Oʻzbekiston Respublikasining “Yoʻl harakati xavfsizligi toʻgʻrisida”gi Qonunining (Oʻzbekiston Respublikasi Oliy Majlisining Axborotnomasi, 1999-y., 9-son) 13-moddasi, Oʻzbekiston Respublikasi Vazirlar Mahkamasining 2003-yil 31-yanvardagi 54-sonli qarori bilan tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisida”gi nizomiga (Oʻzbekiston Respublikasi qonun hujjatlari toʻplami, 2003-y., 1-2-son, 17-modda) muvofiq transport vositalarining 2014-yilda majburiy texnik koʻrigini tashkil qilish va uni oʻtkazishni taʼminlash maqsadida, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6-moddasiga (Oʻzbekiston Respublikasi Oliy Kengashining Axborotnomasi, 1993-y., 9-son, 320-modda) asosan qaror qilaman:

1. Tuman ichki ishlar boʻlimining avtotransport vositalarining texnik holati, ulardan foydalanish qoida va meʼyorlariga amal qilishning nazorati boʻyicha boʻlinmasi tuman hududidagi transport vositalarini majburiy texnik koʻrikdan oʻtkazish ishlarini tashkillashtirsin.

2. Tumanda transport vositalari quyidagi davriylikka muvofiq texnik koʻrikdan oʻtkazilishi belgilansin:

a) tijorat asosida yoʻlovchilar tashish uchun foydalaniladigan yengil avtomobillar, avtobuslar, trolleybuslar, tramvaylar va oʻtiriladigan joylar soni 8 ta va undan ortiq boʻlgan (haydovchining oʻrnidan tashqari), odamlarni muntazam tashish uchun jihozlangan yuk avtomobillari, yirik gabaritli, ogʻir vaznli va xavfli yuklarni tashish uchun maxsus transport vositalari va ularga tirkamalar — bir yilda ikki marta;

b) ishlab chiqarilganligiga besh yildan koʻp boʻlmagan (ishlab chiqarilgan yili ham shu jumlaga kiradi) transport vositalari (mazkur bandning “a” kichik bandida koʻrsatilgan transport vositalaridan tashqari) — ikki yilda bir marta;

v) ishlab chiqarilgan yilini hisobga olgan holda ishlab chiqarilganligiga besh yildan ortiq boʻlgan transport vositalari, shuningdek ishlab chiqarilgan vaqti aniqlanmagan transport vositalari (mazkur bandning “a” kichik bandida koʻrsatilgan transport vositalaridan tashqari) — bir yilda bir marta;

g) tirkamalar koʻrikka transport vositasi — shatakchi uchun belgilangan muddatlarda taqdim etiladi.

DYHXX organlarida roʻyxatdan oʻtkazilgan kundan boshlab ulardan foydalanishning birinchi yili mobaynida transport vositalari texnik koʻrikdan oʻtkazilmaydi (mazkur bandning “a” kichik bandida koʻrsatilganlardan tashqari).

3. Mazkur qarorning 2-bandi “a” kichik bandida koʻrsatilgan transport vositalarining texnik koʻrigi:

birinchi marta — 1-martdan 30-iyungacha;

ikkinchi marta — 1-sentabrdan 31-oktabrgacha oʻtkaziladi.

Yuridik shaxslarga qarashli boʻlgan transport vositalarining texnik koʻrigi 1-martdan 30-iyunga qadar oʻtkaziladi.

Jismoniy shaxslarga qarashli boʻlgan transport vositalarining texnik koʻrigi 1-yanvardan 31-avgustga qadar oʻtkaziladi.

4. Korxona, tashkilot va muassasalardagi avtotransport vositalarini 2014-yilgi texnik koʻrigini oʻtkazish boʻyicha komissiya tarkibi 1-ilovaga muvofiq tasdiqlansin.

5. Korxona, tashkilot va muassasalardagi avtotransport vositalarini 2014-yilgi texnik koʻrigini oʻtkazish jadvali 2-ilovaga* muvofiq tasdiqlansin.

6. Tuman hokimining birinchi oʻrinbosari M. Gʻulomqodirov va Toshkent viloyati hokimligining Yoʻlovchi transportining barcha turlari harakatini litsenziyalash va muvofiqlashtirish departamenti Oʻrtachirchiq tuman vakiliga:

