Ushbu Qonunning maqsadi organik mahsulotlar (organik mahsulotlarni ishlab chiqarish, qayta ishlash, saqlash, transportda tashish, tamg‘alash va realizatsiya qilish, shuningdek muvofiqlikni baholash va avtorizatsiyalashtirish) sohasidagi munosabatlarni tartibga solishdan iborat.

Ushbu Qonunning amal qilishi shaxsiy iste’mol uchun ishlab chiqarilgan organik mahsulotlarga nisbatan tatbiq etilmaydi.

Organik mahsulotlar to‘g‘risidagi qonunchilik ushbu Qonun va boshqa qonunchilik hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining organik mahsulotlar to‘g‘risidagi qonunchiligida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

Ushbu Qonunda quyidagi asosiy tushunchalar qo‘llaniladi:

avtorizatsiyalashtirish — muvofiqlikni baholash bo‘yicha akkreditatsiya qilingan organ sifatida faoliyatni amalga oshirishga ushbu Qonunda va texnik jihatdan tartibga solish sohasidagi organik mahsulotlarga doir boshqa normativ hujjatlarda belgilangan talablarga rioya etilishi uchun mas’ul bo‘lgan vakolatli davlat organi tomonidan ruxsatnoma berish;

inspeksiya nazorati — organik mahsulotlarning organik mahsulotlar to‘g‘risidagi qonunchilikda va texnik jihatdan tartibga solish sohasidagi normativ hujjatlarda belgilangan talablarga muvofiqligini baholash tartib-taomili;

organik mahsulotlar — ishlab chiqarish, qayta ishlash, saqlash, transportda tashish va realizatsiya qilishning barcha bosqichlarida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga javob beradigan ishlab chiqarish texnologiyalarini qo‘llagan holda olingan sertifikatlashtirilgan mahsulotlar;

organik mahsulotlarni ishlab chiqarish — organik jihatdan muvofiqlik sertifikatini olish uchun rioya etilishi zarur bo‘lgan organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga javob beradigan ishlab chiqarish texnologiyalarini qo‘llagan holda mahsulotlarni ishlab chiqarishga va qayta ishlashga doir faoliyat;

organik mahsulotlarni ishlab chiqaruvchi — organik mahsulotlarni ishlab chiqarishga doir faoliyatni amalga oshiruvchi jismoniy yoki yuridik shaxs.

Organik mahsulotlarni ishlab chiqarish sohasidagi asosiy prinsiplar quyidagilardan iborat:

fuqarolar hayoti va sog‘lig‘ini saqlashning, shuningdek atrof-muhitni muhofaza qilishning ustuvorligi;

organik mahsulotlarni ishlab chiqarish yo‘nalishini tanlashdagi ixtiyoriylik;

organik mahsulotlar to‘g‘risidagi axborotning shaffofligi va ochiqligi;

qayta tiklanadigan tabiiy resurslardan foydalanish;

atrof-muhitni muhofaza qilish va ekologik xavfsizlikni ta’minlash.

O‘zbekiston Respublikasi Vazirlar Mahkamasi:

organik mahsulotlar sohasida yagona davlat siyosati amalga oshirilishini ta’minlaydi;

organik mahsulotlarni ishlab chiqarishni rivojlantirishga qaratilgan davlat dasturlarini tasdiqlaydi va ularning amalga oshirilishini ta’minlaydi;

organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni rivojlantirish uchun qulay huquqiy hamda iqtisodiy shart-sharoitlar yaratadi;

organik mahsulotlarni ishlab chiqarish chog‘ida yo‘l qo‘yiladigan ifloslanish normalarini va organik mahsulotlarning, shu jumladan organik ekinlarning (o‘simliklarning) kasalliklari xavfsizligiga doir talablarni belgilaydi hamda zararkunandalardan himoya qilish uchun foydalaniladigan biologik va kimyoviy moddalarning organik mahsulotlar tarkibidagi qoldiqlarining yo‘l qo‘yiladigan miqdorini belgilaydi;

organik mahsulotlarni O‘zbekiston Respublikasi hududiga olib kirishga va uning hududidan olib chiqishga, shuningdek organik mahsulotlarni ishlab chiqarish, qayta ishlash, saqlash, transportda tashish, realizatsiya qilishga hamda utilizatsiya qilishga doir talablarni belgilaydi;

organik mahsulotlar sohasida xalqaro hamkorlikni amalga oshiradi.

