O‘zbekiston Respublikasi Prezidentining “O‘zbekiston Respublikasida kosmik faoliyatni rivojlantirish to‘g‘risida” 2019-yil 30-avgustdagi PF-5806-son Farmoni ijrosini ta’minlash maqsadida Vazirlar Mahkamasi qaror qiladi:

1. Quyidagilar:

O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligi to‘g‘risidagi nizom 2-ilovaga muvofiq tasdiqlansin.

3. Belgilansinki:

“O‘zbekkosmos” agentligi o‘z faoliyatini boshqa davlat va xo‘jalik boshqaruvi organlaridan, mahalliy ijro etuvchi hokimiyat organlaridan mustaqil ravishda amalga oshiradi va O‘zbekiston Respublikasi Vazirlar Mahkamasiga bo‘ysunadi;

“O‘zbekkosmos” agentligining xodimlari mehnatga haq to‘lash shartlari bo‘yicha Vazirlar Mahkamasining “Davlat hokimiyati va boshqaruvi organlari, sud organlari va notarial idoralar xodimlari mehnatiga haq to‘lashning tarif setkasini joriy etish to‘g‘risida” 1996-yil 12-apreldagi 147-son qaroriga 3-ilovada ko‘rsatilgan vazirliklar va idoralar markaziy apparati xodimlariga tenglashtiriladi.

4. “O‘zbekkosmos” agentligi unga yuklatilgan vazifalarni bajarish uchun Agentlik ikki oy muddatda zarur nazariy bilim va amaliy ko‘nikmalarga ega bo‘lgan yuqori malakali mutaxassislar bilan to‘ldirilishini ta’minlasin.

5. O‘zbekiston Respublikasi Moliya vazirligi “O‘zbekkosmos” agentligiga:

mazkur qarorga muvofiq “O‘zbekkosmos” agentligi faoliyatini tashkil etish bilan bog‘liq xarajatlarni moliyalashtirishga zarur mablag‘lar joriy yilda — O‘zbekiston Respublikasi Davlat budjetining 2019-yil parametrlari doirasida ajratilishini ta’minlasin, 2020-yildan boshlab esa ko‘rsatilgan maqsadlarga zarur budjet mablag‘lari har yili ajratilishini nazarda tutsin;

4 ta yengil, shu jumladan 1 ta navbatchi xizmat avtomobilini saqlashga limit belgilagan holda, xizmat avtotransport vositalarini xarid qilish;

“O‘zbekkosmos” agentligining asoslangan hisob-kitoblariga muvofiq moddiy-texnik bazani shakllantirish va Agentlik xodimlariga zarur shart-sharoitlar yaratish maqsadida zamonaviy asbob-uskunalar va axborot-kommunikatsiya texnologiyalarini xarid qilish uchun zarur mablag‘lar ajratilishini ta’minlasin.

9. Toshkent shahar hokimligi O‘zbekiston Respublikasi davlat aktivlarini boshqarish agentligi bilan birgalikda “O‘zbekkosmos” agentligini joylashtirish bo‘yicha ikki hafta muddatda Vazirlar Mahkamasiga taklif kiritsin.

10. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi “O‘zbekkosmos” agentligini zarur aloqa turlari, shu jumladan hukumat aloqasi bilan belgilangan tartibda ta’minlasin.

11. O‘zbekiston Respublikasi Tashqi ishlar vazirligi “O‘zbekkosmos” agentligining buyurtmanomalariga binoan unga yuklangan vazifalarni amalga oshirish doirasida jalb etiladigan xorijiy mutaxassislarga kirish vizalari konsullik va boshqa yig‘imlar undirilmasdan belgilangan tartibda rasmiylashtirilishini ta’minlasin.

12. O‘zbekiston Respublikasi Ichki ishlar vazirligi “O‘zbekkosmos” agentligi buyurtmanomalariga binoan unga yuklangan vazifalarni amalga oshirish doirasida jalb etiladigan xorijiy mutaxassislarga davlat boji undirilmasdan ko‘p martalik kirish vizalari berilishi va ularning muddati uzaytirilishini, shuningdek, ularning vaqtincha turgan joyi bo‘yicha ro‘yxatga olinishini va muddati uzaytirilishini belgilangan tartibda ta’minlasin.

13. “O‘zbekkosmos” agentligi hamda O‘zbekiston Respublikasi Axborot texnologiyalari va kommunikatsiyalarini rivojlantirish vazirligi boshqa manfaatdor vazirlik va idoralar bilan birgalikda O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligining budjetdan tashqari Kosmik tarmoqni rivojlantirish jamg‘armasi to‘g‘risidagi nizomning ikki oy muddatda ishlab chiqilishi va tasdiqlanishini ta’minlasinlar.

14. O‘zbekiston Respublikasi Hukumatining 3-ilovaga muvofiq ayrim qarorlariga qo‘shimchalar kiritilsin.

15. Vazirliklar va idoralar o‘zlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

16. Mazkur qarorning bajirilishini nazorat qilish O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligi hamda O‘zbekiston Respublikasi Vazirlar Mahkamasining Telekommunikatsiyalar, IT-texnologiyalar va innovatsion faoliyatni rivojlantirish, axborot xavfsizligini ta’minlash masalalari kotibiyatiga yuklansin.

1. Ushbu Nizom O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligining (keyingi o‘rinlarda “O‘zbekkosmos” agentligi deb ataladi) maqomi, funksiyalari, maqsadlari, vazifalari, huquqlari, faoliyatining tashkiliy asoslari va majburiyatlarini belgilaydi.

2. “O‘zbekkosmos” agentligi kosmik tadqiqotlar va texnologiyalar sohasida yagona davlat siyosati va strategik yo‘nalishlarni ishlab chiqish hamda amalga oshirish uchun mas’ul davlat boshqaruvi organi hisoblanadi.

3. “O‘zbekkosmos” agentligi o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalarining qarorlariga, O‘zbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga hamda boshqa qonun hujjatlariga amal qiladi.

