Oʻzbekiston Respublikasi Vazirlar Mahkamasining 2017-yil 5-dekabrdagi 965-son qarori bilan tasdiqlangan “Ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zaxiraga qoʻyish tartibi toʻgʼrisida”gi Nizomi, Oʻzbekiston Respublikasining 2020-yil 20-oktabr kungi “Аholi bandligi toʻgʼrisida”gi 642-sonli Qonunining 39-moddasi hamda Oʻzbekiston Respublikasi Prezidentining “Mehnat munosabatlari va kasbga tayyorlash tizimini takomillashtirish hamda ish beruvchilarni ragʻbatlantirishga oid qoʻshimcha chora-tadbirlar toʻgʻrisida” 2025-yil 4-avgustdagi PF-126-son Farmoniga hamda Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6-moddasiga asosan qaror qilaman:

1. Tuman Kambagʻallikni qisqartirish va bandlik boʻlimining 2025-yil 5-sentabr kungi 12/05-02/01/07-620-sonli xati maʼlumot uchun qabul qilinsin.

2. Oʻzbekiston Respublikasining 2020-yil 20-oktabr kungi “Аholi bandligi toʻgʼrisida”gi 642-sonli Qonunining 39-moddasiga muvofiq ijtimoiy himoyaga muhtoj va ish topishda qiynalayotgan shaxslarni ishga joylashtirish uchun tumandagi korxonalar, tashkilotlar, idoralar uchun ishchilarning roʻyxati boʼyicha oʼrtacha sonidan 56 odam, 3,0 foiz miqdorda shu hisobdan:

a) muqobil joylashtirish shakllarida tarbiyalangan yetim, ota-ona qaramogʻidan mahrum boʻlgan shaxslar 42,8 foiz 24 nafar;

b) kambagʻal oilalar reestridagi oilalarning aʼzolari 42,8 foiz 24 nafar;

c) nogironligi boʻlgan shaxslar uchun 9 foiz 5 nafar;

d) jazoni ijro etish muassasalaridan ozod qilingan yoki sudning qaroriga koʻra tibbiy tusdagi majburlov choralari qoʻllanilishidan ozod boʻlgan shaxslar uchun 3,6 foiz 2 nafar;

e) oilaviy (maishiy) zoʻravonlik natijasida jabrlangan shaxslar uchun 1,7 foiz 1 nafar ish oʻrinlari 2026-yil uchun band qilinsin.

3. Band qilinishi kerak boʻlgan ish oʻrinlari sonini va ularga qoʻyiladigan talablarni belgilash uchun maxsus komissiya 1-ilovaga muvofiq, 2026-yilda aholining ijtimoiy ehtiyojmand toifalarini ishga joylashtirish uchun zaxiraga qoʻyiladigan ish oʻrinlari maqsadli koʻrsatkichlari 2-ilovaga muvofiq, 2026-yilda aholining ijtimoiy ehtiyojmand toifalarini ishga joylashtirish uchun davlat tashkilotlari (budjet tashkilotlari va davlat ulushi 50 foizdan yuqori boʻlgan korxonalar) tomonidan majburiy zaxira qoʻyiladigan ish oʻrinlarining manzilli roʻyxati 3-ilovaga muvofiq, 2026-yilda aholining ijtimoiy ehtiyojmand toifalarini ishga joylashtirish uchun xodimlarining roʻyxatdagi oʻrtacha yillik soni yuz nafardan ortiqni tashkil etadigan xoʻjalik yurituvchi subyektlar (davlat ulushi 50 foizdan yuqori boʻlgan korxonalar bundan mustasno) tomonidan majburiy zaxira qoʻyiladigan ish oʻrinlarining manzilli roʻyxati 4-ilovaga tasdiqlansin.

4. Korxona va tashkilotlar rahbarlariga ijtimoiy muhofazaga muhtoj hamda ish topishda qiynalayotgan shaxslarni ish bilan taʼminlash uchun 2025-yil yakunlanishidan 10 kun oldin kvota ish oʻrinlari umumiy miqdorining kamida 25 foizi uchun, 2026-yilning 10-aprelidan kechiktirmasdan ish oʻrinlarining qolgan qismi 75 foizini tashkil qilish (ajratish yoki band qilib qoʻyish) haqidagi, yaʼni har bir kvota toifasi boʻyicha ish oʻrinlarini band qilish kasb va lavozimlari, mutaxassislar kesimidagi maʼlumotlarni va qaror asosida chiqarilgan buyruq nusxalarni tuman kambagʻallikni qisqartirish va bandlikka koʻmaklashish boʻlimiga topshirish vazifalari yuklatilsin.

