Oʻzbekiston Respublikasi “Prokuratura toʻgʻrisida”gi Qonunining 13-moddasi, “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi Qonunining 15-moddasi va Oʻzbekiston Respublikasi Prezidentining 2006-yil 21-apreldagi PQ-331-sonli “Moliya-iqtisodiy, soliq sohasidagi jinoyatlarga, jinoiy faoliyatdan olingan daromadlarni legallashtirishga qarshi kurashishni kuchaytirish chora-tadbirlari toʻgʻrisida”gi qaroriga asosan buyuraman:

1. Terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyalarini toʻxtatib turish, pul mablagʻlarini yoki boshqa mol-mulkini ishga solmay toʻxtatib qoʻyish, ishga solmay toʻxtatib qoʻyilgan mol-mulkidan foydalanishga ruxsat berish va operatsiyalarini tiklash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.

Mazkur Nizom Oʻzbekiston Respublikasining “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi Qonuni, Oʻzbekiston Respublikasi Prezidentining 2006-yil 21-apreldagi PQ-331-sonli “Moliya-iqtisodiy, soliq sohasidagi jinoyatlarga, jinoiy faoliyatdan olingan daromadlarni legallashtirishga qarshi kurashishni kuchaytirish chora-tadbirlari toʻgʻrisida”gi qarori, Oʻzbekiston Respublikasi Vazirlar Mahkamasining 2004-yil 10-sentabrdagi 424-sonli “BMT Xavfsizlik Kengashi 1540-son (2004) Rezolyutsiyasining bajarilishini tashkil etish chora-tadbirlari toʻgʻrisida”gi va 2009-yil 12-oktabrdagi 272-sonli “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish bilan bogʻliq axborotni taqdim etish tartibini takomillashtirish toʻgʻrisida”gi qarorlariga asosan terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyalarini toʻxtatib turish, pul mablagʻlarini yoki boshqa mol-mulkini ishga solmay toʻxtatib qoʻyish, ishga solmay toʻxtatib qoʻyilgan mol-mulkidan foydalanishga ruxsat berish va operatsiyalarini tiklash, shuningdek, ushbu roʻyxatni tuzish va pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarga yetkazish tartibini belgilaydi.

1. Ushbu Nizomda quyidagi asosiy tushunchalar qoʻllaniladi:

pul mablagʻlarini yoki boshqa mol-mulkni ishga solmay toʻxtatib qoʻyish — pul mablagʻlarini yoki boshqa mol-mulkni oʻtkazishni, konversiyalashni, tasarruf etishni yoxud koʻchirishni taqiqlash;

terrorchilik faoliyatida ishtirok etayotgan yoki ishtirok etishda gumon qilinayotgan shaxs — terrorchilik faoliyatida ishtirok etayotgan yoxud ishtirok etishda gumon qilinayotgan yuridik yoki jismoniy shaxs, terrorchilik faoliyatini amalga oshirayotgan yoxud amalga oshirishda gumon qilinayotgan tashkilotning bevosita yoki bilvosita mulkdori boʻlgan yoxud uni nazorat qilayotgan yuridik yoki jismoniy shaxs, shuningdek, terrorchilik faoliyatida ishtirok etayotgan yoxud ishtirok etishda gumon qilinayotgan jismoniy shaxsning yoxud tashkilotning mulkidagi yoki nazorati ostidagi yuridik shaxs;

ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxs — Oʻzbekiston Respublikasi tomonidan tan olingan, ommaviy qirgʻin qurolini tarqatishini oldini olishga qaratilgan BMT Xavfsizlik Kengashining rezolyutsiyalari hamda boshqa xalqaro-huquqiy hujjatlari bilan belgilangan jismoniy yoki yuridik shaxs;

operatsiyalarni toʻxtatib turish — mijozning pul mablagʻlarini yoki boshqa mol-mulkni koʻchirish, konversiyalash, oʻzga shaxslarga egalik qilish va foydalanish uchun berish, shuningdek yuridik ahamiyatga ega boʻlgan boshqa harakatlarni bajarish toʻgʻrisidagi topshiriqnomalari ijrosini toʻxtatib turish;

BMT Xavfsizlik Kengashining qoʻmitalari tomonidan tuzilgan sanksiyaviy roʻyxatlar — BMT Xavfsizlik Kengashining qoʻmitalari tomonidan tuziladigan, shu jumladan 1267/1989/2253 Qoʻmitasining IShID (DAISh) va “Al-Qoida”ga qarshi sanksiyalar yuzasidan, 1988 sanksiyalar Qoʻmitasining (“Tolibon” tashkiloti yuzasidan) qarorlari bilan sanksiyalar qoʻllanilishi belgilangan terrorchilik harakatlari yoki ommaviy qirgʻin qurolini tarqatishga aloqador boʻlgan yuridik va jismoniy shaxslarning roʻyxatlari;