4. “O‘zbekkosmos” agentligining o‘z vakolatlari doirasida qabul qilingan qarorlari davlat va xo‘jalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, fuqarolar tomonidan bajarilishi majburiy hisoblanadi.

5. “O‘zbekkosmos” agentligi davlat muassasasi shaklidagi yuridik shaxs hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga, O‘zbekiston Respublikasi Moliya vazirligining G‘aznachiligida g‘azna hisobvaraqlariga, bank hisobraqamlariga, shu jumladan xorijiy valyutadagi hisobraqamlariga ega bo‘ladi.

6. “O‘zbekkosmos” agentligining rasmiy nomi:

a) davlat tilida:

to‘liq — O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligi;

qisqartirilgani — “O‘zbekkosmos” agentligi;

b) ingliz tilida:

to‘liq — The Space Research and Technology Agency under the Cabinet of Ministers of the Republic of Uzbekistan;

qisqartirilgani — “Uzbekspace” agency;

v) rus tilida:

to‘liq — Agentstvo kosmicheskix issledovaniy i texnologiy pri Kabinete Ministrov Respubliki Uzbekistan;

qisqartirilgani — Agentstvo “Uzbekkosmos”.

7. Quyidagilar “O‘zbekkosmos” agentligi faoliyatining asosiy vazifalari hisoblanadi:

kosmik tadqiqotlar va texnologiyalar sohasida yagona davlat siyosati va strategik yo‘nalishlarni ishlab chiqish va amalga oshirish;

O‘zbekiston Respublikasida kosmik tarmoqni rivojlantirishning davlat dasturlarini ishlab chiqish va amalga oshirish;

kosmik faoliyat, kosmik tadqiqotlar va texnologiyalar sohasida qonun hujjatlarini takomillashtirish bo‘yicha takliflar tayyorlash, shu jumladan normativ-huquqiy hujjatlar loyihalarini ishlab chiqish;

kosmik faoliyatning zarur darajada rivojlanishini ta’minlash, sohaga tegishli va u bilan bog‘liq ishlar bajarilishini, xizmatlar ko‘rsatishni tashkil qilish maqsadida kosmik faoliyat sohasidagi qonun hujjatlariga rioya etilishi bo‘yicha davlat nazoratini amalga oshirish;

kosmik tarmoq infratuzilmasi, kosmik tadqiqotlar va texnologiyalar, ilmiy tadqiqotlar, tajriba-konstruktorlik va innovatsiya ishlarini rivojlantirish bo‘yicha kompleks chora-tadbirlarni ishlab chiqish va amalga oshirish;

kosmik faoliyatning barcha yo‘nalishlari bo‘yicha kadrlarni, jumladan, yetakchi xorijiy oliy ta’lim muassasalarida tayyorlash, qayta tayyorlash va malakasini oshirishni tashkil etish;

stratosfera va uchuvchisiz boshqa uchish apparatlari, shuningdek, yerni masofadan turib zondlash va yo‘ldoshli aloqa kosmik apparatlarini qo‘llash orqali davlat organlariga vazifalarni hal etish samaradorligini oshirishga ko‘maklashish;

kosmik tadqiqotlar va texnologiyalar sohasida xalqaro hamkorlikni amalga oshirish;

xorijiy investitsiyalar va ilg‘or texnologiyalarni kosmik faoliyat sohasiga, shu jumladan davlat-xususiy sheriklik shartlari asosida jalb qilish maqsadida manfaatdor vazirliklar va idoralar bilan birgalikda xalqaro moliya institutlari, donor-mamlakatlar, kompaniyalar va banklar bilan hamkorlikni rivojlantirish;

kosmik va yo‘ldosh texnologiyalarni joriy etish bo‘yicha loyihalarni amalga oshirish uchun mahalliy tijorat tuzilmalari, ishlab chiqaruvchilar va moliya resurslarining keng jalb etilishini ta’minlash;

kosmik faoliyatning ayrim yo‘nalishlari tijoratlashtirilishini rag‘batlantirish;

kosmik suratlarni qayta ishlash va tahlil qilish orqali iqtisodiyot sohalarida qonun buzilishi holatlarini aniqlash;

davlat kosmik monitoringini amalga oshirish bo‘yicha dasturlarni ishlab chiqish va amalga oshirish;

sohaviy tegishliligi bo‘yicha vazirliklar va idoralar tomonidan amalga oshiriladigan monitoring jarayonlarida kosmik texnologiyalarni qo‘llash bo‘yicha takliflarni ishlab chiqish va ishlarni muvofiqlashtirish;

sohalarda vazirliklar va idoralar tomonidan kosmik texnologiyalar qo‘llanilishi darajasini monitoring qilish va joriy etilishini jadallashtirish.

8. “O‘zbekkosmos” agentligi kosmik faoliyatni rivojlantirish sohasida belgilangan vazifalarni bajarish doirasida quyidagi funksiyalarni amalga oshiradi:

kosmik sohasidagi faoliyat davlat siyosatining ustuvor yo‘nalishlari bo‘yicha takliflar tayyorlaydi, shu jumladan normativ-huquqiy hujjatlarni ishlab chiqadi;

kosmik tarmoqning tashkiliy-amaliy, moliya-resurs bazasini doimiy takomillashtirishga yo‘naltirilgan kosmik faoliyatning ustuvor yo‘nalishlari sohasida, jumladan, ilmiy-texnik va investitsiya siyosatini ishlab chiqish hamda amalga oshirish, shuningdek, kosmik infratuzilma obyektlarini yanada rivojlantirish va ularning xavfsiz faoliyat yuritishini ta’minlash bo‘yicha davlat siyosatini shakllantirish va samarali amalga oshirish bo‘yicha takliflar ishlab chiqadi;

kosmik faoliyat masalalari bo‘yicha normativ-huquqiy hujjatlar loyihalari, texnik reglamentlar, davlat standartlari, davlat va sohaga oid statistika hisoboti shakllari va “O‘zbekkosmos” agentligi vakolatiga taalluqli masalalar bo‘yicha boshqa idoralararo hujjatlarni tayyorlaydi va belgilangan tartibda kiritadi;

