Oʻzbekiston Respublikasining “Oʻzbekiston Respublikasining Markaziy banki toʻgʻrisida”gi, “Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisida”gi qonunlariga va Oʻzbekiston Respublikasi Prezidentining 2019-yil 21-maydagi PF-5723-son “Mehnatga haq toʻlash, pensiyalar va boshqa toʻlovlar miqdorlarini aniqlash tartibini takomillashtirish toʻgʻrisida”gi Farmoniga hamda Oʻzbekiston Respublikasi Prezidentining 2019-yil 23-iyuldagi PQ-4400-son “Mikromoliyaviy xizmatlar ommabopligini oshirish chora-tadbirlari toʻgʻrisida”gi qaroriga muvofiq Oʻzbekiston Respublikasi Markaziy banki Boshqaruvi va Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti qaror qiladi:

1. Oʻzbekiston Respublikasi Markaziy banki Boshqaruvi va Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamentining 2017-yil 17-apreldagi 343-V va 14-son qarori (roʻyxat raqami 2886, 2017-yil 23-may) (Oʻzbekiston Respublikasi qonun hujjatlari toʻplami, 2017-y., 21-son, 401-modda) bilan tasdiqlangan Tijorat banklarida jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish boʻyicha ichki nazorat qoidalariga ilovaga muvofiq oʻzgartirish va qoʻshimchalar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

1. 1-band quyidagi mazmundagi xatboshi bilan toʻldirilsin:

“uchinchi tomon — pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar.”.

2. 22-bandning “b” kichik bandida:

ikkinchi — oltinchi va toʻqqizinchi xatboshilaridagi “eng kam ish haqi” degan soʻzlar “bazaviy hisoblash” degan soʻzlar bilan almashtirilsin;

yettinchi xatboshi “sotib olinishi” degan soʻzlardan keyin “(rezident jismoniy shaxslar tomonidan ekvivalenti 100 AQSh dollaridan oshgan miqdorda naqd chet valyutasi sotib olinganda)” degan soʻzlar bilan toʻldirilsin.

3. Quyidagi mazmundagi 23²-band bilan toʻldirilsin:

“23². Tijorat banklari mazkur Qoidalarning 23-bandi ikkinchi — toʻrtinchi xatboshilarida nazarda tutilgan mijozlarni lozim darajada tekshirish boʻyicha chora-tadbirlarni amalga oshirgan uchinchi tomonlarning lozim darajada tekshirish natijalariga ishonishlari mumkin. Mazkur hollarda mijozlarni lozim darajada tekshirish natijalari boʻyicha soʻnggi javobgarlik tijorat banklarining zimmasida qoladi. Bunda tijorat banklari:

mijozlarni lozim darajada tekshirish boʻyicha chora-tadbirlar yuzasidan zarur boʻlgan maʼlumotlarni (elektron tizimlar orqali) kechiktirmasdan olish imkoniyatiga ega boʻlishi;

mijozlarni lozim darajada tekshirish boʻyicha chora-tadbirlar yuzasidan identifikatsiyalash maʼlumotlari va boshqa tegishli hujjatlar nusxasini soʻrov asosida kechiktirmasdan olish imkoniyatiga ega boʻlishi;

uchinchi tomon jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini moliyalashtirishga qarshi kurashish boʻyicha ichki nazorat qoidalari asosida ishlashiga ishonch hosil qilishlari kerak.

Tijorat banklari mazkur bandning ikkinchi — toʻrtinchi xatboshilarida nazarda tutilgan talablardan biriga rioya qilinmagan taqdirda, mijozlarni lozim darajada tekshirish boʻyicha chora-tadbirlarni mustaqil ravishda amalga oshirishi kerak.

Tijorat banklari mijoz bilan ish munosabatlariga kirishish toʻgʻrisidagi qarorni oʻz tavakkalchiliklaridan kelib chiqib, mustaqil ravishda qabul qiladi hamda mijozni lozim darajada tekshirish boʻyicha chora-tadbirlarni amalga oshirishga haqli.

