Tumanda aholini ish bilan taʼminlash va yangi ish oʻrinlari yaratish borasida ishlab chiqilgan aniq va manzilli dasturlar asosida 2013-yilning oʻtgan davrida tumandagi tegishli boʻlim, idora, korxona va tashkilotlar tomonidan yangi ish joylari tashkil etish va aholini bandligini taʼminlash, tadbirkorlik, kichik biznes, kasanachilik va bandlikning boshqa samarali shakllarini rivojlantirish boʻyicha muayyan ishlar amalga oshirildi. Oʻtgan 6 oy davomida iqtisodiyot tarmoqlarida turli moliyaviy manbalar hisobidan jami 5.9 mingta yangi ish oʻrinlari (dasturga nisbatan 108,2 foiz) tashkil etildi.

Tahlillar yangi ish oʻrinlari yaratish yuzasidan yillik dastur parametrlari ortigʻi bilan bajarilishini koʻrsatmoqda.

Endigi asosiy vazifalardan biri 2014-yilda aholining bandligini taʼminlash va yangi ish oʻrinlari yaratish boʻyicha barcha imkoniyatlarni inobatga olgan holda aniq va manzilli dastur ishlab chiqilishini taʼminlashdan iborat.

Oʻzbekiston Respublikasi Prezidenti va Hukumati tomonidan aholini ish bilan taʼminlashni yaxshilash va uning turmush farovonligini oshirish, mamlakatni ijtimoiy-iqtisodiy rivojlantirishning eng muhim ustuvor yoʻnalishlaridan biri qilib belgilab berilgan.

Aholini ish bilan taʼminlash va yangi ish oʻrinlari yaratish 2014-yilda ham eng ustuvor masalalardan biri boʻlishini chuqur his qilgan holda tumandagi korxona va tashkilotlar, fuqarolarning oʻzini oʻzi boshqarish organlari bilan hamkorlikda tumanda 2014-yilda aholi bandligini taʼminlash va yangi ish oʻrinlari yaratish dasturining loyihasini ishlab chiqish boʻyicha tuman hokimi boshchiligida tashkil etilgan ishchi guruhlari ish olib bormoqda.

Ishchi guruhlari tomonidan har bir fuqarolarning oʻzini oʻzi boshqarish organlari va aholi punktlaridagi mavjud imkoniyatlar, bundan tashqari joylarni ijtimoiy-iqtisodiy rivojlantirish dasturlariga kiritilgan obyektlar hamda tadbirkorlik subyektlarining rejalari inobatga olinib, fuqarolarning oʻzini oʻzi boshqarish organlari kesimida aniq va manzilli dasturlar tayyorlanayapti. Shuningdek, moliyaviy mablagʻ miqdori va manbalari ham aniq hisob-kitob qilinmoqda.

Bundan tashqari, ijtimoiy obyektlarini foydalanishga topshirish, iqtisodiyot tarmoqlarini modernizatsiyalash, texnik va texnologik qayta jihozlash dasturlari, hududiy investitsiya dasturi, ijtimoiy-iqtisodiy va industrial rivojlantirish hududiy dasturlari, qishloq xoʻjaligida ishlab chiqarishni modernizatsiyalash, oziq-ovqat tovarlari ishlab chiqarishni kengaytirish dasturlari va boshqa yangi ish oʻrinlari yaratish koʻzda tutilgan dasturlardagi koʻrsatkichlar ham olib chiqilib ish oʻrinlari yaratish dasturiga kiritildi.

Shuningdek, tumandagi tijorat banklari boʻlinmalarining kredit portfelidan kelib chiqib aholiga va tadbirkorlik subyektlariga beradigan imtiyozli kreditlar hisobiga yaratiladigan ish oʻrinlari ham inobatga olinmoqda.

Tumanda 2012 — 2015-yillarga moʻljallangan dasturning soʻzsiz bajarilishini taʼminlash borasida amalga oshirilayotgan ishlarning samaradorligiga erishish, aholi bandligini va yangi ish oʻrinlarini yaratishni taʼminlash maqsadida va Oʻzbekiston Respublikasi “Aholini ish bilan taʼminlash toʻgʻrisida”gi Qonunining 17-moddasi hamda “Mahalliy davlat hokimiyati toʻgʻrisida”gi Qonunining 24-moddasiga binoan Xalq deputatlari tuman Kengashi qaror qiladi:

1. 2014-yil davomida tumanda yaratiladigan yangi ish oʻrinlarining parametrlari 1-ilovaga va tuman ishchi guruhi 2-ilovaga muvofiq tasdiqlansin.