O‘zbekiston Respublikasi Fanlar akademiyasi va boshqa muassasalar bilan birgalikda kosmik faoliyat sohasida, shu jumladan raketa-kosmik texnologiyalar sohasida fundamental tadqiqotlar, ilmiy tadqiqotlar, tajriba-konstruktorlik va innovatsion ishlar loyihalarini ishlab chiqadi;

Axborot texnologiyalari va kommunikatsiyalarini rivojlantirish vazirligi bilan birgalikda axborot texnologiyalari kosmik kommunikatsiyalaridan foydalanish sohasida ilmiy-tadqiqot va tajriba-konstruktorlik ishlarining ustuvor yo‘nalishlarini belgilaydi, tarmoq dasturiy mahsulotlarining ishlab chiqilishini va joriy etilishini tashkil etadi;

boshqa tegishli tashkilotlar bilan birgalikda milliy telekommunikatsiya yo‘ldoshining ishga tushirilishini nazarda tutuvchi O‘zbekiston Respublikasining kosmik aloqa kompleks tizimi loyihasini ishlab chiqadi va amalga oshiradi;

iqtisodiyot, fan, mudofaa va xavfsizlikning muhim sohalari faoliyatining samaradorligini oshirish maqsadida O‘zbekiston Respublikasi hududini kosmos orqali masofadan zondlash, Yerni masofadan zondlash milliy yo‘ldoshining ishga tushirilishini ta’minlaydi;

xalqaro talablarga mos keluvchi kosmik tarmoq obyektlarini qurish va ulardan foydalanish bo‘yicha qisqa muddatli va uzoq muddatli dasturlarni ishlab chiqadi;

O‘zbekiston Respublikasining iqtisodiyot, fan, mudofaa va xavfsizlik bo‘yicha turli sohalar manfaatlarida zamonaviy yo‘ldoshli navigatsiya tizimidan foydalanadi;

O‘zbekiston Respublikasining mudofaa qobiliyati va xavfsizligi uchun mas’ul tuzilmalarning maxsus buyurtmalariga binoan ishlarni amalga oshiradi;

O‘zbekiston Respublikasi iqtisodiyotining turli tarmoq sohalarida kosmik tarmoq yutuqlari va imkoniyatlaridan foydalanishni kengaytirishga ko‘maklashadi;

fundamental va amaliy fanlarni rivojlantirish manfaatlarida Yer, kosmik fazo, sayyoralar va Quyoshni tadqiq etishni tashkil etadi;

O‘zbekiston Respublikasi hududi ustidagi fizik jarayonlarni va atmosferaning kimyoviy tarkibini o‘rganish uchun cho‘llanish, tuproqlarning sho‘rlanish jarayonlarini hisobga olib, geofizik raketalar va zond-sharlarni qo‘llash dasturlarini ishlab chiqadi;

telekommunikatsiyalar, Yerni masofadan zondlash, mudofaa va xavfsizlikning alohida vazifalarini hal qilish uchun xorijiy tajribani hisobga olib, stratosfera uchish apparatlarini (dirijabllarni) o‘rganish va ulardan foydalanish ishlarini amalga oshiradi;

uchuvchisiz boshqariladigan uchish apparatlari asosida yerning lokal uchastkalarini tezkor yuqori aniqlikda masofadan zondlash, O‘zbekiston Respublikasining kosmik va iqtisodiyotning boshqa tarmoqlari manfaatlarida muqobil energetika texnologiyalarining qo‘llanishini tashkil etadi;

yagona kadrlar siyosatini ishlab chiqadi va amalga oshirishni ta’minlaydi hamda “O‘zbekkosmos” agentligi va uning idoraviy mansub bo‘linmalari xodimlarining mehnatiga haq to‘lash va ularni ijtimoiy muhofaza qilish tizimini shakllantiradi;

o‘ta zararli sharoitlarda ishlaganlik uchun qo‘shimcha to‘lov hajmini belgilash bo‘yicha takliflarni ishlab chiqadi va asoslaydi, sohada mehnat muhofazasi bo‘yicha ishlarni muvofiqlashtiradi;

o‘z vakolatlari doirasida kosmik texnika va texnologiyalardan foydalanish sohasida normalar va qoidalarni ishlab chiqadi;

quyidagi yo‘nalishlarda kosmik texnologiyalarni qo‘llovchi tashkilotlarning faoliyatini litsenziyalaydi: ilmiy-tadqiqot va tajriba konstruktorlik ishlari, loyiha-konstruktorlik va texnologik ishlanmalar, kosmik texnikaning sinov, tajriba va tijorat namunalarini tayyorlash va sinovdan o‘tkazish, oxirgi iste’molchilarga kosmik xizmatlar ko‘rsatish;

kosmik tadqiqotlar va texnologiyalar sohasida kadrlarni tayyorlash, jumladan, yetakchi chet el oliy ta’lim va ilmiy-tadqiqot muassasalarida va o‘quv markazlarida ularning malakasini oshirish bo‘yicha zarur chora-tadbirlarni ta’minlaydi;

texnologiyalarning rivojlanish tendensiyalari va xorijiy tajribani hisobga olib, kosmik texnologiyalar sohasida mutaxassislarni tayyorlash bo‘yicha ta’lim standartlarini ishlab chiqishda ishtirok etadi;

yirik xalqaro kosmik loyihalar doirasida, shu jumladan xalqaro boshqariladigan kosmik stansiyalar va sayyoralararo ekspeditsiyalar faoliyatida ishtirok etish uchun kosmonavtlarni (astronavtlarni) tayyorlash bo‘yicha hamkorlik maqsadida xorijiy davlatlarning tashkilotlari va kompaniyalari bilan belgilangan tartibda hamkorlik qiladi;

kosmik tarmoqqa investitsiya kiritishga yuridik va jismoniy shaxslarni jalb etish ishlarini amalga oshiradi.