O‘zbekiston Respublikasi Vazirlar Mahkamasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Qishloq xo‘jaligi vazirligi organik mahsulotlar sohasidagi vakolatli davlat organidir (bundan buyon matnda vakolatli davlat organi deb yuritiladi).

Vakolatli davlat organi:

organik mahsulotlar sohasida yagona davlat siyosatini amalga oshiradi;

organik mahsulotlar sohasidagi davlat dasturlarini va boshqa dasturlarni ishlab chiqadi hamda amalga oshiradi;

davlat siyosati va uning ijrosini ta’minlashga qaratilgan davlat dasturlarining maqsadlari va vazifalariga muvofiq barqaror rivojlanish konsepsiyasi prinsiplariga asoslangan organik mahsulotlarni ishlab chiqarish tizimi yaratilishini ta’minlaydi;

organik mahsulotlarni ishlab chiqarishga, shuningdek bu jarayon doirasidagi ishlarni tashkil etishga doir faoliyatni tarmoqlararo muvofiqlashtirishni amalga oshiradi;

organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga, shu jumladan sertifikatlashtirilgan urug‘lardan, ekish materiallaridan, organik o‘g‘itlardan va o‘simliklarni himoya qilish vositalaridan, ozuqa xom ashyosidan, ozuqaviy qo‘shimchalardan, uy hayvonlarini, parrandalarni, asalarilarni parvarishlash chog‘ida foydalaniladigan dori vositalaridan, dezinfeksiyalovchi va tozalovchi vositalardan, oziq-ovqat qo‘shimchalaridan va texnologik komponentlardan organik mahsulotlarni ishlab chiqarish chog‘ida foydalanish bilan bog‘liq talablarga rioya etilishining monitoringini o‘tkazadi;

muvofiqlikni baholash organlari faoliyatini avtorizatsiyalashtirishni amalga oshiradi;

mulkchilik shaklidan qat’i nazar, boshqa tashkilotlardan organik mahsulotlarni ishlab chiqarish to‘g‘risidagi zarur axborotni so‘raydi va oladi;

inson hayotining va sog‘lig‘ining xavfsizligi, shuningdek atrof-muhitni muhofaza qilish talablariga javob beradigan innovatsion agrotexnologik usullar hamda texnologiyalardan, uslublar va jarayonlardan foydalangan holda tadbirkorlik faoliyati subyektlariga organik mahsulotlarni ishlab chiqarish uchun qulay shart-sharoitlar yaratadi;

organik mahsulotlarni ishlab chiqarish, qayta ishlash masalalari bo‘yicha o‘qitish va maslahat xizmatlari ko‘rsatadi;

organik mahsulotlarni ishlab chiqarish maqsadlari va istiqbollari to‘g‘risidagi bilimlarni targ‘ib qilishga doir ishlarni amalga oshiradi;

organik mahsulotlarni ishlab chiqaruvchilar reyestrini shakllantirish va yuritish tartibini belgilaydi;

organik mahsulotlarni ishlab chiqarishni rag‘batlantirish bo‘yicha chora-tadbirlarni ishlab chiqadi va ularning bajarilishi monitoringini amalga oshiradi;

organik mahsulotlar sohasida kadrlarni tayyorlash, qayta tayyorlash va ularning malakasini oshirish tizimini takomillashtirish choralarini ko‘radi;

organik mahsulotlar sohasida davlat-xususiy sheriklikni qo‘llab-quvvatlaydi va rivojlantiradi;

organik mahsulotlar sohasida innovatsion usullar va texnologiyalarni ishlab chiqish bo‘yicha maqsadli tadqiqotlar o‘tkazilishini qo‘llab-quvvatlaydi;

tashqi va ichki bozorlarda organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni rivojlantirishni qo‘llab-quvvatlaydi;

organik mahsulotlar sohasida xalqaro hamkorlikni amalga oshiradi.

