Oʻzbekiston Respublikasi Prezidentining “Valyuta siyosatini liberallashtirish boʻyicha birinchi navbatdagi chora-tadbirlar toʻgʻrisida” 2017-yil 2-sentabrdagi PF-5177-sonli Farmoniga muvofiq:

1. Oʻzbekiston Respublikasi Prezidentining baʼzi hujjatlariga ilovaga muvofiq oʻzgartish va qoʻshimchalar kiritilsin.

2. Oʻzbekiston Respublikasi Prezidentining “Sugʻurtachilarning moliyaviy barqarorligini yanada oshirishga oid qoʻshimcha chora-tadbirlar toʻgʻrisida” 2011-yil 31-maydagi PQ-1544-sonli qarori oʻz kuchini yoʻqotgan deb hisoblansin.

3. Vazirliklar va idoralar bir oy muddatda oʻzlari ilgari qabul qilgan normativ-huquqiy hujjatlarni ushbu Farmonga muvofiqlashtirsin.

4. Mazkur Farmonning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Bosh vazirining oʻrinbosari D.A. Qoʻchqorov, Oʻzbekiston Respublikasi moliya vaziri B.A. Xodjayev va Oʻzbekiston Respublikasi Markaziy banki raisi M.B. Nurmurotov zimmasiga yuklansin.

1. Oʻzbekiston Respublikasi Prezidentining “Xorijiy sarmoyalar ishtirokidagi korxonalarga beriladigan qoʻshimcha ragʻbatlantirish omillari va imtiyozlar toʻgʻrisida” 1996-yil 30-noyabrdagi PF-1652-sonli Farmoni 1-bandi ikkinchi xatboshidagi “150 ming AQSH dollariga teng summadan” soʻzlari “600 million soʻmdan” soʻzlari bilan almashtirilsin.

2. Oʻzbekiston Respublikasi Prezidentining “Iqtisodiyot real sektori korxonalarining moliyaviy barqarorligini yanada oshirish chora- tadbirlari toʻgʻrisida” 2008-yil 18-noyabrdagi PF-4053-sonli Farmoni 1-bandining ikkinchi xatboshi kuyidagi tahrirda bayon etilsin:

“yangi tashkil etiladigan aksiyadorlik jamiyatlari uchun ustav jamgʻarmasining eng kam miqdori jamiyat davlat tomonidan roʻyxatga olingan sanada kamida 1 600 million soʻmni tashkil etadi”.

3. Oʻzbekiston Respublikasi Prezidentining “Oʻzbekiston Respublikasining turizm sohasini jadal rivojlantirishni taʼminlash chora-tadbirlari toʻgʻrisida” 2016-yil 2-dekabrdagi PF-4861-sonli Farmonining 10-bandi quyidagi tahrirda bayon etilsin:

“10. Belgilab quyilsinki, turistlarni qabul qiladigan turizm operatorlari, shuningdek ularning xodimlari turistlar tomonidan Oʻzbekiston Respublikasi qonunchiligi buzilganligi uchun javobgarlikdan ozod qilinadi, xorijiy fuqarolar va fuqaroligi boʻlmagan shaxslarning Oʻzbekiston Respublikasi hududida boʻlishiga doir tegishli normativ-huquqiy hujjatlarda belgilangan qoidalar bundan mustasno”.

4. Oʻzbekiston Respublikasi Prezidentining “Oʻzbekiston Respublikasi Prezidenti huzuridagi Davlat boshqaruvi akademiyasida boshqaruv kadrlarini tayyorlash, qayta tayyorlash va malakasini oshirish tizimini yanada rivojlantirish chora-tadbirlari toʻgʻrisida” 2017-yil 8-avgustdagi PF-5139-sonli Farmoni 10-bandining beshinchi xatboshidagi “Oʻzbekiston Respublikasi Markaziy bankining toʻlov kunidagi kursi boʻyicha 20 AQSH dollariga teng miqdorda” soʻzlari “80 ming soʻm miqdorda” soʻzlari bilan almashtirilsin.