9. “O‘zbekkosmos” agentligi o‘ziga yuklangan vazifalar va funksiyalarni bajarish uchun quyidagi huquqlarga ega:

qonun hujjatlarida belgilangan tartibda davlat va xo‘jalik boshqaruvi organlari, joylardagi ijro etuvchi hokimiyat organlari, korxonalar va tashkilotlardan “O‘zbekkosmos” agentligi vakolatiga kiradigan masalalarni hal qilish uchun zarur bo‘lgan materiallar va ma’lumotlarni so‘rash va olish;

vakolatiga kiradigan masalalar bo‘yicha zarur statistik axborotni davlat statistika organlaridan bepul olish;

o‘z vakolati doirasida, shu jumladan boshqa davlat organlari bilan birgalikda davlat organlari va tashkilotlari, jismoniy va yuridik shaxslar bajarishi majburiy bo‘lgan normativ-huquqiy hujjatlarni qabul qilish;

kosmik faoliyat sohasida davlat siyosatini amalga oshirish masalalarida davlat, xo‘jalik boshqaruvi organlari va mahalliy ijro etuvchi hokimiyat organlarining faoliyatini belgilangan tartibda muvofiqlashtirish;

kosmik faoliyat sohasida bajariladigan davlat va tijorat loyihalari va dasturlarida ishtirok etish;

davlat va xo‘jalik boshqaruvi organlari, mahalliy ijro etuvchi hokimiyat organlarining, shuningdek, xo‘jalik yurituvchi subyektlarning rahbarlari va mutaxassislarini jalb qilgan holda, “O‘zbekkosmos” agentligi vakolatiga kiradigan masalalar bo‘yicha belgilangan tartibda majlislar chaqirish;

kosmik faoliyat sohasida kadrlarni tayyorlash va xodimlarning malakasini oshirish uchun belgilangan tartibda idoraviy ilmiy va o‘quv muassasalarini yaratish;

kosmik faoliyat sohasidagi joriy va strategik vazifalarni, dolzarb muammolar va amaliy yutuqlarni yoritish uchun belgilangan tartibda noshirlik faoliyatini amalga oshirish va nashriyot organlarini ta’sis etish;

o‘zining tashkiliy tuzilmasi doirasida “O‘zbekkosmos” agentligining mulkini belgilangan tartibda bir bo‘linmadan boshqasiga beg‘araz foydalanish huquqi asosida topshirish;

binolarga xizmat ko‘rsatish, inventarlar va xo‘jalik jihozlari, avtotransport, aloqa vositalari, hisoblash, kompyuter va tashkiliy texnikani saqlash hamda ulardan foydalanish ishlarini bajarish, dasturiy ta’minotni xarid qilish uchun belgilangan tartibda shartnomalar tuzish;

qonun hujjatlariga muvofiq “O‘zbekkosmos” agentligining ijtimoiy infratuzilmasini tashkil etish va takomillashtirish, “O‘zbekkosmos” agentligi xodimlarini moddiy va ma’naviy rag‘batlantirish hamda mehnatini rag‘batlantirishning yagona tizimini shakllantirish;

“O‘zbekkosmos” agentligi vakolatiga kiradigan masalalar bo‘yicha Vazirlar Mahkamasiga, davlat va xo‘jalik boshqaruvi organlariga, mahalliy ijro etuvchi hokimiyat organlariga takliflar kiritish;

“O‘zbekkosmos” agentligi vakolatiga kiradigan masalalar bo‘yicha xorijiy davlatlarda, xalqaro va xorijiy tashkilotlar, forumlarda va maydonlarda O‘zbekiston Respublikasi manfaatlarini belgilangan tartibda ifoda etish;

“O‘zbekkosmos” agentligi faoliyati sohasiga taalluqli masalalarni ishlab chiqish uchun ilmiy va boshqa tashkilotlar, olimlar va mutaxassislarni belgilangan tartibda jalb qilish;

kosmik faoliyatni rivojlantirish masalalari bo‘yicha xorijiy mamlakatlar va xalqaro tashkilotlar bilan xalqaro shartnomalar loyihalarini kelishish va O‘zbekiston Respublikasi Vazirlar Mahkamasiga kiritish;

“O‘zbekkosmos” agentligi va idoraviy mansub tashkilotlar mutaxassislarini tajriba orttirish, malaka oshirish, xalqaro konferensiyalar, biznes-forumlar va boshqa yo‘nalishdagi tadbirlarda ishtirok etish uchun xorijiy davlatlarga belgilangan tartibda yuborish;

“O‘zbekkosmos” agentligi va idoraviy mansub tashkilotlarda ishlash uchun kosmik texnologiyalar bo‘yicha xorijlik yetakchi mutaxassislarini belgilangan tartibda shartnoma asosida jalb qilish;

“O‘zbekkosmos” agentligi vakolatiga taalluqli masalalar bo‘yicha xorijiy davlatlar, xalqaro va xorijiy tashkilotlar, ilmiy-tadqiqot institutlarining vakillari bilan belgilangan tartibda muzokaralar o‘tkazish;

zarur bo‘lgan hollarda, tegishli sohaning olimlari va mutaxassislaridan normativ-huquqiy hujjatlarni ishlab chiqish uchun vaqtincha ishchi guruhlarni tashkil qilish, boshqa vazirliklar, idoralar va tashkilotlardan mutaxassislar va ekspertlarni ushbu ishga shartnoma asosida jalb etish;

idoraviy mansub tashkilotlarda mehnatni muhofaza qilish va xavfsizlik texnikasi bo‘yicha ishlarni muvofiqlashtirish;

ushbu Nizomda belgilangan maqsad va vazifalarga erishish uchun yo‘naltirilgan va qonun hujjatlari bilan taqiqlanmagan faoliyatning boshqa turlarini amalga oshirish.

