Oʻzbekiston Respublikasi Prezidentining 2017-yil 10-oktabrdagi PQ-3318-son “Fermer, dehqon xoʻjaliklari va tomorqa yer egalari faoliyatini yanada rivojlantirish boʻyicha tashkiliy chora-tadbirlar toʻgʻrisida”gi qaroriga muvofiq, Oʻzbekiston Respublikasi Moliya vazirligi, Markaziy banki Boshqaruvi hamda Qishloq va suv xoʻjaligi vazirligi qaror qiladi:

1. Fermer xoʻjaliklarining aʼzolik badalini Oʻzbekiston fermer, dehqon xoʻjaliklari va tomorqa yer egalari kengashiga oʻtkazish va tasdiqlanadigan smeta asosida xarajat qilish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Moliya vazirligi, Qishloq va suv xoʻjaligi vazirligi hamda Markaziy banki Boshqaruvining 2013-yil 26-noyabrdagi 108, 02/528, 327-V-son “Oʻzbekiston Fermerlari Kengashi tizimi faoliyatini moliyalashtirish mablagʻlarini shakllantirish va undan foydalanish tartibi toʻgʻrisidagi nizomni tasdiqlash haqida”gi qarori (roʻyxat raqami 2542, 2013-yil 26-dekabr) (Oʻzbekiston Respublikasi qonun hujjatlari toʻplami, 2013-y., 52-son, 702-modda) oʻz kuchini yoʻqotgan deb topilsin.

3. Mazkur qaror rasmiy eʼlon qilingan kundan eʼtiboran kuchga kiradi.

Ushbu Nizom Oʻzbekiston Respublikasi Prezidentining 2017-yil 10-oktabrdagi PQ-3318-son “Fermer, dehqon xoʻjaliklari va tomorqa yer egalari faoliyatini yanada rivojlantirish boʻyicha tashkiliy chora-tadbirlar toʻgʻrisida”gi qaroriga muvofiq fermer xoʻjaliklarining aʼzolik badalini Oʻzbekiston fermer, dehqon xoʻjaliklari va tomorqa yer egalari kengashiga (bundan buyon matnda Kengash deb yuritiladi) oʻtkazish va tasdiqlanadigan smeta asosida xarajat qilish tartibini belgilaydi.

1. Ushbu Nizom Kengash tizimini moliyalashtirish uchun fermer va yuridik shaxs maqomiga ega boʻlgan dehqon xoʻjaliklarining tuman fermer, dehqon xoʻjaliklari va tomorqa yer egalari kengashlariga (bundan buyon matnda tuman kengashi deb yuritiladi) aʼzolik badali toʻlovini amalga oshirishini hamda Kengash, Qoraqalpogʻiston Respublikasi va viloyatlar fermer, dehqon xoʻjaliklari va tomorqa yer egalari kengashlari (bundan buyon matnda hududiy kengash deb yuritiladi) va tuman kengashlari hisobvaragʻiga kelib tushgan mablagʻlarni toʻplash va ulardan foydalanishni tartibga solish uchun tatbiq etiladi.

2. Kengash Ustaviga muvofiq Kengash faoliyatini moliyalashtirish manbalari quyidagilar hisoblanadi:

aʼzolik badallari;

xayriya mablagʻlari va grantlar;

tadbirkorlik faoliyatidan olinadigan daromad (foyda);

qonun hujjatlarida taqiqlanmagan boshqa tushumlar.

3. Kengashlarga aʼzolik badali Oʻzbekiston Respublikasi Prezidentining 2017-yil 10-oktabrdagi PQ-3318-son “Fermer, dehqon xoʻjaliklari va tomorqa yer egalari faoliyatini yanada rivojlantirish boʻyicha tashkiliy chora-tadbirlar toʻgʻrisida”gi qaroriga muvofiq paxta xomashyosini yetishtiruvchi fermer xoʻjaliklari tomonidan har yili paxta xomashyosi xarid narxining 0,8 foizi miqdordagi mablagʻlari hamda qishloq xoʻjaligining boshqa yoʻnalishlardagi faoliyat turlari bilan shugʻullanuvchi fermer va yuridik shaxs maqomiga ega boʻlgan dehqon xoʻjaliklari aʼzolik shartnomasida belgilangan miqdorda oʻz daromadlari hisobidan amalga oshiriladi.

4. Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi hamda Qishloq va suv xoʻjaligi vazirligi tomonidan tasdiqlanadigan Davlat ehtiyojlari uchun yetishtiriladigan gʻalla hosili yakuniy hisob-kitobi maxsus koʻrsatmalarida Kengashni moliyalashtirish boʻyicha fermer xoʻjaliklari bilan tuzilgan shartnomalarga asosan toʻlovlar belgilanishi mumkin.

5. Tuman kengashi tumanda faoliyat koʻrsatayotgan har bir fermer xoʻjaliklari va yuridik shaxs maqomiga ega boʻlgan dehqon xoʻjaliklari bilan ixtiyoriylik asosida aʼzolik shartnomasi (bundan buyon matnda shartnoma deb yuritiladi) tuzadi.