BMT Xavfsizlik Kengashining tegishli rezolyutsiyalari — BMT Xavfsizlik Kengashi tomonidan qabul qilingan terrorizmga qarshi kurashishga qaratilgan rezolyutsiyalar (1267 (1999), 1333 (2000), 1363 (2001), 1373 (2001), 1390 (2002), 1452 (2002), 1455 (2003), 1526 (2004), 1617 (2005), 1730 (2006), 1735 (2006),1822 (2008), 1904 (2009), 1988 (2011), 1989 (2011), 2161 (2014), 2170 (2014), 2178 (2014), 2253 (2015) va ularni rivojlantirishga qaratilgan rezolyutsiyalar) yoki ommaviy qirgʻin qurolini tarqatishga qarshi kurashishga qaratilgan rezolyutsiyalar (1718 (2006), 1737 (2006), 1747 (2007), 1803 (2008), 1874 (2009), 1929 (2010) va ularni rivojlantirishga qaratilgan rezolyutsiyalar);

maxsus vakolatli davlat organi — Oʻzbekiston Respublikasi Bosh prokuraturasi huzuridagi Soliq, valyutaga oid jinoyatlarga va jinoiy daromadlarni legallashtirishga qarshi kurashish departamenti.

2. Oʻzbekiston Respublikasi fuqarolari va yuridik shaxslarga, chet el fuqarolari va yuridik shaxslarga hamda fuqaroligi boʻlmagan shaxslarga Oʻzbekiston Respublikasi hududida terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarga, shuningdek ularning topshirigʻi boʻyicha faoliyat koʻrsatayotgan shaxslarga, bevosita yoki bilvosita pul mablagʻlari yoki boshqa mol-mulkka, moddiy resurslarga, moliyaviy va boshqa xizmatlardan foydalanishga ruxsat berish taqiqlanadi.

3. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar:

operatsiya ishtirokchilarini terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslar bilan solishtirishi;

terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxatiga kiritilgan shaxslarning operatsiyasini kechiktirmasdan va oldindan xabar qilmasdan toʻxtatib turishi, bundan yuridik yoki jismoniy shaxsning hisobvaragʻiga tushgan pul mablagʻlarini hisobga kiritish boʻyicha operatsiyalar mustasno, va (yoki) pul mablagʻlarini yoki boshqa mol-mulkini ishga solmay toʻxtatib qoʻyishi, shuningdek shubhali operatsiya toʻgʻrisida maxsus vakolatli davlat organiga xabar yuborishi shart.

4. Terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning roʻyxati (bundan buyon matnda Roʻyxat deb yuritiladi) terrorizmga, ommaviy qirgʻin qurolini tarqatishga qarshi kurashishni amalga oshiruvchi davlat organlari va Oʻzbekiston Respublikasining boshqa vakolatli organlaridan taqdim etilayotgan maʼlumotlar, shuningdek, chet davlatlarning vakolatli organlari va xalqaro tashkilotlaridan rasmiy kanallar orqali taqdim etilayotgan maʼlumotlar asosida maxsus vakolatli davlat organi tomonidan tuziladi. Roʻyxat va uning shakli maxsus vakolatli davlat organining rahbari tomonidan tasdiqlanadi.

5. Roʻyxat ikkita boʻlimdan iborat boʻladi:

Xalqaro roʻyxat;

Milliy roʻyxat;

Har bir boʻlim ikkita bobga boʻlinadi:

terrorchilik faoliyatida ishtirok etayotgan yoki ishtirok etishda gumon qilinayotgan shaxslar;

ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar.

Boblar ikkita qismga boʻlinadi:

jismoniy shaxslar;

yuridik shaxslar.

“Milliy roʻyxat” boʻlimi hamda uni yangilash uchun kelayotgan maʼlumotlar maxsus vakolatli davlat organi tomonidan Oʻzbekiston Respublikasi Milliy xavfsizlik xizmati bilan oʻzaro kelishib olinadi.

6. Roʻyxatga kiritish uchun quyidagilar asos hisoblanadi:

a) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda aybdor deb topilgan jismoniy shaxsga nisbatan qonuniy kuchga kirgan Oʻzbekiston Respublikasi sudining hukmi;

b) terrorchilik tashkiloti deb topish, uni tugatish yoki faoliyatini Oʻzbekiston Respublikasi hududida taqiqlash toʻgʻrisida qonuniy kuchga kirgan Oʻzbekiston Respublikasi sudining qarori;

v) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda gumon qilinuvchi yoki ayblanuvchi sifatida jinoyat ishi yuzasidan jismoniy shaxsni jalb qilish toʻgʻrisida tergovchi yoki prokurorning qarori;

g) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda ayblash munosabati bilan shaxsni qidiruvga, shu jumladan xalqaro qidiruvga eʼlon qilish;

d) BMT Xavfsizlik Kengashi qoʻmitalari tomonidan tuzilgan sanksion roʻyxatlar yoki BMT Xavfsizlik Kengashining tegishli rezolyutsiyalari;

e) Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida chet davlatlar va xalqaro tashkilotlarning terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning roʻyxatlari;

j) Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda jismoniy shaxs aybdor deb topilgan chet el davlatlarning sud hukmlari, shuningdek, terrorchilik tashkilot deb tan olish, uni tugatish yoki faoliyatini taqiqlash toʻgʻrisida chet el davlatlarining sud qarorlari;

z) terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish toʻgʻrisida Oʻzbekiston Respublikasi tomonidan tan olingan xalqaro shartnomalar yoki oʻzarolik prinsipi asosida chet davlatlar vakolatli organlarining soʻrovlari.