10. “O‘zbekkosmos” agentligi:

“O‘zbekkosmos” agentligiga yuklangan vazifalar va funksiyalar samarali bajarilishi, shuningdek, kosmik tarmoqni rivojlantirish sohasidagi davlat siyosati samarali amalga oshirilishi;

respublikada kosmik faoliyatni rivojlantirish bo‘yicha zarur choralar ko‘rilishi;

kosmik tarmoq sohasida texnik tartibga solish bo‘yicha normativ hujjatlar talablariga rioya etilishi yuzasidan tizimli nazorat amalga oshirilishi;

O‘zbekiston Respublikasi Prezidenti va Hukumati topshiriqlarining o‘z vaqtida, to‘liq va sifatli bajarilishi, rivojlanishning uzoq muddatli, o‘rta muddatli va yillik dasturlari ishlab chiqilishi, ularning amalga oshirilishi va keyinchalik tizimli monitoring qilinishini ta’minlash;

kosmik tarmoq uchun oliy va maxsus kasb-hunar ma’lumotiga ega yuqori malakali kadrlarni tayyorlash, soha xodimlarini qayta tayyorlash va malakasini oshirish, shuningdek, ularning mehnatini rag‘batlantirish mexanizmlari takomillashtirilishi;

“O‘zbekkosmos” agentligining faoliyati bilan bog‘liq prognoz ko‘rsatkichlariga erishish doirasida uning ishlari sifatli tashkil etilishi;

O‘zbekiston Respublikasi Vazirlar Mahkamasi va Prezidenti Administratsiyasiga kiritiladigan loyihalar sifatli ishlab chiqilishini tashkil qilish, normativ-huquqiy hujjatlar va boshqa hujjatlar, shuningdek, “O‘zbekkosmos” agentligi tomonidan qabul qilinadigan qarorlarni amalga oshirishning yakuniy natijalariga erishish;

kosmik tarmoqni rivojlantirish bo‘yicha dasturlar, tadbirlar rejalari, “yo‘l xaritalari” va boshqa dasturiy hujjatlar o‘z vaqtida va samarali amalga oshirilishi uchun mas’uldir.

11. Quyidagilar “O‘zbekkosmos” agentligi bosh direktorining asosiy funksional vazifalari hisoblanadi:

O‘zbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya etish va ularni bajarish;

“O‘zbekkosmos” agentligi faoliyatiga umumiy rahbarlik qilish, “O‘zbekkosmos” agentligiga O‘zbekiston Respublikasi Prezidenti hujjatlari, Vazirlar Mahkamasi qarorlari va boshqa qonun hujjatlari bilan yuklangan vazifalar va funksiyalarning bajarilishini tashkil qilish;

“O‘zbekkosmos” agentligi faoliyatini yanada takomillashtirish bo‘yicha O‘zbekiston Respublikasi Prezidenti hujjatlari, Vazirlar Mahkamasi qarorlari bilan tasdiqlangan kompleks dasturlar va tadbirlar bajarilishini chuqur va tanqidiy tahlil qilish;

“O‘zbekkosmos” agentligining faoliyat sohasiga kiradigan masalalar bo‘yicha O‘zbekiston Respublikasi Prezidenti Administratsiyasining tegishli bo‘linmalari va Vazirlar Mahkamasi kotibiyatlari, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida masalalarni ko‘rib chiqishda ishtirok etish;

O‘zbekiston Respublikasi Prezidenti, O‘zbekiston Respublikasining Bosh vaziri va uning o‘rinbosarlari, shuningdek, Bosh vazir maslahatchilarining topshiriqlarini o‘z vaqtida va sifatli bajarish;

“O‘zbekkosmos” agentligi faoliyatining ayrim uchastkalariga rahbarlik yuzasidan “O‘zbekkosmos” agentligi mansabdor shaxslarining vakolatlarini va shaxsiy javobgarlik darajasini belgilash;

“O‘zbekkosmos” agentligi faoliyati rejalashtirilishini tashkil etish, “O‘zbekkosmos” agentligi va mansabdor shaxslarning har chorakdagi ish rejalarini tasdiqlash, ularning bajarilishi yuzasidan nazoratni ta’minlash;

O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga hamda Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq O‘zbekiston Respublikasi Prezidenti va Vazirlar Mahkamasining hujjatlari va topshiriqlari bajarilishini tashkil etish va monitoringini yuritishning amaliy tizimini yaratish, “O‘zbekkomos” agentligi faoliyatida ijro intizomini mustahkamlash bo‘yicha kompleks amaliy chora-tadbirlarni amalga oshirish;

O‘zbekiston Respublikasining “Normativ-huquqiy hujjatlar to‘g‘risida”, “Qonunlar loyihalarini tayyorlash va ularni O‘zbekiston Respublikasi Oliy Majlisi Qonunchilik palatasiga kiritish tartibi to‘g‘risida”gi qonunlariga muvofiq “O‘zbekkosmos” agentligining qonun loyihalari bo‘yicha faoliyatini tashkil etish;

“Normativ-huquqiy hujjatlar to‘g‘risida”, “Qonunlar loyihalarini tayyorlash va ularni O‘zbekiston Respublikasi Oliy Majlisi Qonunchilik palatasiga kiritish tartibi to‘g‘risida”gi O‘zbekiston Respublikasi qonunlari, Vazirlar Mahkamasining 2019-yil 22-martdagi 242-son qarori bilan tasdiqlangan O‘zbekiston Respublikasi Vazirlar Mahkamasining Reglamenti (keyingi o‘rinlarda Vazirlar Mahkamasining Reglamenti deb ataladi) hamda O‘zbekiston Respublikasi Prezidentining 2018-yil 26-avgustdagi PF-5519-son Farmoni bilan tasdiqlangan O‘zbekiston Respublikasi Prezidenti Administratsiyasining Reglamenti (keyingi o‘rinlarda O‘zbekiston Respublikasi Prezidenti Administratsiyasining Reglamenti deb ataladi) talablariga qat’iy muvofiq ravishda faoliyat ko‘rsatish masalalari bo‘yicha normativ-huquqiy hujjatlar loyihalarining sifatli ishlab chiqilishini tashkil etish va ularning Vazirlar Mahkamasiga o‘z vaqtida kiritilishini ta’minlash;