Vakolatli davlat organi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Sanitariya-epidemiologik osoyishtalik va jamoat salomatligi xizmati:

organik mahsulotlarning xavfsizligi sohasidagi xalqaro standartlar va tavsiyalar bilan uyg‘unlashgan sanitariya qoidalarini, normalarini va gigiyenik normativlarni ishlab chiqarishga joriy etilishini ta’minlaydi;

texnik jihatdan tartibga solish sohasidagi normativ hujjatlarning organik mahsulotlar xavfsizligiga muvofiqligi yuzasidan ekspertizasini o‘tkazadi.

O‘zbekiston Respublikasi Sanitariya-epidemiologik osoyishtalik va jamoat salomatligi xizmati qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Qishloq xo‘jaligi vazirligi huzuridagi Veterinariya va chorvachilikni rivojlantirish qo‘mitasi:

qishloq xo‘jaligida organik chorvachilikni rivojlantirish sohasidagi xalqaro standartlar va tavsiyalar bilan uyg‘unlashgan veterinariya, veterinariya-sanitariya qoidalari va normalarini ishlab chiqarishga joriy etilishini ta’minlaydi;

ishlab chiqaruvchilar tomonidan organik mahsulotlarni, chorvachilikka oid organik mahsulotlarni hamda kelib chiqishi hayvonlar va o‘simliklarga mansub bo‘lgan xom ashyoni yetishtirish chog‘ida veterinariya to‘g‘risidagi qonunchilikda belgilangan veterinariya-sanitariya talablariga rioya etilishi ustidan nazoratni amalga oshiradi.

O‘zbekiston Respublikasi Qishloq xo‘jaligi vazirligi huzuridagi Veterinariya va chorvachilikni rivojlantirish qo‘mitasi qonunchilikka muvofiq boshqa vakolatlarni ham amalga oshirishi mumkin.

O‘zbekiston Respublikasi Investitsiyalar va tashqi savdo vazirligi huzuridagi O‘zbekiston texnik jihatdan tartibga solish agentligi o‘z vakolatlari doirasida:

muvofiqlikni baholash organlarini akkreditatsiya qilishni amalga oshiradi va ularga akkreditatsiya to‘g‘risida guvohnoma beradi;

organik mahsulotlarning milliy muvofiqlik belgisi shakli va o‘lchamini tasdiqlaydi;

texnik jihatdan tartibga solish sohasidagi normativ-huquqiy hujjatlarni, normativ hujjatlarni ishlab chiqish va tizimli ravishda joriy etishda, shuningdek organik mahsulotlar sohasidagi xalqaro standartlarni respublikada joriy etishga tizimli ravishda ko‘maklashadi;

muvofiqlikni baholash organlarining mutaxassislari uchun inspeksiya nazoratini o‘tkazish doirasida yoki sertifikatlashtirish jarayonida malaka oshirish bo‘yicha tadbirlarni tashkil etadi.

O‘zbekiston Respublikasi Investitsiyalar va tashqi savdo vazirligi huzuridagi O‘zbekiston texnik jihatdan tartibga solish agentligi qonunchilikka muvofiq boshqa vakolatlarni ham amalga oshirishi mumkin.

Mahalliy ijro etuvchi hokimiyat organlari:

qishloq xo‘jaligi korxonalariga va qayta ishlash korxonalariga organik mahsulotlarni ishlab chiqarish, qayta ishlash, saqlash, transportda tashish va realizatsiya qilish uchun yer uchastkalari ajratilishida amaliy yordam ko‘rsatadi;

organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga javob bermaydigan mahsulotlarning organik mahsulotlar sifatida realizatsiya qilinishiga yo‘l qo‘ymaslik choralarini ko‘radi;

aholini organik mahsulotlar yetishtirish to‘g‘risidagi axborot bilan ta’minlaydi.

Mahalliy ijro etuvchi hokimiyat organlari qonunchilikka muvofiq boshqa vakolatlarni ham amalga oshirishi mumkin.

