“Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasi Qonunining 6-moddasiga asosan Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Senatining Reglamenti ilovaga muvofiq tasdiqlansin.

2. Quyidagilar:

Oʻzbekiston Respublikasi Oliy Majlisi Senatining 2017-yil 25-avgustdagi “Oʻzbekiston Respublikasi Oliy Majlisi Senatining Reglamentiga oʻzgartish va qoʻshimchalar kiritish toʻgʻrisida”gi SQ-218-III-sonli Qarorining 1-bandi;

Oʻzbekiston Respublikasi Oliy Majlisi Senati Kengashining 2020-yil 24-martdagi “Oʻzbekiston Respublikasi Oliy Majlisi Senatining Reglamentiga qoʻshimchalar kiritish toʻgʻrisida”gi KQ-27-IV-sonli Qarori oʻz kuchini yoʻqotgan deb topilsin.

3. Ushbu Qaror Oʻzbekiston Respublikasi Oliy Majlisi Senatining navbatdagi yalpi majlisi tasdigʻiga kiritilsin.

4. Ushbu Qarorning ijrosini nazorat qilish Oʻzbekiston Respublikasi Oliy Majlisi Senati Raisining oʻrinbosari Z. Nizamxodjayev zimmasiga yuklatilsin.

5. Ushbu Qaror qabul qilingan kundan eʼtiboran kuchga kiradi.

1-modda. Oʻzbekiston Respublikasi Oliy Majlisi Senatining Reglamenti (bundan buyon matnda Reglament deb yuritiladi) Senatning qonunchilik, nazorat faoliyatini va boshqa faoliyatni amalga oshirish tartibini belgilab beradi, shuningdek Oʻzbekiston Respublikasi Oliy Majlisi Senatining (bundan buyon matnda Senat deb yuritiladi) faoliyatini tashkil etish bilan bogʻliq boshqa masalalarni tartibga soladi.

2-modda. Senat faoliyatining asosiy prinsiplari, uni shakllantirish tartibi, vakolatlari, senatorlik huquqlari va majburiyatlarini moneliksiz hamda samarali amalga oshirish kafolatlari Oʻzbekiston Respublikasi Konstitutsiyasida, “Referendum yakunlari hamda davlat hokimiyati tashkil etilishining asosiy prinsiplari toʻgʻrisida”gi, “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasining Konstitutsiyaviy qonunlarida, “Oʻzbekiston Respublikasi Oliy Majlisi Senatining Reglamenti toʻgʻrisida”gi, “Oʻzbekiston Respublikasi Oliy Majlisi Qonunchilik palatasi deputatining va Senati aʼzosining maqomi toʻgʻrisida”gi, “Parlament nazorati toʻgʻrisida”gi, “Xalq deputatlari mahalliy kengashi deputatini, Oʻzbekiston Respublikasi Oliy Majlisining Qonunchilik palatasi deputatini va Senati aʼzosini chaqirib olish toʻgʻrisida”gi Oʻzbekiston Respublikasi qonunlarida, boshqa qonun hujjatlarida va ushbu Reglamentda belgilanadi.

3-modda. Senat oʻz matbuot organlariga, rasmiy veb-saytiga, hammaga maʼlum xalqaro va milliy ijtimoiy tarmoqlarda sahifalarga ega, shuningdek oʻz nashrlarida va (yoki) umumiy nashrlarda oʻz materiallarini chop etadi.

4-modda. Senat faoliyatining tashkiliy shakli uning zaruratga qarab, lekin yiliga kamida uch marta oʻtkaziladigan majlislaridir.

Senat majlislari, agar ularning ishida senatorlar umumiy sonining kamida yarmi ishtirok etsa, vakolatli hisoblanadi. Oʻzbekiston Respublikasining Konstitutsiyasini, konstitutsiyaviy qonunlarni maʼqullash, ularga oʻzgartishlar va qoʻshimchalar kiritish toʻgʻrisidagi masalalar koʻrib chiqilayotganda senatorlar umumiy sonining kamida uchdan ikki qismi hozir boʻlishi shart.

5-modda. Senat majlislari ishini tashkil etish uchun ushbu majlislarda majlis kotibiyati, sanoq komissiyasi va ovozlarni hisoblashning elektron tizimidan foydalanish ustidan nazorat guruhi saylanadi.

6-modda. Senat oʻzining vakolatlariga kiritilgan masalalar yuzasidan, shuningdek Senatning ichki faoliyatini tashkil etish masalalari yuzasidan qarorlar qabul qiladi.

Senat qarorlari senatorlar umumiy sonining koʻpchilik ovozi bilan qabul qilinadi, qonun hujjatlarida nazarda tutilgan hollar bundan mustasno.

7-modda. Zarur hollarda Senat majlislari axborot-kommunikatsiya texnologiyalari vositalaridan foydalangan holda videokonferensaloqa rejimida oʻtkazilishi mumkin.

Senat majlislarini videokonferensaloqa rejimida oʻtkazish toʻgʻrisidagi qaror Senat Kengashi tomonidan qabul qilinadi.

Senatning videokonferensaloqa rejimidagi majlislari Senat binosining majlislar zalida (markaziy studiyada) oʻtkaziladi. Qoida tariqasida, doimiy asosda ishlovchi senatorlar markaziy studiyadan, qolgan senatorlar esa, Qoraqalpogʻiston Respublikasi, viloyatlar va Toshkent shahri markazlaridan (joylardagi studiyalardan) jamoaviy ishtirok etadilar. Ayrim hollarda senatorlar yakka tartibda ham ishtirok etishlari mumkin.

Senatning videokonferensaloqa rejimida oʻtkaziladigan majlisini olib borish, kun tartibidagi masalalarni koʻrib chiqish va qarorlar qabul qilish ushbu Reglamentda belgilangan umumiy tartibda amalga oshiriladi.

Senatning videokonferensaloqa rejimida oʻtkaziladigan majlisida ovozlarni hisoblash va ovoz berish natijalarini aniqlash bilan bogʻliq masalalarni hal etish uchun senatorlar orasidan sanoq komissiyasi tuziladi.

Videokonferensaloqa rejimida oʻtkaziladigan majlislarda ovoz berish quyidagi tartibda amalga oshiriladi:

1) majlisda raislik qiluvchi tomonidan masala ovozga qoʻyilganligi eʼlon qilinadi;

2) Senat binosining majlislar zalida (markaziy studiyada) hozir boʻlgan, jamoaviy va yakka tartibda ulanish nuqtasidan ishtirok etayotgan senatorlar qoʻllarini koʻtarib ovoz beradilar. Ovoz berish elektron tizim orqali ham amalga oshirilishi mumkin;

3) raislik qiluvchi “qarshilar” bormi, “betaraflar” bormi degan savollar bilan murojaat qiladi. Senatorlar bu savollarga ham qoʻllarini koʻtarib javob beradilar;

4) ishtirok etayotgan barcha senatorlar tasviri ekranga chiqariladi. Ovoz berish jarayonida ovoz berayotgan barcha senatorlar koʻrinib turishi shart;

5) ovoz berish natijasi sanoq komissiyasi tomonidan qayd etib boriladi;

6) majlisda ishtirok etayotgan barcha senatorlar ovoz berib boʻlganidan soʻng sanoq komissiyasi tomonidan raislik qiluvchiga ovoz berish natijalari toʻgʻrisida maʼlumot beriladi;

7) raislik qiluvchi ovoz berish natijalarini eʼlon qiladi.

8-modda. Senatning birinchi majlisi Senat shakllantirilganidan keyin bir oydan kechiktirmay Oʻzbekiston Respublikasi Markaziy saylov komissiyasi tomonidan chaqiriladi.

Senatning birinchi majlisini Oʻzbekiston Respublikasi Markaziy saylov komissiyasining Raisi ochadi va Senat Raisi saylangunga qadar unda raislik qiladi.

9-modda. Senatning birinchi majlisi, qoida tariqasida, quyidagi kun tartibi bilan oʻtkaziladi:

1) Oʻzbekiston Respublikasi Markaziy saylov komissiyasi Raisining Senatni shakllantirish yakunlari toʻgʻrisidagi axboroti;

2) Senat Raisini saylash;

3) Senat Raisining oʻrinbosarlarini saylash;

4) Senat qoʻmitalari va komissiyalarini tuzish.

Senatning birinchi majlisida Senat faoliyatini tashkil etish bilan bogʻliq boshqa masalalar ham koʻrib chiqilishi mumkin. Bu haqda tegishli qarorlar qabul qilinadi.

10-modda. Senat Raisligiga nomzod Oʻzbekiston Respublikasi Prezidenti tomonidan senatorlar orasidan taqdim etiladi.

Senat Raisi lavozimiga nomzodga senatorlar savollariga javob berish uchun 30 daqiqagacha vaqt ajratiladi. Senat Raisi lavozimiga nomzod muhokama qilinayotganda senatorlarning nutqi 10 daqiqadan ortiq davom etmasligi kerak.

11-modda. Senat Raisi yashirin ovoz berish yoʻli bilan Senat vakolatlari muddatiga saylanadi.

Senat Raisini saylashda yashirin ovoz berish usuli Senat tomonidan belgilanadi.

Yashirin ovoz berish uchun byulletenlardan foydalanib ovoz berish oʻtkazilgan taqdirda yashirin ovoz berish vaqti va joyi, uni oʻtkazish tartibi hisob komissiyasi tavsiyalari boʻyicha ushbu Reglamentga muvofiq Senat tomonidan belgilanadi hamda hisob komissiyasi raisi tomonidan eʼlon qilinadi.

12-modda. Nomzod, agar u yashirin ovoz berish natijasida senatorlar umumiy sonining koʻpchilik ovozini olgan boʻlsa, Senat Raisi etib saylangan hisoblanadi.

Senat Raisi saylanganligi toʻgʻrisida qaror qabul qilinadi, qarorni Senat majlisida raislik qiluvchi imzolaydi.

13-modda. Agar Senat Raisi lavozimiga koʻrsatilgan nomzod senatorlarning zarur miqdordagi ovozini toʻplamagan boʻlsa, Senat Raisi lavozimiga takroriy saylov oʻtkaziladi.

Senat Raisi lavozimiga takroriy saylov ushbu Reglamentning 10 — 12-moddalariga muvofiq oʻtkaziladi.

14-modda. Senat Raisi oʻz vazifalarini bajarish davrida siyosiy partiya va harakatlarga aʼzolikni toʻxtatib turadi.

15-modda. Senat Raisi:

1) Senat va uning Kengashi majlislarini chaqiradi, ularda raislik qiladi;

2) Senat muhokamasiga kiritiladigan masalalarni tayyorlashga umumiy rahbarlik qiladi;

3) Senat maʼqullagan qonunlarni imzolash uchun Oʻzbekiston Respublikasi Prezidentiga yuboradi;

4) Senat qoʻmitalari va komissiyalarining faoliyatini muvofiqlashtirib boradi;

5) Oʻzbekiston Respublikasi qonunlarining va Senat qarorlarining ijrosi ustidan nazoratni tashkil etadi;

6) Senat Raisining oʻrinbosarlari oʻrtasida vazifalarni taqsimlaydi;

7) parlamentlararo aloqalarni amalga oshirish ishlariga hamda xalqaro parlament tashkilotlari ishi bilan bogʻliq Senat guruhlarining faoliyatiga rahbarlik qiladi;

8) Senat matbuot organlarining ustavlarini va tahrir hayʼatlari tarkibini hamda ularning ishlashi uchun zarur xarajatlar smetalarini tasdiqlaydi;

9) Senat Kengashi bilan kelishilgan holda Senat matbuot organlarining bosh muharrirlarini tayinlaydi va ularni lavozimidan ozod qiladi;

10) Senat matbuot organlarining faoliyatiga rahbarlikni amalga oshiradi;

11) Qonunchilik palatasi, boshqa davlat organlari, chet davlatlar, xalqaro va boshqa tashkilotlar bilan oʻzaro munosabatlarda Senat nomidan ish koʻradi;

12) Senat va uning Kengashi qarorlarini imzolaydi;

13) Senat devoni faoliyatiga rahbarlikni amalga oshiradi;

14) Senatning xarajatlar smetasini shakllantirish va bajarishga doir ishlarga umumiy rahbarlikni hamda ularni muvofiqlashtirishni amalga oshiradi;

15) Senatga ajratilgan budjet mablagʻlaridan foydalanish toʻgʻrisidagi farmoyishlarni imzolaydi;

16) Oʻzbekiston Respublikasi Konstitutsiyasi, boshqa qonunlar va ushbu Reglamentda nazarda tutilgan boshqa vakolatlarni amalga oshiradi.

Senat Raisi oʻzining vakolatiga taalluqli masalalarni Kengash muhokamasiga kiritishga haqli.

Senat Raisi oʻzining vakolatiga taalluqli masalalar yuzasidan farmoyishlar chiqaradi.

16-modda. Senat Raisi yashirin ovoz berish orqali senatorlar umumiy sonining uchdan ikki qismidan koʻprogʻining ovozi bilan qabul qilingan Senat qaroriga binoan muddatidan ilgari chaqirib olinishi mumkin.

Senat Raisini muddatidan ilgari chaqirib olish toʻgʻrisidagi masala Oʻzbekiston Respublikasi Prezidentining taqdimiga yoki senatorlar umumiy sonining kamida uchdan bir qismining taklifiga binoan Senat tomonidan koʻrib chiqiladi.

Senat Raisini muddatidan ilgari chaqirib olish toʻgʻrisidagi masala koʻrib chiqilayotganda Senat majlisiga Senat Raisining oʻrinbosarlaridan biri raislik qiladi.

Senat Raisini muddatidan ilgari chaqirib olish toʻgʻrisida qaror qabul qilinadi. Ushbu qarorni Senat majlisida raislik qiluvchi imzolaydi.

17-modda. Senat Raisining boʻsh lavozimiga nomzod koʻrsatish va uni saylash ushbu Reglamentning 10 — 13-moddalarida belgilangan tartibda oʻtkaziladi.

18-modda. Senat Raisi oʻrinbosarlarining nomzodlari Oʻzbekiston Respublikasi Prezidenti tomonidan senatorlar orasidan taqdim etiladi.

Senat Raisi oʻrinbosarlari lavozimiga koʻrsatilgan har bir nomzod boʻyicha ushbu Reglamentda nazarda tutilgan tartibda muhokama va alohida ovoz berish oʻtkaziladi.

Senat Raisining oʻrinbosarlari yashirin ovoz berish orqali senatorlar umumiy sonining koʻpchilik ovozi bilan Senat vakolati muddatiga saylanadi.

Senat Raisining oʻrinbosarlaridan biri Qoraqalpogʻiston Respublikasining vakili boʻladi.

19-modda. Senat Raisi oʻrinbosarlari lavozimlariga nomzodlarga senatorlarning savollariga javob berish uchun 20 daqiqagacha vaqt ajratiladi. Senat Raisi oʻrinbosarlarining lavozimlariga nomzodlar muhokama qilinayotganda senatorlarning nutqi 10 daqiqadan ortiq davom etmasligi kerak.

20-modda. Agar nomzodlar yashirin ovoz berish natijasida senatorlar umumiy sonining koʻpchilik ovozini olgan boʻlsa, ular Senat Raisi oʻrinbosarlari etib saylangan hisoblanadi.

Ovoz berish natijalari Senat Qarori bilan rasmiylashtiriladi. Ushbu Qaror Senat majlisida raislik qiluvchi tomonidan imzolanadi.

21-modda. Agar Senat Raisi oʻrinbosari lavozimiga nomzod senatorlarning kerakli miqdordagi ovozini toʻplamagan boʻlsa, ushbu Reglamentning 18 — 20-moddalarida belgilangan tartibda Senat Raisi oʻrinbosari lavozimiga takroriy saylov oʻtkaziladi.

22-modda. Senat Raisi oʻrinbosarlari oʻz vazifalarini bajarish davrida siyosiy partiya va harakatlarga aʼzolikni toʻxtatib turadilar.

23-modda. Senat Raisining oʻrinbosarlari Senat Raisining topshirigʻiga binoan uning ayrim vazifalarini bajaradi va Senat Raisi yoʻqligida yoki oʻz vazifalarini amalga oshirishi mumkin boʻlmagan hollarda uning vazifasini bajarib turadi.

24-modda. Senat Raisining oʻrinbosari:

1) Senat tomonidan oʻtkaziladigan tadbirlar rejalarining tuzilishini tashkillashtiradi;

2) Senat va Senat Kengashi majlislariga, Senatning boshqa tadbirlariga tayyorgarlik koʻrish boʻyicha ishlarni muvofiqlashtirib boradi;

3) qoʻmitalarning, komissiyalarning, senatorlarning ishini muvofiqlashtirib boradi;

4) oʻz vakolatiga taalluqli masalalar yuzasidan topshiriqlar beradi;

5) ushbu Reglamentda nazarda tutilgan boshqa vakolatlarni amalga oshiradi.

25-modda. Senat Raisining oʻrinbosarlari yashirin ovoz berish orqali senatorlar umumiy sonining koʻpchilik ovozi bilan qabul qilingan Senat Qaroriga binoan muddatidan ilgari chaqirib olinishi mumkin.

Senat Raisining oʻrinbosarlarini muddatidan ilgari chaqirib olish toʻgʻrisidagi masala Oʻzbekiston Respublikasi Prezidentining taqdimiga yoki senatorlar umumiy sonining kamida uchdan bir qismining taklifiga binoan Senat tomonidan koʻrib chiqiladi.

Senat Raisining oʻrinbosarlarini muddatidan ilgari chaqirib olish toʻgʻrisida qaror qabul qilinadi, qarorni Senat majlisida raislik qiluvchi imzolaydi.

26-modda. Senat Raisi oʻrinbosarlarining boʻsh lavozimiga nomzod koʻrsatish va ularni saylash ushbu Reglamentning 18 — 20-moddalarida oʻrnatilgan tartibda oʻtkaziladi.

27-modda. Senatning faoliyatini samarali tashkil etish maqsadida Senat Kengashi tuziladi.

Senat Kengashi doimiy faoliyat koʻrsatuvchi kollegial organdir.

Senat Kengashining tarkibiga Senat Raisi, uning oʻrinbosarlari va Senat qoʻmitalarining raislari kiradi.

Senat Kengashiga Senat Raisi rahbarlik qiladi, u Kengashning majlislarini olib boradi va uning qarorlarini imzolaydi.

Senat Kengashi oʻz vakolatiga kiradigan masalalar yuzasidan aʼzolari umumiy sonining koʻpchilik ovozi bilan qarorlar qabul qiladi.

28-modda. Senat Kengashi Senat majlislari oraligʻida zaruratga qarab toʻplanadi.

Senat Kengashi majlislarini Senat Raisi, u boʻlmagan yoki oʻz vazifalarini bajara olmagan taqdirda, uning oʻrinbosarlaridan biri chaqiradi va olib boradi.

Zaruratga koʻra Senat Kengashining majlislari axborot-kommunikatsiya texnologiyalari vositalaridan foydalangan holda videokonferensaloqa rejimida oʻtkazilishi mumkin.

Senat Kengashi majlisi uning boshqa aʼzolari tashabbusiga koʻra ham chaqiriladi.

29-modda. Senat Kengashi:

1) Senat majlisi kun tartibining loyihasini shakllantiradi;

2) Senat majlislarini chaqiradi;

3) qonunda nazarda tutilgan hollarda, Senatning vakolatlariga taalluqli qarorlarni Senatning majlislari oraligʻida qabul qiladi, ushbu qarorlar keyinchalik Senatning majlisida tasdiqlanadi;

4) qoʻmitalarning ishini muvofiqlashtirib boradi;

5) Oʻzbekiston Respublikasi Markaziy banki raisining taqdimiga binoan Oʻzbekiston Respublikasi Markaziy banki boshqaruvining mustaqil aʼzolarini tasdiqlaydi;

6) Senat faoliyatini tashkil etish bilan bogʻliq, shuningdek qonunda nazarda tutilgan boshqa masalalarni hal qiladi.

30-modda. Senat Kengashi qarorlari loyihalari va uning majlisida koʻrib chiqilishi lozim boʻlgan boshqa hujjatlar, qoida tariqasida, Senat Kengashi majlisi boshlanishidan kamida uch kun avval Senat Kengashiga kiritiladi.

Senat Kengashi tarkibiga kiradigan shaxslarga, shuningdek uning majlislarida ishtirok etuvchi boshqa shaxslarga majlisda koʻrib chiqish nazarda tutilgan masalalar haqida oldindan xabar qilinadi va zarur materiallar taqdim etiladi.

Senat Kengashi majlislarida bayonnoma yuritiladi. Bayonnoma majlisda raislik qiluvchi tomonidan imzolanadi.

Senat Kengashi tomonidan koʻrib chiqilgan va qabul qilingan qarorlar toʻgʻrisida senatorlarga hamda uning majlislarida ishtirok etgan shaxslarga xabar qilinadi.

31-modda. Senat muhokamasiga kiritiladigan masalalarni dastlabki tarzda koʻrib chiqish va tayyorlash, Oʻzbekiston Respublikasi qonunlari hamda Senat tomonidan qabul qilinadigan qarorlarning ijrosini nazorat qilish uchun Senat shakllanganidan keyin uning vakolatlari muddatiga senatorlar orasidan rais, uning oʻrinbosari va aʼzolaridan iborat tarkibda qoʻmitalar saylanadi.

Senat qoʻmitalari Senat oldida masʼul va unga hisobdordir.

32-modda. Qoʻmitalar raislari, ularning oʻrinbosarlari va qoʻmitalar aʼzolarining nomzodlari senatorlar orasidan Senat Raisi tomonidan koʻrsatiladi.

Qoʻmitalar raislari va ularning oʻrinbosarlari lavozimiga barcha nomzodlar boʻyicha muhokama oʻtkaziladi.

Muhokama chogʻida qoʻmitalar raislari va ularning oʻrinbosarlari lavozimiga nomzodlar Senat majlisida soʻzga chiqishi va senatorlar savollariga javob berishi mumkin.

Senatorlar koʻrsatilgan nomzodlarni yoqlab yoki ularga qarshi oʻz dalil-isbotlarini bayon etish huquqiga ega.

