Oʻzbekiston Respublikasi Prezidentining “Davlat huquqiy siyosatini amalga oshirishda adliya organlari va muassasalari faoliyatini tubdan takomillashtirish chora-tadbirlari toʻgʻrisida”gi 2018-yil 13-apreldagi PF-5415-son Farmoniga muvofiq:

1. Quyidagilar Oʻzbekiston Respublikasi Adliya vazirligining asosiy vazifalari etib belgilansin:

yagona davlat huquqiy siyosatini yuritish, huquq ijodkorligi faoliyatini muvofiqlashtirish va samaradorligini oshirish;

davlat boshqaruvi tizimi samaradorligini ushbu sohada tegishli islohotlarni amalga oshirish boʻyicha asoslangan takliflarni ishlab chiqqan holda kompleks va tanqidiy tahlil qilish;

qonunlar va boshqa normativ-huquqiy hujjatlarning ijrosi boʻyicha davlat organlari va tashkilotlari faoliyatini muvofiqlashtirish va uslubiy rahbarlikni amalga oshirish;

davlat va xoʻjalik boshqaruvi organlari, mahalliy davlat hokimiyati organlari faoliyatida huquqni qoʻllash amaliyotini izchil va bir xilda taʼminlash boʻyicha choralarni amalga oshirish;

nodavlat notijorat tashkilotlarining faoliyatini rivojlantirish sohasida davlat siyosatini yuritish, ularning davlat organlari va tashkilotlari bilan oʻzaro hamkorligini tashkil qilishga koʻmaklashish;

maʼmuriy tartib-taomillar va davlat xizmatlarini koʻrsatish boʻyicha yagona davlat siyosatini ishlab chiqish va amalga oshirish;

davlat organlari va tashkilotlarining yuridik xizmatlari faoliyatini muvofiqlashtirish, nazorat qilish va uslubiy taʼminlash;

huquqiy targʻibotni amalga oshirish, aholiga qabul qilinayotgan qonun hujjatlarining mohiyati va ahamiyatini yetkazish, aholining huquqiy savodsizligini yoʻq qilish boʻyicha chora-tadbirlarni amalga oshirish, shuningdek davlat organlari va tashkilotlarining huquqiy targʻibot sohasidagi ishlarini muvofiqlashtirish;

huquqiy axborotni tarqatish va undan foydalanishni taʼminlash;

notariat, advokatura hamda jismoniy va yuridik shaxslarga huquqiy xizmat koʻrsatuvchi boshqa tuzilmalar tizimining samarali faoliyat koʻrsatishini taʼminlash;

fuqarolarning huquqlari, erkinliklari va qonuniy manfaatlarini huquqiy himoya qilish boʻyicha choralarni amalga oshirish;

xalqaro-huquqiy hamkorlikni yoʻlga qoʻyish va mustahkamlash, xalqaro shartnomalarni huquqiy ekspertizadan oʻtkazish;

xalqaro va xorijiy tashkilotlarda Oʻzbekiston Respublikasi manfaatlarining huquqiy himoyasini taʼminlash, xalqaro hamjamiyat, xorijiy investorlarni milliy huquq tizimi va oʻtkazilayotgan huquqiy islohotlar haqida oʻz vaqtida xabardor qilish;

yuridik kadrlarni tayyorlash, qayta tayyorlash va malakasini oshirishni tashkil etish, yurisprudensiya sohasidagi fundamental va amaliy tadqiqotlarni amalga oshirishni taʼminlash;

sud ekspertlik faoliyatini rivojlantirishning ustuvor yoʻnalishlarini ishlab chiqish, sud ekspertlarini tayyorlash va malakasini oshirish ishlarini muvofiqlashtirish;

adliya organlari va muassasalari faoliyatida, birinchi navbatda aholiga huquqiy xizmat koʻrsatish va davlat xizmatlarini koʻrsatish sohasida zamonaviy axborot-kommunikatsiya texnologiyalarini qoʻllagan holda ishlashning innovatsion uslublarini joriy qilish;

intellektual mulk sohasida yagona davlat siyosatini ishlab chiqish va amalga oshirish;

2. Quyidagilar:

a) Oʻzbekiston Respublikasi Adliya vazirligi markaziy apparati tuzilmasida:

Davlat boshqaruvi tizimining samaradorligini tahlil qilish boshqarmasi;

Ijtimoiy-iqtisodiy sohada huquqni qoʻllash amaliyotini oʻrganish boshqarmasi;

Hukumat bayonnoma qarorlari va idoraviy normativ hujjatlarni huquqiy ekspertizadan oʻtkazish boshqarmasi;

Qonun hujjatlarini tahlil qilish va turkumlash boshqarmasi;

Huquqiy xizmat koʻrsatishni davlat tomonidan tartibga solish boshqarmasi;

Xalqaro va xorijiy tashkilotlarda Oʻzbekiston Respublikasi manfaatlarini huquqiy himoya qilish boshqarmasi;

b) Oʻzbekiston Respublikasi Adliya vazirligi huzuridagi Huquqiy axborot bilan taʼminlash markazi va “Adolat” nashriyoti negizida:

davlat unitar korxonasi shaklidagi Adliya organlari va muassasalarida axborot-kommunikatsiya texnologiyalarini rivojlantirish markazi (keyingi oʻrinlarda AKTRM deb yuritiladi);

davlat unitar korxonasi shaklidagi “Adolat” huquqiy axborot markazi (keyingi oʻrinlarda “Adolat” markazi deb yuritiladi) tashkil qilinsin.

Belgilab qoʻyilsinki, AKTRM va “Adolat” markazi faoliyatini moliyalashtirish tovarlar (xizmatlar, ishlar)ni realizatsiya qilishdan olingan daromadlar, budjetdan tashqari Adliya organlari va muassasalarini rivojlantirish jamgʻarmasi mablagʻlari, Oʻzbekiston Respublikasi Adliya vazirligining budjetdan tashqari boshqa mablagʻlari, shuningdek qonun hujjatlarida taqiqlanmagan boshqa manbalar hisobidan amalga oshiriladi.

Adliya organlari va muassasalariga AKTRM va “Adolat” HAM bilan tender (tanlov) savdolarini oʻtkazmasdan xizmatlar koʻrsatish (ishlar bajarish) boʻyicha shartnomalar tuzishga ruxsat etilsin.

3. Quyidagilar:

Oʻzbekiston Respublikasi Adliya vazirligi toʻgʻrisidagi nizom 1-ilovaga muvofiq;

Oʻzbekiston Respublikasi Adliya vazirligi tizimining tashkiliy tuzilmasi 2-ilovaga muvofiq;

Oʻzbekiston Respublikasi Davlat budjetidan moliyalashtiriladigan boshqaruv xodimlarining cheklangan umumiy soni 163 nafardan iborat boʻlgan Oʻzbekiston Respublikasi Adliya vazirligi markaziy apparati tuzilmasi 3-ilovaga muvofiq;

Qoraqalpogʻiston Respublikasi Adliya vazirligi tuzilmasi, viloyatlar va Toshkent shahar adliya boshqarmalarining namunaviy tuzilmasi 4 va 5-ilovalarga muvofiq;

tumanlar (shaharlar) adliya boʻlimlarining namunaviy tuzilmasi 6-ilovaga muvofiq;

normativ-huquqiy hujjatlarning ijrochilarga yetkazilishi hamda ulardagi norma va qoidalarning aholiga tushuntirilishi sxemasi 7-ilovaga muvofiq;

Adliya organlari va muassasalari faoliyatini yanada takomillashtirish va samaradorligini taʼminlash boʻyicha kompleks chora-tadbirlar 8-ilovaga muvofiq tasdiqlansin.

Oʻzbekiston Respublikasi adliya vaziriga:

Oʻzbekiston Respublikasi Adliya vazirligi markaziy apparati, adliya organlari va muassasalarining tuzilmasiga xodimlarning belgilangan umumiy soni doirasida oʻzgartirishlar kiritish;

davlat organlari va boshqa tashkilotlar, ilmiy va taʼlim muassasalari, xalqaro tashkilotlar, xorijiy kompaniyalarning yuqori malakali mutaxassislarini, shuningdek, ekspertlarni maslahatchi sifatida jalb qilish;

malakali xorijiy mutaxassislarni ishga qabul qilish va ularga ish haqi miqdori hamda boshqa toʻlovlarni xorijiy valyutada belgilash huquqi berilsin.

4. 2018-yil 1-maydan boshlab shunday tartib joriy etilsinki, unga koʻra:

barcha normativ-huquqiy hujjatlar loyihalari loyihani ishlab chiquvchi tashkilotlar tomonidan Oʻzbekiston Respublikasi Yagona interaktiv davlat xizmatlari portaliga jamoatchilik muhokamasi oʻtkazilishi uchun joylashtirilishi lozim;

normativ-huquqiy hujjatlarning loyihalari Vazirlar Mahkamasiga, Oʻzbekiston Respublikasi Prezidenti Administratsiyaga faqat huquqiy ekspertiza yakuni boʻyicha ularni qabul qilishning maqsadga muvofiqligi haqidagi Oʻzbekiston Respublikasi Adliya vazirligining xulosasi mavjud boʻlgandagina kiritiladi;

huquqiy ekspertiza yakuni boʻyicha hududiy adliya organlarining ijobiy xulosasi mavjudligi mahalliy davlat hokimiyati organlari tomonidan normativ-huquqiy hujjatlarni qabul qilishning majburiy sharti hisoblanadi;

normativ-huquqiy hujjatlar loyihalari Oʻzbekiston Respublikasi Adliya vazirligi tomonidan huquqiy ekspertizadan ular manfaatdor tashkilotlar bilan kelishilganidan soʻng, shuningdek takroran — Vazirlar Mahkamasi apparati va Oʻzbekiston Respublikasi Prezidenti Administratsiyasi tarkibiy tuzilmalarida ularning konseptual qoidalari oʻzgartirilganida oʻtkaziladi;

vazirliklar, davlat qoʻmitalari va idoralar agar qonunlar, Oʻzbekiston Respublikasi Prezidentining farmonlari, qarorlari va farmoyishlari, Oʻzbekiston Respublikasi Vazirlar Mahkamasi qarorlari bilan ularga tegishli hujjatni qabul qilish yoki aniq ijtimoiy munosabatlarni huquqiy tartibga solish boʻyicha vakolat berilgan boʻlsa, idoraviy normativ-huquqiy hujjatlarni qabul qilishlari mumkin.

5. Belgilansinki, 2019-yil 1-yanvardan Oʻzbekiston Respublikasi hududida 1993-yil 17-iyungacha qabul qilingan va Oʻzbekiston Respublikasi Adliya vazirligida roʻyxatdan oʻtmagan umummajburiy idoraviy hujjatlar, shu jumladan sobiq SSSRning idoraviy hujjatlari oʻz kuchini yoʻqotadi.

Oʻzbekiston Respublikasi Adliya vazirligi manfaatdor vazirlik va idoralar bilan birgalikda ikki oy muddatda mazkur bandga muvofiq oʻz kuchini yoʻqotayotgan normativ-huquqiy hujjatlar oʻrniga yangilarini ishlab chiqish boʻyicha chora-tadbirlar rejasi loyihasini Vazirlar Mahkamasiga kiritsin.

6. Oʻzbekiston Respublikasi Adliya vazirligi huzurida maslahat organi sifatida jamoatchilik asosida ishlaydigan, faoliyati fuqarolar, nodavlat notijorat tashkilotlari, fuqarolik jamiyatining boshqa institutlari bilan ochiq muloqotni rivojlantirishga qaratilgan Jamoatchilik kengashi tuzilsin.

Oʻzbekiston Respublikasi Adliya vazirligi bir oy muddatda Jamoatchilik kengashi tarkibini hamda unga yuklatilgan vazifalarni samarali bajarishga qaratilgan chora-tadbirlarni amalga oshirish boʻyicha “yoʻl xaritasi”ni tasdiqlasin.

7. Oʻzbekiston Respublikasi Adliya vazirligi, Oliy va oʻrta maxsus taʼlim vazirligi, Iqtisodiyot vazirligi va Bosh prokuraturasining quyidagi takliflari maʼqullansin:

a) 9-ilovada keltirilgan kasb-hunar kollejlari va akademik litseyni Oʻzbekiston Respublikasi Adliya vazirligining yuridik kollejlariga (keyingi oʻrinlarda yuridik kollejlar deb yuritiladi) quyidagi tartibni oʻrnatgan holda aylantirish:

yuridik kollejlarning oʻquv-metodik jarayonini muvofiqlashtirish, ularga amaliy va axborot-resurslari jihatdan koʻmaklashish Toshkent davlat yuridik universiteti (keyingi oʻrinlarda TDYU deb yuritiladi) tomonidan, ularning faoliyatiga rahbarlik qilish va nazoratni tashkil etish hamda tashkiliy-kadrlar bazasini mustahkamlash esa — hududiy adliya organlari tomonidan amalga oshiriladi;

Qoraqalpogʻiston Respublikasi adliya vaziri hamda viloyatlar va Toshkent shahar adliya boshqarmalari boshliqlari lavozimi boʻyicha yuridik kollejlari direktorlari hisoblanadi;

yuridik kollejlarni zarur oʻquv va sport uskunalari, kompyuter texnikasi va axborot-resurs fondlari bilan jihozlash xarajatlari taʼlimga ajratiladigan budjet mablagʻlari, shuningdek Adliya vazirligining budjetdan tashqari mablagʻlari hisobidan amalga oshiriladi.

yuridik kollejlariga qabul qilish har bir hududning “yurisprudensiya” yoʻnalishi boʻyicha oʻrta maxsus, kasb-hunar taʼlimga ega boʻlgan kadrlarga boʻlgan ehtiyojini inobatga olgan holda Oʻzbekiston Respublikasi Adliya vazirligi tomonidan belgilanadigan kvotalar boʻyicha tanlov asosida 10-ilovada keltirilgan mutaxassislik va kasblarga muvofiq amalga oshiriladi;

2020/2021 oʻquv yilidan boshlab yuridik kollejlari bitiruvchilari TDYUga hududiy adliya organlarining yoʻllanmalari boʻyicha kirish test sinovlarisiz yakka tartibdagi suhbat oʻtkazish orqali bakalavrlarni tayyorlashning maxsus uch yillik dasturi boʻyicha va oʻqishning tugashidan soʻng taqsimotga muvofiq uch yil davomida uzluksiz ishlab berish majburiyatini olgan holda kirishga haqli;

qayta tashkil qilinayotgan yuridik kollejlar va akademik litseyning 3 kurs oʻquvchilarining oʻqishi ularni taʼlimning oʻxshash yoʻnalishlari boʻyicha yaqin joylashgan kasb-hunar kollejlari va akademik litseyning oʻquvchilar kontingentiga qoʻshish yoʻli bilan ushbu taʼlim muassasalarida tamomlanadi;

b) 2018/2019 oʻquv yilidan boshlab TDYU magistraturasiga toʻlov-kontrakt asosida talabalarni qabul qilish kvotasini 150 odamgacha oshirish;

v) 2018/2019 oʻquv yilidan boshlab Toshkent davlat yuridik universitetining magistraturasiga qabulni test sinovlarsiz oʻqitish muddati davomiyligi bir yil boʻlgan holda amalga oshirish;

g) TDYUning boshqaruv xodimlari, professor-oʻqituvchilari, ilmiy, oʻquv-yordamchi, texnik va xizmat koʻrsatuvchi xodimlariga moddiy ragʻbatlantirish maxsus jamgʻarmasi hisobidan oʻrnatiladigan har oylik ustamalar miqdorini ikki baravarga oshirish.

d) pedagog kadrlarni qayta tayyorlash va malakasini oshirish tarmoq markazi negizida TDYU huzurida Yuridik kadrlarni xalqaro standartlar boʻyicha professional oʻqitish markazini (keyingi oʻrinlarda Markaz deb yuritiladi) tuzish, unda quyidagilarni:

oliy maʼlumotga ega mutaxassislarni yuridik mutaxassislik boʻyicha qayta tayyorlash kurslari;

xalqaro standartlar boʻyicha yuridik kadrlarni kasb-hunarga oʻqitish yuzasidan xalqaro tijorat faoliyati, xalqaro arbitrajlar va sud nizolarini huquqiy taʼminlashni oʻz ichiga olgan qisqa muddatli oʻquv kurslari;

oʻrta maxsus, kasb-hunar va oliy taʼlim muassasalarida huquqiy fanlardan dars beruvchi pedagog kadrlarni qayta tayyorlash va malakasini oshirish kurslarini tashkil etish.

