Ўзбекистон Республикаси Президентининг «Коммунал хизматни бошқариш тизимини янада ислоҳ қилиш тўғрисида» 2000 йил 19 декабрдаги ПФ-2791-сон Фармонига ҳамда Ўзбекистон Республикаси Вазирлар Маҳкамасининг «Коммунал хизмат кўрсатиш тизими фаолиятини ташкил этишни такомиллаштириш тўғрисида» 2000 йил 21 декабрдаги 493-сон қарорига мувофиқ Вазирлар Маҳкамаси қарор қилади:

1. Қуйидагилар:

«Ўзкоммунхизмат» агентлиги тўғрисидаги Низом 1-иловага мувофиқ;

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ҳудудий коммунал-фойдаланиш бирлашмаси тўғрисидаги Намунавий низом 2-иловага мувофиқ тасдиқлансин.

2. Белгилаб қўйилсинки, «Ўзкоммунхизмат» агентлиги ўз ваколати доирасида Ўзбекистон Республикаси Коммунал хизмат кўрсатиш вазирлигининг ҳуқуқий вориси ҳисобланади.

3. Вазирлар Маҳкамасининг 3-иловага мувофиқ қарорларига ўзгартириш ва қўшимчалар киритилсин.

4. Ўзбекистон Республикаси Вазирлар Маҳкамасининг 4-иловага мувофиқ қарорлари ўз кучини йўқотган деб ҳисоблансин.

5. Мазкур қарорнинг бажарилишини назорат қилиш Ўзбекистон Республикасининг Бош вазири Котибиятига юклансин.

1. Кейинги ўринларда Агентлик деб юритиладиган «Ўзкоммунхизмат» агентлиги ўз фаолиятида Ўзбекистон Республикаси Вазирлар Маҳкамасига бўйсунади.

2. Агентлик ўз фаолиятида Ўзбекистон Республикасининг Конституциясига, Ўзбекистон Республикаси қонунларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига ҳамда мазкур Низомга амал қилади.

3. Агентлик коммунал хизмат кўрсатишни ислоҳ қилиш, бозор иқтисодиёти шароитларида коммунал хизмат кўрсатишни самарали бошқариш бўйича тажриба ўрганиш ва айирбошлаш масалалари юзасидан халқаро ташкилотларда Ўзбекистон Республикасининг манфаатларини ифодалашга вакил қилинган орган ҳисобланади.

4. Агентлик юридик шахс ҳисобланади, Ўзбекистон Республикасининг Давлат герби тасвири туширилган, ўз номи давлат тилида ёзилган муҳрга ва банк ҳисоб рақамларига эгадир.

5. Қуйидагилар агентликнинг асосий вазифалари ҳисобланади:

табиий ва суюлтирилган газ билан узлуксиз таъминлаш, минтақалараро сув қувурларининг барқарор ва ишончли ишлашини таъминлаш;

минтақалараро сув қувурларини, коммунал газ сотиш тармоқларини ривожлантириш ва улардан фойдаланиш соҳасида ягона техника сиёсатини шакллантириш ва ўтказиш, улар қурилиши бўйича буюртмачи функциясини бажариш;

коммунал хизмат кўрсатиш тизимини ислоҳ қилиш ишларини мувофиқлаштириш, коммунал хизмат кўрсатиш соҳасида норматив-ҳуқуқий ҳужжатларни, техник-иқтисодий шартларни белгиланган тартибда ишлаб чиқиш ва тасдиқлаш;

давлат бошқаруви маҳаллий органлари, хўжалик юритувчи субъектлар ва фуқаролар томонидан коммунал хизмат кўрсатиш соҳасидаги амалдаги қонун ҳужжатларига, белгиланган техник шартлар ва талабларга риоя қилинишини назорат қилиш;

маиший чиқитларни тўплаш, фойдали суратда ишлатиш ва қайта ишлаш масалалари бўйича ягона сиёсатни шакллантириш ва унинг ҳолатини ўрганиш;

тармоққа хорижий инвестициялар ва технологияларни жалб этиш, шу жумладан қўшма корхоналар ташкил этиш ҳисобига жалб этиш.

6. Агентлик ўзига юкланган вазифаларга мувофиқ қуйидаги функцияларни бажаради:

комплекс техник-иқтисодий таҳлил асосида коммунал газ сотиш хўжалигидаги ишларнинг аҳволини ва минтақавий сув қувурлари ишини таҳлил қилади, уларни ривожлантириш тенденцияларини ўрганади ва қонуниятларини умумлаштиради, ушбу соҳада ягона техника сиёсатини шакллантиради ва амалга оширади;

Молия вазирлиги билан биргаликда аҳолини табиий ва суюлтирилган газ билан таъминлашга доир тариф сиёсатини шакллантиришда қатнашади;

норматив-ҳуқуқий ҳужжатлар лойиҳаларини белгиланган тартибда ишлаб чиқади ва тасдиқлаш учун Ўзбекистон Республикаси Ҳукуматига киритади, уй-жой-коммунал муносабатлар бўйича комплекс давлат дастурлари, қонунлар ва бошқа норматив-ҳуқуқий ҳужжатлар лойиҳаларини ишлаб чиқишда қатнашади;

маблағ билан таъминлаш манбаларидан қатъи назар белгиланган тартибда олиб келувчи ва посёлкалараро газ тармоқлари қурилиши, шунингдек Ҳукуматнинг топшириғи бўйича коммунал мақсаддаги бошқа объектлар қурилиши бўйича буюртмачи функциясини бажаради;

коммунал мақсадлардаги илғор технологиялар, асбоб-ускуналар, приборлар, машина ва механизмлар жорий этилиши юзасидан таклифлар тайёрлайди, уларни ишлаб чиқиш ва жиҳозлаш ишларини ташкил этади, Ўзбекистон Республикаси коммунал хўжалиги эҳтиёжлари учун янги машиналар, асбоб-ускуналар ва приборлар яратиш бўйича буюртмачи бўлади;