7. Roʻyxatni tuzish uchun Oʻzbekiston Respublikasining terrorizmga qarshi kurashishni amalga oshiruvchi davlat organlari, Bosh prokuratura, Markaziy bank va “Sanoatgeokontexnazorat” davlat inspeksiyasi ushbu Nizomning 6-bandida nazarda tutilgan maʼlumotlarni, ular maʼlum boʻlgandan yoki Roʻyxatga qoʻshish uchun holatlar yuzaga kelgandan boshlab uch ish kuni davomida maxsus vakolatli davlat organiga taqdim etadilar.

Maʼlumotlar qogʻoz yoki elektron koʻrinishdagi hujjat sifatida rasmiylashtiriladi va maxsus vakolatli davlat organiga qoʻlda yoki himoyalangan maxsus aloqa kanallardan foydalangan holda maxsus alohida pochta aloqasi orqali taqdim etiladi.

8. Oʻzbekiston Respublikasining Tashqi ishlar vazirligi BMT Xavfsizlik Kengashi qoʻmitalari tomonidan tuzilgan sanksion roʻyxatlar va BMT Xavfsizlik Kengashining tegishli rezolyutsiyalari toʻgʻrisida, ular rasmiy kanallar orqali kelib tushishiga qarab maxsus vakolatli davlat organini va Oʻzbekiston Respublikasining vakolatli organlarini xabardor qiladi.

9. Terrorchilik yoki ommaviy qirgʻin qurolini tarqatish xususiyatga ega boʻlgan jinoyatlar uchun hukm qilingan Oʻzbekiston Respublikasining fuqarolari hamda terrorchilik tashkilot deb tan olish, uni tugatish yoki faoliyatini taqiqlash toʻgʻrisida sud qarorlari toʻgʻrisidagi maʼlumotlar maxsus vakolatli davlat organi tomonidan tizimli tarzda Oʻzbekiston Respublikasi Oliy sudidan soʻrab olinadi.

10. Roʻyxatga kiritilgan shaxslarni identifikatsiya (verifikatsiya) qilish uchun maxsus vakolatli davlat organiga qoʻshimcha tarzda quyidagi maʼlumotlar (agar mavjud boʻlsa) taqdim qilinadi:

a) yuridik shaxsga nisbatan:

davlat roʻyxatidan oʻtkazilganligi toʻgʻrisidagi guvohnomaning tartib raqami, tashkiliy-huquqiy shakli va faoliyat turi;

soliq toʻlovchining identifikatsion raqami (STIR) va yuridik manzili;

rahbarlar va taʼsischilar (mulkdorlar) toʻgʻrisida maʼlumot (familiyasi, ismi, otasining ismi, tugʻilgan sanasi, yashash manzili);

banklardagi hisob raqamlar va mulk mavjudligi toʻgʻrisidagi maʼlumotlar;

b) jismoniy shaxsga nisbatan:

pasport yoki shaxsni tasdiqlovchi boshqa hujjatning maʼlumotlari;

yashash joyi (roʻyxatdan oʻtish) manzili yoki turish joyi manzili;

tugʻilgan yili va joyi (kun/oy/yil);

soliq toʻlovchining indetifikatsion raqami (STIR);

ish joyi va lavozimi toʻgʻrisidagi maʼlumotlar;

agarda yakka tartibdagi tadbirkor sifatida faoliyatni amalga oshirayotgan boʻlsa — davlat roʻyxatidan oʻtkazilganlik guvohnomasining tartib raqami va faoliyat turi.

11. Agarda taqdim etilgan maʼlumotlar toʻliq boʻlmasa yoki noaniq boʻlsa maxsus vakolatli davlat organi qoʻshimcha maʼlumot olish uchun Oʻzbekiston Respublikasining tegishli vakolatli davlat organiga murojaat qiladi.

Oʻzbekiston Respublikasining tegishli vakolatli davlat organlari yetti ish kuni davomida qoʻshimcha maʼlumotni taqdim etadilar, bundan ushbu maʼlumotni taqdim qilish uchun chet davlatlarning vakolatli organlariga yoki xalqaro tashkilotlarga murojaat qilish zarur boʻlgan holatlar mustasno.

12. Oʻzbekiston Respublikasining tegishli vakolatli davlat organlaridan yoki chet davlatlarning vakolatli organlari va xalqaro tashkilotlardan rasmiy kanallar orqali kelib tushgan maʼlumotlarga asosan, ular kelib tushgan kundan keyingi uch ish kunidan kechiktirmay maxsus vakolatli davlat organi Roʻyxatga oʻzgartirish va qoʻshimchalarni kiritadi.

Roʻyxatga oʻzgartirish va qoʻshimchalar kiritilganda, u har gal yangi tahrirda chiqariladi.

13. Shaxslarni Roʻyxatdan chiqarilishi, ularni Roʻyxatga kiritish uchun maʼlumotlarni taqdim etgan organning murojaatiga koʻra Nizomning 14-bandida nazarda tutilgan asoslar mavjud boʻlganda yoki sudning qaroriga koʻra amalga oshiriladi, bunda shaxsni Roʻyxatdan chiqarilishi faqat rasmiy tasdiqlangan hujjatlar asosida amalga oshiriladi.

