Oʻzbekiston Respublikasi Prezidentining “Istiqbolli boshqaruv kadrlarini tanlov asosida tanlab olishning zamonaviy tizimini yaratish chora-tadbirlari toʻgʻrisida” 2018-yil 30-maydagi PQ-3755-son qarorini ijro etish yuzasidan, istiqbolli boshqaruv kadrlari salohiyatidan samarali foydalanish hamda davlat va xoʻjalik boshqaruvi organlari, mahalliy davlat hokimiyati organlari va davlat boshqa organlarining kadrlar zaxirasini shakllantirish maqsadida Vazirlar Mahkamasi qaror qiladi:

1. Istiqbolli boshqaruv kadrlarini tanlash boʻyicha “Taraqqiyot” respublika tanlovi finali ishtirokchilari orasidan boshqaruv kadrlari zaxirasini shakllantirish tartibi toʻgʻrisidagi nizom ilovaga muvofiq tasdiqlansin.

2. Belgilab qoʻyilsinki:

davlat va xoʻjalik boshqaruvi organlari, mahalliy ijro etuvchi hokimiyat organlari (keyingi oʻrinlarda davlat tashkilotlari deb ataladi) tanlov finalining kamida uch nafar ishtirokchisi kadrlar zaxirasiga kiritilishini hamda tegishli davlat tashkilotining markaziy apparatida va tarkibiy boʻlinmalarida, qoidaga koʻra, boʻsh turgan rahbarlik lavozimlariga birinchi navbatda ishga joylashtirilishini taʼminlaydilar;

istiqbolli boshqaruv kadrlarini tanlash boʻyicha “Taraqqiyot” respublika tanlovining (keyingi oʻrinlarda tanlov deb ataladi) finali ishtirokchilariga, agar ular davlat tashkilotlariga ishga joylashsa, ishga qabul qilingan kunidan boshlab dastlabki 12 oy davomida tegishli davlat tashkiloti mablagʻlari hisobidan lavozim maoshining 10 foizi miqdorida ustama toʻlanadi.

3. Oʻzbekiston Respublikasi Bandlik va mehnat munosabatlari vazirligi, Innovatsion rivojlanish vazirligi, Oʻzbekiston Respublikasi Prezidenti huzuridagi Davlat boshqaruvi akademiyasi tanlov finali ishtirokchisi davlat tashkilotlariga ishga joylashtirilishi va kasbi boʻyicha faoliyati yuzasidan doimiy monitoring olib borilishini tashkil etsinlar.

4. Mazkur qarorning bajarilishini nazorat qilish Oʻzbekiston Respublikasi Bandlik va mehnat munosabatlari vaziri Sh.D. Kudbiyev va Oʻzbekiston Respublikasi Innovatsion rivojlanish vaziri I.Yu. Abduraxmonov zimmasiga yuklansin.

1. Ushbu Nizom davlat va xoʻjalik boshqaruvi organlari, mahalliy ijro etuvchi hokimiyat organlari (keyingi oʻrinlarda davlat tashkilotlari deb ataladi) tomonidan istiqbolli boshqaruv kadrlarini tanlash boʻyicha “Taraqqiyot” respublika tanlovi (keyingi oʻrinlarda tanlov deb ataladi) finali ishtirokchilari orasidan boshqaruv kadrlari zaxirasini (keyingi oʻrinlarda kadrlar zaxirasi deb ataladi) shakllantirish tartibini belgilaydi.

2. Tanlov finali ishtirokchilari fuqarolarning boshqa toifalari uchun nazarda tutilgan kadrlar zaxirasiga tanlov tartibotlaridan oʻtmagan holda davlat tashklotining kadrlar zaxirasiga kiritilishi lozim va boshqaruv xodimlarining tanlovdagi nominatsiya sohalariga mos keladigan boʻsh turgan, qoida tariqasida, rahbarlik lavozimiga tanlovsiz qabul qilinish (tayinlanish) huquqiga ega.

3. Istiqbolli boshqaruv kadrlarini tanlash boʻyicha “Taraqqiyot” respublika tanlovi oʻtkazilishini tashkil etuvchi Respublika komissiyasi (keyingi oʻrinlarda Respublika komissiyasi deb ataladi) tomonidan “taraqqiyot-tanlov.uz” maxsus veb-saytida tanlov natijalari joylashtirilgan kundan boshlab uch yildan ortiq vaqt mobaynida tanlov finali ishtirokchilari davlat tashkilotining kadrlar zaxirasida turishi mumkin emas.

4. Agar tanlovning finali ishtirokchisi biror-bir lavozimni egallagan holda davlat tashkilotining kadrlar zaxirasiga kiritilgan boʻlsa, oʻz nominatsiyasi sohasiga mos keladigan boʻsh oʻrin ochilsa, lavozimi oshishi uchun ustuvor huquqdan foydalanadi.