бевосита Агентлик бошқарувига кирувчи коммунал хизмат кўрсатиш корхоналари ва ташкилотларини хусусийлаштириш масалалари юзасидан таклифлар тайёрлайди ва уларни ҳал этишда қатнашади, коммунал хизматлар кўрсатиш, инжиниринг, консалтинг, аудиторлик соҳасида ва уй-жой-коммунал тармоқнинг бошқа ташкилотларида рақобат муҳити яратилишига кўмаклашади;

коммунал хўжалик ҳамда машиналар, приборлар, асбоб-ускуналар ишлаб чиқариш масалалари бўйича хорижий мамлакатлар ва халқаро ташкилотлар билан илмий - техник ва иқтисодий ҳамкорлик қилади, хорижий фирмалар ҳамда бошқа корхоналар ва ташкилотлар билан тўғридан-тўғри алоқалар ўрнатилишида маҳаллий корхоналар ва ташкилотларга кўмаклашади;

тармоққа хорижий инвестициялар ва технологияларни жалб қилиш, шу жумладан қўшма корхоналар ташкил этиш, Ҳукумат кафолати остидаги кредитлар ҳисобига хорижий инвестициялар ва технологияларни жалб қилиш ишини таъминлайди ва мувофиқлаштиради;

минтақалараро сув қувурларини, газ сотиш ташкилотларини ва шартнома асосида бошқа корхоналар ва ташкилотларни энг муҳим моддий-техника ресурслари билан таъминлайди;

Иқтисодиёт вазирлиги ҳамда «Ўзбекнефтгаз» миллий холдинг компанияси билан биргаликда тасдиқланган нормативлар бўйича улгуржи ва турли истеъмолчилар (аҳоли)нинг табиий ва суюлтирилган газни истеъмол қилиш балансини тузишда қатнашади;

Даромад (фойда) солиғини ҳисоблаб чиқариш ва тўлаш бўйича Давлат бюджети билан ўзаро ҳисоб-китобларни марказлаштирилган тартибда амалга оширади;

ушбу сектор корхоналари фаолиятини мунтазам равишда мониторинг қилиш, ривожланиш тенденцияларини ва илғор тажрибани ўрганиш йўли билан маиший чиқитларни тўплаш, уларни фойдали суратда ишлатиш ва қайта ишлаш масалалари бўйича ягона техника сиёсатини амалга оширади, унинг жорий этилишига кўмаклашади;

ўз ваколатлари доирасида коммунал хизмат кўрсатиш корхоналари учун мутахассислар, шу жумладан шартнома асосида ўқитилиши, тайёрланиши ва қайта тайёрланишини ҳамда кадрлар малакасини оширишни ташкил этади;

техника сиёсатини ўтказади, меҳнатни муҳофаза қилиш бўйича норматив-ҳуқуқий ҳужжатларни ишлаб чиқади ҳамда Агентлик таркибига кирувчи бўлинмаларда меҳнатни муҳофаза қилиш хизматларига методик раҳбарлик қилади, ўлимга олиб келган гуруҳли бахтсиз ҳодисаларни текширишда қатнашади, меҳнатни муҳофаза қилиш соҳасида илғор тажрибани ўрганади ва умумлаштиради.

Ўзбекистон Республикаси Ҳукуматининг топшириғига кўра:

газ таъминоти, сув таъминоти, канализация, иссиқлик таъминоти, санитария билан боғлиқ тозалаш, ирригация ва ҳудудлар, аҳоли пунктлари дренажи тизимининг концепциясини, истиқболли дастурларини ва ривожлантириш схемаларини ишлаб чиқади, улар амалга оширилишини мониторинг қилади;

манфаатдор республика бошқарув органлари ва жойлардаги ҳокимият органлари билан ўзаро ҳамкорликда уй-жой-коммунал хизматларнинг тариф сиёсатини, истеъмол нормаларини ишлаб чиқиш ва такомиллаштириш юзасидан методолик иш олиб боради;

минтақалараро сув қувурлари объектлари ва коммунал газ сотиш тармоғи бўйича илмий-тадқиқот ва лойиҳа-қидирув ишларини амалга ошириш стратегиясини шакллантиради ва уларнинг бажарилишини таъминлайди;

Ўзбекистон Республикаси қонун ҳужжатларига мувофиқ Агентликка юкланган бошқа функцияларни бажаради.

7. Агентлик қуйидаги ҳуқуқларга эгадир:

ўз ваколатлари доирасида барча вазирликлар, идоралар, хўжалик бирлашмалари, корхоналар, муассасалар, ташкилотлар, шунингдек юридик ва жисмоний шахслар, шу жумладан Ўзбекистон Республикаси ҳудудидаги хорижий юридик ва жисмоний шахслар, уларнинг идоравий бўйсуниши ва мулкчилик шаклларидан қатъи назар, бажариши мажбурий бўлган коммунал хизмат соҳасидаги норматив-ҳуқуқий ҳужжатларни белгиланган тартибда ишлаб чиқиш ва тасдиқлаш;

зарур ҳолларда республика вазирликлари ва идоралари билан биргаликда белгиланган тартибда қарорлар қабул қилиш ва коммунал хизмат кўрсатиш масалалари бўйича қўшма норматив-ҳуқуқий ҳужжатлар чиқариш;

коммунал соҳасидаги энг муҳим муаммоларни ишлаб чиқиш ва кўриб чиқиш бўйича идоралараро комиссиялар ва кенгашлар ташкил этиш. Материалларни ишлаб чиқишга илмий-тадқиқот, технология, лойиҳа-конструкторлик ташкилотларини, олий ўқув юртлари ва бошқа муассасаларнинг ходимларини, шунингдек алоҳида олимлар ва мутахассисларни белгиланган тартибда жалб этиш;

статистика органларидан, «Ўзгеодезкадастр» бош бошқармасидан ўз фаолияти учун зарур бўлган статистика ахборотини ва бошқа ахборотларни белгиланган тартибда олиш;

корхоналар, ташкилотларнинг ҳамда Агентлик таркибига кирувчи бошқа тузилмаларнинг статистика, бухгалтерия ҳисоботлари ва бошқа ҳисоботларини олиш ва кўриб чиқиш;

Агентлик ҳузурида белгиланган тартибда хўжалик ҳисобидаги корхоналар ҳамда амалдаги қонун ҳужжатларига зид бўлмаган бошқа тузилмалар ташкил этиш;

амалдаги тартибга мувофиқ давлат бошқаруви маҳаллий органлари, хўжалик юритувчи субъектлар ва фуқаролар томонидан коммунал хизмат кўрсатиш соҳасидаги амалдаги қонун ҳужжатларига, белгиланган техник шартлар ва талабларга риоя қилиниши устидан назорат қилиш.

