Ўзбекистон Республикаси Ҳукумати ва Словакия Республикаси Ҳукумати (кейинги ўринларда «Аҳдлашувчи Томонлар» деб аталувчилар),

икки давлат ўртасидаги дўстона алоқаларни эътироф этиб,

мавжуд иқтисодий муносабатларни давом эттириш ва мустаҳкамлаш муҳимлиги ва амалий аҳамиятини англаган ҳолда,

тенглик ва ўзаро манфаатдорликка асосланган уларнинг иқтисодий ҳамкорлигини ривожлантиришни қўллаб-қувватлаш истагида,

Ўзбекистон Республикаси ва Словакия Республикасининг миллий қонунчилигига мувофиқ,

уларнинг халқаро мажбуриятларини инобатга олган ҳолда,

қуйидагилар тўғрисида келишиб олдилар:

1.1. Мазкур Битимнинг мақсади Аҳдлашувчи Томонлар ўртасида тенглик ва ўзаро манфаатдорлик асосида ҳамда Аҳдлашувчи Томонлар давлатларининг миллий қонунчилигига мувофиқ иқтисодий ҳамкорликни ривожлантириш ва фаоллаштириш ҳисобланади.

1.2. Аҳдлашувчи Томонлар ўзларининг иқтисодий ва савдо алоқаларини бир-бирларининг суверенитети ва ҳудудий яхлитлигини ҳурмат қилиш асосида амалга оширадилар.

1.3. Ҳамкорлик қуйидаги соҳаларни ўз ичига олади, бироқ улар билан чекланмайди:

a) саноат ва қурилиш саноати;

b) транспорт ва логистика;

c) инвестициялар;

d) инновациялар;

e) энергетика ва тоғ-кон саноати;

f) туризм;

g) кичик ва ўрта бизнес;

h) стандартлаштириш, метрология ва мувофиқликни баҳолаш;

i) қишлоқ ва ўрмон хўжалиги;

j) атроф-муҳитни муҳофаза қилиш ва сув ресурсларини бошқариш;

k) телекоммуникация ва ахборот технологиялари;

l) ўзаро манфаатдорликка асосланган иқтисодий ҳамкорликнинг бошқа йўналишлари.

2.1. Аҳдлашувчи Томонлар:

a) икки мамлакат ўртасидаги иқтисодий ҳамкорликни ривожлантириш учун барча зарур чораларни кўрадилар;

b) ҳар икки мамлакатда ҳам иқтисодий вазият, қоидалар, иқтисодий дастурлар, бизнес ва ўзаро манфаатли бошқа тегишли маълумотлар тўғрисида ахборот алмашиш учун барча зарур чораларни кўрадилар;

c) икки томонлама иқтисодий ҳамкорликка тўсқинлик қиладиган муаммоларни аниқлайдилар ва ушбу муаммоларни ҳал этиш чораларини таклиф этадилар.

2.2. Аҳдлашувчи Томонлар:

a) икки мамлакат ҳудудида инвестиция фаолияти, иқтисодий ҳамкорлик, қўшма корхоналар ташкил этиш, компанияларнинг ваколатхоналари ва филиалларини очишни рағбатлантирадилар;

b) икки мамлакат хусусий секторларининг иккала мамлакатда бўлиб ўтадиган халқаро ярмарка ва кўргазмаларда иштирок этишини рағбатлантирадилар;

c) бизнес делегацияларининг ташрифлари алмашинувини қўллаб-қувватлайдилар ва рағбатлантирадилар;

d) тегишли ҳудудий ва маҳаллий тузилмаларни, касб-ҳунар палаталарини, тадбиркорлик бирлашмаларини ва хусусий секторни иқтисодий ҳамкорликнинг турли йўналишлари бўйича лойиҳаларни амалга ошириш доирасидаги мавжуд имкониятларни ўрганишга рағбатлантирадилар.

3.1. Аҳдлашувчи Томонлар икки томонлама иқтисодий ҳамкорликни мувофиқлаштириш ва рағбатлантириш мақсадида Аҳдлашувчи Томонларнинг тегишли ташкилотлари вакилларидан иборат Иқтисодий ҳамкорлик бўйича Ўзбек-Словак Қўшма комиссиясини (кейинги ўринларда «Қўшма комиссия» деб аталувчи) ташкил этадилар.

3.2. Қўшма комиссия иқтисодий ҳамкорликни қуйидаги йўллар билан мувофиқлаштиради ва ривожлантиради:

a) мазкур Битимнинг мақсадларини амалга оширилишини назорат қилиш;

b) мазкур Битимда кўрсатилган ёки кейинчалик Аҳдлашувчи Томонлар ўртасида келишилган соҳаларда ҳамкорликни ривожлантириш;

c) мазкур Битимда тузилиши мумкин бўлган ҳар қандай келишув ва лойиҳани амалга ошириш жараёнида юзага келиши мумкин бўлган тўсиқларни бартараф этиш бўйича тавсиялар ишлаб чиқиш.