8. Belgilansinki:

Markazda yuridik mutaxassislik boʻyicha qayta tayyorlash kurslarida oʻqitish toʻlov-kontrakt asosida olti oy muddatda, imtihon natijalari boʻyicha belgilangan namunada diplom bergan holda amalga oshiriladi;

yuridik mutaxassislik boʻyicha qayta tayyorlash kurslarini tugatgan va belgilangan namunadagi diplomni olgan shaxslar davlat organlari va boshqa tashkilotlarning yuridik xizmatlarida ishlash huquqiga ega boʻladi.

Oʻzbekiston Respublikasi Adliya vazirligi bir oylik muddatda Vazirlar Mahkamasiga Markazning faoliyatini tashkillashtirish, shuningdek yuridik mutaxassislik boʻyicha qayta tayyorlashga ruxsat etiladigan oliy taʼlim yoʻnalishlari roʻyxatini tasdiqlash boʻyicha takliflarni kiritsin.

9. Oʻzbekiston Respublikasi Oliy va oʻrta maxsus taʼlim vazirligi:

Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda 2018-yil 1-iyulgacha 9-ilovaga muvofiq kasb-hunar kollejlari va akademik litseyni bino va inshootlari, moddiy-texnik vositalari, oʻquv uskunalari va boshqa mulklari bilan birga operativ boshqarish huquqi bilan bepul topshirsin, Oʻzbekiston Respublikasi Adliya vazirligi esa ularni qabul qilib olsin;

Oʻzbekiston Respublikasi Bandlik va mehnat munosabatlari vazirligi bilan birgalikda yuridik kollejlarga aylanayotgan kasb-hunar kollejlari va akademik litseyning boʻshatilayotgan pedagog kadrlarining mutaxassisligiga muvofiq ishga joylashtirilishini taʼminlasin.

10. Oʻzbekiston Respublikasi Adliya vazirligi va Oʻzbekiston milliy teleradiokompaniyasining “Madaniyat va maʼrifat” teleradiokanali” DUK tarkibida uning umumiy shtat soni doirasida efir vaqtini maqbullashtirish hisobidan “Huquqiy axborot” telestudiyasini tashkil etish haqidagi taklifiga rozilik berilsin.

Oʻzbekiston Respublikasi Adliya vazirligi “Huquqiy axborot” telestudiyasini, eng avvalo, mamlakatimizda olib borilayotgan islohotlarning, shuningdek qabul qilinayotgan qonun hujjatlarining mazmuni va ahamiyatini aholiga yetkazishga qaratilgan sifatli efir materiallari bilan taʼminlab borsin.

11. Oʻzbekiston Respublikasi Adliya vazirligining quyidagilar haqidagi takliflari maʼqullansin:

notariuslar tomonidan pullik xizmatlar koʻrsatishdan xamda huquqiy va texnik tusdagi qoʻshimcha harakatlarni amalga oshirishdan kelib tushadigan mablagʻlarning 80 foizi miqdorigacha qismini notarial idoralar xodimlarining lavozim maoshlariga xar oylik shaxsiy ustama haqlari oʻrnatishga yoʻnaltirish;

notariuslar tomonidan undiriladigan davlat boji summalaridan budjetdan tashqari Adliya organlari va muassasalarini rivojlantirish jamgʻarmasiga ajratmalar miqdorini 12 foiz miqdorida belgilash.

Adliya vaziriga Oʻzbekiston Respublikasi Moliya vazirligi bilan kelishgan holda notarial harakatlarni amalga oshirganlik uchun notariuslar tomonidan undiriladigan davlat boji summalaridan ajratmalar va notariuslar tomonidan amalga oshiriladigan huquqiy va texnik tusdagi qoʻshimcha harakatlar uchun tushumlar hisobidan notarial idoralarda qoʻshimcha tarjimon, operator, kuryer va aholiga notarial va u bilan bogʻliq kompleks xizmatlarni koʻrsatish uchun boshqa ishchilar shtat birligini kiritish huquqi berilsin.

12. Belgilansinki, 2018-yil 15-apreldan:

adliya organlari va muassasalari xodimlarining koʻp yillik xizmatlari uchun ustamalar va martaba darajalari uchun qoʻshimchalar miqdorlari prokuratura organlari xodimlari uchun belgilangan miqdorlarga tenglashtiriladi;

Yagona tarif setkasi boʻyicha mehnatga haq toʻlashning tasdiqlangan razryadlariga koʻra adliya organlari xodimlarining lavozim maoshini aniqlashda tarif koeffitsiyentlari bir yarim baravar miqdorda qoʻllaniladi;

adliya organlari va muassasalarining martaba darajalariga ega boʻlgan Oʻzbekiston Respublikasi Adliya vazirligi markaziy apparati xodimlariga, Qoraqalpogʻiston Respublikasi adliya vaziri, viloyatlar va Toshkent shahar adliya boshqarmalari boshliqlariga alohida mehnat sharoitlari uchun lavozim maoshiga qonun hujjatlarida belgilangan ragʻbatlantiruvchi qoʻshimcha haq va ustamalarni hisoblashda lavozim maoshi tarkibiga kiritiladigan 50 foiz miqdorida ustama toʻlansin.

Mazkur bandning ikkinchi — toʻrtinchi xatboshilarining amal qilishi Oʻzbekiston Respublikasi Prezidentining va Vazirlar Mahkamasining qarorlari bilan lavozimga tayinlangan va adliya organlari va muassasalarining martaba darajalariga ega boʻlgan Oʻzbekiston Respublikasi Prezidenti Administratsiyasi va Oʻzbekiston Respublikasi Vazirlar Mahkamasi apparati xodimlariga, Oʻzbekiston Respublikasi Prezidenti devoni va Oʻzbekiston Respublikasi Vazirlar Mahkamasi apparatida amalda boʻlgan barcha toʻlovlar saqlangan holda, tatbiq qilinadi.

Mazkur bandda nazarda tutilgan tadbirlarni amalga oshirish bilan bogʻliq xarajatlar:

adliya organlari va muassasalari xodimlari uchun — adliya organlari va muassasalarining budjetdan tashqari mablagʻlari hisobidan;

Oʻzbekiston Respublikasi Prezidenti Administratsiyasi va Oʻzbekiston Respublikasi Vazirlar Mahkamasi apparati xodimlari uchun — Oʻzbekiston Respublikasi Davlat budjeti hisobidan amalga oshiriladi.

13. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Oʻzbekiston Respublikasi Adliya vazirligi bilan birgalikda bir oylik muddatda tumanlar (shaharlar) adliya boʻlimlarining joylashtirilishini taʼminlasin.

14. Oʻzbekiston Respublikasi Adliya vazirligi:

ikki haftalik muddatda Oʻzbekiston Respublikasi Moliya vazirligi bilan birgalikda mazkur qarorga muvofiq Oʻzbekiston Respublikasi Adliya vazirligining xarajatlar smetasi va shtatlar jadvaliga oʻzgartirish va qoʻshimchalar kiritsin;

bir oylik muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Oʻzbekiston Respublikasi Vazirlar Mahkamasiga takliflar kiritsin.

ikki oylik muddatda Oʻzbekiston Respublikasi Adliya vazirligining yuridik kollejlari oʻquvchilarini Toshkent davlat yuridik universitetiga qabul qilish tartibini nazarda tutuvchi Hukumat qarorini kiritsin.

15. Oʻzbekiston Respublikasi Prezidentining ayrim qarorlari 11-ilovaga muvofiq oʻz kuchini yoʻqotgan deb hisoblansin.

16. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidentining Davlat maslahatchisi R.R. Inoyatov va Oʻzbekiston Respublikasi adliya vaziri R.K. Davletov zimmasiga yuklansin.

1. Mazkur Nizom Oʻzbekiston Respublikasi Adliya vazirligining (keyingi oʻrinlarda Vazirlik deb yuritiladi) maqomi, asosiy vazifalari, funksiyalari, huquqlari, javobgarligini, faoliyatini tashkil etish va hisobot berish tartibini, shuningdek uning rahbarlarining funksional vazifalari va masʼuliyatini belgilaydi.

2. Vazirlik adliya organlari va muassasalari faoliyatiga umumiy rahbarlik qiluvchi va uni muvofiqlashtiruvchi davlat boshqaruvi organi hisoblanadi.

Vazirlik Oʻzbekiston Respublikasi Vazirlar Mahkamasiga (keyingi oʻrinlarda Vazirlar Mahkamasi deb yuritiladi), faoliyatining ayrim masalalari boʻyicha esa bevosita Oʻzbekiston Respublikasi Prezidentiga boʻysunadi.

Vazirlik markaziy apparati, Qoraqalpogʻiston Respublikasi Adliya vazirligi, hududiy adliya boshqarmalari, tumanlar (shaharlar) adliya boʻlimlari huquqni muhofaza qiluvchi organlar hisoblanadi.

3. Vazirlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga va boshqa qonun hujjatlariga amal qiladi.

4. Vazirlikning oʻz vakolatlari doirasida qabul qilgan qarorlari davlat va xoʻjalik boshqaruvi organlari, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek fuqarolar tomonidan bajarilishi majburiy hisoblanadi.

5. Vazirlik, Qoraqalpogʻiston Respublikasi Adliya vazirligi, Vazirlikning tashkiliy tuzilmasiga kiradigan hududiy va tarkibiy tuzilmalar yuridik shaxs hisoblanadi, Oʻzbekiston Respublikasi Davlat gerbi tasviri tushirilgan muhrga va blankalarga, mustaqil balansga, shaxsiy gʻazna hisobvaraqlariga, bank hisob raqamlariga, shu jumladan, xorijiy valyutadagi bank hisob raqamlariga egadirlar.

6. Vazirlikning rasmiy nomi:

a) davlat tilida:

toʻliq nomi — Oʻzbekiston Respublikasi Adliya vazirligi, qisqartirilgan nomi — Adliya vazirligi;

b) rus tilida:

toʻliq nomi — Ministerstvo yustitsii Respubliki Uzbekistan, qisqartirilgan nomi — Ministerstvo yustitsii yoki Minyust;

v) ingliz tilida:

toʻliq nomi — Ministry of Justice of the Republic of Uzbekistan, qisqartirilgan nomi — Ministry of Justice yoki Minjust.

7. Vazirlikning joylashgan joyi (pochta manzili): Toshkent shahri, Sayilgoh koʻchasi, 5-uy.

8. Vazirlik tizimiga quyidagilar kiradi:

Vazirlik markaziy apparati;

Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari, tumanlar (shaharlar) adliya boʻlimlari;

Davlat xizmatlari agentligi;

Intellektual mulk agentligi;

Huquqiy siyosat tadqiqot instituti;

X. Sulaymonova nomidagi Respublika sud ekspertiza markazi;

“Adolat” huquqiy axborot markazi” DUK;

“Adliya organlari va muassasalarida axborot-kommunikatsiya texnologiyalarini rivojlantirish markazi” DUK;

davlat notarial idoralari va arxivlari;

Yuristlar malakasini oshirish markazi;

Toshkent davlat yuridik universiteti;

yuridik kollejlari;

Akademik litsey;

“Inson va qonun” gazetasi tahririyati” DUK.

Adliya organlari va muassasalari mahalliy davlat hokimiyati organlaridan mustaqildir va bevosita Vazirlikka boʻysunadilar.

9. Quyidagilar Vazirlikning asosiy vazifalari hisoblanadi:

yagona davlat huquqiy siyosatini yuritish, huquq ijodkorligi faoliyatini muvofiqlashtirish va samaradorligini oshirish;

davlat boshqaruvi tizimi samaradorligini ushbu sohada tegishli islohotlarni amalga oshirish boʻyicha asoslangan takliflarni ishlab chiqqan holda kompleks va tanqidiy tahlil qilish;

qonunlar va boshqa normativ-huquqiy hujjatlarning ijrosi boʻyicha davlat organlari va tashkilotlari faoliyatini muvofiqlashtirish va uslubiy rahbarlikni amalga oshirish;

davlat va xoʻjalik boshqaruvi organlari, mahalliy davlat hokimiyati organlari faoliyatida huquqni qoʻllash amaliyotini izchil va bir xilda taʼminlash boʻyicha choralarni amalga oshirish;

nodavlat notijorat tashkilotlarining faoliyatini rivojlantirish sohasida davlat siyosatini yuritish, ularning davlat va xoʻjalik boshqaruvi organlari, mahalliy davlat hokimiyati organlari, davlat tashkilotlari (keyingi oʻrinlarda davlat organlari va tashkilotlari deb yuritiladi) bilan oʻzaro hamkorligini tashkil qilishga koʻmaklashish;

maʼmuriy tartib-taomillar va davlat xizmatlarini koʻrsatish boʻyicha yagona davlat siyosatini ishlab chiqish va amalga oshirish;

davlat organlari va tashkilotlarining yuridik xizmatlari faoliyatini muvofiqlashtirish, nazorat qilish va uslubiy taʼminlash;

huquqiy targʻibotni amalga oshirish, aholiga qabul qilinayotgan qonun hujjatlarining mohiyati va ahamiyatini yetkazish, aholining huquqiy savodsizligini yoʻq qilish boʻyicha chora-tadbirlarni amalga oshirish, shuningdek davlat organlari va tashkilotlarining huquqiy targʻibot sohasidagi ishlarini muvofiqlashtirish;

huquqiy axborotni tarqatish va undan foydalanishni taʼminlash;

notariat, advokatura hamda jismoniy va yuridik shaxslarga huquqiy xizmat koʻrsatuvchi boshqa tuzilmalar tizimining samarali faoliyat koʻrsatishini taʼminlash;

fuqarolarning huquqlari, erkinliklari va qonuniy manfaatlarini huquqiy himoya qilish boʻyicha choralarni amalga oshirish;

xalqaro-huquqiy hamkorlikni yoʻlga qoʻyish va mustahkamlash, xalqaro shartnomalarni huquqiy ekspertizadan oʻtkazish;

xalqaro va xorijiy tashkilotlarda Oʻzbekiston Respublikasi manfaatlarining huquqiy himoyasini taʼminlash, xalqaro hamjamiyat, xorijiy investorlarni milliy huquq tizimi va oʻtkazilayotgan huquqiy islohotlar haqida oʻz vaqtida xabardor qilish;

yuridik kadrlarni tayyorlash, qayta tayyorlash va malakasini oshirishni tashkil etish, yurisprudensiya sohasidagi fundamental va amaliy tadqiqotlarni amalga oshirishni taʼminlash;

sud ekspertlik faoliyatini rivojlantirishning ustuvor yoʻnalishlarini ishlab chiqish, sud ekspertlarini tayyorlash va malakasini oshirish ishlarini muvofiqlashtirish;

adliya organlari va muassasalari faoliyatida, birinchi navbatda aholiga huquqiy xizmat koʻrsatish va davlat xizmatlarini koʻrsatish sohasida zamonaviy axborot-kommunikatsiya texnologiyalarini qoʻllagan holda ishlashning innovatsion uslublarini joriy qilish;

intellektual mulk sohasida yagona davlat siyosatini ishlab chiqish va amalga oshirish;

10. Vazirlik oʻziga yuklangan vazifalarga muvofiq quyidagi funksiyalarni amalga oshiradi:

1) yagona davlat huquqiy siyosatini yuritish, huquq ijodkorligi faoliyatini muvofiqlashtirish va samaradorligini oshirish sohasida:

konstitutsiyaviy normalarni amalga oshirish, inson huquqlari va erkinliklarini taʼminlash, jamiyatda qonunga rioya etish va hurmat ruhini mustahkamlash maqsadida huquqiy siyosatning ustuvor yoʻnalishlarini ishlab chiqadi;

huquqiy bazani isloh qilishning oʻrta muddatli va uzoq muddatli dasturlarini ishlab chiqadi;

huquqiy islohotlarni amalga oshirishda davlat organlari va tashkilotlari faoliyatini boshqaradi va muvofiqlashtiradi;

davlat organlari va tashkilotlarining huquq ijodkorligi masalalari boʻyicha faoliyatini muvofiqlashtiradi va uslubiy rahbarlikni amalga oshiradi;

davlat organlari va tashkilotlari huquq ijodkorligi faoliyatining monitoringi va tahlilini amalga oshiradi;

qonunlarni tayyorlash va qabul qilish zaruriyati masalalarining oldindan kelishuvini amalga oshiradi;

normativ-huquqiy hujjatlar loyihalarining qonunchilikka, xalqaro shartnomalar normalariga, mamlakatda amalga oshirilayotgan islohotlarning maqsad va vazifalariga, qonunchilik texnikasi qoidalariga muvofiqligini, ularni korrupsiyaga, boshqa huquqbuzarliklarni sodir etishga shart-sharoit yaratuvchi, shuningdek jismoniy va yuridik shaxslar uchun ortiqcha maʼmuriy va boshqa cheklovlarni joriy etuvchi qoidalar va normalarni aniqlash nuqtai nazaridan huquqiy ekspertizadan oʻtkazadi;

