Oʻzbekiston Respublikasi Vazirlar Mahkamasining 1996-yil 30-iyuldagi “Uy-joy, kommunal xizmatlarning oʻz xarajatlarini oʻzi qoplashiga bosqichma-bosqich oʻtish munosabati bilan normativ hujjatlarni tasdiqlash toʻgʻrisida”gi 271-son, 2001-yil 18-apreldagi “Aholiga kommunal xizmat koʻrsatishni takomillashtirishga doir qoʻshimcha chora-tadbirlar toʻgʻrisida”gi 178-son (Oʻzbekiston Respublikasi qonun hujjatlari toʻplami, 2001-y., 8-son, 40-modda) hamda 2010-yil 28-oktabrdagi “Tovarlar (ishlar, xizmatlar)ga tartibga solinadigan narxlar (tariflar)ni deklaratsiya qilish (tasdiqlash) va belgilash tartibini yanada takomillashtirish chora-tadbirlari toʻgʻrisida”gi 239-son (Oʻzbekiston Respublikasi qonun hujjatlari toʻplami, 2010-y., 42-43-son, 364-modda) qarorlariga asosan, shuningdek Vazirlar Mahkamasining 2015-yil 9-apreldagi 05-5-7-son topshirigʻi hamda Oʻzbekiston Respublikasi Moliya vazirligining 2015-yil 10-sentabrdagi MM/15-04-34-26/104-1355-son xati ijrosini taʼminlash maqsadida, “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasini qoʻllab qaror qilaman:

1. Oʻzbekiston Respublikasi Vazirlar Mahkamasining 2015-yil 9-apreldagi 05-5-7-son topshirigʻi rahbarlik va ijro uchun qabul qilinsin.

2. Oʻzbekiston Respublikasi Moliya vazirligining 2015-yil 10-sentabrdagi MM/15-04-34-26/104-1355-son xatiga muvofiq viloyatda issiq suv hisoblash uskunasi oʻrnatilgan va oʻrnatilmagan markazlashgan issiqlik tarmogʻiga ulangan xonadonlar aholisiga xoʻjalik va sanitariya-gigiyena ehtiyojlari uchun issiqlik energiyasi va issiq suv tayyorlash boʻyicha talab qilinadigan issiqlik energiyasining meʼyorlari ilovaga muvofiq tasdiqlansin.

3. Viloyatda issiqlik taʼminoti korxona rahbarlariga:

Issiqlik taʼminoti korxonalarining takliflariga muvofiq ishlab chiqilgan issiq suv va issiqlik energiyasi tayyorlash boʻyicha talab qilinadigan issiqlik energiyasini viloyat moliya boshqarmasi tomonidan tasdiqlangan meʼyorlaridan kelib chiqqan holda hisobotlarni yuritish vazifalari topshirilsin.

4. Fargʻona (Rahmatov), Quvasoy (Ziyavitdinov), Qoʻqon (Abdullayev) shaharlari hokimliklari issiqlik taʼminoti korxonalarining debitor va kreditor qarzdorliklarini kamaytirish, moliyaviy holatini sogʻlomlashtirish, kuz-qish mavsumida aholini uzluksiz issiqlik energiyasi bilan taʼminlash, issiqlik tizimini rivojlantirish va modernizatsiya ishlarini amalga oshirish yuzasidan tegishli chora-tadbirlarni koʻrsinlar.

5. Ushbu qaror qabul qilinishi munosabati bilan viloyat hokimining 2011-yil 17-yanvardagi “Viloyat aholisiga issiq suv yetkazib berish meʼyorlarini tasdiqlash toʻgʻrisida”gi 8-son qarori oʻz kuchini yoʻqotgan deb hisoblansin.

6. Mazkur qaror “Fargʻona haqiqati” va “Ferganskaya pravda” gazetalarida rasmiy eʼlon qilinsin hamda viloyat hokimligining rasmiy veb-saytiga joylashtirilsin.

7. Belgilab qoʻyilsinki, mazkur qaror ommaviy axborot vositalarida rasmiy eʼlon qilingandan soʻng kuchga kiradi.

8. Mazkur qarorning ijrosini nazorat qilish viloyat hokimining oʻrinbosari O. Axmedov zimmasiga yuklatilsin.