada boʻlgan shaxsiy tarkib, xizmat koʻrsatiladigan korxona va obyektlar bilan tuzilgan shartnomalarga muvofiq bepul ovqat bilan taʼminlanadi yoki ovqat oʻrniga pulli kompensatsiya toʻlanadi.

43. HKQQ xodimlarining ish haqi, koeffitsiyentlar, mukofotlar, ustamalar, qoʻshimcha haqlar, boshqa ragʻbatlantiruvchi toʻlovlar, imtiyoz va kompensatsiyalar xizmat koʻrsatilayotgan korxonalarning tegishli toifadagi ishchilari, mutaxassislari va rahbarlari uchun belgilangan miqdorlarda amalga oshiriladi.

Harbiylashtirilgan kon-qutqaruv qismi xodimlarining pul taʼminoti toʻgʻrisidagi nizom Inspeksiya tomonidan tasdiqlanadi.

44. HKQQ tuzilmasiga tezkor, oʻquv va yordamchi boʻlinmalar kiradi. HKQQ ilmiy-tadqiqot va loyiha-konstruktorlik tashkilot va korxonalarni tashkil etishi mumkin.

45. HKQQ tezkor boʻlinmasi kon-qutqaruv boʻlinmalari, punktlar, guruhlar (vzvod) va otryadlardan iborat.

46. HKQQ birlamchi tezkor birligi 8 kishidan iborat harbiylashtirilgan kon-qutqaruv boʻlinmasi hisoblanadi (boʻlinma komandiri, 6 nafar respiratorchi va tezkor transport vositasi haydovchisi).

Boʻlinma odamlarni qutqarish va avariyalarni bartaraf etishda alohida tezkor vazifalarni bajarishi mumkin.

47. Harbiylashtirilgan kon-qutqaruv punkti olisda joylashgan bitta korxona yoki obyektga xizmat qilish uchun tashkil etilib, ikkita boʻlinmadan iborat boʻladi va xizmat koʻrsatilayotgan korxona va obyektning yordamchi (koʻngilli) kon-qutqaruv komandasi bilan birgalikda kon-qutqaruv ishlarini amalga oshiradi.

48. Harbiylashtirilgan kon-qutqaruv guruhi (vzvod) xizmat koʻrsatilayotgan obyektlarda kon-qutqaruv ishlarining asosiy turlarini bajarish uchun uch va undan koʻp boʻlinmalardan iborat boʻladi. Guruh (vzvod) tarkibiga tez tibbiy yordam koʻrsatish uchun reanimatsiya-shokka qarshi guruhi, kon-qutqaruvchi gʻavvoslar boʻlinmasi, kon havosi namunasini tahlil qilish uchun laboratoriya kirishi mumkin.

49. Harbiylashtirilgan kon-qutqaruv otryadi ikki va undan koʻp kon-qutqaruv guruhlaridan (vzvod) iborat boʻlib, xizmat koʻrsatilayotgan obyektlarda kon-qutqaruv, profilaktika va boshqa muhandislik-texnik ishlarning butun majmui bajarilishini taʼminlaydi.

50. Harbiylashtirilgan kon-qutqaruv otryadi oʻz tarkibida kon-qutqaruv va shaxta yongʻin uskunalarini taʼmirlash va sozlash boʻyicha mexanik ustaxonalariga ega boʻlishi mumkin. Otryad tarkibiga depression, gaz va issiqlik oʻlchov mutaxassislari guruhi, poʻlat-arqon sinov stansiyalari, laboratoriyalar, tezkor yordam koʻrsatuvchi tibbiy brigada va muhandislik boʻlinmalari kiritilishi mumkin (reanimatsiya-shokka qarshi guruhlar, gʻavvoslar va boshqalar).

Guruh (vzvod) otryad tarkibiga kirmagan taqdirda, ushbu guruh (vzvod) harbiylashtirilgan kon-qutqaruv otryadi huquqi bilan alohida kon-qutqaruv guruhi (vzvod) hisoblanadi.

51. HKQQ boshqaruv organi HKQQ shtabi hisoblanadi hamda barcha tarkibiy boʻlinmalar faoliyatini muvofiqlashtiradi va rahbarlik qiladi.