Oʻzbekiston Respublikasi Prezidenti, Vazirlar Mahkamasining topshiriqlari boʻyicha va oʻz tashabbusiga koʻra normativ-huquqiy hujjatlar loyihalarini ishlab chiqadi va ularni koʻrib chiqish uchun belgilangan tartibda kiritadi;

qonun hujjatlaridagi huquqiy nuqsonlarni, korrupsiyaga, boshqa huquqbuzarliklarni sodir etishga shart-sharoit yaratuvchi, shuningdek jismoniy va yuridik shaxslar uchun ortiqcha maʼmuriy va boshqa cheklovlarni joriy etuvchi qoidalar va normalarni aniqlaydi va ularni bartaraf etish boʻyicha takliflar tayyorlaydi;

normativ-huquqiy hujjatlarni ishlab chiqish boʻyicha takliflarni Oʻzbekiston Respublikasi Prezidenti Administratsiyasi va Vazirlar Mahkamasi, davlat organlari va boshqa tashkilotlarga koʻrib chiqish uchun kiritadi;

qonunosti hujjatlariga rasmiy sharhlarning loyihalarini tayyorlaydi va ularni Oʻzbekiston Respublikasi Prezidenti va Vazirlar Mahkamasiga koʻrib chiqish uchun kiritadi;

Oʻzbekiston Respublikasi Prezidenti va Vazirlar Mahkamasining topshiriqlariga asosan normativ-huquqiy hujjatlar rasmiy sharhlarining loyihalari boʻyicha xulosalar beradi;

davlat organlari va tashkilotlarining normativ-huquqiy hujjatlari loyihalarini tayyorlash, yuridik-texnik jihatdan rasmiylashtirish va huquqiy ekspertizadan oʻtkazish boʻyicha uslubiy koʻrsatmalarni tasdiqlaydi;

normativ-huquqiy hujjatlar va ular loyihalarining korrupsiyaga qarshi ekspertizasini oʻtkazish tartibini belgilaydi;

idoraviy normativ-huquqiy hujjatlarni tayyorlash va qabul qilish qoidalarini tasdiqlaydi;

idoraviy normativ-huquqiy hujjatlarni, shuningdek normativ-huquqiy koʻrsatmalar mavjud boʻlgan shaharsozlik normalari va qoidalarini davlat roʻyxatidan oʻtkazadi;

idoraviy normativ-huquqiy hujjatlarning davlat reyestrini yuritadi;

vazirliklar, davlat qoʻmitalari va idoralarning huquqiy hujjatlarini davlat roʻyxatidan oʻtkazilishi lozim boʻlmagan hujjatlar toifasiga kiritish haqida qarorlar qabul qiladi;

idoraviy normativ-huquqiy hujjatlarni qabul qilish, davlat roʻyxatidan oʻtkazish va manfaatdor shaxslar eʼtiboriga yetkazishning belgilangan tartibiga rioya qilinishi ustidan nazoratni amalga oshiradi;

Hukumat bayonnoma qarorlari loyihalarini huquqiy ekspertizadan oʻtkazadi va imzolangandan soʻng ularning hisobini yuritadi;

mahalliy davlat hokimiyati organlari tomonidan qabul qilinadigan normativ-huquqiy hujjatlarni qabul qilish, eʼlon qilish va manfaatdor shaxslar eʼtiboriga yetkazishning belgilangan tartibiga rioya qilinishi ustidan nazoratni amalga oshiradi;

davlat organlari va tashkilotlari tomonidan normativ-huquqiy hujjatlarning turkumlashtirilgan hisobini yuritish tartibini tasdiqlaydi, unga rioya qilish ustidan nazoratni amalga oshiradi;

Oʻzbekiston Respublikasi normativ-huquqiy hujjatlarining davlat hisobini va qonun hujjatlarini turkumlashtirish boʻyicha ishlarni amalga oshiradi;

Oʻzbekiston Respublikasi normativ-huquqiy hujjatlarining nazorat nusxalarini yuritadi, ularning bankini (fondini) shakllantiradi;

Qonunchilik tarmoqlari umumhuquqiy klassifikatorini tasdiqlaydi, normativ-huquqiy hujjatlarga klassifikator asosida kodlar beradi;

adliya organlari va muassasalari faoliyati sohasidagi qonun hujjatlarini qoʻllash boʻyicha tushuntirishlar beradi;

2) davlat boshqaruvi tizimi samaradorligini ushbu sohada tegishli islohotlarni amalga oshirish boʻyicha asoslangan takliflarni ishlab chiqqan holda kompleks va tanqidiy tahlil qilish sohasida:

davlat boshqaruvining tegishli sohalarida islohotlarni muvaffaqiyatli amalga oshirishga salbiy taʼsir oʻtkazayotgan tizimli muammo va kamchiliklarni tahlil qiladi;

davlat organlari va tashkilotlarining bir birini takrorlovchi funksiyalarini chiqarib tashlash, davlat boshqaruvi tizimini ortiqcha va xos boʻlmagan vazifalar, funksiyalar va vakolatlarni chiqarib tashlash hisobiga optimallashtirish va nomarkazlashtirish boʻyicha takliflarni tayyorlaydi;

davlat organlari va tashkilotlari faoliyatida tizimli muammo va kamchiliklarni bartaraf etish boʻyicha takliflar ishlab chiqadi;

davlat boshqaruvi samaradorligini takomillashtirish va oshirish, jamoatchilik nazoratining samarali shakllarini joriy etish boʻyicha takliflarni tayyorlaydi va tegishli davlat organlari va tashkilotlariga kiritadi;

xoʻjalik boshqaruvi va fuqarolarning oʻzini oʻzi boshqarish organlariga davlat funksiyalarini va alohida davlat vakolatlarini berish amaliyotini oʻrganadi, shu asosda qonunchilikni takomillashtirish boʻyicha takliflarni tayyorlaydi;

davlat boshqaruvida ortiqcha sarflar darajasini pasaytirish, boshqaruv qarorlarini qabul qilish faoliyatining samaradorligini va tizimining ochiqligini oshirish, iqtisodiyot tarmoqlariga boʻlgan maʼmuriy taʼsirni yanada qisqartirish va boshqaruvning bozor mexanizmlarini kengaytirish boʻyicha choralarni koʻradi;

davlat organlari va tashkilotlari faoliyatida davlat-xususiy sheriklik mexanizmlarini qoʻllash samaradorligini oʻrganadi, ularni yanada takomillashtirish boʻyicha takliflarni tayyorlaydi;

Oʻzbekiston Respublikasida maʼmuriy islohotning asosiy yoʻnalishlarini shakllantirish boʻyicha takliflarni tayyorlaydi, maʼmuriy islohotni amalga oshirish jarayonida yuridik koʻmakni amalga oshiradi;

davlat organlari va tashkilotlariga yuklatilgan vazifalar va funksiyalarni amalga oshirishning samaradorligini tahlil qiladi, tahlil natijalariga koʻra davlat boshqaruvi tizimini, davlat organlari va tashkilotlarining tashkiliy-shtat tuzilmalarini va ishlash mexanizmlarini takomillashtirish boʻyicha takliflar tayyorlaydi;

davlat boshqaruvini takomillashtirish, maʼmuriy islohotni amalga oshirish sohasida tadqiqotlar oʻtkazilishini tashkillashtiradi;

davlat organlari va tashkilotlari xodimlari faoliyatini baholash mezonlari tizimini ishlab chiqishda ishtirok etadi;

davlat organlari va tashkilotlarining alohida funksiyalarini nodavlat sektorga, shu jumladan davlat-xususiy sheriklik asosida oʻtkazish maqsadga muvofiqligi haqida takliflarni ishlab chiqadi va ularning takliflari boʻyicha xulosalar beradi;

3) qonunlar va boshqa normativ-huquqiy hujjatlarning ijrosi boʻyicha davlat organlari va tashkilotlari faoliyatini muvofiqlashtirish va uslubiy rahbarlikni amalga oshirish sohasida:

qonunlar va boshqa normativ-huquqiy hujjatlarning ijrosini tashkillashtirish masalalari boʻyicha davlat organlari va tashkilotlariga tushuntirishlar beradi va zarur koʻmakni amalga oshiradi;

davlat organlari va tashkilotlari tomonidan qonunlar va boshqa normativ-huquqiy hujjatlarning ijrosini tashkillashtirilishi masalalari boʻyicha uslubiy koʻrsatmalarni ishlab chiqadi;

davlat organlari va tashkilotlari tomonidan qonunlar va boshqa normativ-huquqiy hujjatlarning ijrosi tashkillashtirilishining monitoringi va tahlilini olib boradi, ushbu sohadagi muammolarni bartaraf qilish boʻyicha takliflarni ishlab chiqadi;

davlat organlari va tashkilotlarining qonunlar va boshqa normativ-huquqiy hujjatlarning ijrosini taʼminlash boʻyicha faoliyatini muvofiqlashtiradi;

davlat organlari va tashkilotlarida normativ-huquqiy hujjatlarning ijrosini tashkillashtirish boʻyicha ijro intizomiga rioya etilishini oʻrganadi, shu asosda Oʻzbekiston Respublikasi Prezidenti Administratsiyasi va Vazirlar Mahkamasiga kiritish uchun axborot-tahlil hujjatlarni tayyorlaydi;

4) davlat va xoʻjalik boshqaruvi organlari, mahalliy davlat hokimiyati organlari faoliyatida huquqni qoʻllash amaliyotini izchil va bir xilda taʼminlash boʻyicha choralarni amalga oshirish sohasida:

davlat organlari va tashkilotlari faoliyatida normativ-huquqiy hujjatlarni qoʻllash amaliyotini tahlil qiladi va oʻrganadi;

qonun hujjatlari va huquqni qoʻllash faoliyati samaradorligi masalalari boʻyicha jamoatchilik fikrini oʻrganishni tashkil qiladi, natijasi boʻyicha ularni takomillashtirish yuzasidan takliflar ishlab chiqadi;

qonun hujjatlari va huquqni qoʻllash amaliyotini takomillashtirish boʻyicha takliflarni ishlab chiqish maqsadida iqtisodiy va ijtimoiy sohalarni huquqiy tartibga solish yuzasidan xalqaro va xorijiy tajriba, ilmiy, tadqiqot ishlari natijalarini oʻrgangan holda qiyosiy tahlil qiladi;

aniqlangan qonun hujjatlari buzilishlarini, ularning sodir etilishiga imkon beruvchi sabab va shart-sharoitlarni bartaraf etish boʻyicha choralar koʻrish uchun huquqni qoʻllash amaliyotining umumlashtirish materiallarini davlat organlari va tashkilotlariga yoʻllaydi;

normativ-huquqiy hujjatlarni notoʻgʻri yoki ziddiyatli tarzda qoʻllash amaliyotini, shuningdek huquqni qoʻllash amaliyotida huquqbuzarliklarning sodir etilishiga imkon beruvchi salbiy omillar, sabablar va shart-sharoitlarni bartaraf etish boʻyicha amaliy choralar koʻradi;

davlat organlari va tashkilotlarining huquqni qoʻllash faoliyatini tahlil qilish natijalari boʻyicha qonun hujjatlarini yanada takomillashtirishga oid takliflar tayyorlaydi;

normativ-huquqiy hujjatlarni qoʻllash masalalari yuzasidan oʻz xulosasini shakllantiradi va yetkazadi;

qonun hujjatlarini qoʻllash amaliyotini umumlashtiradi va tegishli soha faoliyatida davlat siyosatining amalga oshirilishi holatini tahlil qiladi, uning asosida huquqni qoʻllash faoliyatini takomillashtirish boʻyicha choralarni ishlab chiqadi;

davlat boshqaruvi organlarining huquqiy monitoringni oʻtkazish sohasidagi faoliyatini muvofiqlashtiradi;

qonun hujjatlari qoʻllanilishining huquqiy monitoringini oʻtkazishda qonun buzilishlarni bartaraf etish boʻyicha taʼsir choralarini koʻradi;

davlat boshqaruvi organlari tomonidan huquqiy monitoring oʻtkazilishini tahlil qiladi va ular tomonidan huquqiy monitoring oʻtkazish sifatini oshirish boʻyicha choralar koʻrish uchun tavsiyalar tayyorlaydi;

5) nodavlat notijorat tashkilotlarining faoliyatini rivojlantirish sohasida davlat siyosatini amalga oshirish, ularning davlat organlari va tashkilotlari bilan oʻzaro hamkorligini tashkil qilishga koʻmaklashish sohasida:

nodavlat notijorat tashkilotlarini va ularning ramziy belgilarini davlat roʻyxatidan oʻtkazishni amalga oshiradi;

roʻyxatdan oʻtkazilgan nodavlat notijorat tashkilotlarining davlat reyestrini yuritadi;

nodavlat notijorat, shu jumladan diniy tashkilotlar tomonidan qonun hujjatlariga, ustav faoliyatiga, taʼsis hujjatlariga, qayta roʻyxatdan oʻtkazish va tugatish tartibiga rioya etilishi ustidan nazoratni amalga oshiradi;

nodavlat notijorat, shu jumladan diniy tashkilotlarga ajratilgan mablagʻlar, grantlar, boshqa moliyaviy va moddiy resurslardan oqilona va maqsadli foydalanilishini taʼminlash boʻyicha choralar koʻradi;

nodavlat notijorat, shu jumladan diniy tashkilotlar faoliyati qonuniyligini taʼminlash masalalari boʻyicha davlat organlari va tashkilotlari bilan oʻzaro hamkorlik qiladi;

nodavlat notijorat, shu jumladan diniy tashkilotlar tomonidan qonun hujjatlari, ustav faoliyati va taʼsis hujjatlari buzilishining oldini olish va bartaraf qilishga qaratilgan choralar koʻradi;

nodavlat notijorat, shu jumladan diniy tashkilotlarning chet el fuqarolari boʻlgan xodimlarini, shuningdek ularning qaramogʻida boʻlgan oila aʼzolarini akkreditatsiyadan oʻtkazadi;

nodavlat notijorat, shu jumladan diniy tashkilotlar tomonidan tashkil etilayotgan tadbirlar toʻgʻrisidagi kelib tushayotgan axborotlarni tahlil qiladi;

nodavlat notijorat, shu jumladan diniy tashkilotlarning chet davlatlardan, xalqaro va chet el tashkilotlaridan, chet davlatlarning fuqarolaridan yoki ularning topshirigʻiga binoan boshqa shaxslardan pul mablagʻlari va mol-mulk olishini kelishadi;

nodavlat notijorat, shu jumladan diniy tashkilotlarning faoliyati haqidagi hisobotlarni qabul qiladi va tahlil qiladi;

nodavlat notijorat tashkilotlari tomonidan qonun hujjatlari buzilganda, ularning faoliyatini toʻxtatib qoʻyish yoki ularni tugatish toʻgʻrisida takliflar tayyorlaydi va sudga koʻrib chiqish uchun kiritadi;

siyosiy partiyalarning ustav faoliyatini moliyalashtirish uchun ajratilgan davlat mablagʻlarini ular oʻrtasida taqsimlaydi;

nodavlat notijorat, shu jumladan diniy tashkilotlarning faoliyati ustidan monitoring olib borish, chet davlatlardan, xalqaro va chet el tashkilotlaridan, chet el fuqarolaridan yoki ularning topshirigʻiga binoan boshqa shaxslardan pul mablagʻlari va mol-mulk olish tartibini belgilaydi, shuningdek nodavlat notijorat, shu jumladan diniy tashkilotlarning faoliyati haqidagi hisobotlarning, akkreditatsiya kartochkasining shakllarini tasdiqlaydi;

doimiy faoliyat koʻrsatuvchi hakamlik sudlari hisobini roʻyxatdan oʻtkazish va muvaqqat hakamlik sudlarini hisobga olishni amalga oshiradi;

