Oʻzbekiston Respublikasining Mehnat kodeksi va “Transport to'g'risida”gi Qonuniga muvofiq buyuraman:

1. O'zbekiston Respublikasi mehnat va aholini ijtimoiy muhofaza qilish vazirining 2013-yil 23-avgustdagi 64-B-son buyrug'i (ro'yxat raqami 2506, 2013-yil 9-sentabr) (O'zbekiston Respublikasi qonun hujjatlari to'plami, 2013-y., 37-son, 487-modda) bilan tasdiqlangan Avtotransport vositalari haydovchilarining ish vaqti va dam olish vaqti to'g'risidagi nizomga ilovaga muvofiq o'zgartirish va qo'shimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 1-bandning uchinchi xatboshisi quyidagi tahrirda bayon etilsin:

“tashuvchi — mulk huquqi asosida yoki boshqa qonuniy asoslarda transport vositasiga ega bo'lgan, yo'lovchilarni, bagajni, yuk bagajini, yuklarni, pochta va kuryerlik jo'natmalarini tashish bo'yicha tijorat asosida xizmatlar ko'rsatadigan, shuningdek tashish uchun tegishli litsenziyaga, sertifikatga yoxud ruxsat etish xususiyatiga ega hujjati bo'lgan yuridik yoki jismoniy shaxs;”.

2. 9-bandda:

yettinchi xatboshidagi “bo'sh turib qolingan vaqti” degan soʻzlar “bekor turib qolingan vaqti” degan soʻzlar bilan almashtirilsin.

quyidagi mazmundagi xatboshi bilan to'ldirilsin:

“mehnat to'g'risidagi qonunchilikda hamda mehnat haqidagi boshqa huquqiy hujjatlarda nazarda tutilgan boshqa vaqtlar.”;

3. 13-band quyidagi mazmundagi xatboshi bilan to'ldirilsin:

“Haydovchining ish smenasi davomiyligi oʻn ikki soat boʻlganida, shuningdek mehnat sharoitlari oʻta zararli va oʻta xavfli ishlarda ish vaqtidan tashqari ishlarga yoʻl qoʻyilmaydi.”.

14-band quyidagi tahrirda bayon etilsin:

“14. Haydovchilar quyidagi huquqlarga ega:

ish kuni (smena) davomidagi tanaffuslar va ovqatlanish uchun tanaffusga chiqish (tushlik tanaffusi);

har kungi (smenalar oralig'idagi) dam olish;

dam olish kunlari (har haftalik uzluksiz dam olish);

ishlanmaydigan bayram kunlarida dam olish;

o'rnatilgan tartibda ta'tilga chiqish;

oʻz xohishiga ko'ra dam olish kunida yoki ishlanmaydigan bayram kunida ishlaganlik uchun kompensatsiya sifatida taqdim etiladigan ishdan bo'sh bo'lgan qo'shimcha kunlardan, shuningdek qon va uning tarkibiy qismlari topshirilgan har bir kundan keyin donorlarga beriladigan dam olish kunlaridan foydalanish.”.