5. Tanlov finalining ishtirokchisi bir vaqtning oʻzida ikkitadan ortiq boʻlmagan davlat tashkilotining, shu jumladan, oʻzi ishlayotgan tashkilotning kadrlar zaxirasiga kiritilishi mumkin.

6. Tanlov finalining ishtirokchilari davlat tashkilotiga ishga joylashtirilsa, ularga ishga qabul qilingan kunidan boshlab dastlabki 12 oy mobaynida tegishli davlat tashkilotlarining mablagʻlari hisobidan lavozim maoshining 10 foizi miqdorida ustama toʻlanadi.

7. Tanlov finali ishtirokchilari ishtirokidagi kadrlar zaxirasi tuziladigan davlat tashkilotining lavozimlari roʻyxati har yili tashkilot kadrlar xizmati tomonidan 1-dekabrdan kechikmay quyidagi lavozimlar boʻyicha alohida aniqlanadi:

davlat tashkiloti rahbarlari (rahbar oʻrinbosarlari);

davlat tashkiloti tarkibiy boʻlinmalari rahbarlari (rahbarlar oʻrinbosarlari);

hududiy boʻlinmalar rahbarlari (rahbarlar oʻrinbosarlari);

davlat tashkiloti markaziy apparatining bosh boshqarmalari, boshqarmalari boʻlimlari, shuʼbalari boshliqlari (boshliqlarning oʻrinbosarlari) va bosh mutaxassislari.

Davlat tashkilotining kadrlar zaxirasi tuziladigan lavozimlar roʻyxati davlat tashkilotining rasmiy veb-saytida eʼlon qilinishi kerak, uning faoliyati tartibida oʻzgacha tartib nazarda tutilgan holatlar bundan mustasno.

8. Davlat tashkiloti:

“taraqqiyot-tanlov.uz” maxsus veb-saytiga joylashtirilgan Respublika komissiyasi maʼlumotlari asosida ushbu Nizomning 7-bandida nazarda tutilgan mazkur tashkilotdagi lavozimlarni egallaydigan kadrlar zaxirasiga kiritish uchun tanlov finali ishtirokchilarining shaxsiy roʻyxatini shakllantiradi;

ushbu Nizomning 7-bandida nazarda tutilgan lavozimlarni egallaydigan kadrlar zaxirasiga kiritish toʻgʻrisidagi shaxsiy taklifni (ofertani) yoki tegishli boʻsh oʻrinlar mavjud boʻlsa, taklif etilayotgan lavozimlarni va har bir lavozim boʻyicha mehnat shartnomasining asosiy shartlarini koʻrsatgan holda ishga joylashtirish (ishga qabul qilish) toʻgʻrisidagi taklifni final ishtirokchilarining manziliga yozma shaklda yuboradi.

9. Kadrlar zaxirasiga kiritish uchun tanlov finali ishtirokchisining yozma roziligini olgach davlat tashkiloti ushbu shaxsni kadrlar zaxirasiga kiritish toʻgʻrisida farmoyish beruvchi hujjatni (buyruq) chiqaradi va ushbu hujjatning nusxasini tanlov finali ishtirokchisiga yuboradi.

Tanlov finali ishtirokchisi davlat tashkilotidagi boʻsh lavozimga ishga joylashishga rozi boʻlsa, u bilan uch ish kunidan ortiq boʻlmagan muddatda, belgilangan tartibda mehnat shartnomasi tuziladi.

Tanlov finali ishtirokchisining yozma roziligi yoxud kadrlar zaxirasiga kirish va (yoki) boʻsh lavozimga ishga joylashish haqidagi taklifni rad etishi davlat tashkilotiga elektron shaklda yuborilishi mumkin.

Tanlov finali ishtirokchisi manziliga shaxsiy taklif (oferta) yuborilgandan keyin u ikki oy davomida kadrlar zaxirasiga kirishga va (yoki) boʻsh lavozimga ishga joylashishga yozma rozilik bermasa, u taklifni rad etgan deb baholanadi.

10. Kadrlar zaxirasiga kiritilgan tanlov finali ishtirokchilari jumlasiga kiradigan shaxslar bilan bevosita ish olib borish davlat tashkilotining kadrlar xizmati tomonidan amalga oshiriladi.

Davlat tashkilotining rahbari kadrlar zaxirasi bilan ishlashga umumiy rahbarlik qiladi va buning uchun javob beradi.

11. Kadrlar zaxirasi bilan ishlash davlat tashkilotining rahbari tomonidan tasdiqlanadigan xodimlarni kasbiy yuksaltirishga doir davlat tashkilotining dasturiga muvofiq amalga oshiriladi.