“O‘zbekkosmos” agentligiga taqdim etilgan takliflarning va normativ-huquqiy hujjatlar loyihalarining to‘liq va har tomonlama ko‘rib chiqilishini ta’minlash, ular moliyaviy, iqtisodiy, huquqiy va boshqa xil ekspertizadan puxta o‘tkazilishini, shuningdek, ularning Vazirlar Mahkamasi Reglamentida va O‘zbekiston Respublikasi Prezidenti Administratsiyasining Reglamentida belgilangan muddatlarda kelishilishini (vizalanishini) ta’minlash;

“O‘zbekkosmos” agentligi xodimlarini lavozimga tayinlash va lavozimdan ozod etish;

“O‘zbekkosmos” agentligiga kadrlarni tanlash va joy-joyiga qo‘yish, ularning samarali faoliyati uchun zarur shart-sharoitlar yaratish, “O‘zbekkosmos” agentligi kadrlar zaxirasini shakllantirish;

“O‘zbekkosmos” agentligi xodimlarini tayyorlash, qayta tayyorlash va ularning malakasini oshirish tizimini tashkil etish;

“O‘zbekkosmos” agentligi faoliyatiga ishlarni tashkil etishning zamonaviy shakllari joriy etilishini ta’minlash;

davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish;

“O‘zbekkosmos” agentligi rahbarlari va xodimlarining xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy mas’uliyatlarini yanada oshirish va xorijiy delegatsiyalarning O‘zbekiston Respublikasiga tashriflarini tashkil etish choralari to‘g‘risida” 2017-yil 3-avgustdagi PQ-3170-son qarorlariga to‘liq muvofiq holda tashkil etish va amalga oshirish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablag‘lardan maqsadli va oqilona foydalanilishini ta’minlash;

“O‘zbekkosmos” agentligi xodimlari tomonidan “O‘zbekkosmos” agentligi xodimlarining odob-ahloq qoidalari talablariga rioya etilishini ta’minlash;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq “O‘zbekkosmos” agentligi tizimida korrupsiya va boshqa huquqbuzarliklarning oldini olish bo‘yicha choralar ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga imkon yaratadigan sabablar va sharoitlarni aniqlash, tahlil qilish, bartaraf etish;

“O‘zbekkosmos” agentligi xodimlari tomonidan bajarilishi shart bo‘lgan buyruqlarni qabul qilish, ko‘rsatmalar berish;

zarur bo‘lganda, boshqaruv xodimlarining belgilangan umumiy soni va mehnatga haq to‘lash fondi doirasida “O‘zbekkosmos” agentligining tashkiliy tuzilmasiga o‘zgartirishlar kiritish;

“O‘zbekkosmos” agentligining shtat jadvalini belgilangan tartibda tasdiqlash;

“O‘zbekkosmos” agentligi xodimlarini ko‘krak nishonlari va faxriy yorliqlar bilan taqdirlash to‘g‘risida belgilangan tartibda takliflar kiritish, “O‘zbekkosmos” agentligining alohida o‘rnak ko‘rsatgan xodimlariga O‘zbekiston Respublikasining faxriy unvonlarini berish va ularni davlat mukofotlari bilan mukofotlashga tavsiya etish;

“O‘zbekkosmos” agentligi xodimlarini qonun hujjatlari bilan belgilangan tartibda rag‘batlantirish va intizomiy javobgarlikka tortish masalalarini hal etish, shu jumladan ularning egallab turgan lavozimida bundan keyin qolishi maqsadga muvofiqligi to‘g‘risidagi masalalarni ko‘rib chiqish, ularning shaxsiy javobgarligini oshirish yuzasidan tizimli chora-tadbirlarni amalga oshirish;

“O‘zbekkosmos” agentligi mulkini qonun hujjatlarida belgilangan tartibda tasarruf etish.

12. Quyidagilar “O‘zbekkosmos” agentligi bosh direktori o‘rinbosarlarining va tarkibiy bo‘linmalari rahbarlarining asosiy funksional majburiyatlari hisoblanadi:

“O‘zbekkosmos” agentligi tarkibiy bo‘linmalarining xodimlari tomonidan O‘zbekiston Respublikasi Konstitutsiyasi va Qonunlari, shuningdek, boshqa normativ-huquqiy hujjatlar talablariga rioya qilinishini ta’minlash;

tarkibiy bo‘linmalar faoliyatiga bevosita rahbarlik qilish, ushbu bo‘linmalarga yuklangan vazifalar va funksiyalarning bajarilishini tashkil etish;

O‘zbekiston Respublikasi Prezidentining “O‘zbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun O‘zbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xo‘jalik boshqaruvi organlari, shuningdek barcha darajalardagi hokimliklar rahbarlarining shaxsiy javobgarligi to‘g‘risida” 2017-yil 11-apreldagi PQ-2881-son qaroriga va Vazirlar Mahkamasining “Ijro intizomini mustahkamlash chora-tadbirlari to‘g‘risida” 1999-yil 12-yanvardagi 12-son qaroriga muvofiq O‘zbekiston Respublikasi Prezidentining va Vazirlar Mahkamasining hujjatlari va topshiriqlari bajarilishini ta’minlash, ijro intizomini mustahkamlash bo‘yicha kompleks amaliy chora-tadbirlarni amalga oshirish, tarkibiy bo‘linmalar xodimlarining topshiriqlar o‘z vaqtida sifatli bajarilishi yuzasidan shaxsiy javobgarligini oshirish bo‘yicha choralar ko‘rish;

“O‘zbekkosmos” agentligining qarorlari, bosh direktorning buyruqlari va topshiriqlari o‘z vaqtida va sifatli bajarilishini ta’minlash;

tarkibiy bo‘linmalarning har chorakdagi ish rejalari ishlab chiqilishini ta’minlash, ularni tasdiqlashga kiritish, ularda ko‘rsatilgan vazifalar va tadbirlar o‘z vaqtida va sifatli bajarilishini ta’minlash;

tarkibiy bo‘limlarga yuklangan vazifalar bajarilishini muvofiqlashtirish va nazorat qilish;

tarkibiy bo‘linmalar faoliyati masalalari bo‘yicha qonun hujjatlarini takomillashtirish yuzasidan takliflar ishlab chiqish va ularni ko‘rib chiqish uchun “O‘zbekkosmos” agentligi rahbariyatiga kiritish;