Muvofiqlikni baholash organi quyidagi vakolatlarga ega:

xalqaro standartlarga muvofiq organik mahsulotlarni ishlab chiqarishni sertifikatlashtirish chog‘ida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilishini ta’minlaydi;

organik mahsulotlarni ishlab chiqarishni sertifikatlashtirish to‘g‘risidagi yoki organik mahsulotlar haqidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilmagan taqdirda sertifikatlashtirishni rad etish to‘g‘risida qarorlar qabul qiladi;

organik mahsulotlarni ishlab chiqaruvchilarga organik mahsulotlarni ishlab chiqarish uchun berilgan yer uchastkalaridagi tuproq, suv, urug‘lar, ko‘chatlardan va ekish materialidan, shuningdek oziq-ovqat mahsulotlaridan va ozuqalardan namunalar olishni amalga oshiradi;

qonunchilikda belgilangan tartibda organik jihatdan muvofiqlik sertifikatini beradi, uning amal qilishini to‘xtatib turadi va ushbu sertifikatni bekor qiladi.

Muvofiqlikni baholash organi qonunchilikka muvofiq boshqa vakolatlarni ham amalga oshirishi mumkin.

Muvofiqlikni baholash organi organik mahsulotlarni ishlab chiqarishni sertifikatlashtirish uchun zarur bo‘lgan hujjatlarni organik mahsulotlarni ishlab chiqaruvchidan so‘rab olish huquqiga ega.

Organik mahsulotlar sohasini davlat tomonidan qo‘llab-quvvatlash quyidagi yo‘llar bilan amalga oshiriladi:

organik mahsulotlarni ishlab chiqarish, qayta ishlash, saqlash, transportda tashish va realizatsiya qilishni qo‘llab-quvvatlash hamda rivojlantirishni ta’minlash bo‘yicha aniq chora-tadbirlarni o‘z ichiga olgan qisqa muddatli, o‘rta muddatli va uzoq muddatli davlat dasturlarini qabul qilish hamda amalga oshirish uchun qulay shart-sharoitlar yaratish;

organik mahsulotlar ishlab chiqarishga o‘tkazilgan qishloq xo‘jaligi ekinlarini yetishtirishning o‘ziga xos xususiyatlarini hisobga olgan holda sertifikatlashtirilgan organik mahsulotlarni ishlab chiqarish uchun subsidiyalar ajratish;

organik mahsulotlar sohasida innovatsion uslublar va texnologiyalarning, shuningdek ilg‘or tajribalarning joriy etilishini rag‘batlantirish;

organik mahsulotlarni ishlab chiqaruvchilarga organik mahsulotlarni ishlab chiqarishni moliyalashtirishda, axborotga oid, maslahat va sertifikatlashtirish xizmatlari ko‘rsatishda ko‘maklashish;

organik mahsulotlar ishlab chiqarishni rivojlantirish va sinov loyihalarini amalga oshirish bo‘yicha davlat va xalqaro grant dasturlari doirasida ko‘maklashish;

organik mahsulotlar toifasiga kirmaydigan mahsulotlarni ishlab chiqaruvchilarga organik mahsulotlarni ishlab chiqarishga o‘tish chog‘ida subsidiyalar berish.

Organik mahsulotlarni ishlab chiqaruvchilar quyidagi huquqlarga ega:

organik mahsulotlarni ishlab chiqarish, qayta ishlash, saqlash, transportda tashish va realizatsiya qilish chog‘ida o‘z firma nomidan, tovar belgisidan va xizmat ko‘rsatish belgisidan foydalanish;

organik mahsulotlarni ishlab chiqarish, qayta ishlash, saqlash, transportda tashish va realizatsiya qilish uchun zarur bo‘lgan xizmatlar (ishlar) turlarini, shu jumladan muvofiqlikni baholash organlarini va maslahat xizmatlari ko‘rsatuvchi tashkilotlarni mustaqil ravishda tanlash.

Organik mahsulotlarni ishlab chiqaruvchilar qonunchilikka muvofiq boshqa huquqlarga ham ega bo‘lishi mumkin.

Organik mahsulotlarni ishlab chiqaruvchilar organik mahsulotlarni ishlab chiqarish, qayta ishlash, saqlash, transportda tashish, tamg‘alash va realizatsiya qilish chog‘ida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga rioya etishi shart.

