Ўзбекистон Республикасининг «Аҳолининг санитария-эпидемиологик осойишталиги тўғрисида»ги Қонуни, Ўзбекистон Республикаси Президентининг 2025 йил 14 июлдаги ПФ-111-сон «Давлат бошқаруви тизимида самарадорлик, проактивлик ва натижадорликни ошириш чора-тадбирлари тўғрисида»ги Фармони ва 2023 йил 2 июндаги ПҚ-181-сон «Ўзбекистон Республикасининг Жаҳон савдо ташкилотига аъзо бўлиш жараёнини жадаллаштиришга доир қўшимча чора-тадбирлар тўғрисида»ги қарорига мувофиқ Ўзбекистон Республикаси Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитаси қарор қилади:

1. Озиқ-овқат қўшимчаларига ва улардан фойдаланишга ҳамда озиқ-овқат қўшимчаларини тамғалашга доир санитария қоидалари, нормалари ва гигиена нормативларига (0098-25-сон СанҚваН) (ҳисоб рақами 366, 2025 йил 8 август) иловага мувофиқ ўзгартириш ва қўшимчалар киритилсин.

2. «Озиқ-овқат қўшимчаларига ва улардан фойдаланишга ҳамда озиқ-овқат қўшимчаларини тамғалашга доир санитария қоидалари, нормалари ва гигиена нормативларини (0098-25-сон СанҚваН) тасдиқлаш тўғрисида»ги қарорнинг (ҳисоб рақами 366, 2025 йил 8 август) амал қилиши 2028 йил 10 февралга қадар тўхтатиб турилсин.

3. Мазкур қарор Ўзбекистон Республикаси Қишлоқ хўжалиги вазирлиги, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ва Савдо-саноат палатаси билан келишилган.

4. Ушбу қарор расмий эълон қилинган кундан эътиборан кучга киради.

1. Муқаддимада:

олтинчи хатбоши қуйидаги таҳрирда баён этилсин:

«озиқ-овқат маҳсулотларини ишлаб чиқаришда ҳимоя ва қоплама материаллари сифатида қўлланиладиган, озиқ-овқат маҳсулотлари таркибига кирмайдиган ва истеъмол қилиш учун мўлжалланмаган моддалар;»;

ўн учинчи хатбоши қуйидаги таҳрирда баён этилсин:

«қайта ишлашда қўлланиладиган ёрдамчи моддалар;»;

қуйидаги мазмундаги ўн бешинчи ва ўн олтинчи хатбошилар билан тўлдирилсин:

«озиқ-овқат маҳсулотларига қўшиладиган озуқавий моддалар;

озиқ-овқат ароматизаторлари, ферментлар;»;

ўн бешинчи хатбоши тегишли равишда ўн еттинчи хатбоши деб ҳисоблансин.

2. 1-бандда:

тўртинчи хатбоши қуйидаги таҳрирда баён этилсин:

«озиқ-овқат ароматизаторлари — озиқ-овқат маҳсулотларига хушбўй ҳид бериш, уларнинг таъмини ўзгартириш ёки кучайтириш учун қўшиладиган хушбўйлантирувчи моддалар, бундан таъмни кучайтирувчи моддаларнинг функционал синфига киритилган озиқ-овқат қўшимчалари, шунингдек шакар, сирка ёки ош тузи каби фақат ширин, нордон ёки шўр таъмга эга бўлган моддалар мустасно;»;

қуйидаги мазмундаги бешинчи — еттинчи хатбошилар билан тўлдирилсин:

«озуқавий моддалар — овқатланиш мақсадида озиқ-овқат маҳсулотларига қўшиладиган витаминлар, минераллар ва бошқа моддалар, шунингдек физиологик мақсадлар учун қўшиладиган моддалар;

препарат — сақлаш, суюлтириш ёки эритиш жараёнларини осонлаштириш учун препаратга бошқа моддалар (озиқ-овқат қўшимчалари ва/ёки ингредиентлар) қўшилган бир ёки бир нечта озиқ-овқат қўшимчалари, ферментлар ва/ёки озуқавий моддалардан иборат аралашмалар;

шакар қўшилмаган маҳсулотлар — таркибида моно- ёки дисахаридлар бўлмаган ҳамда ширинлаштириш мақсадида фойдаланиладиган маҳсулотлар;»;

бешинчи — ўн иккинчи хатбошилар тегишли равишда саккизинчи — ўн бешинчи хатбошилар деб ҳисоблансин.

