O‘zbekiston Respublikasi Prezidentining “2011 — 2015-yillarda respublika moliya-bank tizimini yanada isloh qilish va barqarorligini oshirish hamda yuqori xalqaro reyting ko‘rsatkichlariga erishishning ustuvor yo‘nalishlari to‘g‘risida” 2010-yil 26-noyabrdagi PQ-1438-sonli qaroriga muvofiq hamda sug‘urta faoliyatini yanada takomillashtirish, sug‘urtachilarning kapitallashuvi va moliyaviy barqarorligini oshirish, shuningdek sug‘urta xizmatlaridan foydalanuvchilarning huquqlari himoya qilinishini ta’minlash maqsadida:

1. O‘zbekiston Respublikasi Moliya vazirligi va Iqtisodiyot vazirligining ilovaga muvofiq sug‘urta faoliyati turlariga qarab, sug‘urtachilarning ustav kapitali minimal miqdorlarini 2012 — 2014-yillar mobaynida bosqichma-bosqich, tabaqalashtirilgan tarzda oshirib borish to‘g‘risidagi taklifi qabul qilinsin.

Ishlab turgan sug‘urta kompaniyalari (sug‘urtachilar) ustav kapitali miqdorlarining ushbu qarorda belgilangan talablar va muddatlarga muvofiq holga keltirilishini ta’minlasinlar.

2. O‘zbekiston Respublikasi Moliya vazirligi Davlat soliq qo‘mitasi bilan birgalikda mazkur qarorning 1-bandi talablariga javob bermaydigan sug‘urtachilarning litsenziyalari amal qilishini qonun hujjatlarida o‘rnatilgan tartibda to‘xtatib qo‘yish va tugatish choralarini ko‘rsin.

3. O‘zbekiston Respublikasi Prezidentining “Sug‘urta xizmatlari bozorini yanada isloh qilish va rivojlantirishga oid qo‘shimcha chora-tadbirlar to‘g‘risida” 2008-yil 21-maydagi PQ-872-sonli qarorining 1 va 2-bandlari 2012-yilning 1-iyulidan boshlab o‘z kuchini yo‘qotgan deb hisoblansin.

4. Ushbu qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.