Ўзбекистон Республикаси Ҳукумати ва Қозоғистон Республикаси Ҳукумати, кейинги ўринларда «Томонлар» деб аталувчилар,

1998 йил 31 октябрда имзоланган Ўзбекистон Республикаси ва Қозоғистон Республикаси ўртасидаги абадий дўстлик тўғрисидаги Шартноманинг қоидаларига асосланган ҳолда,

икки халқ ўртасидаги анъанавий дўстона муносабатларни мустаҳкамлашга интилиб,

фавқулодда вазиятларни олдини олиш ва бартараф этиш соҳасидаги ҳамкорлик Томонлар давлатларининг фаровонлиги ва хавфсизлигига кўмаклашишини эътироф этиб,

табиий ва техноген тусдаги фавқулодда вазиятларнинг Томонлар давлатлари учун хавфини англаб,

фавқулодда вазиятларни олдини олиш ва бартараф этиш соҳасидаги илмий-техникавий маълумот алмашинувининг Томонлар давлатлари учун фойдали эканлигини инобатга олиб,

Томонлардан бирининг куч ва воситалари билан бартараф этиб бўлмайдиган фавқулодда вазиятлар келиб чиқиши эҳтимоли ҳамда иккала давлатнинг ушбу билан келиб чиқадиган фавқулодда вазиятларнинг олдини олиш ва бартараф этиш мақсадидаги мувофиқлаштирилган ҳаракатларига бўлган эҳтиёжни эътиборга олиб,

фавқулодда вазиятларнинг олдини олиш ва уларни бартараф этиш учун самарали амалий чораларни ишлаб чиқиш ва қўллашда давлатлар ўртасида ҳамкорликни мустаҳкамлаш зарурлигига ишонч ҳосил қилиб,

Бирлашган Миллатлар Ташкилоти ва бошқа халқаро ташкилотларнинг фавқулодда вазиятларнинг олдини олиш ва унинг оқибатларини бартараф этиш соҳасидаги ўрнини инобатга олиб,

давлат суверенитети ва тенг ҳуқуқлилик принципларини ҳурмат қилган ҳолда,

қуйидагилар тўғрисида келишиб олдилар:

Мазкур Битимда қўлланиладиган атамалар қуйидаги маъноларга эга:

«сўровчи Томон» — бошқа Томонга ёрдам кўрсатиш гуруҳларини, жиҳозлар ва таъминот материалларини юбориш тўғрисидаги илтимос билан мурожаат қиладиган Томон;

«тақдим этувчи Томон» — бошқа Томоннинг ёрдам кўрсатиш гуруҳларини, жиҳозларини ва таъминот материалларини юбориш тўғрисидаги илтимосини қаноатлантирувчи Томон;

«фавқулодда вазият» — одамлар қурбон бўлишига, уларнинг соғлигига ёки атроф табиий муҳитга зарар етишига, жиддий моддий йўқотишларга ва аҳолининг ҳаёт кечириш шароитига зиён етишига олиб келиши мумкин бўлган ёки олиб келган авария, техноген ва табиий хавфли ҳодиса, табиий ёки бошқа офат натижасида юзага келган муайян ҳудуддаги ҳолат;

«фавқулодда вазиятнинг олдини олиш» — олдиндан Томонлар тарафидан ўтказиладиган ва фавқулодда вазиятлар рўй бериш хавфини имкон қадар камайтиришга, шунингдек, бундай вазиятлар рўй берган тақдирда, одамларнинг ҳаётини асраб қолиш ва уларнинг соғлиғини сақлашга, атроф табиий муҳитга зарарлар ва моддий талофатларнинг ҳажмини камайтиришга қаратилган тадбирлар мажмуи;

«авария-қутқарув ишлари» — фавқулодда вазиятлар зонасидаги одамларнинг ҳаётини асраб қолиш ва соғлиғини сақлаш, аҳолига тезкор тиббий ва руҳий ёрдам кўрсатиш, моддий ва маданий бойликларни ҳамда атроф табиий муҳитни муҳофаза қилиш, фавқулодда вазиятларнинг кенгайишига йўл қўймасликка ва бартараф этишга ёки уларга хос бўлган хавфли омилларни мумкин бўлган даражада таъсирини камайтиришга қаратилган ҳаракатлар;

