Oʻzbekiston Respublikasi Vazirlar Mahkamasining 2003-yil 31-yanvardagi 54-son qarori bilan tasdiqlangan “Transport vositalarini majburiy texnik koʻrikdan oʻtkazish toʻgʻrisida”gi Nizomiga asosan tuman hududidagi yuridik va jismoniy shaxslarga tegishli boʻlgan avtomototransport vositalarini 2012-yilda majburiy texnik koʻrikdan oʻtkazish hamda viloyat hokimligining 2012-yil 10-fevraldagi 03-05/004-sonli yigʻilish bayonnomasi ijrosini taʼminlash maqsadida qaror qilaman:

1. Viloyat hokimiligining 2012-yil 10-fevraldagi “Oʻzbekiston Respublikasi Vazirlar Mahkamasining 2003-yil 31-yanvardagi “Transport vositalarini majburiy texnik koʻrikdan oʻtkazish tartibi toʻgʻrisidagi Nizomni tasdiqlash haqida”gi 54-sonli qarori talablarining bajarilishi toʻgʻrisida”gi 03-05/004-sonli yigʻilish bayonnomasi rahbarlik va ijro uchun qabul qilinsin.

2. Tuman hududidagi barcha yuridik va jismoniy shaxslarga, shu jumladan xorijiy yuridik va jismoniy shaxslarga tegishli boʻlgan va belgilangan tartibda Davlat yoʻl harakati xavfsizligi xizmati (DYHXX) organlaridan roʻyxatdan oʻtkazilgan transport vositalari 2012-yilda majburiy texnik koʻrikdan oʻtkazilsin.

3. Transport vositalari quyidagi davriylikka muvofik texnik koʻrikdan oʻtkazilsin;

a) Tijorat asosida yoʻlovchilar tashish uchun foydalaniladigan yengil avtomobillar, avtobuslar, mikroavtobuslar va oʻtiriladigan joylar soni 8 ta va undan ortiq boʻlgan (haydovchining oʻrnidai tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ulardagi tirkamalar — bir yilda ikki marta;

b) ishlab chiqarilganiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (mazkur bandning “a” kichik bandida koʻrsatilgan transport vositalaridan tashqari) ikki yilda bir marta;

v) ishlab chiqarilgan yilini hisobga olgan holda ishlab chiqarilganiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari (mazkur bandning “a” kichik bandida koʻrsatilgan transport vositalaridan tashqari) bir yilda bir marta;

g) Tirkamlar koʻrikka transport vositasi shatakli transport vositalari uchun belgilangan muddatlarda taqdim etilsin.

Transport vositalari DYXXX organlarida roʻyxatdan oʻtkazilgan kundan boshlab ulardan foydalanishning birinchi yili mobaynida transport vositalari texnik koʻrikdan oʻtkazilmaydi (mazkur bandning “a” kichik bandida koʻrsatilganlardan tashqari).

4. Mazkur qarorning 2-bandi “a” kichik bandida koʻrsatilgan transport vositalarining texnik koʻrigi:

birinchi marta — 1-martdan 30-iyungacha;

ikkinchi marta — 1-sentabrdan 31oktyabrgacha oʻtkazilsin.

Yuridik shaxslarga qarashli boʻlgan transport vositalarining texnik koʻrigi:

1-martdan 30-iyungacha oʻtkazilsin.

Jismoniy shaxslarga qarashli boʻlgan transport vositalarining texnik koʻrigi:

1-yanvardan 31-avgustgacha oʻtkazilsin.

Texnik koʻrigi belgilangan muddatda oʻtkazish tuman Ichki Ishlar boʻlimining yoʻllarda harakatlanish xavfsizligi boʻlinmasi (E. Toʻychiyev) va tuman mudofaa ishlari boʻyicha boʻlimi (A. Baratov) zimmasiga yuklatilsin.

Mazkur qarorning 3-bandi “a” kichik bandida koʻrsatilgan transport vositalari ikkinchi marta texnik koʻrikdan oʻtkazilganligi uchun yigʻim undirilmaydi.

Birinchi (oldingi) texnik koʻrikdan nosoz deb topilgan transport vositalari takroriy texnik koʻrikdan oʻtkazilganligi uchun belgilangan miqdorda yigʻim undiriladi.