Organik mahsulotlarni ishlab chiqaruvchilarga faoliyatning quyidagi kafolatlari beriladi:

organik mahsulotlarni ishlab chiqarish uchun ajratilgan yer uchastkalarida qishloq xo‘jaligi ekinlarini joylashtirishni ilmiy asoslangan almashlab ekish sxemalariga muvofiq, texnik jihatdan tartibga solish sohasidagi normativ-huquqiy hujjatlarni, shuningdek normativ hujjatlar talablarini hisobga olgan holda amalga oshirish;

organik mahsulotlarni ishlab chiqarish uchun ajratilgan yer uchastkalarida qishloq xo‘jaligi ekinlarini erkin joylashtirish.

Organik mahsulotlarni ishlab chiqarishga o‘tish shartlari quyidagilardan iborat:

organik mahsulotlarni ishlab chiqaruvchi va muvofiqlikni baholash organi o‘rtasida organik mahsulotlarning muvofiqligini baholash to‘g‘risida shartnoma tuzish;

mahsulotlarni ishlab chiqarish jarayonini organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga muvofiqlashtirish;

organik mahsulotlarni ishlab chiqarish organik mahsulotlar toifasiga kirmaydigan mahsulotlarni ishlab chiqarishdan alohida tarzda amalga oshiriladi;

o‘tish davrida ishlab chiqarilgan mahsulotlarni “o‘tish davridagi organik mahsulotlar” sifatida tamg‘alash va realizatsiya qilish.

Organik mahsulotlar toifasiga kirmaydigan mahsulotlarni ishlab chiqarishdan organik mahsulotlarni ishlab chiqarishga o‘tish chog‘ida o‘tish davri belgilanib, mahsulotlarni ishlab chiqaruvchi tomonidan bu davr ichida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablarining bajarilishi ta’minlanadi.

Organik mahsulotlarni ishlab chiqarishga nisbatan quyidagi talablar qo‘yiladi:

sog‘lom hayvonlar va o‘simliklardan, xavfsiz mahsulotlardan hamda kelib chiqishi hayvonlar va o‘simliklarga mansub bo‘lgan xom ashyodan foydalanish;

organik mahsulotlarni ishlab chiqarish chog‘ida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq bo‘lgan texnologiyalardan foydalanish;

tuproq unumdorligini saqlash, tiklash va oshirish;

ishlab chiqarish uchun organik mahsulotlarning muayyan turini tanlash chog‘ida ekologik tizimlarni saqlash;

qayta tiklanadigan tabiiy resurslardan, shu jumladan kelib chiqishi o‘simliklar va hayvonlarga mansub bo‘lgan mahsulotlardan hamda chiqindilardan organik mahsulotlar to‘g‘risidagi qonunchilik talablariga muvofiq foydalanish;

qayta tiklanmaydigan tabiiy resurslardan foydalanishni qisqartirish;

inson sog‘lig‘iga, o‘simliklarga va hayvonlarga zarar yetkazmaydigan, atrof-muhit ifloslanishining oldini oladigan yoki uning oqibatlarini bartaraf etadigan texnologiyalardan foydalanish;

texnologik jarayonlarni sifatli bajarish uchun texnik jihatdan tartibga solish sohasidagi normativ hujjatlarda ruxsat etilgan normalarda oziq-ovqat qo‘shimchalaridan, mikroelementlardan foydalanish;

o‘simliklarni himoya qilish bo‘yicha tegishli choralarni ko‘rish, shu jumladan almashlab ekishga, kasalliklarga, zararkunandalarga va begona o‘tlarga chidamli bo‘lgan o‘simliklar turlarini hamda navlarini tanlash chog‘ida mexanik, biologik va fizik usullarni qo‘llash;

mahalliy sharoitlarga moslashgan, chidamli o‘simlik turlarini, navlarini va hayvonlar zotlarini tanlash;

chorvachilikda organik mahsulotlarni ishlab chiqarish uchun kelib chiqishi tabiiy bo‘lgan moddalardan olingan ingrediyentlardan iborat ozuqalarni va ozuqaviy qo‘shimchalarni qo‘llash;

ichimlik suvi uchun qonunchilikda belgilangan talablarga javob beradigan suvdan organik mahsulotlar ishlab chiqarish chog‘ida ingrediyent sifatida foydalanish;

ayni bir turdagi organik va noorganik ingrediyentlarni bitta organik mahsulotga aralashtirmaslik.