6. Kengashga paxta xomashyosi xarid narxida koʻzda tutiladigan 0,8 foiz miqdordagi mablagʻni hamda qishloq xoʻjaligining boshqa yoʻnalishlardagi faoliyat turlari bilan shugʻullanuvchi fermer va yuridik shaxs maqomiga ega boʻlgan dehqon xoʻjaliklarining aʼzolik badallarini kirim qilish uchun tuman kengashlariga tijorat banklarida alohida maxsus hisobvaraqlari belgilangan tartibda ochiladi.

7. Fermer xoʻjaliklari tomonidan har yili paxta xomashyosi xarid narxining 0,8 foizi miqdordagi fermer xoʻjaliklarining maxsus hisobvaragʻiga kirim qilingan mablagʻlar hisobidan aʼzolik badali summasi mutanosib ravishda oyma-oy tuman kengashlari tomonidan shartnomaga muvofiq qoʻyiladigan toʻlov talabnomalari asosida tuman kengashlarining maxsus hisobvaragʻiga oʻtkazib beriladi.

8. Tuman kengashlarining maxsus hisobvaraqlariga fermer xoʻjaliklaridan aʼzolik badallari uchun kelib tushgan mablagʻlar keyingi ish kunidan kechikmagan holda bank hisobvaragʻi shartnomasiga asosan memorial order orqali toʻliq hududiy kengashning alohida maxsus hisobvaragʻiga oʻtkaziladi.

9. Hududiy kengashning alohida maxsus hisobvaragʻiga tuman kengashlaridan kelib tushgan mablagʻlar keyingi ish kunidan kechikmagan holda bank hisobvaragʻi shartnomasiga asosan memorial order orqali toʻliq Kengashning alohida maxsus hisobvaragʻiga oʻtkaziladi.

10. Qishloq xoʻjaligining boshqa yoʻnalishlardagi faoliyat turlari bilan shugʻullanuvchi fermer xoʻjaliklari va yuridik shaxs maqomiga ega boʻlgan dehqon xoʻjaliklarining aʼzolik badallari ham tuzilgan shartnomalarga asosan ularning toʻlov topshiriqnomalariga muvofiq tuman kengashlarining maxsus hisobvaraqlariga oʻtkazib beriladi.

11. Kengashning maxsus hisobvaragʻida jamlangan aʼzolik badallari mablagʻlaridan har yili Oʻzbekiston Respublikasi Moliya vazirligi bilan kelishilgan holda Kengash tomonidan tasdiqlanadigan Oʻzbekiston fermer, dehqon xoʻjaliklari va tomorqa yer egalari kengashi, hududiy va tuman fermerlar kengashlarining yillik daromadlar prognozi va xarajatlar smetalariga asosan foydalaniladi.

12. Maxsus hisobvaraqlarda yigʻilgan mablagʻlardan boshqa maqsadlar uchun foydalanilmaydi.

13. Kengash, hududiy va tuman kengashlarining hisobvaraqlariga xayriya mablagʻlari va grantlar, tadbirkorlik faoliyatidan olinadigan daromad (foyda) va qonun hujjatlarida taqiqlanmagan boshqa tushumlar hisobidan kelib tushadigan mablagʻlar ularning asosiy hisobvaraqlariga kirim qilinadi va mazkur kengashlar tasarrufida qoladi. Ushbu mablagʻlardan qonun hujjatlarida nazarda tutilgan tartibda oʻz ustavlarida koʻrsatilgan maqsad va vazifalarni amalga oshirish uchun foydalaniladi.

14. Kengashga, hududiy va tuman kengashlariga ularning Ustavida belgilangan vazifalar asosida fermer, dehqon xoʻjaliklarini va tomorqa yer egalarini qoʻllab-quvvatlash yuzasidan javobgarlik yuklatiladi.

15. Fermer va yuridik shaxs maqomiga ega boʻlgan dehqon xoʻjaliklariga shartnomada koʻrsatilgan aʼzolik badallarini belgilangan muddatlarda toʻlab berish majburiyati yuklatiladi.

16. Oʻzbekiston fermer, dehqon xoʻjaliklari va tomorqa yer egalari kengashi, hududiy va tuman fermerlar kengashlarining yillik daromadlar va xarajatlar smetalarining toʻgʻriligi va asoslanganligi hamda mablagʻlarni maqsadli ishlatilishi uchun Kengash, hududiy va tuman kengashlari rahbarlari shaxsan javobgardirlar.

17. Mablagʻlarni toʻgʻri va maqsadli ishlatishini nazorat qilish Kengash zimmasiga yuklatiladi.

18. Mazkur Nizom talablarining buzilishida aybdor boʻlgan shaxslar qonun hujjatlarida belgilangan tartibda javobgar boʻladi.

19. Mazkur Nizom Oʻzbekiston fermer, dehqon xoʻjaliklari va tomorqa yer egalari kengashi va Oʻzbekiston Respublikasi Vazirlar Mahkamasi huzuridagi Qishloq xoʻjaligi mahsulotlarining davlat xaridi va qishloq xoʻjaligini texnika bilan jihozlashni maqsadli moliyalashtirish jamgʻarmasi bilan kelishilgan.