2. Tuman Ishchi komissiyasi tomonidan 2014-yilda yangi ish joylari yaratish hududiy dasturlari parametrlari Oʻzbekiston Respublikasi Prezidentining 2008-yil 28-noyabrdagi PF–4058-sonli Farmoni (Oʻzbekiston Respublikasi qonun hujjatlari toʻplami, 2008-y., 49-son, 477-modda) bilan tasdiqlangan moliyaviy inqirozga qarshi kurash choralari doirasida shakllantirilganligi maʼqullansin.

3. Tuman iqtisodiyot boʻlimi (S. Tursunov)ga:

ushbu parametrlar boʻyicha hokimlik bilan kelishgan holda 2014-yilda har bir qishloq va mahalla fuqarolar yigʻinlarida yaratiladigan yangi ish oʻrinlari parametrlarini yana bir marotaba tahlil qilib, tuman hokimligiga taqdim etish;

2014-yilda yangi ish joylari yaratish va aholi bandligini taʼminlash dasturining ijrosi monitoringini yuritishda investitsiya, lokalizatsiya, tarmoqlar, hududlarni, ishlab chiqarish va ijtimoiy infratuzilmani rivojlantirish va boshqa maqsadli dasturlar ijrosiga alohida eʼtibor qaratishi belgilab qoʻyilsin.

4. Tumandagi barcha tijorat banklari rahbarlariga:

yangi kichik biznes subyektlari tashkil etish, xizmat koʻrsatish va servis sohasini rivojlantirish, birinchi navbatda, mehnat bozorida tanglik kuzatilayotgan hududlarda, kichik hajmdagi korxonalar tashkil etishga kreditlar, shu jumladan imtiyozli kreditlar ajratishni 1-ilovaga muvofiq tasdiqlangan dastur koʻrsatkichlari parametrlaridan kelib chiqqan holda ishlab chiqish;

tasdiqlangan reja-grafigiga muvofiq tijorat banklari tomonidan 2014-yilda yangi ish joylari yaratish uchun kreditlarning belgilangan muddatlarda ajratilishini qatʼiy nazoratga olish, mablagʻlar ajratilishini joylarga chiqqan holda hokimlik, tijorat banklari va tadbirkorlar ishtirokida muhokama etib, zarur choralarini koʻrish;

tuman Mikrokreditbank (S. Pulatov) hokimlik bilan birgalikda qishloq joylarda xizmat koʻrsatish va servis obyektlarini ishga tushirish uchun imtiyozli kreditlar ajratish reja-jadvalini ishlab chiqish va amalga oshirish tavsiya etilsin.

5. Savdo-sanoat palatasi tuman boʻlimi (Sh. Xushvaktov) 2014-yilda kichik biznes va xususiy tadbirkorlik subyektlari tomonidan yangi ish joylari tashkil etilishi va aholini ish bilan taʼminlashga keng jalb qilish boʻyicha ishlarni faollashtirsin.

6. Tuman hokimligining majmualari real sektor korxonalarni, ishlab chiqarish va ijtimoiy infrastrukturani qoʻllab-quvvatlash, kichik biznes, xizmat koʻrsatish va servis sohasi, kasanachilikni rivojlantirish hisobiga yangi joylarni koʻpaytirishni 1-ilovaga muvofiq tasdiqlangan dastur koʻrsatkichlari parametrlariga moslashtirsin.

7. Tuman moliya boʻlimi (A. Uzoqov) sugʻurta idoralari bilan birgalikda yirik sugʻurta idoralarining har bir qishloq va mahalla fuqarolar yigʻinlarida filiallari (vakolatxonalari) tarmogʻini kengaytirishning qoʻshimcha chora-tadbirlarini ishlab chiqib, har bir qishloq va mahalla fuqarolar yigʻinlari kesimida 2014-yilda yangidan tashkil etiladigan obyektlarning manzilli roʻyxatlarini tasdiqlasin.