5. Korxona, muassasa va idoralar rahbarlariga ijtimoiy himoyaga muhtoj va ish topishda qiynalayotgan shaxslar ish oʻrinlarining koʻrsatib oʻtilgan miqdorini Oʻzbekiston Respublikasi Vazirlar Mahkamasining 2017-yil 5-dekabr kungi 965-sonli qarori bilan tasdiqlangan “Ijtimoiy himoyaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zahiraga qoʻyish tartibini yanada takomillashtirish chora-tadbirlari toʻgʼrisida” gi Nizomga muvofiq belgilangan muddatda va tartib bilan yaratilishini (ajratilishini yoki band qilib qoʻyilishini) hamda ish oʻrinlarini sanitariya-gigiyena qoidalariga va ishchilar oʻz vazifalarini qiyinchiliklarsiz bajarishini taʼminlaydigan mehnat shartnomalariga muvofiq boʻlishini taʼminlasinlar.

6. Ushbu qarorni bajarmagan tashkilot va korxonalarning mansabdor shaxslariga Oʻzbekiston Respublikasi Vazirlar Mahkamasining “Ijtimoiy himoyaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zahiraga qoʻyish tartibini yanada takomillashtirish chora-tadbirlari toʻgʼrisida”gi Nizomning 21-bandiga muvofiq javobgarlikka tortiladi.

7. Oʻzbekiston Respublikasi Vazirlar Mahkamasining 2017-yil 5-dekabr kungi 965-sonli qarori bilan tasdiqlangan “Ijtimoiy himoyaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish oʻrinlarining eng kam sonini belgilash va zahiraga qoʻyish tartibini yanada takomillashtirish chora-tadbirlari toʻgʼrisida”gi Nizomga muvofiq ijtimoiy himoyaga muhtoj hamda ish izlayotgan shaxslar uchun band qilib qoʻyiladigan ish oʻrinlarini tuman hokimi tomonidan belgilangan miqdordan ortiqcha tashkillashtirilgan tashkilotlar shu ish oʻrinlarini tashkillashtirishga sarflangan mablagʼning bir qismini tuman kambagʼallikni qisqartirish va bandlikka koʻmaklashish boʻlimi bilan tuzilgan shartnoma asosida bandlikka koʼmaklashish davlat jamgʼarmasi mablagʼlari hisobidan qoplash huquqiga ega ekanliklari hisobga olinsin.

8. Tuman kambagʻallikni qisqartirish va bandlikka koʻmaklashish boʻlimi tomonidan Oʻzbekiston Respublikasi Kambagʻallikni qisqartirish va bandlik vazirining “Oʻzbekiston Respublikasi Bandlikka koʻmaklashish davlat jamgʼarmasi mablagʼlari hisobidan subsidiya va grantlar ajratish tartibi toʻgʼrisida Nizomni tasdiqlash haqida”gi buyrugʼiga asosan subsidiyalar ajratib berish tartibi amaliyotga joriy etilganligini hisobga olib, “Ijtimoiy ehtiyojmand aholi qatlamlariga mansub shaxslarni kvotalangan eng kam sondan ortiq miqdorda ishga qabul qilgan tashkilotlarga - har bir xodim uchun bir yil davomida oyiga bazaviy hisoblashning 2 baravari miqdorida haq toʼlash” toʻgʼrisidagi Nizomga asosan subsidiya ajratilishini taʼminlansin.

9. Tuman kambagʼallikni qisqartirish va bandlikka koʻmaklashish boʻlimi (R.Matsapayev) ushbu qarorni tegishli korxona va tashkilot rahbarlariga yetkazsin hamda uning bajarilishini nazorat qilishni taʼminlasin.

10. Ellikqalʼa tuman hokimining 2024-yil 28-oktabrdagi “Ijtimoiy muhofazaga muhtoj, ish topishda qiynalayotgan shaxslarni ishga joylashtirish uchun ish oʻrinlarini 2025-yil uchun band qilish toʻgʼrisida”gi 188-13-194-Q/24-sonli qarori oʼz kuchini yoʼqotgan deb hisoblansin.

11. Ushbu qaror rasman eʼlon qilingan kundan boshlab kuchga kiradi.

12. Ushbu qarorning ijrosini nazorat qilish tuman hokimining birinchi oʻrinbosari B.Аlimov zimmasiga yuklatilsin.