Roʻyxatdan chiqarish toʻgʻrisidagi murojaat shaxsni Roʻyxatdan chiqarish uchun asos boʻlgan maʼlumotlar olingan yoki aniqlangan kundan keyingi uch ish kunidan kechiktirmay maxsus vakolatli davlat organiga yuboriladi.

14. Roʻyxatdan chiqarish uchun asoslar quyidagilardan iborat:

a) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda jismoniy shaxsga nisbatan qonuniy kuchga kirgan Oʻzbekiston Respublikasi sudining hukmi bekor qilinishi;

b) terrorchilik tashkilot deb tan olish, uni tugatish yoki faoliyatini Oʻzbekiston Respublikasi hududida taqiqlash toʻgʻrisida qonuniy kuchga kirgan Oʻzbekiston Respublikasi sudi qarorining bekor qilinishi;

v) terrorchilik yoki ommaviy qirgʻin qurolini tarqatish xususiyatga ega boʻlgan jinoyat uchun hukm qilingan jismoniy shaxsning sudlanganlik muddatining oʻtib ketganligi yoki sudlanganlikning olib tashlanishi;

g) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda ayblangan shaxsga nisbatan jinoyat ishi Oʻzbekiston Respublikasi Jinoyat-protsessual kodeksining 83 va 84-moddalarida nazarda tutilgan asoslar bilan tugatilishi;

d) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda ayblash munosabati bilan shaxsning qidiruvi, shu jumladan xalqaro qidiruvining tugatilishi;

e) BMT Xavfsizlik Kengashi qoʻmitasi tomonidan jismoniy yoki yuridik shaxsni sanksion roʻyxatidan chiqarib tashlash toʻgʻrisidagi qaror qabul qilinganligi yoki BMT Xavfsizlik Kengashining tegishli rezolyutsiyasidan chiqarib tashlanganligi haqida rasmiy hujjat;

j) shaxs terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning roʻyxatidan chiqarib tashlanganligi toʻgʻrisida chet davlati yoki xalqaro tashkilotining rasmiy xabari;

z) terrorchilik yoki ommaviy qirgʻin qurolini tarqatish xususiyatga ega boʻlgan jinoyatni sodir etishda jismoniy shaxs aybdor deb topish toʻgʻrisidagi hukmi yoki terrorchilik tashkilot deb tan olish, uni tugatish yoki faoliyatini taqiqlash toʻgʻrisidagi qarorini bekor qilish haqida chet davlat sudining qarori;

i) terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslarning operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish toʻgʻrisidagi chet davlati vakolatli organlarining soʻrovini chaqirib olinishi yoki bekor qilinishi;

k) Oʻzbekiston Respublikasi qonun hujjatlarida belgilangan tartibda tasdiqlangan jismoniy shaxsning vafoti toʻgʻrisidagi maʼlumot.

15. BMT Xavfsizlik Kengashi qoʻmitalari tomonidan tuzilgan sanksion roʻyxatlar yoki BMT Xavfsizlik Kengashining tegishli rezolyutsiyalariga kiritilgan shaxsni Roʻyxatdan chiqarib tashlanishi, BMT Xavfsizlik Kengashining qoʻmitalari va rezolyutsiyalarining tegishli hujjatlarida (boshqaruv prinsiplar) belgilangan tartibda amalga oshiriladi;

BMT Xavfsizlik Kengashi qoʻmitalari tomonidan tuzilgan sanksion roʻyxatlarga asosan Roʻyxatga kiritilgan shaxsning oʻzi, yoki oʻlimidan keyin uning qonuniy vorislari, uni Roʻyxatdan chiqarib tashlash uchun BMT Xavfsizlik Kengashining Rezolyutsiyasi 1904 (2009) bilan taʼsis etilgan Ombudsman Devonxonasiga murojaat qilishadi.

BMT Xavfsizlik Kengashi qoʻmitalari tomonidan tuzilgan sanksion roʻyxatlarga yoki BMT Xavfsizlik Kengashining tegishli rezolyutsiyalariga kiritilgan shaxs vafoti rasmiy tan olinganida Oʻzbekiston Respublikasining vakolatli organlari bu haqda BMT Xavfsizlik Kengashining tegishli qoʻmitasiga xabar yuborish uchun Oʻzbekiston Respublikasi Tashqi ishlar vazirligini tasdiqlovchi hujjatlarni ilova qilgan holda xabardor qiladilar.

16. Roʻyxatga adashib kiritilgan yoki mazkur Nizomning 14-bandiga asosan Roʻyxatdan chiqarib tashlanishi lozim boʻlgan, lekin undan chiqarib tashlanmagan yuridik va jismoniy shaxslar asoslantirilgan ariza bilan maxsus vakolatli davlat organiga murojaat qiladilar.

17. Maxsus vakolatli davlat organi uch ish kunidan kechiktirmasdan arizani koʻrib chiqish uchun Roʻyxatga kiritishga asos boʻlgan maʼlumotni taqdim qilgan Oʻzbekiston Respublikasining tegishli vakolatli organiga yuboradi.