«фавқулодда вазиятни бартараф этиш» — вазиятлар рўй берганда ўтказиладиган ҳамда одамларнинг ҳаётини асраб қолишга ва соғлиғини сақлашга, атроф табиий муҳитга зарарлар ва моддий талофатларнинг ҳажмини камайтиришга, шунингдек, фавқулодда вазиятлар зоналарининг кенгайишига йўл қўймасликка ва уларга хос бўлган хавфли омилларнинг ҳаракатини тугатишга қаратилган авария-қутқарув ишлари ва бошқа кечиктириб бўлмайдиган ишлар;

«фавқулодда вазият зонаси» — фавқулодда вазият юзага келган Томон давлатининг ҳудуди;

«ваколатли орган» — мазкур Битимни амалга ошириш билан боғлиқ ишларга раҳбарлик қилиш ва мувофиқлаштириш учун ҳар иккала Томондан тайинланадиган давлат органи;

«ёрдам кўрсатиш гуруҳи» — ёрдам кўрсатиш учун мўлжалланган фавқулодда вазиятлар зонасида ҳаракатларни амалга ошириш учун зарур бўлган жиҳозлар билан етарли даражада таъминланган, тақдим этувчи Томон мутахассисларининг (зарурат бўлганда, хизмат итлари билан) уюшган гуруҳи;

«жиҳоз» — ёрдам кўрсатиш гуруҳининг материаллари, техника ва транспорт воситалари, анжоми, шу жумладан, хизмат итлари, гуруҳ аъзоларининг шахсий анжоми, дори воситалари ва тиббий жиҳоз;

«таъминот материаллари» — фавқулодда вазият оқибатида жабрланган аҳоли ўртасида бепул тақсимлаш учун мўлжалланган моддий воситалар.

Томонлар мазкур Битимни бажариш учун қуйидаги ваколатли органларни тайинлайдилар:

Ўзбекистон томонидан — Ўзбекистон Республикаси Фавқулодда вазиятлар вазирлиги;

Қозоғистон томонидан — Қозоғистон Республикаси Фавқулодда вазиятлар вазирлиги.

Томонлар бошқа ваколатли органлар тайинланган ёки мавжуд ваколатли органларнинг номлари ўзгарган тақдирда, бир-бирларини бу ҳақида дипломатик каналлар орқали хабардор этадилар.

Мазкур Битимга мувофиқ барча фаолият Томонлар давлатларининг қонунчилиги асосида амалга оширилади ва ҳар бир Томоннинг зарур маблағлари мавжудлиги инобатга олинган ҳолда олиб борилади.

Мазкур Битим доирасидаги ҳамкорлик қуйидагиларни назарда тутади:

хавфли техноген ва экологик жараёнлар, табиий ҳодисалар мониторингини ташкил этиш ва ўтказиш;

табиий ва техноген тусдаги фавқулодда вазиятларни мониторинг қилиш ва олдиндан аниқлаш тўғрисида мунтазам маълумот алмашинуви;

аҳолини фавқулодда вазиятлардаги, шу жумладан, биринчи тиббий ёрдам кўрсатиш бўйича ҳаракатларга тайёрлашни ташкил этишда тажриба алмашиш;

фавқулодда вазиятларни бартараф этишда тегишли давлат органларининг ҳамкорлигини ташкил этиш;

атроф табиий муҳит ва аҳоли учун саноат авариялари, фалокатлар ва табиий офатлар натижасида келиб чиқиши мумкин бўлган ифлосланишлар билан боғлиқ хавф-хатарни баҳолаш;

табиий офатларни олдини олиш ва бартараф этиш;

илмий-тадқиқот лойиҳаларини биргаликда режалаштириш, ишлаб чиқиш ва амалга ошириш, илмий-техникавий адабиёт ва тадқиқот ишлари натижалари билан алмашиш;

маълумотлар, даврий нашрлар, услубий ва бошқа адабиётлар, видео ва фотоматериаллар, шунингдек, фавқулодда вазиятларнинг олдини олиш ва бартараф этиш соҳасидаги технологиялар билан алмашиш;

қўшма конференциялар, семинарлар, ишчи мажлислар, ўқув машғулотлари ва машқларни ташкил қилиш;

қўшма нашрлар ва маърузаларни тайёрлаш;