8. Агентлик ўзига юкланган вазифалар ва қабул қилинган қарорлар бажарилиши учун Ўзбекистон Республикаси қонун ҳужжатларига мувофиқ ўз ваколатлари доирасида жавоб беради.

9. Агентликка Ўзбекистон Республикаси Вазирлар Маҳкамаси томонидан лавозимга тайинланадиган ва лавозимдан озод қилинадиган бош директор бошчилик қилади.

10. Агентлик бош директорининг Ўзбекистон Республикаси Вазирлар Маҳкамаси томонидан тайинланадиган биринчи ўринбосари бўлади. «Минтақалараро сув қувурларидан фойдаланиш ва уларни ривожлантириш бош дирекцияси директори мақомига кўра «Ўзкоммунхизмат» агентлиги бош директорининг ўринбосари ҳисобланади.

Ўринбосарлар ўртасида вазифаларни тақсимлаш Агентлик бош директори томонидан амалга оширилади.

11. Бош директор Агентлик зиммасига юкланган вазифалар ва мажбуриятлар бажарилиши учун шахсан жавоб беради, Агентлик фаолияти айрим йўналишларига раҳбарлик қилиш учун ўринбосарлар, таркибий бўлинмалар раҳбарларининг жавобгарлиги даражасини белгилайди.

12. Агентлик бош директори:

Агентлик ишини ташкил этади;

ўз ваколатлари доирасида Ўзбекистон Республикаси қонун ҳужжатларига мувофиқ Агентлик ходимлари, шунингдек Агентлик таркибига кирувчи корхоналар ва ташкилотлар томонидан бажарилиши мажбурий бўлган буйруқлар чиқаради ва кўрсатмалар беради;

давлат ҳокимияти органларида, шунингдек халқаро ташкилотларда Агентлик манфаатларини ифодалайди.

Агентлик тизимидаги алоҳида ўрнак кўрсатган ходимларни Ўзбекистон Республикаси қонун ҳужжатларида белгиланган тартибда Ўзбекистон Республикаси давлат мукофотлари билан тақдирлашга тақдим этади;

тармоқ ходимларини кўкрак нишонлари, Фахрий ёрлиқлар билан мукофотлайди ва рағбатлантиришнинг бошқа турларини қўллайди;

Агентлик бўйсунишида бўлган давлат корхоналари, муассасалар ва ташкилотларнинг уставларини (низомларини) белгиланган тартибда тасдиқлайди;

Агентлик бошқаруви аппаратига сарфланадиган сарф-харажатлар сметасини, унинг ходимлари штат жадвалини ҳамда бошқарув аппарати таркибий бўлинмалари тўғрисидаги низомларни белгиланган тартибда тасдиқлайди, меҳнатга ҳақ тўлаш миқдорини ва рағбатлантириш тизимини белгилайди;

тасдиқланган номенклатурага мувофиқ Агентлик бошқарув аппарати ходимларини, Агентлик таркибига кирувчи давлат корхоналари ва ташкилотлари раҳбарларини лавозимга тайинлайди ва лавозимдан озод қилади;

Агентлик ходимларини хизмат сафарларига, шу жумладан Ўзбекистон Республикаси ташқарисига хизмат сафарларига юборади;

ўз ваколатлари доирасида Агентлик ходимларининг ижтимоий ҳимоя қилинишини таъминлаш масалаларини ҳал этади.

13. Агентликда таркибига бош директор (ҳайъат раиси) ва бош директор ўринбосарлари, шунингдек Агентлик ва унинг таркибий бўлинмаларининг бошқа раҳбар ходимлари кирган беш кишидан иборат ҳайъат ташкил этилади.

Агентлик ҳайъатининг шахсий таркиби Ўзбекистон Республикаси Вазирлар Маҳкамаси томонидан тасдиқланади.

Ҳайъат ва унинг иш тартиби тўғрисидаги низом Агентлик бош директори томонидан тасдиқланади.

14. Агентлик ҳайъати ўз мажлисларида аҳолини табиий ва суюлтирилган газ билан узлуксиз таъминлаш, минтақалараро сув қувурларининг барқарор ва ишончли ишлаши, минтақалараро сув қувурлари, коммунал газ сотиш тармоғидан фойдаланиш ва уларни ривожлантириш соҳасида ягона техник сиёсатни шакллантириш ва амалга ошириш, коммунал хизмат кўрсатишни ислоҳ қилиш ишларини мувофиқлаштиришнинг асосий масалаларини, давлат бошқаруви маҳаллий органлари, хўжалик юритувчи субъектлар ва фуқаролар томонидан коммунал хизмат кўрсатиш соҳасидаги амалдаги қонун ҳужжатларига, белгиланган техник шартлар ва талабларга риоя қилинишини текшириш натижаларини кўриб чиқади.

Ҳайъат қарорлари, қоидага кўра, Агентлик бош директорининг буйруқлари билан ҳаётга жорий этилади. Бош директор (раис) ва ҳайъат ўртасида келишмовчиликлар пайдо бўлган тақдирда раис пайдо бўлган келишмовчиликлар тўғрисида Ўзбекистон Республикаси Вазирлар Маҳкамасига ахборот берган ҳолда ўз қарорини амалга оширади, ҳайъат аъзолари ўз навбатида ўз фикрларини Ўзбекистон Республикаси Вазирлар Маҳкамасига маълум қилишлари мумкин.