Tijorat banklari shartnomada va (yoki) shartnoma ofertasida mijozlarni lozim darajada tekshirish boʻyicha chora-tadbirlar tijorat banklari tomonidan amalga oshirilishi mumkinligini koʻrsatishi lozim.”.

4. 26-bandi quyidagi tahrirda bayon etilsin:

“26. Tijorat banki tomonidan jismoniy shaxs — mijozni identifikatsiyalash shaxsni tasdiqlovchi hujjat (pasport yoki uning oʻrnini bosadigan hujjat) yoki mijozning biometrik maʼlumotlari asosida amalga oshiriladi. Bunda tijorat banki jismoniy shaxs — mijoz identifikatsiyasi:

shaxsni tasdiqlovchi hujjat (pasport yoki uning oʻrnini bosadigan hujjat) asosida amalga oshirilganda bunday hujjatning asli bilan tanishib chiqishi;

biometrik maʼlumotlar asosida amalga oshirilganda esa ushbu maʼlumotlarni Oʻzbekiston Respublikasi Ichki ishlar vazirligining axborot tizimi bilan verifikatsiya qilishi lozim.”.

5. 38-bandning beshinchi va oltinchi xatboshilaridagi “eng kam ish haqining 50 baravari miqdorigacha” degan soʻzlar “bazaviy hisoblash miqdorining 50 baravarigacha” degan soʻzlar bilan almashtirilsin.

6. 45-bandning toʻrtinchi xatboshisi “tomonidan amalga oshirilgan” degan soʻzlardan keyin “yoki tijorat banklari tomonidan biometrik maʼlumotlar asosida identifikatsiya qilingan, shuningdek uchinchi tomonlar amalga oshirgan mijozlarni lozim darajada tekshirish natijalariga tijorat banklarining ishongan” degan soʻzlar bilan toʻldirilsin.

7. 48-bandda:

oʻn uchinchi, oʻn beshinchi, oʻn oltinchi va oʻn toʻqqizinchi xatboshilardagi “eng kam ish haqining 500 baravari miqdoriga” degan soʻzlar “bazaviy hisoblash miqdorining 500 baravariga” degan soʻzlar bilan almashtirilsin;

oʻn yettinchi xatboshidagi “eng kam ish haqining 1000 baravari miqdoriga” degan soʻzlar “bazaviy hisoblash miqdorining 1000 baravariga” degan soʻzlar bilan almashtirilsin;

oʻn sakkizinchi xatboshi quyidagi tahrirda bayon etilsin:

“jismoniy shaxslarning foydasiga yuridik shaxslar yoki yakka tartibdagi tadbirkorlar hisobvaraqlaridan operatsiya amalga oshirilish kuniga belgilangan bazaviy hisoblash miqdorining 1000 baravariga teng yoki undan oshadigan summadagi pul mablagʻlarining dividend yoki daromad sifatida koʻchirilishi;”;

yigirmanchi xatboshi chiqarib tashlansin;

yigirma birinchi va yigirma ikkinchi xatboshilar tegishli ravishda yigirmanchi va yigirma birinchi xatboshilar deb hisoblansin;

yigirmanchi xatboshidagi “miqdori eng kam ish haqining” degan soʻzlar “bazaviy hisoblash miqdorining” degan soʻzlar bilan almashtirilsin;

yigirma birinchi xatboshi “oluvchining hisobvaragʻiga” degan soʻzlardan keyin “operatsiya amalga oshirilish kuniga belgilangan bazaviy hisoblash miqdorining 500 baravariga teng yoki undan oshadigan summada” degan soʻzlar bilan toʻldirilsin.

8. 49-bandda:

uchinchi, toʻrtinchi, yettinchi va oʻn beshinchi xatboshilardagi “eng kam ish haqining 500 baravari miqdoriga” degan soʻzlar “bazaviy hisoblash miqdorining 500 baravariga” degan soʻzlar bilan almashtirilsin;

oʻn toʻrtinchi xatboshidagi “eng kam ish haqining 20000 baravari miqdoriga” degan soʻzlar “bazaviy hisoblash miqdorining 20000 baravariga” degan soʻzlar bilan almashtirilsin.