Oʻzbekiston Respublikasi Vazirlar Mahkamasining 2004-yil 1-martdagi 96-sonli qarori bilan tasdiqlangan “Elektr energetikada nazorat boʻyicha “Oʻzdavenergonazorat” davlat inspeksiyasi toʻgʻrisidagi nizom”ga asosan va Oʻzbekiston Respublikasi Vazirlar Mahkamasining 2004-yil 5-fevraldagi “Mahsulotlar, xomashyo va materiallarning yuqori likvidli turlarini sotishning bozor mexanizmlarini joriy etishni davom ettirish toʻgʻrisida”gi 57-sonli qarorini hamda Oʻzbekiston Respublikasi Vazirlar Mahkamasining 2004-yil 1-noyabrdagi “Elektr energiyasidan foydalanganlik uchun hisob-kitob qilish mexanizmini tubdan takomillashtirish chora-tadbirlari toʻgʻrisida”gi 511-sonli qarorini bajarish Nazorat-rejasining 2-bandini ijro etish maqsadida, buyuraman:

1. “Isteʼmolchilarga elektr energiyasini yetkazib berish tartibi toʻgʻrisidagi nizom” ilovaga* muvofiq tasdiqlansin.

2. Mazkur buyruq Oʻzbekiston Respublikasi Adliya vazirligida davlat roʻyxatidan oʻtgan kundan boshlab 10 kundan keyin amalga kiritilsin.

3. Mazkur buyruq kuchga kirgan kunidan boshlab “Oʻzdavenergonazorat” inspeksiyasining 2004-yil 15-iyuldagi Oʻzbekiston Respublikasi Adliya vazirligida roʻyxatdan oʻtgan (2004-yil 29-iyul, roʻyxat raqami 1392 — Oʻzbekiston Respublikasi Qonun hujjatlari toʻplami, 2004-y. 30-son) “Isteʼmolchilarga elektr energiyasini yetkazib berish tartibi toʻgʻrisida nizom”ni tasdiqlash haqidagi 257-sonli buyrugʻi oʻz kuchini yoʻqotgan deb hisoblansin.

4. Ushbu buyruqning bajarilishi ustidan nazoratni oʻz zimmamda qoldiraman.