15. Агентлик ҳузурида коммунал хизмат кўрсатиш ва тармоқнинг илмий-техник тараққиёти муаммоларини кўриб чиқиш ва мақбул ҳал этиш йўлларини излаш учун илмий-техник кенгаш ташкил этилади. Кенгашнинг шахсий таркиби ва у тўғрисидаги Низом Агентлик бош директори томонидан тасдиқланади, илмий-техник кенгашда ишлаш учун вазирликлар, идоралар хўжалик бирлашмалари ва бошқа ташкилотларнинг мутахассислари (келишув бўйича) жалб этилиши мумкин.

16. Агентлик марказий аппаратининг тузилмаси ва ходимлари сони Ўзбекистон Республикаси Вазирлар Маҳкамаси томонидан тасдиқланади. Агентлик бош директори марказий аппаратнинг тасдиқланган тузилмасига ходимларнинг белгиланган сони доирасида ўзгартиришлар киритишга, ходимларнинг умумий сонидан ташқари хизмат кўрсатувчи ва ахборот хизматлари ташкил этишга ҳақлидир.

17. Агентлик қонун ҳужжатларида белгиланган тартибда қайта ташкил этилади ва тугатилади.

1. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ҳудудий коммунал-фойдаланиш бирлашмаси (матннинг кейинги ўринларида «бирлашма» деб аталади) Ўзбекистон Республикаси Вазирлар Маҳкамасининг 2000 йил 21 декабрдаги 493-сон қарорига мувофиқ фаолият кўрсатади.

2. Бирлашма ҳокимлик томонидан шаҳарлар ва туманларнинг коммунал-фойдаланиш бошқармалари, иссиқлик, сув таъминоти, канализация ҳудудий корхоналари ва ташкилотлари ҳамда коммунал мақсадлардаги бошқа хизматлар фаолиятини мувофиқлаштиришга, аҳолига уй-жой-коммунал хизматларнинг бутун комплексини кўрсатишга, уларни ичимлик сув, марказий иситиш, канализация билан таъминлашга вакил қилинган орган ҳисобланади.

3. Бирлашма ўз фаолиятида Ўзбекистон Республикаси Конституциясига, Ўзбекистон Республикаси қонунларига, Ўзбекистон Республикаси Президентининг фармонлари ва фармойишларига, Ўзбекистон Республикаси Вазирлар Маҳкамасининг, ҳокимликнинг қарорлари ва фармойишларига, шунингдек ушбу Низомга амал қилади.

4. Бирлашма юридик шахс ҳисобланади, Ўзбекистон Республикаси Давлат герби тасвири туширилган, ўз номи давлат тилида ёзилган муҳрга ва банкларда ҳисоб рақамларига эга бўлади.

5. Қуйидагилар бирлашманинг асосий вазифалари ҳисобланади:

аҳолига уй-жой-коммунал хизматлар бутун комплексини кўрсатиш, уларни ичимлик сув, марказий иситиш, канализация билан таъминлаш;

уй-жой-коммунал хўжалиги объектларини мавсумий фойдаланишга тайёрлаш ишларини амалга ошириш;

кўп квартирали уйларни тўлиқ таъмирлаш ишларини белгиланган тартибда ташкил этиш;

уй-жой эгалари ширкатларини ҳамда Ягона буюртмачи хизматларини, уй-жой фондига хизмат кўрсатиш ва коммунал хизматлар кўрсатиш бўйича муқобил пудрат ташкилотларини шакллантириш учун зарур ташкилий-иқтисодий шароитлар яратиш;

маҳаллий бюджет ва ўз маблағлари ҳисобига коммунал объектлар қуриш бўйича буюртмачи функцияларини амалга ошириш;

шаҳарлар ва аҳоли пунктларини ободонлаштириш ва санитария жиҳатидан тозалаш ишларини ташкил этиш;

шаҳарлар ва туманлар коммунал-фойдаланиш бошқармалари фаолиятини мувофиқлаштириш.

6. Бирлашма ўзига юкланган вазифаларга мувофиқ қуйидаги функцияларни бажаради:

вилоят ҳудудида уй-жой фондидан фойдаланиш ва уларнинг сақланишини таъминлаш, коммунал хизмат кўрсатишни ривожлантириш соҳасида техника сиёсатини шакллантириш ва ўтказиш;

коммунал хўжалигини ривожлантириш концепциялари, истиқбол дастурлари ва схемаларини, тармоқда илмий-техника сиёсатини ишлаб чиқиш ва амалга оширишда қатнашиш, коммунал объектлар ва уй-жой фондини лойиҳалаш, қуриш ва улардан фойдаланиш масалаларида илғор тажрибани ўрганиш ва ёйиш;

комплекс техник-иқтисодий таҳлил асосида тасарруфидаги корхоналар ва ташкилотларнинг ишлаб чиқариш-техника ва молия-иқтисодий фаолиятини ташкил этиш;

ҳудудларга хизмат кўрсатиш корхоналарини иқтисодий ривожлантириш прогнозлари ва комплекс дастурлари лойиҳаларини ишлаб чиқиш;

коммунал хизмат кўрсатиш корхоналарини куз-қиш даврида ишлашга тайёрлаш тадбирларини ишлаб чиқиш ва амалга ошириш, кўп квартирали уй-жойларни тўлиқ таъмирлаш ишларини белгиланган тартибда ташкил этиш;

маҳаллий бюджет, ўз маблағлари, банк кредитлари ва бошқа манбалар ҳисобига коммунал мақсадлардаги объектларни лойиҳалаш ва қуриш бўйича аниқ рўйхатларни тайёрлаш ва тасдиқлаш, буюртмачи функцияларини ва уларнинг қурилиши устидан назоратни амалга ошириш;

уй-жой эгаларига, шаҳарлар ва туманлар ҳокимликларига уй-жой эгалари ширкатлари ҳамда Ягона буюртмачи хизматлари, уй-жой фондига хизмат кўрсатиш ва коммунал хизматлар кўрсатиш бўйича муқобил пудрат ташкилотлари ташкил этишда ва уларнинг фаолият кўрсатишида кўмаклашиш ва амалий ёрдам кўрсатиш, уларни шартнома асосида зарур норматив-ҳуқуқий ҳужжатлар ва тавсияномалар билан таъминлаш;