6) maʼmuriy tartib-taomillar va davlat xizmatlarini koʻrsatish boʻyicha yagona davlat siyosatini ishlab chiqish va amalga oshirish sohasida:

davlat organlari va tashkilotlarining maʼmuriy tartib-taomillar va davlat xizmatlari sohasidagi faoliyati tahlilini amalga oshiradi;

maʼmuriy tartib-taomillar va davlat xizmatlari sohasida qonun hujjatlari va huquqni qoʻllash amaliyotini takomillashtirish boʻyicha takliflar tayyorlaydi;

vakolatli organlar tomonidan maʼmuriy tartib-taomillar sohasida qonun hujjatlariga rioya etilishi holatini oʻrganadi, davlat xizmatlarini koʻrsatishda nazoratni tashkil qiladi;

davlat xizmatlarini koʻrsatilishining sifati va tezkorligini oshirishga qaratilgan davlat organlari, boshqa tashkilotlar va davlat xizmatlari markazlarining oʻzaro hamkorligini kengaytirish uchun zarur tashkiliy-texnik va moliyaviy-iqtisodiy sharoitlarni yaratishga koʻmaklashadi;

davlat organlari va tashkilotlarining maʼmuriy tartib-taomillari va davlat xizmatlarini koʻrsatishning zamonaviy va yangi shakllari, mexanizmlarini joriy etish boʻyicha faoliyatini muvofiqlashtiradi;

davlat organlari va boshqa tashkilotlarning davlat xizmatlarini koʻrsatish sohasidagi, shu jumladan tegishli axborot tizimlari, resurslar va maʼlumotlar bazalarini joriy etish boʻyicha faoliyati samaradorligini nazorat qilish va baholashni amalga oshirishni tashkil qiladi;

davlat organlari, boshqa tashkilotlar va Oʻzbekiston Respublikasi Yagona interaktiv davlat xizmatlari portali oʻrtasida axborot almashinuvi boʻyicha faoliyatini tashkil etishni muvofiqlashtiradi va koʻmaklashadi;

7) davlat organlari va tashkilotlarining yuridik xizmatlari faoliyatini muvofiqlashtirish, nazorat qilish va uslubiy taʼminlash sohasida:

davlat organlari va tashkilotlarining yuridik xizmatlari faoliyatini muvofiqlashtirishni va nazoratini amalga oshiradi;

davlat organlari va tashkilotlarining yuridik xizmatlari faoliyatini, ular tomonidan amalga oshirilayotgan huquqiy ishlar holatini oʻrganadi

davlat organlari va tashkilotlarining yuridik xizmatlari faoliyatini tartibga soluvchi aniqlangan qonun hujjatlari talablari buzilishlarini bartaraf etish, shuningdek aybdor shaxslarni qonun hujjatlarida belgilangan javobgarlikka tortish boʻyicha choralar koʻradi;

davlat organlari va tashkilotlarining yuridik xizmatlari xodimlarini lavozimiga tayinlash va ozod qilishda ishtirok etadi;

davlat organlari va tashkilotlarining yuridik xizmatlariga huquqiy ishlarga oid koʻrsatmalar beradi;

davlat organlari va tashkilotlari yuridik xizmatlari xodimlarining malakasini oshirishni tashkil qiladi;

davlat organlari va tashkilotlarining yuridik xizmatlari xodimlarini attestatsiyadan oʻtkazish tartibini belgilaydi, attestatsiyadan oʻtganlik toʻgʻrisida guvohnoma beradi;

davlat organlari va tashkilotlari yuridik xizmatlari xodimlarining hisobini yuritadi;

davlat organlari va tashkilotlari yuridik xizmatlarining maʼlumotlar bazasini shakllantirish va yuritish tartibini, maʼlumotlar bazasiga kiritish uchun maʼlumot taqdim etish shakllari va muddatlarini belgilaydi;

davlat organlari va tashkilotlarining yuridik xizmatlari xodimlarini lavozimiga tayinlash va ozod qilish masalasini adliya organlari bilan kelishish tartibini belgilaydi;

davlat organlari va tashkilotlari yuridik xizmatlari xodimlarining adliya organlarida stajirovka oʻtash tartibini belgilaydi;

davlat organlari va tashkilotlarining yuridik xizmati xodimi lavozimiga birinchi marta tayinlangan shaxslarning stajirovka oʻtashini tashkil etadi;

davlat organlari va tashkilotlarining yuridik xizmatlari faoliyatini uslubiy jihatdan taʼminlashni amalga oshiradi;

davlat organlari va tashkilotlari yuridik xizmatlari xodimlarining ish joyini moddiy-texnik jihatdan taʼminlashga qoʻyilgan minimal talablarni ishlab chiqadi va tasdiqlaydi;

8) huquqiy targʻibotni amalga oshirish, aholiga qabul qilinayotgan qonun hujjatlarining mohiyati va ahamiyatini yetkazish, aholining huquqiy savodsizligini yoʻq qilish boʻyicha chora-tadbirlarni amalga oshirish, shuningdek, davlat organlari va tashkilotlarining huquqiy targʻibot sohasidagi ishlarini muvofiqlashtirish sohasida:

davlat organlari va tashkilotlar tomonidan huquqiy targʻibot va maʼrifat boʻyicha olib borilgan ishlarni oʻrganadi, shuningdek, ularning ushbu yoʻnalishdagi faoliyatini takomillashtirish boʻyicha tavsiyalar tayyorlaydi;

davlat organlari va tashkilotlarning huquqiy axborotdan keng koʻlamda foydalanishini taʼminlash, ularning fuqarolik jamiyati institutlari va ommaviy axborot vositalari bilan samarali hamkorlik qilish boʻyicha faoliyatini muvofiqlashtiradi;

ijrochilar va aholini qonunchilikning mohiyati va ahamiyati toʻgʻrisida xabardor qilishning sifatini tubdan oshirish, ushbu faoliyatni tashkil qilishda prinsipial yangi yondashuvlarni ishlab chiqish boʻyicha kompleks chora-tadbirlarni amalga oshiradi;

aholining turli qatlamlari, shu jumladan tadbirkorlar va yoshlarning axborotga boʻlgan ehtiyojlarini hisobga olgan holda huquqiy targʻibotni amalga oshirishning zamonaviy mexanizmlarini joriy etish boʻyicha takliflar ishlab chiqadi;

ijrochilar va aholini qonunchilikning mohiyati va ahamiyati toʻgʻrisida xabardor qilishning sifatini tubdan yaxshilash maqsadida keng jamoatchilik fikrini oʻrganadi va tahlil qiladi, ushbu sohada ishlarni yanada takomillashtirish borasida takliflar ishlab chiqadi.

9) huquqiy axborotni tarqatish va undan foydalanishni taʼminlash:

davlat organlari va tashkilotlarining huquqiy axborotni tarqatish va undan foydalanish imkoniyatini yaratish sohasidagi faoliyatini muvofiqlashtiradi, uslubiy rahbarlikni va nazoratni amalga oshiradi;

normativ-huquqiy hujjatlar va tegishli axborot-tahliliy materiallarning barcha davlat organlari va tashkilotlariga oʻz vaqtida yetkazilishini taʼminlaydi;

huquqiy axborotni yigʻish, qayta ishlash va tahlil qilishning dasturiy-texnik vositalari va texnologiyalari joriy etilishini tashkil qiladi;

davlat organlari va tashkilotlarini zarur normativ-huquqiy hujjatlar bilan taʼminlash choralarini koʻradi;

Oʻzbekiston Respublikasi qonun hujjatlari maʼlumotlari milliy bazasini yaratish va saqlashni tashkil qiladi, yuridik va jismoniy shaxslarning undan foydalanishini belgilangan tartibda taʼminlaydi;

normativ-huquqiy hujjatlarni, shu jumladan normativ-huquqiy hujjatlarni eʼlon qilishning rasmiy manbai hisoblangan “Oʻzbekiston Respublikasi qonun hujjatlari toʻplami”, shuningdek Oʻzbekiston Respublikasi Tashqi ishlar vazirligi bilan birgalikda “Oʻzbekiston Respublikasi xalqaro shartnomalari toʻplami”ning rasmiy nashr etilishini tashkil etadi;

10) notariat, advokatura hamda jismoniy va yuridik shaxslarga huquqiy xizmat koʻrsatuvchi boshqa tuzilmalar tizimining samarali faoliyat koʻrsatishini taʼminlash sohasida:

notariat sohasida davlat siyosatini amalga oshiradi va yagona notarial amaliyotni taʼminlash boʻyicha choralar koʻradi;

notariuslar tomonidan notariat toʻgʻrisidagi qonun hujjatlariga rioya etilishi ustidan nazoratni amalga oshiradi, ularning ishini tahlil qiladi va umumlashtiradi;

notarius vakolatlarini berish boʻyicha tanlov oʻtkazish tartibini belgilaydi;

“Notarius” yagona avtomatlashtirilgan axborot tizimining shakllantirilishini va yuritilishini hamda uni vazirlik va idoralarning maʼlumotlar bazalari va axborot tizimlari bilan integratsiyalashni taʼminlaydi;

chet elda foydalanish uchun moʻljallangan hujjatlardagi notariuslar imzosining va ularning muhri koʻchirmasining haqiqiyligini tasdiqlaydi, notariat faoliyati bilan bogʻliq boʻlgan boshqa funksiyalarni bajaradi;

notarial ish yuritish qoidalarini, notariuslar tomonidan notarial harakatlarni amalga oshirish tartibi toʻgʻrisidagi yoʻriqnomalarni, notarial harakatlar, tasdiqlovchi yozuvlar va guvohnomalarni roʻyxatga olish reyestrlari shaklini, notarius stajyori faoliyatini tashkil etish tartibini tasdiqlaydi;

notariuslar tomonidan statistik maʼlumotlarni taqdim etish shakllarini tasdiqlaydi va muddatlarini belgilaydi;

davlat notarial idoralarini tashkil etadi va tugatadi, notarius lavozimini taʼsis etadi va tugatadi, notarial idoralar reyestrini yuritadi;

notariuslar lavozimlari umumiy sonini tasdiqlaydi va muayyan hududdagi (notarial okrugidagi) notariuslar lavozimlari sonini belgilaydi;

notariuslar malakasini oshirish, ularni attestatsiyadan oʻtkazish va boshqa joyga oʻtkazish (rotatsiya) tartibini belgilaydi;

Vazirlik huzuridagi Oliy malaka komissiyasi va Qoraqalpogʻiston Respublikasi, viloyatlar va Toshkent shahar adliya boshqarmalari huzuridagi malaka komissiyalari toʻgʻrisidagi nizomlarni tasdiqlaydi;

Oʻzbekiston Respublikasining xalqaro shartnomalariga muvofiq tegishli rasmiy hujjatlarga apostil qoʻyadi;

notarial idoralar, Oʻzbekiston Respublikasining chet davlatlardagi konsullik muassasalarini qatʼiy hisobdagi gerbli (maxsus) blanklar bilan taʼminlaydi;

notarial idoralarga beriladigan gerbli blanklarni hisobga olish, saqlash, sarflash va ular boʻyicha hisobot berish tartibini belgilaydi;

pullik xizmatlar va notariuslar tomonidan amalga oshiriladigan huquqiy va texnik tusdagi qoʻshimcha harakatlar roʻyxatlarini, ushbu harakatlar amalga oshirilganligi va xizmatlar koʻrsatilganligi uchun, shuningdek notarial arxivlar tomonidan yuridik va jismoniy shaxslarga notarial tasdiqlangan hujjatlar dublikatlari, roʻyxatlardan koʻchirmalar, maʼlumotnomalar va arxiv hujjatlarining nusxalari berilganligi uchun toʻlovlar miqdorlarini tasdiqlaydi;

advokatlik tuzilmalari va Oʻzbekiston Respublikasi Advokatlar palatasi faoliyati kafolatlarini taʼminlashda koʻmaklashadi;

Oʻzbekiston Respublikasi Advokatlar palatasi bilan birgalikda malaka komissiyalari vakolatlari va faoliyatini tashkil etish tartibini belgilaydi;

Oʻzbekiston Respublikasi Advokatlar palatasi bilan birgalikda Oʻzbekiston Respublikasi Advokatlar palatasi huzuridagi Oliy malaka komissiyasi tarkibini tasdiqlaydi;

advokatlarga litsenziyalar berishni va advokatlik tuzilmalarini davlat roʻyxatidan oʻtkazishni, shuningdek yuridik maslahatxonalarni hisobga qoʻyishni amalga oshiradi;

tegishli adliya organida davlat roʻyxatidan oʻtgan (hisobga qoʻyilgan) advokatlik tuzilmalarida ishlayotgan advokatlarning Yigʻma davlat reyestrini yuritadi;

advokatlar malakasini oshirishda koʻmaklashadi;

Oʻzbekiston Respublikasi Advokatlar palatasi bilan kelishilgan holda advokatlik tuzilmalarining statistik maʼlumotlarini taqdim qilish shakllarini tasdiqlaydi va muddatlarini belgilaydi;

advokatlik guvohnomasi shaklini va uni berish tartibini tasdiqlaydi;

advokat tomonidan ishni olib borishda order shaklini tasdiqlaydi;

advokatlar tomonidan litsenziya talablari va shartlariga, shuningdek advokatlik tuzilmalari tomonidan taʼsis hujjatlariga, ustav faoliyatiga, qayta roʻyxatdan oʻtkazish va tugatish tartibiga rioya qilinishi ustidan nazoratni amalga oshiradi;

advokatura faoliyati toʻgʻrisidagi statistik maʼlumotlarni oʻrganadi;

notarial harakatlar boʻyicha statistikani yuritadi;

11) fuqarolarning huquqlari, erkinliklari va qonuniy manfaatlarini huquqiy himoya qilish boʻyicha choralarni amalga oshirish sohasida:

inson huquqlari sohasidagi qonun hujjatlarini doimiy ravishda tahlil qiladi va uni takomillashtirish yuzasidan takliflar kiritadi;

davlat organlari va tashkilotlari tomonidan inson huquqlari sohasidagi qonun hujjatlariga rioya etilishi ustidan nazoratni amalga oshiradi;

Oʻzbekiston Respublikasi Oliy Majlisining Inson huquqlari boʻyicha vakili va Inson huquqlari boʻyicha Oʻzbekiston Respublikasi milliy markazi bilan oʻzaro hamkorlik qiladi;

davlat organlari va tashkilotlarida inson huquqlari sohasidagi qonun hujjatlariga rioya etilishi holati toʻgʻrisidagi axborot va materiallarni tahlil qiladi va umumlashtiradi, ularni yaxshilash yuzasidan takliflar tayyorlaydi;

fuqarolar oʻz huquqlari va erkinliklari davlat organlari va tashkilotlari tomonidan buzilishi toʻgʻrisidagi murojaatlarini xolisona va har tomonlama koʻrib chiqilishini taʼminlaydi, ularga nisbatan qonun hujjatlariga muvofiq choralar koʻradi;

inson huquqlari va erkinliklari buzilishi mumkin boʻlgan holatlar toʻgʻrisida axborot yigʻish va xalqaro shartnomalarda aks ettirilgan inson huquqlari va erkinliklari universal standart prinsiplarini hisobga olgan holda uni baholashni amalga oshiradi;

inson huquqlari va erkinliklarini himoya qilish sohasida nodavlat notijorat tashkilotlar tomonidan oʻtkazilayotgan monitoring natijalarini oʻrganadi;

fuqarolarning buzilgan huquqlarini tiklash boʻyicha choralar koʻradi;

12) xalqaro-huquqiy hamkorlikni yoʻlga qoʻyish va mustahkamlash, xalqaro shartnomalarni huquqiy ekspertizadan oʻtkazish sohasida:

Oʻzbekiston Respublikasining xalqaro shartnomalarini tuzish boʻyicha takliflarni kelishadi, Oʻzbekiston Respublikasining xalqaro shartnomalarini tayyorlash va ijro etishda ishtirok etadi;

xalqaro shartnomalar loyihalarini huquqiy ekspertizadan oʻtkazadi;

Oʻzbekiston Respublikasining huquqiy yordam koʻrsatish toʻgʻrisidagi xalqaro shartnomalarini tayyorlash, tuzish va bajarish haqida takliflar taqdim etadi;

adliya organlari faoliyati sohasidagi xalqaro-huquqiy normalarni oʻrganadi va Oʻzbekiston Respublikasi qonunchiligini ularga muvofiqlashtirishga doir takliflarni kiritadi;

xorijdan mablagʻ jalb qilish shartnomalari va Oʻzbekiston Respublikasi davlat kafolatlari boʻyicha belgilangan tartibda yuridik xulosalar beradi;

xorijiy va xalqaro tashkilotlar bilan hamkorlik toʻgʻrisida shartnomalar tuzish boʻyicha takliflar tayyorlaydi;

xorijiy va xalqaro tashkilotlar bilan xalqaro hamkorlikni oʻrnatadi va rivojlantiradi;