5. Mulkchilik shaklidan qatʼiy nazar tuman hududida joylashgan barcha tashkilot, korxona va xoʻjalik rahbarlariga, foydalanishda boʻlgan transport vositalarini texnik koʻrikdan oʻtkazish davomida shu korxona va tashkilotda ishlovchi xodimlarning shaxsiy transport vositalarini ham birgalikda texnik koʻrikdan oʻtkazish uchun xodimlarning roziligi bilan tegishli toʻlovlarni yaʼni sugʻurta, texnik koʻrik, ekologiya taloni uchun toʻlovlarini oylik maoshlaridan ushlab qolib, tegishli hisob raqamlariga oʻtkazish vazifasi yuklatilsin.

6. 2012-yilgi davlat texnik koʻrigini uyushqoqlik bilan sifatli oʻtkazish boʻyicha tumanning maxsus komissiyasi tarkibi ilovaga* muvofiq tasdiqlansin.

Tuman hududida Davlat texnik koʻrigini sifatli va belgilangan muddatlarda. oʻtkazish uchun yetarlicha muhandis va texnik xodimlar hamda mutaxassislar bilan birgalikda soliq inspeksiyasi, davlat sugʻurta idoralari vakillari va mudofaa ishlari boʻlimining xodimlari ishtirok etilishini taminlash hamda Oʻzbekiston Respublikasi Vazirlar Mahkamasining 2006-yil 2-avgustdagi 156-sonli qarori talablariga asosan yoʻlovchi tashuvchi avtotransport vositalari haydovchilarining bir yilda bir marta 30 soatlik dastur asosida mashgʻulot oʻtishlari qattiq nazorat ostiga olinsin.

avtoxoʻjaliklar, korxona va tashkilotlar rahbarlaridan hamda shaxsiy avtotransport egalaridan ularga tegishli boʻlgan transport vositalarining texnik holatini yaxshilashda ularning qayta jihozlanganligi, yani qoʻshimcha yonilgʻi idishi, yoxud boshqa turdagi dvigatel oʻrnatilganligi, avtobus va mikroavtobuslarning oʻrindiqlarini qonun doirasida boʻlishligi hamda gaz yonilgʻisida qayta jihozlanganligiga eʼtibor qaratib, belgilangan muddatda oʻtkazilishini taʼminlashni nazorat ostiga olish;

hokimlik yigʻilishlarida ichki ishlar, mudofaa boʻlimlarining, tashkilot, korxona va xoʻjaliklarning yillik texnik koʻrigi natijalari boʻyicha hisobotlarni hamda yoʻl harakati xavfsizligini taminlash, transport vositalarini texnik holatini yaxshilash chora-tadbirlarini yetarli darajada amalga oshirmagan rahbarlarga nisbatan belgilangan tartibda maʼmuriy va intizomiy choralar qoʻllash masalasini koʻrib chikish;

aholiga texnik xizmat koʻrsatish tashkiloti va uning joylardagi boʻlinmalaridan texnik koʻrik oʻtkazish davomida xodimlarni qatnashishini taminlash.

7. Shaxsiy avto ulov vositalari egalaridan undirib olinadigan transport soligʻi hamda majburiy transport sugʻurta toʻlovlarini qonuniy ravishda oʻz vaqtida undirib olish ishlari tuman davlat soliq boʻlimi (R. Meliboyev) tuman Agrosugʻurta idorasi (Z. Kamolova)ga hamda mahalla va qishloq fuqarolar yigʻinlari raislari zimmasiga yuklatilsin.

8. Tuman avtomotohavaskorlar jamiyati (N. Jumayev), Oʻzbekiston mudofaaga koʻmaklashuvchi “Vatanparvar” tashkiloti (A. Eshboyev), tuman ichki ishlar boʻlimining yoʻl harakati xavfsizligi boʻlinmasi (E. Tuychiyev) Oʻzbekiston Respublikasi Vazirlar Mahkamasining 2006-yil 2-avgustdagi 156-sonli qaroriga asosan yoʻlovchilar tashish bilan shugʻullanuvchi transport vositala haydovchilarini bir yilda bir marta yul harakati qoidalari va yul harakat xavfsizligi fanidan 30 soatlik dastur asosida mashgʻulot oʻtishlari uchun shart-sharoitlar yaratgan holda toʻliq jalb etilishini taʼminlasinlar.

9. Texnik koʻrik oʻtkazish muddatlarida komissiya aʼzolarining oʻrtacha oylik maoshlari asosiy ish joylarida toʻliq saqlangan holda boshqa ishlardan ozod qilinsin.

10. Oʻtkazilgan texnik koʻrik natijalari boʻyicha har oy yakunida yozma ravishda taqdimnomalar kiritilsin hamda komissiya yigʻilishlarida muhokama etib borilsin.

11. Ushbu qaror ijrosini nazorat qilish tuman hokimining birinchi oʻrinbosari F. Umarov zimmasiga yuklatilsin.