шаҳарлар ва туманлар коммунал-фойдаланиш бошқармаларининг, иссиқлик, сув таъминоти ва канализация корхоналарининг атроф муҳитни ва меҳнатни муҳофаза қилиш билан боғлиқ чора-тадбирларни амалга ошириш, сифатли коммунал хизматлар кўрсатиш бўйича фаолиятини мувофиқлаштириш, маиший чиқиндиларни тўплаш, фойдаланиладиган қилиш ва қайта ишлаш, шаҳарлар ва аҳоли пунктларининг санитария ҳолатини яхшилаш бўйича янги усуллар ва технологияларни жорий этиш ишларини амалга ошириш;

вилоят ҳудудида коммунал хизмат кўрсатишнинг техник даражасини ошириш учун хорижий инвестицияларни жалб этиш мақсадида, ҳокимлик билан келишилган ҳолда ташқи иқтисодий алоқаларни ўрнатиш ва ривожлантириш, хорижий фирмалар, қўшма корхоналар ва республика ташкилотлари билан ҳамкорликнинг янги шаклларини жорий қилиш;

коммунал корхоналар, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг биргаликдаги сайъ-ҳаракатларини талаб қилувчи моддий-техника таъминоти масалаларини ҳал этишда қатнашиш;

уй-жой эгалари кенгашлари жамоат тузилмалари ва фуқароларнинг ўзини ўзи бошқариш органлари билан аҳолининг яшаш шароитларини, коммунал хизмат кўрсатишни яхшилаш ҳамда коммунал ва фойдаланиш хизматлари учун тўловларни тўлиқ йиғиш борасида ўзаро ҳамкорлик қилиш;

бирлашма таркибига кирувчи корхоналар ва ташкилотларга бозор муносабатларига ўтишда, уларни акциядорлик ва бошқа ташкилий-ҳуқуқий шаклларга айлантиришда кўмаклашиш;

фуқаролар мурожаатларининг ўз вақтида кўриб чиқилишини таъминлаш, уй-жой-коммунал хизмат кўрсатиш корхоналари фаолиятидаги камчиликларни бартараф этиш чора-тадбирларини кўриш;

ҳокимлик топшириғига кўра:

тасарруфидаги ҳудудда аҳолини тоза ичимлик сув ва газ билан таъминлаш учун сув қувурлари ва газ тармоқларини ривожлантириш бўйича мақсадли давлат дастурларини амалга ошириш;

тасарруфидаги ҳудудда коммунал хизматларга тарифларни шакллантириш бўйича таклифлар тайёрлаш;

сув, газ, иссиқлик ва бошқа энергия манбалари сарфини якка тартибда ҳисобга олиш ва тартибга солиш приборларини жорий этиш ишларини амалга ошириш;

тасарруфидаги ҳудудда техник хатловдан ўтказиш бюроси фаолиятини ташкил этишга кўмаклашиш;

Ўзбекистон Республикаси қонун ҳужжатларига мувофиқ бирлашмага юкланган бошқа ваколатларни амалга оширади.

7. Бирлашма қуйидаги ҳуқуқларга эга:

статистика органлари ва ҳокимликдан ўз фаолияти учун зарур бўлган статистик ва бошқа маълумотларни белгиланган тартибда олиш;

бирлашма таркибига кирувчи корхоналар, ташкилотлар ва бошқа тузилмалардан статистика, бухгалтерия ҳисоботларини ва бошқа ҳисоботларни олиш ва кўриб чиқиш;

ўз ваколати доирасида мутахассисларни ўқитиш, тайёрлаш ва қайта тайёрлашни ҳамда кадрлар малакасини оширишни ташкил этиш;

ҳокимлик билан келишилган ҳолда, белгиланган тартибда хўжалик ҳисобидаги корхоналар ва амалдаги қонун ҳужжатларига зид бўлмаган бошқа тузилмалар ташкил этиш;

минтақада уй-жой-коммунал хизмат кўрсатишни бошқариш тузилмасини такомиллаштириш бўйича таклифлар киритиш.

8. Бирлашма ўзига юкланган вазифаларнинг ва унинг ваколатлари доирасида қабул қилинган қарорларнинг бажарилиши учун Ўзбекистон Республикаси қонун ҳужжатларига мувофиқ жавоб беради.

9. Бирлашма таркибига шаҳарлар, туманлар, шаҳарлардаги туманлар коммунал-фойдаланиш бошқармалари, уй-жой-коммунал хизмат кўрсатиш бўйича Ягона буюртмачи хизматлари, вилоят сув қувурлари канализация, иссиқлик энергияси хўжаликлари, минтақа ҳудудида жойлашган, юқорида кўрсатиб ўтилган бошқармалар таркибига кирмайдиган аҳолига коммунал-фойдаланиш хизмати кўрсатувчи корхоналар ва ташкилотлар киради, «Ўзкоммунхизмат» агентлиги таркибига кирувчи корхоналар ва ташкилотлардан ташқари.

Бирлашма таркибига кирувчи корхоналар ва ташкилотлар ўз хўжалик мустақиллигини ҳамда юридик шахс ҳуқуқини сақлаб қолади.

10. Бирлашма Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига бўйсунади.

Ҳудудий коммунал-фойдаланиш бирлашмасини Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлари томонидан лавозимга тайинланадиган ва бирлашмага якка бошчилик асосида раҳбарлик қиладиган бошлиқ бошқаради.

11.Бошлиқ бирлашманинг бутун фаолиятига раҳбарлик қилади ва бирлашма ишларини ташкил этади, бирлашма ишлари натижалари учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари олдида жавоб беради.

12. Бошлиқ ишончномасиз бирлашма номидан иш кўради, давлат ҳокимияти ва бошқаруви барча органларида, корхоналарда, ташкилотларда унинг номидан вакиллик қилади, бирлашма мол-мулкини белгиланган тартибда тасарруф этади, шартномалар тузади, ишончномалар беради, банкларда ҳисоб рақамлари очади, молия, ҳисобот ҳужжатларини ва бошқа ҳужжатларни имзолайди; ҳокимлик билан келишилган ҳолда тузилмани ва штатлар жадвалини тасдиқлайди; бирлашма аппарати таъминоти харажатлари сметасини, унинг таркибий бўлинмалари тўғрисидаги низомларни ва лавозим йўриқномаларини тасдиқлайди.