“O‘zbekkosmos” agentligi tarkibiy bo‘linmalarida kadrlarni tanlash va joy-joyiga qo‘yishda bosh direktorga takliflar berish, ularning professionalligi, o‘z ishini bilishi, amaliy ish tajribasi, yuqori ishchanlik darajasi va ma’naviy-axloqiy sifatlari kafolatlanganligini ta’minlash, ularning kasbiy malakasini oshirish choralarini ko‘rish, tarkibiy bo‘linmalarda kadrlar zaxirasini shakllantirish;

tarkibiy bo‘linmalarda normativ-huquqiy hujjatlar loyihalarining sifatli ishlab chiqilishini tashkil etish, keyinchalik ularni ko‘rib chiqish uchun “O‘zbekkosmos” agentligi tarkibiy bo‘linmalarida tayyorlangan hujjatlar loyihalarini ko‘rib chiqish va ularga viza qo‘yishni tashkil etish, ularni “O‘zbekkosmos” agentligi rahbariyati tomonidan imzolash (viza qo‘yish), ularning Vazirlar Mahkamasi Reglamenti va O‘zbekiston Respublikasi Prezidenti Administratsiyasining Reglamenti talablariga qat’iy ravishda o‘z vaqtida Vazirlar Mahkamasiga kiritilishini ta’minlash;

o‘zining vakolati doirasida “O‘zbekkosmos” agentligiga taqdim etilgan normativ-huquqiy hujjatlar loyihalarini va takliflarni to‘liq va har tomonlama ko‘rib chiqish, ularning moliyaviy, iqtisodiy, huquqiy va boshqa ekspertizadan puxta o‘tkazish;

xizmat safarlarini O‘zbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari to‘g‘risida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy mas’uliyatlarini yanada oshirish va xorijiy delegatsiyalarning O‘zbekiston Respublikasiga tashriflarini tashkil etish choralari to‘g‘risida” 2017-yil 3-avgustdagi PQ-3170-son qarorlariga to‘liq muvofiq holda amalga oshirish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablag‘lardan maqsadli va oqilona foydalanilishini ta’minlash;

“O‘zbekkosmos” agentligi tarkibiy bo‘linmalari xodimlari faoliyatining samaradorligi va natijadorligini muntazam tanqidiy tahlil qilish, yig‘ilishlarda ularning shaxsiy hisobotlarini eshitish, kamchiliklarni bartaraf etish hamda ish samaradorligini oshirish yuzasidan zarur choralar ko‘rish;

“O‘zbekkosmos” agentligi xodimlarining odob-axloq qoidalari talablariga rioya etishlarini ta’minlash;

“Korrupsiyaga qarshi kurashish to‘g‘risida”gi O‘zbekiston Respublikasi Qonuni talablariga muvofiq “O‘zbekkosmos” agentligi tarkibiy bo‘linmalari tuzilmasida korrupsiya va boshqa huquqbuzarliklarning oldini olish choralarini ko‘rish, shuningdek, huquqni qo‘llash amaliyotini va qonun hujjatlarini takomillashtirishga doir takliflarni ishlab chiqish va amalga oshirish orqali ularning sodir etilishiga imkon yaratadigan sabablar va sharoitlarni aniqlash, tahlil qilish, bartaraf etish;

davlat siriga kiritilgan ma’lumotlar va maxfiy axborot bilan ishlashda qonun hujjatlari talablariga rioya qilish.

13. “O‘zbekkosmos” agentligining bosh direktori:

“O‘zbekkosmos” agentligiga yuklangan vazifa va funksiyalarning bajarilishi;

“O‘zbekkosmos” agentligining ushbu Nizomning 10-bandida nazarda javobgarlik sohalari bo‘yicha vazifalarning samarali bajarilishi;

ushbu Nizomning 11-bandida ko‘rsatilgan o‘z funksional majburiyatlarining sifatli bajarilishi uchun shaxsan javob beradi.

14. “O‘zbekkosmos” agentligi bosh direktorining o‘rinbosarlari va tarkibiy bo‘linmalari rahbarlari:

tegishli tarkibiy bo‘linmalarga yuklangan vazifalar va funksiyalarning o‘z vaqtida hamda sifatli amalga oshirilishi;

ushbu Nizomning 12-bandida ko‘rsatilgan o‘z funksional majburiyatlarining sifatli va to‘liq hajmda bajarilishi uchun shaxsan javob beradi.

15. “O‘zbekkosmos” agentligining bosh direktori, bosh direktor o‘rinbosarlari O‘zbekiston Respublikasi Vazirlar Mahkamasining qarori bilan lavozimga tayinlanadi va lavozimdan ozod etiladi.

“O‘zbekkosmos” agentligining bosh direktori o‘z maqomiga ko‘ra vazirning birinchi o‘rinborsariga, bosh direktorning o‘rinbosarlari esa vazir o‘rinbosarlariga tenglashtiriladi.

“O‘zbekkosmos” agentligining bosh direktori “O‘zbekkosmos” agentligining yakka ijro etuvchi organi hisoblanadi va uning joriy faoliyatiga rahbarlik qiladi;

“O‘zbekkosmos” agentligi bosh direktori va xodimlarining mehnatiga haq to‘lash shartlari qonun hujjatlarida belgilangan tartibda aniqlanadi.

16. Bosh direktor “O‘zbekkosmos” agentligi xodimlarining lavozim funksiyalarini belgilangan tartibda tasdiqlaydi va majburiyatlarini taqsimlaydi.

Bosh direktor qonun hujjatlariga muvofiq boshqa vakolatlarni ham amalga oshirishi mumkin.

Bosh direktor bo‘lmaganda, uning vakolatlarini vazifalar taqsimotiga muvofiq direktor o‘rinbosarlari bajarishadi.

17. Agentlik nizomlari bosh direktor tomonidan tasdiqlanadigan ekspertlar kengashi va boshqa maslahat organlarini tashkil etish huquqiga ega.