Senat Raisi va uning oʻrinbosarlari Senatning qoʻmitalari tarkibiga saylanishi mumkin emas.

33-modda. Qoʻmitalarning shaxsiy tarkibi boʻyicha takliflar qoʻmitalar raislari va boshqa senatorlar tomonidan Senat muhokamasiga kiritiladi.

34-modda. Senatorlarda qoʻmita tarkibi boʻyicha eʼtirozlar boʻlgan taqdirda, ovoz berish nomzodi qoʻmita tarkibiga taklif etilayotgan har bir senator boʻyicha alohida-alohida oʻtkaziladi.

Muhokama Senatning senatorlar umumiy sonining koʻpchilik ovozi bilan qabul qilingan qaroriga koʻra toʻxtatiladi.

35-modda. Senat qoʻmitalari raislari, ularning oʻrinbosarlari va qoʻmitalar aʼzolari Senat majlisida yashirin ovoz berish orqali senatorlar umumiy sonining koʻpchilik ovozi bilan Senat vakolati muddatiga saylanadi.

Senat qoʻmitalari raislari, ularning oʻrinbosarlari va qoʻmitalar aʼzolari saylanganligi toʻgʻrisida Senat qaror qabul qiladi.

36-modda. Agar qoʻmita raisi lavozimiga koʻrsatilgan nomzod zarur miqdordagi ovozlarni toʻplamagan boʻlsa, qoʻmita raisining takroriy saylovi ushbu Reglamentning 32 — 35-moddalarida nazarda tutilgan tartibda oʻtkaziladi.

37-modda. Qoʻmitalar tarkibini oʻzgartirish boʻyicha takliflar Senat Kengashi tomonidan Senatga koʻrib chiqish uchun kiritiladi.

Qoʻmitalar tarkibini oʻzgartirish toʻgʻrisidagi qarorlar senatorlar umumiy sonining koʻpchilik ovozi bilan qabul qilinadi va Senat qarorlari bilan rasmiylashtiriladi.

38-modda. Senat muayyan vazifalarni bajarish uchun komissiyalar tuzishi mumkin.

Komissiyalar Senat majlisida senatorlar orasidan komissiya raisi va aʼzolari, zarurat boʻlganda esa komissiya raisining oʻrinbosaridan iborat tarkibda tuziladi.

Senat komissiya tuzilganligi toʻgʻrisida qaror qabul qiladi.

Senat komissiyalari Oʻzbekiston Respublikasi Oliy Majlisi palatalarining (bundan buyon matnda Oliy Majlis palatalari deb yuritiladi) qoʻshma qarori bilan ham tuzilishi mumkin.

Komissiyani tuzish toʻgʻrisidagi Senat qarorida komissiyaning nomi, maqsadi va vazifalari, uning shaxsiy tarkibi, komissiya vakolatlari, komissiya ishini taʼminlashga doir tadbirlar belgilangan boʻlishi kerak.

39-modda. Zaruratga koʻra Senat qoʻmitalari va komissiyalarining majlislari axborot-kommunikatsiya texnologiyalari vositalaridan foydalangan holda videokonferensaloqa rejimida oʻtkazilishi mumkin.

40-modda. Senat, uning organlari va senatorlar faoliyatining tashkiliy, axborot, moddiy-texnika taʼminoti Senat devoni tomonidan amalga oshiriladi.

41-modda. Senat devonini tashkil etish va faoliyatini yuritish tartibi Senat Kengashi tomonidan tasdiqlanadigan Senat devoni toʻgʻrisidagi nizomda belgilanadi.

42-modda. Senat majlisida koʻrib chiqilishi lozim boʻlgan masalalar ularni koʻrib chiqish navbati, har bir masalani koʻrib chiqishga tayyorlash uchun masʼul boʻlgan Senatning qoʻmitalari (bundan buyon matnda masʼul qoʻmitalar deb yuritiladi) koʻrsatilgan holda majlis kun tartibi loyihasiga kiritiladi.

Senat majlisi kun tartibining loyihasi Senat Kengashi tomonidan shakllantiriladi.

Masʼul qoʻmita Senat majlisining kun tartibiga kiritish uchun Senat Kengashiga oʻzi tayyorlagan masalalar va takliflar toʻgʻrisidagi xulosalarini taqdim etadi.

Senat majlisining kun tartibi Senat qarori bilan tasdiqlanadi.

43-modda. Senat majlisini uyushqoqlik bilan oʻtkazish va unda rejalashtirilgan qarorlarni oʻz vaqtida qabul qilish uchun Senat Kengashi tomonidan senatorlar va Senat devoni xodimlari jumlasidan Senat majlisiga tayyorgarlik koʻruvchi va uni oʻtkazuvchi ishchi guruh tuziladi. Ishchi guruhga, qoida tariqasida, Senat Raisining oʻrinbosarlaridan biri rahbarlik qiladi. Ishchi guruh oʻz faoliyatini guruh rahbari tomonidan tasdiqlanadigan Senat majlisiga tayyorgarlik koʻrish va uni oʻtkazish boʻyicha tashkiliy-texnik tadbirlar rejasiga muvofiq amalga oshiradi.

44-modda. Senat majlislari ochiq va oshkora oʻtkaziladi hamda ommaviy axborot vositalari tomonidan yoritiladi.

Ommaviy axborot vositalari vakillari Senatda belgilangan tartibda akkreditatsiyadan oʻtgan taqdirdagina ochiq majlislarda ishtirok etishlari mumkin.

Taklif etilganlar Senat majlisining faoliyatiga aralashish huquqiga ega emas, Senat ishini maʼqullashini yoki maʼqullamasligini bildirishdan tiyilishi, belgilangan tartibga rioya qilishi va Senat majlisida raislik qiluvchining farmoyishlariga boʻysunishi shart.

45-modda. Zarurat boʻlganda, Senat yopiq majlis oʻtkazish toʻgʻrisida qaror qabul qilishi mumkin. Agar shunday taklif Oʻzbekiston Respublikasi Prezidenti, Senat Raisi, Senat Kengashi yoki qoʻmitasi tomonidan kiritilgan boʻlsa, yopiq majlis oʻtkazish toʻgʻrisida qaror qabul qilinishi mumkin.

Senatning yopiq majlisini oʻtkazish toʻgʻrisidagi qaror senatorlar umumiy sonining koʻpchilik ovozi bilan qabul qilinadi.

46-modda. Senatning yopiq majlisida muhokama etiladigan davlat siridan yoki qonun bilan qoʻriqlanadigan boshqa sirdan iborat maʼlumotlarni oshkor etish mumkin emas.

Senatning yopiq majlisida raislik qiluvchi majlis boshlanishida senatorlar va taklif etilgan shaxslarni yopiq majlisni oʻtkazishga oid asosiy qoidalar, majlisda muhokama etiladigan maʼlumotlarning maxfiylik darajasi toʻgʻrisida xabardor qiladi hamda davlat siridan yoki qonun bilan qoʻriqlanadigan boshqa sirdan iborat maʼlumotlarni oshkor qilganlik uchun javobgarlik haqida ogohlantiradi.

47-modda. Senatning yopiq majlislariga ommaviy axborot vositalarining vakillari kiritilmaydi.

Senatning yopiq majlisiga foto va videotexnika, telefon aloqa hamda radioaloqa vositalarini, shuningdek ovoz yozish va axborotni qayta ishlash vositalarini olib kirish va yopiq majlis davomida ulardan foydalanish taqiqlanadi.

48-modda. Senat majlislari hozir boʻlgan senatorlarni roʻyxatga olishdan boshlanadi.

Senat majlislari, agar ularning ishida senatorlar umumiy sonining kamida yarmi ishtirok etsa, vakolatli hisoblanadi.

Senator Senat majlislarida ishtirok etishi shart.

Senator Senat majlisida ishtirok eta olmasligi haqida Senat Raisini oldindan xabardor qiladi.

Senatorlarni roʻyxatga olish majlisdagi har bir tanaffusdan soʻng oʻtkaziladi. Qoʻshimcha roʻyxatga olish senator talabiga koʻra oʻtkazilishi mumkin.

49-modda. Senat majlisida raislik qiluvchi:

1) majlisning borishiga umumiy rahbarlik qiladi, ushbu Reglamentga rioya etilishini taʼminlaydi;

2) majlis kun tartibiga koʻra soʻzga chiqish istagining qayd etilgan roʻyxati boʻyicha ushbu Reglament talablariga muvofiq yoxud Senat qarorida belgilangan boshqa tartibda soʻzlash uchun navbat beradi;

3) Senat majlisini olib borish masalalari yuzasidan Senat qarorlari bajarilishini taʼminlaydi;

4) ovoz berishni oʻtkazadi va uning natijalarini eʼlon qiladi;

5) Senat majlislarining stenogrammalarini yuritish boʻyicha Senat devoni ishini nazorat qiladi.

Senat majlisida raislik qiluvchi:

1) ushbu Reglament qoidalarini buzgan taqdirda senatorni ogohlantirishga, takror buzgan taqdirda esa majlis oʻtkaziladigan butun kun davomida uni soʻzga chiqishdan mahrum qilishga;

2) Senat majlisining ishiga halaqit berayotgan taklif etilgan shaxslarni majlislar zalidan chiqarib yuborishga haqli.

50-modda. Senat majlislarida ish davlat tilida olib boriladi va zarurat boʻlganda boshqa tillarga sinxron tarjimasi taʼminlanadi.

Senat majlislarida stenogrammalar yuritiladi.

Senat majlisining stenogrammasi, shuningdek majlisda koʻrib chiqilayotgan masalalarga aloqador hujjatlar, senatorlarni roʻyxatga olish toʻgʻrisidagi elektron tizimning hisobga olish maʼlumotlari va ularning ovoz berish, shu jumladan nomma-nom ovoz berish natijalari saqlash uchun Senat devoniga topshiriladi.

51-modda. Senat majlisida qilinadigan maʼruzalar va qoʻshimcha maʼruzalarning hamda yakunlovchi nutqning muddati raislik qiluvchi tomonidan maʼruzachilar (qoʻshimcha maʼruzachilar) bilan kelishgan holda, qoida tariqasida, maʼruzalar uchun 30 daqiqagacha, qoʻshimcha maʼruzalar uchun 20 daqiqagacha va yakunlovchi nutq uchun 15 daqiqagacha qilib belgilanadi.

Muzokaralarda soʻzga chiquvchilarga 10 daqiqagacha vaqt beriladi. Muzokaralarda takror soʻzga chiqish uchun, shuningdek majlisning olib borilishi tartibi yuzasidan, ovoz berish sabablari boʻyicha, nomzodlar yuzasidan soʻzga chiqish, bayonotlar, savollar, takliflar, xabarlar va maʼlumotlar berish uchun 3 daqiqagacha vaqt ajratiladi.

Raislik qiluvchi majlisda hozir boʻlgan senatorlar koʻpchiligining roziligi bilan Senat majlisining kun tartibiga kiritilgan masala muhokamasining umumiy muddatini, savol-javoblarga ajratiladigan vaqtni belgilashi, soʻzlash vaqtini uzaytirishi mumkin.

Senat majlislarida senatorlar muzokaralarda ishtirok etishga, muhokama etilayotgan masalalarning mohiyati yuzasidan takliflar va mulohazalar kiritishga, Senat tomonidan saylanadigan, tayinlanadigan, tasdiqlanadigan mansabdor shaxslarning nomzodlari boʻyicha oʻz fikrini bildirishga, savollar berishga, maʼlumotlar berishga, Senat majlisida muhokama qilinadigan masalalarga doir materiallarni koʻpaytirishga va senatorlar orasida tarqatishga, shuningdek ushbu Reglamentda belgilab qoʻyilgan boshqa huquqlardan foydalanishga haqli.

Senat majlislarida senator aynan bir masala boʻyicha muzokaralarda koʻpi bilan ikki marta soʻzga chiqishi mumkin.

Muzokaralarni toʻxtatish toʻgʻrisida qaror qabul qilinganidan keyin maʼruzachi va qoʻshimcha maʼruzachi yakunlovchi nutq bilan chiqish huquqiga ega.

Agar soʻzga chiquvchi soʻzlash uchun ajratilgan vaqtdan oʻtib ketsa yoki muhokama etilayotgan masala yuzasidan fikr bildirmayotgan boʻlsa, Senat majlisida raislik qiluvchi ogohlantirganidan keyin uni soʻzdan mahrum qiladi.

52-modda. Senatning majlislari, qoida tariqasida, ish kunlari soat 10:00 dan 13:00 gacha va tanaffusdan soʻng soat 15:00 dan 18:00 gacha oʻtkaziladi.

Senat qarori bilan palata majlislarini boshlash, tugallashning hamda tanaffus qilishning boshqa vaqti belgilanishi mumkin.

53-modda. Senat majlisida soʻzga chiquvchi oʻz nutqida senatorlar va boshqa shaxslarning shaʼni va qadr-qimmatiga ziyon yetkazuvchi qoʻpol, haqoratli iboralarni qoʻllashga, kimnidir asossiz ayblashga, bila turib yolgʻon axborotdan foydalanishga, noqonuniy xatti-harakatlarga daʼvat qilishga haqli emas. Soʻzga chiquvchi ushbu talablarni buzgan taqdirda, Senat majlisida raislik qiluvchi uni ogohlantiradi, talab takroran buzilganda esa uni soʻzdan mahrum qiladi.

Agar Senat majlisida raislik qiluvchi soʻzga chiquvchiga murojaat qilsa, u darhol oʻz nutqini toʻxtatishi kerak.

Senat majlisida raislik qiluvchi, agar soʻzga chiquvchiga nisbatan taʼsir chorasi qoʻllash bilan bogʻliq boʻlmasa, soʻzga chiquvchi uchun vaqtni uning nutqi boʻlingan muddatga uzaytirib beradi.

Senat majlisida raislik qiluvchi soʻzga chiquvchini unga ajratilgan vaqt davomida soʻzlashdan mahrum etishi mumkin emas, nutq mavzusidan chetga chiqish va ushbu moddaning birinchi qismida nazarda tutilgan talablarni buzish hollari bundan mustasno.

Senat majlisida raislik qiluvchining ruxsatisiz hech kim soʻzlashga haqli emas. Bu qoidani buzgan shaxs raislik qiluvchi tomonidan ogohlantirishsiz soʻzdan mahrum etiladi.

Senat majlisi vaqtida hech kim nutqni bayon etishga yoki eshitishga toʻsqinlik qiluvchi xatti-harakatlari bilan soʻzga chiquvchiga va tinglovchilarga xalaqit bermasligi kerak.

54-modda. Senat va Qonunchilik palatasining qoʻshma majlislari Oʻzbekiston Respublikasi Prezidenti qasamyod qilganda, Oʻzbekiston Respublikasi Prezidenti mamlakat ijtimoiy-iqtisodiy hayotining, ichki va tashqi siyosatining muhim masalalari yuzasidan nutq soʻzlaganda, chet davlatlarning rahbarlari nutq soʻzlaganda, shuningdek Bosh vazirga ishonchsizlik votumi bildirilishi toʻgʻrisidagi masala muhokama qilinayotganda oʻtkaziladi. Oliy Majlis palatalarining kelishuviga muvofiq qoʻshma majlislar boshqa masalalar yuzasidan ham oʻtkazilishi mumkin.

55-modda. Oliy Majlis palatalarining qoʻshma majlisini chaqirish va oʻtkazish tartibi qonun hujjatlarida belgilangan tartibda amalga oshiriladi.

56-modda. Senat majlislarida ovoz berish tartibi “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasining Qonunida belgilanadi.

57-modda. Har bir senatorga uning hududiy mansubligi inobatga olinib, Senatning majlislar zalida maxsus taxtacha bilan rasmiylashtirilgan, uning familiyasi, ismi, otasining ismi koʻrsatilgan, ishlash uchun zarur elektron va texnik vositalar bilan taʼminlangan doimiy joy ajratiladi.

Senatorlarga elektron tizimdan foydalangan holda ovoz berish uchun kartochka beriladi. Senator ovoz berish kartochkasi lozim darajada saqlanishini va undan tegishli tarzda foydalanilishini taʼminlashi shart.

58-modda. Har bir masala boʻyicha ovoz berishda senator bitta ovozga ega boʻladi va qaror qabul qilinishini “yoqlab” yoki unga “qarshi” yoxud qaror qabul qilinishiga betaraflik bildirib ovoz beradi.

Senator oʻzining ovoz berish huquqini shaxsan amalga oshiradi.

59-modda. Senat majlisida raislik qiluvchi tomonidan ovoz berish boshlanganligi eʼlon qilingandan keyin hech kim uni toʻxtata olmaydi. Ovoz berishdan boshlab to uning natijalari eʼlon qilingunga qadar hech kimga soʻz berilmaydi.

Agar ovoz berishni oʻtkazish vaqtida ovoz berish tartib-taomili buzilsa yoki uni oʻtkazishda toʻsqinlik yuzaga kelsa, muhokamasiz darhol takroriy ovoz berish oʻtkaziladi.

60-modda. Senat qarorlari, agar qonun hujjatlarida boshqacha tartib nazarda tutilgan boʻlmasa, senatorlar umumiy sonining koʻpchilik ovozi bilan qabul qilinadi.

61-modda. Barcha masalalar yuzasidan ovoz berish natijalari Senat majlisi stenogrammasiga kiritiladi.

62-modda. Senatda elektron tizimdan:

1) senatorlarni roʻyxatga olish;

2) senatorlarning soʻzga chiqish istagini qayd etish;

3) ovozlarni hisoblash va ovoz berish natijalarini aniqlash;

4) zarurat boʻlsa, sinxron tarjima bilan taʼminlash uchun foydalanish mumkin.

63-modda. Senat majlislarida senatorlar orasidan elektron tizimdan foydalanishni nazorat qiluvchi guruh tuziladi.

Elektron tizimdan foydalanishni nazorat qiluvchi guruh tarkibiga kiruvchi senatorlar tizimni nazorat qilish uchun zarur boʻlgan barcha axborotdan toʻsiqsiz foydalanish huquqiga ega. Ushbu guruhning oʻz vakolatiga taalluqli masalalar boʻyicha qarorlari Senat devonining barcha xodimlari, shu jumladan Senatning elektron tizimiga xizmat koʻrsatuvchi mutaxassislar uchun majburiydir.

64-modda. Elektron tizimdan foydalanishni nazorat qiluvchi guruh yashirin ovoz berish boshlangunga qadar elektron tizimning sozligini tekshirishi shart, bu haqda maxsus bayonnoma tuziladi.

Elektron tizimdan foydalanishni nazorat qiluvchi guruh nomma-nom ovoz berish natijalarida mavjud boʻlgan noaniqliklar, soʻzga chiqish istagini qayd etish natijalarida mavjud boʻlgan noaniqliklar va elektron tizim ishidagi boshqa xatolar ustidan senatorlar tomonidan bildirilgan arzlarni koʻrib chiqadi va ularning asosliligini tekshiradi.

Elektron tizimdan foydalanishni nazorat qiluvchi guruh oʻz ishiga ekspertlar va mutaxassislarni jalb qilishi mumkin.

65-modda. Qonun Qonunchilik palatasi tomonidan qabul qilinganidan keyin Senatga kiritiladi. Qonun Senatga kiritilayotganda quyidagilar taqdim etilishi lozim:

1) Qonunchilik palatasining qonun qabul qilinganligi toʻgʻrisidagi qarori;

2) Qonunchilik palatasi tomonidan qabul qilingan qonun;

3) qonun konsepsiyasi bayon etilgan Qonunga doir tushuntirish xati;

4) qonun qabul qilinishi munosabati bilan qonun hujjatlariga oʻzgartish va qoʻshimchalar kiritish toʻgʻrisidagi, shuningdek qonun hujjatlarini oʻz kuchini yoʻqotgan deb topish toʻgʻrisidagi qonun;

5) oʻzgartirilishi, qoʻshimcha kiritilishi, oʻz kuchini yoʻqotgan deb topilishi yoki qabul qilinishi lozim boʻlgan qonun osti hujjatlarining roʻyxati;

6) moddiy xarajatlar talab etuvchi qonunlar uchun — moliyaviy-iqtisodiy asos;

7) davlat daromadlarining qisqartirilishini yoki davlat xarajatlarining koʻpaytirilishini, shuningdek Oʻzbekiston Respublikasi Davlat budjetining moddalari boʻyicha oʻzgartishlarni nazarda tutuvchi qonunlar yuzasidan Vazirlar Mahkamasining xulosasi;

8) xalqaro hujjatlar va xorijiy mamlakatlar qonun hujjatlari prinsiplari, qoidalari va tariflarining tayyorlangan aniq tahlili keltirilgan qiyosiy jadval;

9) qonunchilik tashabbusi huquqi subyekti tomonidan qonun loyihasi bilan birga Qonunchilik palatasiga taqdim etilgan materiallar.

Ushbu moddaning birinchi qismida nazarda tutilgan qonun matni va unga ilova qilingan materiallar qogʻozda, ularning asliga toʻgʻri nusxasi esa elektron tashuvchida taqdim etilishi kerak.

66-modda. Qonun Senat devonida roʻyxatga olingan kundan boshlab Senatga kiritilgan hisoblanadi. Kelib tushgan qonun unga ilova qilingan materiallar bilan birga Senat Raisiga beriladi. Senat Raisi qonunni dastlabki tarzda koʻrib chiqadigan Senatning masʼul qoʻmitasini belgilaydi.

Senat Raisi qonunni Senatning bir nechta qoʻmitalariga berishga haqli boʻlib, uni koʻrib chiqish uchun masʼul boʻlgan qoʻmitani belgilaydi.

67-modda. Qonun unga ilova qilingan materiallar bilan birga Senat Raisi topshirigʻida koʻrsatilgan qabul qiluvchilarga yuborish uchun Senat devoni Umumiy boʻlimiga qaytariladi.

68-modda. Qonun unga ilova qilingan materiallar bilan birga Senat devoni Umumiy boʻlimiga beriladi, ularning elektron nusxalari esa albatta Senat Raisiga, Senat Raisi oʻrinbosariga, masʼul qoʻmitaga, Yuridik boshqarmaga, Nazorat-tahlil boshqarmasi, Axborot xizmatiga beriladi. Agar qonun Oʻzbekiston Respublikasining xalqaro shartnomalarini ratifikatsiya qilish, denonsatsiya qilish, tugatish va toʻxtatib turishiga daxldor boʻlsa, qonunning elektron nusxasi Xalqaro aloqalar boʻlimiga ham beriladi.

