Oʻzbekiston Respublikasining “Yoʻl harakati xavfsizligi toʻgʻrisida”gi Qonuni 17-moddasi hamda Vazirlar Mahkamasining 2003-yil 31-yanvardagi 54-sonli qarori bilan tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizom talablariga muvofiq, transport vositalarining 2020-yilgi majburiy texnik koʻrigini tashkil qilish maqsadida, “Mahalliy davlat hokimiyati toʻgʻrisida”gi Qonunning 6-moddasiga asosan qaror qilaman:

1. Tuman hududidagi barcha yuridik va jismoniy shaxslarga tegishli boʻlgan avtomototransport vositalari va ularning tirkamalari majburiy texnik koʻrikdan oʻtkazilsin.

2. Majburiy texnik koʻrikdan oʻtkazish boʻyicha tuman komissiyasining tarkibi 1-ilovaga, texnik koʻrikdan oʻtkazish jadvali 2-ilovaga muvofiq tasdiqlansin.

3. Tumandagi barcha transport vositalari egalari boʻlgan yuridik va jismoniy shaxslarga transport vositalarini texnik pasporti bilan birgalikda, oʻz vaqtida rejali jadval asosida koʻrikdan oʻtkazish majburiyati yuklatilsin.

4. Transport vositalari quyida belgilangan muddatlarda texnik koʻrikdan oʻtkazilsin:

a) tijorat asosida yoʻlovchilar tashish uchun foydalaniladigan yengil avtomobillar, avtobuslar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalar bir yilda ikki marta;

b) ishlab chiqarilganligiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (mazkur bandning “a” kichik bandida koʻrsatilgan transport vositalaridan tashqari) ikki yilda bir marta;

v) ishlab chiqarilgan yilini hisobga olgan holda ishlab chiqarilganligiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari (mazkur bandning “a” kichik bandida koʻrsatilgan transport vositalaridan tashqari) bir yilda bir marta;

g) tirkamalar koʻrikka transport vositasi-shatakchi uchun belgilangan muddatlarda taqdim etilsin.

5. Qarorning 4-bandi “a” kichik bandida koʻrsatilgan transport vositalarining texnik koʻrigi:

birinchi marta — 1-mart — 30-iyunda;

ikkinchi marta — 1-sentabr — 31-oktabrda oʻtkaziladi.

Yuridik shaxslarga qarashli boʻlgan transport vositalarining texnik koʻrigi 1-mart — 30-iyunda oʻtkaziladi.

Jismoniy shaxslarga qarashli boʻlgan transport vositalarining texnik koʻrigi 28-fevral — 31-avgustda oʻtkaziladi.

6. Transport vositalarini texnik koʻrikdan oʻtkazish boʻyicha tuman komissiyasi (B. Abdullayev)ga:

Transport vositalarining texnik holati, ulardan foydalanish normalari va qoidalariga rioya etilishi ustidan samarali nazoratni tashkil etish;

Transport vositalarining texnik holati va uskunalari yoʻl harakati xavfsizligi standartlari, qoidalari, normalariga muvofiqligini baholash vazifasi yuklatilsin.

7. Belgilansinki, Vazirlar Mahkamasining 2003-yil 31-yanvardagi “Transport vositalarini majburiy texnik koʻrikdan oʻtkazish tartibi toʻgʻrisidagi nizomini tasdiqlash haqida”gi 54-sonli qarori 3-bandiga muvofiq, Oʻzbekiston Respublikasi Milliy gvardiyasi, Mudofaa vazirligi, Ichki ishlar vazirligi, Davlat xavfsizlik xizmatining harbiy boʻlinmalari transport vositalari koʻrsatib oʻtilgan idoralar tomonidan belgilangan tartibda majburiy texnik koʻrikdan oʻtkazilishi inobatga olinsin.

8. Transport vositalari DYHXX organlari tomonidan texnik koʻrikdan oʻtkazilganligi uchun belgilangan tartibda yigʻim undiriladi.

9. Tuman ichki ishlar boʻlimi (Oʻ. Asqarov) majburiy texnik koʻrik yakuni boʻyicha tuman hokimligiga axborot taqdim etsin.

10. Mazkur qaror qabul qilinishi munosabati bilan tuman hokimining 2019-yil 28-fevraldagi 1100-sonli qarori oʻz kuchini yoʻqotgan deb hisoblansin.

11. Mazkur qarorning ijrosini nazorat qilish tuman hokimi oʻrinbosari L. Muqimov zimmasiga yuklansin.

12. Ushbu qaror rasmiy eʼlon qilingan kundan eʼtiboran kuchga kiradi.