13. Бошлиқ ўз ваколати доирасида бирлашма барча ходимларининг, шунингдек таркибий бўлинмаларининг бажариши мажбурий бўлган буйруқлар чиқаради ва кўрсатмалар беради.

14. Бирлашма бошлиғи бирлашма ходимларини белгиланган тартибда лавозимга тайинлайди ва лавозимдан озод қилади, тасарруфидаги корхоналар раҳбарларини, тегишли ҳокимликларнинг тақдимномасига кўра эса шаҳарлар (шаҳарлардаги туманлар) ва туманлар коммунал-фойдаланиш бошқармалари раҳбарларини лавозимга тасдиқлайди.

15. Коммунал хизмат кўрсатишни ривожлантириш ва яхшилаш масалаларини кўриб чиқиш, тармоқ корхоналарининг мувофиқлаштирилган ҳолда ишлашини таъминлаш учун бирлашма ҳузурида бирлашма таркибига кирувчи корхоналар ва ташкилотлар раҳбарлари кенгаши тузилади. Кенгашга минтақада коммунал хизматлар кўрсатувчи бошқа корхоналар ва ташкилотлар раҳбарлари ҳам киришлари мумкин. Бирлашма раҳбари айни бир вақтда раҳбарлар кенгашининг раиси ҳисобланади.

Раҳбарлар кенгаши фаолиятини тартибга солувчи низомни кенгаш раиси тасдиқлайди.

16. Бирлашмани қайта ташкил этиш ва тугатиш қонун ҳужжатларида белгиланган тартибда амалга оширилади.

1. Ўзбекистон Республикаси Вазирлар Маҳкамасининг «Республика халқ хўжалигини ва аҳолини газ билан таъминлашни ташкил этишни яхшилаш чора-тадбирлари тўғрисида» 1993 йил 2 декабрдаги 587-сон қарорининг 5, 9, 11-бандларидаги «Ўзбекистон Республикаси Коммунал хизмат кўрсатиш вазирлиги», «Коммунал хизмат кўрсатиш вазирлиги», «Ўзбекистон Республикаси Коммунал хизмат кўрсатиш вазирлиги» сўзлари Ўзбекистон «Ўзкоммунхизмат» агентлиги, Ўзбекистон «Ўзкоммунхизмат» агентлиги», Ўзбекистон «Ўзкоммунхизмат» агентлиги» сўзлари билан алмаштирилсин.

2. Ўзбекистон Республикаси Вазирлар Маҳкамасининг «Саноат теракчилигини ривожлантириш ва бошқа тез ўсувчи ёғочбоп дарахтзорларни барпо этишга оид чора-тадбирлар тўғрисида» 1994 йил 8 февралдаги 62-сон қарорида:

1-банддаги «ва Ўзбекистон Республикаси Коммунал хизмат кўрсатиш вазирлиги» сўзлари «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари» сўзлари билан алмаштирилсин;

1-иловадаги Ўзбекистон Республикаси «Коммунал хизмат кўрсатиш вазирлигига», «Коммунал хизмат кўрсатиш вазирлиги» сўзлари тегишли равишда «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига», «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари» сўзлари билан алмаштирилсин;

1-илова қуйидаги мазмундаги изоҳ билан тўлдирилсин:

«Изоҳ: 2001—2003 йилларда терак кўчатлари ўстириш бўйича топшириқ қуйидаги миқдорда тақсимлансин (млн та):

Қорақалпоғистон Республикаси Вазирлар Кенгаши – 2,4;

Андижон вилояти ҳокимлиги – 2,4;

Бухоро вилояти ҳокимлиги – 2,4;

Жиззах вилояти ҳокимлиги – 1,5;

Қашқадарё вилояти ҳокимлиги – 3,0;

Навоий вилояти ҳокимлиги – 0,6;

Наманган вилояти ҳокимлиги – 3,0;

Самарқанд вилояти ҳокимлиги – 2,4;

Сирдарё вилояти ҳокимлиги – 1,5;

Сурхондарё вилояти ҳокимлиги – 0,9;

Тошкент вилояти ҳокимлиги – 2,4;

Фарғона вилояти ҳокимлиги – 3,0;

Хоразм вилояти ҳокимлиги – 2,1;

Тошкент шаҳар ҳокимлиги – 2,4.»

3. Ўзбекистон Республикаси Вазирлар Маҳкамасининг «Уй-жой фондида ва ижтимоий-маданий мақсадлардаги объектларда сув ва газни ҳисобга олиш асбобларини ўрнатиш ва улардан фойдаланиш ҳақидаги Низомни тасдиқлаш тўғрисида» 1995 йил 26 майдаги 185-сон қарори билан тасдиқланган Уй-жой фондида ва ижтимоий-маданий мақсадлардаги объектларда сув ва газни ҳисобга олиш асбобларини ўрнатиш ва улардан фойдаланиш ҳақидаги Низомнинг II қисми тўртинчи хатбошидаги «Ўзбекистон Республикаси Коммунал хизмат кўрсатиш вазирлиги» сўзлари «Ўзкоммунхизмат» агентлиги, ҳудудий коммунал-фойдаланиш бирлашмалари таркибига кирувчи» сўзлари билан алмаштирилсин.

5. Ўзбекистон Республикаси Вазирлар Маҳкамасининг «Уй-жой-коммунал хизматларнинг ўз харажатларини ўзи қоплашига босқичма-босқич ўтиш муносабати билан норматив ҳужжатларни тасдиқлаш тўғрисида» 1996 йил 30 июлдаги 271-сон қарори билан тасдиқланган Аҳолига сотиладиган коммунал хизматлар тарифларидаги фарқларни бюджетдан қоплаш тартибининг 14-бандидаги «Қорақалпоғистон Республикаси Коммунал хизмат-кўрсатиш вазирлиги, вилоятлар ва Тошкент шаҳар ҳудудий коммунал-фойдаланиш бирлашмалари» сўзлари «Ўзбекистон Республикаси Молия вазирлиги ва унинг ҳудудий бўлинмалари» сўзлари билан алмаштирилсин.