69-modda. Yuridik boshqarma Senat Raisining topshirigʻiga binoan u tomonidan belgilangan muddatda Senatga kelib tushgan qonunni huquqiy ekspertizadan oʻtkazadi.

Yuridik boshqarma qonunning huquqiy ekspertizasi natijalari asosida Yuridik boshqarma xulosasini tayyorlaydi.

Zarur hollarda Yuridik boshqarma xulosa loyihasini tayyorlash uchun ekspertlarni jalb qilish mumkin.

Yuridik boshqarmaning xulosasi boshqarma boshligʻi tomonidan familiyasi, imzolagan sanasi koʻrsatilgan holda imzolanadi va masʼul qoʻmitaga taqdim etiladi.

Agar belgilangan muddatda xulosani berish imkoni boʻlmasa, bu muddat Yuridik boshqarmaning asosli taklifiga binoan Senat Raisi tomonidan uzaytirilishi mumkin.

70-modda. Yuridik boshqarma Qonunchilik palatasi tomonidan qabul qilingan va koʻrib chiqish uchun Senat qoʻmitalari tomonidan Senatga kelib tushgan qonunlarni dastlabki tarzda koʻrib chiqish uchun tuziladigan ishchi guruhlar majlislarida ishtirok etishi mumkin.

71-modda. Nazorat-tahlil boshqarmasi Senat Raisining topshirigʻiga binoan u tomonidan belgilangan muddatda koʻrib chiqish uchun Senatga kelib tushgan qonunning davlat tili va rus tilidagi matnlarining oʻzaro muvofiqligini, shuningdek grammatika, lingvistika hamda stilistika qoidalariga mos kelishini ekspertizadan oʻtkazadi.

Nazorat-tahlil boshqarmasi qonun ekspertizasi natijalari asosida xulosa (taqqoslama jadval bilan birga) tayyorlaydi.

Zarur hollarda Nazorat-tahlil boshqarmasi xulosa loyihasini tayyorlashga ekspertlarni taklif qilishi mumkin.

Nazorat-tahlil boshqarmasining xulosasi imzolangan sanasi koʻrsatilgan holda boʻlim mudiri tomonidan imzolanadi va masʼul qoʻmitaga taqdim etiladi.

Agar belgilangan muddatda xulosani berish imkoni boʻlmasa, bu muddat Nazorat-tahlil boshqarmasining asosli taklifiga binoan Senat Raisi tomonidan uzaytirilishi mumkin.

72-modda. Axborot xizmati masʼul qoʻmitaning qonunni dastlabki tarzda koʻrib chiqish borasidagi ishlarini ommaviy axborot vositalarida va Senatning rasmiy veb-saytida belgilangan tartibda yoritib borilishini taʼminlaydi.

73-modda. Masʼul qoʻmita ushbu Reglament 69-moddasining toʻrtinchi qismida va 71-moddasining toʻrtinchi qismida nazarda tutilgan xulosalarni inobatga olib, qonunni dastlabki tarzda koʻrib chiqadi hamda u boʻyicha xulosa tayyorlaydi.

74-modda. Masʼul qoʻmita raisi:

1) qonunlarni koʻrib chiqish bilan bogʻliq zarur materiallar tayyorlanishini tashkil qiladi, qoʻmita majlislarini chaqiradi va ularda raislik qiladi;

2) qoʻmita aʼzolariga topshiriqlar beradi, ularga qonunlarni dastlabki tarzda koʻrib chiqish bilan bogʻliq materiallar va hujjatlarni yuboradi;

3) qonunlarni dastlabki tarzda koʻrib chiqish boʻyicha ishchi guruhlar ishida qatnashuvchi qoʻmita aʼzolarini belgilaydi;

4) qoʻmita ishida qatnashish uchun davlat organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalari vakillarini, shuningdek mutaxassislar, ekspertlar va olimlarni taklif etadi;

5) qonunlarni qoʻmitada dastlabki tarzda koʻrib chiqish bilan bogʻliq axborotni umumlashtiradi, tegishli hujjatlar (qonunlarni koʻrib chiqish boʻyicha ishchi guruhlar yigʻilishlarining bayonnomalari va boshqalar) rasmiylashtirilishini tashkil qiladi;

6) Senat, Senat Kengashi majlislarida, davlat organlari va nodavlat notijorat tashkilotlari bilan munosabatlarda qoʻmitaning nomidan ish koʻradi;

7) Senat, Senat Kengashi, Senat Raisi va Senat Raisining oʻrinbosarlariga qonunlarni dastlabki tarzda koʻrib chiqish bilan bogʻliq topshiriqlarning bajarilishi haqida axborot beradi;

8) qoʻmita aʼzolarini ularning tavsiyalari koʻrib chiqilganligidan xabardor qiladi;

9) qonun hujjatlariga muvofiq boshqa vakolatlarni amalga oshiradi.

75-modda. Qonunlarni dastlabki tarzda koʻrib chiqish davomida Senat qoʻmitalari:

1) qonunlar yuzasidan xulosalar beradi;

2) Senat qarorlarining loyihalarini ishlab chiqadi;

3) qonunni Senat majlisi kun tartibiga kiritish yoki uning ustida ishlashni davom ettirish yoxud asoslantirilgan holda uni rad etish toʻgʻrisida Senat Kengashiga takliflar kiritadi;

4) davlat organlari va boshqa tashkilotlardan, mansabdor shaxslardan qonunlarni dastlabki tarzda koʻrib chiqish uchun zarur boʻlgan hujjatlarni, ekspert xulosalari va boshqa xulosalarni, statistika maʼlumotlari va boshqa maʼlumotlarni talab qilib oladi;

5) qonunlarni dastlabki tarzda koʻrib chiqish uchun ishchi guruhlar tuzadi, ular tarkibiga davlat organlari, nodavlat notijorat tashkilotlari, ilmiy muassasalar vakillari, xoʻjalik yurituvchi subyektlar, ommaviy axborot vositalari vakillari, shuningdek mutaxassislar, ekspertlar va olimlarni jalb etadi;

6) Senat majlisiga rad etish uchun kiritilayotgan qonunlarning matnlari yuzasidan takliflar tayyorlaydi;

7) qonunlarning qarama-qarshi emasligini va tizimliligini taʼminlaydi;

8) qonunlarni ularda amalga oshirish mexanizmlari mavjudligi nuqtai nazaridan dastlabki tarzda koʻrib chiqadi;

9) qonunlarni chet el huquq amaliyoti bilan har tomonlama, chuqur qiyosiy tahlil qilish maqsadida rivojlangan demokratik mamlakatlar tajribasini oʻrganadi;

10) qonun hujjatlariga muvofiq boshqa vakolatlarni amalga oshiradi.

76-modda. Qonunni masʼul qoʻmita tomonidan dastlabki tarzda koʻrib chiqish muddati, qoida tariqasida, qonun qoʻmitaga kelib tushgan sanadan boshlab oʻn besh kundan oshmasligi kerak.

Zarur hollarda masʼul qoʻmita raisining bildirgisi asosida Senat Raisi qonunni dastlabki tarzda koʻrib chiqish muddatini uzaytirishi mumkin.

77-modda. Zarur hollarda, masʼul qoʻmita qonun nusxalarini manfaatdor idoralarga, shuningdek nodavlat notijorat tashkilotlari va ilmiy muassasalarga fikr-mulohazalar tayyorlash uchun yuborishi mumkin.

Qonun nusxalari yuboriladigan tashkilotlarning roʻyxati masʼul qoʻmita raisi tomonidan belgilanadi.

78-modda. Zarur hollarda, masʼul qoʻmita qonun nusxalarini umumdavlat va hududiy manfaatlar mutanosibligini taʼminlash maqsadida qonunning oʻrganilishini tashkil qilish, shuningdek hududiy manfaatlarni hisobga olish va qonun boʻyicha takliflarni toʻplash uchun qonunni masʼul qoʻmita aʼzolariga va joylardagi senatorlarga yuborishi mumkin. Qonun va boshqa materiallar pochta aloqasi orqali yoki elektron shaklda yuborilishi mumkin.

79-modda. Masʼul qoʻmita aʼzolari va joylardagi senatorlar qonunni olgandan soʻng Qoraqalpogʻiston Respublikasi Joʻqorgʻi Kengesining tegishli qoʻmitasi hamda xalq deputatlari viloyatlar va Toshkent shahar Kengashlarining doimiy komissiyasi bilan hamkorlikda xalq deputatlari mahalliy Kengashlarining deputatlari, davlat organlari, xoʻjalik boshqaruvi organlari hududiy boʻlinmalari, fuqarolik jamiyati institutlari vakillari hamda mutaxassislar xabardorligini taʼminlash, shuningdek qonunning hududiy manfaatlarga mos kelishini oʻrganish maqsadida uch kun davomida qonun muhokama etilishini tashkil qiladi.

80-modda. Masʼul qoʻmita aʼzolari va joylardagi senatorlar qonunlarni, ayniqsa aholining hayotiy muhim manfaatlariga, ijtimoiy huquqlariga bevosita daxldor qonun hujjatlarini dastlabki tarzda muhokama qilishga xalq deputatlari mahalliy Kengashlari deputatlarini, davlat organlari, xoʻjalik boshqaruvi organlari hududiy boʻlinmalarining, fuqarolik jamiyati institutlarining, xususan fuqarolar oʻzini oʻzi boshqarish organlarining va ommaviy axborot vositalarining vakillarini jalb qiladi.

81-modda. Masʼul qoʻmita aʼzolari va joylardagi senatorlar hudud manfaatlaridan kelib chiqadigan takliflar va fikr-mulohazalar mavjud boʻlgan taqdirda, asoslangan umumiy axborotni tayyorlaydilar.

Axborot Qoraqalpogʻiston Respublikasi Joʻqorgʻi Kengesi yoki qonunni koʻrib chiqqan masʼul qoʻmita, xalq deputatlari viloyatlar va Toshkent shahar Kengashining yoki qonunni koʻrib chiqqan doimiy komissiyaning tegishli qarori bilan tasdiqlanadi va ikki kun ichida masʼul qoʻmitaga yuboriladi.

82-modda. Qoʻmita aʼzosi qonunni dastlabki tarzda koʻrib chiqish maqsadida qoʻmita tomonidan tuzilgan ishchi guruh majlisida qonun yuzasidan tayyorlangan takliflar va fikr-mulohazalarni taqdim etishi mumkin.

83-modda. Masʼul qoʻmita qoʻmitaning barcha aʼzolaridan yoki boshqa senatorlardan kelib tushgan takliflar va fikr-mulohazalarni umumlashtiradi hamda qonunni dastlabki tarzda koʻrib chiqish uchun tuzilgan ishchi guruh muhokamasiga kiritadi.

84-modda. Qoʻmita aʼzolari davlat va xoʻjalik boshqaruvi organlarining hududiy boʻlinmalaridan, korxona, muassasa, tashkilotlardan, mansabdor shaxslardan qonun boʻyicha takliflar tayyorlash uchun zarur hujjatlar, ekspert xulosalari va boshqa xulosalarni, statistika maʼlumotlari va boshqa maʼlumotlarni talab qilib olishi mumkin.

85-modda. Fikr-mulohazalarni olish uchun yuborilgan qonun boʻyicha taklif va mulohazalar kelganidan keyin masʼul qoʻmita raisi qonunni dastlabki tarzda koʻrib chiqish uchun ishchi guruh tashkil etish zaruratini aniqlaydi. Qonun boʻyicha savollar boʻlmagan taqdirda, ishchi guruh tuzilmasligi mumkin.

86-modda. Ishchi guruh qonun boʻyicha yuzaga kelgan masalalarni hal etish hamda tushgan taklif va mulohazalarni muhokama qilish uchun tuziladi. Ishchi guruh tarkibiga senatorlardan tashqari, davlat organlari, nodavlat notijorat tashkilotlari, ilmiy muassasalar vakillari, shuningdek mutaxassislar, ekspertlar va olimlar kiritilishi mumkin.

Agar qonun bir nechta qoʻmitada koʻrib chiqilayotgan boʻlsa, ular tomonidan qoʻshma ishchi guruh tuzilishi mumkin.

Hududlarni rivojlantirishning hal qilinishi koʻrib chiqilayotgan qonun bilan bogʻliq masalalarini yechish uchun ishchi guruhlar tarkibiga senatorlar — masʼul qoʻmitaning joylarda ishlayotgan aʼzolari jalb etilishi mumkin.

87-modda. Ishchi guruh majlislariga Qonunchilik palatasi deputatlari va qonunni Qonunchilik palatasiga qonunchilik tashabbusi huquqi tartibida kiritgan qonunchilik tashabbusi huquqi subyekti vakillari taklif qilinishi mumkin.

Zarur hollarda masʼul qoʻmita qonunni dastlabki tarzda koʻrib chiqish davomida yuzaga keladigan savollar boʻyicha fikr-mulohazalarini olish uchun ekspertlar, mutaxassislar, olimlarni jalb etishi mumkin.

88-modda. Qonunni dastlabki tarzda koʻrib chiqish jarayonida masʼul qoʻmita qonunning Oʻzbekiston Respublikasi Konstitutsiyasiga, Oʻzbekiston Respublikasining qonunlariga, qonunchilik texnikasi qoidalariga, xalqaro prinsiplar hamda normalarga muvofiqligini aniqlaydi va bu qoʻmita xulosasining tarkibiy qismi hisoblanadi.

89-modda. Qonunni dastlabki tarzda koʻrib chiqish natijalari boʻyicha masʼul qoʻmita raisi tomonidan, u boʻlmaganda esa — qoʻmita raisining oʻrinbosari yoxud Senatda doimiy asosda ishlovchi qoʻmita aʼzosi tomonidan qoʻmita xulosasining loyihasi tayyorlanadi. Masʼul qoʻmita xulosasining loyihasida ushbu Reglamentning 88-moddasida nazarda tutilganidan tashqari, qoida tariqasida, quyidagilar koʻrsatiladi:

1) Qonunchilik palatasi qonunni qabul qilgan sana va qonun Senatga kelib tushgan sana;

2) qonunning maqsadi va asosiy vazifalari;

3) qonunni qabul qilish zarurligini asoslash, shu jumladan qonunni qoʻllash amaliyotini oʻrganish va hisobga olish masalalari, huquqiy tartibga solishga boʻlgan ijtimoiy ehtiyojni aniqlash, qonunning samaradorligiga taʼsir koʻrsatadigan sabablar va sharoitlar;

4) qonunning tuzilishi (modda, bob, boʻlimlar soni va ularning asosiy mazmuni);

5) qonunning ilgari amal qilgan yoki hozirgi kunda amal qilib turgan, shu sohadagi munosabatlarni tartibga soladigan qonun hujjatlaridan farqi (yangi normalar va qoidalar kiritilganligi);

6) davlat organlari, xoʻjalik boshqaruvi organlari, fuqarolarning oʻzini oʻzi boshqarish organlari, korxonalar, muassasalar, tashkilotlar va nodavlat notijorat tashkilotlarning, shuningdek fuqarolarning takliflarini, ommaviy axborot vositalarining materiallarini, ilmiy muassasalar, olimlar va mutaxassislarning tavsiyalarini, jamoatchilik fikrini aniqlashning boshqa vositalaridan olingan maʼlumotlarni umumlashtirish hamda ulardan foydalanish masalalari;

7) boshqa davlatlarning qonunchilik yoʻli bilan tartibga solish tajribasini hisobga olish masalalari;

8) Qonunni maʼqullash yoki rad etish uchun uni Senat majlisining kun tartibiga kiritish yuzasidan Senat Kengashiga tavsiyalar.

Masʼul qoʻmita xulosasining loyihasi masʼul qoʻmita majlisida muhokama etiladi va masʼul qoʻmita raisi tomonidan, agar u boʻlmagan taqdirda qoʻmita raisi oʻrinbosari tomonidan imzolanadi.

90-modda. Masʼul qoʻmita majlislari ochiq oʻtkaziladi.

Qoʻmita majlislarida ushbu qoʻmitaning aʼzosi boʻlmagan senatorlar maslahat berish ovozi bilan ishtirok etishga haqli.

Masʼul qoʻmita majlislariga davlat organlari, xoʻjalik boshqaruvi organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalarining vakillari, shuningdek mutaxassislar, ekspertlar va olimlar taklif qilinishi mumkin.

Zarurat boʻlganda qoʻmita yopiq majlis oʻtkazish haqida qaror qabul qilishi mumkin.

91-modda. Masʼul qoʻmita majlislari, agar ularda qoʻmita aʼzolarining kamida yarmi hozir boʻlsa, vakolatli hisoblanadi.

Masʼul qoʻmita koʻrib chiqilayotgan masalalar yuzasidan qoʻmita aʼzolari umumiy sonining koʻpchilik ovozi bilan qaror qabul qiladi.

Masʼul qoʻmitaning qonun boʻyicha qarori quyidagi maʼlumotlarni qamrab olgan boʻlishi kerak:

1) qonun yuzasidan qoʻmita xulosasining loyihasini koʻrib chiqish natijalari;

2) qonun yuzasidan masʼul qoʻmita xulosasini oʻqib eshittiradigan senator;

3) qonun yuzasidan uni muhokama qilish tartibida soʻzga chiqadigan senatorlar.

92-modda. Masʼul qoʻmitaning xulosasida qonunni maʼqullash yoki rad etish haqidagi tavsiya orqali qonunga baho berilgan boʻlishi kerak. Qonunni rad etish zarurligi haqidagi xulosada masʼul qoʻmita qonunni rad etish zarur deb hisoblashining asoslari bayon etilgan boʻlishi kerak.

Qonunning Oʻzbekiston Respublikasi Konstitutsiyasiga va boshqa qonun hujjatlariga mos emasligi, qonun normalari oʻrtasida nomuvofiqliklar va qarama-qarshiliklar mavjudligi, qonunning toʻgʻridan toʻgʻri amal qilishiga taʼsir qiluvchi havolaki normalardan asossiz ravishda foydalanilganligi, qonunni qabul qilishga zarurat yoʻqligi, qonunning qonunchilik texnikasi qoidalariga, xalqaro prinsiplar va normalarga muvofiq emasligi uni rad etish uchun asos boʻladi.

93-modda. Qonunni dastlabki tarzda koʻrib chiqish natijalariga qarab, masʼul qoʻmita qonunni maʼqullash yoki uni rad etish toʻgʻrisida Senat qarorining loyihasini tayyorlaydi.

Qonunni rad etish haqidagi Senat qarorining loyihasi asoslarni koʻrsatgan holda qonunni rad etish toʻgʻrisidagi taklifni yoki qonunni rad etib, ayni vaqtda kelishuv komissiyasi tuzish haqidagi taklifni oʻz ichiga olgan boʻlishi kerak. Bundan tashqari, unda qonunga oʻzgartish va qoʻshimchalar kiritish zarurligi, shuningdek aniq senatorlarni — Senatdan kelishuv komissiyasi aʼzolarini koʻrsatgan holda kelishuv komissiyasini tuzish toʻgʻrisidagi takliflar keltirilishi mumkin.

94-modda. Kelishuv komissiyasi tuzish haqidagi taklif qonunning ayrim normalari yuzasidan kelishmovchiliklar paydo boʻlgan taqdirda, shu jumladan:

1) qonun matnida atamashunoslik va stilistik yoʻsindagi nuqsonlar boʻlganida;

2) qonunni texnik jihatdan rasmiylashtirish bilan bogʻliq masalalar mavjud boʻlganda;

3) qonunchilik texnikasi qoidalari buzilganda;

4) qonun normalari oʻrtasida qarama-qarshiliklar kelib chiqqanda;

5) qonun normalari bilan amaldagi qonun hujjatlari oʻrtasida qarama-qarshiliklar boʻlganida;

6) qonunning bitta yoki bir nechta normasi rad etilganida;

7) boshqa asoslar mavjud boʻlganida kiritiladi.

95-modda. Agar qoʻmitaning fikricha, vujudga kelgan kelishmovchiliklar boʻyicha bir fikrga kelish mumkin boʻlmasa yoki qonunni konseptual jihatdan toʻlaligicha qayta ishlab chiqish talab qilinsa, kelishuv komissiyasini tuzmasdan qonunni rad etish haqida taklif kiritiladi.

96-modda. Masʼul qoʻmitaning qonunni Senat yalpi majlisi kun tartibi loyihasiga kiritish mumkinligi haqida yoki qonun ustida ishni davom ettirish zarurligi haqida taklif bildirilgan xulosasi Senat Kengashining muhokamasiga taqdim etiladi.

Senat Kengashida qonunni koʻrib chiqish maʼruzachi tomonidan masʼul qoʻmitaning xulosasini oʻqib eshittirishdan boshlanadi. Koʻrib chiqilayotgan qonun boʻyicha uni muhokama qilish tarzida senatorlar soʻzga chiqishlari mumkin.

Senat Kengashi masʼul qoʻmita xulosasini muhokama qilish natijalari boʻyicha qonunni muhokama qilish uchun Senatning navbatdagi yalpi majlisi kun tartibi loyihasiga kiritish yoki kiritmaslik haqida qaror qabul qiladi.

97-modda. Masʼul qoʻmitalar qonunlarni dastlabki tarzda koʻrib chiqish borasidagi oʻz faoliyati toʻgʻrisida jamoatchilikni xabardor qilib boradilar. Masʼul qoʻmitalar va ishchi guruhlar majlislariga ommaviy axborot vositalari vakillari taklif etilishi mumkin.

Masʼul qoʻmitalarning qonunlarni dastlabki tarzda koʻrib chiqish borasidagi faoliyati toʻgʻrisidagi axborot va ular tomonidan qabul qilingan qarorlar Senatning rasmiy veb-saytida joylashtirilishi, “Xalq soʻzi”, “Narodnoye slovo” gazetalarida va boshqa ommaviy axborot vositalarida eʼlon qilinishi mumkin.