5. Oʻzbekiston Respublikasi Prezidentining 2007-yil 10-apreldagi PQ-618-sonli qarori bilan tasdiqlangan sugʻurta bozorining professional qatnashchilari toʻgʻrisidagi Nizom 10-bandida:

a) ikkinchi, uchinchi, toʻrtinchi va beshinchi xatboshilar kuyidagi tahrirda bayon etilsin:

“umumiy sugʻurtalash tarmogʻida — 7,5 milliard soʻm;

hayotni sugʻurtalash tarmogʻida — 10 milliard soʻm;

majburiy sugʻurtalash boʻyicha — 15 milliard soʻm;

faqat qayta sugʻurtalash boʻyicha — 30 milliard soʻmni tashkil etadi”;

b) mazmuni quyidagicha izoh bilan toʻldirilsin:

“Izoh. Faoliyat yurituvchi sugʻurtachilar 2018-yilning 1-iyuliga qadar ustav kapitali miqdorlarini mazkur band talablariga muvofiqlashtirishlari lozim”.

6. Oʻzbekiston Respublikasi Prezidentining “Paxta tolasini respublikaning ichki isteʼmolchilariga sotishni takomillashtirish va toʻqimachilik sanoatini rivojlantirish chora-tadbirlari toʻgʻrisida” 2007-yil 21-noyabrdagi PQ-733-sonli qarorining 1-bandidagi “erkin ayirboshlanadigan” soʻzlari “milliy” soʻzi bilan almashtirilsin.

7. Oʻzbekiston Respublikasi Prezidentining “Bank tizimining moliyaviy barqarorligini yanada oshirish va investitsiyaviy faolligini kuchaytirish chora-tadbirlari toʻgʻrisida” 2010-yil 6-apreldagi PQ-1317-sonli qarorining 3-bandi quyidagi tahrirda bayon etilsin:

“3. Yangidan tashkil etilayotgan tijorat banklari ustav kapitalining eng kam miqdori 100,0 milliard soʻm qilib belgilansin.

Oʻzbekiston Respublikasi Markaziy banki tijorat banklari bilan birgalikda 2019-yilning 19-yanvariga kadar tijorat banklarining ustav kapitali miqdorlari mazkur bandda koʻrsatilgan talablarga yetkazilishini taʼminlasin”.

8. Oʻzbekiston Respublikasi Prezidentining “Toʻqimachilik sanoati korxonalarining jadal rivojlantirilishini ragʻbatlantirishga oid qoʻshimcha chora-tadbirlar toʻgʻrisida” 2011-yil 28-martdagi PQ-1512-sonli qarorida:

a) 1-bandi kuyidagi tahrirda bayon etilsin:

“1. Vazirlar Mahkamasining 2004-yil 25-martdagi 141-sonli qarori 6-bandida nazarda tutilgan “Oʻzbekyengilsanoat” AJ korxonalari tomonidan olib kelinadigan, respublikamizda ishlab chiqarilmaydigan ximikatlar, boʻyash mahsulotlari, furnitura va aksessuarlar, shuningdek, boshqa yordamchi materiallarni import boji toʻlashdan ozod qilish boʻyicha imtiyozlarning amal qilishi 2020-yilning 1-yanvariga qadar uzaytirilsin”;

b) mazmuni quyidagicha 1¹-bandi bilan toʻldirilsin:

“1¹. “Oʻzbekyengilsanoat” AJ korxonalariga 2020-yilning 1-yanvariga kadar toʻqimachilik yarim fabrikatlari (kalava, gazlama, trikotaj polotnosi, paxta yigirish chiqitlari, aksessuarlar va furniturani) nol stavkasi boʻyicha qoʻshilgan qiymat soligʻi bilan xarid qilishga ruxsat berilsin”.

9. Oʻzbekiston Respublikasi Prezidentining “Fuqarolik jamiyati institutlarini rivojlantirishga koʻmaklashish borasidagi qoʻshimcha chora-tadbirlar toʻgʻrisida” 2013-yil 12-dekabrdagi PQ-2085-sonli qarorining ilovasida:

a) 1-bandining “Davlat boji stavkalari” grafasidagi “eng kam ish haqining oʻn baravari va 50 AQSH dollari” soʻzlari “eng kam ish haqining 12,5 baravari miqdorida” soʻzlari bilan almashtirilsin.

b) “Nodavlat notijorat tashkilotlarining ramzlarini davlat roʻyxatidan oʻtkazish uchun undiriladigan yigʻimlar miqdorlari” boʻlimining 1-bandidagi “eng kam ish haqining ikki baravari va 25 AQSH dollari” soʻzlari “eng kam ish haqining uch baravari” soʻzlari bilan almashtirilsin.