13) xalqaro va xorijiy tashkilotlarda Oʻzbekiston Respublikasi manfaatlarining huquqiy himoyasini taʼminlash, xalqaro hamjamiyat, xorijiy investorlarni milliy huquq tizimi va oʻtkazilayotgan huquqiy islohotlar haqida oʻz vaqtida xabardor qilish sohasida:

xalqaro va xorijiy tashkilotlarda Oʻzbekiston Respublikasi manfaatlarining huquqiy himoyasini taʼminlaydi;

xalqaro arbitraj va sud muhokamalari masalalari boʻyicha xalqaro va xorijiy tashkilotlarda Oʻzbekiston Respublikasi manfaatlarining huquqiy himoyasini taʼminlaydi, shuningdek ushbu sohalarda Tashqi ishlar vazirligi hamda boshqa davlat organlari va tashkilotlari bilan idoralararo hamkorlikni amalga oshiradi;

xalqaro shartnomalarga muvofiq xalqaro va xorijiy tashkilotlarda Oʻzbekiston Respublikasi manfaatlarini ifodalaydi;

xorijiy davlatlar sudlarida va xalqaro arbitrajlarda tomonlardan biri Oʻzbekiston Respublikasi boʻlgan nizolar koʻrib chiqilayotganda Oʻzbekiston Respublikasi manfaatlarini himoya qiladi;

Oʻzbekiston Respublikasi ishtirokidagi sud va arbitraj muhokamalari bilan bogʻliq tegishli materiallarni yigʻishni hamda tizimli tahlilini tashkillashtirishni amalga oshiradi;

xalqaro arbitraj muhokamalari vujudga kelishini oldini olish boʻyicha takliflarni ishlab chiqadi, xorijiy davlatlar sudlari va xalqaro arbitrajlarda Oʻzbekiston Respublikasi manfaatlarining samarali himoyasini taʼminlashga qaratilgan qonun hujjatlarini takomillashtirish boʻyicha choralar koʻradi;

xorijiy davlatlar sudlari va xalqaro arbitrajlarda Oʻzbekiston Respublikasi manfaatlarini ifodalash maqsadida xorijiy va milliy advokatlik (yuridik) firmalari, maslahatchi va ekspertlarni jalb qiladi hamda faoliyatini muvofiqlashtiradi;

aniq bir arbitraj muhokamasi doirasida tashkil etiladigan ishchi guruhlarning ishchi organi funksiyalarini amalga oshiradi;

xorijiy davlatlar sudlari va xalqaro arbitrajlar muhokamalari masalalari boʻyicha maʼlumotlar bazasini shakllantiradi va yuritadi;

Oʻzbekiston Respublikasi Prezidenti va eks-Prezidentining huquqlari va qonuniy manfaatlarini huquqiy, shu jumladan sudda himoya qilishni amalga oshiradi;

mamlakatda amalga oshirilayotgan huquqiy islohotlar, eng avvalo inson huquqlari va erkinliklarini himoya qilish masalalari boʻyicha, shu jumladan ishonchsiz maʼlumotlarni inkor qilish maqsadida xolis axborotni xalqaro hamjamiyatga va jamoatchilikka yetkazishni taʼminlaydi;

vakolatli organlar ishtirokida Oʻzbekiston Respublikasi fuqarolarining huquqlari va erkinliklari buzilishi, shu jumladan xalqaro tashkilotlardan kelib tushgan qiynoqqa solish va boshqa shafqatsiz inson qadr-qimmatini kamsituvchi muomala turlarini qoʻllashga doir murojaatlarni koʻrib chiqadi;

Oʻzbekiston Respublikasining tegishli davriy maʼruzalarini koʻrib chiqish natijasi boʻyicha BMT konvension organlarining yakuniy eʼtirozlari va tavsiyalarining ijrosi boʻyicha milliy harakat rejalarining amalga oshirilishini monitoring qiladi;

Oʻzbekiston Respublikasining tegishli davriy maʼruzalarini koʻrib chiqish natijasi boʻyicha BMT konvension organlarining yakuniy eʼtirozlari va tavsiyalarini koʻrib chiqadi;

Oʻzbekiston Respublikasining tegishli davriy maʼruzalarini koʻrib chiqish natijalari boʻyicha BMT konvension organlarining yakuniy eʼtirozlari va tavsiyalarining ijrosi yuzasidan milliy harakat rejalari ishlab chiqilishida ishtirok etadi;

tegishli davriy maʼruzalarni koʻrib chiqish natijalari boʻyicha BMT konvension organlarining yakuniy eʼtirozlari va tavsiyalarini bajarish yuzasidan milliy harakat rejalarining ijrosi asosida huquqni muhofaza qiluvchi va boshqa davlat organlari, fuqarolik jamiyati institutlari uchun inson huquqlari va erkinliklariga rioya etilishi masalalari boʻyicha uslubiy tavsiyanomalar ishlab chiqadi;

14) yuridik kadrlarni tayyorlash, qayta tayyorlash va malakasini oshirishni tashkil etish, yurisprudensiya sohasidagi fundamental va amaliy tadqiqotlarni amalga oshirishni taʼminlash sohasida:

huquqiy taʼlimning holatini tahlil qiladi, uni yaxshilash boʻyicha takliflar ishlab chiqadi;

oliy va oʻrta maxsus, kasb-hunar taʼlimi muassasalarining talabalari va oʻquvchilari uchun yuridik darsliklar, oʻquv qoʻllanmalari, shuningdek boshqa yuridik adabiyotlar nashr etish rejalarini ishlab chiqadi va nashr etilishini tashkil etadi;

davlat organlari va boshqa tashkilotlarning yuridik kadrlarga boʻlgan ehtiyojini aniqlaydi, ularni Vazirlik tizimidagi taʼlim muassasalarida tayyorlash ishlarini tashkil etadi va rahbarlik qiladi;

yuridik kadrlarni tayyorlash, qayta tayyorlash va malakasini oshirishni amalga oshiruvchi taʼlim muassasalarini akkreditatsiya qilishda, ularning pedagog va ilmiy xodimlarini attestatsiyadan oʻtkazishda ishtirok etadi;

xorijiy davlatlarda yurisprudensiya sohasida berilgan taʼlim va ilmiy unvonlar haqidagi hujjatlarni eʼtirof etish va nostrifikatsiya qilishda (ekvivalentligini belgilashda) ishtirok etadi;

yuridik kadrlarni tayyorlash, qayta tayyorlash va malakasini oshirishni tashkil etadi;

yuristlarni tayyorlash, qayta tayyorlash va malakasini oshirish tizimini, kadrlar ishini takomillashtirish boʻyicha takliflar ishlab chiqadi;

kadrlar zaxirasini yaratadi, ularni tayyorlash, qayta tayyorlash va stajirovkadan oʻtishini tashkil etadi, adliya organlari va muassasalariga kadrlar tanlovini amalga oshiradi va ularni joy-joyiga qoʻyishda qatnashadi;

huquqiy fanlarni rivojlantirish choralarini koʻradi, davlat va jamiyat qurilishi, sud-huquq tizimi, mamlakatda huquq ijodkorligi, huquqni qoʻllash, huquqni muhofaza qilish faoliyati sohalarida fundamental va amaliy tadqiqotlarning amalga oshirilishini muvofiqlashtiradi;

huquq sohasidagi taʼlim ishlarining uslubiy jihatdan taʼminlanishini tashkil etadi, huquqiy tarbiya va taʼlimning zamonaviy shakllarini joriy etish boʻyicha tavsiyalar ishlab chiqadi;

15) sud ekspertlik faoliyatini rivojlantirishning ustuvor yoʻnalishlarini ishlab chiqish, sud ekspertlarini tayyorlash va malakasini oshirish ishlarini muvofiqlashtirish sohasida:

sud ekspertizasi sohasida ilmiy-tadqiqot, ekspertlik ishlarini tashkil etadi;

Oʻzbekiston Respublikasi davlat sud-ekspert muassasalari faoliyatini muvofiqlashtiradi va ularga ilmiy-uslubiy rahbarlikni amalga oshiradi, shuningdek Sud ekspertizasi muammolari boʻyicha kengashni boshqaradi;

sud ekspertlik faoliyatini yanada rivojlantirishning ustuvor yoʻnalishlarini ishlab chiqadi, sud ekspertlarini tayyorlash va malakasini oshirish sohasidagi ishlarni muvofiqlashtiradi;

sud ekspertlik faoliyatiga fan va texnika yutuqlarini joriy etish boʻyicha choralarni koʻradi;

sud ekspertizasi sohasidagi tizimli muammolarni kompleks oʻrganish va ularni hal etishga doir ilmiy asoslangan takliflar va taʼsirchan mexanizmlarni ishlab chiqadi;

16) adliya organlari va muassasalari faoliyatida, birinchi navbatda aholiga huquqiy xizmat koʻrsatish va davlat xizmatlarini koʻrsatish sohasida zamonaviy axborot-kommunikatsiya texnologiyalarini qoʻllagan holda ishlashning innovatsion uslublarini joriy qilish sohasida:

ilmiy-tadqiqot va innovatsiya faoliyatining zamonaviy yutuqlari asosida adliya organlari va muassasalariga axborot-kommunikatsiya texnologiyalarini joriy qilish va rivojlantirish strategiyasini belgilaydi;

elektron hukumat loyihalarini adliya organlari va muassasalarida samarali amalga oshirilishini taʼminlaydi;

innovatsion va axborot-kommunikatsiya texnologiyalarini joriy qilish va idoralararo elektron hamkorlikni rivojlantirish yoʻli bilan adliya organlarining aholi va tadbirkorlik subyektlari bilan hamkorligi shakllarini takomillashtirish boʻyicha choralarni amalga oshiradi;

adliya organlari va muassasalarida axborot-kommunikatsiya texnologiyalarini, shu jumladan elektron hukumatni joriy qilish va rivojlantirish uchun normativ-huquqiy bazani takomillashtirish boʻyicha takliflarni tayyorlaydi;

adliya organlari va muassasalari rasmiy saytlari, boshqa axborot resurslarini Internet tarmogʻida rivojlantirish va modernizatsiya qilish boʻyicha choralarni amalga oshiradi;

adliya organlari va muassasalarida axborot texnologiyalarini rivojlantirish, axborot xavfsizligini taʼminlash sohasida tartibga soluvchi va texnik hujjatlarni ishlab chiqadi.

Oʻzbekiston Respublikasi adliya vaziri (keyingi oʻrinlarda — Vazir deb yuritiladi) har yili Oʻzbekiston Respublikasi Oliy Majlisi Senatiga davlat organlari va tashkilotlarining huquq ijodkorligi faoliyati va huquqni qoʻllash amaliyoti holati toʻgʻrisida axborot kiritadi.

Vazirlik qonun hujjatlarida belgilangan boshqa funksiyalarni ham amalga oshirishi mumkin.

17) intellektual mulk sohasida yagona davlat siyosatini ishlab chiqish va amalga oshirish sohasida:

intellektual mulk sohasini rivojlantirish boʻyicha asosiy yoʻnalishlarni ishlab chiqishni amalga oshiradi;

intellektual mulk sohasining rivojlanish holatini, shu jumladan mazkur sohadagi xalqaro reytinglar va indekslar mezonlari va metodologiyalari asosida har tomonlama tahlil qilish va baholashni amalga oshiradi;

intellektual mulk sohasida qonunchilikni va huquqni qoʻllash amaliyotini takomillashtirish boʻyicha takliflarni tayyorlaydi;

intellektual mulk sohasidagi qonunchilikka rioya etilishi ahvolini oʻrganadi;

intellektual mulk sohasida huquqbuzarliklarni aniqlash va oldini olish boʻyicha huquqni muhofaza qiluvchi, soliq va boshqa davlat organlari bilan hamkorlik boʻyicha faoliyatni muvofiqlashtiradi;

intellektual mulk sohasida normativ-huquqiy hujjatlarni qoʻllash amaliyotini oʻrganadi va tahlil qiladi;

intellektual mulk sohasida davlat organlari va boshqa tashkilotlar faoliyati samaradorligini nazorat qilish va baholashning amalga oshirilishini tashkil etadi.

11. Vazirlikning markaziy apparati, hududiy va tarkibiy tuzilmalari funksiyalari, agar Oʻzbekiston Respublikasi Prezidentining yoki Vazirlar Mahkamasining qarorlarida boshqacha qoida belgilanmagan boʻlsa, Vazir tomonidan tasdiqlanadigan nizomlar va ustavlar bilan belgilanadi.

12. Vazirlik oʻziga yuklatilgan vazifalar va funksiyalarni amalga oshirish uchun quyidagi huquqlarga egadir:

1) oʻz vakolati doirasida davlat organlari va tashkilotlari, jismoniy va yuridik shaxslar uchun majburiy boʻlgan, shu jumladan boshqa davlat organlari bilan birgalikda normativ-huquqiy hujjatlarni qabul qilish;

2) Oʻzbekiston Respublikasi Prezidenti, Vazirlar Mahkamasi va boshqa davlat organlari koʻrib chiqishi uchun qonun hujjatlarini va huquqni qoʻllash amaliyotini takomillashtirish masalalari boʻyicha takliflar kiritish;

3) davlat organlari va tashkilotlarida:

norma ijodkorligi faoliyati, huquqiy ishlar, yuridik xizmatlar faoliyati, normativ-huquqiy hujjatlarni eʼlon qilish va manfaatdor shaxslar eʼtiboriga yetkazish holatini;

huquqni qoʻllash amaliyoti, fuqarolar huquqlarini taʼminlash boʻyicha qonun hujjatlari ijrosi, davlat xizmatlarini koʻrsatishning belgilangan tartibiga rioya etish holatini, shu jumladan joylarga chiqqan holda tekshirish;

4) nodavlat notijorat tashkilotlari tomonidan qonun hujjatlari va taʼsis hujjatlariga rioya qilinishi, shuningdek ularga ajratilgan mablagʻlardan maqsadli foydalanishini tekshirish;

5) vazirliklar, davlat qoʻmitalari, idoralar, huquqni muhofaza qiluvchi va nazorat organlari, mahalliy davlat hokimiyati organlari va boshqa tashkilotlarga bajarilishi majburiy boʻlgan:

davlat roʻyxatidan oʻtmagan normativ-huquqiy tusga ega boʻlgan hujjatlarni bekor qilish va ijrodan chaqirib olish toʻgʻrisida;

qonun hujjatlariga muvofiq boʻlmagan normativ-huquqiy hujjatlarni bekor qilish, toʻxtatib turish (toʻliq yoki qisman) yoxud ularni qonun hujjatlariga muvofiqlashtirish toʻgʻrisida;

ishlab chiqish muddatini koʻrsatgan holda normativ-huquqiy hujjatlarni qabul qilish, ular tomonidan qabul qilingan normativ-huquqiy hujjatlarga rasmiy sharh berish zarurligi toʻgʻrisida;

huquqni qoʻllash amaliyoti, fuqarolarning huquqlariga rioya qilish boʻyicha qonun hujjatlarini bajarish holatini tekshirish davomida aniqlangan huquqbuzarliklarga yoʻl qoʻymaslik, ularning sodir etilishiga koʻmaklashuvchi sabablar va shart-sharoitlarni bartaraf etish toʻgʻrisida;

davlat organlari va tashkilotlarining yuridik xizmati faoliyati, maʼmuriy tartib-taomillar va davlat xizmatlarini koʻrsatish sohasida aniqlangan huquqbuzarliklarga yoʻl qoʻymaslik, ularning sodir etilishiga koʻmaklashuvchi sabablar va shart-sharoitlarni bartaraf etish toʻgʻrisida taqdimnomalarni kiritish;

davlat boshqaruvi organlari tomonidan huquqiy monitoring yakunlari boʻyicha oʻz vaqtida taqdim etilmagan, notoʻgʻri, ishonchsiz yoki toʻliq boʻlmagan axborot taqdim etilgan taqdirda, ularga nisbatan huquqiy monitoringni oʻtkazishdagi qoidabuzarliklarni bartaraf etish toʻgʻrisida bajarilishi majburiy boʻlgan taqdimnomalar kiritish;