98-modda. Masʼul qoʻmita raisi, u boʻlmaganda esa — qoʻmita raisining oʻrinbosari, Yuridik boshqarma boshligʻi, Nazorat-tahlil boshqarmasi boshligʻi, agar qonun Oʻzbekiston Respublikasi xalqaro shartnomalarini ratifikatsiya, denonsatsiya qilish, tugatish yoki toʻxtatib turishga oid boʻlsa — Xalqaro aloqalar boʻlimi mudirining vizasi qoʻyilgan qonun boʻyicha Senat qarorining loyihasi Senat Raisining oʻrinbosarlariga topshiriladi.

Senat Raisining oʻrinbosarlari tomonidan viza qoʻyilgan Senat qarorining loyihasi masʼul qoʻmitaga qaytariladi.

99-modda. Qonun yuzasidan belgilangan tartibda viza qoʻyilgan Senat qarorining loyihasi, masʼul qoʻmita xulosasi, qonun matnining nusxalari va Qonunchilik palatasidan qonun bilan birga kelib tushgan boshqa hujjatlar senatorlarning planshetlariga joylashtirilishini taʼminlash uchun Axborot-kommunikatsiya texnologiyalari boʻlimiga beriladi.

100-modda. Qonun yuzasidan Senat qarorining davlat tilidagi va rus tilidagi elektron nusxalari Umumiy boʻlimda saqlanib, boʻlim Senatning yalpi majlisida qabul qilingan Senat qarori tegishli blankada chiqarilishini taʼminlaydi.

101-modda. Qonun Senat tomonidan senatorlar umumiy sonining koʻpchilik ovozi bilan maʼqullanadi, Oʻzbekiston Respublikasining Konstitutsiyasini, konstitutsiyaviy qonunni, ularga oʻzgartish va qoʻshimchalar kiritish toʻgʻrisidagi qonunlarni maʼqullash uchun esa senatorlar umumiy sonining uchdan ikki qismidan iborat koʻpchilik ovozi talab qilinadi.

102-modda. Senat Raisining oʻrinbosari, masʼul qoʻmita raisi, Yuridik boshqarma boshligʻi, Nazorat-tahlil boshqarmasi boshligʻi, shuningdek agar qonun Oʻzbekiston Respublikasi xalqaro shartnomalarini ratifikatsiya qilish, denonsatsiya qilish, tugatish yoki toʻxtatib turishga oid boʻlsa, Xalqaro aloqalar boʻlimining mudiri viza qoʻygan qonun boʻyicha Senat qarori masʼul qoʻmita raisi tomonidan Senat Raisiga imzolash uchun topshiriladi.

103-modda. Senat tomonidan maʼqullangan va belgilangan tartibda vizalar qoʻyilgan qonun oʻn kun ichida Oʻzbekiston Respublikasi Prezidenti Administratsiyasiga yuboriladi. Bunda qonunga qonunning uchta nusxasi va Senat qarorining Umumiy boʻlim muhri bilan tasdiqlangan nusxasi ilova qilinadi. Ayni vaqtda yuborilgan hujjatlarning nusxalari Senat Raisiga, Senat Raisining oʻrinbosariga, masʼul qoʻmita raisiga, Yuridik boshqarmaga, Nazorat-tahlil boshqarmasiga beriladi. Agar qonun Oʻzbekiston Respublikasi xalqaro shartnomalarini ratifikatsiya qilish, denonsatsiya qilish, tugatish yoki toʻxtatib turishga oid boʻlsa, mazkur hujjatlarning nusxalari Xalqaro aloqalar boʻlimiga ham topshiriladi.

104-modda. Qonun va unga ilova qilinadigan hujjatlarning Oʻzbekiston Respublikasi Prezidenti Administratsiyasiga topshirilishi Yuridik boshqarma tomonidan tashkil etiladi.

105-modda. Qonunni maʼqullash toʻgʻrisidagi Senat qarorining Umumiy boʻlim muhri bilan tasdiqlangan nusxasi qaror qabul qilingan kundan eʼtiboran oʻn kun ichida Qonunchilik palatasiga yuboriladi.

106-modda. Qonun Oʻzbekiston Respublikasi Prezidenti tomonidan imzolanganidan keyin qonunni koʻrib chiqish bilan bogʻliq hujjatlar (Senat qarori, tarqatish varagʻi, masʼul qoʻmita xulosasi, Qonunchilik palatasidan kelib tushgan hujjatlar) masʼul qoʻmita tomonidan besh kun ichida Umumiy boʻlimga topshiriladi. Bunda ishchi guruhlar va masʼul qoʻmita majlislarining ish materiallari yigʻmajildga joylanib, bu yigʻmajild Senat arxiviga topshiriladi.

107-modda. Qonunni rad etish toʻgʻrisidagi Senat qarori qabul qilingan kundan boshlab oʻn kun ichida Qonunchilik palatasi tomonidan qabul qilingan qonun matni hamda masʼul qoʻmita xulosasining nusxasi bilan birga Qonunchilik palatasiga qaytariladi. Hujjatlarni Qonunchilik palatasiga topshirishni Senat devoni rahbarining oʻrinbosari tashkil qiladi. Bunda ilova xatning bir nusxasi Umumiy boʻlimga topshiriladi, ikkinchi nusxasi esa, hujjatlar olinganligini tasdiqlovchi imzo bilan ishga oid materiallarga tikib qoʻyiladi.

108-modda. Senat tomonidan rad etilgan qonun yuzasidan Senat va Qonunchilik palatasi yuzaga kelgan kelishmovchiliklarni bartaraf etish uchun Senat aʼzolari va Qonunchilik palatasi deputatlari orasidan tenglik asosida kelishuv komissiyasini tuzishi mumkin.

Kelishuv komissiyasining majlislari uning aʼzolari ixtiyoriga koʻra Qonunchilik palatasida yoki Senatda oʻtkaziladi.

109-modda. Senatda kelishuv komissiyasini tuzish toʻgʻrisidagi tashabbus Senat Raisidan, masʼul qoʻmitadan, shuningdek Senat aʼzolari umumiy sonining kamida beshdan bir qismini tashkil etuvchi senatorlardan chiqishi mumkin.

Kelishuv komissiyasi tarkibiga nomzodlar yuzasidan Senat Raisi va Qonunchilik palatasining Spikeri tomonidan oʻzaro maslahatlashuvlar oʻtkaziladi.

Kelishuv komissiyasi tarkibiga, qoida tariqasida, qonunni dastlabki tarzda koʻrib chiqish uchun masʼul boʻlgan qoʻmita aʼzolari saylanadi. Komissiya tarkibiga boshqa qoʻmitalarning ushbu qonun boʻyicha maxsus bilimlarga ega boʻlgan senatorlari kiritilishi mumkin.

Kelishuv komissiyasi tarkibi kamida uch nafardan iborat boʻlgan va Qonunchilik palatasi bilan hamkorlikda tenglik asosida belgilanadigan miqdordagi senatorlarni oʻz ichiga olishi kerak.

110-modda. Kelishuv komissiyasining Senatdan koʻrsatilgan tarkibi uning majlisida, Senat majlislari oraligʻidagi davrda esa uning Kengashi tomonidan tasdiqlanadi. Kelishuv komissiyasini tashkil etish va uning tarkibiga senatorlarni saylash toʻgʻrisida Senat qaror qabul qiladi, qaror loyihasi masʼul qoʻmita tomonidan Senat Kengashiga kiritiladi, keyinchalik masala Senat majlisiga kiritiladi. Komissiya tarkibi Senat Kengashi tomonidan tasdiqlangan taqdirda, Kengash qarori bilan rasmiylashtiriladi.

Kelishuv komissiyasining Senatdan koʻrsatilgan aʼzolari oʻz tarkibidan koʻpchilik ovoz bilan komissiya hamraisini saylaydilar. Senatdan komissiya hamraisining saylanishi Senat kelishuv komissiyasi aʼzolarining qarori bilan rasmiylashtiriladi.

111-modda. Kelishuv komissiyasining aʼzosi boʻlgan senator vakolatlari tugatilsa (muddatidan oldin tugatilsa), u Senatning alohida qarori qabul qilinmay kelishuv komissiyasi tarkibidan chiqarib yuboriladi. Kelishuv komissiyasining chiqarib yuborilgan aʼzosi oʻrniga Senat yoki uning Kengashi tomonidan kelishuv komissiyasining yangi aʼzosi saylanadi.

Senatning yoki Senat Kengashi kelishuv komissiyasining yangi aʼzosini saylash toʻgʻrisidagi Qarori Qonunchilik palatasiga yuboriladi.

112-modda. Kelishuv komissiyasi oʻz faoliyatini belgilangan tartibda amalga oshiradi.

113-modda. Kelishuv komissiyasi tarkibiga saylangan senator uning majlislarida ishtirok etishi shart. Kelishuv komissiyasi majlisida ishtirok etish imkoni boʻlmasa, senator kelishuv komissiyasining Senatdan koʻrsatilgan hamraisini oldindan xabardor qiladi.

114-modda. Kelishuv komissiyasining majlislariga kelishuv komissiyasiga Oliy Majlis palatalaridan koʻrsatilgan hamraislar navbatma-navbat raislik qiladilar.

115-modda. Kelishuv komissiyasi qonunning yagona matnini ishlab chiqish maqsadida Senatning har bir eʼtirozini alohida-alohida koʻrib chiqadi. Agar Senatning eʼtirozlari boʻlmagan qonunning ayrim moddalari tahririga kiritilayotgan oʻzgartishlar kelishuv komissiyasi tomonidan qoʻllab-quvvatlangan Senat takliflari asosida ishlab chiqilgan qonun moddalarining yangi tahriri bilan izohlansa, kelishuv komissiyasi bunday oʻzgartishlarni kiritish toʻgʻrisida qaror qabul qilishga haqli.

116-modda. Kelishuv komissiyasi qarorlari kelishuv komissiyasi tarkibiga kirgan senatorlar va deputatlarning alohida-alohida ovoz berishi orqali qabul qilinadi. Qaror, agar komissiyaning har bir palatadan saylangan aʼzolarining koʻpchiligi uni yoqlab ovoz bergan boʻlsa, qabul qilingan hisoblanadi. Qaror, agar kelishuv komissiyasi tomonidan boshqacha tartib belgilanmasa, ochiq ovoz berish orqali qabul qilinadi.

117-modda. Kelishuv komissiyasi qonun boʻyicha kelishmovchiliklarni koʻrib chiqayotganda olimlar va mutaxassislarning maslahatlarini olishga, zarur materiallar va maʼlumotlarni talab qilib olishga haqli.

Kelishuv komissiyasi majlisida bayonnoma yuritiladi. Zarur hollarda kelishuv komissiyasining qaroriga binoan majlis stenogrammasi yuritiladi.

118-modda. Agar kelishuv komissiyasi ish yakunlari boʻyicha qonun yuzasidan kelishuvga erishilmagan boʻlsa, qonun Senat tomonidan rad etilgan sifatida Qonunchilik palatasi tomonidan takroran koʻrib chiqilishi lozim. Qonun boʻyicha kelishuvga erishish imkoni boʻlmasa, bayonnoma tuzilib, u komissiya hamraislari tomonidan imzolanadi hamda Senatga va Qonunchilik palatasiga yuboriladi.

Agar kelishuv komissiyasi bir fikrga kelsa, kelishuv komissiyasi oʻz ish natijalari boʻyicha kelishmovchiliklarni bartaraf etishga doir takliflarni oʻz ichiga olgan xulosa qabul qiladi. Xulosaga qonunga oʻzgartish va qoʻshimchalar loyihasining matni ilova qilinadi.

Kelishuv komissiyasining xulosasi kelishuv komissiyasining Senat va Qonunchilik palatasidan saylangan hamraislari tomonidan imzolanib, tegishincha Senat va Qonunchilik palatasiga topshiriladi.

119-modda. Kelishuv komissiyasining takliflari qabul qilingan taqdirda qonun Qonunchilik palatasi tomonidan qayta koʻrib chiqilishi lozim. Qonun takroran koʻrib chiqilayotganda kelishuv komissiyasining bayonnomasida keltirilgan takliflargina muhokama etiladi. Bunday hollarda qonun odatdagi tartibda qabul qilinadi.

120-modda. Kelishuv komissiyasining tahriridagi qonun Qonunchilik palatasi tomonidan qabul qilingan taqdirda, u besh kun ichida zarur materiallar ilova qilingan holda Senatga maʼqullash uchun yuboriladi.

Kelishuv komissiyasining loaqal bitta taklifi rad etilgan taqdirda Senat yangi takliflarni taqdim etishi uchun kelishuv komissiyasiga Senat tomonidan maʼqullangan tuzatishlarni inobatga olgan holda ishni davom ettirishni taklif qilishi mumkin.

121-modda. Agar Senat qonunni kelishuv komissiyasining tahririda maʼqullamasa, u rad etilgan qonun sifatida Qonunchilik palatasiga qaytarilishi kerak.

Agar Qonunchilik palatasi deputatlar umumiy sonining kamida uchdan ikki qismidan iborat koʻpchilik ovozi bilan qonunni yana maʼqullasa, qonun Oliy Majlis tomonidan qabul qilingan hisoblanadi hamda oʻn kun ichida Qonunchilik palatasi tomonidan Oʻzbekiston Respublikasi Prezidentiga imzolash va eʼlon qilish uchun yuboriladi.

122-modda. Agar Senat tomonidan rad etilgan qonun takroran koʻrib chiqilayotganda Qonunchilik palatasi uni kelishuv komissiyasining tahririda qabul qilmasa va Senatning qonunni rad etish toʻgʻrisidagi qaroriga oʻzining norozi ekanligini bildirsa, qonun avvalgi qabul qilingan tahririda ovozga qoʻyiladi.

Agar Senat tomonidan rad etilgan qonun boʻyicha Qonunchilik palatasida avval qabul qilingan tahrirda ovoz berilganda ushbu qonun deputatlar umumiy sonining kamida uchdan ikki qismi ovozini toʻplamasa, koʻrib chiqilayotgan qonun qabul qilinmagan hisoblanadi.

123-modda. Koʻrib chiqilayotgan qonun boʻyicha Qonunchilik palatasi va Senat tomonidan uzil-kesil qaror qabul qilinganidan keyin kelishuv komissiyasi oʻz vakolatlarini tugatadi.

124-modda. Oʻzbekiston Respublikasi Prezidenti tomonidan qaytarilgan va Qonunchilik palatasi tomonidan Oʻzbekiston Respublikasi Prezidentining takliflari va fikr-mulohazalarini hisobga olgan holda yoxud Oʻzbekiston Respublikasi Prezidentining takliflari va fikr-mulohazalarini hisobga olmagan holda takroran koʻrib chiqilib, avval qabul qilingan tahrirda qabul qilingan qonun Senatga belgilangan tartibda yuboriladi.

Senat Raisi kelib tushgan qonunni masʼul qoʻmitaga beradi.

Oʻzbekiston Respublikasi Prezidenti tomonidan qaytarilgan va Qonunchilik palatasi tomonidan avval qabul qilingan tahrirdagi qonun yuzasidan masʼul qoʻmita xulosa beradi.

Senat Kengashi masʼul qoʻmitaning xulosasini olgach, Oʻzbekiston Respublikasi Prezidenti tomonidan qaytarilgan qonunni takroran koʻrib chiqish toʻgʻrisidagi masalani Senat majlisi kun tartibi loyihasiga kiritadi.

Oʻzbekiston Respublikasi Prezidenti tomonidan qaytarilgan qonunni Senat majlisida takroran koʻrib chiqish Oʻzbekiston Respublikasi Prezidentining takliflari va fikr-mulohazalarini hamda masʼul qoʻmitaning ushbu taklif va fikr-mulohazalarga doir xulosasini bayon etishdan boshlanadi.

125-modda. Oʻzbekiston Respublikasi Prezidentining taklif va mulohazalari, shuningdek masʼul qoʻmitaning ushbu taklif va mulohazalarga doir xulosasi muhokama qilingandan soʻng Senat majlisida qonunni Oʻzbekiston Respublikasi Prezidentining taklif va mulohazalarini inobatga olgan holda maʼqullash toʻgʻrisidagi masala qoʻyiladi.

Oʻzbekiston Respublikasi Prezidenti tomonidan qaytarilgan va keyinchalik Qonunchilik palatasi tomonidan Prezidentning taklif hamda mulohazalarini inobatga olgan holda qabul qilingan qonun, agar uni yoqlab majlisda hozir boʻlgan senatorlar umumiy sonining yarmidan koʻpi ovoz bergan boʻlsa, Senat tomonidan maʼqullangan hisoblanadi.

Agar Oʻzbekiston Respublikasi Prezidenti tomonidan qaytarilgan qonun Prezidentning hech boʻlmasa bitta taklifi yoki mulohazasini inobatga olmay, deputatlar umumiy sonining kamida uchdan ikki qismidan iborat koʻpchilik ovozi bilan qabul qilingan boʻlsa, uni maʼqullash uchun majlisda hozir boʻlgan senatorlar umumiy sonining kamida uchdan ikki qismi uni yoqlab ovoz berishi kerak.

Takror muhokama natijalari boʻyicha Senat qonunni maʼqullash yoki uni rad etish toʻgʻrisida qaror qabul qiladi.

126-modda. Senat tomonidan qayta koʻrib chiqishda maʼqullangan qonun imzolash va eʼlon qilish uchun Senat qarori bilan birgalikda belgilangan tartibda Oʻzbekiston Respublikasi Prezidentiga yuboriladi.

Senatning qayta koʻrib chiqish natijalari boʻyicha qonunni maʼqullash yoki rad etish toʻgʻrisidagi qarori mazkur qaror qabul qilingan kundan eʼtiboran oʻn kun ichida Qonunchilik palatasiga yuboriladi.

127-modda. Senat oʻz vakolatlariga doir masalalar yuzasidan qarorlar qabul qiladi.

Qaror loyihasi Senatga kiritilayotganda unga doir qisqacha tushuntirish xati va boshqa zarur materiallar ilova qilinadi.

128-modda. Senat Raisi Senat qarorining loyihasini dastlabki tarzda koʻrib chiqish uchun masʼul qoʻmitani va muddatni belgilaydi. Senat qarorining loyihasi tegishliligiga qarab kelishish uchun Yuridik boshqarmaga yoki Nazorat-tahlil boshqarmasiga beriladi.

Senat Kengashi masʼul qoʻmita vakilining axborotini eshitib, qaror loyihasini Senat majlisining kun tartibiga kiritish toʻgʻrisida qaror qabul qiladi va maʼruzachini belgilaydi.

Senat majlisida masʼul qoʻmita vakilining axboroti eshitiladi va muhokama natijalari yuzasidan senatorlar umumiy sonining koʻpchilik ovozi bilan qaror qabul qilinadi.

129-modda. Agar ovoz berish yakunlariga koʻra qaror loyihasini qabul qilish toʻgʻrisidagi taklif zarur miqdorda ovoz toʻplamagan boʻlsa, taklif rad etilgan hisoblanadi.

Senatning Qonunchilik palatasi bilan birgalikdagi vakolatlariga kiritilgan masala yuzasidan qabul qilingan qaror, agar qonunda boshqacha qoida belgilangan boʻlmasa, mazkur qaror qabul qilingan kundan eʼtiboran besh kun ichida Qonunchilik palatasiga yuboriladi.

130-modda. Senat tomonidan Qonunchilik palatasi bilan birgalikdagi vakolatiga kiritilgan masalalar boʻyicha ayrim qarorlar qabul qilishning oʻziga xos xususiyatlari amaldagi qonun hujjatlarida belgilanadi.

131-modda. Oʻzbekiston Respublikasi Konstitutsiyaviy sudi Oʻzbekiston Respublikasi Prezidentining taqdimiga binoan Senat tomonidan Oʻzbekiston Respublikasi Sudyalar oliy kengashi tavsiya etgan shaxslar orasidan, Qoraqalpogʻiston Respublikasining vakilini qoʻshgan holda saylanadi.

Oʻzbekiston Respublikasi Konstitutsiyaviy sudining har bir sudyasi yakka tartibda saylanadi. Senat aʼzolari umumiy sonining koʻpchilik ovozini olgan shaxs saylangan hisoblanadi.

Oʻzbekiston Respublikasi Konstitutsiyaviy sudi raisi va uning oʻrinbosari qonun hujjatlarida belgilangan tartibda saylanadi.

Oʻzbekiston Respublikasi Oliy sudining raisi, raisi oʻrinbosarlari, sudyalari Oʻzbekiston Respublikasi Prezidentining taqdimiga binoan Senat tomonidan saylanadi. Oʻzbekiston Respublikasi Oliy sudining har bir sudyasi yakka tartibda saylanadi. Senat aʼzolari umumiy sonining koʻpchilik ovozini olgan shaxs saylangan hisoblanadi.

132-modda. Oʻzbekiston Respublikasi Prezidentining sudyalarni saylash yoxud lavozimidan ozod etish uchun nomzodlar boʻyicha taqdimnomasi Senat devonida roʻyxatga olingan kundan boshlab Senatga kiritilgan hisoblanadi.

Oʻzbekiston Respublikasi Prezidentining Senat devoniga kelib tushgan sudyalarni saylash yoxud lavozimidan ozod etish toʻgʻrisidagi taqdimnomasi Senat Raisiga beriladi. Senat Raisi Senatning Sud-huquq masalalari va korrupsiyaga qarshi kurashish qoʻmitasiga sudyalarni saylash yoki lavozimidan ozod etish toʻgʻrisidagi masalani dastlabki tarzda muhokama etishni topshiradi.

Sudyalarni lavozimlarga saylash yoki ularni lavozimidan ozod etish toʻgʻrisidagi Senatning Sud-huquq masalalari va korrupsiyaga qarshi kurashish qoʻmitasi qarori ushbu masalani Senatning navbatdagi majlisi kun tartibi loyihasiga kiritish uchun Senat Kengashiga beriladi.

133-modda. Sudyalarni saylash toʻgʻrisidagi masala Senatning navbatdagi majlisida koʻrib chiqadi.