Davlat tashkilotining xodimlarni kasbiy yuksaltirishga doir dasturi professionalizmni oshirish va boshqaruv koʻnikmalarini rivojlantirish boʻyicha shaxsiy rejalar (keyingi oʻrinlarda shaxsiy reja deb ataladi) asosida shakllantiriladi. Shaxsiy rejada kadrlar zaxirasiga kiritilgan shaxs zarur nazariy va amaliy bilimlarni egallashi, boʻlajak ish xususiyatini chuqur oʻzlashtirishi, davlat tashkiloti oldida turgan vazifalarni hisobga olgan holda tashkilotchilik koʻnikmalarini ishlab chiqishi uchun imkon beradigan aniq tadbirlar nazarda tutilgan boʻlishi kerak.

Shaxsiy rejada quyidagi ish shakllaridan foydalanilishi mumkin:

boshqaruvni tashkil etishning zamonaviy usullarini, iqtisodiyot va qonun hujjatlarini oʻrganish;

davlat tashkilotining vazifalari doirasiga kiradigan ayrim masalalar boʻyicha qarorlar qabul qilishda ishtirok etish;

kadrlar zaxirasiga kiritilgan final ishtirokchisiga moʻljallangan lavozim boʻyicha majburiyatlarni vaqtinchalik bajarish;

kadrlar zaxirasiga kiritilgan tanlov finali ishtirokchisiga moʻljallangan lavozimlarning mutaxassisligiga muvofiq bilim sohalari boʻyicha eng yangi yutuqlar bilan tanishish va amaliy koʻnikmalar olish maqsadida konferensiyalar, kengashlar, seminarlar, ishchi guruhlar va boshqa kollegial organlar ishida ishtirok etish.

Tanlov finali ishtirokchisining kadrlar zaxirasida boʻlishi boʻyicha shaxsiy rejasi uning fikr-mulohazalarini hisobga olib shakllantiriladi va davlat tashkilotining rahbari tomonidan tasdiqlanadi.

12. Tanlov finali ishtirokchisi kadrlar zaxirasida boʻlish davrida:

mos keladigan boʻsh oʻrinlar ochilgan kundan boshlab uch ish kunidan ortiq boʻlmagan muddatda ushbu boʻsh oʻrinlarning mavjudligi haqida axborot olish;

davlat tashkilotining tegishli nizomlarida nazarda tutilgan tartibda, shu jumladan, qoʻshimcha kasbga oʻqitish shaklida kasbga qayta tayyorlashdan va malaka oshirishdan bepul oʻtish;

kadrlar zaxirasiga kiritilgan davlat tashkiloti tomonidan oʻtkaziladigan tadbirlarda (bundan davlat tashkilotining mansabdor shaxslarigina ishtirok etadigan kengashlar mustasno), shu jumladan, konferensiyalar, seminarlar, tajriba orttirish ishlarida ishtirok etish huquqiga ega.

Tanlov finali ishtirokchisining shaxsiy rejasiga kiritilgan tadbirlarni amalga oshirish xarajatlari kadrlari zaxiraga kiritilgan davlat tashkiloti tomonidan qoplanadi.

13. Kadrlar zaxirasida boʻlish davrida tanlov finali ishtirokchisi:

davlat tashkiloti rahbari tomonidan tasdiqlangan professionalizmni oshirish va koʻnikmalarni rivojlantirish shaxsiy rejasini bajarishi;

ishga joylashganligi yoki shaxsiy sabablar tufayli kadrlar zaxirasida boʻlishni toʻxtatishi haqida kadrlar zaxirasiga kiritilgan davlat tashkilotini oʻz vaqtida ogohlantirishi shart.

14. Tanlov finali ishtirokchisi quyidagi holatlarda kadrlar zaxirasidan chiqib ketadi:

kadrlar zaxirasiga kiritilmagan boshqa davlat tashkilotiga oʻtish (lavozimga tayinlanish);

kadrlar zaxirasiga kiritilgan davlat tashkiloti bilan mehnat shartnomasini toʻxtatish;

tanlov finali ishtirokchisining kadrlar zaxirasiga kiritilgan davlat tashkilotidagi boʻsh lavozimga ishga joylashishdan yozma ravishda voz kechishi;

ushbu Nizomning 3-bandida nazarda tutilgan kadrlar zaxirasida boʻlish muddati tugashi;

davlat tashkilotining rahbari tomonidan tanlov finali ishtirokchisining malakasizligi tufayli ushbu tashkilotga ishga joylashishga mos emas deb topilishi;

tanlov finali ishtirokchisining sud tomonidan muomalaga layoqatsiz deb topilishi;

tanlov finali ishtirokchisiga nisbatan sudning ayblov hukmi chiqarilishi.

15. Ushbu Nizomga rioya etilishi yuzasidan davlat tashkiloti rahbarlari va kadrlar xizmati javob beradi.