6. Ўзбекистон Республикаси Вазирлар Маҳкамасининг «Кенг кўламли «Тоза сув, санитария ва аҳоли саломатлиги» лойиҳасини амалга ошириш чора-тадбирлари тўғрисида» 1998 йил 15 октябрдаги 444-сон қарорининг 5-бандидаги «Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин.

7. Ўзбекистон Республикаси Вазирлар Маҳкамасининг «Аҳолига коммунал хизмат кўрсатиш тизимида иқтисодий ислоҳотларни чуқурлаштириш Концепциясини тасдиқлаш тўғрисида» 1998 йил 3 ноябрдаги 461-сон қарорида:

Ўзбекистон Республикаси аҳолига коммунал хизмат кўрсатиш тизимида иқтисодий ислоҳотларни чуқурлаштириш Концепциясининг (1-илова) IV бўлими ўн иккинчи хатбошидаги, VII бўлими саккизинчи хатбошидаги «Ўзбекистон Республикаси Коммунал хизмат кўрсатиш вазирлиги ҳузурида» сўзлари “Ўзбекистон «Ўзкоммунхизмат» агентлиги ҳузурида» сўзлари билан алмаштирилсин;

«Ўзбекистон Республикаси аҳолига коммунал хизмат кўрсатиш тизимида иқтисодий ислоҳотларни чуқурлаштириш Концепциясини амалга ошириш чора-тадбирлари» номли 2-илованинг «Масъул ижро этувчилар» бўлимидаги «Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин.

8. Ўзбекистон Республикаси Вазирлар Маҳкамасининг «Хорижий фуқаролар ва фуқаролиги бўлмаган шахслар томонидан Ўзбекистон Республикасида уй-жой сотиб олиш ҳамда доимий яшаш учун Тошкент шаҳрига келишни тартибга солиш тўғрисида» 1999 йил 27 февралдаги 92-сон қарори 1-бандининг учинчи хатбошидаги «Коммунал хизмат кўрсатиш вазирлигининг» сўзлари «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг» сўзлари билан алмаштирилсин.

10. Ўзбекистон Республикаси Вазирлар Маҳкамасининг «Уй-жой фондини сув ва газни ҳисобга олиш приборлари билан жиҳозлаш, уларни Ўзбекистон Республикасида ишлаб чиқаришни ташкил этиш чора-тадбирлари тўғрисида» 1999 йил 1 июндаги 280-сон қарорида (Ўзбекистон Республикаси ҚТ, 1999 йил, 6-сон, 30-модда):

3-банднинг тўртинчи хатбошидаги «Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин;

7-банддаги «Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин.

11. Ўзбекистон Республикаси Вазирлар Маҳкамасининг «Табиий газ етказиб бериш ва унинг учун ҳисоб-китоб қилиш тизимини такомиллаштириш тўғрисида» 1999 йил 21 сентябрдаги 439-сон қарорида (Ўзбекистон Республикаси ҚТ, 1999 йил, 9-сон, 57-модда):

а) 1-бандда:

биринчи хатбошидаги «Ўзбекистон Республикаси Коммунал хизмат кўрсатиш вазирлигининг» сўзлари «Ўзбекистон «Ўзкоммунхизмат» агентлигининг» сўзлари билан алмаштирилсин;

тўртинчи хатбошидаги «Ўзбекистон Республикаси Коммунал хизмат кўрсатиш вазирлигининг табиий газ узатувчи хўжалик ҳисобидаги «Бошкоммунгаз» бош бошқармасининг» ва «хўжалик ҳисобидаги «Бошкоммунгаз» бош бошқармасининг» сўзлари тегишли равишда «Ўзбекистон «Ўзкоммунхизмат» агентлиги «Бошкоммунгаз» корхонасининг» ва «Бошкоммунгаз» корхонаси» сўзлари билан алмаштирилсин;

бешинчи хатбошидаги «хўжалик ҳисобидаги «Бошкоммунгаз» бош бошқармасининг газ сотувчи ташкилотларига» сўзлари «Бошкоммунгаз» корхонасининг шуъба корхоналарига» сўзлари билан алмаштирилсин;

б) 2-банднинг учинчи, тўртинчи ва бешинчи хатбошидаги «хўжалик ҳисобидаги «Бошкоммунгаз» бош бошқармасининг газ сотувчи ташкилотлари» сўзлари «Бошкоммунгаз» корхонасининг шуъба корхоналари» сўзлари билан алмаштирилсин;

в) учинчи банддаги «Ўзбекистон Республикаси Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин.

12. Ўзбекистон Республикаси Вазирлар Маҳкамасининг «Уй-жой мулкдорлари ширкатининг Намунавий уставини ва уй-жойларни уй-жой мулкдорлари ширкати бошқарувига бериш ва уй-жой фондини сақлаш ва тузатиш масалаларида давлат ҳокимияти органлари билан ўзаро ҳамкорлик қилиш тартиби тўғрисидаги Намунавий низомни тасдиқлаш тўғрисида» 1999 йил 4 октябрдаги 454-сон қарорининг 2-бандидаги «Коммунал хизмат кўрсатиш вазирлиги» сўзлари «Ўзбекистон «Ўзкоммунхизмат» агентлиги» сўзлари билан алмаштирилсин.

13. Ўзбекистон Республикаси Вазирлар Маҳкамасининг «Ўзбекистон Республикасининг уй-жой фондини давлат йўли билан ҳисобга олиш тўғрисида» 2000 йил 20 январдаги 18-сон қарорида (Ўзбекистон Республикаси ҚТ, 2000 йил, 1-сон, 5-модда):

2-банд қуйидаги таҳрирда баён қилинсин:

«Ўзгеодезкадастр» бош бошқармаси техник инвентаризация кадастрлар ҳудудий бюролари фаолиятига услубий раҳбарликни, шунингдек уй-жой фонди йиғма кадастрининг юритилишини таъминлайди».

