O‘zbekiston Respublikasi Prezidentinig 2001-yil 17-apreldagi PF-2832-son “Kommunal xizmat ko‘rsatish sohasida iqtisodiy islohotlarni chuqurlashtirishning yangi bosqichi to‘g‘risida”gi Farmoni va O‘zbekiston Respublikasi Vazirlar Mahkamasining 2001-yil 18-apreldagi 178-son “Aholiga kommunal xizmat ko‘rsatishni takomillashtirishga doir qo‘shimcha chora-tadbirlar to‘g‘risida”gi qarori ijrosini ta’minlash maqsadida O‘zbekiston Respublikasi Markaziy banki Boshqaruvi va O‘zbekiston Respublikasi Moliya vazirligining 2001-yil 25-apreldagi 01/1-291-son qaroriga asosan qaror qiladi:

1. Tashkilotlar va muassasalar tomonidan o‘z xodimlaridan kommunal xizmatlar uchun haqni ish haqidan ushlab qolish ko‘rinishida qabul qilish tartibi to‘g‘risidagi nizom ilovaga muvofiq tasdiqlansin.

2. Mazkur buyruq O‘zbekiston Respublikasi Adliya vazirligida davlat ro‘yxatidan o‘tgan kundan boshlab o‘n kundan keyin kuchga kiradi.

Mazkur Nizom (matn davomida — nizom) O‘zbekiston Respublikasining Fuqarolik kodeksi, Mehnat kodeksi, O‘zbekiston Respublikasi Prezidentining 2001-yil 17-apreldagi “Kommunal xizmat ko‘rsatish sohasida iqtisodiy islohotlarni chuqurlashtirishning yangi bosqichi to‘g‘risida” PF-2832-son Farmoni, O‘zbekiston Respublikasi Vazirlar Mahkamasining 2001-yil 18-apreldagi “Aholiga kommunal xizmat ko‘rsatishni takomillashtirishga doir qo‘shimcha chora-tadbirlar to‘g‘risida” 178-son qarori va boshqa qonun hujjatlariga muvofiq, ko‘rsatilgan kommunal xizmatlar uchun o‘z vaqtida haq to‘lanishini ta’minlash maqsadida ishlab chiqilgan.

1. Ushbu Nizom barcha mulkchilik shakllaridagi korxonalar, tashkilotlar va muassasalar (matn davomida — korxona) tomonidan kommunal xizmatlar uchun o‘z xodimlaridan ularning yozma roziligini olgan holda ish haqidan ushlanmalar ko‘rinishida to‘lovni qabul qilish qoidalarini belgilaydi.

2. Korxona o‘z xodimlaridan kommunal xizmatlar uchun to‘lovni belgilangan tartibda ish haqidan ushlanma ko‘rinishida qabul qilib, keyin xodimlarning yozma arizasi asosida kommunal xizmatlar ko‘rsatadigan korxonalar va tashkilotlar (matn davomida — Kommunal tashkilotlar) hisobvarag‘iga ushbu mablag‘larni o‘tkazadi.

3. Kommunal xizmatlar uchun ish haqidan ushlanma to‘g‘risidagi arizada xodim o‘z shaxsiy hisobvarag‘i, kommunal xizmatlar qiymati va turi, kommunal tashkilot rekvizitlari va ushlanma amalga oshirilishi zarur bo‘lgan davrni ko‘rsatishi kerak.

4. Agar xodim kasalligi, ta’tildagi va boshqa sabablar bilan ishda bo‘lmasa, ish haqidan ushlanma keyingi oyda amalga oshiriladi.

4-1. Xodimning ish haqidan ushlab qolishda ushlanmalarning umumiy miqdori xodimga beriladigan mehnat haqining ellik foizidan oshishi mumkin emas.

5. Korxona kommunal xizmatlar uchun ish haqidan ushlangan mablag‘larni to‘lov topshiriqnomasi bilan kommunal xizmatlar ko‘rsatadigan korxona va tashkilotlarning hisobvaraqlariga o‘tkazadi. To‘lov topshiriqnomasining “To‘lov detallari” bo‘limida “Xodimlarning ish haqidan kommunal to‘lovlar ushlanishi” ko‘rsatilishi lozim. Bunda to‘lov topshiriqnomasiga xodim (xodimlar)ning familiya va initsiali, ularning yashash joyi, kommunal xizmatlar turi ko‘rsatilgan reyestr ilova qilinadi.

6. Kommunal xizmatlar to‘langani to‘g‘risidagi to‘lov hujjatlarining ko‘chirma nusxalarini Korxona xodimga mablag‘lar Kommunal tashkilotlar hisobvarag‘iga o‘tkazilganidan keyin ertasi kuni topshiradi.

7. Kommunal tashkilotga xizmat ko‘rsatadigan bank kommunal xizmatlar uchun kelib tushgan mablag‘larni ana shu mablag‘lar bankning korrespondentlik hisobvarag‘iga kelib tushgan kundan keyingi bank kunidan kechiktirmay kommunal tashkilot hisobvarag‘iga qayd etishi kerak.

8. Mulkchilik shakllaridan qat’i nazar korxonalarning rahbarlari:

o‘z xodimlari o‘rtasida ish haqidan ushlab qolish yo‘li bilan kommunal to‘lovlarni to‘lash tartibi va imkoniyatlari to‘g‘risida tegishli tushuntirish ishini doimiy ravishda o‘tkazishlari;

o‘z xodimlari yozma ravishda murojaat qilganida tegishli hisob-kitoblarni bajarishlari, kommunal xizmatlar uchun ish haqidan ushlanadigan to‘lov summalarini aniqlashlari;

mablag‘lar kommunal tashkilotlar hisobvarag‘iga o‘tkazilganidan keyin ish haqidan ushlanma amalga oshirilgan xodimga kommunal to‘lovlar to‘langanini tasdiqlaydigan, korxona bosh buxgalteri imzo chekkan hujjat topshirilishi kerak.

9. Ushbu mablag‘larning kommunal tashkilotlar hisobvarag‘iga o‘z vaqtida o‘tkazilishi uchun korxonalarning rahbarlari va bosh buxgaltyerlari shaxsan javobgar bo‘ladilar.

10. Mazkur Nizomda belgilangan talablarni buzishda aybdor bo‘lgan mansabdor shaxslar qonun hujjatlariga muvofiq javobgarlikka tortiladilar.