“Aholi bandligi toʻgʻrisida”gi Oʻzbekiston Respublikasi Qonunining 9-bobi hamda Vazirlar Mahkamasining 2017-yil 5-dekabrdagi 965-sonli qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibi toʻgʻrisida”gi Nizomga asosan 2026-yil uchun ish oʻrinlarini band qilib qoʻyish maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6- va 24-moddalarigaasosan, qaror qilaman:

1. Quyidagilar rahbarlik va ijro uchun qabul qilinsin:

a) Oʻzbekiston Respublikasi Prezidentining “Mehnat munosabatlari va kasbga tayyorlash tizimini takomillashtirish hamda ish beruvchilarni ragʻbatlantirishga oid qoʻshimcha chora-tadbirlar toʻgʻrisida” 2025-yil 4-avgustdagi PF-126-son Farmoniga asosan:

b) Oʻzbekiston Respublikasi Prezidentining “Oʻzbekiston Respublikasida mahalliy davlat hokimiyati vakillik organlari faoliyatini 2030-yilgacha rivojlantirish konsepsiyasini tasdiqlash toʻgʻrisida” 2025-yil 23-iyundagi PF-98-son Farmoniga asosan, ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish;

xoʻjalik yurituvchi subyektlar faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar hamda ota-ona qaramogʻidan mahrum boʻlgan shaxslar uchun ish oʻrinlarining majburiy zaxiralarini shakllantirishi, bunda majburiy zaxiralash xodimlar umumiy sonining 3 foizidan oshmasligi hamda xodimlar soni 100 nafardan ortiq boʻlgan tashkilotlarga nisbatan qoʻllanilishi;

budjet tashkilotlari va davlat ulushi 50 foizdan yuqori boʻlgan korxonalar esa faqat nogironligi boʻlgan shaxslar, oilaviy (maishiy) zoʻravonlikdan jabrlangan shaxslar, kambagʻal oilalar reyestridagi oilalarning aʼzolari, muqobil joylashtirish shakllarida tarbiyalangan yetim shaxslar, ota-ona qaramogʻidan mahrum boʻlgan shaxslar, jazoni ijro etish muassasalaridan ozod qilingan hamda odam savdosidan jabrlangan shaxslar uchun ish oʻrinlarining majburiy zaxiralarini shakllantirishi, bunda majburiy zaxiralash xodimlar umumiy sonining 7 foizidan oshmasligi va xodimlar soni 20 nafardan ortiq boʻlgan tashkilotlarga tatbiq etilishi.

2. Sherobod tumani Kambagʻallikni qisqartirish va bandlikka koʻmaklashish boʻlimi (Sh.Egamberdiyev) hamda tuman “Inson” ijtimoiy xizmatlar markazi tuman hududidagi tashkilotlar boʻyicha 2026-yilda aholining ijtimoiy ehtiyojmand toifalari uchun ish oʻrinlarini belgilash boʻyicha quyidagi takliflari maʼqullansin:

Xodimlar soni 20 nafardan ortiq boʻlgan davlat tashkilotlarida majburiy zaxiralanadigan ish oʻrinlari xodimlar umumiy sonining 7 foizidan oshmagan miqdorda, xodimlar soni 100 nafardan ortiq boʻlgan xoʻjalik yurituvchi subyektlarda (davlat ulushi 50 foizdan yuqori boʻlgan korxonalar bundan mustasno) esa majburiy zaxiralanadigan ish oʻrinlari xodimlar umumiy sonining 3 foizidan oshmagan miqdorda boʻlishi belgilansin.

2026-yil uchun jami 98 ta ish oʻrni zaxiraga qoʻyilsin, jumladan:

nogironligi boʻlgan shaxslar uchun — 15,3 % (15 kishi);

oilaviy (maishiy) zoʻravonlikdan jabrlangan shaxslar uchun — 1,02 % (1 kishi);

kambagʻal oilalar reyestridagi oilalarning aʼzolari uchun — 77,55 % (76 kishi);

muqobil joylashtirish shakllarida tarbiyalangan yetim va ota-ona qaramogʻidan mahrum boʻlgan shaxslar uchun — 1,02 % (1 kishi);

jazoni ijro etish muassasalaridan ozod qilingan shaxslar uchun — 3,06 % (3 kishi);

odam savdosidan jabrlangan shaxslar uchun — 2,04 % (2 kishi).

3. 2026-yilda ijtimoiy ehtiyojmand toifalarni ishga joylashtirish maqsadida davlat tashkilotlari tomonidan majburiy zaxira qoʻyiladigan ish oʻrinlarining manzilli roʻyxati 1-ilovaga muvofiq tasdiqlansin.

4. Korxonalar, tashkilotlar va muassasalar rahbarlari:

zaxiraga qoʻyiladigan ish oʻrinlarining kamida 25 foizini yil boshlanishidan oldin, oʻn kundan kechiktirmay tayyor holda taʼminlashi va bu haqida tuman Kambagʻallikni qisqartirish va bandlikka koʻmaklashish boʻlimiga maʼlum qilishi;

qolgan ish oʻrinlarini kalendar yilning birinchi choragida zaxiraga qoʻyishi va chorak yakunidan soʻng oʻn kundan kechiktirmay maʼlumot taqdim etishi;

ishga joylashtirish boʻyicha har oyda, hisobot oyidan keyingi oyning 5-sanasigacha axborot berib borishi shart.

Zaxiraga qoʻyiladigan ish oʻrinlarini saqlash tartibi “Aholi bandligi toʻgʻrisida”gi Qonunning 40-moddasiga muvofiq amalga oshiriladi.

5. Oʻzbekiston Respublikasi Prezidentining 2025-yil 14-fevraldagi PQ-64-son qaroriga muvofiq, belgilangan eng kam sondan ortiq miqdorda ijtimoiy ehtiyojmand shaxslarni ishga qabul qilgan ish beruvchilarga — har bir xodim uchun 12 oy davomida oyiga BHMning 2 baravari miqdorida subsidiya toʻlab berilsin.

6. Oʻzbekiston Respublikasi “Aholi bandligi toʻgʻrisida”gi Qonunning 3-, 13-, 34-, 38-, 39-, 40-, 41-moddalariga asosan, ushbu qaror talablari bajarilmagan taqdirda ish beruvchilar qonunchilikda belgilangan tartibda javobgarlikka tortiladi.

7. Oʻzbekiston Respublikasi Vazirlar mahkamasining 965-son qaror bilan tasdiqlangan Nizomning 21-bandi, 2-qismiga muvofiq, zaxiraga qoʻyiladigan ish oʻrinlarini yaratmaslik uchun jarima toʻlash tashkilotni majburiyatdan ozod qilmaydi.

8. Sherobod tumani Kambagʻallikni qisqartirish va bandlikka koʻmaklashish boʻlimi (Sh.Egamberdiyev):

ushbu qaror nusxasini 5 kun ichida 1-ilovada keltirilgan tashkilotlar rahbarlariga yetkazsin va bajarilishi ustidan nazoratni taʼminlasin;

ishga qabul qilish rad etilganda yoki ish oʻrinlari yaratilmaganda mansabdor shaxslarni belgilangan tartibda maʼmuriy javobgarlikka tortishni taʼminlasin.

9. Mazkur qaror ommaviy axborot vositalarida eʼlon qilinsin va hokimlikning rasmiy veb-saytiga joylashtirilsin.

10. Mazkur qarorning ijrosini nazorat qilish tuman hokimining birinchi oʻrinbosari U.Xamrayev zimmasiga yuklansin.

11. Mazkur qaror qabul qilingan kundan kuchga kiradi.