Sudyalar lavozimlariga koʻrsatilgan nomzodlarni muhokama qilish yoki ularni lavozimidan ozod qilish toʻgʻrisidagi masalani hal qilish jarayonida senatorlar muhokama etilayotgan nomzodlar yuzasidan oʻz fikrini bildirishga, ularga savollar berishga haqli.

134-modda. Sudya lavozimiga koʻrsatilgan har bir nomzod boʻyicha ovoz berish alohida-alohida oʻtkaziladi.

Senatning sudyalarni saylash yoxud lavozimidan ozod etish toʻgʻrisidagi qarori, senatorlar umumiy sonining koʻpchilik ovozi bilan qabul qilinadi.

Agar Oʻzbekiston Respublikasi Konstitutsiyaviy sudi sudyalari, Oʻzbekiston Respublikasi Oliy sudi raisi, rais oʻrinbosarlari va sudyalari lavozimlariga saylanish uchun taqdim etilgan nomzodlar ovoz berish paytida senatorlar ovozlarining yetarli sonini ololmasalar, Oʻzbekiston Respublikasi Prezidenti Senat koʻrib chiqishi uchun shu nomzodlarni qaytadan taqdim etishi mumkin. Ular takroran rad etilgan taqdirda, Oʻzbekiston Respublikasi Prezidenti tomonidan Senat koʻrib chiqishi uchun boshqa nomzodlar taqdim etiladi.

Tegishli sudyalarni saylash yoxud lavozimidan ozod qilish toʻgʻrisidagi Senat qarori qabul qilingan kundan eʼtiboran uch kun ichida Oʻzbekiston Respublikasi Prezidentiga yuboriladi.

Senatning sudyalarni saylash yoki lavozimidan ozod qilish toʻgʻrisidagi qarori “Xalq soʻzi” va “Narodnoye slovo” gazetalarida eʼlon qilinishi lozim.

135-modda. Oʻzbekiston Respublikasi Sudyalar oliy kengashi raisi Oʻzbekiston Respublikasi Prezidentining taqdimiga binoan Senat tomonidan tayinlanadi.

Oʻzbekiston Respublikasi Prezidentining Oʻzbekiston Respublikasi Sudyalar oliy kengashi raisini tayinlash yoki lavozimidan ozod etish toʻgʻrisidagi taqdimnomasi Senat devonida roʻyxatdan oʻtkazilgan kundan boshlab Senatga kiritilgan hisoblanadi.

Senat devoniga kelib tushgan Oʻzbekiston Respublikasi Prezidentining taqdimnomasi Senat Raisiga beriladi. Senat Raisi Senatning Sud-huquq masalalari va korrupsiyaga qarshi kurashish qoʻmitasiga masalani dastlabki tarzda koʻrib chiqishni topshiradi.

136-modda. Oʻzbekiston Respublikasi Prezidentining Oʻzbekiston Respublikasi Sudyalar oliy kengashi raisini tayinlash yoki lavozimidan ozod etish toʻgʻrisidagi taqdimnomasini koʻrib chiqish yakunlari boʻyicha Senatning Sud-huquq masalalari va korrupsiyaga qarshi kurashish qoʻmitasining qarori ushbu masalani Senatning navbatdagi majlisi kun tartibi loyihasiga kiritish uchun Senat Kengashiga beriladi.

137-modda. Oʻzbekiston Respublikasi Prezidentining taqdimiga binoan Oʻzbekiston Respublikasi Sudyalar oliy kengashi raisini tayinlash yoki lavozimidan ozod etish toʻgʻrisidagi masalalar Senatning navbatdagi majlisida koʻrib chiqiladi.

Senatorlar muhokama etilayotgan nomzodlar yuzasidan oʻz fikrini bildirishga, savollar berishga haqli.

138-modda. Oʻzbekiston Respublikasi Prezidentining taqdimiga binoan Oʻzbekiston Respublikasi Sudyalar oliy kengashi raisini tayinlash yoki lavozimidan ozod etish toʻgʻrisidagi Senat qarori, agar majlisda hozir boʻlgan senatorlar umumiy sonining koʻpchiligi uni yoqlab ovoz bergan boʻlsa, qabul qilingan deb hisoblanadi.

Oʻzbekiston Respublikasi Sudyalar oliy kengashi raisini tayinlash yoki lavozimidan ozod etish toʻgʻrisidagi Senat qarori qabul qilingan kundan eʼtiboran uch kun ichida Oʻzbekiston Respublikasi Prezidentiga yuboriladi.

139-modda. Agar Oʻzbekiston Respublikasi Sudyalar oliy kengashi raisi lavozimiga tayinlash uchun taqdim etilgan nomzod ovoz berish paytida senatorlar ovozlarining yetarli sonini ololmasa, Oʻzbekiston Respublikasi Prezidenti Senat koʻrib chiqishi uchun shu nomzodni qaytadan taqdim etishi mumkin. Agar u takroran rad etilgan taqdirda, Senat koʻrib chiqishi uchun Oʻzbekiston Respublikasi Prezidenti tomonidan boshqa nomzod taqdim etiladi.

140-modda. Oʻzbekiston Respublikasi Prezidentining Oʻzbekiston Respublikasi Bosh prokurorini, Oʻzbekiston Respublikasi Hisob palatasi raisini, Oʻzbekiston Respublikasi Davlat xavfsizlik xizmati raisini tayinlash hamda lavozimidan ozod etish toʻgʻrisidagi farmonlari Senat devonida roʻyxatga olingan kundan eʼtiboran Senatga tasdiqlash uchun kiritilgan deb hisoblanadi.

Senat devoniga kelib tushgan Oʻzbekiston Respublikasi Prezidentining farmonlari Senat Raisiga beriladi. Senat Raisi masʼul qoʻmitaga masalani dastlabki tarzda koʻrib chiqishni topshiradi.

Quyidagilar masʼul qoʻmitalar hisoblanadi:

1) Senatning Sud-huquq masalalari va korrupsiyaga qarshi kurashish qoʻmitasi — Oʻzbekiston Respublikasi Prezidentining Oʻzbekiston Respublikasi Bosh prokurorini tayinlash va lavozimidan ozod etish toʻgʻrisidagi farmonini tasdiqlash haqidagi masala koʻrib chiqilayotganda;

2) Senatning Budjet va iqtisodiy islohotlar masalalari qoʻmitasi — Oʻzbekiston Respublikasi Prezidentining Oʻzbekiston Respublikasi Hisob palatasi raisini tayinlash va lavozimidan ozod etish toʻgʻrisidagi farmonini tasdiqlash haqidagi masala koʻrib chiqilayotganda;

3) Senatning Mudofaa va xavfsizlik masalalari qoʻmitasi — Oʻzbekiston Respublikasi Prezidentining Oʻzbekiston Respublikasi Davlat xavfsizlik xizmati raisini tayinlash va lavozimidan ozod etish toʻgʻrisidagi farmonini tasdiqlash haqidagi masala koʻrib chiqilayotganda.

141-modda. Oʻzbekiston Respublikasi Prezidentining tegishli mansabdor shaxslarni tayinlash yoki lavozimidan ozod etish toʻgʻrisidagi farmonlarini tasdiqlash haqidagi masalani koʻrib chiqish yakunlari boʻyicha masʼul qoʻmitaning qarori ushbu masalani Senatning navbatdagi majlisi kun tartibi loyihasiga kiritish uchun Senat Kengashiga beriladi

142-modda. Oʻzbekiston Respublikasi Prezidentining Oʻzbekiston Respublikasi Bosh prokurorini, Oʻzbekiston Respublikasi Hisob palatasi raisini, Oʻzbekiston Respublikasi Davlat xavfsizlik xizmati raisini tayinlash hamda lavozimidan ozod etish toʻgʻrisidagi farmonlarini tasdiqlash haqidagi masalalar Senatning navbatdagi majlisida koʻrib chiqiladi.

Muhokama jarayonida senatorlar muhokama etilayotgan nomzodlar yuzasidan oʻz fikrini bildirishga, ularga savollar berishga haqli.

143-modda. Oʻzbekiston Respublikasi Bosh prokurorini, Oʻzbekiston Respublikasi Hisob palatasi raisini, Oʻzbekiston Respublikasi Davlat xavfsizlik xizmati raisini tayinlash yoki lavozimidan ozod etish toʻgʻrisidagi Oʻzbekiston Respublikasi Prezidentining farmonlarini tasdiqlash haqidagi Senat qarori, agar senatorlar umumiy sonining koʻpchiligi uni yoqlab ovoz bergan boʻlsa, qabul qilingan deb hisoblanadi.

Ushbu moddaning birinchi qismida koʻrsatilgan mansabdor shaxslarni tayinlash yoki lavozimidan ozod etish toʻgʻrisidagi Senat qarori qabul qilingan kundan eʼtiboran uch kun ichida Oʻzbekiston Respublikasi Prezidentiga yuboriladi.

144-modda. Oʻzbekiston Respublikasi Prezidentining Oʻzbekiston Respublikasi Markaziy banki boshqaruvi raisini, shuningdek Oʻzbekiston Respublikasining chet davlatlardagi diplomatik va boshqa vakillarini tayinlash hamda ularni lavozimidan ozod etish toʻgʻrisidagi taqdimnomasi Senat devonida roʻyxatga olingan kundan eʼtiboran Senatga kiritilgan deb hisoblanadi.

Senat devoniga kelib tushgan Oʻzbekiston Respublikasi Prezidentining taqdimnomasi Senat Raisiga beriladi. Senat Raisi masʼul qoʻmitaga masalani dastlabki tarzda koʻrib chiqishni topshiradi.

Quyidagilar masʼul qoʻmitalar hisoblanadi:

1) Senatning Budjet va iqtisodiy islohotlar masalalari qoʻmitasi — Oʻzbekiston Respublikasi Prezidentining Oʻzbekiston Respublikasi Markaziy banki boshqaruvi raisini tayinlash va lavozimidan ozod etish toʻgʻrisidagi taqdimnomasi koʻrib chiqilayotganda;

2) Senatning Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qoʻmitasi Oʻzbekiston Respublikasi Prezidentining Oʻzbekiston Respublikasining chet davlatlardagi diplomatik va boshqa vakillarini tayinlash hamda ularni lavozimidan ozod etish toʻgʻrisidagi taqdimnomasi koʻrib chiqilayotganda.

145-modda. Oʻzbekiston Respublikasi Prezidentining tegishli mansabdor shaxslarni tayinlash yoki lavozimidan ozod etish toʻgʻrisidagi taqdimnomalarini tasdiqlash haqidagi masalani koʻrib chiqish yakunlari boʻyicha masʼul qoʻmitaning qarori ushbu masalani Senatning navbatdagi majlisi kun tartibi loyihasiga kiritish uchun Senat Kengashiga beriladi.

146-modda. Oʻzbekiston Respublikasi Prezidentining Oʻzbekiston Respublikasi Markaziy banki boshqaruvi raisini, Oʻzbekiston Respublikasining chet davlatlardagi diplomatik va boshqa vakillarini tayinlash hamda ularni lavozimidan ozod etish toʻgʻrisidagi masalalar Senatning navbatdagi majlisida koʻrib chiqiladi.

Muhokama jarayonida senatorlar muhokama etilayotgan nomzodlar yuzasidan oʻz fikrini bildirishga, ularga savollar berishga haqli.

147-modda. Oʻzbekiston Respublikasi Prezidentining taqdimnomasiga binoan Oʻzbekiston Respublikasi Markaziy banki boshqaruvi raisini, shuningdek Oʻzbekiston Respublikasining chet davlatlardagi diplomatik va boshqa vakillari tayinlash yoki lavozimidan ozod etish toʻgʻrisidagi Senat qarori, agar senatorlar umumiy sonining koʻpchiligi uni yoqlab ovoz bergan boʻlsa, qabul qilingan deb hisoblanadi.

Ushbu moddaning birinchi qismida nazarda tutilgan mansabdor shaxslarni Oʻzbekiston Respublikasi Prezidenti taqdimnomasiga binoan tayinlash yoki lavozimidan ozod etish toʻgʻrisidagi Senat qarori qabul qilingan kundan eʼtiboran uch kun ichida Oʻzbekiston Respublikasi Prezidentiga yuboriladi.

148-modda. Oʻzbekiston Respublikasi Prezidentining Oʻzbekiston Respublikasi Markaziy banki boshqaruvi raisi, Oʻzbekiston Respublikasining chet davlatlardagi diplomatik va boshqa vakillari lavozimlariga tayinlash uchun nomzodlar ovoz berishda senatorlarning zarur miqdordagi ovozlarini olmagan taqdirda, Oʻzbekiston Respublikasi Prezidenti ushbu nomzodlarni Senatga koʻrib chiqish uchun takroran taqdim etishi mumkin. Ushbu nomzodlar Senat tomonidan takroran rad etilgan taqdirda, Oʻzbekiston Respublikasi Prezidenti tomonidan koʻrib chiqish uchun boshqa nomzodlar taqdim etiladi.

149-modda. Amnistiya toʻgʻrisidagi hujjatni qabul qilish toʻgʻrisidagi masala Oʻzbekiston Respublikasi Prezidentining taqdimnomasiga binoan Senat tomonidan koʻrib chiqiladi.

Oʻzbekiston Respublikasi Prezidentining taqdimnomasi Senat devonida roʻyxatga olingan kundan eʼtiboran Senatga kiritilgan deb hisoblanadi.

Oʻzbekiston Respublikasi Prezidentining Senatga kelib tushgan amnistiya toʻgʻrisidagi hujjatni qabul qilish haqidagi taqdimnomasi Senat Raisiga beriladi. Senat Raisi Senatning Sud-huquq masalalari va korrupsiyaga qarshi kurashish qoʻmitasiga amnistiya toʻgʻrisidagi hujjatni qabul qilish haqidagi taqdimnomani dastlabki tarzda muhokama etishni topshiradi.

Senat Sud-huquq masalalari va korrupsiyaga qarshi kurashish qoʻmitasining qarori, Senatning amnistiya toʻgʻrisidagi qarori va Senatning amnistiya toʻgʻrisidagi qarorini qoʻllash tartibi haqidagi qarori loyihalari bilan birga ushbu masalani Senatning navbatdagi majlisi kun tartibi loyihasiga kiritish uchun Senat Kengashiga beradi.

150-modda. Senatning amnistiya toʻgʻrisidagi qarorini va Senatning amnistiya toʻgʻrisidagi qarorni qoʻllash tartibi haqidagi qarorini qabul qilish haqidagi masala Senatning navbatdagi majlisida koʻrib chiqiladi.

Senatning amnistiya toʻgʻrisidagi qarori va Senatning amnistiya toʻgʻrisidagi qarorini qoʻllash tartibi haqidagi qarori, agar senatorlar umumiy sonining yarmidan koʻpi ularni yoqlab ovoz bergan boʻlsa, ular qabul qilingan deb hisoblanadi.

Senatning amnistiya toʻgʻrisidagi qarori va Senatning amnistiya toʻgʻrisidagi qarorini qoʻllash tartibi haqidagi qarori qabul qilingan kundan eʼtiboran uch kun ichida Oʻzbekiston Respublikasi Prezidentiga yuboriladi.

Senatning amnistiya toʻgʻrisidagi qarori qabul qilingan kundan eʼtiboran besh kun ichida eʼlon qilinishi lozim.

151-modda. Senatorni daxlsizlik huquqidan mahrum qilish toʻgʻrisidagi masala Oʻzbekiston Respublikasi Bosh prokurorining taqdimnomasiga binoan Senat tomonidan oʻn kun ichida hal etiladi.

Oʻzbekiston Respublikasi Bosh prokurorining senatorni jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan maʼmuriy jazo choralarini qoʻllashga rozilik olish toʻgʻrisidagi taqdimnomalari Senat tomonidan uning majlisida, Senatning majlislari oraligʻidagi davrda esa, Senatning Kengashi tomonidan koʻrib chiqiladi.

152-modda. Senatning yoki Senat Kengashining senatorni daxlsizlik huquqidan mahrum etishga rozilik berish toʻgʻrisidagi qarori yashirin ovoz berish orqali qabul qilinadi.

Senatning yoki Senat Kengashining senatorni jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan maʼmuriy jazo choralarini qoʻllashga rozilik berish masalasi yuzasidan qarori darhol Oʻzbekiston Respublikasi Bosh prokuroriga yuboriladi.

153-modda. Senatorni daxlsizlik huquqidan mahrum qilishga rozilik olgan Oʻzbekiston Respublikasi Bosh prokurori jinoyat ishi tugatilgan kundan eʼtiboran uch kunlik muddatda ishni tergov qilish, sudda koʻrib chiqish natijalari toʻgʻrisida Senatga xabar berishi shart.

154-modda. Senat yoki uning Kengashining senatorni daxlsizlik huquqidan mahrum qilishiga rozilik berishni rad etishi unga nisbatan jinoiy ish qoʻzgʻatishni yoki sud tartibida maʼmuriy jazo berishni nazarda tutuvchi maʼmuriy huquqbuzarlik toʻgʻrisidagi ish qoʻzgʻatishni istisno etadigan hamda bunday ishlarning tugatilishiga olib keladigan holat hisoblanadi. Tegishli ishni tugatish toʻgʻrisidagi qaror yangi ochilgan holatlar mavjud boʻlgan taqdirdagina bekor qilinishi mumkin.

155-modda. Senatga jinoiy ish tugatilganligi yoki maʼmuriy huquqbuzarlik toʻgʻrisida qoʻzgʻatilgan ish tugatilganligi, shuningdek daxlsizlikdan mahrum etish boʻyicha rozilik berilgan senatorga nisbatan jinoiy ish qoʻzgʻatish rad etilganligi haqida xabar kelib tushgan taqdirda, Senat yoki uning Kengashi tegishli ravishda navbatdagi majlisida rozilik berish toʻgʻrisida avval qabul qilingan qaror oʻz kuchini yoʻqotgan deb topish toʻgʻrisida qaror qabul qiladi. Qabul qilingan qaror darhol Oʻzbekiston Respublikasi Bosh prokuroriga, shuningdek zarur boʻlganda tegishli sudga yuboriladi.

156-modda. Oʻzbekiston Respublikasi Bosh prokurorining Oʻzbekiston Respublikasi Oliy Majlisining Inson huquqlari boʻyicha vakilini (ombudsmanni) jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan maʼmuriy jazo choralarini qoʻllashga rozilik olish toʻgʻrisidagi taqdimnomasi ushbu masala boʻyicha Qonunchilik palatasining qarori Senatga kelib tushganidan keyin oʻn kun ichida Senatning majlisida, Senatning majlislari oraligʻidagi davrda esa Senatning Kengashi tomonidan koʻrib chiqiladi.

Senatning yoki uning Kengashining Oʻzbekiston Respublikasi Oliy Majlisining Inson huquqlari boʻyicha vakilini (ombudsmanni) daxlsizlik huquqidan mahrum etishga rozilik berish toʻgʻrisidagi qarori yashirin ovoz berish orqali qabul qilinadi.

157-modda. Senatning yoki uning Kengashining Oʻzbekiston Respublikasi Oliy Majlisining Inson huquqlari boʻyicha vakilini (ombudsmanni) jinoiy javobgarlikka tortish, ushlab turish, qamoqqa olish yoki unga nisbatan sud tartibida beriladigan maʼmuriy jazo choralarini qoʻllashga rozilik berish masalasiga oid qarori darhol Oʻzbekiston Respublikasi Bosh prokuroriga yuboriladi.

158-modda. Senatning Oʻzbekiston Respublikasi Oliy Majlisining Inson huquqlari boʻyicha vakilini (ombudsmanni) daxlsizlik huquqidan mahrum qilishga rozilik berishni rad etishi unga nisbatan jinoiy ish qoʻzgʻatishni yoki sud tartibida maʼmuriy jazo berishni nazarda tutuvchi maʼmuriy huquqbuzarlik toʻgʻrisidagi ish qoʻzgʻatishni istisno etadigan hamda bunday ishlarning tugatilishiga olib keladigan holat hisoblanadi.

159-modda. Senatga jinoiy ish tugatilganligi yoki maʼmuriy huquqbuzarlik toʻgʻrisida qoʻzgʻatilgan ish tugatilganligi, shuningdek daxlsizlik huquqidan mahrum etish boʻyicha rozilik berilgan Oʻzbekiston Respublikasi Oliy Majlisining Inson huquqlari boʻyicha vakiliga (ombudsmanga) nisbatan jinoiy ish qoʻzgʻatish rad etilganligi haqida xabar kelib tushgan taqdirda, Senat yoki uning Kengashi tegishli ravishda navbatdagi majlisida rozilik berish toʻgʻrisida avval qabul qilingan qarorni oʻz kuchini yoʻqotgan deb topish toʻgʻrisida qaror qabul qiladi. Qabul qilingan qaror darhol Oʻzbekiston Respublikasi Bosh prokuroriga, shuningdek zarur boʻlganda tegishli sudga yuboriladi.

160-modda. Senat Oʻzbekiston Respublikasining Konstitutsiyasiga, “Oʻzbekiston Respublikasi Oliy Majlisining Senati toʻgʻrisida”gi Oʻzbekiston Respublikasining Konstitutsiyaviy Konstitutsiyaviy qonuniga, “Parlament nazorati toʻgʻrisida”gi, “Oʻzbekiston Respublikasi Oliy Majlisi Senatining Reglamenti toʻgʻrisida”gi Oʻzbekiston Respublikasining qonunlariga, ushbu Reglamentga hamda boshqa qonun hujjatlariga muvofiq oʻz nazorat vakolatlarini amalga oshiradi.

Davlat organlari, xoʻjalik boshqaruvi organlari tomonidan Oʻzbekiston Respublikasining Konstitutsiyasi va qonunlari, Senat va uning organlari qarorlarini, davlat dasturlarini ijro etish, shuningdek oʻz zimmalariga yuklatilgan vazifalar hamda funksiyalarni amalga oshirish boʻyicha faoliyatini nazorat qilish tartib-taomillari ushbu Reglament bilan belgilanadi.

161-modda. Davlat organlari, xoʻjalik boshqaruvi organlarining mansabdor shaxslariga qonunlarning, turli sohalardagi davlat dasturlarining ijrosi masalalari hamda ularning vakolatlariga kiradigan boshqa muhim masalalar yuzasidan asoslantirilgan tushuntirish berish yoki nuqtai nazarini bayon etish talabi bildirilgan Senat murojaatining oʻziga xos shakli parlament soʻrovi hisoblanadi.

