Oʻzbekiston Respublikasi Vazirlar Mahkamasining 2003-yil 31-yanvardagi 54-son qarori bilan tasdiqlangan “Transport vositalarini majburiy texnik koʻrikdan oʻtkazish toʻgʻrisidagi nizomni tasdiqlash haqida”gi qarori ijrosini taʼminlash hamda 2014-yilda tuman hududidagi yuridik va jismoniy shaxslarga tegishli boʻlgan avtomototransport vositalarini majburiy texnik koʻrikdan oʻtkazishni uyushqoqlik bilan, sifatli tashkil etilishini taʼminlash maqsadida qaror qilaman:

1. Tumandagi barcha yuridik va jismoniy shaxslarga, shu jumladan xorijiy yuridik va jismoniy shaxslarga tegishli boʻlgan va belgilangan tartibda Davlat yoʻl harakati xavfsizligi xizmati organlarida roʻyxatdan oʻtkazilgan transport vositalari majburiy texnik koʻrikdan oʻtkazilishi taʼminlansin.

2. Tumandagi avtobuslar, mikroavtobuslar, avtomobillar, motoulov vositalari va tirkama-ulamalarni (keyingi oʻrinlarda matnda “transport vositalari” deb yuritiladi) davlat texnik koʻrigidan oʻtkazish tuman IIB YHXG (B. Berdiyev) va tuman Mudofaa ishlari boʻlimi (A. Baratov)lar zimmasiga yuklatilsin.

3. Mazkur texnik koʻrikdan oʻtkazishda:

mulkchilik shakli va sigʻimidan qatʼi nazar, yoʻlovchi tashish bilan shugʻullanuvchi transport vositalarining majburiy texnik koʻrigi:

birinchi marta 1-martdan 30-iyungacha, ikkinchi marta 1-sentabrdan 31-oktabrgacha oʻtkazilishi tashkillashtirilsin;

tumandagi yuridik shaxslarga qarashli boʻlgan transport vositalarining texnik koʻrigi 1-martdan 30-iyungacha texnik koʻrikdan oʻtkazilsin;

tuman fuqarolariga tegishli boʻlgan barcha turdagi, shaxsiy transport vositalari 1-yanvardan 31-avgustga qadar texnik koʻrikdan oʻtkazilsin.

4. Yuridik va jismoniy shaxslarga tegishli boʻlgan transport vositalarini muddatidan oldin majburiy texnik koʻrikdan oʻtkazish, belgilangan tartibga rioya qilgan holda taqdim qilish mumkin.

5. Texnik koʻrikdan oʻtkazishda:

barcha transport vositalarining texnik holatini tekshirishda ularni tayyorlagan zavod koʻrsatmalariga asosan ishlatilish qoida qoʻllanmalariga har bir harakatlanish qismining talabga javob berishi;

korxona va tashkilot rahbarlaridan yoʻl harakati qoidalarida koʻrsatilganidek transport vositalarini foydalanishini taʼqiqlovchi shartlarga asosan texnik soz holatda taʼminlanishini;

maxsus mashinalar, harakatlanuvchi taʼmirlash va tuzatish ustaxonalarini jihozlanganligiga alohida eʼtibor qaratish topshirilsin.

6. 2014-yilda texnik koʻrikni uyushqoqlik bilan sifatli oʻtkazish maqsadida tuman hokimining majburiy texnik koʻrikni oʻtkazish komissiyasi tuzilsin. Komissiya aʼzolari tarkibi 1-ilovaga muvofiq tasdiqlansin.

7. Tuman IIB YHXG (B. Berdiyev)ga har bir korxona, tashkilot va muassasalarda transport vositalarini texnik koʻrikdan oʻtkazish boʻyicha 2-ilovaga* asosan tasdiqlangan reja jadvalini tashkilotlar rahbarlariga yetkazish hamda oʻz vaqtida bajarilishini taʼminlash:

texnik koʻrikni oʻtkazish sharti boʻyicha tegishli tartibda tuman hokimligi yigʻilishi muhokamasiga kiritish topshirilsin.

8. Tuman Ichki ishlar boʻlimi yoʻl harakati xavfsizligi guruhi katta inspektori serjant (B. Berdiyev), Tuman koʻngilli Avtomotohavaskorlar jamiyati raisi (N. Jumayev), Oʻzbekiston mudofaaga koʻmaklashuvchi “Vatanparvar” tashkiloti (A. Eshboyev), Oʻzbekiston Respublikasi Vazirlar Mahkamasining 2006-yil 2-avgustdagi 156-sonli “Oʻzbekiston Respublikasi avtomototransport vositalarini va shahar elektr transport vositalarini boshqarish huquqini berish, haydovchilarni tayyorlash va qayta tayyorlash tartibini takomillashtirish choralari toʻgʻrisida”gi qaroriga asosan yoʻlovchilar tashish bilan shugʻullanuvchi transport vositalari haydovchilarini bir yilda bir marta 30 soatlik dastur asosida mashgʻulot oʻtishlari uchun shart-sharoitlar yaratgan holda toʻliq jalb etilishini taʼminlasinlar.

9. Tumandagi har bir tashkilot, korxona va muassasa rahbarlari hamda shaxsiy avtomototransport vositalari egalari zimmasiga:

Avtotransport vositalarini texnik hujjatlari bilan birgalikda texnik koʻrikdan oʻtkazish, ularning texnik jihatdan sozligini va oʻz vaqtida reja-jadval asosida koʻrikdan oʻtkazish;

korxona, tashkilot va muassasalar rahbarlariga alohida tartib oʻrnatish va xalq xoʻjaligi hisobida boʻlgan ishga yaroqsiz, tiklanmaydigan va ishlatilmaydigan transport vositalarini hisobdan chiqarish choralarini texnik koʻrikka qadar koʻrib chiqish vazifasi yuklatilsin.

10. Oʻzbekiston Respublikasi Vazirlar Mahkamasining 2003-yil 31-yanvardagi 54-sonli qarori bilan tasdiqlangan “Transport vositalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash haqida”gi qarorining 3-bandi talablaridan kelib chiqib, tuman Ichki ishlar boʻlimi, tuman Mudofaa ishlari boʻlimi transport vositalarini majburiy texnik koʻrikdan oʻtkazishda oʻz yuqori tashkilotlarining qarori va ish rejasi asosida amalga oshirishi nazarda tutilsin.

11. Tumanda avtomobillar, motoulovlar, tirkama-ulamalar hamda shaxsiy avtotransport vositalaridan tushadigan majburiy sugʻurta badalini undirish sugʻurta tashkilotlari rahbarlari zimmasiga yuklatilsin.

12. Ushbu qarorning bajarilishini nazorat qilish tuman hokimining birinchi oʻrinbosari S. Xamrayev zimmasiga yuklatilsin.

13. Mazkur qaror rasman eʼlon qilingan kundan kuchga kiradi.