бошқа Томон давлати ўқув муассасаларида мутахассислар тайёрлаш, стажёрлар, ўқитувчилар, олимлар ва мутахассислар билан алмашиш;

фавқулодда вазиятларни бартараф этишда ўзаро ёрдам кўрсатиш;

Томон давлатининг ҳудуди орқали ҳаракатланадиган инсонпарварлик ёрдам юкларини учинчи давлатдан ёки учинчи давлатга ўтказиб юборишда кўмак кўрсатиш;

трансчегаравий ҳудудларда юзага келган зилзила оқибатларини ўрганишда қўшма макросейсмик тадқиқотларни ташкил қилиш ва ўтказиш;

фавқулодда вазиятларнинг олдини олиш ва бартараф этиш соҳасида Томонлар давлатларининг ваколатли органлари ўртасида келишиладиган бошқа фаолият.

Томонлар, зарур ҳолларда, Томонлар давлатларининг фавқулодда вазиятларнинг олдини олиш ва бартараф этиш соҳасида фаолият юритадиган давлат ташкилотлари ва муассасалари, юридик ва жисмоний шахслари ўртасидаги ҳамкорликка кўмаклашадилар.

Башарти Томонлар ўзгача келишувга эришмаган бўлсалар, тақдим этувчи Томон фавқулодда вазиятларни бартараф этишда ёрдам кўрсатиш билан бевосита боғлиқ бўлмаган, мазкур Битимнинг 3-моддасида белгиланган фаолиятда иштирок этишда ўз вакилларининг белгиланган манзилгача бориб-келиш, яшаш ва овқатланиш бўйича харажатларини қоплайди.

Башарти Томонлар ўзгача келишувга эришмаган бўлсалар, қабул қилувчи Томон қўшма конференциялар, семинарлар, ишчи йиғилишлар, ўқув машғулотлари ва машқларни ташкил этиш, шунингдек, ўз давлати ҳудудида тақдим этувчи Томон вакилларининг ҳаракатланиши бўйича харажатларини қоплайди.

Ёрдам кўрсатиш фавқулодда вазият хусусияти тўғрисида маълумотлар тақдим қилинган, зарур бўлган ёрдам турлари, ҳажми, жойи ва муддати кўрсатилган сўровчи Томоннинг ёзма сўровномаси асосида амалга оширилади.

Тақдим этувчи Томон қисқа муддатларда сўровномани кўриб чиқади ҳамда ёрдам кўрсатишнинг имконияти, ҳажми ва шартлари ёки ёрдам бериш имкониятининг мавжуд эмаслиги тўғрисида сўровчи Томонни хабардор этади.

Ёрдам кўрсатиш гуруҳларига раҳбарлик қилиш сўровчи Томоннинг ваколатли органи томонидан ушбу гуруҳлар раҳбарлари орқали амалга оширилади.

Фавқулодда вазиятларни бартараф этиш ёрдам кўрсатиш гуруҳлари, тегишли ускуналар, таъминот материалларини юбориш орқали ёки бошқа сўралаётган шаклда ёрдам кўрсатилади.

Ёрдам кўрсатиш гуруҳлари фавқулодда вазият зонасида авария-қутқарув ишларини бажарадилар.

Сўровчи Томон тақдим этувчи Томоннинг ёрдам кўрсатиш гуруҳлари раҳбарларини фавқулодда вазият зонасида ва аниқ иш участкаларида юзага келган вазият бўйича хабардор қилади, зарур ҳолларда, ушбу гуруҳларни таржимонлар ва алоқа воситалари, шунингдек, хавфсизлик ва тез тиббий ёрдам билан таъминлайди, уларнинг ҳаракатларини мувофиқлаштиради.

Ёрдам кўрсатиш гуруҳлари фавқулодда вазият зонасида 72 соат давомида мустақил ҳаракат қилишлари учун етарли даражада жиҳозланган бўлиши керак.

Башарти Томонлар ўртасида қўшимча равишда бошқача келишилмаган бўлса, захира жиҳозлари тугаганда, сўровчи Томон кўрсатилган гуруҳларни улар кейинги ишини давом эттиришлари учун зарур воситалар билан таъминлайди.

Ёрдам кўрсатиш гуруҳлари аъзолари сўровчи Томон давлатининг Давлат чегарасини халқаро қатнов учун очиқ бўлган ўтиш пунктлари орқали Томонлар давлатлари иштирокчи ҳисобланган халқаро шартномаларда белгиланган тартибга кўра шахсни тасдиқловчи ҳужжатлар бўйича кесиб ўтадилар.

