Oʻzbekiston Respublikasi Prezidentining 2025-yil 23-iyundagi “Oʻzbekiston Respublikasida mahalliy davlat hokimiyati vakillik organlari faoliyatini 2030-yilga qadar rivojlantirish konsepsiyasini tasdiqlash toʻgʻrisida”gi PF-98-son hamda 2025-yil 4-avgustdagi “Mehnat munosabatlari va kasbga tayyorlash tizimini takomillashtirish hamda ish beruvchilarni ragʻbatlantirishga oid qoʻshimcha chora-tadbirlar toʻgʻrisida” PF-126-son farmonlariga asosan tuman Kambagʻallikni qisqartirish va bandlikka koʻmaklashish boʻlimi boshligʻi A. Kanakovning hisobotini tinglab, doimiy komissiyalarning 2025-yil 7-oktabrdagi 03-03-01-DKQB/11-25-sonli qoʻshma majlis bayonini inobatga olib, Oʻzbekiston Respublikasining “Aholi bandligi toʻgʻrisida”gi Qonuni 9-bobi, “Mahalliy davlat hokimiyati toʻgʻrisida”gi Qonunining 6 va 25¹-moddalariga muvofiq, qaror qilaman:

1. Boʻstonliq tumani Kambagʻallikni qisqartirish va bandlikka koʻmaklashish boʻlimi boshligʻi A. Kanakovning tumanidagi aholining ijtimoiy ehtiyojmand toifalarini 2026-yilga ishga joylashtirish uchun ish oʻrinlarining eng kam miqdorini belgilash va zaxiraga qoʻyish yuzasidan takliflari maʼlumot uchun qabul qilinsin.

2. Oʻzbekiston Respublikasi Prezidentining 2025-yil 4-avgustdagi PF-126-son Farmoniga asosan:

xoʻjalik yurituvchi subyektlar faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar uchun ish oʻrinlarining majburiy zaxiralari shakllantirilishi, bunda majburiy zaxiralash xodimlar umumiy sonining 3 foizidan oshmasligi hamda xodimlari soni 100 nafardan ortiq boʻlgan tashkilotlarga nisbatan qoʻllanilishi;

budjet tashkilotlari va davlat ulushi 50 foizdan yuqori boʻlgan korxonalar faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar, jazoni ijro etish muassasalaridan ozod qilingan hamda odam savdosidan jabrlangan shaxslar uchun ish oʻrinlarining majburiy zaxiralari shakllantirilishi, bunda majburiy zaxiralash xodimlar umumiy sonining 7 foizidan oshmasligi hamda xodimlari soni 20 nafardan ortiq boʻlgan tashkilotlarga nisbatan tatbiq etilishi belgilanganligi rahbarlik va ijro uchun qabul qilinsin.

3. Tumani Kambagʻallikni qisqartirish va bandlikka koʻmaklashish boʻlimi hamda tuman “Inson” ijtimoiy xizmatlar markazining tuman hududidagi tashkilotlar boʻyicha 2026-yilda aholining ijtimoiy ehtiyojmand toifalari uchun ish oʻrinlarini belgilash toʻgʻrisidagi quyidagi takliflari maʼqullansin:

xodimlar soni 20 nafardan ortiq boʻlgan davlat tashkilotlarida majburiy zaxiralanadigan ish oʻrinlari soni xodimlar umumiy sonining yetti foizidan oshmagan miqdorda hamda xodimlar soni 100 nafardan ortiq boʻlgan xoʻjalik yurituvchi subyektlarda (davlat ulushi 50 foizdan yuqori boʻlgan korxonalar bundan mustasno) majburiy zaxiralanadigan ish oʻrinlari soni xodimlar umumiy sonining uch foizidan oshmagan miqdorida kelgusi yil uchun 202 ta ish oʻrinlarini zaxiraga qoʻyish, jumladan:

nogironligi boʻlgan shaxslar uchun 5,4 foiz yoki 11 kishi;

oilaviy (maishiy) zoʻravonlikdan jabrlangan shaxslar uchun 11,8 foiz yoki 24 kishi;

kambagʻal oilalar reyestridagi oilalarning aʼzolari uchun 78,7 foiz yoki 159 kishi;

muqobil joylashtirish shakllarida tarbiyalangan yetim va ota-ona qaramogʻidan mahrum boʻlgan shaxslar uchun 2,9 foiz yoki 6 kishi;

jazoni ijro etish muassasalaridan ozod qilingan shaxslar uchun 0,9 foiz yoki 2 kishi.

4. 2026-yilda tumandagi aholining ijtimoiy ehtiyojmand toifalarini ishga joylashtirish maqsadida quyidagilar:

davlat tashkilotlari (byudjet tashkilotlari va davlat ulushi 50 foizdan yuqori boʻlgan korxonalar) tomonidan majburiy zaxira qoʻyiladigan ish oʻrinlarining manzilli roʻyxati 1-ilovaga;

xodimlarining roʻyxatdagi oʻrtacha yillik soni yuz nafardan ortiqni tashkil etadigan xoʻjalik yurituvchi subyektlar (davlat ulushi 50 foizdan yuqori boʻlgan korxonalar bundan mustasno) tomonidan majburiy zaxira qoʻyiladigan ish oʻrinlarining manzilli roʻyxati 2-ilovaga muvofiq tasdiqlansin.

5. Tumandagi barcha korxona, tashkilot va muassasalar rahbarlariga:

zaxiraga qoʻyiladigan ish oʻrinlari umumiy sonining kamida yigirma besh foizi miqdorida zaxiraga qoʻyiladigan ish oʻrinlarining tayyorligini yil boshlanishidan oldin oʻn kundan kechiktirmay taʼminlash;

ish oʻrinlarining qolgan qismini zaxiraga qoʻyish tashkilot (ish beruvchi) tomonidan taqvim (kalendar) yilning birinchi choragi mobaynida taʼminlash vazifalari yuklatilsin.

6. Oʻzbekiston Respublikasi Prezidentining 2025-yil 14-fevraldagi PQ-64-son qarori bilan aholining ijtimoiy ehtiyojmand toifalaridan boʻlgan shaxslarni ish oʻrinlarining belgilangan eng kam sonidan ortiq miqdorda ishga qabul qilish uchun ish beruvchilarga — har bir xodim uchun 12 oy davomida har oyda bazaviy hisoblash miqdorining 2 baravari miqdorida subsidiya mablagʻlarini toʻlab berilishi belgilanganligi koʻrsatib oʻtilsin.

7. Tuman Kambagʻallikni qisqartirish va bandlikka koʻmaklashish boʻlimi (A. Kanakov):

besh kunlik muddatda ushbu qaror nusxasini tegishli tashkilotlar rahbarlariga yetkazsin va uning ijrosi ustidan nazorat oʻrnatsin;

aholining ijtimoiy ehtiyojmand toifalarini ishga qabul qilishda asossiz rad etish holatlari aniqlanganda, belgilangan tartibda chora koʻrilishini taʼminlasin.

8. Tuman hokimligi matbuot kotibi (Y. Abdullayev), “Boʻstonliq ovozi” gazetasi bosh muharriri (A. Kulbayev) mazkur qarorni tuman hokimligining rasmiy veb-sayti, ijtimoiy tarmoqlardagi sahifalari va tuman gazetasida yoritsinlar.

9. Mazkur qarorning ijrosini nazorat qilish tuman hokimining birinchi oʻrinbosari X. Abduyusupov zimmasiga yuklatilsin.