6) nodavlat notijorat tashkilotlar faoliyatida aniqlangan qonun hujjatlari va taʼsis hujjatlari buzilishlarini bartaraf etish toʻgʻrisida nodavlat notijorat, shu jumladan diniy tashkilotlariga, advokatlik tuzilmalariga bajarilishi majburiy boʻlgan taqdimnomalar kiritish;

7) qonun hujjatlari buzilishiga yoʻl qoʻymaslik haqida mansabdor shaxslarini yozma ravishda ogohlantirish;

8) fuqarolarning qonuniy huquq va erkinliklari, yuridik xizmatlarni faoliyati sohasidagi qonun hujjatlari buzilishi holatlari aniqlaganda hamda adliya organlarining qonuniy talablari bajarilmaganda, aybdor mansabdor shaxslarni javobgarlikka tortish toʻgʻrisida tegishli davlat organlariga takliflar kiritish;

9) davlat, yuridik va jismoniy shaxslar manfaatlarini koʻzlab sudlarga davlat boji toʻlamasdan arizalar va daʼvolarni kiritish;

10) normativ-huquqiy hujjatlarni qoʻllash amaliyoti toʻgʻrisida zarur statistik maʼlumotlarni, tahliliy materiallarni, hujjatlarni, boshqa axborotlarni, qarorlar va boshqa hujjatlarni, maʼlumotlarni davlat organlari va tashkilotlaridan bepul tarzda soʻrash va olish;

11) nodavlat notijorat, shu jumladan diniy tashkilotlardan axborot, hujjatlar va maʼlumotlar, shuningdek ularning rahbarlari va masʼul shaxslaridan tushuntirishlarni talab qilish va olish;

12) tekshirish oʻtkazish, jismoniy va yuridik shaxslarning murojaatlarini oʻrganish, shuningdek Vazirlik vakolatiga kiruvchi masalalar boʻyicha axborot-tahliliy materiallarni tayyorlash uchun vazirliklar, davlat qoʻmitalari, idoralar, ilmiy va taʼlim muassasalari va boshqa tashkilotlar vakillarini chaqirish va jalb etish;

13) tekshirish va tahlil davomida aniqlangan holatlarga aniqlik kiritish maqsadida davlat organlari va boshqa tashkilotlarning mansabdor shaxslari hamda xodimlarini chaqirish, qonun hujjatlarining buzilishi holatlari yuzasidan ogʻzaki va yozma tushuntirishlar talab qilish;

14) davlatga tegishli Vazirlikning va unga idoraviy mansub tuzilmalarning mol-mulkini oʻzining tashkiliy tuzilmasi doirasida bepul foydalanish huquqi bilan bir tarkibiy tuzilmadan boshqa tuzilmaga belgilangan tartibda oʻtkazish;

15) Vazirlik va unga idoraviy mansub tashkilotlar xodimlari tomonidan oʻz sohasida ular faoliyatining asosiy koʻrsatkichlari boʻyicha parametrlar bajarilishini hisobga olgan holda ularni moddiy ragʻbatlantirish tartibi, miqdorlari va shartlarini belgilash;

16) budjetdan tashqari mablagʻlarni hamda adliya organlari va muassasalarining depozit hisob raqamlarida joylashgan mablagʻlarni Oʻzbekiston Respublikasi tijorat banklarining depozit raqamlarida milliy va xorijiy valyutada joylashtirish. Bunda, mablagʻlarni joylashtirishdan olingan daromad adliya organlari va muassasalarining budjetdan tashqari hisob raqamalariga ushbu daromadlar moddiy-texnik bazani, ijtimoiy rivojlantirishga va xodimlarini moddiy ragʻbatlantirish hamda qonun hujjatlarida nazarda tutilgan boshqa maqsadlarga yoʻnaltirgan holda oʻtkaziladi;

17) Vazirlik vakolatiga kiradigan masalalar boʻyicha idoralararo tusdagi xalqaro shartnomalarni belgilangan tartibda tuzish;

18) Vazirlik vakolatiga tegishli boʻlgan masalalar boʻyicha xalqaro darajada Oʻzbekiston Respublikasi manfaatlarini belgilangan tartibda ifodalash;

19) qonunlar, Oʻzbekiston Respublikasi Prezidenti hujjatlari va Vazirlar Mahkamasi qarorlariga zid boʻlgan idoraviy normativ-huquqiy hujjatlarni belgilangan tartibda davlat reyestridan chiqarish;

20) jismoniy va yuridik shaxslarning oʻz huquqlari, erkinliklari va qonuniy manfaatlari buzilganligi toʻgʻrisida murojaatlarni koʻrib chiqish;

21) Vazirlik vakolatiga kiruvchi masalalarni koʻrib chiqishda davlat organlari va tashkilotlarining hayʼat majlislarida ishtirok etish;

22) xorijiy davlatlarning sudlari va xalqaro arbitrajlarda Oʻzbekiston Respublikasining huquqlari va qonuniy manfaatlariga daxldor huquqiy nizolar boʻyicha daʼvogar va javobgarning vakili sifatida ishtirok etish;

23) advokatlar malaka komissiyalariga advokatlarni intizomiy javobgarlikka tortish masalasini kiritish;

24) advokatlarga berilgan litsenziyalarning amal qilishini toʻxtatib turish va tugatish;

25) yuridik xizmat xodimining attestatsiyadan oʻtganligi toʻgʻrisidagi guvohnomaning amal qilishini tugatish;

26) nodavlat notijorat tashkilotlari tomonidan oʻtkaziladigan tadbirlarda (konferensiyalar, seminarlar, treninglar, yigʻilishlar, aksiyalar va shu kabilarda) ishtirok etish;

27) nodavlat notijorat, shu jumladan diniy tashkilotlar tomonidan rejalashtirilgan tadbirlarni oʻtkazilishini taqiqlash yuzasidan qaror qabul qilish;

28) siyosiy partiyalarning ustavlarida nazarda tutilgan faoliyatini davlat tomonidan moliyalashtirishni toʻxtatib turish yoki tugatish toʻgʻrisida qaror qabul qilish;

29) nodavlat notijorat tashkilotlarning chet el fuqarolari boʻlgan xodimlarini, shuningdek ularning qaramogʻidagi oila aʼzolarini, ular tomonidan Oʻzbekiston Respublikasining qonun hujjatlari buzilgan hollarda akkreditatsiyadan mahrum qilish;

30) oʻz vakolatlari doirasida xorijiy davlatlar organlari va xalqaro tashkilotlar bilan toʻgʻridan-toʻgʻri aloqalar oʻrnatish;

31) adliya organlari va muassasalari faoliyatini taʼminlash uchun zarur boʻlgan tegishli tuzilmalar tashkil etish, ularni qayta tashkil etish va tugatish, shuningdek ularning ustavlari (nizomlari)ni tasdiqlash;

32) davlat siri va qonun bilan qoʻriqlanadigan boshqa sirga rioya qilish sharti bilan tekshirishni oʻtkazish uchun zarur boʻlgan hujjatlar va materiallar bilan tanishish, davlat organlarining elektron bazalaridan (banklaridan) foydalanish uchun xizmat guvohnomasini koʻrsatgan holda davlat organlari va boshqa tashkilotlarning hududlariga va binolariga kirish;

33) oʻz vakolati doirasida maʼmuriy javobgarlikni keltirib chiqaradigan holatlar yuzasidan maʼmuriy huquqbuzarliklar toʻgʻrisida bayonnomalar tuzish;

34) davlat boshqaruvi organlari tomonidan oʻtkaziladigan qonun hujjatlarining huquqiy monitoringida ishtirok etish.

Vazirlik qonun hujjatlariga muvofiq boshqa huquqlarga ham ega boʻlishi mumkin.

13. Vazirlikning markaziy apparati, hududiy va tarkibiy tuzilmalarining huquqlari, agar Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasining qarorlarida boshqacha qoida nazarda tutilmagan boʻlsa, Vazir tomonidan tasdiqlanadigan nizomlar (ustavlar) bilan belgilanadi.

14. Vazirlik:

oʻziga yuklatilgan vazifalar va funksiyalarning samarali bajarilishi, shuningdek, tegishli sohadagi davlat siyosatining samarali amalga oshirilishi;

oʻz faoliyati bilan bogʻliq prognoz koʻrsatkichlarga soʻzsiz erishilishini taʼminlash;

Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Vazirlik tomonidan qabul qilinadigan buyruqlar amalga oshirilishining sifati, pirovard natijalari va oqibatlari;

oʻz faoliyati sohasini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning samarali amalga oshirilishi uchun javobgardir.

15. Vazirlikning markaziy apparati:

Vazirlikning tarkibiy va hududiy tuzilmalari bilan birgalikda Vazirlikka yuklangan vazifalar va funksiyalarning samarali bajarilishini taʼminlash;

Vazirlik faoliyati bilan bogʻliq prognoz koʻrsatkichlarga erishishni taʼminlash boʻyicha Vazirlik markaziy apparati tuzilmalarining ishini tashkil etish;

Vazirlik tomonidan koʻrib chiqish uchun Oʻzbekiston Respublikasi Vazirlar Mahkamasi va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek Vazirlik tomonidan qabul qilinadigan buyruqlarning tayyorlanishi va ekspertizadan oʻtkazilishi sifati;

oʻz faoliyat sohasini rivojlantirish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarning tarkibiy va hududiy tuzilmalar hamda idoraviy mansub tashkilotlar tomonidan amalga oshirilishini tashkil etish uchun javobgardir.

16. Vazirlikning Qoraqalpogʻiston Respublikasi, viloyatlar va Toshkent shahri, tumanlar (shaharlar)dagi hududiy tuzilmalari:

Vazirlikning tegishli hududiy tuzilmasiga yuklangan vazifalar va funksiyalar sifatli va oʻz vaqtida bajarilishini taʼminlash;

Vazirlikning tegishli hududiy tuzilmasi faoliyati bilan bogʻliq boʻlgan prognoz koʻrsatkichlarga erishishni taʼminlash;

Vazirlikka kiritilayotgan hujjatlar loyihalari va takliflar, shuningdek, Vazirlikning hududiy tuzilmalari tomonidan qabul qilinadigan qarorlarning amalga oshirilishi sifati, pirovard natijalari va oqibatlari;

huquqni qoʻllash amaliyotida aniqlangan muammolarni har tomonlama va chuqur tahlil qilish asosida oʻz hududida tegishli sohani rivojlantirishga doir takliflarni tayyorlash;

oʻz faoliyati sohasini rivojlantirish, muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlarni tegishli hududda samarali amalga oshirilishi uchun javob beradi.

17. Quyidagilar Vazirlik birinchi rahbari — vazirning asosiy funksional vazifalari hisoblanadi:

1) Vazirlik faoliyatini umumiy boshqarishni amalga oshirish, Oʻzbekiston Respublikasi Prezidenti, Vazirlar Mahkamasining tegishli qarori bilan Vazirlikka yuklatilgan vazifa va funksiyalarni bajarishni tashkillashtirish;

2) Oʻzbekiston Respublikasi Prezidenti, Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish boʻyicha konsepsiyalar, kompleks dasturlar va kompleks tadbirlar ijrosini tanqidiy va chuqur tahlil qilish;

3) Vazirlik, uning tegishli tarkibiy va hududiy tuzilmalari faoliyati bilan bogʻliq boʻlgan prognoz koʻrsatkichlariga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

4) Oʻzbekiston Respublikasi Prezidenti Administratsiyasi tarkibiy boʻlinmalari va Vazirlar Mahkamasining komplekslari hamda Vazirlik faoliyati sohasiga kiradigan masalalar boʻyicha tegishli vazirlik va idoralar bilan hamkorlik qilish, Vazirlar Mahkamasi yigʻilishlarida va uning Prezidiumidagi masalalarni koʻrib chiqishda qatnashish;

5) Oʻzbekiston Respublikasi Prezidenti, Oʻzbekiston Respublikasi Bosh vaziri topshiriqlarini bajarish;

6) oʻz oʻrinbosarlari vakolatlarini belgilash, ular oʻrtasida vazifalarni taqsimlash, Vazirlikning boshqa mansabdor shaxslari vakolatlarini belgilash, Vazirlik faoliyatining alohida uchastkalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy masʼuliyati darajasini belgilash;

7) Vazirlik faoliyati rejalashtirilishini tashkil etish, Vazirlikning davriy ish rejalarini tasdiqlash, ularning bajarilishi ustidan nazoratni taʼminlash;

8) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini tashkil etish va monitoringini olib borishning amaliy tizimini yaratish, Vazirlik faoliyatida ijro intizomini mustahkamlash boʻyicha kompleks amaliy chora-tadbirlarni bajarish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari hamda barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va boshqa qonun hujjatlariga muvofiq topshiriqlarning oʻz vaqtida va sifatli bajarilishi uchun tarkibiy va hududiy tuzilmalar rahbarlarining shaxsiy masʼuliyatini oshirish choralarini koʻrish;

9) Vazirlik xodimlarini tizimli qayta tayyorlashni va ularning malakasini oshirishni tashkil etish;

10) Vazirlik tizimida kadrlarni tanlash va joy-joyiga qoʻyish, ularning mutaxassisliklariga (yurisprudensiya, iqtisod, moliya, psixologiya, tashqi aloqalar, filologiya va h.k) talablar belgilash, samarali faoliyati uchun zarur shart-sharoitlar yaratish, Vazirlikning kadrlar zaxirasini shakllantirish;

11) Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi nomenklaturasiga kiradigan boʻsh lavozimlarga taklif etilgan kadrlarning, shuningdek Vazirlikka ishga qabul qilinayotgan boshqa kadrlarning professionalligi va oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlashga qaratilgan choralarni amalga oshirish;

12) Oʻzbekiston Respublikasi Prezidenti, Vazirlar Mahkamasi topshiriqlariga va oʻz tashabbusiga koʻra normativ-huquqiy hujjatlar loyihalari sifatli ishlab chiqilishini, ularni “Normativ-huquqiy hujjatlar toʻgʻrisida”gi, “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Oʻzbekiston Respublikasi Vazirlar Mahkamasining Reglamenti hamda Oʻzbekiston Respublikasi Prezidenti Administratsiyasining Reglamenti talablariga qatʼiy muvofiq ravishda oʻz vaqtida Vazirlar Mahkamasiga kiritilishini tashkil etish, ularning Vazirlar Mahkamasi apparatida puxta ishlanishida, Vazirlar Mahkamasida himoya qilinishi va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

13) “Normativ-huquqiy hujjatlar toʻgʻrisida”gi, “Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga va Davlat va xoʻjalik boshqaruvi organlari, mahalliy ijro etuvchi hokimiyat organlarining qonun loyihasini tayyorlash faoliyatining Namunaviy reglamentiga muvofiq Vazirlikning qonun loyihalarini tayyorlash faoliyatini tashkil etish;

14) oʻz vakolati doirasida normativ-huquqiy hujjatlar qabul qilish, zarur hollarda davlat boshqaruvining boshqa organlari bilan birgalikda qarorlar va boshqa hujjatlarni birgalikda qabul qilish;

15) Vazirlik rahbarlari va xodimlari xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlish samaradorligi va xorijiy delegatsiyalarning Oʻzbekiston Respublikasiga tashriflarini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

16) oʻz oʻrinbosarlari va hududiy tuzilmalar, shuningdek idoraviy mansub tashkilotlar rahbarlari faoliyati samaradorligini va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

17) Vazirlikning hududiy va tarkibiy tuzilmalarining rahbarlari faoliyatini muvofiqlashtirish va nazorat qilish;

18) Vazirlik xodimlarini ragʻbatlantirish va intizomiy javobgarlikka tortish masalalarini hal etish, oʻzining oʻrinbosarlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligi masalasini koʻrib chiqish boʻyicha takliflarni kiritish, ularning shaxsiy masʼuliyatini oshirish boʻyicha tizimli chora-tadbirlar koʻrish;

19) Vazirlik xodimlarining Davlat boshqaruvi organlari xodimlarining odob-axloq qoidalari talablariga rioya qilishi ustidan nazoratni tashkil etish;

20) huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

21) Vazirlik, uning tarkibiy va hududiy tuzilmalari ish faoliyatining zamonaviy shakllarini joriy etishni taʼminlash;

22) qonun hujjatlarida belgilangan muddatlarda va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

23) Oʻzbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Vazirlikning rahbarlari va xodimlarini ularning faoliyatida faol ishtirok etishini, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan kelib tushgan murojaatlari oʻz vaqtida va toʻlaqonli koʻrib chiqilishini taʼminlash;