162-modda. Parlament soʻrovini yuborish toʻgʻrisidagi taklif qoʻmitalar tomonidan, shuningdek senatorlar umumiy sonining kamida beshdan bir qismi tomonidan Senat majlisida koʻrib chiqishi uchun kiritiladi. Bunda qoʻmita tegishli qaror qabul qiladi.

Senat qoʻmitasining parlament soʻrovini yuborish haqidagi masalani Senatning navbatdagi yalpi majlisi kun tartibi loyihasiga kiritish haqidagi taklifi Senat Kengashining navbatdagi majlisida muhokama etiladi.

Senat Kengashi Senat qoʻmitasi vakilining parlament soʻrovini yuborish toʻgʻrisidagi taklifini eshitib, Senat tomonidan parlament soʻrovini yuborish toʻgʻrisidagi masalani Senatning navbatdagi yalpi majlisi kun tartibi loyihasiga kiritish yoki kiritmaslik toʻgʻrisida qaror qabul qiladi.

163-modda. Parlament soʻrovini yuborish toʻgʻrisidagi masala Senatning navbatdagi majlisida koʻrib chiqiladi.

Parlament soʻrovini yuborish masalasi muhokama qilinayotganda Senatning yalpi majlisi ochiq, oshkora oʻtkaziladi va ommaviy axborot vositalari tomonidan yoritiladi. Zarurat boʻlganda, Senat yopiq majlis oʻtkazish haqida qaror qabul qilishi mumkin.

Parlament soʻrovi yuborish masalasi muhokama qilinayotganda Senatning yalpi majlisi, agar uning ishida senatorlar umumiy sonining kamida yarmi ishtirok etsa, vakolatli hisoblanadi.

164-modda. Parlament soʻrovini yuborish haqidagi masalani koʻrib chiqish yakunlari boʻyicha Senat majlisda hozir boʻlgan senatorlar umumiy sonining koʻpchiligi ovozi bilan qaror qabul qiladi. Senat qarori parlament soʻrovi yoʻllangan mansabdor shaxsga yuboriladi.

Agar parlament soʻrovini yuborish toʻgʻrisidagi taklif senatorlar umumiy sonining kamida beshdan bir qismi tomonidan kiritilgan boʻlsa, Senat masʼul qoʻmitani belgilaydi.

Parlament soʻrovini yuborish toʻgʻrisidagi qarorga parlament soʻrovi matni ham ilova qilinadi.

165-modda. Parlament soʻrovi qisqa va tushunarli shaklda bayon etilgan boʻlishi kerak. Parlament soʻrovida umumdavlat, hududiy yoki mahalliy xususiyatga ega muammolar nazarda tutiladi.

Parlament soʻrovida quyidagilar boʻlishi kerak:

1) parlament soʻrovi yuborilayotgan mansabdor shaxsning familiyasi, ismi, otasining ismi, shuningdek uning lavozimi;

2) parlament soʻrovi yuborilishi sabablarining qisqacha asoslari;

3) axborot (hujjatlar) taqdim etish yoki tegishli maʼlumotlar tekshiruvini oʻtkazish haqidagi talablar.

166-modda. Davlat organi va xoʻjalik boshqaruvi organi mansabdor shaxsining javobi ogʻzaki yoki yozma shaklda taqdim etilishi mumkin.

Parlament soʻroviga javobni taqdim etish shakli uni yuborish toʻgʻrisidagi Senat qarorida nazarda tutiladi.

167-modda. Davlat organi va xoʻjalik boshqaruvi organining mansabdor shaxsi parlament soʻroviga ogʻzaki javobni tegishli ravishda Senatning navbatdagi majlisida oʻziga ajratilgan muddatda beradi.

168-modda. Davlat organi va xoʻjalik boshqaruvi organining mansabdor shaxsi parlament soʻroviga yozma javobni, agar Senatning parlament soʻrovini yuborish toʻgʻrisidagi qarorida boshqa muddat belgilanmagan boʻlsa, soʻrov olingan kundan eʼtiboran oʻn kundan kechiktirmay barcha soʻralgan hujjatlarni, tekshiruv natijalarini va takliflarni ilova qilgan holda yuborishi kerak.

169-modda. Parlament soʻroviga javob u yuborilgan mansabdor shaxs tomonidan yoxud uning vazifalarini bajaruvchi shaxs tomonidan imzolangan boʻlishi kerak.

170-modda. Agar parlament soʻroviga yuborilgan yozma javobda asoslantirilgan tushuntirish berilgan boʻlsa yoki davlat organi va xoʻjalik organi mansabdor shaxsining nuqtai nazari bayon etilgan boʻlsa, qoʻmita parlament soʻroviga berilgan javobni Senat majlisida muhokama etish zarurati yoʻqligi haqida maʼlumotnoma tayyorlaydi. Bunda qoʻmita tegishli qaror qabul qiladi.

171-modda. Parlament soʻroviga yozma javob Senat majlisida raislik qiluvchi tomonidan oʻqib eshittiriladi. Yozma javobning nusxalari va qoʻmita maʼlumotnomasi Senat majlisida oʻqib eshittirilgunga qadar oldindan senatorlarga yozma yoki elektron shaklda yuboriladi.

172-modda. Agar parlament soʻroviga berilgan yozma javob asossiz axborotga ega boʻlsa va soʻrovda nazarda tutilgan masalalarni hal qilmasa, qoʻmita Senat majlisida kelib tushgan javobni parlament soʻrovi yuborilgan mansabdor shaxsning oʻzi ishtirokida muhokama etish toʻgʻrisidagi taklifni Senat Kengashi koʻrib chiqishi uchun kiritadi.

173-modda. Parlament soʻroviga berilgan javobni muhokama etishda u yuborilgan mansabdor shaxs asossiz axborot berish sabablarini maʼlum qilishi, shuningdek parlament soʻrovida qoʻyilgan masalalar yuzasidan asoslantirilgan tushuntirish berishi yoki nuqtai nazarini bayon etishi, bunda uning javobini tasdiqlovchi tegishli hujjatlarni taqdim etishi kerak.

Parlament soʻrovini muhokama etish yakunlari boʻyicha Senat qaror qabul qiladi.

174-modda. Vazirlar Mahkamasining Oʻzbekiston Respublikasi Oliy Majlisidagi vakolatli vakili Vazirlar Mahkamasining aʼzolariga, davlat boshqaruvi organlarining, mahalliy ijro etuvchi hokimiyat organlarining mansabdor shaxslariga yuborilgan parlament soʻroviga oʻz vaqtida javob yuborilishini taʼminlashga koʻmaklashadi.

175-modda. Senator, qoida tariqasida, tegishli hududlarning huquqlari va qonuniy manfaatlarini taʼminlash bilan bogʻliq masalalar yuzasidan asoslantirilgan tushuntirish berish yoki nuqtai nazarini bayon etish talabi bilan davlat organi va xoʻjalik boshqaruvi organlarining mansabdor shaxslariga soʻrov yuboradi.

176-modda. Senator davlat organi va xoʻjalik boshqaruvi organlarining mansabdor shaxslariga qonun hujjatlari ijro etilishi holatini oʻrganish, shuningdek tegishli hududlarning manfaatlarini taʼminlash bilan bogʻliq jismoniy va yuridik shaxslarning murojaatlari hamda boshqa ijtimoiy muhim masalalar boʻyicha soʻrov yuboradi.

177-modda. Senator soʻrovi qisqa va tushunarli shaklda bayon etilgan boʻlishi kerak. Senator soʻrovida umumdavlat, hududiy yoki mahalliy xususiyatga ega muammolar nazarda tutilishi mumkin.

Senator soʻrovi rasmiy blankda rasmiylashtiriladi va soʻrov muallifi tomonidan imzolanadi. Senatorning soʻrovida quyidagilar boʻlishi kerak:

1) soʻrov yuborilayotgan mansabdor shaxsning familiyasi, ismi, otasining ismi, shuningdek uning lavozimi;

2) soʻrov yuborilishi sabablarining qisqacha asoslari;

3) axborot (hujjatlar) taqdim etish yoki tegishli maʼlumotlar tekshiruvini oʻtkazish haqidagi talablar.

178-modda. Senator Senatning tegishli qoʻmitasini soʻrov yuborilganligidan xabardor qiladi.

179-modda. Senator soʻrovi yuborilgan mansabdor shaxs, agar boshqa muddat belgilanmagan boʻlsa, soʻrov olingan kundan eʼtiboran oʻn kundan kechiktirmay barcha soʻralgan axborotlarni (hujjatlarni) va tekshiruv natijalarni ilova qilgan holda yozma shaklda unga javob berishi kerak.

Senator soʻroviga javob u yuborilgan mansabdor shaxs tomonidan yoxud uning vazifalarini bajaruvchi shaxs tomonidan imzolangan boʻlishi kerak. Soʻrovga javob ushbu soʻrovni imzolagan senatorga yuboriladi.

180-modda. Senator soʻroviga berilgan javob uni yuborgan mansabdor shaxs ishtirokida Senat tegishli qoʻmitasining navbatdagi majlisida koʻrib chiqilishi mumkin.

Senator soʻroviga berilgan javobni koʻrib chiqish natijalari boʻyicha Senat qoʻmitasi qaror qabul qiladi. Senat qoʻmitasining qarori senator soʻroviga javob bergan mansabdor shaxsga yuboriladi.

181-modda. Agar senator soʻroviga berilgan javobda keltirilgan axborot soʻrovda nazarda tutilgan barcha masalalarni hal qilmasa, Senat qoʻmitasi Senat majlisi muhokamasiga senatorning soʻrovi boʻyicha axborotni kiritish toʻgʻrisidagi taklifni Senat Kengashi koʻrib chiqishi uchun kiritishi mumkin.

Senat qoʻmitasining taklifi ushbu Reglament 23-bobining 14-paragrafida belgilangan tartibga muvofiq koʻrib chiqiladi.

182-modda. Vazirlar Mahkamasining Oʻzbekiston Respublikasi Oliy Majlisidagi vakolatli vakili Vazirlar Mahkamasining aʼzolariga, davlat boshqaruvi organlarining, mahalliy ijro etuvchi hokimiyat organlarining mansabdor shaxslariga yuborilgan senator soʻroviga oʻz vaqtida javob yuborilishini taʼminlashga koʻmaklashadi.

183-modda. Senat qoʻmitalari ish rejalariga, Senatning, Senat Kengashining qarorlariga muvofiq oʻz majlislarida davlat organi va xoʻjalik boshqaruvi organlari rahbarlarining ular tomonidan qonunlarga rioya etilishi, Senat, Senat Kengashi va Senat qoʻmitalari qarorlarining bajarilishi toʻgʻrisidagi axborotini eshitishi mumkin.

184-modda. Davlat organi va xoʻjalik boshqaruvi organlari rahbarlarining axborotlarini eshitish (bundan buyon matnda eshituv deb yuritiladi) ochiq va yopiq shaklda oʻtkazilishi mumkin.

Ochiq eshituvlarda nodavlat notijorat tashkilotlari va ommaviy axborot vositalari vakillari ishtirok etishga haqli.

Yopiq eshituvlarda davlat siri yoki qonun bilan qoʻriqlanadigan boshqa sir bilan bogʻliq masalalar muhokama etiladi. Nodavlat notijorat tashkilotlari va ommaviy axborot vositalari vakillari yopiq eshituvlarga qoʻyilmaydi.

185-modda. Ish rejaga, Senat yoki uning Kengashi qaroriga muvofiq eshituv oʻtkazish toʻgʻrisidagi masala koʻtarilsa, Senat Raisi tomonidan eshituvni oʻtkazish uchun materiallar va boshqa hujjatlarni tayyorlash uchun masʼul Senat qoʻmitasi belgilanadi.

Masʼul Senat qoʻmitasi Senat Raisining topshirigʻi asosida zarur materiallar va hujjatlarni tayyorlash uchun ishchi guruh tuzishga haqli.

Ishchi guruh tarkibiga senatorlardan tashqari xalq deputatlari viloyat, tuman va shahar Kengashlari deputatlari, ekspertlar, mutaxassislar, davlat organlari, xoʻjalik boshqaruvi organlari va nodavlat notijorat tashkilotlari vakillari kiritilishi mumkin.

186-modda. Masʼul qoʻmita tegishli materiallarni tayyorlab, eshituv oʻtkazish yoki eshituv oʻtkazishni rad etish toʻgʻrisidagi masalani koʻrib chiqish uchun ularni Senat Kengashiga kiritadi.

Eshituv oʻtkazish yoki eshituv oʻtkazishni rad etish toʻgʻrisidagi masala Senat Kengashi majlisida koʻrib chiqiladi.

Senat Kengashida eshituv oʻtkazish yoki eshituv oʻtkazishni rad etish toʻgʻrisidagi masalani koʻrib chiqishda Senat Kengashi aʼzolaridan tashqari faoliyati muhokama etilayotgan masalalarga daxldor boʻlgan senatorlar, davlat organlari va xoʻjalik boshqaruvi organlari rahbarlari, Senat qoʻmitasi tomonidan tuzilgan ishchi guruh aʼzolari, nodavlat notijorat tashkilotlari va ommaviy axborot vositalari vakillari ishtirok etishga haqli.

187-modda. Eshituv oʻtkazish toʻgʻrisidagi masalani muhokama etish yakunlari boʻyicha Senat Kengashi eshituv oʻtkazish yoki eshituv oʻtkazishni rad etish toʻgʻrisida qaror qabul qiladi. Ayni bir vaqtda ochiq yoki yopiq eshituvlar oʻtkazish toʻgʻrisidagi masala hal etiladi.

Senat Kengashining eshituvni oʻtkazish toʻgʻrisidagi qarorida eshituv oʻtkaziladigan sana, vaqt va joy koʻrsatiladi.

188-modda. Senatning masʼul qoʻmitasi eshituvlarda javob olish zarur boʻlgan masalalarni belgilaydi, ular boʻyicha axborot materiallarini, shuningdek eshituv yakunlari boʻyicha qabul qilish nazarda tutilgan qarorlar loyihalarini tayyorlaydi.

Senatning masʼul qoʻmitasi eshituvlarda koʻrib chiqiladigan masalaga qarab davlat organlarini, xoʻjalik boshqaruvi organlarini, shuningdek eshituvlarga taklif etiladigan shaxslar tarkibini belgilaydi.

189-modda. Eshituvlarda masʼul qoʻmita tomonidan tuzilgan ishchi guruh aʼzolari ishtirok etishga haqli. Eshituvlarga davlat organlari va nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalari vakillari, shuningdek mutaxassislar, ekspertlar va olimlar taklif etilishi mumkin.

190-modda. Eshituvlar boʻyicha belgilangan tartibda rasmiylashtirilgan materiallar eshituvlar oʻtkazilishidan besh kun avval masʼul qoʻmita tomonidan senatorlarga, shuningdek faoliyati eshituvlarga daxldor boʻlgan davlat organlarining, xoʻjalik boshqaruvi organlarining rahbarlariga yuboriladi.

Masʼul qoʻmita eshituvlarga jalb etiladigan shaxslarga yozma takliflarning oldindan yuborilishini tashkil qiladi.

191-modda. Eshituvlar masʼul qoʻmitaning majlisida raislik qiluvchining qisqa kirish soʻzi bilan boshlanib, u muhokama qilinadigan masala, eshituvni oʻtkazish tartibi, taklif etilgan shaxslar toʻgʻrisida axborot beradi.

Raislik qiluvchining kirish soʻzidan soʻng muhokama qilinayotgan masala yuzasidan maʼruza qilish uchun masʼul qoʻmitaning vakiliga yoxud taklif etilgan shaxsga soʻz beriladi.

192-modda. Masʼul qoʻmita vakilining yoxud taklif etilgan shaxsning maʼruzasidan soʻng eshituv ishtirokchilari eshituvda koʻrib chiqilayotgan masalalarni muhokama qilishga oʻtadilar. Senatorlar va eshituvning boshqa ishtirokchilari soʻzga chiquvchilarga ogʻzaki va yozma shaklda savollar berishlari mumkin.

193-modda. Eshituvlarni oʻtkazish tartib-taomili Senat masʼul qoʻmitasining tegishli majlisida qabul qilingan reglament doirasidan chiqmasligi lozim.

194-modda. Eshituvlar yakuni boʻyicha masʼul qoʻmitaning qarori qabul qilinib, u qabul qilingan kundan eʼtiboran oʻn kun ichida tegishli davlat organiga, xoʻjalik boshqaruvi organiga yuboriladi.

Eshituvlarning yakunlari boʻyicha qarorlar senatorlar — tegishli Senatning masʼul qoʻmitasi majlisda hozir boʻlgan aʼzolari umumiy sonining koʻpchilik ovozi bilan qabul qilinadi. Masʼul qoʻmitaning qarori uning raisi tomonidan imzolanadi.

Eshituvlar yakunlari boʻyicha qabul qilingan qarorda ularning ijro etilishi uchun masʼul boʻlgan davlat organlari, xoʻjalik boshqaruvi organlari, boshqa tashkilotlar va muassasalar aniq koʻrsatiladi.

195-modda. Ochiq eshituvlar ommaviy axborot vositalarida yoritilishi mumkin. Yopiq eshituvlarning materiallaridan faqat senatorlar, davlat organlarining, xoʻjalik boshqaruvi organlarining, qabul qilingan qarorlar ijro etilishi uchun masʼul boʻlgan boshqa tashkilotlarning vakillari foydalanishi mumkin.

196-modda. Eshituvlar yakunlari boʻyicha qabul qilingan Senat masʼul qoʻmitasining qarori ijro etilishi shart.

Senat masʼul qoʻmitasi qarorining ijro etilishini nazorat qilish qoʻmita aʼzolaridan birining zimmasiga yuklatiladi.

Senat masʼul qoʻmitasining qarorida davlat organlari, xoʻjalik boshqaruvi organlari tomonidan qarorni koʻrib chiqish natijalari yoki koʻrilgan choralar toʻgʻrisida Senat qoʻmitasiga axborot taqdim etish muddatlari koʻrsatilishi mumkin.

Agar Senat masʼul qoʻmitasining qarorida davlat organlari, xoʻjalik boshqaruvi organlari tomonidan qarorni koʻrib chiqish natijalari toʻgʻrisida axborot taqdim etish muddatlari koʻrsatilmagan boʻlsa, davlat organlarining, xoʻjalik boshqaruvi organlarining mansabdor shaxslari bir oylik muddatdan kechiktirmay masʼul qoʻmitani uning qarorini koʻrib chiqish natijalaridan yoki koʻrilgan choralardan xabardor qilishi kerak.

197-modda. Ushbu qarorni ijro etish toʻgʻrisidagi axborot tegishli ravishda Senat masʼul qoʻmitasi majlisida koʻrib chiqilishi mumkin.

198-modda. Senat qoʻmitalari oʻz ish rejalariga muvofiq vaqti-vaqti bilan davlat organlari, xoʻjalik boshqaruvi organlari tomonidan qonunlarning, Senat qarorlarining ijrosi holatini, huquqni qoʻllash amaliyotini joylarga chiqib oʻrganadi.

198¹-modda. Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masala jismoniy va yuridik shaxslarning murojaatlari, davlat organlarining, xoʻjalik boshqaruvi organlarining maʼlumotlari asosida Senat qoʻmitalari tomonidan dastlabki tarzda koʻrib chiqiladi.

198²-modda. Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi jismoniy va yuridik shaxslarning murojaatlari, davlat organlarining, xoʻjalik boshqaruvi organlarining maʼlumotlari Senat devonida roʻyxatga olingan kundan boshlab Senatga kiritilgan hisoblanadi.

Kelib tushgan materiallar Senat Raisiga beriladi. Senat Raisi xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi jismoniy va yuridik shaxslarning murojaatlarini, davlat organlarining, xoʻjalik boshqaruvi organlarining maʼlumotlarini dastlabki tarzda koʻrib chiqadigan Senatning masʼul qoʻmitasini belgilaydi.

198³-modda. Senat qoʻmitalari xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masalani dastlabki tarzda koʻrib chiqishga doir faoliyatini Senat, Senat Kengashi va Senat Raisi topshiriqlari hamda tavsiyalariga muvofiq tashkil etadi.

Senat qoʻmitalarining xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masalani oʻrganib chiqishga doir faoliyatini muvofiqlashtirish Senat Raisi yoki uning topshirigʻiga muvofiq Senat Raisining oʻrinbosarlari yoxud Senatning Mahalliy hokimiyat vakillik organlari faoliyatini kuchaytirishga koʻmaklashuvchi komissiyasi tomonidan amalga oshiriladi.

198⁴-modda. Senat qoʻmitalarining xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masalani oʻrganishga tayyorgarlik koʻrish va oʻrganishni oʻtkazish tartibi Senat qoʻmitasining raisi tomonidan belgilanadi.

Senat qoʻmitalarining xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masalani oʻrganishga tayyorgarlik Senat qoʻmitasi tomonidan mazkur oʻrganishni oʻtkazish rejasini ishlab chiqishdan boshlanadi.

Oʻrganishni oʻtkazish rejasini tayyorlash davomida:

1) oʻrganish oʻtkaziladigan xalq deputatlari viloyat, tuman, shahar Kengashi qarorida belgilangan normalarning tahlilini oʻtkazadi;

2) davlat organlari va boshqa tashkilotlardan, mansabdor shaxslardan hujjatlar, ekspertlik va boshqa xulosalarni, statistik va boshqa maʼlumotlarni talab qilib oladi;

3) oʻrganib chiqilayotgan masalaga doir tegishli qonunlar, Oʻzbekiston Respublikasi Prezidentining farmon, qaror va farmoyishlarining dastlabki tahlilini oʻtkazadi;

4) masala toʻliq va xolisona oʻrganib chiqilishi uchun zarur boʻlgan boshqa harakatlarni amalga oshiradi.