Organik mahsulotlarni ishlab chiqarish chog‘ida quyidagilar taqiqlanadi:

sintetik moddalar, pestitsidlar, gormonlar, antibiotiklardan va kimyoviy oziq-ovqat qo‘shimchalaridan foydalanish;

tuproqdan foydalanmasdan o‘simlik mahsulotlarini yetishtirish usullarini qo‘llash;

ionlashtiruvchi nurlanishdan (manbalardan) foydalanish;

tabiiy holda o‘sadigan o‘simliklarga ishlov berishning kimyoviy usullaridan foydalanish;

oqova suvlar cho‘kmasidan, septik chiqindilardan hamda inson hayotiga va faoliyatiga doir boshqa chiqindilardan tarkib topgan moddalardan o‘g‘it sifatida foydalanish;

chiqindilardan, kimyoviy va radioaktiv moddalardan ifloslangan yer uchastkalaridan, suv obyektlaridan va (yoki) ularning qismlaridan foydalanish;

embrionlarni transplantatsiya qilishni, klonlashtirishni va genga oid muhandislik usullarini, gen-muhandislik-modifikatsiya qilingan hamda transgen organizmlarni qo‘llash, shuningdek gen-muhandislik-modifikatsiya qilingan va transgen organizmlardan foydalangan holda tayyorlangan mahsulotlarni qo‘llash.

Organik mahsulotlarning ayrim turlarini ishlab chiqarishga, shu jumladan ularni parallel ravishda va bir vaqtning o‘zida ishlab chiqarish shart-sharoitlariga doir alohida talablar texnik jihatdan tartibga solish sohasidagi normativ hujjatlarda belgilanadi.

O‘zbekiston Respublikasi hududiga organik mahsulotlarni olib kirish chog‘ida chet davlatning muvofiqlikni baholash organi tomonidan berilgan organik jihatdan muvofiqlik sertifikatining va ushbu mamlakatda qabul qilingan namunadagi organik mahsulotlarning kelib chiqishini tasdiqlaydigan sertifikatning ko‘chirma nusxalari taqdim etilishi kerak.

O‘zbekiston Respublikasi hududiga olib kiriladigan organik mahsulotlarga nisbatan qonunchilikda belgilangan sanitariya, fitosanitariya, veterinariya hamda veterinariya-sanitariya qoidalari va normalari qo‘llaniladi.

Organik mahsulotlarni O‘zbekiston Respublikasi hududidan olib chiqish O‘zbekiston Respublikasi Vazirlar Mahkamasi tomonidan tasdiqlangan shakldagi organik jihatdan muvofiqlik sertifikati taqdim etilganda amalga oshiriladi.

Organik mahsulotlarni ishlab chiqarish, qayta ishlash, saqlashning muvofiqligini baholashni tashkil etish organik mahsulotlarni ishlab chiqaruvchilar uchun ixtiyoriydir.

Organik mahsulotlarni ishlab chiqarish, qayta ishlash, saqlash, transportda tashish, tamg‘alash va realizatsiya qilishning muvofiqligini baholash chog‘ida inspeksiya nazorati organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga rioya etilishi nuqtai nazaridan amalga oshiriladi.

Organik jihatdan muvofiqlik sertifikati organik mahsulotlarni ishlab chiqarish, qayta ishlash, saqlash, transportda tashish, tamg‘alash va realizatsiya qilishning muvofiqligini baholash natijasidir.

Organik mahsulotlarni ishlab chiqaruvchi organik mahsulotlarning muvofiqligini tasdiqlash tartib-taomilidan o‘tganidan va organik jihatdan muvofiqlik sertifikatini olganidan keyin organik mahsulotlarning milliy muvofiqlik belgisidan foydalanish huquqiga ega bo‘ladi.

Organik mahsulotlarning milliy muvofiqlik belgisining tavsifi, shakli va unga doir texnik talablar texnik jihatdan tartibga solish sohasidagi normativ hujjatlarda belgilanadi.