18. “O‘zbekkosmos” agentligi o‘z vazifalari va funksiyalarini amalga oshirish diorasida davlat va xo‘jalik boshqaruvi organlari, mahalliy davlat hokimiyati organlari va boshqa tashkilotlar bilan o‘zaro hamkorlik qiladi.

19. “O‘zbekkosmos” agentligi faoliyatining samaradorligi muntazam baholanishi zarur.

20. “O‘zbekkosmos” agentligi faoliyatining samaradorligi va natijadorligini baholash davriyligi “O‘zbekkosmos” agentligi faoliyatining samaradorligi va natijadorligini baholash mezonlari va ishchi indikatorlari asosida belgilanadi va O‘zbekiston Respublikasining Bosh vaziri tomonidan tasdiqlanadi.

21. “O‘zbekkosmos” agentligi faoliyati samaradorligini va natijadorligini baholash yakunlariga ko‘ra:

“O‘zbekkosmos” agentligining rahbarlari va xodimlariga nisbatan rag‘batlashtirish (mukofotlash) yoki intizomiy javobgarlikning tegishli choralarini ko‘rish;

aniqlangan kamchiliklarni bartaraf etish va “O‘zbekkosmos” agentligi faoliyatini yanada takomillashtirish choralari ko‘riladi.

22. “O‘zbekkosmos” agentligining faoliyati samaradorligini va natijadorligini baholash tartibi va metodikasi qonun hujjatlari bilan belgilanadi.

23. “O‘zbekkosmos” agentligining faoliyati O‘zbekiston Respublikasi Davlat budjeti mablag‘lari va qonun hujjatlariga muvofiq jalb etilgan budjetdan tashqari mablag‘lar, shuningdek, Kosmik tarmoqni rivojlantirish jamg‘armasi (keyingi o‘rinlarda Jamg‘arma deb ataladi) resurslari hisobidan moliyalashtiriladi.

24. Jamg‘arma mablag‘laridan Moliya vazirligida ro‘yxatga olinadigan xarajatlar smetasi asosida belgilangan tartibda foydalaniladi.

25. “O‘zbekkosmos” agentligi xodimlari amaldagi qonun hujjatlariga muvofiq moddiy rag‘batlantiriladi.

26. “O‘zbekkosmos” agentligi xodimlarining ish haqi lavozim maoshidan, mukofotlar, qo‘shimcha to‘lovlar, ustamalar va qonun hujjatlarida nazarda tutilgan rag‘batlantirish to‘lovlaridan iborat bo‘ladi.

27. “O‘zbekkosmos” agentligi xodimlarining lavozim maoshiga (rag‘batlantirish koeffitsiyenti hisobga olingan holda, lavozim maoshiga nisbatan koeffitsiyentlarda) ko‘p yillik xizmati uchun 1 yildan 3 yilgacha — 0,2; 3 yildan 5 yilgacha — 0,3; 5 yildan 10 yilgacha — 0,4; 10 yildan 15 yilgacha — 0,5; 15 yildan 20 yilgacha — 0,6; 20 yildan 25 yilgacha — 0,7; 25 yildan ortiq — 0,8 koeffitsiyentlarda har oylik ustamalar to‘lanadi.

28. “O‘zbekkosmos” agentligining bosh direktori O‘zbekiston Respublikasi Prezidenti va Vazirlar Mahkamasiga “O‘zbekkosmos” agentligi faoliyati natijalari to‘g‘risida muntazam hisobot beradi.

29. Faoliyat monitoringi va uni baholash yakunlari bo‘yicha “O‘zbekkosmos” agentligining mansabdor shaxslari va xodimlariga nisbatan yuklangan vazifalarni vijdonan va o‘z vaqtida bajarganlik uchun rag‘batlantirish yoxud yo‘l qo‘yilgan jiddiy kamchiliklar uchun egallab turgan lavozimidan ozod etishgacha bo‘lgan javobgarlik choralari ko‘riladi.

30. “O‘zbekkosmos” agentligi qonun hujjatlarida belgilangan tartibda qayta tashkil etiladi va tugatiladi.

1. Vazirlar Mahkamasining 2016-yil 7-oktabrdagi 336-son (O‘zbekiston Respublikasi QT, 2016-yil, 10-son, 80-modda) bilan tasdiqlangan Rahbarlari xodimlarni Toshkent shahri va Toshkent viloyatida doimiy propiska qilish to‘g‘risida iltimosnoma kiritishi mumkin bo‘lgan davlat hokimiyati organlari, davlat va xo‘jalik boshqaruvi organlari, respublika ahamiyatiga molik boshqa davlat tashkilotlari ro‘yxatiga quyidagi mazmundagi 73-band qo‘shilsin:

“73. O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligi”.

2. Vazirlar Mahkamasining 2006-yil 26-apreldagi 180-f-son farmoyishi bilan tasdiqlangan O‘zbekiston Respublikasi aeroportlarida rasmiy delegatsiyalarga xizmat ko‘rsatish zali to‘g‘risidagi nizomda:

a) “Toshkent” aeroportining VIP zalida bepul xizmat ko‘rsatilishi huquqiga ega bo‘lgan diplomatik missiyalar mansabdor shaxslari va xodimlarining toifalari ro‘yxatiga (1-ro‘yxat) quyidagi mazmundagi 6.5-kichik band qo‘shilsin:

“6.5. O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligining bosh direktori va uning o‘rinbosarlari”;

b) O‘zbekiston Respublikasi aeroportlarida Rasmiy delegatsiyalar zalida bepul xizmat ko‘rsatilishi huquqiga ega bo‘lgan diplomatik missiyalar mansabdor shaxslari va xodimlarining ro‘yxatiga (1-ro‘yxat) quyidagi mazmundagi 6.7-kichik band qo‘shilsin:

“6.7. O‘zbekiston Respublikasi Vazirlar Mahkamasi huzuridagi Kosmik tadqiqotlar va texnologiyalar agentligining bosh direktori va uning o‘rinbosarlari”.