Гуруҳ раҳбари ёрдам кўрсатиш гуруҳ аъзоларининг рўйхати ҳамда тақдим этувчи Томоннинг ваколатли органи томонидан берилган унинг ваколатларини тасдиқловчи ҳужжатга эга бўлиши лозим.

Ёрдам кўрсатиш гуруҳлари аъзолари сўровчи Томон давлатининг ҳудудида бўлган вақтларида ушбу давлат қонунчилигига риоя қилишлари лозим.

Бунда улар тақдим этувчи Томон давлатининг меҳнат, жиноятчилик ва маъмурий ҳамда улар билан боғлиқ масалалар соҳасидаги юрисдикцияси остида бўладилар.

Ёрдам кўрсатиш гуруҳи таркибига кирувчи ҳарбий хизматчига нисбатан тақдим этувчи Томон давлатининг ҳарбий хизматчи мақомини тартибга солувчи қонунчилигининг меҳнат ҳуқуқий муносабатлари ва ижтимоий-иқтисодий кафолатларга оид соҳаси қўлланилади.

Ёрдам кўрсатиш гуруҳларининг ҳаракатланиши, уларнинг жиҳозлари ва таъминот материалларини ташиш автомобиль, темир йўл ёки ҳаво транспорти орқали амалга оширилади.

Ёрдам кўрсатиш учун қайд этилган транспорт турларидан фойдаланиш тартиби Томонлар ваколатли органлари тарафидан тегишли давлат органлари билан келишилган ҳолда белгиланади.

Фавқулодда вазиятларни бартараф этишда ёрдам кўрсатиш учун сўровчи Томон давлатининг ҳудудига олиб кириладиган ва тақдим этувчи Томон давлат ҳудудидан олиб чиқиладиган жиҳоз ва таъминот материаллари божхона божлари, солиқлар ва йиғимлардан озод этилади.

Жиҳозлар ва таъминот материалларининг божхона расмийлаштируви соддалаштирилган шаклда ва ёрдам кўрсатиш гуруҳининг таркиби, олиб кириладиган ёки олиб чиқиладиган жиҳозлар ва таъминот материалларининг рўйхати кўрсатиладиган Томон ваколатли органлари тарафидан бериладиган хабарномаларга мувофиқ устувор равишда амалга оширилади.

Ёрдам кўрсатиш гуруҳларига сўровчи Томон давлат ҳудудига фақатгина мазкур модданинг иккинчи хатбошисида қайд этилган рўйхатдаги жиҳоз ва таъминот материалларини олиб киришга рухсат берилади.

Жабрланганларга тез тиббий ёрдам кўрсатиш зарур бўлган ҳолларда, сўровчи Томон давлат ҳудудига зарур миқдорда таркибида гиёҳвандлик ва психотроп моддалари бўлган тиббий препаратлар ушбу давлат билан келишган ҳолда ҳамда сўровчи Томон давлатининг қонунчилигига мувофиқ олиб кирилиши мумкин.

Бундай ҳолатда, ёрдам кўрсатиш гуруҳи раҳбари тақдим қилувчи ва сўровчи Томонларнинг божхона органларига таркибида гиёҳвандлик ва психотроп моддалари мавжуд бўлган тиббий препаратлар мавжудлиги ҳақида уларнинг номенклатура ва миқдори кўрсатилган декларацияни тақдим этади.

Таркибида гиёҳвандлик ва психотроп моддалари мавжуд бўлган тиббий препаратлардан фақатгина тақдим қилувчи Томоннинг малакали тиббиёт ходими фойдаланишга ҳақлидир.

Сўровчи Томоннинг тегишли мансабдор шахслари таркибида гиёҳвандлик ва психотроп моддалари мавжуд бўлган ушбу тиббий препаратларнинг ишлатилиши ва сақланишини назорат қилишга ҳақлидирлар.

Таркибида гиёҳвандлик ва психотроп моддалари мавжуд бўлган фойдаланилмаган тиббий препаратлар сўровчи Томон давлат ҳудудидан ушбу препаратларнинг номенклатураси ва миқдорини тасдиқловчи ҳужжатлар асосида олиб чиқилиши шарт.