Akkreditatsiya qilingan muvofiqlikni baholash organi organik mahsulotlarni ishlab chiqarish, qayta ishlash, saqlash, transportda tashish va realizatsiya qilish jarayonlarining muvofiqligini organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq baholash ishlarini keyinchalik amalga oshirish uchun vakolatli davlat organi tomonidan avtorizatsiyalashtirishdan o‘tishi shart.

Muvofiqlikni baholash organi avtorizatsiyalashtirishdan o‘tish uchun vakolatli davlat organiga avtorizatsiyalashtirish to‘g‘risida ariza beradi.

Avtorizatsiyalashtirish to‘g‘risidagi arizaga quyidagilar ilova qilinadi:

akkreditatsiya haqidagi guvohnomaning ko‘chirma nusxasi;

yuridik shaxsning davlat ro‘yxatidan o‘tkazilganligi to‘g‘risidagi guvohnomaning ko‘chirma nusxasi;

yuridik shaxs ustavining va (yoki) ta’sis shartnomasining ko‘chirma nusxasi;

organik mahsulotlarni ishlab chiqarish, ularga ishlov berish, ularni qayta ishlash, saqlash, transportda tashish va realizatsiya qilish (organik o‘simlik mahsulotlari, chorvachilikdan olinadigan organik mahsulotlar, organik oziq-ovqat mahsulotlari, organik ozuqa mahsulotlari va boshqalar) sohasida bazaviy ixtisoslashuv to‘g‘risidagi ma’lumotlarga ega bo‘lgan doimiy inspektorlarning yoki inspektorning mavjudligi haqidagi ma’lumotlar;

muvofiqlikni baholash organi xodimlarining ro‘yxati va ularning organik mahsulotlarni ishlab chiqarish, ularga ishlov berish, ularni qayta ishlash, saqlash, transportda tashish va realizatsiya qilish sohasidagi malaka darajasini (ish tajribasini, organik mahsulotlar ishlab chiqarish sohasidagi maxsus bilimlarini, organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablarini bilishini) tasdiqlovchi hujjatlar.

Vakolatli davlat organi muvofiqlikni baholash organini avtorizatsiyalashtirish haqidagi yoki avtorizatsiyalashtirishni rad etish to‘g‘risidagi qarorni ushbu moddaning uchinchi qismida ko‘rsatilgan ariza va unga ilova qilinadigan hujjatlar olingan kundan e’tiboran besh ish kuni ichida qabul qiladi.

Muvofiqlikni baholash organi:

avtorizatsiyadan o‘tgan taqdirda, organik mahsulotlarni ishlab chiqarish, qayta ishlash, saqlash, transportda tashish va realizatsiya qilish jarayonlarining muvofiqligini organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablariga muvofiq baholashni belgilangan tartibda amalga oshiradi;

organik jihatdan muvofiqlik sertifikatini berish, uning amal qilishini to‘xtatib turish yoki uni bekor qilish to‘g‘risida qaror qabul qilingan kundan e’tiboran uch ish kuni ichida vakolatli davlat organini yozma shaklda xabardor qiladi;

bir yil ichida berilgan sertifikatlar to‘g‘risidagi yillik hisobotni vakolatli davlat organiga taqdim etadi.

Muvofiqlikni baholash organining avtorizatsiyalashtirishni rad etish to‘g‘risidagi qarori quyidagi hollarda qabul qilinadi:

muvofiqlikni baholash organi avtorizatsiyalashtirishni bekor qilish to‘g‘risida ariza berganda;

organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablari muvofiqlikni baholash organi tomonidan buzilganda;

ushbu moddaning uchinchi qismi talablariga muvofiq bo‘lmaganda;

muvofiqlikni baholash organi tomonidan taqdim etilgan hujjatlarda ko‘rsatilgan axborot ishonchsiz bo‘lganda;

akkreditatsiya to‘g‘risidagi guvohnomaning amal qilishi to‘xtatib turilganda, tugatilganda yoki u bekor qilinganda.