Arizani qabul qilgan organ uni qonunda belgilangan tartibda koʻrib chiqadi va quyidagi asoslantirilgan qarorlardan birini qabul qiladi:

Roʻyxatdan chiqarib tashlash toʻgʻrisida taklif kiritish haqida;

arizani qanoatlantirishni rad etish haqida.

18. Maxsus vakolatli davlat organi tegishli organning qarori kelib tushgan kunidan boshlab uch ish kunidan kechiktirmasdan qabul qilingan qaror haqida arizachini xabardor qiladi.

19. Arizani qanoatlantirishni rad etish haqidagi qarori ustidan shaxs sud tartibida shikoyat qilishga haqli.

20. Yuridik yoki jismoniy shaxs uni Roʻyxatning “Xalqaro roʻyxat” boʻlimiga kiritish toʻgʻrisidagi qarori ustidan shikoyat qilish uchun quyidagi tashkilotlarga murojaat qilishga haqli:

BMT Xavfsizlik Kengashi qoʻmitalari tomonidan tuzilgan sanksion roʻyxatlarga yoki BMT Xavfsizlik Kengashining tegishli rezolyutsiyalariga asosan kiritilgan shaxs BMT Xavfsizlik Kengashining rezolyutsiyasiga 1730 (2006) asosan tuzilgan Aloqa markaziga yoki BMT Xavfsizlik Kengashining rezolyutsiyasiga 1904 (2009) asosan taʼsis etilgan Ombudsman Devonxonasiga;

shaxs, Roʻyxatga chet davlat yoki xalqaro tashkilot terrorchilik faoliyatida yoki ommaviy qirgʻin qurolini tarqatishda ishtirok etayotgan yoki ishtirok etishda gumon qilinayotgan shaxslar roʻyxati asosida kiritilganlik holatida ushbu chet davlatning vakolatli organiga yoki xalqaro tashkilotga;

Roʻyxatga kiritish uchun asos boʻlgan chet davlatining hukm yoki qaror chiqargan yuqori turuvchi sudiga;

Roʻyxatga kiritish uchun asos boʻlgan operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish toʻgʻrisida soʻrovni yuborgan chet davlatining vakolatli organiga.

21. Roʻyxat tuzilib tasdiqlangandan keyin bir ish kunidan kechiktirmasdan maxsus vakolatli davlat organi tomonidan ichki nazorat qoidalarini hamkorlikda tasdiqlagan tegishli nazorat qiluvchi, litsenziyalovchi va roʻyxatdan oʻtkazuvchi organlarga elektron shaklida yetkazib beradi va Roʻyxatni oʻzining veb-saytida joylashtiradi.

Qayd etilgan nazorat qiluvchi, litsenziyalovchi va roʻyxatdan oʻtkazuvchi organlar Roʻyxatni olgandan keyin uni bir ish kunidan kechiktirmasdan pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarga yetkazib beradilar.

22. Roʻyxatga oʻzgartirish va qoʻshimchalar kiritilgan taqdirda maxsus vakolatli davlat organi yangilangan Roʻyxatni bir ish kunidan kechiktirmasdan mazkur Nizomning 21-bandida koʻrsatilgan organlarga yetkazib beradi va oʻzining veb-saytida joylashtiradi. Bunda Roʻyxatdan chiqarib tashlangan shaxslar toʻgʻrisidagi maʼlumotlar alohida Roʻyxatga ilova sifatida rasmiylashtiriladi.

23. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlarda, nazorat qiluvchi, litsenziyalovchi va roʻyxatdan oʻtkazuvchi organlar boʻlmagan holda, ular Roʻyxatni olish uchun mustaqil ravishda maxsus vakolatli davlat organiga murojaat qilishlari yoki maxsus vakolatli davlat organining veb-saytidan koʻchirib olishlari lozim.

Maxsus vakolatli davlat organi pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotdan murojaat olingan kunidan boshlab ikki ish kunidan kechiktirmasdan unga Roʻyxatni taqdim qiladi.

24. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar operatsiyalarni amalga oshirishda ularning ishtirokchilarini Roʻyxat bilan solishtirishlari lozim.

25. Mijoz yoki operatsiya qatnashchilaridan birining barcha identifikatsiya maʼlumotlari Roʻyxatga kiritilgan shaxsning maʼlumotlari bilan toʻliq mos kelgan taqdirda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot bu operatsiyani kechiktirmasdan va oldindan xabar qilmasdan toʻxtatib turadi, bundan yuridik yoki jismoniy shaxsning hisobvaragʻiga tushgan pul mablagʻlarini hisobga kiritish boʻyicha operatsiyalar mustasno, va pul mablagʻlarini yoki boshqa mol-mulkini ishga solmay toʻxtatib qoʻyadi.

Quyidagi holatlarda ham operatsiyani toʻxtatib turish va pul mablagʻlarini yoki boshqa mol-mulkni ishga solmay toʻxtatib qoʻyish lozim:

agarda operatsiya qatnashchilaridan biri Roʻyxatga kiritilgan shaxs nomidan yoki uning topshirigʻiga binoan faoliyat koʻrsatayotgan boʻlsa;

operatsiyani amalga oshirishda foydalanayotgan pul mablagʻlari yoki boshqa mol-mulk toʻliq yoki qisman Roʻyxatga kiritilgan shaxsga tegishli boʻlsa;

operatsiya qatnashchisi — yuridik shaxs Roʻyxatga kiritilgan shaxsning mulkida yoki nazorat ostida boʻlsa.

