Oʻzbekiston Respublikasi Oliy Majlisi Senatining 2013-yil 12-dekabrdagi “Oʻzbekiston Respublikasining 2013-yilgi Davlat budjeti toʻgʻrisida”gi SQ-399-II-sonli qarorining ijrosini taʼminlash hamda Oʻzbekiston Respublikasining “Mahalliy davlat hokimiyati toʻgʻrisida”gi Qonuniga asosan xalq deputatlari Surxondaryo viloyat Kengashi qaror qiladi:

1. Oliy Majlisi Senatining ushbu qarori bilan Oʻzbekiston Respublikasining 2014-yilgi Davlat budjeti, budjet taqchilligining eng yuqori darajasi yalpi ichki mahsulot hajmiga nisbatan 1,0 foiz miqdori belgilanligi maʼlumot uchun qabul qilinsin.

2. Surxondaryo viloyatining 2014-yil mahalliy budjeti 2014-yilgi daromadlari 581 650,0 mln soʻm, xarajatlari 1 224 990,0 mln soʻm va respublika budjetidan olinadigan maqsadli subvensiyalar 618 393,5 mln soʻm hamda respublika budjetidan mahalliy budjetga oʻtkazilib beriladigan daromad 24 946,4 mln soʻm miqdorida 1 va 2-ilovalarga* muvofiq tasdiqlansin.

3. Surxondaryo viloyati hokimligi:

iqtisodiyotni yanada liberallashtirish yuzasidan iqtisodiy va moliyaviy barqarorlikni taʼminlashni, aholining daromadlar darajasini va turmush farovonligini oshirishga, ijtimoiy dasturlar ustuvor tarzda moliyalashtirilishini va budjet mablagʻlari iqtisod qilinishini taʼminlasin;

iqtisodiyot va aholi zimmasidagi mahalliy soliq yukini izchillik bilan kamaytirish borasidagi ishlarni davom ettirsin, xoʻjalik yurituvchi subyektlarning ishchanlik faolligini oshirishga, korxonalarning iqtisodiy mustaqilligini, eng avvalo, olingan daromadlarni tasarruf etish masalalaridagi mustaqilligini kengaytirishga koʻmaklashadigan chora-tadbirlar qabul qilinsin;

ijtimoiy sohaga qilinadigan davlat xarajatlarining, shu jumladan taʼlimni rivojlantirish, tibbiy xizmatlar sifatini yaxshilash, ijtimoiy infratuzilmani rivojlanishi xarajatlarini yanada kuchaytirish yoʻli bilan aholi turmush farovonligini oshirish boʻyicha choralarni roʻyobga chiqarishni davom ettirsin;

mamlakatda ishlab chiqarilayotgan tovarlar va koʻrsatilayotgan xizmatlarning ichki hamda tashqi bozorlarda raqobatbardoshligini taʼminlash maqsadida iqtisodiyotda yangi yuqori texnologiyali korxonalar va ishlab chiqarishlar ildam rivojlantirilishini taʼminlashga, ishlab turgan quvvatlarni modernizatsiyalash va texnik yangilash jarayonlarini tezlashtirishga qaratilgan tarkibiy oʻzgartirishlar dasturlarini amalga oshirishni, ishbilarmonlik muhitini hamda xoʻjalik yurituvchi subyektlarning moliyaviy barqarorligini tubdan yaxshilashni davom ettirsin;

budjet mablagʻlaridan va budjetdan tashqari mablagʻlarning maqsadli, manzilli va samarali foydalanishi ustidan qatʼiy nazoratni taʼminlash maqsadida Oʻzbekiston Respublikasi Davlat budjetining gʻazna ijrosi tizimini takomillashtirish boʻyicha davlat xaridlari jarayonini tartibga soladigan, davlat xaridlarini joylashtirishda oshkoralikni, ochiq-oydinlikni taʼminlashga hamda raqobat muhitini qoʻllab-quvvatlashga qaratilgan normativ-huquqiy hujjatlar bilan belgilangan vazifalarning ijrosini soʻzsiz taʼminlasin;

soliq-budjet qonunchiligining mohiyatini, ahamiyatini hamda mexanizmlarini barcha soliq toʻlovchilar va budjetdan mablagʻ oluvchilar eʼtiboriga yetkazish yuzasidan seminarlar hamda boshqa turdagi tushuntirish ishlarini muntazam ravishda olib borishni tashkillashtirsin.

4. Shahar va tumanlar hokimliklari budjetga toʻlovlar toʻliq undirilishini, xarajatlarning mahalliy budjetlardan oʻz vaqtida moliyalashtirilishini taʼminlasinlar va budjet mablagʻlaridan samarali foydalanish ustidan qatʼiy va taʼsirchan nazorat oʻrnatsinlar.

5. Ushbu qarorning bajarilishini nazorat qilish xalq deputatlari viloyat Kengashining mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari boʻyicha doimiy komissiyasi (I. Yoqubov) zimmasiga yuklatilsin.