198⁵-modda. Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlari oʻrganilishini oʻtkazish rejasida:

1) savolnoma tuzish va uni yuborish muddatlari;

2) ishchi guruh tarkibi;

3) joylarga chiqishning aniq sanasi;

4) oʻrganish oʻtkaziladigan tegishli xalq deputatlari viloyat, tuman, shahar Kengashi;

5) xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini oʻrganish tartibi va yakunlanadigan muddati;

6) Senat qoʻmitasi qarorining loyihasini tayyorlash muddatlari;

7) Senat qoʻmitasi majlisini oʻtkazish tartibi va joyi belgilanadi.

198⁶-modda. Savolnomani tuzish bekor qilinishi rejalashtirilgan tegishli xalq deputatlari viloyat, tuman, shahar Kengashlari qarori normalarini tahlil qilish natijalari asosida amalga oshiriladi.

Senat qoʻmitasi tomonidan tuzilgan savolnoma tegishli mahalliy Kengashga, shuningdek xalq deputatlari viloyat, tuman, shahar Kengashlari joylashgan hududda ishlayotgan senatorlarga ham yuborilishi mumkin.

198⁷-modda. Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini oʻrganish uchun Senat qoʻmitasi tomonidan ishchi guruh tuziladi.

Ishchi guruh tarkibiga senatorlar, davlat organlari, shu jumladan Oʻzbekiston Respublikasi Bosh prokuraturasi, Adliya vazirligi va Moliya vazirligining markaziy apparatlaridan, xoʻjalik boshqaruvi organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, ommaviy axborot vositalarining vakillari, shuningdek olimlar, ekspertlar va mutaxassislar kiritilishi mumkin.

198⁸-modda. Senat qoʻmitasining raisi yoki Senatning tegishli qoʻmitasi aʼzosi — senator ishchi guruh rahbari boʻladi.

Ishchi guruh rahbari ishchi guruhning aʼzolari orasida ishlarni taqsimlaydi.

Ishchi guruhning har bir aʼzosi oʻzi amalga oshirgan ishlari haqida axborot tayyorlaydi, bu axborot keyinchalik umumiy maʼlumotnomaga kiritiladi.

198⁹-modda. Ishchi guruh oʻtkazgan oʻrganish natijalari toʻgʻrisidagi umumiy maʼlumotnomada quyidagi maʼlumotlar keltiriladi:

1) xalq deputatlari viloyat, tuman, shahar Kengashlari tomonidan qabul qilingan (ishlab chiqilgan) qarorning Oʻzbekiston Respublikasining Konstitutsiyasiga, qonunlariga, Oʻzbekiston Respublikasi Prezidenti farmon, qaror va farmoyishlariga muvofiqligi;

2) aniqlangan kamchiliklar;

3) yakuniy maʼlumotnoma;

4) boshqa zarur maʼlumotlar.

Ishchi guruh tomonidan tayyorlangan umumiy maʼlumotnoma ishchi guruh rahbari, ishchi guruh aʼzolari va tegishli davlat hamda xoʻjalik boshqaruvi organlarining rahbarlari tomonidan imzolanadi.

198¹⁰-modda Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorini oʻrganish natijalari dastlabki tarzda Senat qoʻmitasining majlisida koʻrib chiqiladi.

198¹¹-modda. Xalq deputatlari viloyat, tuman, shahar Kengashlarining Oʻzbekiston Respublikasining Konstitutsiyasiga, qonunlariga, Oʻzbekiston Respublikasi Prezidentining farmon, qaror va farmoyishlariga zid keladigan qarorlarini bekor qilish masalasini oʻrganish natijalari koʻrib chiqilayotganda Senat qoʻmitasining majlislari ochiq oʻtkaziladi. Zarurat boʻlganda, Senat qoʻmitasi yopiq majlis oʻtkazish toʻgʻrisida qaror qabul qilishi mumkin.

Xalq deputatlari viloyat, tuman, shahar Kengashlarining Oʻzbekiston Respublikasining Konstitutsiyasiga, qonunlariga, Oʻzbekiston Respublikasi Prezidentining farmon, qaror va farmoyishlariga zid keladigan qarorlarini bekor qilish masalasini oʻrganish natijalari koʻrib chiqilayotganda Senat qoʻmitasining majlisiga davlat organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalari vakillari, shuningdek mutaxassislar, ekspertlar va olimlar taklif etiladi.

198¹²-modda. Xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini oʻrganish natijalari boʻyicha Senat qoʻmitasi qaror qabul qiladi.

Qarorda quyidagi masalalardan biri aks ettiriladi:

xalq deputatlari viloyat, tuman, shahar kengashi tomonidan qabul qilingan qaror Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid deb topishga asoslar mavjud emasligi;

xalq deputatlari viloyat, tuman, shahar kengashi tomonidan qabul qilingan qaror Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid ekanligi hamda mazkur masalani Senatning navbatdagi yalpi majlisi kun tartibiga kiritish haqida Senat Kengashiga taklif kiritish.

198¹³-modda. Senat xalq deputatlari viloyat, tuman, shahar Kengashlarining Oʻzbekiston Respublikasi Konstitutsiyasi va qonunlariga, Oʻzbekiston Respublikasi Prezidentining farmonlari, qarorlari va farmoyishlariga zid keladigan qarorlarini bekor qilish toʻgʻrisidagi masalani oʻn besh kun ichida koʻrib chiqadi va qaror qabul qiladi.

Xalq deputatlari viloyat, tuman, shahar Kengashlarining Oʻzbekiston Respublikasining Konstitutsiyasiga, qonunlariga, Oʻzbekiston Respublikasi Prezidentining farmon, qaror va farmoyishlariga zid keladigan qarorlarini bekor qilish masalasini oʻrganish natijalari boʻyicha qabul qilingan Senat qarori qabul qilingan kundan eʼtiboran besh kun ichida belgilangan tartibda tegishli mahalliy Kengashga, shuningdek murojaat, maʼlumot muallifiga yuboriladi.

199-modda. Davlat organlari, xoʻjalik boshqaruvi organlari tomonidan qonunlarning, Senat qarorlarining ijrosi holati, huquqni qoʻllash amaliyoti oʻrganilayotganda Senat qoʻmitalarining asosiy vazifalari quyidagilardan iborat boʻladi:

1) yagona huquqni qoʻllash amaliyotini taʼminlash maqsadida normalari amaliyotda qoʻllanilmayotgan qonun hujjatlarini va qonunchilikdagi boʻshliqlarni aniqlash;

2) qonun ustuvorligini taʼminlash uchun qabul qilingan qonun osti hujjatlarining qonun normalariga muvofiqligini aniqlash;

3) qonun hujjatlarining ijrosiga toʻsqinlik qilayotgan sabablar va sharoitlarni aniqlash;

4) qonun hujjatlari ijrosida yoʻl qoʻyilayotgan xato va kamchiliklarni bartaraf etish yuzasidan takliflar ishlab chiqish;

5) eng dolzarb hududiy muammolarni aniqlash va ularni hal qilish boʻyicha tavsiyalar ishlab chiqish;

6) Senat qoʻmitalari (komissiyalari) tomonidan oʻtkazilgan konferensiyalar, davra suhbatlari va seminarlar, shuningdek jismoniy va yuridik shaxslarning murojaatlarini koʻrib chiqish natijalari boʻyicha olingan axborotni amalda qoʻllash;

7) senatorlar va xalq deputatlari mahalliy Kengashlari deputatlarining nazariy bilimlari hamda amaliy koʻnikmalarini oshirish;

8) jamiyatda huquqiy ong va huquqiy madaniyatni oshirish;

9) qonun hujjatlarining soʻzsiz ijrosini, ularning moddiy-protsessual normalarini roʻyobga chiqarish, shuningdek qonun hujjatlarning ijrosiga toʻsqinlik qilayotgan sabablar va sharoitlarni bartaraf etish;

10) davlat dasturlari, Senatning, Senat Kengashining qarorlari, shuningdek Senat qoʻmitalari tomonidan ularning nazorat faoliyati natijalari boʻyicha mamlakatni va hududlarni rivojlantirishning ustuvor yoʻnalishlarini hisobga olgan holda qabul qilingan qarorlari amalga oshirilishini taʼminlash;

11) joylardagi ishlarning holatini oʻrganish natijalariga koʻra hududlarning aniqlangan dolzarb muammolarini hal qilish uchun aniq, har tomonlama puxta takliflar ishlab chiqish.

200-modda. Senat qoʻmitalari qonunlar, Senat qarorlari ijrosi, huquqni qoʻllash amaliyoti holatini oʻrganish boʻyicha ishni oʻz rejalariga, shuningdek Senat, Senat Kengashi va Senat Raisi topshiriqlari hamda tavsiyalariga muvofiq tashkil etadi.

Senat qoʻmitalarining qonunlar, Senat qarorlari ijrosi, huquqni qoʻllash amaliyoti holatini oʻrganish boʻyicha ish rejalarini ishlab chiqishga doir faoliyatini muvofiqlashtirish Senat Raisi yoki uning topshirigʻiga muvofiq Senat Raisining oʻrinbosarlari tomonidan amalga oshiriladi.

201-modda. Senat qoʻmitalarining qonunlar, Senat qarorlari ijrosi, huquqni qoʻllash amaliyoti holatini oʻrganish boʻyicha yarim yillik ish rejalari Senat Kengashi tomonidan yilning 1-fevrali va 1-iyuliga qadar tasdiqlanadi. Senat qoʻmitalarining qonunlar, Senat qarorlari ijrosi, huquqni qoʻllash amaliyoti holatini oʻrganish boʻyicha yarim yillik ish rejalarini koʻrib chiqish natijalari yuzasidan Senat Kengashi qaror qabul qiladi.

Senat qoʻmitalarining qonunlar, Senat qarorlari ijrosi, huquqni qoʻllash amaliyoti holatini oʻrganish boʻyicha ish rejalari mamlakatni va hududlarni rivojlantirishning ustuvor yoʻnalishlarini, davlat dasturlari, Senatning harakat dasturlari, Senat qoʻmitalari tomonidan oʻtkazilgan konferensiyalar, davra suhbatlari va seminarlarning natijalari amalga oshirilishi zarurligini hisobga olgan holda, shuningdek Senat Kengashi va Senat Raisining topshiriqlari asosida tayyorlanadi.

202-modda. Davlat organlari, xoʻjalik boshqaruvi organlari tomonidan qonunlarning, Senat qarorlarining ijrosi holatini, huquqni qoʻllash amaliyotini oʻrganish boʻyicha tadbirlar oʻtkazishga tayyorgarlik koʻrish va oʻtkazish tartibi Senat qoʻmitasining raisi tomonidan belgilanadi.

Senat qoʻmitasi qonunlarning, Senat qarorlarining ijro etilishini, huquqni qoʻllash amaliyoti holatini oʻrganishga tayyorgarlik Senat qoʻmitasi tomonidan mazkur oʻrganishni oʻtkazish rejasini ishlab chiqishdan boshlanadi.

Qonunlarning, Senat qarorlarining ijro etilishini, huquqni qoʻllash amaliyoti holatini oʻrganishni oʻtkazish rejasini tayyorlash davomida:

1) oʻrganish moʻljallanayotgan qonun hujjatlari normalarining tahlilini oʻtkazadi;

2) qonun hujjatlarining amal qilish sohasini hamda ular bilan tartibga solinadigan munosabatlarni aniqlaydi;

3) davlat organlari va boshqa tashkilotlardan, mansabdor shaxslardan hujjatlar, ekspertlik va boshqa xulosalarni, statistik va boshqa maʼlumotlarni talab qilib oladi;

4) tegishli qonun osti va idoraviy normativ hujjatlarning dastlabki tahlilini oʻtkazadi;

5) qonun hujjatlarining ijro etilishi amaliyotini oʻrganish uchun zarur boʻlgan boshqa harakatlarni amalga oshiradi.

203-modda. Qonunlarning, Senat qarorlarining ijrosi holati, huquqni qoʻllash amaliyoti oʻrganilishini oʻtkazish rejasida:

1) savolnoma tuzish va uni yuborish muddatlari;

2) ishchi guruh tarkibi;

3) joylarga chiqishning aniq sanasi;

4) qonunlarning, Senat qarorlarining ijrosi holatini, huquqni qoʻllash amaliyotini oʻrganish oʻtkaziladigan davlat organlari, xoʻjalik boshqaruvi organlari;

5) qonunlarning, Senat qarorlarining ijrosi holatini, huquqni qoʻllash amaliyotini oʻrganish tartibi;

6) qonunlar, Senat qarorlari ijrosi holatini, huquqni qoʻllash amaliyotini oʻrganish yakunlanadigan sana;

7) Senat qoʻmitasi qarorining loyihasini tayyorlash muddatlari;

8) Senat qoʻmitasi majlisini oʻtkazish tartibi va joyi belgilanadi.

204-modda. Savolnoma tuzishdan asosiy maqsad:

1) qonunlarning, Senat qarorlarining ijrosi holati, huquqni qoʻllash amaliyoti oʻrganilayotganda Senat qoʻmitasi faoliyatining yoʻnalishlarini;

2) qonun hujjatlari bilan tartibga solinadigan munosabatlarni;

3) qonun hujjatlarining ijro etilishi bilan bogʻliq boʻlgan amaldagi qoidalarning qonun normalariga muvofiqligini;

4) qonun hujjatlari amal qiladigan shaxslar doirasini;

5) qonun hujjatlari normalari amalda qoʻllanilayotgan davlat organlari, xoʻjalik boshqaruvi organlarining vakolatlarini;

6) qonun hujjatlari normalarini amalga oshirish mexanizmi qay darajada ishlab chiqilganligini, shu jumladan qonun hujjatlarini ijro etish uchun qabul qilingan qonun osti hujjatlarining mavjudligini, amaldagi qonun osti hujjatlarining qonun hujjatlari normalariga muvofiqligini, qonun osti hujjatlarida qonun hujjatlari normalarining qanchalik toʻla amalga oshirilganligini va shu kabilarni aniqlashdan iborat.

205-modda. Savolnomani tuzish ijro etilishi amaliyotini oʻrganish rejalashtirilgan tegishli qonun hujjatlari normalarini tahlil qilish natijalari asosida amalga oshiriladi.

Senat qoʻmitasi tomonidan tuzilgan savolnoma tegishli davlat organlari, xoʻjalik boshqaruvi organlariga oldindan yuboriladi. Savolnoma qonunning ijro etilishi amaliyotini oʻrganish rejalashtirilgan hududda ishlayotgan senatorlarga va xalq deputatlari mahalliy Kengashlari doimiy komissiyalari vakillariga ham yuborilishi mumkin.

206-modda. Davlat organlari, xoʻjalik boshqaruvi organlari tomonidan qonunlarning, Senat qarorlarining ijrosi holatini, huquqni qoʻllash amaliyotini oʻrganish uchun Senat qoʻmitasi tomonidan ishchi guruh tuziladi.

Ishchi guruh tarkibiga senatorlar — Senatning tegishli qoʻmitasi aʼzolari, davlat organlari, xoʻjalik boshqaruvi organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, ommaviy axborot vositalarining vakillari, shuningdek olimlar, ekspertlar va mutaxassislar kiritiladi.

207-modda. Eng dolzarb hududiy muammolarni aniqlash va hududlarni rivojlantirish masalalarini hal qilish uchun qonunlarning, Senat qarorlarining ijrosi holati, huquqni qoʻllash amaliyoti oʻrganilayotganda ishchi guruh tarkibiga joylarda ishlayotgan senatorlar, shuningdek tegishli hudud xalq deputatlari mahalliy Kengashlari doimiy komissiyalarining vakillari kiritilishi mumkin.

Senat qoʻmitasining raisi yoki Senatning tegishli qoʻmitasi aʼzosi — senator ishchi guruh rahbari boʻladi.

208-modda. Davlat organlarining, xoʻjalik boshqaruvi organlarining mansabdor shaxslari ishchi guruh joʻnab ketadigan sana haqida oldindan xabardor qilinadi.

209-modda. Ishchi guruh rahbari ishchi guruhning har bir aʼzosi uchun ish uchastkasini belgilab beradi.

Ishchi guruhning har bir aʼzosi oʻzi amalga oshirgan ishlari haqida axborot tayyorlaydi, bu axborot keyinchalik umumiy maʼlumotnomaga kiritiladi.

210-modda. Ishchi guruh oʻtkazgan oʻrganish natijalari toʻgʻrisidagi umumiy maʼlumotnomada quyidagi maʼlumotlar keltiriladi:

1) qonun hujjatlarini ijro etish uchun tashkilot tomonidan qabul qilingan (ishlab chiqilgan) qonun osti va idoraviy normativ hujjatlar toʻgʻrisida (agar bunday hujjatlar qabul qilinmagan boʻlsa, sababi koʻrsatiladi);

2) tashkilot tomonidan qabul qilingan (ishlab chiqilgan) qonun osti va idoraviy normativ hujjatlarning qonun hujjatlari normalariga muvofiqligi hamda ularda qonun hujjatlari normalari qanchalik toʻliq qamrab olinganligi haqida;

3) qonunchilikda qonun hujjatlarini ijro etishga toʻsqinlik qilayotgan ziddiyatlar va nuqsonlar mavjudligi toʻgʻrisida, shu jumladan ularni bartaraf etish uchun koʻrilgan chora-tadbirlar haqida;

4) aniqlangan kamchiliklar haqida;

5) boshqa maʼlumot.

Ishchi guruh tomonidan tayyorlangan umumiy maʼlumotnoma ishchi guruh rahbari, ishchi guruh aʼzolari va tegishli davlat organlarining, xoʻjalik boshqaruvi organlarining rahbarlari tomonidan imzolanadi.

211-modda. Qonunlarning, Senat qarorlarining ijrosi holatini, huquqni qoʻllash amaliyotini oʻrganish natijalarini koʻrib chiqish Senat qoʻmitasining majlisida oʻtkaziladi. Senat qoʻmitasi majlisida ishchi guruh aʼzolari tomonidan tayyorlangan axborot muhokama qilinadi. Zarurat boʻlganda, qonun hujjatlarining ijrosi holatini, huquqni qoʻllash amaliyotini oʻrganish natijalari Senat qoʻmitasi va xalq deputatlari mahalliy Kengashining qoʻshma majlisida koʻrib chiqilishi mumkin.

212-modda. Senat qoʻmitasining majlisi, agar unda qoʻmita aʼzolarining kamida yarmi hozir boʻlsa, vakolatli hisoblanadi.

Qonunlarning, Senat qarorlarining ijrosi holatini, huquqni qoʻllash amaliyotini oʻrganish natijalari koʻrib chiqilayotganda Senat qoʻmitasining majlislari ochiq oʻtkaziladi. Zarurat boʻlganda, Senat qoʻmitasi yopiq majlis oʻtkazish toʻgʻrisida qaror qabul qilishi mumkin.

Qonunlarning, Senat qarorlarining ijrosi holatini, huquqni qoʻllash amaliyotini oʻrganish natijalari koʻrib chiqilayotganda Senat qoʻmitasining majlisiga davlat organlari, nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalari vakillari, shuningdek mutaxassislar, ekspertlar va olimlar taklif etiladi.

Senat qoʻmitasining majlisida qonun hujjatlarining ijrosi holatini, huquqni qoʻllash amaliyotini oʻrganish natijalari koʻrib chiqilayotganda ishchi guruh aʼzolari va oʻrganilgan tashkilot rahbari hozir boʻlishi shart.

213-modda. Senat qoʻmitasida koʻrib chiqilayotgan masalalar yuzasidan qarorlar qoʻmitaning majlisida hozir boʻlgan aʼzolari umumiy sonining koʻpchilik ovozi bilan qabul qilinadi. Senat qoʻmitasining qarori qoʻmita raisi tomonidan imzolanadi.

Qonunlarning, Senat qarorlarining ijrosi holatini, huquqni qoʻllash amaliyotini oʻrganish natijalari boʻyicha qabul qilingan Senat qoʻmitasining qarori tegishli davlat organlariga, xoʻjalik boshqaruvi organlariga u qabul qilingan kundan eʼtiboran oʻn kun ichida yuboriladi. Senat qoʻmitasining qarori ommaviy axborot vositalarida eʼlon qilinishi mumkin.

214-modda. Senat qoʻmitasining qarori asoslantiruvchi va qaror qiluvchi qismlardan iborat boʻladi.

Senat qoʻmitasi qarorining asoslantiruvchi qismida qonun hujjatlari ijrosi holatini, huquqni qoʻllash amaliyotini oʻrganish jarayonida aniqlangan ijobiy va salbiy jihatlar koʻrsatilgan boʻlishi kerak.

Senat qoʻmitasi qarorining qaror qiluvchi qismida quyidagilar boʻlishi kerak:

1) qonun hujjatlarining ijro etilishi yuzasidan qabul qilingan qonun osti va idoraviy normativ hujjatlarni baholash;

2) tegishli davlat organlarining, xoʻjalik boshqaruvi organlarining faoliyatini baholash;

3) davlat organlarining, xoʻjalik boshqaruvi organlarining faoliyatini takomillashtirishga doir tavsiyalar;

4) qonunchilikka oʻzgartishlar kiritish yuzasidan takliflar tayyorlash haqidagi tavsiyalar;

5) Senat qoʻmitasining qarori koʻrib chiqish uchun yuboriladigan davlat organlarining, xoʻjalik boshqaruvi organlarining roʻyxati.

215-modda. Senat qoʻmitasining qarorida davlat organlari, xoʻjalik boshqaruvi organlari tomonidan qarorni koʻrib chiqish natijalari yoki koʻrilgan choralar toʻgʻrisida Senat qoʻmitasiga axborot taqdim etish muddatlari koʻrsatilishi mumkin.

Agar Senat qoʻmitasining qarorida davlat organlari, xoʻjalik boshqaruvi organlari tomonidan qarorni koʻrib chiqish natijalari toʻgʻrisida axborot taqdim etish muddatlari koʻrsatilgan boʻlmasa, davlat organlarining, xoʻjalik boshqaruvi organlarining mansabdor shaxslari uzogʻi bilan bir oylik muddatdan kechiktirmasdan Senat qoʻmitasiga uning qarorini koʻrib chiqish natijalari yoki koʻrilgan choralar haqida axborot berishlari shart.

216-modda. Senatning qoʻmitalari yangi qabul qilingan qonunlar ijrosini taʼminlash uchun qonun osti hujjatlarining oʻz vaqtida qabul qilinishi yuzasidan monitoringni amalga oshiradi.