3.3. Қўшма Комиссия Аҳдлашувчи Томонлардан бирининг сўровига кўра ва бошқа Аҳдлашувчи Томоннинг розилиги билан зарурият бўйича навбатма-навбат икки мамлакатда учрашади.

3.4. Ҳар бир Аҳдлашувчи Томон ўз тарафидан Раисни («Ҳамраис» деб аталувчи) тайинлайди ва ҳар бир Ҳамраис Қўшма комиссиянинг тегишли қисми учун котибни тайинлайди.

3.5. Қабул қилувчи Аҳдлашувчи Томон йиғилиш санаси ва кун тартибини таклиф этади ҳамда ушбу Аҳдлашувчи Томон котиби баённомани тайёрлаш учун масъул ҳисобланади.

3.6. Ҳар бир Аҳдлашувчи Томон ўз делегацияларининг Қўшма комиссия йиғилишлари билан боғлиқ харажатларини қоплайди.

3.7. Қўшма комиссия доирасида мазкур Битимнинг 1-моддаси 1.3-бандида кўрсатилган ҳамкорликнинг алоҳида йўналишлари билан шуғулланувчи ишчи гуруҳлар тузилади.

4.1. Мазкур Битим Ўзбекистон Республикаси ёки Словакия Республикаси тарафидан учинчи томонлар билан тузилган амалдаги халқаро шартномалардан келиб чиқадиган, шунингдек, иккала давлатнинг халқаро ташкилотларга аъзолигидан келиб чиқадиган ҳуқуқ ва мажбуриятларига дахл қилмайди.

4.2. Мазкур Битим Словакия Республикасининг Европа Иттифоқига аъзолигидан келиб чиқадиган мажбуриятларига дахл қилмаган ҳолда қўлланилади. Шу боис, мазкур Битимнинг қоидалари Европа Иттифоқи тўғрисидаги Шартнома бўйича мажбуриятларни бекор қиладиган ёки бошқача таъсир қиладиган тарзда талқин қилиниши ёки амалга оширилиши мумкин эмас.

Мазкур Битимни талқин қилиш ёки амалга оширишдан келиб чиқадиган ҳар қандай келишмовчиликлар Аҳдлашувчи Томонлар Ўртасида дипломатик каналлар орқали музокаралар ва маслаҳатлашувлар орқали ҳал қилинади.

Мазкур Битимга Аҳдлашувчи Томонларнинг ўзаро ёзма розилигига кўра ўзгартиришлар киритилиши мумкин. Бундай ўзгартиришлар мазкур Битимнинг ажралмас қисми ҳисобланадиган алоҳида баённомалар орқали расмийлаштирилади ва мазкур Битимнинг 7-моддасига мувофиқ кучга киради.

7.1. Мазкур Битим Аҳдлашувчи Томонлар тарафидан дипломатик каналлар орқали ушбу Битимнинг кучга кириши учун зарур бўлган тегишли давлат ички тартиб-тамойиллари бажарилганлигини тасдиқловчи охирги ёзма хабарномани олинган санадан сўнг 30 (ўттизинчи) кунда кучга киради.

7.2. Мазкур Битим 5 (беш) йил муддатга тузилади ва Аҳдлашувчи Томонлардан бири унинг амал қилишини тугатиш нияти тўғрисида белгиланган муддатдан 6 (олти) ой олдин бошқа Аҳдлашувчи Томонни ёзма равишда хабардор қилмаса, ўз-ўзидан кейинги беш (5) йиллик муддатларга амал қилади.

7.3. Мазкур Битим кучга кирган санадан эътиборан 1995 йил 16 майда Тошкент шаҳрида имзоланган Ўзбекистон Республикаси Ҳукумати ва Словакия Республикаси Ҳукумати ўртасида савдо-иқтисодий ва илмий-техникавий ҳамкорлик тўғрисидаги Битим ҳамда 1997 йил 23 декабрда Братислава шаҳрида имзоланган ушбу Битимнинг 1-рақамли Қўшимчаси қоидалари Ўзбекистон Республикаси ва Словакия Республикаси ўртасидаги ўзаро муносабатларга нисбатан қўлланилиши тугатилади.

Нъю-Йорк шаҳрида 2024 йил 24 сентябрь санасида икки нусхада, ҳар бири ўзбек, словак ва инглиз тилларида тузилди, бунда барча матнлар тенг аутентикдир.

Мазкур Битим қоидаларини талқин қилишда тафовутлар юзага келган тақдирда, инглиз тилидаги матн устувор ҳисобланади.