24) adliya organlari va muassasalari xodimlariga belgilangan tartibda martaba darajalarini berish hamda oliy martaba darajalari berish uchun ularni, shuningdek qonun hujjatlarida belgilangan tartibda boshqa davlat organlari xodimlarini Oʻzbekiston Respublikasi Prezidentiga taqdim etish;

25) Oʻzbekiston Respublikasi Adliya vazirligi tizimidagi moliyaviy mutanosiblikni taʼminlash uchun adliya organlari va muassasalarining budjetdan tashqari mablagʻlarini qayta taqsimlash;

26) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

18. Quyidagilar vazir oʻrinbosarlarining asosiy funksional vazifalari hisoblanadi:

1) Vazirlik rahbari vaqtincha boʻlmaganida Vazir buyrugʻi asosida uning vazifalarini bajarish;

2) Vazirlikning mutasaddilik qilinadigan tarkibiy tuzilmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

3) Vazirlik faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidenti va Vazirlar Mahkamasining qarorlari bilan tasdiqlangan Vazirlik faoliyatini yanada takomillashtirish boʻyicha konsepsiyalar, kompleks dasturlar va kompleks tadbirlar ijrosini tanqidiy va chuqur tahlil qilish;

4) mutasaddilik qilinadigan tarkibiy tuzilmalar tomonidan prognoz koʻrsatkichlarga erishishni soʻzsiz taʼminlash chora-tadbirlarini koʻrish, tuzilmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

5) mutasaddilik qilinadigan tarkibiy tuzilmalarning rejalarini tasdiqlash, ularning bajarilishi ustidan nazoratni taʼminlash;

6) Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini taʼminlash, Vazirlikning mutasaddilik qilinadigan tarkibiy tuzilmalarida ijro intizomi boʻyicha kompleks amaliy chora-tadbirlarni amalga oshirish, shuningdek Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va boshqa qonun hujjatlariga muvofiq topshiriqlar oʻz vaqtida va sifatli ijro etilishi uchun tarkibiy tuzilmalar rahbarlarining shaxsiy masʼuliyatini oshirish chora-tadbirlarini koʻrish;

7) Vazirlik hayʼati, Vazirning buyruqlari va topshiriqlari oʻz vaqtida va sifatli bajarilishini taʼminlash;

8) mutasaddilik qilinadigan tarkibiy tuzilmalarda kadrlarni tanlash va joy-joyiga qoʻyish boʻyicha Vazirga takliflar taqdim etish, ularning professionalligi, oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlash, ularning kasbiy malakasini oshirish chora-tadbirlarini koʻrish, mutasaddilik qilinadigan tarkibiy tuzilmalarda kadrlar zaxirasini shakllantirish;

9) mutasaddilik qilinadigan tarkibiy tuzilmalar tomonidan normativ-huquqiy hujjatlar loyihalari sifatli ishlab chiqilishini tashkil etish, Vazirlikning mutasaddilik qilinadigan tarkibiy tuzilmalarida tayyorlangan hujjatlar loyihalarini koʻrib chiqish va ular keyinchalik Vazir tomonidan koʻrib chiqilishi, imzolanishi (viza qoʻyilishi) uchun viza qoʻyish, ularning Oʻzbekiston Respublikasi Prezidenti Administratsiyasi Reglamenti va Oʻzbekiston Respublikasi Vazirlar Mahkamasining Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, shuningdek Vazirlar Mahkamasi apparatida normativ-huquqiy hujjatlar loyihalarini ishlab chiqishda Vazirning topshirigʻiga binoan ishtirok etish;

10) Vazirlikka taqdim etilgan takliflar va normativ-huquqiy hujjatlar loyihalari toʻliq va oʻz vaqtida koʻrib chiqilishini taʼminlash, ularni puxta huquqiy ekspertizadan oʻtkazish;

11) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

12) mutasaddilik qilinadigan tarkibiy tuzilmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, Vazirlik hayʼati majlislarida ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

13) sohaga oid masalalar boʻyicha Vazirlik faoliyatini takomillashtirishga doir amaliy chora-tadbirlar koʻrish, qonun hujjatlarini takomillashtirish boʻyicha takliflarni ishlab chiqish va ularni Vazirlik rahbariyatiga kiritish;

14) mutasaddilik qilinadigan tarkibiy tuzilmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishi maqsadga muvofiqligi masalasini koʻrib chiqish boʻyicha Vazirga taklif kiritish, funksional vazifalar va yuklangan vazifalar bajarilishi uchun ularning shaxsiy masʼuliyatini oshirish boʻyicha tizimli chora-tadbirlar koʻrish;

15) Oʻzbekiston Respublikasi Adliya vazirligi xodimlarining Odob-axloq qoidalari talablariga rioya qilish;

16) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Vazirlik tizimida korrupsiya va boshqa huquqbuzarliklarning oldini olish choralarini koʻrish, shuningdek huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish va bartaraf etish;

17) davlat xizmatlari samaradorligini, ulardan erkin foydalanishni va koʻrsatilish sifatini oshirish hamda “Elektron hukumat toʻgʻrisida”gi Oʻzbekiston Respublikasi Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

18) jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonun hujjatlarida belgilangan muddatlarda va tartibda jismoniy va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

19) Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan kelib tushgan barcha murojaatlarini oʻz vaqtida va toʻliq koʻrib chiqilishini taʼminlash;

20) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

19. Quyidagilar Vazirlik markaziy apparati tarkibiy tuzilmalari rahbarlarining asosiy funksional vazifalari hisoblanadi:

1) tarkibiy tuzilmalar faoliyatiga bevosita umumiy rahbarlik qilish, ushbu tuzilmalarga yuklangan vazifalar va funksiyalar bajarilishini tashkil etish;

2) tegishli tarkibiy tuzilmalar va idoraviy mansub tashkilotlar faoliyatini oʻz vakolatlari doirasida muvofiqlashtirish;

3) Vazirlik markaziy apparati tarkibiy tuzilmasi xodimlari tomonidan Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va boshqa qonun hujjatlariga muvofiq topshiriqlarning oʻz vaqtida va sifatli bajarilishi uchun tarkibiy tuzilmalar xodimlarining shaxsiy masʼuliyatini oshirish chora-tadbirlarini koʻrish;

4) Vazirlik hayʼati qarorlari, Vazir va uning oʻrinbosarlari buyruqlari hamda topshiriqlari oʻz vaqtida va sifatli bajarilishini taʼminlash;

5) tarkibiy tuzilmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

6) tarkibiy tuzilmalarga yuklangan vazifalar bajarilishini nazorat qilish va muvofiqlashtirish, Vazirlik hududiy tuzilmalari va idoraviy mansub tashkilotlar faoliyatiga amaliy va uslubiy yordam koʻrsatish;

7) tarkibiy tuzilmalar faoliyati sohalariga oid qonun hujjatlari va huquqni qoʻllash amaliyotini takomillashtirish boʻyicha takliflarni ishlab chiqish va ularni koʻrib chiqish uchun Vazirlik rahbariyatiga kiritish;

8) tarkibiy tuzilmalarda kadrlarni tanlash va joy-joyiga qoʻyishda Vazir oʻrinbosarlariga takliflar taqdim etish, professionalligi, oʻz ishini bilishi, amaliy tajribaga, yuksak ishchanlik va maʼnaviy-axloqiy fazilatlarga ega ekanligi kafolatini taʼminlash, ularning kasb malakasini oshirish choralarini koʻrish, tarkibiy tuzilmalarda kadrlar zaxirasini shakllantirish;

9) normativ-huquqiy hujjatlar loyihalari tarkibiy tuzilmalar tomonidan sifatli ishlab chiqilishini tashkil etish, Vazirlikning tarkibiy tuzilmalarida tayyorlangan hujjatlar loyihalarini keyinchalik Vazirlik rahbariyati tomonidan koʻrib chiqish, imzolash (viza qoʻyish) uchun koʻrib chiqish va viza qoʻyish, ularning Oʻzbekiston Respublikasi Prezidenti Administratsiyasi Reglamenti va Vazirlar Mahkamasi Reglamenti talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash, Vazirlik rahbariyatining topshirigʻi boʻyicha normativ-huquqiy hujjatlar loyihalarini Vazirlar Mahkamasi apparatida ishlab chiqishda ishtirok etish;

10) tarkibiy tuzilmaga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish, ularni puxta huquqiy ekspertizadan oʻtkazish;

11) xizmat safarlarini Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish chora-tadbirlari toʻgʻrisida” 2014-yil 5-martdagi PQ-2142-son va “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq amalga oshirish, xizmat safarlari asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

12) tarkibiy tuzilmalar xodimlari faoliyati samaradorligi va natijadorligini muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlarni koʻrish;

13) Oʻzbekiston Respublikasi Adliya vazirligi xodimlarining Odob-axloq qoidalari talablariga rioya etish;

14) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq tarkibiy tuzilmalarda korrupsiya va boshqa huquqbuzarliklarning oldini olish choralarini koʻrish, shuningdek huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

15) jismoniy va yuridik shaxslarning murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, muntazam ravishda shaxsiy, shu jumladan sayyor qabullar oʻtkazish;

16) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushgan murojaatlarini oʻz vaqtida va toʻlaqonli koʻrib chiqish;

17) davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

20. Quyidagilar Vazirlikning Qoraqalpogʻiston Respublikasi, viloyatlar, tumanlar (shaharlar) va Toshkent shahridagi hududiy tuzilmalari rahbarlarining asosiy funksional majburiyatlari hisoblanadi:

1) Vazirlikning tegishli tuzilmasi faoliyatiga umumiy rahbarlik qilish, Oʻzbekiston Respublikasi Prezidentining tegishli Farmoni va qarori, Vazirlar Mahkamasining qarori va boshqa qonun hujjatlari, shuningdek Vazirlik hujjatlari bilan ushbu tuzilmaga yuklangan vazifalar va funksiyalar bajarilishini tashkil etish;

2) hududiy tuzilmalar faoliyati bilan bogʻliq prognoz koʻrsatkichlarga erishishni soʻzsiz taʼminlash boʻyicha amaliy chora-tadbirlarni ishlab chiqish va qabul qilish;

3) hududiy tuzilma xodimlari tomonidan Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini taʼminlash, ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarori va boshqa qonun hujjatlariga muvofiq topshiriqlarning oʻz vaqtida va sifatli bajarilishi uchun hududiy tuzilmalar xodimlarining shaxsiy masʼuliyatini oshirish chora-tadbirlarini koʻrish;

4) Vazirlik hayʼati qarorlari, Vazir va uning oʻrinbosarlari buyruqlari hamda topshiriqlari oʻz vaqtida va sifatli bajarilishini taʼminlash;

5) Vazirlik faoliyati sohasiga kiradigan masalalar yuzasidan mahalliy davlat hokimiyati organlari va kompleks ijtimoiy-iqtisodiy rivojlantirish boʻyicha sektorlar bilan hamkorlik qilish;

6) tegishli tuzilmaning mansabdor shaxslarining vakolatlarini belgilash, hududiy tuzilma faoliyatining alohida tarmoqlariga rahbarlik qilish uchun ularning shaxsiy javobgarligi darajasini belgilash;

7) hududiy tuzilma faoliyatini rejalashtirishni tashkil etish, hududiy tuzilmaning har choraklik ish rejalarini tasdiqlash, ularning bajarilishi ustidan nazoratni taʼminlash;

8) hududiy tuzilmada kadrlarni tanlash va joy-joyiga qoʻyish, ularning samarali faoliyat koʻrsatishi uchun zarur shart-sharoitlar yaratish, hududiy tuzilma kadrlar zaxirasini shakllantirish;

9) Vazirlik rahbari nomenklaturasiga kiradigan boʻsh lavozimlarga taklif etilgan kadrlarning, shuningdek hududiy tuzilmaga ishga qabul qilinayotgan boshqa kadrlarning professionalligi, oʻz ishini bilishi, amaliy tajribaga, yuksak darajada ishchanlik va maʼnaviy-axloqiy fazilatlarga ega ekanligi kafolatini taʼminlash;

10) hududiy tuzilma xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarlarini ragʻbatlantirish va intizomiy javobgarlikka tortish toʻgʻrisida takliflar kiritish, shu jumladan, ular egallab turgan lavozimda qolishi maqsadga muvofiqligiga doir masalalarni koʻrib chiqish, ularning shaxsiy masʼuliyatini oshirish boʻyicha muntazam chora-tadbirlar koʻrish;

11) hududiy tuzilma xodimlari tomonidan Oʻzbekiston Respublikasi Adliya vazirligi xodimlarining Odob-axloq qoidalari talablariga rioya qilishini taʼminlash;

12) “Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq hududiy tuzilmada korrupsiya va boshqa huquqbuzarliklarning oldini olish choralarini koʻrish, shuningdek huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

13) hududiy tuzilma xodimlari faoliyatining samaradorligi va natijadorligini tizimli ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur chora-tadbirlar koʻrish;

14) hududiy tuzilmalar faoliyatiga oid masalalar boʻyicha qonun hujjatlarini takomillashtirish, shuningdek davlat xizmatlari samaradorligi, sifati va ulardan erkin foydalanishni oshirish boʻyicha takliflarni ishlab chiqish hamda ularni koʻrib chiqish uchun Vazirlik rahbariyatiga kiritish;

15) jismoniy va yuridik shaxslarning murojaatlarini koʻrib chiqish, aholi bilan toʻgʻridan-toʻgʻri va ochiq muloqotni yoʻlga qoʻyish, muntazam ravishda shaxsiy, shu jumladan sayyor qabullar oʻtkazish;

16) Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida Oʻzbekiston Respublikasi Prezidentining “Jismoniy va yuridik shaxslarning murojaatlari bilan ishlash tizimini tubdan takomillashtirishga doir chora-tadbirlar toʻgʻrisida” 2016-yil 28-dekabrdagi PF-4904-son Farmoniga muvofiq faol ishtirok etish, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan tushgan murojaatlarini oʻz vaqtida va toʻlaqonli koʻrib chiqish;

17) hududiy tuzilma xodimlari lavozim maoshiga mukofotlar, ustamalar toʻlash, ularga moddiy yordam berish, ularni mukofotlash, ragʻbatlantirish va ularga intizomiy chora qoʻllash toʻgʻrisida qaror qabul qilish, ularni davlat mukofotlari va idoraviy mukofotlar bilan taqdirlash toʻgʻrisida Vazirlikka takliflar kiritish;

18) davlat sirini yoki qonun bilan qoʻriqlanadigan boshqa sirni tashkil etuvchi maʼlumotlarning himoya qilinishini taʼminlash;

19) korxonalar, muassasalar va tashkilotlarga milliy intellektual mulk obyektlarini huquqiy muhofaza qilishni taʼminlash boʻyicha konsultativ va amaliy koʻmaklashish;

20) intellektual mulk obyektlarining huquqiy muhofaza qilinishini, mualliflarning va boshqa huquq egalarining huquqlari muhofaza qilinishini taʼminlash boʻyicha, shu jumladan kontrafakt mahsulotlarini ishlab chiqarish, tarqatish va realizatsiya qilishga qarshi kurashda vakolatli davlat organlariga koʻmaklashish orqali tegishli chora-tadbirlar koʻrish;

21) davlat va xoʻjalik boshqaruvi organlari, mahalliy davlat hokimiyati organlarining intellektual mulk sohasidagi faoliyatini tartibga solishda huquqni qoʻllash amaliyotini izchil va bir xilda taʼminlash;

22) aholi oʻrtasida intellektual mulk muhofazasi sohasida huquqiy madaniyatni oshirish boʻyicha targʻibot tadbirlarini tashkillashtirish va oʻtkazish.

21. Adliya vaziri:

Vazirlikka yuklangan vazifalar va funksiyalarning bajarilishi;

ushbu Nizomning 14-bandida nazarda tutilgan javobgarlik sohalari boʻyicha;

ushbu Nizomning 17-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

22. Vazir oʻrinbosarlari:

Vazirlikning mutasaddilik qilinadigan tarkibiy tuzilmalarida Vazirlikka yuklangan vazifalar va funksiyalarning bajarilishi;

ushbu Nizomning 14-bandida nazarda tutilgan Vazirlikning mutasaddilik qilinadigan masalalarga doir javobgarlik sohalari boʻyicha;

ushbu Nizomning 18-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

23. Markaziy apparat tarkibiy tuzilmalari rahbarlari:

tegishli tarkibiy tuzilmalarga yuklangan vazifalar va funksiyalarning amalga oshirilishi;

ushbu Nizomning 15-bandida nazarda tutilgan Vazirlik markaziy apparatining javobgarlik sohalari boʻyicha;

ushbu Nizomning 19-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

24. Vazirlikning Qoraqalpogʻiston Respublikasi, viloyatlar, tumanlar (shaharlar) va Toshkent shahridagi hududiy tuzilmalari rahbarlari:

hududiy tuzilmalarga yuklangan vazifalar va funksiyalarning bajarilishi;

Vazirlik hududiy tuzilmalarining ushbu Nizomning 16-bandida nazarda tutilgan javobgarlik sohalari boʻyicha;

ushbu Nizomning 20-bandida koʻrsatilgan oʻz funksional vazifalarining sifatli bajarilishi uchun shaxsan javob beradi.

