Oʻzbekiston Respublikasi Prezidentining 2019-yil 21-maydagi PF-5723-son “Mehnatga haq toʻlash, pensiyalar va boshqa toʻlovlar miqdorlarini aniqlash tartibini takomillashtirish toʻgʻrisida”gi, 2017-yil 1-dekabrdagi PF-5270-son “Nogironligi boʻlgan shaxslarni davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida”gi farmonlari, 2019-yil 5-martdagi PQ-4227-son “2019-yilda aholi bandligini taʼminlash va yangi ish oʻrinlarini tashkil etish boʻyicha davlat buyurtmasi toʻgʻrisida”gi va 2019-yil 11-dekabrdagi PQ-4549-son “Meva-sabzavotchilik va uzumchilik tarmogʻini yanada rivojlantirish, sohada qoʻshilgan qiymat zanjirini yaratishga doir qoʻshimcha chora-tadbirlar toʻgʻrisida”gi qarorlariga muvofiq buyuraman:

1. Oʻzbekiston Respublikasi bandlik va mehnat munosabatlari vazirining 2019-yil 10-maydagi 19-2019-B-son buyrugʻi (roʻyxat raqami 3163, 2019-yil 31-may) (Qonun hujjatlari maʼlumotlari milliy bazasi, 31.05.2019-y., 10/19/3163/3221-son) bilan tasdiqlangan Oʻzbekiston Respublikasi Bandlikka koʻmaklashish davlat jamgʻarmasi mablagʻlari hisobidan subsidiya va grantlar ajratish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

1. 2-bandda:

ikkinchi — beshinchi xatboshilardagi “eng kam oylik ish haqining” degan soʻzlar “bazaviy hisoblash miqdorining” degan soʻzlar bilan almashtirilsin;

quyidagi mazmundagi beshinchi xatboshi bilan toʻldirilsin:

“kam taʼminlangan oilalar bandligini taʼminlash maqsadida tashkil etiladigan qishloq xoʻjaligi birlashmalari ustav fondiga (jamgʻarmasiga) ulush sifatida kiritish uchun — har bir aʼzoga (oilaga) bazaviy hisoblash miqdorining 10 baravari miqdorida toʻlash;”;

beshinchi xatboshi oltinchi xatboshi deb hisoblansin.

2. 11-banddagi “eng kam oylik haqining” degan soʻzlar “bazaviy hisoblash miqdorining” degan soʻzlar bilan almashtirilsin.

3. 15-bandning birinchi xatboshisi, 16, 17, 25, 26, 31, 32 va 40-bandlardagi hamda ilovaning 2-bandidagi “eng kam oylik ish haqining” degan soʻzlar “bazaviy hisoblash miqdorining” degan soʻzlar bilan almashtirilsin.

4. 27-bandda:

ikkinchi xatboshidagi “nogiron bolalari boʻlgan” degan soʻzlar “nogironligi boʻlgan bolalari bor” degan soʻzlar bilan almashtirilsin;

beshinchi xatboshidagi “nogironlar” degan soʻz “nogironligi boʻlgan” degan soʻzlar bilan almashtirilsin.

5. Quyidagi mazmundagi 5¹-bob bilan toʻldirilsin:

40¹. Kam taʼminlangan oilalar bandligini taʼminlash maqsadida birlashma tashkil etmoqchi boʻlgan muassis (bundan buyon matnda muassis deb yuritiladi) birlashma ustav fondiga (jamgʻarmasiga) ulush sifatida kiritish uchun — har bir aʼzoga (oilaga) subsidiya olish uchun hududdagi ABKMga yozma ravishda murojaat qiladi.

Muassis tomonidan murojaatga birlashmaga ixtiyoriy aʼzo boʻluvchilarning (oila boshligʻi) F.I.O. koʻrsatilgan roʻyxati hamda qishloq xoʻjaligi mahsulotlarini yetishtirish uchun muassis va oila oʻrtasida tuzilgan pudrat shartnomalari nusxalari ilova qilinishi kerak.

40². Mazkur Nizomning 40¹-bandi ikkinchi xatboshisida nazarda tutilgan maʼlumotlar toʻliq topshirilgandan soʻng ABKMning masʼul xodimi muassisning murojaatini 5 ish kuni ichida oʻrganib chiqadi va oʻrganish natijalari boʻyicha birlashmaga ixtiyoriy aʼzo boʻluvchilarga subsidiya ajratish uchun ABKM rahbariga taklif kiritadi. Bunda, masʼul xodim oilani kam taʼminlanganligiga eʼtibor qaratishi lozim.

40³. ABKM rahbari birlashmaga ixtiyoriy aʼzo boʻluvchilarning birlashma ustav fondidagi ulushini shakllantirish uchun 2 ish kunida subsidiya ajratish toʻgʻrisidagi buyruqni rasmiylashtiradi va pochta orqali muassisga yuboradi. Buyruqda subsidiya oluvchilar F.I.O., subsidiya miqdori koʻrsatilishi zarur.

40⁴. ABKMning masʼul xodimi muassis taqdim etgan hujjatlar mazkur Nizomning 40¹-bandining ikkinchi xatboshisiga muvofiq boʻlmaganda yoxud oʻrganish natijasi boʻyicha muassisning murojaatida koʻrsatilgan oila kam taʼminlangan oila boʻlmagan hollarda 1 ish kunida subsidiya ajratishni rad etish toʻgʻrisida muassisga rad etishning sabablari asoslantirilgan holda yozma ravishda xat yuboradi.

40⁵. ABKMning subsidiya ajratish toʻgʻrisidagi buyrugʻining nusxasini olgan muassis belgilangan tartibda birlashma tashkil etadi.

40⁶. Muassis belgilangan tartibda birlashma tashkil etganidan soʻng, ABKMga yozma ravishda davlat xizmatlari markazida roʻyxatga olingan birlashmaning aʼzolari ulushi koʻrsatilgan ustav, birlashmaning asosiy rekvizitlari, aʼzolarning mulkiy payi toʻgʻrisidagi guvohnoma nusxalarini taqdim etadi.

40⁷. ABKM 2 ish kuni muddatida birlashma ustav fondiga har bir oila boshligʻining ulushi sifatida kiritish uchun birlashmaning bankdagi hisob raqamiga bazaviy hisoblash miqdorining 10 baravari miqdorida subsidiya ajratadi hamda birlashma raisi (muassis) va oila boshligʻi yozma ravishda xabardor qilinadi.

40⁸. Qishloq xoʻjaligi birlashmalari ustav fondiga (jamgʻarmasiga) ulush sifatida kiritish uchun subsidiya bitta oilaga faqat bir marotaba ajratiladi.”.

6. Mazkur oʻzgartirish va qoʻshimchalar Oʻzbekiston Respublikasi Iqtisodiyot va sanoat vazirligi hamda Moliya vazirligi bilan kelishilgan.