Таркибида гиёҳвандлик ва психотроп моддалари мавжуд бўлган фойдаланилган тиббий препаратлар бўйича сўровчи Томоннинг божхона органларига ёрдам кўрсатиш гуруҳи раҳбари ва шифокори имзолаган ҳамда сўровчи Томоннинг ваколатли органи вакили тасдиқлаган далолатнома тақдим этилади.

Ёрдам кўрсатиш ишлари якунланганидан сўнг сўровчи Томон давлат ҳудудига олиб кирилган жиҳоз (тўлиқ фойдаланилган ёки йўқ қилинган жиҳоздан ташқари) тақдим этувчи Томон давлат ҳудудига олиб кетилиши лозим.

Башарти юзага келган айрим вазиятлар туфайли жиҳозларни олиб чиқиб кетишнинг имконияти бўлмаса, сўровчи Томоннинг ваколатли органига келишилган шартлар асосида ёрдам сифатида беғараз берилиши мумкин.

Бундай ҳолатда, бериладиган жиҳознинг турлари, миқдори ва жойлашган жойи кўрсатилган ҳолда сўровчи Томон ваколатли ва божхона органлари хабардор қилиниши лозим.

Жиҳозларнинг йўқ қилинганлиги ёки тўлиқ ишлатилганлиги ҳамда жабрланган аҳоли ўртасида таъминот материалларининг тақсимланганлиги факти ҳужжатлар билан тасдиқланиши шарт.

Тақдим этувчи Томоннинг ваколатли органи ҳаво кемаларининг тури ва танитувчи белгилари, йўналиши, экипаж аъзоларининг сони, юк хусусияти, парвоз қилиш, қўниш жойи ва вақтини кўрсатган ҳолда ёрдам бериш учун ҳаво кемаларидан фойдаланиш тўғрисидаги қарори тўғрисида сўровчи Томоннинг ваколатли органини хабардор қилади.

Сўровчи Томон ўз давлати ҳудудининг маълум манзилигача учиб боришга рухсат беради.

Тез ёрдам кўрсатиш ва бир давлат ҳудудидан бошқа давлат ҳудудидаги белгиланган пунктга куч ва воситаларни ваколатли орган ҳаво кемалари орқали тезкор тарзда юбориш мақсадида Томонларнинг ваколатли органлари Томонлар давлатларининг қонунчилигига мувофиқ, ҳаво кемаларидан фойдаланиш имконияти тўғрисида қўшимча йўриқнома ва устувор равишда фавқулодда вазиятларни бартараф этишда ҳаво кемаларининг давлат чегараларини кесиб ўтиш тартибини соддалаштириш масалаларида давлат органлари вакилларининг (чегара, божхона, фитосанитар, карантин хизматлари) ўзаро ҳамкорлиги механизмини ишлаб чиқадилар ва келишадилар.

Парвозлар Халқаро фуқаро авиацияси ташкилоти ва Томонлар давлатлари тарафидан ўрнатилган қоидаларга мувофиқ амалга оширилади.

Башарти Томонлар ўзгача келишувга эришмаган бўлсалар, сўровчи Томон тақдим этувчи Томоннинг ёрдам кўрсатиш билан боғлиқ харажатларини қоплайди.

Сўровчи Томон ўзининг ёрдам бериш тўғрисидаги сўровномасини исталган вақтда бекор қилиши мумкин.

Бундай ҳолатда, тақдим этувчи Томон сарфланган харажатлари учун товон олиш ҳуқуқига эга.

Башарти Томонлар ўзгача келишувга эришмаган бўлсалар, харажатлар тақдим этувчи Томоннинг талабномаси келиб тушгач, 30 иш куни мобайнида қопланади.

Тақдим этувчи Томон ёрдам кўрсатиш гуруҳлари аъзоларининг суғурта қилинишини таъминлайди.

Суғурталашни расмийлаштириш бўйича харажатлар ёрдам кўрсатиш бўйича қилинадиган умумий харажатларга киритилади.

Тақдим этувчи Томон ҳаво кемаларининг учиб ўтиши, қўниши, аэродромда тўхтаб туриши ва ундан парвоз қилиши, шунингдек, аэронавигация хизматлари учун тўловдан озод қилинади.