Muvofiqlikni baholash organi organik mahsulotlarning muvofiqligini baholash to‘g‘risida o‘zi bilan shartnoma tuzgan organik mahsulotlarni ishlab chiqaruvchilarni ushbu organning avtorizatsiyalashtirilishi bekor bo‘lganligi haqida yozma shaklda xabardor qilishi shart.

Muvofiqlikni baholash organi tomonidan berilgan, avtorizatsiyalashtirilishi bekor qilingan organik jihatdan muvofiqlik sertifikati haqiqiy deb topiladi, bunday mahsulotlarni ishlab chiqaruvchilar esa organik mahsulotlarni ishlab chiqaruvchi maqomini organik jihatdan muvofiqlik sertifikatining amal qilish muddati tugaguniga qadar saqlab qoladi.

Organik mahsulotlar sohasida ekvivalentlikni baholash vakolatli davlat organi tomonidan amalga oshiriladi.

Organik mahsulotlarni ishlab chiqarish sohasida ekvivalentlikni baholash chog‘ida organik mahsulotlar to‘g‘risidagi qonunchilik hamda texnik jihatdan tartibga solish sohasidagi normativ hujjatlar talablari xorijiy mamlakatlar qonunchiligiga va xalqaro standartlarga muvofiq o‘rganiladi.

Organik mahsulotlarni tamg‘alash qonunchilikda belgilangan tartibda amalga oshiriladi.

Organik mahsulotlarni ishlab chiqaruvchilar organik mahsulotlarning milliy muvofiqlik belgisidan foydalanish huquqiga ega.

Organik mahsulotlarni ishlab chiqaruvlar tomonidan organik mahsulotlarni tamg‘alashda:

“organic” (organik), “biologic” (biologik), “ecologic” (ekologik), “natural” (tabiiy) degan so‘zlardan va ularning qisqartmalaridan yoki ushbu so‘zlardan hosil qilingan so‘zlardan alohida tarzda yoxud organik mahsulotlarning nomiga qo‘shib foydalanilishi mumkin;

organik jihatdan muvofiqlik sertifikatini bergan muvofiqlikni baholash organi akkreditatsiya qilinganligi to‘g‘risidagi guvohnomaning Muvofiqlikni baholash organlarining davlat reyestrida nazarda tutilgan ro‘yxatga olish raqami ko‘rsatiladi.

Organik mahsulotlarni ishlab chiqaruvchilar reyestri vakolatli davlat organi tomonidan elektron hujjat tarzida shakllantiriladi va yuritiladi.

Organik mahsulotlarni ishlab chiqaruvchilar reyestri vakolatli davlat organining rasmiy veb-saytiga joylashtiriladi.

Vakolatli davlat organi fuqarolarning hayotiga va sog‘lig‘iga tahdid solishi yoki moddiy zarar yetkazishi mumkin bo‘lgan qalbakilashtirilgan organik mahsulotlar chiqarilishining oldini olishga, uning oqibatlarini kamaytirishga yoki uni bartaraf etishga qaratilgan choralar to‘g‘risida aholini xabardor qiladi.

Organik mahsulotlarni realizatsiya qilish bilan shug‘ullanuvchi shaxslarga organik jihatdan muvofiqlik sertifikatiga ega bo‘lmagan organik mahsulotlarni realizatsiya qilish taqiqlanadi.

Muvofiqlikni baholash organi vakolatli davlat organiga organik mahsulotlarni ishlab chiqaruvchilar tomonidan organik mahsulotlarni ishlab chiqarish, qayta ishlash, saqlash, transportda tashish va realizatsiya qilish, shu jumladan ularni qonunchilikda belgilangan tartibda sertifikatlashtirishni amalga oshirish to‘g‘risida axborot taqdim etadi.

Organik mahsulotlar sohasida yuzaga keladigan nizolar qonunchilikda belgilangan tartibda hal etiladi.

Organik mahsulotlar to‘g‘risidagi qonunchilikni buzganlikda aybdor shaxslar belgilangan tartibda javobgar bo‘ladi.

O‘zbekiston Respublikasi Qishloq xo‘jaligi vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

Ushbu Qonun rasmiy e’lon qilingan kundan e’tiboran uch oy o‘tgach kuchga kiradi.