25. Vazirlikka Oʻzbekiston Respublikasi Bosh vazirining tavsiyasiga binoan Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan vazir boshchilik qiladi.

26. Vazir oʻzining maqomiga koʻra Vazirlar Mahkamasi aʼzosi hisoblanadi.

27. Vazirning oʻrinbosarlari Oʻzbekiston Respublikasi Prezidenti tomonidan lavozimga tayinlanadi va lavozimdan ozod etiladi.

28. Vazir boʻlmagan vaqtda uning vakolatlari vazirning birinchi oʻrinbosari tomonidan, u boʻlmagan vaqtda esa vazir buyrugʻiga asosan boshqa oʻrinbosar tomonidan amalga oshiradi.

29. Vazirlikning hududiy tuzilmalar va idoraviy mansub tashkilotlar rahbarlari vazir tomonidan lavozimga tayinlanadi va lavozimdan ozod etiladi, qonun hujjatlari bilan belgilangan hollar bundan mustasno.

30. Vazirlikning hududiy tuzilmalar va idoraviy mansub tashkilotlar toʻgʻrisidagi nizom vazir tomonidan tasdiqlanadi, agar Oʻzbekiston Respublikasi Prezidenti yoki Vazirlar Mahkamasi qarorlarida boshqacha qoida nazarda tutilmagan boʻlsa.

31. Vazirlik oʻziga yuklatilgan vazifa va funksiyalarni bevosita, shuningdek adliya organlari va muassasalari orqali bajaradi.

32. Vazirlik markaziy apparati tarkibiy tuzilmalarining uning hududiy tuzilmalari va idoraviy mansub tashkilotlari bilan oʻzaro hamkorligi markaziy apparat tarkibiy tuzilmalarining rahbarlari tomonidan taʼminlanadi.

33. Vazirlik markaziy apparatining tarkibiy tuzilmalari Vazirlikning hududiy tuzilmalari bilan oʻz faoliyati yoʻnalishlari boʻyicha oʻzaro hamkorlik qilib:

topshiriqlarni hududiy tuzilmalarga va idoraviy mansub tashkilotlarga yetkazadi hamda ularning bajarilishini nazorat qiladi;

Vazirlikning hududiy tuzilmalariga va idoraviy mansub tashkilotlariga tarkibiy tuzilmalarning bevosita faoliyati masalalari boʻyicha soʻrovlar yuboradi hamda ularning ijro etilishini nazorat qiladi;

Vazirlikning hududiy tuzilmalari va idoraviy mansub tashkilotlari faoliyati amaliyotini tekshiradi va oʻrganadi, umumlashtiradi, uni takomillashtirishga qaratilgan chora-tadbirlarni ishlab chiqadi va qabul qiladi;

Vazirlikning hududiy tuzilmalari va idoraviy mansub tashkilotlari faoliyatini tashkil etish va faoliyati natijalari toʻgʻrisida hisobot va axborot materiallari, statistika maʼlumotlari va boshqa maʼlumotlar oʻrganilishini tashkil etadi;

Vazirlikning hududiy tuzilmalari va idoraviy mansub tashkilotlari ish rejalarini tahlil qiladi, ularning faoliyatini rejalashtirishni takomillashtirishga doir choralar koʻradi;

Vazirlikning hududiy tuzilmalari va idoraviy mansub tashkilotlaridan tushgan takliflarni koʻrib chiqadi;

normativ-huquqiy hujjatlar loyihalarini tayyorlashda Vazirlikning hududiy tuzilmalari va idoraviy mansub tashkilotlari ishtirokini tashkil etadi, qonun hujjatlarini takomillashtirish boʻyicha ulardan tushgan takliflarni koʻrib chiqadi.

34. Vazirlikning hududiy tuzilmalari va idoraviy mansub tashkilotlari Vazirlik markaziy apparatining tarkibiy tuzilmalari bilan oʻzaro hamkorlik qiladi, shu jumladan:

Vazirlik rahbariyati topshiriqlari ijrosi haqida xabar beradi;

belgilangan faoliyat sohasida qonun hujjatlarini amalga oshirish boʻyicha faoliyat natijalari toʻgʻrisida markaziy apparatga axborot taqdim etadi;

ularning faoliyatini tekshirish va oʻrganish natijasida ishda aniqlangan kamchiliklar va qoidabuzarliklarni bartaraf etish natijalari toʻgʻrisida xabar beradi;

oʻz faoliyati natijalari toʻgʻrisidagi hisobotlarni belgilangan tartibda va muddatlarda Vazirlikning markaziy apparatiga taqdim etadi;

Vazirlik vakolatiga taalluqli sohalardagi muammolarni hal qilishga qaratilgan takliflarni Vazirlikning markaziy apparatiga yuboradi;

mahalliy davlat hokimiyati organlari, davlat organlarining hududiy tuzilmalari, kompleks ijtimoiy-iqtisodiy rivojlantirish boʻyicha sektorlar bilan oʻzaro hamkorlik natijalari toʻgʻrisida xabar beradi;

vakolatli organlar tomonidan oʻtkazilgan oʻz faoliyatini tekshirish natijalari toʻgʻrisida maʼlumot beradi;

intellektual mulk sohasida huquqbuzarliklarni aniqlash va oldini olish boʻyicha huquqni muhofaza qiluvchi, soliq va boshqa davlat organlari bilan hamkorlik natijalari toʻgʻrisida hisobot beradi.

35. Vazirlik markaziy apparati tarkibiy tuzilmalari va uning hududiy tuzilmalari hamda idoraviy mansub tashkilotlarning oʻzaro hamkorligi jarayonida yuzaga keladigan kelishmovchiliklar vazirning topshirigʻiga binoan uning tegishli oʻrinbosari tomonidan koʻrib chiqiladi. Agar vazir oʻrinbosari tomonidan kelishmovchiliklarni tartibga solishning imkoniyati boʻlmasa, soʻnggi qaror bevosita vazir tomonidan qabul qilinadi.

36. Vazirlik oʻz vazifalari va funksiyalarini amalga oshirishda boshqa davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

37. Vazirlikning hududiy tuzilmalari oʻz vakolati doirasida boshqa davlat va xoʻjalik boshqaruvi organlarining hududiy organlari, mahalliy davlat hokimiyati organlari va boshqa tashkilotlar bilan oʻzaro hamkorlik qiladi.

Vazirlikning hududiy tuzilmalari tegishli hududlarni ijtimoiy-iqtisodiy rivojlantirish boʻyicha “yoʻl xaritalari”ni ishlab chiqishda va amalga oshirishda kompleks ijtimoiy-iqtisodiy rivojlantirish boʻyicha sektorlar bilan oʻzaro yaqin hamkorlik qiladi.

Vazirlikning hududiy boʻlinmalari oʻz vakolatlari doirasida intellektual mulk sohasida huquqbuzarliklarni aniqlash va oldini olish boʻyicha huquqni muhofaza qiluvchi, soliq va boshqa hududiy davlat organlari bilan hamkorlik qiladi.

38. Vazirlikning faoliyatiga Oʻzbekiston Respublikasi Prezidenti Administratsiyasining tegishli tarkibiy boʻlinmalari tomonidan mutasaddilik qilinadi.

39. Vazirlikda rahbar, (hayʼat raisi), uning oʻrinbosarlari (lavozimi boʻyicha), shuningdek uning faoliyatining asosiy yoʻnalishlarini muvofiqlashtiruvchi tarkibiy tuzilmalar rahbarlaridan iborat tarkibda hayʼat tuziladi.

Hayʼat tarkibining soni va shaxsiy tarkibi vazirning taqdimnomasiga binoan Vazirlar Mahkamasi tomonidan tasdiqlanadi.

40. Hayʼatga quyidagi vazifalar yuklanadi:

Vazirlik faoliyatining ushbu Nizomda belgilangan asosiy yoʻnalishlarini ishlab chiqish va amalga oshirish;

qonun hujjatlarida, Oʻzbekiston Respublikasi Prezidenti hujjatlari va Oʻzbekiston Respublikasi Hukumati qarorlarida belgilangan vazifalar oʻz vaqtida va sifatli amalga oshirilishini taʼminlash uchun Vazirlik tizimi xodimlari va rahbarlarining shaxsiy javobgarligini oshirish boʻyicha choralarini koʻrgan holda tarkibiy va hududiy tuzilmalar hamda idoraviy mansub tashkilotlar rahbarlari hisobotlarini muntazam ravishda eshitilishini tashkil etish;

Vazirlik faoliyati sohasidagi hududiy va tarmoq dasturlari amalga oshirilishining natijadorligini har chorakda va muntazam koʻrib chiqish;

joylarda Vazirlik faoliyati sohasidagi dolzarb masalalar muhokama qilinishini taʼminlagan holda hayʼatning kengaytirilgan sayyor majlislari oʻtkazilishini tashkil etish, shuningdek yuzaga kelgan muammolarni bartaraf etish boʻyicha tegishli qarorlarni ishlab chiqish va qabul qilish;

Vazirlik markaziy apparati va uning tizimiga kiradigan lavozimlar nomenklaturasini koʻrib chiqish va tasdiqlash;

Vazirlik nomenklaturasiga kiradigan lavozimlarga kadrlarni tanlash, joy-joyiga qoʻyish masalalarini koʻrib chiqish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari bilan belgilangan vazifalar oʻz vaqtida va sifatli bajarilishini taʼminlash uchun Vazirlik rahbarlari va xodimlarining ijro intizomini mustahkamlash va shaxsiy javobgarligini oshirish.

Hayʼat Vazirlik vakolatiga kiritilgan boshqa masalalarni ham koʻrib chiqishga haqlidir.

41. Hayʼat majlisiga davlat va xoʻjalik boshqaruvi organlari, boshqa tashkilotlar rahbarlari, ularning vakolatiga kiradigan masalalar yuzasidan taklif etilishi mumkin.

42. Hayʼat, agar uning majlisida hayʼat tarkibining yarmidan koʻpi qatnashsa, vakolatli hisoblanadi. Koʻrib chiqilayotgan masalalar yuzasidan qarorlar oddiy koʻpchilik ovoz bilan qabul qilinadi.

43. Hayʼat qarorlari vazirning buyruqlari bilan amalga oshiriladi.

44. Vazir va hayʼat aʼzolari oʻrtasida kelishmovchiliklar yuzaga kelgan taqdirda, vazir yuzaga kelgan kelishmovchiliklar haqida Vazirlar Mahkamasiga va Oʻzbekiston Respublikasi Prezidenti devoniga axborot bergan holda mustaqil ravishda qaror qabul qiladi. Hayʼat aʼzolari ham Vazirlar Mahkamasiga va Oʻzbekiston Respublikasi Prezidenti Administratsiyasiga oʻz fikrini xabar qilishi mumkin.

45. Hayʼat faoliyati tartibi hayʼat tomonidan tasdiqlanadigan uning reglamenti bilan belgilanadi.

46. Vazirlik huzurida Oʻzbekiston Respublikasi adliya vaziri rais hisoblangan intellektual mulk obyektlarining huquqiy muhofazasi bilan bogʻliq boʻlgan apellyatsiyalarni sudgacha koʻrib chiquvchi Apellyatsiya kengashi tashkil etiladi.

Apellyatsiya kengashining tarkibiga intellektual mulk sohasidagi mustaqil olimlar va mutaxassislar kiradi. Apellyatsiya kengashi tarkibida adliya organlari va muassasalarining xodimlari soni Apellyatsiya kengashi aʼzolari umumiy sonining oʻttiz foizidan oshmasligi lozim.

Vazirlikda boshqa kengash, maslahat va ekspertlik organlari tuzilishi mumkin.

47. Vazirlik huzurida tuziladigan kengash, maslahat va ekspertlik organlari tarkibi va ular toʻgʻrisidagi nizomlar vazir tomonidan tasdiqlanadi, ularning tarkibi va nizomlari Oʻzbekiston Respublikasi Prezidenti hujjatlari va Vazirlar Mahkamasi qarorlari bilan tasdiqlanadigan hollar bundan mustasno.

48. Vazirlik faoliyatining samaradorligi muntazam baholanadi.

49. Vazirlik faoliyati samaradorligi va natijadorligiga berilgan baho Oʻzbekiston Respublikasi Prezidenti Administratsiyasining tegishli tarkibiy boʻlinmalari tomonidan tasdiqlanadigan Vazirlik faoliyati samaradorligi va natijadorligini baholash mezonlari va ish indikatorlariga asoslanadi.

50. Vazirlik faoliyati samaradorligi va natijadorligini baholash yakunlari boʻyicha:

Vazirlik rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Vazirlik faoliyatida aniqlangan kamchiliklarni bartaraf etish va uning faoliyatini yanada takomillashtirish chora-tadbirlari koʻriladi.

51. Vazirlik faoliyati samaradorligi va natijadorligini baholash tartibi va uslubiyoti qonun hujjatlari bilan belgilanadi.

52. Vazirlik va uning hududiy tuzilmalarini moddiy-texnik taʼminlash xarajatlarini moliyalashtirish, shuningdek ularning xodimlari mehnatiga haq toʻlash va moddiy ragʻbatlantirish Oʻzbekiston Respublikasi Davlat budjeti, budjetdan tashqari fondlarning manbalari va qonun hujjatlarida taqiqlanmagan boshqa manbalar hisobiga amalga oshiriladi.

53. Vazirlik xodimlarining ish haqi lavozim maoshi, mukofotlar, qoʻshimcha haqlar, ustamalardan va qonun hujjatlarida nazarda tutilgan boshqa toʻlovlardan iborat.

Xizmat vazifasini sidqidildan va samarali bajarib kelayotgan Vazirlikning yuqori malakali, tashabbuskor xodimlariga yuqori malakasi uchun vazir tomonidan adliya organlari va muassasalarining budjetdan tashqari mablagʻlari hisobidan lavozim maoshining 200 foizi miqdoridan koʻp boʻlmagan shaxsiy ustamalar belgilanishi mumkin.

Vazirlik xodimlari lavozim maoshlariga har oyda qoʻshiladigan ragʻbatlantirish xususiyatiga ega boʻlgan qoʻshimcha haqlar va ustamalar vazir tomonidan tasdiqlanadigan qoidalarga muvofiq toʻlanadi.

54. Oʻzbekiston Respublikasi Vazirlar Mahkamasi va Oʻzbekiston Respublikasi Prezidenti qarorlari bilan boshqa lavozimlarga tayinlangan yoki Oʻzbekiston Respublikasi Oliy Majlisi Senati, Qonunchilik palatasiga saylangan (tayinlangan) Vazirlikning xodimlarida Vazirlikda berilgan koʻp yillik xizmatlari uchun qoʻshimcha haq va ustamalar hamda martaba darajalari saqlanadi.

55. Vazirlik rahbarlari oʻz faoliyati toʻgʻrisida Oʻzbekiston Respublikasi Prezidentiga, Oʻzbekiston Respublikasi Prezidenti Administratsiyasining tegishli tarkibiy boʻlinmalariga va Vazirlar Mahkamasiga muntazam ravishda hisobot beradi.

56. Oʻzbekiston Respublikasi Prezidenti Administratsiyasining tegishli tarkibiy boʻlinmalari rahbarlari Vazirlik rahbarlariga yuklangan vazifalar samarali bajarilishi boʻyicha ular faoliyati ustidan muntazam monitoring olib boradi, Vazirlik faoliyati samaradorligiga xolisona baho beradi.

57. Monitoring va baholash yakunlari boʻyicha Vazirlikning alohida oʻrnak koʻrsatgan rahbarlari, mansabdor shaxslari va xodimlari ragʻbatlantiriladi yoxud yoʻl qoʻyilgan jiddiy kamchiliklar uchun egallab turgan lavozimidan ozod etishgacha boʻlgan javobgarlikka tortiladi.

58. Vazirlikni qayta tashkil etish va tugatish qonun hujjatlarida belgilangan tartibda amalga oshiriladi.