2014-yil 1-fevralga qadar yoʻllarda harakat xavfsizligini taʼminlash komissiyalari bilan hamkorlikda, yuridik shaxslar rahbarlarini jalb qilgan holda transport vositalarini majburiy texnik koʻrikka tayyorlash hamda uni oʻtkazish chora-tadbirlarini ishlab chiqsin va amalga oshirilishi ustidan nazorat oʻrnatsin;

transport vositalarini majburiy texnik koʻrikdan oʻtkazish ishlarining samaradorligini oshirish maqsadida tuman ichki ishlar boʻlimi — “Avtomototransport vositalarining texnik holati, ulardan foydalanish qoida va meʼyorlariga amal qilinishining nazorati boʻyicha boʻlinmasi”, mudofaa ishlari boʻyicha tuman boʻlimi vakillari va yuridik shaxslarning muhandis-texnik xodimlaridan iborat ishchi guruhlar tuzsin;

tuman ichki ishlar boʻlimi “Avtomototransport vositalarining texnik holati, ulardan foydalanish qoida va meʼyorlariga amal qilinishining nazorati boʻyicha boʻlinmasi” bilan birgalikda faoliyati tugatilgan, mulkchilik shaklidan qati nazar, korxona va tashkilotlar tasarrufida boʻlgan transport vositalarini, tirkamalarini, yarim tirkamalarini aniqlash hamda ularni belgilangan tartibda hisobdan chiqarish choralarini koʻrsin.

7. Oʻzbekiston Respublikasi Prezidentining 2006-yil 28-fevraldagi 294-sonli “Toshkent shahri va Toshkent viloyatida yoʻlovchilar tashish xavfsizligini taʼminlashga oid qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2006-y., 9-son, 64-modda) hamda Oʻzbekiston Respublikasi Vazirlar Mahkamasining 2003-yil 4-noyabrdagi 482-sonli “Oʻzbekiston Respublikasida avtomobil transportida yoʻlovchilar va bagaj tashish qoidalarini hamda avtobuslarda yoʻlovchilar tashish xavfsizligini taʼminlashga doir tadbirlarni tasdiqlash haqida”gi qarorlari (Oʻzbekiston Respublikasi qonun hujjatlari toʻplamlari, 2003-y., 21-son, 204-modda) talablari ijrosini taʼminlash, yoʻlovchilarga samarali transport xizmati hamda ularning xavfsizligini taʼminlash maqsadida tumandagi barcha tijorat asosida yoʻlovchi tashish bilan shugʻullanuvchi yuridik shaxslar tasarrufidagi ishlab chiqarilgan yilidan qati nazar, barcha turdagi avtobus va kichik avtobuslarning majburiy koʻrigi Olmaliq shahridagi 1-sonli diagnostika tarmogʻida oʻtkazilishini tashkillashtirsin;

8. Tuman ichki ishlar boʻlimining tegishli xizmatlari xodimlari jamoatchilik vakillari bilan hamkorlikda jismoniy va yuridik shaxslarga qarashli boʻlgan avtomototransport vositalarini toʻliq majburiy texnik koʻrikdan oʻtkazilishini taʼminlasin.

9. Transport vositalarini majburiy texnik koʻrikdan oʻtkazish jadvaliga asosan avtobus va kichik avtobuslarni majburiy texnik koʻrikka tayyorlash va taqdim etish yuridik shaxslar rahbarlari va jismoniy shaxslar tomonidan amalga oshirilsin.

10. Oʻrnatilgan tartibda majburiy texnik koʻrikdan oʻtmagan avtobus va kichik avtobuslardan foydalanish taqiqlansin.

11. Mulkchilik shaklidan qati nazar, korxona, muassasa va tashkilot rahbarlari majburiy texnik koʻrik boshlanishidan kamida 10 kun oldin viloyat Yoʻl harakati xavfsizligi xizmati boshqarmasining tumanlararo roʻyxatlash va imtihon olish boʻlinmasiga (TRIB) mavjud transport vositalari haqidagi maʼlumotlarni taqqoslash uchun taqdim etsinlar va ularga texnik koʻrik hamda ekologik talon uchun belgilangan toʻlovlarni oʻz vaqtida toʻlashni taʼminlash lozimligi koʻrsatib oʻtilsin.

12. “Oʻzagrosugʻurta” Davlat aksiyadorlik kompaniyasi tuman boʻlimi, tuman ichki ishlar boʻlimi — “Avtomototransport vositalarining texnik holati, ulardan foydalanish qoida va meʼyorlariga amal qilinishining nazorati boʻyicha boʻlinmasi” (K. Isakov) bilan hamkorlikda majburiy transport vositasi sugʻurtasi toʻlovlarini qonun hujjatlarida belgilangan tartibda undirish choralarini koʻrsin.

13. Tuman “Mashʼal” gazetasi (T. Xakimov)ga:

transport vositalarini majburiy texnik koʻrikdan oʻtkazish yoʻl harakati xavfsizligini taʼminlashning asosiy garovi ekanligini targʻib qilib borish tavsiya etilsin.

14. Oʻrtachirchiq tumani hokimining 2013-yil 10-maydagi 223-sonli “2013-yilda tuman hududida transport vositalarini texnik koʻrigini tashkil etish va uni oʻtkazish toʻgʻrisida”gi qarori oʻz kuchini yoʻqotgan deb hisoblansin.

15. Mazkur qaror rasman eʼlon qilingan kundan eʼtiboran kuchga kiradi.

16. Ushbu qaror ijrosini nazorat qilish tuman hokimining birinchi oʻrinbosari M. Gʻulomqodirov zimmasiga yuklatilsin.