Mahalliy to‘qimachilik va tikuv-trikotaj sanoati korxonalarini barqaror rivojlantirishni ta’minlash, paxta tolasini yanada chuqur qayta ishlashni rag‘batlantirishni kuchaytirish va zamonaviy raqobatbardosh to‘qimachilik mahsulotlarini ishlab chiqarishni tashkil etish maqsadida:

1. Vazirlar Mahkamasining 2004-yil 25-martdagi 141-son qarori 6-bandida ko‘zda tutilgan “O‘zto‘qimachiliksanoat” uyushmasiga a’zo korxonalar tomonidan olib kirilayotgan ximikatlar, bo‘yoqlar, furnitura va aksessuarlar, shuningdek, respublikada ishlab chiqarilmaydigan boshqa yordamchi materiallarni import bojxona bojlari to‘lashdan ozod qilishga oid imtiyozning amal qilish muddati 2020-yil 1-yanvarga qadar uzaytirilsin.

Vazirlar Mahkamasining 2004-yil 25-martdagi 141-son qarori 6-bandining amal qilishi barcha tadbirkorlik subyektlariga nisbatan tatbiq etilsin.

1¹. “O‘zto‘qimachiliksanoat” uyushmasiga a’zo korxonalarga 2020-yilning 1-yanvariga qadar to‘qimachilik yarim fabrikatlarini (kalava, gazlama, trikotaj polotnosi, paxta yigirish chiqitlari, aksessuarlar va furnitura) qo‘shilgan qiymat solig‘ining nol stavkasida xarid qilishga ruxsat berilsin.

3. O‘zbekiston Respublikasi Tashqi iqtisodiy aloqalar, investitsiyalar va savdo vazirligining tashqi savdo kompaniyalari “O‘zpaxtasanoat” uyushmasi, O‘zbekiston Respublikasi Moliya vazirligi huzuridagi Davlat ehtiyojlari uchun xarid qilinadigan qishloq xo‘jaligi mahsulotlarining hisob-kitob jamg‘armasi va respublikadagi to‘qimachilik korxonalari bilan birgalikda bir oy muddatda 2010-yil hosilidan ichki bozorga amalda yetkazib berilgan paxta tolasi hajmi uchun to‘lovlar bo‘yicha qayta hisob-kitob qilishni, 2011-yil 1-yanvardan boshlab respublika to‘qimachilik korxonalari foydasiga 2010-yil hosilidan kelgusida paxta tolasini yetkazib berish uchun ularning oldindan haq to‘lashi hisobiga ijobiy tafovutni o‘tkazib berishni amalga oshirsin.

4. Vazirlar Mahkamasining 2005-yil 27-yanvardagi “Respublika to‘qimachilik tarmog‘iga investitsiyalar jalb etish chora-tadbirlari to‘g‘risida”gi 38-son qarori 5-bandidan “va Vazirlar Mahkamasining 2004-yil 25-martdagi 141-son qarorida” so‘zlari chiqarib tashlansin.

O‘zbekiston Respublikasi Iqtisodiyot vazirligi Adliya vazirligi, boshqa manfaatdor vazirliklar, idoralar va xo‘jalik birlashmalari bilan birgalikda ikki hafta muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

5. Mazkur qarorning bajarilishini nazorat qilish O‘zbekiston Respublikasi Bosh vaziri Sh.M. Mirziyoyev zimmasiga yuklansin.