26. Roʻyxatga kiritilgan shaxsning operatsiyasi toʻxtatib turilganda va (yoki) pul mablagʻlarini yoki boshqa mol-mulkini ishga solmay toʻxtatib qoʻyilganda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot ishga solmay toʻxtatib qoʻyilgan mulkning miqdori koʻrsatilgan holda bu haqda maxsus vakolatli davlat organiga shubhali operatsiya toʻgʻrisida xabar yuborish lozim.

27. Operatsiyalarini tiklash va ishga solmay toʻxtatib qoʻyilgan mol-mulkidan foydalanishga ruxsat berish quyidagi holatlarda amalga oshiriladi:

Shaxs Roʻyxatdan chiqarilganda;

operatsiyasi toʻxtatib turilgan va pul mablagʻlarini yoki boshqa mol-mulkini ishga solmay toʻxtatib qoʻyilgan shaxs Roʻyxatga kiritilgan shaxs bilan bir xildagi identifikatsiya maʼlumotlarga ega boʻlsa (“yanglishish holati”).

28. Operatsiyasi toʻxtatib turilgan va pul mablagʻlarini ishga solmay toʻxtatib qoʻyilgan, Roʻyxatga kiritilgan shaxs bilan bir xildagi identifikatsion maʼlumotlarga ega boʻlgan shaxslar ularni tiklash uchun maxsus vakolatli davlat organiga yozma murojaat yuboradilar.

Murojaatga shaxsning toʻliq identifikatsiya qilish uchun zarur boʻlgan hamda u Roʻyxatga kiritilgan shaxs emasligini tasdiqlovchi hujjat va boshqa maʼlumotlar ilova qilinishi lozim.

29. Maxsus vakolatli davlat organi murojaatni besh ish kuni davomida koʻrib chiqadi va operatsiya ishtirokchisi Roʻyxatga kiritilgan shaxs emasligi, balkim bu shaxs bilan bir xildagi identifikatsiya maʼlumotlarga ega ekanligi tasdiqlansa, bu haqda arizachini va pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotni xabardor qiladi.

Agarda arizachi tomonidan taqdim qilingan maʼlumotlar boʻyicha shaxsni toʻliq identifikatsiya (verifikatsiya) qilish imkoni boʻlmasa, maxsus vakolatli davlat organi murojaat kelib tushgan kundan uch kundan kechiktirmasdan arizachiga asoslantirilgan rad javobini yuboradi.

30. Quyidagi holatlarda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot toʻxtatilgan operatsiyani oʻtkazishni tiklaydi va ishga solmay toʻxtatib qoʻyilgan mol-mulkidan foydalanishga ruxsat beradi:

yangilangan Roʻyxat kelib tushgan kundan uch kundan kechiktirmasdan, agarda shaxs Roʻyxatdan chiqarib tashlangan boʻlsa;

“yanglishish holati” haqida maxsus vakolatli davlat organidan xabarnoma kelib tushgan kunning oʻzida, lekin kelib tushgan kunning keyingi ish kunidan kechiktirmasdan.

31. Quyidagi maqsadlarda Roʻyxatga kiritilgan shaxs bazaviy hayotiy ehtiyojlarini taʼminlash maqsadida ishga solmay toʻxtatib qoʻyilgan mol-mulkidan foydalanishga ruxsat berish uchun pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotga murojaat qilishga haqli:

a) oziq-ovqat mahsulotlari, turar joy ijarasi, kommunal toʻlovlar, dori vositalari, tibbiy xizmat va tibbiyot uchun moʻljallangan buyumlar, soliq, boshqa majburiy va sugʻurta toʻlovlar, oʻrtacha bozor narxi chegarasida advokatlar xizmati va yuridik maslahatlar, bank hisobvaraqlarga xizmat koʻrsatish yoki mulkni saqlash bilan bogʻliq boʻlgan toʻlov va yigʻimlar uchun;

b) favqulotdagi xarajatlar toʻlovlari uchun.

Murojaatga toʻlov maqsadi, summasi, asosi, ishga solmay toʻxtatib qoʻyilgan mol-mulkidan foydalanishga ruxsat berish mulkning turi, pul mablagʻlari yoki boshqa mol-mulk oluvchining rekvizitlari va identifikatsion maʼlumotlari, pul mablagʻlari oluvchining banki toʻgʻrisidagi maʼlumotlar ilova qilinadi.

32. Pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilot murojaat kelgan kundan boshlab bir ish kunidan kechiktirmasdan uni maxsus vakolatli davlat organiga yuboradi.

33. Maxsus vakolatli davlat organi ishga solmay toʻxtatib qoʻyilgan mol-mulkdan foydalanishga ruxsat berish toʻgʻrisidagi murojaat kelgan kundan boshlab ikki ish kunidan kechiktirmasdan uni koʻrib chiqish uchun shaxsni Roʻyxatga kiritish uchun tegishli maʼlumotlarni taqdim etgan organga yuboradi.