8. Ishchi komissiyasiga:

mavjud korxonalarni kengaytirish va quvvatlarini yangilash yoʻnalishi boʻyicha ish joylari tumanning 2014-yilga moʻljallangan investitsiya va tarmoq dasturlariga muvofiq;

sanoatda kichik korxonalar va mikrofirmalarni tashkil qilish hisobiga barpo etiladigan ish oʻrinlari — Oʻzbekiston Respublikasi Prezidentining 2009-yil 26-yanvardagi PQ-1047-sonli “Oziq-ovqat mahsulotlari ishlab chiqarishni kengaytirish va ichki bozorni toʻldirish yuzasidan qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 5-son, 34-modda; 2011-y., 52-son, 561-modda) qaroriga, tarmoq va hududiy dasturlariga muvofiq;

qurilish-pudrat ishlarini kengaytirish, jumladan uy-joy qurilishi va taʼmirlash yoʻnalishida tashkil qilinadigan ish joylari — Oʻzbekiston Respublikasi Prezidentining 2009-yil 29-yanvardagi PQ-1051-sonli “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 5-son, 38-modda, 52-son, 560-modda; 2011-y., 52-son, 561-modda) qaroriga, tarmoq va hududiy dasturga muvofiq;

ishlab chiqarish va ijtimoiy infratuzilmani rivojlantirish hisobiga tashkil etiladigan ish joylari — Oʻzbekiston Respublikasi Prezidentining 20-yanvardagi PQ-1041-sonli “Ishlab chiqarish va ijtimoiy infratuzilmani yanada rivojlantirish yuzasidan qoʻshimcha chora-tadbirlar toʻgʻrisida”gi (Oʻzbekiston Respublikasi qonun hujjatlari toʻplami, 2009-y., 4-son, 21-modda) qaroriga, tarmoq va hududiy dasturlariga muvofiq;

kichik korxona va mikrofirmalarni tashkil etish, xususiy tadbirkorlikni rivojlantirish, mikrokreditlash tizimini qoʻllab-quvvatlash;

xizmat koʻrsatish va servisni rivojlantirish;

uy mehnatining barcha shakllarini, shu jumladan korxonalar bilan mehnat shartnomalariga binoan kooperatsiya asosida kasanachilikni tashkil etish, milliy hunarmandchilik va oilaviy tadbirkorlikni rivojlantirish;

noqonuniy tarzda tadbirkorlik faoliyati bilan shugʻullanishni oldini olish, ularni rasmiylashtirish va yangidan tadbirkorlik tashkil etish ehtiyojida boʻlgan fuqarolarni har tomonlama qoʻllab-quvvatlash;

ishlamasdan turgan korxonalar faoliyatini tiklash natijasida yaratiladigan (tiklanadigan) ish oʻrinlari tumanda hokimlik huzuridagi tugatish boʻyicha doimiy ishlovchi maxsus komissiya bilan birgalikda moliyaviy sogʻlomlashtirish choralari qoʻllanilgan sharoitda ish joylarini tiklash, ulardagi boʻsh ish joylari va ishlab chiqarish quvvatlaridan foydalanish darajasini oshirish imkoniyati boʻlgan iqtisodiy nochor korxonalar hisobiga shakllantirilishi va qarorlarda belgilab berilgan vazifalarni hayotga izchil tatbiq etish orqali bandlik masalasini hal etishga alohida eʼtibor qaratish;

hududlar, tarmoqlar kesimida, ish oʻrinlari tashkil etish va aholini ish bilan taʼminlash hududiy dasturlarini bajarilishining doimiy monitoringini amalga oshirish va bu boradagi tahliliy maʼlumot hamda hisobotlarni ishchi komissiyasiga taqdim etib borish topshirilsin.

9. Ish guruhiga joylarda qabul qilingan yangi ish oʻrinlari tashkil etish dasturlarini hududlarni ijtimoiy-iqtisodiy rivojlantirish boʻyicha istiqbolli dasturlar bilan mutanosibligini taʼminlash, har chorakda tahlil qilib tegishli oʻzgartirishlarni kiritish hamda muhokama qilib borish vazifasi yuklatilsin.

10. Tuman statistika boʻlimi (F. Turayev) tuman ishchi guruhi bilan birgalikda barcha chora-tadbirlar hisobiga 2014-yil davomida yaratiladigan yangi ish joylarining statistika hisobotlarida toʻliq va sifatli aks ettirilishini taʼminlasin.

11. Tuman boʻyicha 2014-yil davomida yaratiladigan yangi ish oʻrinlari hisobotini umumlashtirish va viloyat Mehnat va aholini ijtimoiy muhofaza qilish bosh boshqarmasiga belgilangan tartibda tasdiqlatib taqdim etish tuman Bandlikka koʻmaklashish va aholini ijtimoiy muhofaza qilish markazi direktori A. Temirovga topshirilsin.

12. Mazkur qarorning ijrosini nazorat qilish Xalq deputatlari tuman Kengashining doimiy komissiyalari raislari zimmasiga yuklatilsin.

13. Mazkur qaror rasman eʼlon qilingan kundan eʼtiboran kuchga kiradi.