Monitoring amaldagi qonunlar va qonun osti hujjatlarini muntazam oʻrganishdan iborat. Monitoring qonun Senat majlisining kun tartibiga kiritilguniga qadar uni dastlabki tarzda koʻrib chiqqan Senat qoʻmitasi tomonidan, qoida tariqasida, qonun kuchga kirgan vaqtdan boshlab bir yil oʻtgandan keyin amalga oshiriladi.

217-modda. Monitoring jarayonida Senat qoʻmitasi tegishli qonunni tahlil qiladi va:

1) unda havolaki normalar mavjudligini;

2) davlat organlari, xoʻjalik boshqaruvi organlari tomonidan qabul qilinishi lozim boʻlgan qonun osti hujjatlarini;

3) ushbu hujjatlarni ishlab chiqish boʻyicha masʼul organlarni aniqlaydi.

Senat qoʻmitalari davlat organlari, xoʻjalik boshqaruvi organlari tomonidan qabul qilingan qonun osti hujjatlarini yozma shaklda talab qilib oladi.

218-modda. Senat qoʻmitalari, shuningdek senatorlar qonun osti hujjatlari qabul qilinishi yuzasidan monitoringni amalga oshirishda davlat organlaridan va boshqa tashkilotlardan, mansabdor shaxslardan hujjatlarni, ekspert xulosalarini, statistika va boshqa maʼlumotlarni talab qilib olishi mumkin.

219-modda. Monitoring yakunlari, agar davlat organlari, xoʻjalik boshqaruvi organlari tomonidan qabul qilingan qonun osti hujjatlari qonunga muvofiq kelmasa yoki qonunlarda qabul qilinishi nazarda tutilgan qonun osti hujjatlari ishlab chiqilmaganligi aniqlansa, Senat qoʻmitasining majlisida koʻrib chiqilishi mumkin.

220-modda. Qoʻmitalar (komissiyalar) tomonidan konferensiyalar, davra suhbatlari, seminarlar va Senat faoliyati bilan bogʻliq boshqa tadbirlar oʻtkaziladi.

221-modda. Senat qoʻmitalari (komissiyalari) tomonidan oʻtkaziladigan tadbirlar qoʻyilgan maqsad yoki vazifalarga qarab, quyidagi turlarga boʻlinadi:

konferensiya — eng dolzarb muammolar boʻyicha, ularni hal etish yuzasidan kelishilgan tarzda xulosalar qabul qilish va tavsiyalar ishlab chiqish maqsadida davlat organlarining, xoʻjalik boshqaruvi organlarining, tadqiqot markazlari va boshqa tashkilotlarning, fuqarolik jamiyati institutlarining vakillarini, shuningdek olimlar, ekspertlarni jalb etgan holda oʻtkaziladi;

xalqaro konferensiya — eng dolzarb muammolar boʻyicha bir necha davlat manfaatlariga daxldor mavzularni muhokama etish maqsadida xorijiy davlatlar va xalqaro tashkilotlarning vakillari hamda ekspertlarini jalb etgan holda oʻtkaziladi;

ilmiy konferensiya — nazariy xususiyatga ega boʻlgan masalalarni muhokama etish uchun ilmiy-nazariy muammoni hal etishga qaratilgan tavsiyalar ishlab chiqish maqsadida oʻtkaziladi;

ilmiy-amaliy konferensiya — mavzu amaliy xususiyatga ega boʻlgan taqdirda oʻtkaziladi. Bunda asosiy maqsad amaliy muammolarni ilmiy asoslangan tarzda hal etish yuzasidan tavsiyalar ishlab chiqishdan iborat boʻladi;

davra suhbati — muayyan muammoni (mavzuni) muhokama etish (ayrim muammo yoki masala boʻyicha) va uni hal etish yuzasidan tavsiyalar ishlab chiqish uchun torroq doiradagi ishtirokchilar bilan oʻtkaziladi (qoida tariqasida davra suhbatida ishtirok etish uchun kamida oʻttiz kishi taklif etiladi);

seminar — nazariy bilimlar saviyasini va amaliy koʻnikmalarni oshirish maqsadida oʻtkaziladi. Seminarlar mavzu doirasiga qarab oʻquv seminarlariga (treninglar), ilmiy (ilmiy-nazariy) va ilmiy-amaliy seminarlarga boʻlinadi (qoida tariqasida seminarda ishtirok etish uchun kamida ellik kishi taklif etiladi).

222-modda. Konferensiyalar, davra suhbatlari va seminarlardan koʻzlangan asosiy maqsad quyidagilardan iborat:

1) yagona huquqni qoʻllash amaliyotini taʼminlash maqsadida normalari amaliyotda qoʻllanilmayotgan qonunlarni, shuningdek qonunchilikdagi nuqsonlarni aniqlash;

2) qonun ustuvorligini taʼminlash uchun qabul qilingan qonun osti hujjatlarining qonun normalariga muvofiqligini aniqlash;

3) qonunning ijro etilishiga toʻsqinlik qilayotgan sabablar va sharoitlarni aniqlash;

4) amaldagi qonunchilikni takomillashtirish, shu jumladan tadbirlar jarayonida muhokama qilinayotgan masalalarga oid muammolarni hal qilish yuzasidan aniq taklif va tavsiyalar ishlab chiqish (tadbir ishtirokchilarining takliflari asosida);

5) qonunchilikni takomillashtirish masalalari yuzasidan mutaxassislar, olimlar, amaliyotchilarning fikr-mulohazalarini umumlashtirish, shuningdek boshqa davlatlardagi qonun bilan tartibga solish tajribasini oʻrganish;

6) hududlarni rivojlantirish masalalarini koʻrib chiqish hamda muhokama qilish, hududiy muammolarni aniqlash va ularni hal etish yuzasidan tavsiyalar ishlab chiqish;

7) Oʻzbekiston Respublikasi qonunlari, Senat (Senat Kengashi) va Senat qoʻmitalari (komissiyalari) qarorlarining davlat organlari, xoʻjalik boshqaruvi organlari tomonidan ijro etilishini nazorat qilish bilan bogʻliq tadbirlar davomida Senat qoʻmitalari (komissiyalari) aniqlagan muammolarni muhokama qilish;

8) Senat qoʻmitalarining (komissiyalarining) nazorat faoliyatini amalga oshirishi bilan bogʻliq tadbirlarni oʻtkazish davomida olingan axborotni amalda qoʻllash;

9) Senat qoʻmitalari (komissiyalari) faoliyatini keng yoritish va jamoatchilik fikrini shakllantirish;

10) senatorlarning, xalq deputatlari mahalliy Kengashlari deputatlarining nazariy bilimini va amaliy koʻnikmalarini oshirish;

11) ijtimoiy-siyosiy va iqtisodiy munosabatlarning turli sohalaridagi eng dolzarb muammolarni aniqlash, shuningdek ularni hal etish yuzasidan ilmiy asoslar va amaliy koʻnikmalarni ishlab chiqish;

12) tadbir ishtirokchilarining huquqiy madaniyatini oshirish va jamiyatda qonun ustuvorligini taʼminlash;

13) Senat faoliyati bilan bogʻliq boshqa masalalarni koʻrib chiqish va muhokama qilish.

223-modda. Konferensiya, davra suhbati, seminar va boshqa tadbirlarni oʻtkazishga tayyorgarlik koʻrish tartibini Senat qoʻmitasining (komissiyasining) raisi belgilaydi.

Konferensiya, davra suhbati, seminar va boshqa tadbirlarni oʻtkazish toʻgʻrisida qoʻmita raisi, qoida tariqasida, Senat Raisini u oʻtkazilishidan kamida yetti kun avval xabardor qiladi, ayni bir vaqtda unga barcha zarur hujjatlarni taqdim etadi. Senat Raisining roziligini olgandan keyin qoʻmita (komissiya) raisi konferensiya, davra suhbati yoki seminar oʻtkazilishini uyushtiradi va u oʻtkaziladigan sanani va joyni, shuningdek qatnashchilar sonini belgilaydi.

Konferensiya, davra suhbati, seminar va boshqa tadbirlar oʻtkaziladigan sana Senat qoʻmitasining ish rejasiga muvofiq belgilanadi.

224-modda. Rejalashtirilgan konferensiya, davra suhbati, seminar va boshqa tadbirlar uchun zarur boʻlgan hujjatlarning loyihalari Senat qoʻmitasi (komissiyasi) tomonidan tadbir oʻtkaziladigan sanadan oʻn kun oldin Axborot-tahlil boʻlimiga taqdim etiladi.

Rejalashtirilgan konferensiya, davra suhbati, seminar va boshqa tadbirlar uchun zarur boʻlgan hujjatlarning loyihalari Senat qoʻmitasi (komissiyasi) tomonidan tadbirlar oʻtkaziladigan sanadan yetti kun oldin ularni ommaviy axborot vositalarida yoritishga doir ishlarni amalga oshirish (press-reliz, intervyu va boshqalarni tayyorlash) uchun Axborot xizmatiga taqdim etiladi.

225-modda. Konferensiya, davra suhbati, seminar va boshqa tadbirlar Senat binosida va undan tashqarida (sayyor konferensiyalar, davra suhbatlari, seminar va boshqa tadbirlar) oʻtkazilishi mumkin.

226-modda. Konferensiya, davra suhbati, seminar va boshqa tadbirlarni oʻtkazishga tayyorgarlik koʻrilayotganda Senat qoʻmitasi (komissiyasi) davlat organlari va boshqa tashkilotlardan, mansabdor shaxslardan hujjatlar, ekspert xulosalari va boshqa xulosalarni, statistik va boshqa maʼlumotlarni talab qilib olishi mumkin. Olingan axborot asosida boʻlajak tadbir ishtirokchilarining doirasi, tadbir dasturi va maʼruzachilar (qoʻshimcha maʼruzachilar) belgilanadi.

227-modda. Tadbirlarda ishtirok etish uchun Qonunchilik palatasining deputatlari va xalq deputatlari mahalliy Kengashlarining deputatlari, davlat organlari va nodavlat notijorat tashkilotlari vakillari, xoʻjalik yurituvchi subyektlar, ilmiy muassasalar va tadqiqot markazlari, matbuot organlari, televideniye, radio va boshqa ommaviy axborot vositalari vakillari, shuningdek mutaxassislar, ekspertlar va olimlar taklif qilinishi mumkin.

228-modda. Tadbir ishtirokchilarining miqdor tarkibi tadbirdan koʻzlangan maqsadga qarab belgilanadi. Ishtirokchilarning uzil-kesil roʻyxati Senat qoʻmitasining (komissiyasining) raisi tomonidan tasdiqlanadi.

229-modda. Maʼruzachilar (qoʻshimcha maʼruzachilar) sifatida konferensiya, davra suhbati, seminar yoki boshqa tadbir mavzusi boʻyicha nazariy va amaliy bilimlarga ega boʻlgan shaxslar (olimlar, mutaxassislar, ekspertlar) taklif qilinadi. Zarurat boʻlganda maʼruzachilardan (qoʻshimcha maʼruzachilardan) maʼruzalarning (nutqlarning) matnlari (tezislari) avvaldan soʻrab olinadi.

230-modda. Konferensiya, davra suhbati, seminar yoki boshqa tadbir dasturi asosiy maʼruzalar (eng muhim masalalar boʻyicha rasmiy shaxslarning nutqlari), qoʻshimcha maʼruzalar roʻyxatidan hamda soʻzga chiqishga doir reglamentdan iborat boʻladi.

231-modda. Xatlar (dastur-taklifnomalar) tadbir ishtirokchilariga avvaldan yuboriladi. Ularda tadbir mavzusi, oʻtkaziladigan muddati va joyi koʻrsatiladi. Xatlarga (dastur-taklifnomalarga) soʻzga chiquvchilarning umumlashma tezislari, shuningdek boshqa materiallar oldindan tanishib chiqish uchun ilova qilinishi mumkin.

232-modda. Tadbir boshlanishidan avval tadbir ishtirokchilari hamda ommaviy axborot vositalarining taklif qilingan vakillari roʻyxatga olinadi.

233-modda. Konferensiya, davra suhbati, seminar va boshqa tadbirni oʻtkazish vaqtida umumiy rahbarlik Senat qoʻmitasining raisi yoki uning topshirigʻiga muvofiq qoʻmita aʼzosi (bundan buyon matnda raislik qiluvchi deb yuritiladi) tomonidan amalga oshiriladi.

234-modda. Boshqa organlar va tashkilotlar bilan birgalikda qoʻshma konferensiyalar, davra suhbatlari, seminarlar va boshqa tadbirlar oʻtkazilganida raislik qiluvchi tadbir tashkilotchilari oʻrtasidagi kelishuvga muvofiq belgilanadi.

Konferensiya, davra suhbati, seminar yoki boshqa tadbir, qoida tariqasida, raislik qiluvchining kirish soʻzi bilan boshlanadi, soʻngra maʼruzachilarga, qoʻshimcha maʼruzachilarga soʻz beriladi.

Muhokamada qatnashish istagida boʻlganlar raislik qiluvchiga murojaat etadilar. Raislik qiluvchi murojaat etish navbati tartibida ularga soʻz beradi.

235-modda. Ishtirokchilarning soʻzga chiqishi natijalari asosida asosiy xulosa va tavsiyalar tayyorlanadi. Seminarlar oʻtkazilganida tavsiyalar ishlab chiqilmaydi.

236-modda. Bildirilgan fikr va takliflarni hisobga olib borish, qoida tariqasida, Senatda doimiy asosda ishlovchi senatorlar va Axborot-tahlil boʻlimining tegishli Senat qoʻmitasiga biriktirilgan masʼul xodimi tomonidan amalga oshiriladi. Agar ishtirokchilar oʻz nutqlarida xulosalar va tavsiyalarga taʼsir koʻrsatadigan takliflarni bildirsalar, raislik qiluvchi hozir boʻlganlarga tadbirning yakuniy xulosalari va tavsiyalariga oʻzgartish va qoʻshimchalar kiritish zarurligini muhokama etishni taklif qiladi.

237-modda. Konferensiyalar va tadbirlarda bildirilgan tavsiyalarning asosiy maqsadi amaldagi qonunchilikni va Senat qoʻmitalarining (komissiyalarining) nazorat-tahlil faoliyatini takomillashtirish, shuningdek eng dolzarb muammolarni, jumladan hududlarni rivojlantirish masalalarini va hududiy muammolarni hal qilish yuzasidan aniq takliflar ishlab chiqishdan iborat.

238-modda. Amaldagi qonunchilikni takomillashtirish haqida tavsiyalar tayyorlash vaqtida oʻzgartishlar kiritilishi yoki ishlab chiqilishi zarur boʻlgan aniq normativ-huquqiy hujjatlar koʻrsatiladi.

Senat qoʻmitalarining (komissiyalarining) nazorat-tahlil faoliyatini takomillashtirishga qaratilgan tavsiyalar tayyorlash vaqtida Senat qoʻmitalari (komissiyalari) oʻrganishi yoki ularning nazorat-tahlil faoliyati rejasiga kiritilishi zarur boʻlgan aniq masalalar koʻrsatiladi.

Eng dolzarb muammolarni hal etishga qaratilgan tavsiyalarni tayyorlashda ularni hal etishning aniq chora-tadbirlari koʻrsatiladi.

239-modda. Tavsiyalar matnini maromiga yetkazish uchun Senat qoʻmitalari (komissiyalari) tomonidan ishchi guruhlar tuzilishi mumkin. Ishchi guruh tarkibiga senatorlar, xalq deputatlari mahalliy Kengashlari deputatlari, davlat organlari va nodavlat notijorat tashkilotlari, ilmiy muassasalar, xoʻjalik yurituvchi subyektlar, matbuot organlari, televideniye, radio va boshqa ommaviy axborot vositalari vakillari, shuningdek mutaxassislar, ekspertlar va olimlar kiritilishi mumkin.

240-modda. Ishchi guruhning majlislari oʻtkaziladigan sana va majlislar soni Senat qoʻmitasining (komissiyasining) raisi tomonidan belgilanadi.

241-modda. Ishchi guruh aʼzolariga ishchi guruhning majlisi oʻtkaziladigan sana oldindan xabar qilinadi. Ishchi guruh aʼzolariga yoki ular ishlaydigan tashkilotga yuboriladigan xat yoki telefonogrammani Senat qoʻmitasining (komissiyasining) raisi imzolaydi.

242-modda. Ishchi guruhning majlisiga masʼul qoʻmita (komissiya) raisi yoki uning topshirigʻiga muvofiq Senatda doimiy asosda ishlovchi qoʻmita aʼzosi rahbarlik qiladi.

243-modda. Senat qoʻmitalarining (komissiyalarining) konferensiyalar va davra suhbatlari natijalari boʻyicha ishlab chiqilgan tavsiyalari oʻn kunlik muddat ichida davlat va xoʻjalik boshqaruvi organlariga ijro etish uchun yuboriladi.

244-modda. Zarurat boʻlganda, Senat qoʻmitalari (komissiyalari) davlat va xoʻjalik boshqaruvi organlaridan hamda boshqa manfaatdor tashkilotlardan Senat qoʻmitalari (komissiyalari) tavsiyalarining ijro etilishi yuzasidan axborot talab qilib olishi mumkin.

245-modda. Senat qoʻmitalarining (komissiyalarining) konferensiyalar, davra suhbatlari, seminarlar va boshqa tadbirlar oʻtkazish bilan bogʻliq faoliyatini tashkiliy, axborot, moddiy-texnik jihatdan taʼminlash Senat devonining tegishli boʻlimlari tomonidan amalga oshiriladi.

246-modda. Senat boshqa davlatlarning parlamentlari va xalqaro parlament tashkilotlari bilan parlamentlararo hamkorlik toʻgʻrisida bitimlar tuzishi, boshqa davlatlarning parlamentlari va xalqaro parlament tashkilotlari bilan hamkorlik boʻyicha parlamentlararo guruhlar, komissiyalar, qoʻmitalar, ishchi guruhlar va boshqa tuzilmalar tashkil etishi, rasmiy parlament delegatsiyalari almashinishi, shuningdek xalqaro aloqalarni mustahkamlashga qaratilgan turli tadbirlar oʻtkazishi mumkin.

247-modda. Boshqa davlatlarning parlamentlari rahbarlariga, davlatlar va hukumatlar boshliqlariga, parlament delegatsiyalari rahbarlariga ularning iltimosiga binoan Senat majlisida soʻzga chiqish imkoniyati berilishi mumkin.

248-modda. Boshqa davlatlarning parlamentlari va xalqaro parlament tashkilotlari bilan hamkorlik boʻyicha parlamentlararo guruhlar, komissiyalar, qoʻmitalar, ishchi guruhlar va boshqa tuzilmalar Senat aʼzolari orasidan tashkil etiladi, uning tarkibi Senat Kengashining qarori bilan tasdiqlanadi.

Senat va Qonunchilik palatasi birgalikda Senat aʼzolari va Qonunchilik palatasi deputatlari orasidan boshqa davlatlarning parlamentlari va xalqaro parlament tashkilotlari bilan hamkorlik boʻyicha parlamentlararo guruhlar, komissiyalar, qoʻmitalar, ishchi guruhlar va boshqa tuzilmalar tashkil etishi mumkin, ularning tarkibi Senat Kengashi va Qonunchilik palatasi Kengashining qoʻshma qarori bilan tasdiqlanadi.

249-modda. Hamkorlik boʻyicha parlamentlararo guruhlar, komissiyalar, qoʻmitalar, ishchi guruhlar va boshqa tuzilmalar faoliyatining tartibi Senat Kengashi va Qonunchilik palatasi Kengashining qoʻshma qarori bilan belgilanadi.

250-modda. Boshqa davlatlarning parlamentlari va xalqaro parlament tashkilotlari bilan aloqalarni mustahkamlash hamda rivojlantirish uchun Senat aʼzolari rasmiy parlament delegatsiyalari tarkibida xorijiy mamlakatlarga yuborilishi mumkin.

Rasmiy parlament delegatsiyalarini xorijiy mamlakatlarga yuborish masalasi belgilangan tartibga muvofiq Senat Kengashi tomonidan koʻrib chiqiladi.

Oʻzbekiston Respublikasining rasmiy parlament delegatsiyalari xorijiy safar yakunlari boʻyicha Senat Kengashiga axborot taqdim etadi.

251-modda. Senat, uning qoʻmitalari (komissiyalari), senatorlar faoliyati ommaviy axborot vositalarida va Senatning rasmiy veb-saytida yoritilishi mumkin.

252-modda. Senat faoliyatini moliyalashtirish Oʻzbekiston Respublikasi Davlat budjeti mablagʻlari hisobidan amalga oshiriladi va ushbu budjetda alohida satrda nazarda tutiladi

253-modda. Senatning xarajatlari, shu jumladan parlamentlararo va xalqaro hamkorlikka doir xarajatlari smetasi Senat devoni tomonidan Senatning Budjet va iqtisodiy islohotlar masalalari qoʻmitasi bilan birgalikda tuziladi.

Senatning kelgusi yil uchun xarajatlari smetasi har yilgi indeksatsiya hisobga olingan, joriy yildagi haqiqiy xarajatlardan kelib chiqqan holda shakllantiriladi.

Senatning xarajatlari smetasi Senat Kengashi tomonidan tasdiqlanadi.

Senat xarajatlarining tasdiqlangan smetasi uni Oʻzbekiston Respublikasi Davlat budjetining shakllantiriladigan loyihasiga kiritish uchun joriy yilning 1-iyulidan kechiktirmay Vazirlar Mahkamasiga yuboriladi.

254-modda. Reglament, unga oʻzgartish va qoʻshimchalar Senat qarori bilan, Senat majlislari oraligʻidagi davrda esa Senat Kengashi qarori bilan qabul qilinadi va qabul qilingan qaror keyinchalik Senat majlisida tasdiqlanadi.

Ushbu Reglamentga oʻzgartish va qoʻshimchalar kiritish toʻgʻrisidagi takliflar qoʻmitalar (komissiyalar) va senatorlar tomonidan Senat Kengashiga belgilangan tartibda koʻrib chiqish uchun kiritilishi mumkin.