3. 3-банд қуйидаги таҳрирда баён этилсин:

«3. Озиқ-овқат қўшимчалари истеъмолчиларнинг саломатлигига хавф туғдирмаслиги, озиқ-овқат маҳсулотларида қўлланилиши учун яроқли бўлиши, шунингдек мазкур санитария қоидаларининг 2 — 6-иловаларини инобатга олган ҳолда қўлланилиши лозим.».

4. 5-банд қуйидаги таҳрирда баён этилсин:

«5. Озиқ-овқат маҳсулотларини ишлаб чиқариш, қайта ишлаш, тайёрлаш, қадоқлаш, ташиш ёки сақлаш жараёнларига кўмаклашиш мақсадларида озиқ-овқат қўшимчасида сифатсиз хомашё қўлланилишига (номақбул ҳаракатлар амалга оширилишига) йўл қўйилмайди.».

5. 11-банд қуйидаги таҳрирда баён этилсин:

«11. Озиқ-овқат қўшимчаларидан фойдаланиш шартлари мазкур санитария қоидаларининг 2-иловасига мувофиқ бўлиши керак, бунда озиқ-овқат маҳсулотлари тоифалари ва уларнинг рақамланиши озиқ-овқат қўшимчаларидан фойдаланиш шартлари учун қўлланилади.».

6. 14-бандда:

биринчи хатбоши қуйидаги таҳрирда баён этилсин:

«Озиқ-овқат қўшимчасида РЕМД кўрсатилмаган бўлса, етарли миқдор (quantum satis) тамойили қўлланилади.»;

қуйидаги мазмундаги иккинчи хатбоши билан тўлдирилсин:

«Озиқ-овқат қўшимчасининг ёрлиғида РЕМД ёки етарли миқдор (quantum satis) тамойили кўрсатилмаган ҳолда ушбу озиқ-овқат қўшимчасидан фойдаланишга йўл қўйилмайди.».

7. 19-бандда:

биринчи хатбоши қуйидаги таҳрирда баён этилсин:

«19. Қуйидаги озиқ-овқат маҳсулотлари тоифаларига озиқ-овқат қўшимчаларини қўшишга йўл қўйилмайди (бундан ушбу санитария қоидаларининг 2-иловасида кўрсатилган шартлар мустасно):»;

қуйидаги мазмундаги тўртинчи ва бешинчи хатбошилар билан тўлдирилсин:

«қайта ишланган дон маҳсулотлари;

махсус тиббий мақсадлар учун парҳез (даволаш) озиқ-овқат маҳсулотлари.».

8. 21-банднинг биринчи хатбошиси қуйидаги таҳрирда баён этилсин:

«21. Озиқ-овқат қўшимчалари ушбу санитария қоидаларининг 4-иловасида келтирилган мазкур қўшимчаларнинг функционал синфлари ва тегишли технологик тавсифларга мувофиқ қуйидаги мақсадларни амалга ошириш учун фойдаланилиши лозим:».

9. 28-банд қуйидаги таҳрирда баён этилсин:

«28. Озиқ-овқат қўшимчаларини ёрлиқ билан тамғалашда ушбу ёрлиқ осон кўринадиган, аниқ ўқиладиган ва ўчмайдиган бўлиши, ёлғон ёки чалғитувчи маълумотларни ўз ичига олмаслиги керак.».

10. 31-бандда:

иккинчи хатбошидаги «индекс рақамини» деган сўзлар «тартиб рақамини» деган сўзлар билан алмаштирилсин;

еттинчи хатбоши қуйидаги таҳрирда баён этилсин:

«озиқ-овқат қўшимчасини қўллаш бўйича йўриқнома ва ундан фойдаланиш бўйича кўрсатмалар;».

11. Қуйидаги мазмундаги 38¹-банд билан тўлдирилсин:

«38¹. Озиқ-овқат маҳсулотларини тамғалашда ва уларга безак беришда қўлланиладиган озиқ-овқат бўёқлари ушбу санитария қоидаларининг 1 ва 2-иловаларига мувофиқ бўлиши лозим.».

12. 1 — 3 ва 5-иловалар мазкур ўзгартириш ва қўшимчаларнинг 1 — 4-иловаларига мувофиқ таҳрирда баён этилсин.