Oʻzbekiston Respublikasi Prezidentining 2024-yil 15-yanvardagi PQ-22-son “Kriminologiya sohasida ilmiy-amaliy tadqiqot ishlarini tashkil etish chora-tadbirlari toʻgʻrisida”gi qarori hamda Oʻzbekiston Respublikasi Vazirlar Mahkamasining 2024-yil 24-iyuldagi 445-son “Kriminologik faoliyatni ilmiy taʼminlash chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi Kriminologiya tadqiqot instituti tomonidan pullik xizmatlarni koʻrsatish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Kriminologiya tadqiqot instituti (bundan buyon matnda Institut deb yuritiladi) tomonidan jamoat xavfsizligini taʼminlash va jinoyatchilikka qarshi kurashish sohasida shartnoma asosida pullik xizmatlar koʻrsatish tartibini belgilaydi.

1. Ushbu Nizomda quyidagi asosiy tushunchalardan foydalaniladi:

buyurtmachi — Institutga jamoat xavfsizligini taʼminlash va jinoyatchilikka qarshi kurashish sohasida ekspertlik, ilmiy-tadqiqot, noshirlik va matbaa faoliyati boʻyicha xizmat koʻrsatishni soʻrab oʻz ixtiyoriga koʻra murojaat qilgan jismoniy yoki yuridik shaxs;

pullik xizmat — Institut tomonidan shartnoma asosida haq evaziga jamoat xavfsizligini taʼminlash va jinoyatchilikka qarshi kurashish sohasida ekspertlik, ilmiy-tadqiqot, noshirlik va matbaa faoliyatini amalga oshirish boʻyicha koʻrsatiladigan xizmatlar.

2. Institut jamoat xavfsizligini taʼminlash va jinoyatchilikka qarshi kurashish sohasida shartnoma asosida quyidagi faoliyat turlari boʻyicha pullik xizmat koʻrsatadi:

ekspertlik faoliyati;

ilmiy-tadqiqot faoliyati;

noshirlik faoliyati;

matbaa faoliyati.

3. Institut ekspertlik faoliyati boʻyicha quyidagi pullik xizmatlarni koʻrsatadi:

jamoat xavfsizligini taʼminlash va jinoyatchilikka qarshi kurashish faoliyatini amalga oshiruvchi davlat organlari xodimlarining kasbiy malakasini oshirish;

jamoat xavfsizligini taʼminlash va jinoyatchilikka qarshi kurashish sohasida jinoyatning omillari va tendensiyalari hamda ularni bartaraf etish chora-tadbirlari boʻyicha xulosa berish.

4. Institut ilmiy-tadqiqot faoliyati boʻyicha quyidagi pullik xizmatlarni koʻrsatadi:

jamoat xavfsizligini taʼminlash va jinoyatchilikka qarshi kurashish faoliyati sohasida ijtimoiy fikrni oʻrganish boʻyicha sotsiologik tadqiqotlar oʻtkazish;

stenogramma xizmatini koʻrsatish (ilmiy darajalar beruvchi ilmiy kengashlar majlislari stenogrammasini tayyorlash).

5. Institut noshirlik faoliyatida bosma mahsulotlarni (ilmiy va ommaviy adabiyotlarni, jumladan, kitob, gazeta, jurnal va tasviriy sanʼat asarlarini) nashr qilishga tayyorlash boʻyicha pullik xizmatlarni koʻrsatadi.

6. Institut matbaa faoliyati boʻyicha quyidagi pullik xizmatlarni koʻrsatadi:

bosma nashrlarni bosish;

bosma mahsulotlarning qoliplarini tayyorlash;

muhr va shtamplar tayyorlash, bosma mahsulotlarni muqovalash.

7. Buyurtmachi pullik xizmat koʻrsatishni soʻrab Institutga yozma yoki elektron shaklda murojaat qiladi.

8. Institutga murojaat kelib tushgan kundan boshlab bir ish kuni ichida buyurtmachi va Institut oʻrtasida ikki nusxada pullik xizmat koʻrsatish boʻyicha shartnoma tuziladi.

9. Pullik xizmatlar preyskuranti (narxlari) Institut boshligʻi tomonidan bozor konyunkturasidan kelib chiqqan holda tasdiqlanadi.

10. Pullik xizmatlar koʻrsatishdan tushadigan mablagʻlar Institutning budjetdan tashqari jamgʻarmasiga oʻtkaziladi.

11. Pullik xizmatlar koʻrsatishdan tushadigan mablagʻlarning kelib tushishi va maqsadli sarflanishini nazorat qilish Institut boshligʻi zimmasiga yuklatiladi.

12. Mazkur Nizom talablarining buzilishida aybdor shaxslar qonunchilik hujjatlariga muvofiq javobgar boʻladilar.