10. Oʻzbekiston Respublikasi Prezidentining “Oʻzbekiston Respublikasining 2017-yilgi asosiy makroiqtisodiy koʻrsatkichlar prognozi va Davlat budjeti parametrlari toʻgʻrisida” 2016-yil 27-dekabrdagi PQ-2699-sonli qarori 17-ilovasining “Soliqqa tortish bazasi miqdori (qoʻshilgan qiymat soligʻi va aksiz soligʻidan tashqari)” grafasining 1-va 2-satrlari kuyidagi tahrirda bayon etilsin:

“bir tonnasi uchun 18 400 000 soʻmdan ortiqdan “kesish narxi”gacha

1000 kub. metr uchun 640 000 soʻmdan ortiqdan “kesish narxi”gacha”.

11. Oʻzbekiston Respublikasi Prezidentining “Oliy taʼlim tizimini yanada rivojlantirish chora-tadbirlari toʻgʻrisida” 2017-yil 20-apreldagi PQ-2909-sonli qarori 4-bandining beshinchi xatboshidagi “20 AQSH dollari ekvivalentidagi kundalik meʼyor boʻyicha Oʻzbekiston Respublikasi Markaziy bankining toʻlov kunidagi kursi boʻyicha” soʻzlari “80 ming soʻm miqdorida” soʻzlari bilan almashtirilsin.

12. Oʻzbekiston Respublikasi Prezidentining “Toshkent davlat Yuridik universitetida kadrlar tayyorlash tizimini tubdan takomillashtirish va samaradorligini oshirish chora-tadbirlari toʻgʻrisida” 2017-yil 28-apreldagi PQ-2932-sonli qarori 8-bandining uchinchi xatboshidagi “xorijiy valyutada” soʻzlari “milliy valyutada” soʻzlari bilan almashtirilsin.

13. Oʻzbekiston Respublikasi Prezidentining “Tadbirkorlik faoliyatini rivojlantirishni qoʻllab-quvvatlash davlat jamgʻarmasini tashkil etish toʻgʻrisida” 2017-yil 17-avgustdagi PQ-3225-sonli qarorining 1-bandida:

a) “b” kichik bandidagi “500 ming AQSH dollaridan koʻp boʻlmagan yoki unga ekvivalent” soʻzlari “2 milliard soʻmdan koʻp boʻlmagan” soʻzlari bilan almashtirilsin;

b) “v” kichik bandining birinchi xatboshidagi “1 million AQSH dollaridan oshmaydigan” soʻzlari “4 milliard soʻmdan oshmaydigan” soʻzlari bilan almashtirilsin.

14. Oʻzbekiston Respublikasi Prezidentining “Tovarlar (ishlar, xizmatlar)ning davlat va korporativ xaridlarini amalga oshirishning zamonaviy shakl va uslublarini yanada joriy etish chora-tadbirlari toʻgʻrisida” 2017-yil 23-avgustdagi PQ-3237-sonli qarorining 3-bandida:

a) ikkinchi xatboshidagi “1 ming AQSH dollaridan” soʻzlari “4 million soʻmdan” soʻzlari bilan almashtirilsin;

b) uchinchi xatboshidagi “1 mingdan 100 ming AQSH dollarigacha” soʻzlari “4 million soʻmdan 400 million soʻmgacha” soʻzlari bilan almashtirilsin;

v) toʻrtinchi xatboshidagi “100 ming AQSH dollaridan” soʻzlari “400 million soʻmdan” soʻzlari bilan almashtirilsin.

15. Oʻzbekiston Respublikasi Prezidentining 2008-yil 19-noyabrdagi R-4010-sonli farmoyishi bilan tasdiqlangan iqtisodiy nochor korxonalarni tijorat banklariga sotish boʻyicha Respublika komissiyasi toʻgʻrisidagi Nizom 8-bandining beshinchi xatboshidagi “2 million AQSH dollari ekvivalentida” soʻzlari “8 milliard soʻm” soʻzlari bilan almashtirilsin.