Shaxsni Roʻyxatga kiritish uchun tegishli maʼlumotlarni taqdim etgan organ yetti ish kuni davomida murojaatni koʻrib chiqadi va qabul qilingan qaror haqida maxsus vakolatli davlat organini xabardor qiladi, bundan qaror qabul qilish uchun chet davlatlar va xalqaro tashkilotlarning vakolatli organlariga soʻrovlar yuborish zaruriyati boʻlgan holatlar mustasno.

Maxsus vakolatli davlat organi ikki ish kunidan kechiktirmasdan qabul qilingan qaror haqida pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotni xabardor qiladi.

34. Ishga solmay toʻxtatib qoʻyilgan mol-mulkdan foydalanishga ruxsat berish toʻgʻrisidagi murojaat Roʻyxatga kiritilgan shaxsning mulkiga nisbatan boʻlsa, agarda u:

BMT Xavfsizlik Kengashi qoʻmitalari tomonidan tuzilgan sanksion roʻyxatlarga yoki BMT Xavfsizlik Kengashining tegishli rezolyutsiyalariga asosan kiritilgan boʻlsa, maxsus vakolatli davlat organi ikki ish kuni davomida ushbu murojaatni BMT Xavfsizlik Kengashining tegishli qoʻmitasiga yuborish uchun Oʻzbekiston Respublikasi Tashqi ishlar vazirligiga taqdim etadi;

xalqaro shartnoma asosida tan olingan yoki oʻzarolik prinsipi asosida chet davlati vakolatli organining soʻroviga asosan kiritilgan boʻlsa, maxsus vakolatli davlat organi ikki ish kuni davomida soʻrov yuborgan chet davlati vakolatli organiga murojaat olganligi haqida ishga solmay toʻxtatib qoʻyilgan mol-mulkidan foydalanishga ruxsat berish masalasini kelishish toʻgʻrisida xabar yuboradi.

35. BMT Xavfsizlik Kengashi qoʻmitalari tomonidan tuzilgan sanksion roʻyxatlarga yoki BMT Xavfsizlik Kengashining tegishli rezolyutsiyalariga asosan kiritilgan shaxsga:

mazkur Nizomning 31-bandi “a” kichik bandida koʻrsatilgan maqsadlar uchun ishga solmay toʻxtatib qoʻyilgan mol-mulkidan foydalanishga ruxsat, bunday ruxsat olish toʻgʻrisidagi murojaat Oʻzbekiston Respublikasi Tashqi ishlar vazirligi tomonidan BMT Xavfsizlik Kengashining tegishli qoʻmitasiga yetkazilganligi sharti bilan beriladi;

mazkur Nizomning 31-bandi “b” kichik bandida koʻrsatilgan maqsadlar uchun ishga solmay toʻxtatib qoʻyilgan mol-mulkidan foydalanishga ruxsat faqat murojaat BMT Xavfsizlik Kengashining tegishli qoʻmitasining roziligi va diplomatik kanallar orqali tasdiqlovchi hujjatlar olinganda beriladi.

36. Pul mablagʻlari yoki boshqa mol-mulkdan foydalanish ruxsati berilgan pul mablagʻlari yoki boshqa mol-mulk bilan bogʻliq operatsiya, shu jumladan uni oʻtkazishning urinib koʻrishi, pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkiloti tomonidan shubhali deb topiladi va qonun hujjatlarda belgilangan tartibda maxsus vakolatli davlat organiga xabar yuboriladi.

37. Terrorchilik faoliyatida yoki ommaviy qirgʻin qurolini tarqatishda ishtirok etish yoki ishtirok etishda gumon qilish bilan bogʻliq, sanksiyalar ostiga tushayotgan shaxslarning operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish toʻgʻrisidagi xalqaro tashkilot yoki chet davlati vakolatli organining soʻrovi diplomatik kanallar orqali kelib tushgan taqdirda Oʻzbekiston Respublikasi Tashqi ishlar vazirligi uch ish kuni davomida hujjatlarni maxsus vakolatli davlat organiga yuboradi.

Xalqaro tashkilot yoki chet davlati vakolatli organining soʻrovi quyidagilardan iborat boʻlishi lozim:

shaxsning terrorchilik faoliyati yoki ommaviy qirgʻin qurolini tarqatishga aloqadorligi haqida batafsil maʼlumotlar, shu jumladan BMT Xavfsizlik Kengashining rezolyutsiyalarida belgilangan sanksiyalarni qoʻllash uchun asos boʻlgan mezonlarga toʻgʻri kelishi haqida;

jismoniy va yuridik shaxslar uchun mazkur Nizomning 10-bandida nazarda tutilgan maʼlumotlar;

operatsiyani toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish haqida soʻrov yuborilganligi holatini oshkor qilishga rozilik berish.

38. Maxsus vakolatli davlat organi kelib tushgan xalqaro tashkilot yoki chet davlati vakolatli organining soʻrovini ikki ish kuni davomida koʻrib chiqadi va natijasi boʻycha shaxsni Roʻyxatga qoʻshish yoki Roʻyxatga qoʻshishni rad etish toʻgʻrisida qaror chiqaradi.