Тақдим этувчи Томон ҳаво кемаларига ёнилғи ва техник хизмат кўрсатиш харажатларини қоплаш масалалари ҳар бир аниқ ҳолатда алоҳида ҳал этилади.

Башарти ҳар бир аниқ ҳолатда ўзгача тартиб келишилмаган бўлса, Томонлар мазкур Битимни амалга ошириш жараёнида келиб чиқадиган харажатларни Томонлар давлатлари қонунчилигида назарда тутилган маблағлар доирасида мустақил равишда қоплайдилар.

Сўровчи Томон тақдим этувчи Томоннинг ёрдам кўрсатиш гуруҳи аъзолари вафот этганда ва жароҳатланда, шунингдек, ушбу Томоннинг асбоб-ускунаси ёки бошқа мулки йўқ қилинганда ёки зарар етказилганда агар бундай зарар мазкур Битимни амалга ошириш билан боғлиқ вазифаларни бажариш жараёнида етказилган бўлса, тақдим этувчи Томонга товон тўлайди.

Товон миқдори ҳар бир аниқ ҳолатда алоҳида келишиб олинади.

Тақдим этувчи Томон, ёрдам кўрсатиш гуруҳи аъзоси тарафидан сўровчи Томон давлат ҳудудида ёрдам кўрсатиш билан тўғридан-тўғри боғлиқ бўлмаган фаолият жараёнида жисмоний ёки юридик шахсга етказилган зарарни сўровчи Томоннинг қонунчилигига мувофиқ қоплайди.

Тақдим этувчи Томоннинг ёрдам кўрсатиш гуруҳи аъзоси сўровчи Томон ҳудудида мазкур Битим қоидаларини амалга ошириш билан боғлиқ вазифаларни бажариши жараёнида жисмоний ёки юридик шахсга зарар етказса, етказилган зарар сўровчи Томон тарафидан ўз давлати қонунчилигига мувофиқ қопланиши лозим.

Тақдим этувчи Томоннинг ёрдам кўрсатиш гуруҳи аъзоси томонидан қасддан ёки қўпол равишда бепарволик туфайли етказилган зарар тақдим этувчи Томон тарафидан қопланади.

Мазкур Битим доирасида олиб борилаётган фаолият натижасида олинган маълумот, Томонлар давлатлар қонунчилигига мувофиқ ошкор этилмайдиган маълумотдан ташқари, башарти Томонларнинг ваколатли органлари ёзма шаклда ўзгача келишувга эришмаган бўлсалар, Томонлардан ҳар бирининг кундалик амалиёт ва кўрсатмаларига мувофиқ эълон қилинади ва фойдаланилади.

Мазкур Битим қоидаларини талқин қилиш ва (ёки) қўллаш юзасидан келиб чиқадиган низо ва келишмовчиликлар Томонлар ўртасида музокаралар ва маслаҳатлашувлар орқали ҳал этилади.

Мазкур Битимга Томонларнинг ўзаро ёзма розилигига кўра унинг ажралмас қисми ҳисобланадиган ва мазкур Битимнинг 16-моддасида белгиланган тартибда кучга кирадиган алоҳида баённомалар билан расмийлаштириладиган ўзгартириш ва қўшимчалар киритилиши мумкин.

Мазкур Битим Томонлар унинг кучга кириши учун зарур бўлган давлат ички процедураларини бажарилганликлари тўғрисида дипломатик каналлар орқали охирги ёзма хабарнома олинган санадан бошлаб кучга киради.

Мазкур Битим номуайян муддатга тузилади ва Томонлардан бири бошқа Томоннинг мазкур Битим амал қилишини тугатиш нияти тўғрисидаги ёзма хабарномасини дипломатик каналлар орқали олган санадан бошлаб, олти ой ўтгунга қадар амалда бўлади.

Башарти Томонлар ўзгача келишмасалар, мазкур Битим амал қилишининг тугатилиши унинг амал қилиши даврида бошланган ва тугатилмаган у билан боғлиқ олиб борилаётган фаолиятга дахл қилмайди.

Нур-Султон шаҳрида 2021 йил 6 декабрда икки асл нусхада, ҳар бири ўзбек, қозоқ ва рус тилларида тузилди, бунда барча матнлар бир хил юридик кучга эга.

Мазкур Битим матнлари ўртасида тафовутлар юзага келган тақдирда, рус тилидаги матн устувор кучга эга бўлади.