Ўзбекистон Республикасида уй-жой фондини давлат йўли билан ҳисобга олишнинг ягона тизими тўғрисида Низомнинг (1-илова) 6-банди 2-хатбошидаги «Ўзбекистон Республикаси Коммунал хизмат кўрсатиш вазирлиги билан» сўзлари «Ўзгеодезкадастр» бош бошқармаси билан» сўзлари билан алмаштирилсин.

14. Ўзбекистон Республикаси Вазирлар Маҳкамасининг 2000 йил 24 январдаги 22-сон қарори (Ўзбекистон Республикаси ҚТ, 2000 йил, 1-сон, 6-модда) билан тасдиқланган Уй-жой-коммунал хизмат кўрсатиш бўйича Ягона буюртмачи хизмати тўғрисида Вақтинчалик Низомнинг 3-банди иккинчи хатбошидаги «Коммунал хизмат кўрсатиш вазирлиги» сўзлари «Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг ҳудудий коммунал-фойдаланиш бирлашмаси» сўзлари билан алмаштирилсин.

15. Ўзбекистон Республикаси Вазирлар Маҳкамасининг «Чимён-Чорвоқ зонаси табиий бойликларини сақлаш ҳамда ҳудудини ўзлаштиришга комплекс ва изчиллик билан ёндошишни таъминлаш чора-тадбирлари тўғрисида» 2000 йил 10 мартдаги 83-сон қарорида:

3-банднинг тўртинчи хатбошидаги «Ўзбекистон Республикаси Коммунал хизмат кўрсатиш вазирлиги» сўзлари «Тошкент вилояти ҳокимлиги» сўзлари билан алмаштирилсин;

5-банднинг иккинчи хатбошидаги «Коммунал хизмат кўрсатиш вазирлиги ҳамда» сўзлари чиқариб ташлансин;

ушбу қарорга 1-илова 3—5-бандларининг «Масъул ижро этувчилар» устунидаги «Коммунал хизмат кўрсатиш вазирлиги» сўзлари «Тошкент вилояти ҳокимлиги» сўзлари билан алмаштирилсин;

ушбу қарорга 6-иловадаги «Михайлов В.К. Коммунал хизмат кўрсатиш вазирининг биринчи ўринбосари» сўзлари «лавозими бўйича «Ўзкоммунхизмат» агентлиги бош директорининг биринчи ўринбосари» сўзлари билан алмаштирилсин.

1. «КПСС Марказий Комитети ва СССР Министрлар Советининг «Мамлакатда турар-жой-коммунал хўжалиги ишларини янада такомиллаштириш тадбирлари тўғрисида» 1987 йил 8 апрелдаги 427-сон қарори юзасидан Ўзбекистон ССР Министрлар Советининг 1987 йил 19 августдаги 339-сон қарори (ЎзССР ҚТ, 1987 й., 8-сон, 49-модда).

2. Ўзбекистон Республикаси Вазирлар Маҳкамасининг «Ўзбекистон ССЖ Уй-жой коммунал хўжалиги системасидаги корхоналар (бирлашмалар) ва ташкилотларни тўла хўжалик ҳисоби ва ўзини ўзи маблағ билан таъминлашга ўтказиш тўғрисида» 1990 йил 9 августдаги 283-сон қарори.

3. Ўзбекистон Республикаси Вазирлар Маҳкамасининг «Уй-жой фондига хизмат кўрсатиш ва уни сақлаш учун ҳисоб-китобларнинг контракт (шартнома) тизимига ўтиш тўғрисида» 1993 йил 17 июлдаги 363-сон қарорининг 1-4, 7-10-бандлари ва қарорга илова.

4. Ўзбекистон Республикаси Вазирлар Маҳкамасининг «Ўзбекистон Республикаси Коммунал хизмат кўрсатиш вазирлигини ташкил этиш ва унинг фаолияти масалалари тўғрисида» 1993 йил 22 июлдаги 371-сон қарори.

5. Ўзбекистон Республикаси Вазирлар Маҳкамасининг «Ўзбекистон Республикаси Коммунал хизмат кўрсатиш вазирлиги тўғрисидаги Низомни тасдиқлаш ҳақида» 1993 йил 12 октябрдаги 490-сон қарори (Ўзбекистон Республикаси ҚТ, 1993 й., 10-сон, 36-модда).

6. Ўзбекистон Республикаси Вазирлар Маҳкамасининг «Ўзбекистон Республикаси Коммунал хизмат кўрсатиш вазирлиги фаолиятининг айрим масалалари тўғрисида» 1996 йил 2 апрелдаги 130-сон қарори.

7. Вазирлар Маҳкамасининг «Уй-жой коммунал хизматларнинг ўз харажатларини ўзи қоплашига босқичма-босқич ўтиш муносабати билан норматив ҳужжатларни тасдиқлаш тўғрисида» 1996 йил 30 июлдаги 271-сон қарори билан тасдиқланган Коммунал хизматлар учун иқтисодий асосланган ставкалар ва тарифларни ҳисоблаш методикаси.

8. Ўзбекистон Республикаси Вазирлар Маҳкамасининг «Жисмоний шахсларга мулк ҳуқуқида тегишли бўлган бинолар ва иншоотлар бўйича рўйхатга олиш-баҳолаш ишларини амалга ошириш тўғрисида» 1998 йил 21 январдаги 35-сон қарори, 1-банддан ташқари.

9. Ўзбекистон Республикаси Вазирлар Маҳкамасининг «Хўжалик ҳисобидаги техник рўйхатга олиш республика кадастр бюроси тўғрисидаги Низомни тасдиқлаш ҳақида» 1998 йил 3 октябрдаги 423-сон қарори (Ўзбекистон Республикаси ҚТ, 1998й., 10-сон, 36-модда).

10. Ўзбекистон Республикаси Вазирлар Маҳкамасининг «Ўзбекистон Республикасининг Уй-жой кодексини амалга ошириш чора-тадбирлари тўғрисида» 1999 йил 16 июлдаги 345-сон қарори (Ўзбекистон Республикаси ҚТ, 1999 й., 7-сон, 38-модда) билан тасдиқланган Ҳукуматнинг айрим қарорларига киритилаётган ўзгартириш ва қўшимчаларнинг 1-банди.