39. Agarda pul mablagʻlarini yoki boshqa mol-mulkni ishga solmay toʻxtatib qoʻyish haqida soʻrovning ijrosi maxsus vakolatli davlat organining vakolatiga kirmaydigan boʻlsa, u Oʻzbekiston Respublikasi Tashqi ishlar vazirligini xabardor qilgan holda soʻrovni bajarish vakolatiga ega boʻlgan Oʻzbekiston Respublikasining tegishli davlat organiga yuboradi.

40. Soʻrovni bajarish imkoni boʻlmagan taqdirda, maʼlumot va hujjatlar soʻrov ijrosiga toʻsqinlik qiluvchi sabablar koʻrsatilgan holda diplomatik kanallar orqali soʻrov tashabbuskoriga qaytariladi.

41. Soʻrov Oʻzbekiston Respublikasi qonunchiligiga zid boʻlsa yoki uning ijrosi Oʻzbekiston Respublikasining suvereniteti yoki xavfsizligiga zarar keltirishi mumkin boʻlsa u ijrosiz qaytariladi.

42. Terrorchilik faoliyatida yoki ommaviy qirgʻin qurolini tarqatishda ishtirok etish yoki ishtirok etishda gumon qilish bilan bogʻliq boʻlgan sanksiyalar ostiga tushayotgan shaxslarga nisbatan Oʻzbekiston Respublikasi vakolatli organlarining soʻrovlari Oʻzbekiston Respublikasi Tashqi ishlar vazirligining diplomatik kanallari orqali xalqaro tashkilotlarga yoki chet davlatlarining vakolatli organlariga yuboriladi.

43. Terrorizmga qarshi kurashishni amalga oshiruvchi davlat organlari tomonidan BMT Xavfsizlik Kengashining qoʻmitalari tomonidan tuziladigan sanksion roʻyxatlarga kiritilishi lozim boʻlgan shaxsga nisbatan maʼlumotlar aniqlansa yoki olinsa, BMT Xavfsizlik Kengashining tegishli qoʻmitasiga koʻrib chiqishga yuborish uchun Oʻzbekiston Respublikasi Tashqi ishlar vazirligiga taqdim qilinadi, bunda bu maʼlumotlar Oʻzbekiston Respublikasi Milliy xavfsizlik xizmati bilan kelishilgan boʻlishi lozim.

44. Oʻzbekiston Respublikasi Tashqi ishlar vazirligiga yuboriladigan mazkur Nizomning 43-bandida nazarda tutilgan maʼlumotlar oʻz ichiga shaxsni BMT Xavfsizlik Kengashining rezolyutsiyalarida belgilangan, BMT Xavfsizlik Kengashi qoʻmitalarining sanksion roʻyxatlariga kiritish uchun asos boʻluvchi mezonlarga toʻgʻri keladigan imkoni boricha koʻproq maʼlumotlarni hamda jismoniy va yuridik shaxslarning identifikatsion maʼlumotlarini, shu jumladan BMT Xavfsizlik Kengashi qoʻmitalari tomonidan tasdiqlangan toʻldirilgan shakllarni oʻz ichiga olishi lozim.

45. Maxsus vakolatli davlat organi tegishli nazorat qiluvchi, litsenziyalovchi va roʻyxatdan oʻtkazuvchi organlar bilan hamkorlikda pul mablagʻlari yoki boshqa mol-mulk bilan bogʻliq operatsiyalarni amalga oshiruvchi tashkilotlar tomonidan mazkur Nizom talablariga rioya etilishi ustidan monitoring va nazoratni amalga oshiradi.

46. Operatsiyalarni toʻxtatib turish va (yoki) pul mablagʻlarini yoki boshqa mol-mulkni ishga solmay toʻxtatib qoʻyish natijasida zarar koʻrgan jismoniy va yuridik shaxslar, mulkni ishga solmay toʻxtatib qoʻyish qarori qoʻllanilgan shaxsga nisbatan mulkiy zararni qoplash daʼvosi bilan sudga murojaat qilishga haqli.

47. Mazkur Nizom talablari buzilishida aybdor boʻlgan shaxslar qonun hujjatlariga muvofiq javobgar boʻladilar.

48. Mazkur Nizom Oʻzbekiston Respublikasi Milliy xavfsizlik xizmati, Markaziy banki, Tashqi ishlar vazirligi, Moliya vazirligi, Adliya vazirligi, Ichki ishlar vazirligi, Axborot texnologiyalari va kommunikatsiyalarini rivojlantirish vazirligi, Mudofaa vazirligi, Favqulodda vaziyatlar vazirligi, Tashqi iqtisodiy aloqalar, investitsiyalar va savdo vazirligi, Xususiylashtirish, monopoliyadan chiqarish va raqobatni rivojlantirish davlat qoʻmitasi, Davlat soliq qoʻmitasi, Davlat bojxona qoʻmitasi, Davlat statistika qoʻmitasi, “Sanoatgeokontexnazorat” davlat inspeksiyasi va Davlat raqobat qoʻmitasi huzuridagi Qimmatli qogʻozlar bozorini muvofiqlashtirish va rivojlantirish markazi bilan kelishilgan.