52. HKQQni moliyalashtirish koʻmir, kon ruda mahsulotlari (ish, xizmat) qazib olish va ularni qayta ishlash tannarxiga kiritilgan holda, hamda foydali qazilma boyliklarni qidirish xarajatlari smetasiga, shu bilan birga, yerosti inshootlarni qurish, kengaytirish, qayta qurish, foydalanish, tugatish yoki xavfli ishlab chiqarish obyektlarini konservatsiya qilish ishlari xarajatlariga kiritgan holda, idoralar va xoʻjalik birlashmalari hisobidan, shuningdek, oʻz xoʻjalik faoliyatidan olinadigan daromadlar hisobidan amalga oshiriladi.

53. Meʼyor va tartiblar xizmat koʻrsatilayotgan korxonalar bilan tuzilgan shartnomalarga muvofiq oʻrnatiladi.

54. HKQQ xodimlari xizmat koʻrsatilayotgan korxonalar bilan tuzilgan shartnomalarda koʻzda tutilgan mablagʻlar hisobidan, ular tomonidan lavozim majburiyatlarini bajarish vaqtida yuz beruvchi mehnat qobiliyatini toʻla yoki qisman yoʻqotishi, halok boʻlishi yoxud kasb kasalliklari hodisasi uchun majburiy shaxsiy sugʻurta qilinishi kerak.

55. Harbiylashtirilgan xodimlari va ularning oila aʼzolariga turar joydan foydalanish qiymati xarajatlari belgilangan tartibga asosan HKQQ mablagʻlari hisobidan qoplanadi.

56. Xizmat koʻrsatilayotgan obyektlarda avariyalarni bartaraf etish jarayonida jabrlangan harbiylashtirilgan xodimlar, xizmat koʻrsatilayotgan korxonalarning jamoat shartnomalarida belgilangan tartibda tibbiy muassasalar, sanatoriylar, profilaktoriylarda bepul tibbiy xizmatdagi foydalanishga haqlidirlar.

57. Avariyalarni bartaraf etish vaqtida xavfning ortishini inobatga olgan holda, harbiylashtirilgan xodimlarni ijtimoiy himoya qilishning samaradorligini oshirish, xodimlarning mehnatga layoqatsiz kunlari sogʻligini tiklash, sanatoriy va kurortlarda davolanish, sport tadbirlarini oʻtkazish toʻlovlari, shuningdek, oʻz vazifalarini bajarish jarayonida xodimning sogʻligʻiga keltirilgan zararni qoplash uchun sarflanadigan xarajatlar HKQQ tomonidan tashkil etiladigan davlat taʼminoti jamgʻarmasi hisobidan amalga oshiriladi. Davlat taʼminoti jamgʻarmasini tashkil etish va sarflash Harbiylashtirilgan kon-qutqaruv qismi shaxsiy tarkibining pul taʼminoti toʻgʻrisidagi nizomga muvofiq amalga oshiriladi.

58. Xizmat koʻrsatilayotgan korxona va obyektlarda bevosita avariya-qutqaruv ishlarini amalga oshirayotgan kon-qutqaruv qismlarning harbiylashtirilgan xodimlari, qonunchilikda belgilangan tartibda imtiyozli pensiya olish huquqiga ega.

59. HKQQni tugatish va qayta tashkil etish qonunchilik hujjatlarida oʻrnatilgan tartib va holatlarda amalga oshiriladi.

60. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

1. Faoliyatni boshlash yoki tugatish uchun vakolatli organni xabardor etish tartibi toʻgʻrisidagi yagona nizomga 22-ilovada:

a) 2-pozitsiyaning uchinchi ustunining “9”-kichik bandi qoʻyidagi mazmundagi oltinchi xatboshi bilan toʻldirilsin:

“togʻ-kon sanoati sohasida yer qaʼridan mineral xomashyolarni qazib olishdagi marksheyderlik izlanishlarida geodeziya va topografiya ishlari”;

b) 4-pozitsiyaning uchinchi ustuni quyidagi mazmundagi ikkinchi xatboshi bilan toʻldirilsin:

“Togʻ-kon sanoati va geologiya vazirligi huzuridagi “Yer qaʼridan foydalanish markazi” DM (Togʻ-kon sanoati sohasida yer qaʼridan mineral xomashyolarni qazib olishdagi marksheyderlik izlanishlarida geodeziya va topografiya ishlari boʻyicha)”;

v) 7-pozitsiyaning uchinchi ustuni quyidagi mazmundagi oltinchi xatboshi bilan toʻldirilsin:

“Togʻ-kon sanoati va geologiya vazirligi huzuridagi Togʻ-kon sanoati va geologiya sohasini nazorat qilish inspeksiyasi”;

g) 9-pozitsiyaning uchinchi ustuni “b” kichik bandida:

oltmish sakkizinchi xatboshi quyidagi tahrirda bayon etilsin:

“burchak oʻlchashning oʻrtacha kvadrat xatolik 7” (“Togʻ-kon sanoati sohasida yer qaʼridan mineral xomashyolarni qazib olishdagi marksheyderlik izlanishlarida — 1”) gacha boʻlgan elektron taxeometr — 1 komplekt;*”;

quyidagi mazmundagi yetmish beshinchi — yetmish yettinchi xatboshilar bilan toʻldirilsin:

“oʻlchanilgan maʼlumotlarni qayta ishlash va modellashtirish maqsadida litsenziyalangan dasturiy taʼminot mavjudligi;

2 chastotali GNSS qabul qiluvchilari — 1 komplekt;*

Togʻ-kon sanoati sohasida yer qaʼridan mineral xomashyolarni qazib olishdagi marksheyderlik izlanishlarida geodeziya va topografiya ishlari boʻyicha maʼlumotlar haqqoniyligi;*”;

v) yetmish beshinchi — bir yuz oʻn oltinchi xatboshilar tegishincha yetmish sakkizinchi — bir yuz oʻn toʻqqizinchi xatboshilari deb hisoblansin.

2. Vazirlar Mahkamasining “Faoliyatni boshlash yoki tugatish uchun vakolatli organni xabardor qilish tartibi toʻgʻrisidagi yagona nizomni tasdiqlash haqida” 2022-yil 25-fevraldagi 88-son qaroriga 3-ilovaning 16-bandi oʻz kuchini yoʻqotgan deb hisoblansin.

1. Vazirlar Mahkamasining “Oʻzbekiston Respublikasi Sanoat xavfsizligi davlat qoʻmitasining harbiylashtirilgan kon-qutqaruv qismi toʻgʻrisida”gi va “Oʻzbekneftgaz” milliy xolding kompaniyasining ochiq neft va gaz favvoralarining oldini olish hamda ularni bartaraf etish boʻyicha Oʻzbekiston harbiylashtirilgan qismi toʻgʻrisida”gi nizomlarni tasdiqlash haqida” 2014-yil 4-dekabrdagi 332-son qarori rus tilidagi matnida 1-bandning ikkinchi xatboshisi va 1-ilovasi.

2. Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi huzuridagi Kon-geologiya faoliyatini nazorat qilish inspeksiyasi toʻgʻrisidagi nizomni tasdiqlash haqida” 2018-yil 11-iyundagi 436-son qarori.

3. Vazirlar Mahkamasining “Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar (Oʻzbekiston Respublikasi Prezidentining “Sanoat, radiatsiya va yadro xavfsizligi sohasida davlat boshqaruvi va nazorati tizimini tubdan takomillashtirish chora-tadbirlari toʻgʻrisida” 2018-yil 12-dekabrdagi PF-5594-son Farmoni va Oʻzbekiston Respublikasi Prezidentining “Oʻzbekiston Respublikasi Sanoat xavfsizligi davlat qoʻmitasi faoliyatini tashkil etish toʻgʻrisida” 2018-yil 12-dekabrdagi PQ-4058-son qarori)” 2019-yil 6-martdagi 195-son qaroriga ilovaning rus tilidagi matnining 26-bandi.

5. Vazirlar Mahkamasining “Oʻzbekiston Respublikasi Davlat geologiya va mineral resurslar qoʻmitasi huzuridagi Kon-geologiya faoliyatini nazorat qilish inspeksiyasi toʻgʻrisidagi nizomga oʻzgartirish kiritish toʻgʻrisida” 2020-yil 14-fevraldagi 83-son qarori.

6. Vazirlar Mahkamasining “Iqtisodiyotni rivojlantirish va kambagʻallikni qisqartirishga oid davlat siyosati tubdan takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirishlar kiritish, shuningdek, baʼzilarini oʻz kuchini yoʻqotgan deb hisoblash toʻgʻrisida” 2020-yil 14-dekabrdagi 777-son qaroriga 1-ilovaning 34-bandi.

7. Vazirlar Mahkamasining “Yer qaʼri uchastkalaridan foydalanish huquqi uchun ruxsatnomalar berish tartibini yanada takomillashtirish chora-tadbirlari toʻgʻrisida” 2022-yil 25-martdagi 133-son qaroriga 5-ilovaning 5-bandi.